1-2. Mɛni esa akɛ wɔfee be ni wɔmɛɔ jeŋ hee lɛ?

 EŊƆƆ wɔnaa waa akɛ, Yehowa ewo shi akɛ ebaajie jeŋ fɔŋ nɛɛ kɛya ni ekɛ jalɛ jeŋ hee aba. (2 Pet. 3:13) Eyɛ mli akɛ wɔleee be tuuntu ni jeŋ hee lɛ baaba moŋ, shi nibii ni yaa nɔ yɛ je lɛ mli lɛ fɛɛ tsɔɔ akɛ ebɛŋkɛ kpaakpa.​—Mat. 24:32-34, 36; Bɔf. 1:7.

² Ekɔɔɔ he eko afii abɔ ni wɔkɛhi Yehowa asafo lɛ mli lɛ, esa akɛ wɔ fɛɛ wɔya nɔ wɔfee nibii ni baahã hemɔkɛyeli ni wɔyɔɔ yɛ Yehowa shiwoo nɛɛ mli lɛ mli awa. Mɛni hewɔ? Ejaakɛ kɛ́ wɔhemɔkɛyeli lɛ mli wa tamɔ mɛni po, emli baanyɛ agbɔjɔ. Anɔkwa, bɔfo Paulo tsɛ hemɔkɛyeli ni abɛ lɛ akɛ “esha ni lalaa wɔ oya.” (Heb. 12:1) Bɔ ni afee ni wɔhemɔkɛyeli lɛ mli akagbɔjɔ lɛ, yɛ be kɛ beiaŋ lɛ, esa akɛ wɔsusu nibii ni tsɔɔ akɛ etsɛŋ jeŋ hee lɛ baaba lɛ ahe.​—Heb. 11:1

3. Mɛni he wɔbaasusu yɛ nikasemɔ nɛɛ mli?

³ Yɛ nikasemɔ nɛɛ mli lɛ, wɔbaasusu nibii etɛ ni wɔbaanyɛ wɔfee ni baahã hemɔkɛyeli ni wɔyɔɔ yɛ shi ni Yehowa ewo akɛ jeŋ hee baaba lɛ mli lɛ mli awa lɛ ahe. Nomɛi ji, (1) ni wɔbaajwɛŋ kpɔmɔnɔ lɛ nɔ, (2) ni wɔbaasusu hewalɛ ni Yehowa yɔɔ lɛ he, (3) ni wɔbaafee nibii ni baahã wɔbɛŋkɛ Yehowa kpaakpa. No sɛɛ lɛ, wɔbaasusu bɔ ni sane ni Yehowa kɛɛ Habakuk lɛ baanyɛ ahã wɔhemɔkɛyeli lɛ mli awa ŋmɛnɛ lɛ he. Shi klɛŋklɛŋ lɛ, nyɛhãa wɔkwɛa shihilɛi komɛi ni wɔbaanyɛ wɔkɛkpe ni biɔ ni wɔná hemɔkɛyeli ni mli wa akɛ jeŋ hee lɛ baaba.

 SHIHILƐI NI BIƆ NI WƆNÁ HEMƆKƐYELI NI MLI WA

4. Mɛɛ shihilɛi komɛi wɔkɛkpeɔ ni kɛ́ wɔbɛ hemɔkɛyeli ni mli wa lɛ, wɔnyɛŋ wɔkpɛ wɔyiŋ jogbaŋŋ yɛ he?

⁴ Daa gbi lɛ, wɔkɛ shihilɛi komɛi kpeɔ ni kɛ́ wɔbɛ hemɔkɛyeli ni mli wa lɛ, wɔnyɛŋ wɔkpɛ wɔyiŋ jogbaŋŋ yɛ he. Shihilɛi nɛɛ ekomɛi kɔɔ mɛi ni wɔkɛbɔɔ, nibii ni wɔkɛjieɔ wɔhiɛtserɛ, skulyaa, gbalashihilɛ, bii, kɛ nitsumɔ he. No hewɔ lɛ, wɔbaanyɛ wɔbi wɔhe akɛ: ‘Ani yiŋ ni mikpɛɔ yɛ saji nɛɛ ahe lɛ tsɔɔ akɛ miheɔ miyeɔ akɛ etsɛŋ abaajie jeŋ fɔŋ nɛɛ kɛya ni akɛ jalɛ jeŋ hee lɛ baaba? Aloo yiŋ ni mikpɛɔ lɛ tamɔ yiŋ ni mɛi ni heee amɛyeee akɛ jalɛ jeŋ hee lɛ baaba lɛ kpɛɔ lɛ nɔŋŋ?’ (Mat. 6:19, 20; Luka 12:16-21) Kɛ́ wɔhã hemɔkɛyeli ni wɔyɔɔ akɛ etsɛŋ jeŋ hee lɛ baaba lɛ mli wa lɛ, no baaye abua wɔ ni wɔkpɛ yiŋ kpakpai.

5-6. Mɛni hewɔ esa akɛ wɔná hemɔkɛyeli ni mli wa kɛ́ wɔmiitsɔ shihilɛ ko ni mli wa mli? Okɛ enɛ he nɔkwɛmɔnɔ ahã.

⁵ Agbɛnɛ hu, wɔkɛ naagbai komɛi kpeɔ ni kɛ́ wɔbɛ hemɔkɛyeli ni mli wa lɛ, wɔnyɛŋ wɔdamɔ naa. Ekolɛ abaawa wɔ yi, hela ni naa wa baamɔ wɔ, loo wɔkɛ shihilɛi komɛi ni baanyɛ aje wɔnijiaŋ wui lɛ baakpe. Bei pii lɛ, kɛ́ naagbai nɛɛ je shishi lɛ, wɔtswaa wɔfai shi akɛ wɔbaafi shi. Shi bei komɛi lɛ, naagbai ni tamɔ nɛkɛ lɛ asɛɛ tsɛɔ, ni kɛ́ eba lɛ nakai lɛ, ja wɔyɛ hemɔkɛyeli ni mli wa dani wɔbaanyɛ wɔfi shi ni wɔya nɔ wɔsɔmɔ Yehowa kɛ miishɛɛ.​—Rom. 12:12; 1 Pet. 1:6, 7.

⁶ Kɛ́ wɔmiitsɔ shihilɛ ko ni mli wa mli lɛ, ekolɛ wɔbaanu he akɛ jeŋ hee ni Yehowa ewo he shi lɛ baŋ kɔkɔɔkɔ. Ani no tsɔɔ akɛ wɔhemɔkɛyeli lɛ mli egbɔjɔ? Jeee doo. Hã wɔsusu nɔkwɛmɔnɔ nɛɛ he wɔkwɛ. Kɛ́ nugbɔ nɛ kɛtsara nɔ aahu ni ekpaaa lɛ, ekolɛ wɔbaasusu akɛ hulu etsoŋ da. Shi hulu lɛ tsoɔ kɛ̃. Nakai nɔŋŋ kɛ́ wɔmiitsɔ shihilɛ ko ni wa mli lɛ, ekolɛ wɔnijiaŋ baaje wui ni wɔbaanu he akɛ jeŋ hee lɛ baŋ kɔkɔɔkɔ. Shi kɛ́ wɔyɛ hemɔkɛyeli ni mli wa lɛ, wɔle akɛ Yehowa shiwoi lɛ baaba mli. (Lala 94:3, 14, 15; Heb. 6:17-19) No wajeɔ wɔ koni wɔya nɔ wɔkɛ Yehowa sɔɔmɔ lɛ aye klɛŋklɛŋ gbɛhe yɛ wɔshihilɛ mli.

7. Mɛɛ susumɔ esa akɛ wɔkwɛ jogbaŋŋ ni ekaná wɔnɔ hewalɛ?

⁷ Agbɛnɛ hu, ja wɔyɛ hemɔkɛyeli ni mli wa dani wɔbaanyɛ wɔtsu shiɛmɔ nitsumɔ lɛ. Mɛi ni wɔshiɛɔ “sane kpakpa” lɛ wɔhãa lɛ ateŋ mɛi babaoo heee amɛyeee akɛ shi ni Nyɔŋmɔ ewo akɛ jeŋ hee lɛ baaba lɛ baaba mli. (Mat. 24:14; Eze. 33:32) Ni kɛ́ wɔkwɛɛɛ ni ahi lɛ, susumɔ nɛɛ baanyɛ aná wɔnɔ hewalɛ. Mɛni wɔbaanyɛ wɔfee koni ekaba lɛ nakai? Esa akɛ wɔhã wɔhemɔkɛyeli lɛ mli awa. Nyɛhãa wɔkwɛa nibii etɛ ni kɛ́ wɔfee lɛ ebaahã wɔhemɔkɛyeli lɛ mli awa.

JWƐŊMƆ KPƆMƆNƆ LƐ NƆ

8-9. Kɛ́ wɔjwɛŋ kpɔmɔnɔ lɛ nɔ lɛ, mɛɛ gbɛ nɔ ehãa wɔhemɔkɛyeli lɛ mli waa?

⁸ Nɔ kome ni wɔbaanyɛ wɔfee koni wɔhemɔkɛyeli lɛ mli awa ji, ni wɔbaajwɛŋ kpɔmɔnɔ lɛ nɔ. Kpɔmɔnɔ lɛ ji nɔ ni hãa wɔnáa nɔmimaa akɛ Nyɔŋmɔ shiwoi lɛ baaba mli. Kɛ́ wɔjwɛŋ nɔ hewɔ ni Yehowa kɛ kpɔmɔnɔ lɛ hã, kɛ nɔ mli ni etsɔ dani ekɛhã lɛ nɔ jogbaŋŋ lɛ, ebaahã wɔná hemɔkɛyeli ni mli wa akɛ, shi ni Yehowa ewo akɛ wɔbaahi shi kɛya naanɔ yɛ jeŋ hee ko mli lɛ baaba mli. Mɛni hewɔ wɔkɛɔ nakai?

⁹ Mɛni mli Yehowa tsɔ be ni ekɛ kpɔmɔnɔ lɛ hãa lɛ? Yehowa tsu ekromɔbi ni esumɔɔ lɛ waa lɛ, ni ji enaanyo kpaakpa lɛ kɛjɛ ŋwɛi koni abafɔ lɛ akɛ adesa ni yeɔ emuu yɛ shikpɔŋ lɛ nɔ. Be ni Yesu yɔɔ shikpɔŋ lɛ nɔ lɛ, ekɛ shihilɛi ni mli wawai srɔtoi kpe. Agbɛnɛ hu, apiŋ lɛ ni agbe lɛ musuŋshaa naa. Yehowa nu  he waa be ni ena shihilɛ ni e-Bi lɛ lɛ tsɔɔ mli lɛ. Eji wɔ-Nyɔŋmɔ ni yɔɔ suɔmɔ lɛ miisumɔ ni wɔná shihilɛ kpakpa be kukuoo ko kɛkɛ kulɛ, eŋmɛŋ gbɛ ni apiŋ e-Bi ni esumɔɔ waa lɛ ni agbe lɛ. (Yoh. 3:16; 1 Pet. 1:18, 19) Akɛni Yehowa ŋmɛ gbɛ ni e-Bi ni esumɔɔ waa lɛ bagbo kɛhã wɔ lɛ hewɔ lɛ, bɔ fɛɛ bɔ ni fee lɛ, ebaahã wɔhi shi kɛya naanɔ yɛ jeŋ hee lɛ mli.

SUSUMƆ HEWALƐ NI YEHOWA YƆƆ LƐ HE

10. Yɛ nɔ ni awie yɛ Efesobii 3:20 lɛ naa lɛ, mɛni Yehowa baanyɛ efee?

¹⁰ Nɔ ni ji enyɔ ni wɔbaanyɛ wɔfee koni wɔhemɔkɛyeli lɛ mli awa ji, ni wɔbaasusu hewalɛ ni Yehowa yɔɔ lɛ he. Eyɛ hewalɛ aahu akɛ, ebaanyɛ ehã eshiwoi fɛɛ aba mli. Ŋmɛnɛ lɛ, mɛi pii susuɔ akɛ shi ni Nyɔŋmɔ ewo akɛ wɔbaahi shi kɛya naanɔ yɛ jeŋ hee lɛ mli lɛ nyɛŋ aba mli. Bei pii lɛ, nibii ni Yehowa woɔ shi akɛ ebaafee lɛ, adesai nyɛɛɛ afee. Lɛ ji Ofe lɛ. (Hiob 42:2; Mar. 10:27) No hewɔ lɛ, ebɛ naakpɛɛ akɛ ewoɔ shi akɛ ebaafee nibii ni wɔjwɛŋmɔ shɛɛɛ he.​—Kanemɔ Efesobii 3:20.

11. Tsɔɔmɔ Yehowa shiwoo ko ni yɛ adesai asusumɔ naa lɛ etamɔ nɔ ni enyɛŋ eba mli, shi eba mli. (Kwɛmɔ akrabatsa ni ji “ Yehowa Shiwoi Komɛi Ni Efee Tamɔ Nɔ Ni Enyɛŋ Eba Mli Kɔkɔɔkɔ.”)

¹¹ Hã wɔsusu nibii komɛi ni Yehowa wo etsuji ni hi shi yɛ blema lɛ shi akɛ ebaafee ni yɛ adesai ahiɛ lɛ, etamɔ nɔ ni enyɛŋ eba mli kɔkɔɔkɔ lɛ ahe wɔkwɛa. Ewo Abraham kɛ Sara shi akɛ, ebaahã amɛfɔ binuu yɛ amɛgbɔlɛ beiaŋ. (1 Mo. 17:15-17) Agbɛnɛ hu, ewo Abraham shi akɛ ekɛ Kanaan shikpɔŋ lɛ baahã eseshibii lɛ. Afii pii ni Israelbii lɛ, ni ji Abraham seshibii lɛ, yaye yɛ Ejipt akɛ nyɔji lɛ hewɔ lɛ, efee tamɔ nɔ ni shiwoo nɛɛ nyɛŋ aba mli, shi eba mli pɛpɛɛpɛ. Sɛɛ mli lɛ, Yehowa wie akɛ yoomo ko ni atsɛɔ lɛ Elizabet lɛ baafɔ. Agbɛnɛ hu, ewo oblayoo fro ko ni atsɛɔ lɛ Maria lɛ shi akɛ ebaafɔ binuu, ni ji lɛ Yehowa lɛ diɛŋtsɛ Binuu. Enɛ baahã shi ni Yehowa wo afii akpei abɔ yɛ Eden abɔɔ lɛ mli lɛ aba mli.​—1 Mo. 3:15.

12. Mɛni Yoshua 23:14 kɛ Yesaia 55:10, 11 lɛ hãa wɔleɔ yɛ Yehowa hewalɛ lɛ he?

¹² Kɛ́ wɔjwɛŋ nibii ni Yehowa wo shi yɛ blema akɛ ebaafee ni efee hu lɛ ahe lɛ, ebaahã hemɔkɛyeli ni wɔyɔɔ akɛ Yehowa baahã jeŋ hee lɛ aba lɛ mli awa. (Kanemɔ Yoshua 23:14; Yesaia 55:10, 11.) Enɛ yeɔ ebuaa wɔ ni wɔnyɛɔ wɔtsɔɔ mɛi akɛ, shi ni Yehowa ewo akɛ ekɛ jeŋ hee baaba lɛ jeee adesã ko kɛkɛ. Be ni Yehowa wo shi akɛ ekɛ ŋwɛi hee kɛ shikpɔŋ hee baaba lɛ, ewie kɛfata he akɛ: “Wiemɔi nɛɛ, anɔkwa wiemɔi ni, ni amɛyɛ mli.”​—Kpo. 21:1, 5.

FEEMƆ NIBII NI BAAHÃ OTSI OBƐŊKƐ YEHOWA KPAAKPA

13. Mɛɛ gbɛ nɔ asafoŋ kpeei baanyɛ ahã wɔhemɔkɛyeli lɛ mli awa?

¹³ Nɔ ni ji etɛ ni wɔbaanyɛ wɔfee ni baahã wɔhemɔkɛyeli lɛ mli awa ji, ni wɔbaafee nibii ni baahã wɔbɛŋkɛ Yehowa kpaakpa. Nibii nɛɛ ateŋ ekome ji, asafoŋ kpeei ni wɔbaaya. Te wɔnáa he sɛɛ wɔhãa tɛŋŋ? Nyɛmi yoo ko ni atsɛɔ lɛ Anna ni kɛ ehe ewo be fɛɛ sɔɔmɔ nitsumɔ lɛ fãi srɔtoi amli afii pii lɛ wie akɛ: “Asafoŋ kpeei lɛ hãa mihemɔkɛyeli lɛ mli waa. Kɛ́ mɔ ni tsɔɔ nii lɛ he esako tsɔ loo eewie nibii ni mile momo po ahe lɛ, bei pii lɛ minuɔ nɔ ko ni yeɔ ebuaa mi ni hãa minuɔ Biblia mli sane ko shishi jogbaŋŋ, ni enɛ hãa mihemɔkɛyeli lɛ mli waa.” b Nɔ kroko hu ni wajeɔ wɔhemɔkɛyeli lɛ ji, ni wɔbaabo saji ahetoo ni wɔnyɛmimɛi lɛ hãa lɛ toi jogbaŋŋ.​—Rom. 1:11, 12; 10:17.

14. Mɛɛ gbɛ nɔ shiɛmɔ nitsumɔ lɛ hãa wɔhemɔkɛyeli lɛ mli waa waa?

 ¹⁴ Nɔ kroko ni hãa wɔhemɔkɛyeli lɛ mli waa ji, shiɛmɔ nitsumɔ lɛ. (Heb. 10:23) Nyɛmi yoo ko ni atsɛɔ lɛ Barbara ni kɛ nɔ ni fe afii 70 esɔmɔ Yehowa lɛ wie akɛ: “Minaa shiɛmɔ nitsumɔ lɛ akɛ nitsumɔ ko ni woɔ mihemɔkɛyeli lɛ mli hewalɛ. Kɛ́ migba mɛi nibii ni Yehowa ewo shi akɛ ebaafee lɛ, ehãa mihemɔkɛyeli lɛ mli waa waa.”

15. Mɛɛ gbɛ nɔ aŋkro nikasemɔ hãa wɔhemɔkɛyeli lɛ mli waa? (Kwɛmɔ mfonirii lɛ hu.)

¹⁵ Nɔ kroko hu ni hãa wɔhemɔkɛyeli lɛ mli waa ji, aŋkro nikasemɔ. Nyɛmi yoo ko ni atsɛɔ lɛ Susan lɛ wie akɛ, etoɔ gbɛjianɔ ni ekaseɔ nibii srɔtoi yɛ otsi lɛ mli ni enɛ yeɔ ebuaa lɛ waa. Ewie akɛ: “Daa Hɔgbaa lɛ, mikaseɔ Buu-Mɔɔ lɛ ni abaakase yɛ otsi ni nyiɛ sɛɛ lɛ mli lɛ. Ju kɛ Jufɔ lɛ, mikaseɔ nibii ni abaakase yɛ otsi teŋ kpee lɛ mli lɛ, ni yɛ gbii ni eshwɛ lɛ amli lɛ, mikaseɔ nibii ni mito miyiŋ akɛ makase lɛ fiofio lɛ.” Akɛni Susan folɔɔɔ gbɛjianɔ ni eto ni ekɛkaseɔ nii daa otsi lɛ mli hewɔ lɛ, ehemɔkɛyeli lɛ mli ewa waa. Nyɛmi yoo ko ni atsɛɔ lɛ Irene ni kɛ afii pii esɔmɔ yɛ nitsumɔhe yitso lɛ ena akɛ, Biblia mli gbalɛi ni ekaseɔ lɛ ehã ehemɔkɛyeli lɛ mli ewa waa. Ewie akɛ: “Bɔ ni Yehowa gbalɛi baa mli fitsofitso lɛ hãa minaa kpɛɔ mihe waa.” c

“BƆ FƐƐ BƆ NI FEE LƐ, EBAABA MLI”

16. Mɛni hewɔ wɔbaanyɛ wɔkɛɛ akɛ nɔ ni Yehowa kɛɛ Habakuk lɛ kɔɔ wɔ hu wɔhe ŋmɛnɛ lɛ? (Hebribii 10:36, 37)

¹⁶ Yehowa tsuji komɛi ekpa jeŋ fɔŋ nɛɛ naagbee lɛ gbɛ aahu shi ebako. Mɛi komɛi susuɔ akɛ naagbee lɛ sɛɛ etsɛ tsɔ. Yehowa le bɔ ni etsuji nuɔ he amɛhãa. Enɛ hewɔ lɛ, ekɛɛ gbalɔ Habakuk akɛ: “Ninaa lɛ yɛ hã ebe ni ato lɛ kɛ̃, ni eeye oyai ní eyashɛ enaagbee, ni emaleŋ. Kɛ́ esɛɛ gbala shi po lɛ, yaa nɔ omɛ lɛ! Ejaakɛ bɔ fɛɛ bɔ ni fee lɛ, ebaaba mli. Ekpeŋ sɛɛ!” (Hab. 2:3) Ani Habakuk pɛ hewɔ Yehowa wie nɔ ni  ewie nɛɛ, aloo ekɔɔ wɔ hu wɔhe ŋmɛnɛ? Yehowa kɛ emumɔ krɔŋkrɔŋ lɛ tsirɛ bɔfo Paulo ni etsɛ nakai wiemɔi lɛ ayisɛɛ be ni ekɛ Kristofoi ni mɛɔ jeŋ hee lɛ wieɔ lɛ. (Kanemɔ Hebribii 10:36, 37.) Kɛ́ wɔnu he akɛ shi ni Yehowa ewo akɛ ekɛ jeŋ hee lɛ baaba lɛ sɛɛ miigbala shi lɛ, wɔbaanyɛ wɔná nɔmimaa akɛ “bɔ fɛɛ bɔ ni fee lɛ, ebaaba mli. Ekpeŋ sɛɛ!”

17. Mɛɛ gbɛ nɔ nyɛmi yoo ko kɛ ŋaa ni Yehowa wo Habakuk lɛ tsu nii?

¹⁷ Yehowa tsuji lɛ ateŋ mɛi pii ebo Yehowa ŋaawoo akɛ wɔya nɔ wɔmɛ naagbee lɛ toi, ni mɛi komɛi po efee enɛ afii abɔ. Akɛ nɔkwɛmɔnɔ lɛ, nyɛmi yoo ko ni atsɛɔ lɛ Louise ni bɔi Yehowa sɔɔmɔ yɛ afi 1939 lɛ wie akɛ: “Yɛ nakai be mli lɛ, miyasusu akɛ Harmagedon baaba dani magbe sɛkɛndre skul naa, shi eyabaaa lɛ nakai. Kɛjɛ no sɛɛ kɛbaa nɛɛ, nɔ kome ni eye ebua mi ji, mikaneɔ Yehowa tsuji komɛi ni ehe bahia ni amɛmɛ be kplaŋŋ dani shi ni Yehowa wo amɛ lɛ aba mli lɛ ahe saji. Mɛi nɛɛ ekomɛi ji, Noa, Abraham, kɛ Yosef. Enɛ hewɔ lɛ, miiya nɔ miimɛ naagbee lɛ, ni no ehã hemɔkɛyeli ni mi kɛ minyɛmimɛi krokomɛi yɔɔ akɛ jeŋ hee lɛ ebɛŋkɛ kpaakpa lɛ mli ewa.” Nɛkɛ nɔŋŋ Yehowa tsuji lɛ ateŋ mɛi babaoo ni esɔmɔ Yehowa etsɛ lɛ nuɔ he.

18. Mɛɛ gbɛ nɔ kɛ́ wɔkwɛ nibii ni Yehowa ebɔ lɛ, ebaanyɛ ehã hemɔkɛyeli ni wɔyɔɔ akɛ jeŋ hee lɛ baaba lɛ mli awa?

¹⁸ Lɛɛlɛŋ, jeŋ hee lɛ bako. Shi susumɔ nibii tamɔ ŋulamii, tsei, kooloi, kɛ gbɔmɛi ahe okwɛ. Be ko ni eho lɛ, nibii nɛɛ bɛ, shi bianɛ lɛ fɛɛ eba shihilɛ mli. Mɛni hewɔ? Ejaakɛ Yehowa bɔ amɛ. (1 Mo. 1:1, 26, 27) Nakai nɔŋŋ Yehowa ewo shi akɛ ekɛ jeŋ hee baaba, ni bɔ fɛɛ bɔ ni fee lɛ ebaaye eshiwoo lɛ nɔ. Yɛ jeŋ hee lɛ mli lɛ, adesai baaná gbɔmɔtsoŋ hewalɛ kpakpa ni amɛbaahi shi kɛya naanɔ. Ŋmɛnɛ lɛ, bɔ ni wɔnaa nibii ni Yehowa ebɔ lɛ, nakai nɔŋŋ kɛ́ be ni Yehowa eto lɛ shɛ lɛ, wɔbaana jeŋ hee lɛ hu.​—Yes. 65:17; Kpo. 21:3, 4.

19. Mɛni kɛ́ ofee lɛ, ebaahã ohemɔkɛyeli lɛ mli awa?

¹⁹ Kɛyashi jeŋ hee lɛ baaba lɛ, yaa nɔ ofee nɔ fɛɛ nɔ ni obaanyɛ koni ohemɔkɛyeli lɛ mli awa. Feemɔ nibii ni tsɔɔ akɛ ohiɛ sɔɔ kpɔmɔnɔ lɛ. Susumɔ hewalɛ ni Yehowa yɔɔ lɛ he, ni agbɛnɛ hu, ofee nibii ni baahã obɛŋkɛ Yehowa kpaakpa. Kɛ́ ofee nibii nɛɛ lɛ, obaafata “mɛi ni tsɔɔ hemɔkɛyeli kɛ tsuishitoo nɔ amɛnáa shiwoi lɛ” ahe.​—Heb. 6:11, 12; Rom. 5:5.