Kitãkamɔ ji shi ni awoɔ kɛ hiɛdɔɔ akɛ abaafee nɔ ko loo afeŋ nɔ ko, ni bei pii lɛ, mɔ lɛ tsɛɔ Nyɔŋmɔ akɛ odasefonyo yɛ sane lɛ mli. Abaanyɛ akɛ naabu akã kitã loo aŋma yɛ wolo nɔ.

Mɛi komɛi susuɔ akɛ esaaa akɛ Kristofoi kãa kitã, ejaakɛ Yesu wie akɛ: “Nyɛkakãa kitã kwraa . . . Nyɛhãa nyɛwiemɔ ‘Hɛɛ’ afea hɛɛ, ‘Dabi’ afea dabi, ejaakɛ nɔ fɛɛ nɔ ni tekeɔ enɛɛmɛi lɛ, ejɛ mɔ fɔŋ lɛ mli.” (Mat. 5:33-37) Yesu le akɛ, Mose Mla lɛ bi ni Israelbii lɛ akãmɔ kitãi yɛ shihilɛi komɛi amli, ni Nyɔŋmɔ tsuji anɔkwafoi komɛi hu kãmɔ kitãi. (1 Mo. 14:22, 23; 2 Mo. 22:10, 11) Ele hu akɛ, Yehowa diɛŋtsɛ po kãmɔ kitãi. (Heb. 6:13-17) No hewɔ lɛ, nɔ ni Yesu wie lɛ etsɔɔɔ akɛ esaaa akɛ wɔkãa kitã kɔkɔɔkɔ. Moŋ lɛ, nɔ ni etsɔɔ ji akɛ, jeee sane fɛɛ sane kɛkɛ esa akɛ wɔkã kitã yɛ he. Mɛni hewɔ? Ejaakɛ wɔkã kitã jio, wɔkãaa kitã jio lɛ, Yehowa miikpa gbɛ akɛ wɔbaaye wɔwiemɔ nɔ be fɛɛ be.

No hewɔ lɛ, kɛ́ akɛɛ okã kitã yɛ sane ko he lɛ, mɛni esa akɛ ofee? Klɛŋklɛŋ lɛ, esa akɛ okwɛ akɛ kitã lɛ ni oyaakã lɛ obaanyɛ oye nɔ. Kɛji oyiŋ miifee bo enyɔnyɔɔnyɔ yɛ he lɛ, no lɛ, kaakã kitã lɛ kwraa. Nyɔŋmɔ Wiemɔ lɛ kɛɔ akɛ: “Ehi akɛ owooo shi, moŋ fe nɔ ni obaawo shi ni oyeee nɔ.” (Jaj. 5:5) Nɔ ni ji enyɔ lɛ, susumɔ Biblia mli shishitoo mlai ni kɔɔ kitã lɛ ni oyaakã lɛ he lɛ ahe ni odamɔ ohenilee nɔ okpɛ oyiŋ yɛ he. Naa shishitoo mlai nɛɛ ekomɛi.

Kitãi komɛi eteee shi ewooo Nyɔŋmɔ mlai. Akɛ nɔkwɛmɔnɔ lɛ, kɛ́ Yehowa Odasefoi enyɔ yaabote gbalashihilɛ mli lɛ, amɛkãmɔɔ amɛhe kitã yɛ Nyɔŋmɔ kɛ mɛi ni eba jɛmɛ lɛ ahiɛ. Nuu lɛ kãa kitã akɛ, ebaasumɔ yoo lɛ ni ehiɛ lɛ dɔdɔɔdɔ ni ebu lɛ bei abɔ ni amɛyi enyɔ lɛ fɛɛ amɛkɛaahi shi. Ni yoo lɛ hu kãa kitã akɛ, ebaafee nakai nɔŋŋ ehã nuu lɛ. (Mɛi komɛi yɛ ni jeee wiemɔi nɛɛ tuuntu amɛwie, shi loloolo lɛ amɛkã kitã ko kɛ̃ yɛ Nyɔŋmɔ hiɛ.) No sɛɛ dani amɛbatsɔmɔɔ wu kɛ ŋa, ni Nyɔŋmɔ miikpa gbɛ akɛ amɛbaahi shi akɛ wu kɛ ŋa amɛwala gbii abɔ fɛɛ. (1 Mo. 2:24; 1 Kor. 7:39) Tɔmɔ ko kwraa be he akɛ abaakã kitã nɛɛ, ejaakɛ eteee shi ewooo Nyɔŋmɔ mla ko kwraa.

Kitãi komɛi teɔ shi ewoɔ Nyɔŋmɔ mlai. Akɛ nɔkwɛmɔnɔ lɛ, kɛ́ akɛɛ anɔkwa Kristofonyo ko akɛ ekã kitã akɛ ebaawu ta kɛfã maŋ lɛ he loo ejáŋ Nyɔŋmɔ dɔŋŋ lɛ, efeŋ nakai, ejaakɛ kitã ni tamɔ nakai lɛ teɔ shi ewoɔ Nyɔŋmɔ mlai. Kristofoi ‘fataaa je lɛ he,’ ni no hewɔ lɛ amɛkɛ amɛhe wooo maŋ saji kɛ tai amli.​—Yoh. 15:19; Yes. 2:4; Yak. 1:27.

Kitãi komɛi yɛ ni mɔ baadamɔ lɛ diɛŋtsɛ ehenilee nɔ ekpɛ eyiŋ kɛji ebaakã aloo ekãŋ. Bei komɛi lɛ, ehe miihia ni Kristofonyo asusu nɔ ni Yesu wie akɛ, ‘akɛ Kaisare nibii ahã Kaisare ni akɛ Nyɔŋmɔ nibii ahã Nyɔŋmɔ’ lɛ he jogbaŋŋ koni no aye abua lɛ ni ena kɛji esa akɛ ekã kitã ko aloo esaaa akɛ ekãa.​—Luka 20:25.

 Ŋɔɔ lɛ akɛ, Kristofonyo ko miiŋmala woji anɔ nii koni etsɔ maŋ ko nɔ nyo loo koni ahã lɛ paspɔt, ni ená ele akɛ ebaabi ni ekã kitã dã. Kɛ́ kitã lɛ ni abiɔ ni ekã lɛ baahã eku Nyɔŋmɔ mla ko mli lɛ, no lɛ ehenilee ni ekɛ Biblia lɛ etsɔse lɛ eŋmɛŋ lɛ gbɛ ni ekã nakai kitã lɛ. Shi kɛ́ amralofoi lɛ ŋmɛɔ gbɛ ni atsakeɔ kitã lɛ mli wiemɔi lɛ ekomɛi lɛ, no lɛ, ebaanyɛ efee nakai koni enyɛ ekã kitã lɛ ni ehenilee gbaaa enaa.

Romabii 13:1 lɛ kɛɔ akɛ: “Mɔ fɛɛ mɔ aba ehe shi awo hegbɛi ni yeɔ nɔ lɛ ashishi.” Kristofonyo ko baanyɛ adamɔ shishitoo mla ni yɔɔ ŋmalɛ nɛɛ mli lɛ nɔ emu sane naa akɛ, ejeee tɔmɔ akɛ ebaakã maŋ lɛ kitã kɛji etsake nakai kitã lɛ wiemɔi ni baabi ni eku Nyɔŋmɔ mla ko mli lɛ. Mɛni hewɔ? Ejaakɛ ebaanyɛ emu sane naa akɛ, nɔ ni kitã lɛ biɔ ni efee lɛ ji nɔ ko ni Nyɔŋmɔ biɔ ni efee momo, ni no hewɔ lɛ, naagba ko bɛ he.

Ni kɛ́ abi ni Kristofonyo ko ahiɛ nɔ ko loo efee okadi ko be ni ekãa kitã lɛ hu? No hu mɔ fɛɛ mɔ baadamɔ ehenilee nɔ ekpɛ eyiŋ kɛji ebaafee nakai aloo efeŋ nakai. Blema Romabii kɛ Skitebii lɛ hiɛɔ amɛklantei ni amɛkɛ amɛnyɔŋmɔi ni nyiɛɔ amɛhiɛ kɛyaa ta mli lɛ agbɛ́i kãa kitã akɛ amɛbaaye anɔkwa loo amɛbaaye amɛwiemɔ nɔ. Greekbii lɛ hu woɔ amɛnine nɔ kɛyaa ŋwɛi kɛ́ amɛmiikã kitã. Amɛfeɔ okadi nɛɛ kɛtsɔɔ akɛ, amɛle akɛ mɔ ko yɛ ŋwɛi ni nuɔ nɔ fɛɛ nɔ ni adesai wieɔ, ni naa nɔ fɛɛ nɔ ni adesai feɔ lɛ, ni akɛ, adesai baabu amɛhe akɔntaa amɛhã lɛ.

Yehowa tsuji kɛ maŋ okadi ko ni ajáa, tamɔ aflaŋaa lɛ nɛkɛ, loo maŋ okadi ko ni kɛ amale jamɔ yɔɔ tsakpãa lɛ kãŋ kitã kɔkɔɔkɔ. Shi kɛ́ otee kɔɔtu ni akɛɛ okɛ onine afɔ̃ Biblia lɛ nɔ ni okã kitã akɛ obaawie anɔkwale hu? Obaanyɛ okpɛ oyiŋ akɛ obaafee nakai, ejaakɛ anɔkwafoi ni awie amɛhe yɛ Biblia lɛ mli lɛ ateŋ mɛi komɛi fee okadi be ni amɛkãa kitã lɛ. (1 Mo. 24:2, 3, 9; 47:29-31) Shi ehe miihia ni okai akɛ, kɛ́ okã kitã ni tamɔ nɛkɛ lɛ, belɛ ookã kitã yɛ Nyɔŋmɔ hiɛ akɛ obaawie anɔkwale. No hewɔ lɛ, esa akɛ ofee klalo akɛ, sane fɛɛ sane ni abaabi bo lɛ, obaawie anɔkwale.

Akɛni wɔsumɔŋ ni wɔfite wɔ kɛ Yehowa teŋ hewɔ lɛ, dani wɔbaakã kitã ko lɛ, esa akɛ wɔsɔle ni wɔsusu nakai kitã lɛ he jogbaŋŋ wɔkwɛ akɛ ehãŋ wɔku Biblia mli shishitoo mla ko mli loo wɔfee nɔ ko ni baahã wɔhenilee agba wɔnaa lo. Kɛ́ okã kitã lɛ, no lɛ, bɔ fɛɛ bɔ ni fee lɛ, esa akɛ oye nɔ.​—1 Pet. 2:12.