1. Mɛni wɔle?

 WƆLE akɛ Yehowa sumɔɔ wɔ, ni ji ewebii lɛ, ni eesumɔ ni wɔná miishɛɛ. (Rom. 8:35-39) Wɔle hu akɛ, kɛ́ wɔkɛ Biblia mli shishitoo mlai tsu nii lɛ wɔbaaná he sɛɛ. (Yes. 48:17, 18) Shi bei komɛi lɛ, wɔkɛ naagbai ni wɔkpaaa gbɛ kwraa kpeɔ. Kɛ́ eba lɛ nakai lɛ, mɛni esa akɛ wɔfee?

2. Mɛɛ naagbai wɔbaanyɛ wɔkɛkpe? Ni mɛɛ saji ekolɛ wɔbaabi wɔhe?

² Yehowa tsuji fɛɛ kɛ naagbai kpeɔ. Akɛ nɔkwɛmɔnɔ lɛ, wɔwekunyo ko baanyɛ ahã wɔnine anyɛ shi, hela ko ni naa wa baanyɛ amɔ wɔ bɔ ni wɔnyɛŋ wɔtsu babaoo yɛ Yehowa sɔɔmɔ lɛ mli, adebɔɔ naa oshãra ko baanyɛ akpãtã wɔnibii ahiɛ, loo abaanyɛ awa wɔ yi waa yɛ wɔhemɔkɛyeli lɛ hewɔ. Kɛ́ wɔkɛ naagbai nɛɛ loo ekrokomɛi ni tamɔ nakai kpe lɛ, ekolɛ wɔbaabi wɔhe akɛ, ‘Mɛni hewɔ enɛ ba minɔ? Mɛɛ esha mifee? Ani enɛ tsɔɔ akɛ Yehowa mli efu mi ni ekpa mi jɔɔmɔ?’ Ani obi ohe saji ni tamɔ nɛkɛ pɛŋ? Kɛ́ obi ohe saji ni tamɔ nɛkɛ pɛŋ lɛ, kaahã no je onijiaŋ wui. Yehowa tsuji anɔkwafoi pii ebi amɛhe saji ni tamɔ nɛkɛ pɛŋ.​—Lala 22:1, 2; Hab. 1:2, 3.

3. Mɛni wɔkaseɔ yɛ Lala 34:19 lɛ mli?

³ Kanemɔ Lala 34:19. Kadimɔ nibii enyɔ ni he hiaa waa ni awie yɛ ŋmalɛ nɛɛ mli: (1) Jalɔi kɛ naagbai kpeɔ. (2) Yehowa jieɔ wɔ kɛjeɔ wɔnaagbai lɛ amli. Mɛɛ gbɛ nɔ etsɔɔ efeɔ nakai?  Gbɛ kome ni etsɔɔ nɔ efeɔ nakai ji, eyeɔ ebuaa wɔ ni wɔnaa bɔ ni shihilɛ ji diɛŋtsɛ yɛ jeŋ fɔŋ nɛɛ mli. Yehowa ewo wɔ shi akɛ, kɛ́ wɔjá lɛ lɛ wɔbaaná miishɛɛ. (Yes. 66:14) Shi ekɛko akɛ wɔkɛ naagbai ekpeŋ yɛ shihilɛ mli. Moŋ lɛ, ewoɔ wɔ hewalɛ ni wɔkɛ wɔjwɛŋmɔ ama jɔɔmɔi ni wɔbaaná wɔsɛɛ lɛ anɔ. Nakai beiaŋ lɛ, wɔbaahi shi kɛya naanɔ ni wɔbaaná miishɛɛ. (2 Kor. 4:16-18) Shi amrɔ nɛɛ po lɛ, eyeɔ ebuaa wɔ koni wɔnyɛ wɔya nɔ wɔsɔmɔ lɛ daa.​—Yaf. 3:22-24.

4. Mɛni he wɔbaasusu yɛ nikasemɔ nɛɛ mli?

⁴ Yɛ nikasemɔ nɛɛ mli lɛ, wɔbaasusu Yehowa tsuji anɔkwafoi komɛi ni hi shi yɛ blema kɛ etsuji komɛi ni ehi shi yɛ wɔbei nɛɛ amli lɛ ahe ni wɔkwɛ nɔ ni wɔbaanyɛ wɔkase yɛ amɛhe saji lɛ amli. Wɔbaana akɛ, wɔbaanyɛ wɔkɛ naagbai ni wɔkpaaa gbɛ akpe. Shi kɛ́ wɔkɛ wɔhiɛ fɔ̃ Yehowa nɔ lɛ, ebaaye ebua wɔ be fɛɛ be. (Lala 55:22) Be ni wɔsusuɔ saji nɛɛ ahe lɛ, bi ohe akɛ: ‘Eji mi mikɛ shihilɛ ni tamɔ nakai kpe kulɛ, te mafee minii mahã tɛŋŋ? Mɛɛ gbɛ nɔ sane nɛɛ hãa hemɔkɛyeli ni miyɔɔ akɛ Yehowa baaye ebua mi lɛ mli waa? Mɛni mikase ni manyɛ mikɛtsu nii yɛ mi diɛŋtsɛ mishihilɛ mli?’

5. Mɛni Laban fee Yakob? (Kwɛmɔ mfoniri ni yɔɔ wolo lɛ hiɛ lɛ.)

⁵ Yehowa tsuji ni hi shi yɛ blema lɛ kɛ naagbai ni amɛkpaaa gbɛ kwraa kpe. Amɛteŋ mɔ kome ji, Yakob. Epapa fã lɛ ni eya amɛwekunyo ko ni atsɛɔ lɛ Laban, ni lɛ hu ejáa Yehowa lɛ ŋɔɔ ni eyaŋɔ ebiyei lɛ ateŋ mɔ kome akɛ eŋa. Ehã ele akɛ kɛ́ efee nakai lɛ, Yehowa baajɔɔ lɛ. (1 Mo. 28:1-4) Yakob fee nakai pɛpɛɛpɛ. Efã gbɛ kɛjɛ Kanaan kɛtee he ni Laban yɔɔ lɛ. Laban yɛ biyei enyɔ, Lea kɛ Rahel. Yakob basumɔ Rahel, ni ji Laban biyoo fioo lɛ, ni ekɛ Laban ba gbeekpamɔ akɛ ebaasɔmɔ lɛ afii kpawo koni ekɛ ebiyoo lɛ ahã lɛ. (1 Mo. 29:18) Shi nibii eyaaa lɛ bɔ ni Yakob yasusu lɛ. Laban laka lɛ ni ekɛ ebiyoo onukpa Lea moŋ hã lɛ. Laban kɛɛ lɛ akɛ, ebaanyɛ ekɛ Rahel ahi shi enɔ otsi, shi ebaabi ni etsu nii afii kpawo ekoŋŋ. (1 Mo. 29:25-27) Agbɛnɛ hu, Laban shishiu Yakob yɛ nitsumɔ ni ekɛ lɛ tsu lɛ mli. Eshishiu lɛ afii 20 sɔŋŋ!​—1 Mo. 31:41, 42.

6. Mɛɛ naagbai krokomɛi Yakob kɛkpe?

⁶ Yakob kɛ naagbai krokomɛi hu kpe. Eweku lɛ da waa, shi jeee be fɛɛ be ebihii lɛ kɛ amɛhe ye jogbaŋŋ. Akɛ nɔkwɛmɔnɔ lɛ, be ko lɛ, amɛhɔ̃ɔ amɛ diɛŋtsɛ amɛnyɛmi nuu Yosef akɛ nyɔŋ. Yakob bihii enyɔ, ni ji Simon kɛ Levi fee nɔ ko ni gbe amɛweku lɛ kɛ Yehowa gbɛ́i lɛ he guɔ. Kɛfata he lɛ, Yakob ŋa ni esumɔɔ lɛ waa, ni ji Rahel lɛ gbo be ni eyaafɔ amɛbi ni ji enyɔ nɔ lɛ. Agbɛnɛ hu, hɔmɔ ko ni naa wa ni ba lɛ hewɔ lɛ, Yakob fã eyahi Ejipt yɛ egbɔlɛ beiaŋ.​—1 Mo. 34:30; 35:16-19; 37:28; 45:9-11, 28.

7. Mɛni Yehowa fee ni hã Yakob na akɛ eshiko lɛ?

⁷ Yɛ naagbai ni Yakob kɛkpe lɛ fɛɛ sɛɛ lɛ, ehãaa hemɔkɛyeli ni eyɔɔ yɛ Yehowa kɛ eshiwoi lɛ amli lɛ mli agbɔjɔ. Yehowa fee nibii ni hã Yakob na akɛ eshiko lɛ. Eyɛ mli akɛ Laban kɛ Yakob yeee jogbaŋŋ moŋ, shi Yehowa hã Yakob ná heloonaa nibii pii. Feemɔ bɔ ni Yakob nu he ehã be ni Yehowa hã ekɛ ebinuu Yosef, mɔ ni esusu akɛ egbo afii pii lɛ, kpe ekoŋŋ lɛ he mfoniri okwɛ. Ŋwanejee ko bɛ he akɛ, ená miishɛɛ waa. Akɛni Yakob kɛ Yehowa bɔ naanyo kpaakpa hewɔ lɛ, enyɛ efi shi yɛ naagbai fɛɛ ni ekɛkpe lɛ amli. (1 Mo. 30:43; 32:9, 10; 46:28-30) Kɛ́ wɔhã naanyobɔɔ ni yɔɔ wɔ kɛ Yehowa teŋ lɛ mli wa lɛ, wɔ hu wɔbaanyɛ wɔfi shi kɛ́ wɔkɛ naagbai ni wɔkpaaa gbɛ kwraa kpe po.

8. Mɛni Maŋtsɛ David shwe ni efee?

 ⁸ Jeee nibii fɛɛ ni Maŋtsɛ David shwe ni efee yɛ Yehowa sɔɔmɔ lɛ mli lɛ enyɛ efee. Akɛ nɔkwɛmɔnɔ lɛ, no mli lɛ, David miishwe waa ni ema sɔlemɔ shĩa ehã Yehowa. No hewɔ lɛ, ekɛɛ gbalɔ Natan nɔ ni etaoɔ efee lɛ. Natan kɛɛ lɛ akɛ: “Feemɔ nɔ fɛɛ nɔ ni yɔɔ otsui mli, ejaakɛ anɔkwa Nyɔŋmɔ lɛ kɛ bo yɛ.” (1 Kro. 17:1, 2) Ŋwanejee ko bɛ he akɛ, nɔ ni Natan kɛɛ David lɛ wo lɛ hewalɛ waa. Ekolɛ, oya nɔŋŋ ni David bɔi gbɛjianɔ too koni enyɛ etsu nitsumɔ kpele nɛɛ.

9. Te David fee enii ehã tɛŋŋ be ni enu sane ko ni ekpaaa gbɛ lɛ?

⁹ Shi etsɛɛɛ ni Natan ku esɛɛ ebakɛɛ David sane ko ni ekpaaa gbɛ kwraa. “Nakai nyɔɔŋ lɛ mli nɔŋŋ lɛ,” Yehowa kɛɛ Natan ni eyakɛɛ David akɛ, jeee lɛ ebaama sɔlemɔ shĩa lɛ, shi moŋ ebihii lɛ ateŋ mɔ kome ni baama. (1 Kro. 17:3, 4, 11, 12) Te David fee enii ehã tɛŋŋ yɛ sane ni abakɛɛ lɛ lɛ he? Etsake oti ni ekɛma ehiɛ lɛ. Ebua shika kɛ nibii ni he baahia ebinuu Solomon ni enyɛ ema tsũ lɛ naa.​—1 Kro. 29:1-5.

10. Mɛɛ gbɛ nɔ Yehowa jɔɔ David?

¹⁰ Be ni Yehowa hã David ná ele akɛ jeee lɛ ebaama sɔlemɔ shĩa lɛ, Yehowa kɛ lɛ fee kpaŋmɔ ko yɛ nakai be lɛ mli nɔŋŋ. Ewo David shi akɛ, eseshibii lɛ ateŋ mɔ kome baaye maŋtsɛ kɛya naanɔ. (2 Sam. 7:16) Yɛ Afii Akpe lɛ mli lɛ, kɛ́ okwɛ lɛ, te David baanu he ehã tɛŋŋ kɛ́ ená ele akɛ Yesu, mɔ ni yeɔ nɔ lɛ, jɛ eweku lɛ mli? Ebaaná miishɛɛ waa. David sane nɛɛ hãa wɔnaa akɛ, kɛ́ wɔnyɛɛɛ wɔfee nibii fɛɛ ni wɔshweɔ akɛ wɔfee wɔhã Yehowa po lɛ, wɔ-Nyɔŋmɔ lɛ baanyɛ ejɔɔ wɔ yɛ gbɛi krokomɛi ni wɔkpaaa gbɛ kwraa anɔ.

11. Eyɛ mli akɛ Maŋtsɛyeli lɛ baaa be ni blema Kristofoi lɛ kpaa lɛ gbɛ lɛ moŋ, shi mɛɛ jɔɔmɔi amɛná? (Bɔfoi 6:7)

¹¹ Blema Kristofoi lɛ kɛ naagbai ni amɛkpaaa gbɛ kwraa kpe. Akɛ nɔkwɛmɔnɔ lɛ, no mli lɛ amɛmiishwe waa ni Nyɔŋmɔ Maŋtsɛyeli lɛ aba, shi amɛleee be tuuntu ni ebaaba. (Bɔf. 1:6, 7) No hewɔ lɛ mɛni amɛfee? Amɛtee nɔ amɛshiɛ kɛ ekãa. Amɛshiɛ yɛ hei srɔtoisrɔtoi, ni yibii ni jɛ mli kɛba lɛ hã amɛna akɛ, Yehowa miijɔɔ amɛnitsumɔ lɛ nɔ.​—Kanemɔ Bɔfoi 6:7.

12. Mɛni blema Kristofoi lɛ fee be ni hɔmɔ ba lɛ?

¹² Be ko lɛ, hɔmɔ kpele ko ba “shikpɔŋ muu lɛ fɛɛ nɔ,” ni esa blema Kristofoi lɛ hu ahe. (Bɔf. 11:28) Kɛ́ okwɛ lɛ, mɛɛ gbɛ nɔ hɔmɔ ni naa wa ni ba nɛɛ sa amɛhe? Ŋwanejee ko bɛ he akɛ, weku yitsei hao waa yɛ bɔ ni amɛbaafee amɛkwɛ amɛweku lɛ he. Ni oblahii kɛ oblayei ni no mli lɛ amɛmiitao amɛtsu babaoo yɛ Yehowa sɔɔmɔ lɛ mli lɛ hu? Eeenyɛ efee akɛ, amɛteŋ mɛi komɛi nu he akɛ amɛmɛ ni hɔmɔ lɛ sɛɛ afo dã. Ekɔɔɔ he eko shihilɛ mli ni Kristofoi nɛɛ ateŋ mɔ fɛɛ mɔ yɔɔ lɛ, emia ehiɛ edamɔ hɔmɔ ni ba lɛ naa. Amɛtee nɔ amɛshiɛ, ni amɛjɛ amɛsuɔmɔ mli amɛkɛ amɛnyɛmimɛi ni yɔɔ Yudea lɛ ja nii ni amɛyɔɔ lɛ.​—Bɔf. 11:29, 30.

13. Mɛɛ jɔɔmɔi blema Kristofoi lɛ ná be ni hɔmɔ lɛ ba lɛ?

¹³ Mɛɛ jɔɔmɔi blema Kristofoi lɛ ná be ni hɔmɔ lɛ ba lɛ? Mɛi ni nine shɛ niyenii ni ajara lɛ nɔ lɛ na akɛ, Yehowa ni hã amɛnine shɛ niyenii lɛ nɔ. (Mat. 6:31-33) Ekã shi faŋŋ akɛ, enɛ hã amɛbasumɔ amɛnyɛmimɛi ni ye amɛbua amɛ lɛ waa. Ni nyɛmimɛi ni jɛ amɛsuɔmɔ mli amɛkɛ niyenii lɛ hã kɛ mɛi ni jɛ amɛsuɔmɔ mli amɛyajara niyenii lɛ ná miishɛɛ waa. (Bɔf. 20:35) Yehowa jɔɔ amɛteŋ mɔ fɛɛ mɔ yɛ amɛhe ni amɛtsake amɛwo shihilɛ ni eba lɛ mli lɛ hewɔ.

14. Mɛni afee Barnaba kɛ Paulo? Ni mɛni jɛ mli kɛba? (Bɔfoi 14:21, 22)

¹⁴ Awa blema Kristofoi lɛ ayi shii abɔ, ni bei komɛi lɛ enɛ baa be ni amɛkpaaa gbɛ kwraa.  Susumɔ nɔ ni ba Barnaba kɛ bɔfo Paulo nɔ be ni amɛshiɛɔ yɛ Listra lɛ he okwɛ. Shishijee lɛ, gbɔmɛi lɛ here amɛ hiɛmɛɛ ni amɛbo amɛ toi. Shi sɛɛ mli lɛ, mɛi ni teɔ shi amɛwoɔ amɛ lɛ ‘batsɔ maŋbii lɛ ayiŋ’ ni amɛteŋ mɛi komɛi tswia Paulo tɛi ni amɛshi lɛ koni egbo. (Bɔf. 14:19) Enɛ fɛɛ sɛɛ lɛ, Barnaba kɛ Paulo tee he kroko amɛyashiɛ. Ni mɛni jɛ mli kɛba? Amɛfee “mɛi saŋŋ kaselɔi” yɛ he ni amɛtee lɛ, ni amɛwiemɔi kɛ nɔkwɛmɔnɔ kpakpa ni amɛfee lɛ wo amɛnyɛmimɛi Kristofoi lɛ hewalɛ. (Kanemɔ Bɔfoi 14:21, 22.) Bɔ ni Barnaba kɛ Paulo fi shi be ni awa amɛ yi lɛ wo mɛi krokomɛi hewalɛ. Wɔ hu kɛ́ wɔfi shi yɛ nitsumɔ ni Yehowa kɛwo wɔdɛŋ lɛ mli lɛ, ebaajɔɔ wɔ.

15. Mɛni okaseɔ yɛ Nyɛminuu A. H. Macmillan sane lɛ mli?

¹⁵ Dani afi 1914 baashɛ lɛ, no mli lɛ, Yehowa webii lɛ miikpa gbɛ akɛ nibii komɛi baaba. Akɛ nɔkwɛmɔnɔ lɛ, nyɛmimɛi lɛ ateŋ mɛi babaoo, ni Nyɛminuu A. H. Macmillan fata he lɛ, susu akɛ etsɛŋ amɛbaaya ŋwɛi. Be ni ehãa wiemɔ ko yɛ September 1914 lɛ mli lɛ, ewie akɛ: “Ekolɛ, enɛ baafee naagbee wiemɔ ni mahã.” Shi bɔ ni esusu lɛ eyabaaa lɛ nakai. Sɛɛ mli lɛ, Nyɛminuu Macmillan wie akɛ: “Efeɔ mi akɛ, wɔteŋ mɛi komɛi ye wɔhe oyai ni wɔyasusu akɛ be ni wɔkɛbaaya ŋwɛi lɛ eshɛ.” Ekɛfata he akɛ: “Nɔ ni he hiaa ni wɔfee bianɛ moŋ ji, ni wɔtsu babaoo yɛ Nuŋtsɔ lɛ nitsumɔ lɛ mli.” Anɔkwa, Nyɛminuu Macmillan tsu babaoo yɛ Nuŋtsɔ lɛ nitsumɔ lɛ mli. Ekɛ ekãa shiɛ waa. Yɛ be kɛ beiaŋ lɛ, eyawoɔ nyɛmimɛi babaoo ni awo amɛ tsũŋ yɛ amɛhe ni amɛkɛwooo maŋ saji amli lɛ hewɔ lɛ hewalɛ. Ni be ni egbɔ po lɛ, efooo asafoŋ kpeei amli. Mɛɛ gbɛ nɔ Nyɛminuu Macmillan ná ekãa ni ekɛtsu sɔɔmɔ nitsumɔ lɛ waa be ni emɛɔ be ni ekɛbaaya ŋwɛi lɛ he sɛɛ? Be ni eshwɛ fioo ni ebaagbo lɛ, eŋma akɛ: “Hemɔkɛyeli ni miyɔɔ bianɛ lɛ mli wa tamɔ bɔ ni eji be ko ni eho lɛ nɔŋŋ.” Egbo yɛ afi 1966. Enɔkwɛmɔnɔ lɛ sa waa, ni esa akɛ wɔkase, titri lɛ, kɛ́ naagba ko ni wɔkɛkpeɔ lɛ sɛɛ etsɛ fe bɔ ni wɔkpaa gbɛ.​—Heb. 13:7.

16. Mɛɛ naagba Nyɛminuu Herbert Jennings kɛ eŋa kɛkpe ni amɛkpaaa gbɛ kwraa? (Yakobo 4:14)

¹⁶ Yehowa tsuji babaoo miiye helai komɛi ni amɛkpaaa gbɛ kwraa. Akɛ nɔkwɛmɔnɔ lɛ, yɛ Nyɛminuu Herbert Jennings b wala shihilɛ he sane lɛ mli lɛ, etsɔɔ bɔ ni ekɛ eŋa ná miishɛɛ waa be ni amɛsɔmɔɔ yɛ Ghana akɛ maŋsɛɛ sɔɔlɔi lɛ. Shi sɛɛ mli lɛ, ahã ele akɛ eeye hela ko ni naa wa waa. Nyɛminuu Jennings damɔ wiemɔi ni yɔɔ Yakobo 4:14 lɛ nɔ etsɛ shihilɛ ni ekɛkpe lɛ akɛ, “‘wɔ́’ ko ni wɔkpaaa lɛ gbɛ.” (Kanemɔ.) Bɔ ni nibii tee lɛ ehã lɛ hewɔ lɛ, Nyɛminuu Jennings wie akɛ: “Wɔto gbɛjianɔ koni wɔshi Ghana kɛ wɔnanemɛi pii ni bɛŋkɛ wɔ kpaakpa lɛ, ni wɔku sɛɛ kɛtee Canada” koni ayatsa mihela lɛ. Yehowa ye ebua Nyɛminuu Jennings kɛ eŋa lɛ ni amɛtee nɔ amɛsɔmɔ lɛ yɛ naagba ni amɛkɛkpe lɛ fɛɛ sɛɛ.

17. Mɛɛ gbɛ nɔ Nyɛminuu Jennings sane lɛ wo mɛi krokomɛi hewalɛ?

¹⁷ Nyɛminuu Jennings hela lɛ he sane ni ewie he yɛ ewala shihilɛ he sane lɛ mli lɛ wo mɛi krokomɛi hewalɛ. Be ni nyɛmi yoo ko kane Nyɛminuu Jennings sane lɛ, ewie akɛ: “Nɔ ko kanyako mi waa pɛŋ tamɔ nɔ ni mikane yɛ sane nɛɛ mli lɛ. . . . Bɔ ni ehe bahia ni Nyɛminuu Jennings afɔ̃ɔ nitsumɔ ni akɛwo edɛŋ lɛ koni enyɛ etsa hela ni yeɔ lɛ lɛ he sane ni mikane lɛ ye ebua mi koni maná jwɛŋmɔ ni ja yɛ mishihilɛ lɛ he.” Nyɛmi nuu ko hu ŋma  akɛ: “Be ni misɔmɔ akɛ asafoŋ onukpa afii nyɔŋma sɛɛ lɛ, ehe bahia ni maŋmɛɛ misɔɔmɔ hegbɛ lɛ he yɛ jwɛŋmɔŋ hela ni miyeɔ lɛ hewɔ. Henumɔi ni miná akɛ mibɔɔɔ mɔdɛŋ lɛ mli bawa aahu akɛ, bei pii lɛ ehãa minijiaŋ jeɔ wui ni minyɛɛɛ makane mɛi awala shihilɛ he saji. . . . Shi kɛ̃lɛ, Nyɛminuu Jennings tsuishiŋmɛɛ lɛ wo mi hewalɛ waa diɛŋtsɛ.” Enɛ hãa wɔnaa akɛ, kɛ́ wɔkɛ naagba ko ni wɔkpaaa gbɛ kpe ni wɔfi shi lɛ, ewoɔ mɛi krokomɛi hewalɛ. No hewɔ lɛ, kɛ́ nibii eyaaa lɛ bɔ ni wɔkpaa gbɛ po lɛ, wɔbaanyɛ wɔfi shi ni wɔhiɛ wɔhemɔkɛyeli lɛ mli, ni mɛi krokomɛi baakase wɔ.​—1 Pet. 5:9.

18. Tamɔ wɔnaa yɛ mfoniri lɛ mli lɛ, mɛni wɔkaseɔ yɛ nyɛmi yoo lɛ ni jɛ Nigeria ni ewu egbo lɛ sane lɛ mli?

¹⁸ Oshãrai loo helai ni tsɛŋeɔ mɔ ni baa yɛ je lɛŋ he fɛɛ he lɛ esa Yehowa tsuji babaoo ahe. Enɛ he nɔkwɛmɔnɔ ji COVID-19 hela lɛ. Yɛ COVID-19 be lɛ mli lɛ, nyɛmi yoo ko ni yɔɔ Nigeria ni wu egbo lɛ nɔ fɛɛ nɔ batã ni eshwɛ lɛ omɔ kɔɔpoo kome pɛ. Leebi ko lɛ, ebiyoo fioo lɛ bi lɛ akɛ, kɛ́ amɛye omɔ lɛ mɛni ekoŋŋ amɛbaaye. Nyɛmi yoo lɛ kɛɛ ebiyoo lɛ akɛ, amɛshika kɛ amɛniyenii fɛɛ etã, no hewɔ lɛ, amɛkase Zarefat yoo okulafo lɛ ni amɛye amɛniyenii ni eshwɛ lɛ ni amɛkɛ amɛhiɛ afɔ̃ Yehowa nɔ. (1 Maŋ. 17:8-16) Shi eshɛɛɛ shwane po ni nyɛmimɛi lɛ bahã amɛ niyenii kɛ nibii krokomɛi ni baanyɛ ashɛ amɛ otsii enyɔ kɛ sɛɛ. Nyɛmi yoo lɛ wie akɛ, no mli lɛ eleee kwraa akɛ Yehowa miibo amɛ toi be ni ekɛ ebiyoo lɛ wieɔ lɛ. Lɛɛlɛŋ, kɛ́ wɔkɛ wɔhiɛ fɔ̃ɔ Yehowa nɔ lɛ, no lɛ kɛ́ wɔkɛ shihilɛi ni wɔkpaaa gbɛ kpe po lɛ, nomɛi moŋ baahã wɔbɛŋkɛ Yehowa kpaakpa.​—1 Pet. 5:6, 7.

19. Mɛɛ shihilɛ Nyɛminuu Aleksey Yershov kɛkpe?

¹⁹ Nyɛsɛɛ nɛɛ, awa wɔnyɛmimɛi lɛ babaoo yi be ni amɛkpaaa gbɛ kwraa. Nyɛmi nuu ko ni yɔɔ Russia ni atsɛɔ lɛ Aleksey Yershov lɛ kɛ shihilɛ ko ni tamɔ nɛkɛ kpe. Abaptisi  Nyɛminuu Yershov yɛ afi 1994. Yɛ nakai beiaŋ lɛ, nyɛmimɛi ni yɔɔ Russia lɛ nyɛɔ amɛsɔmɔɔ Yehowa ni mɔ ko mɔ ko gbaaa amɛnaa. Shi nyɛsɛɛ nɛɛ, nibii etsake kwraa yɛ Russia. Yɛ afi 2020 lɛ, asraafoi ba Nyɛminuu Yershov shĩa lɛ, amɛbagbɛlɛ shi ni amɛloo enibii babaoo kɛtee. Nyɔji saŋŋ sɛɛ lɛ, amralo lɛ kɛ saji fɔ̃ enɔ akɛ eku maŋ lɛ mla mli. Nɔ ni fite sane lɛ fe fɛɛ ji akɛ, adamɔ vidioi komɛi ni mɔ ko ni ekɛ lɛ kaseɔ nii lɛ rikɔdi lɛ anɔ akɛ saji nɛɛ fɔ̃ enɔ. Ekɛ mɔ nɛɛ ekase nii fe afi. Nɔ ni mɔ lɛ fee lɛ ehiii kwraa.

20. Mɛni Nyɛminuu Yershov efee koni wekukpaa ni yɔɔ ekɛ Yehowa teŋ lɛ mli awa?

²⁰ Ani nɔ ko kpakpa ejɛ shihilɛ ni Nyɛminuu Yershov kɛkpe nɛɛ mli kɛba? Hɛɛ. Wekukpaa ni yɔɔ ekɛ Yehowa teŋ lɛ mli ewa waa. Ewie akɛ: “Bianɛ lɛ, mikɛ miŋa fɔɔ sɔlemɔ waa fe be ko ni eho. Miyɔse akɛ, kɛ́ mihãaa Yehowa aye abua mi lɛ, minyɛŋ madamɔ shihilɛ nɛɛ naa.” Ekɛfata he akɛ: “Kɛ́ minijiaŋ je wui lɛ, aŋkro nikasemɔ ni mifeɔ lɛ yeɔ ebuaa mi. Mijwɛŋɔ Yehowa tsuji ni hi shi yɛ blema lɛ ahe saji lɛ anɔ. Saji pii yɛ Biblia lɛ mli ni hãa minaa nɔ hewɔ ni ehe hiaa ni wɔto wɔtsui shi ni wɔkɛ wɔhiɛ afɔ̃ Yehowa nɔ.”

21. Mɛni wɔkase yɛ nikasemɔ nɛɛ mli?

²¹ Mɛni wɔkase yɛ nikasemɔ nɛɛ mli? Wɔbana akɛ, bei komɛi lɛ wɔbaanyɛ wɔkɛ naagbai ni wɔkpaaa gbɛ kwraa akpe. Shi kɛ́ eba lɛ nakai lɛ, Yehowa yeɔ ebuaa etsuji ni kɛ amɛhiɛ fɔ̃ɔ enɔ lɛ be fɛɛ be. Tamɔ wɔnaa yɛ ŋmalɛ ni nikasemɔ lɛ damɔ nɔ lɛ mli lɛ, “jalɔ tsɔɔ shihilɛi babaoo ni mli wawai amli, shi Yehowa jieɔ lɛ kɛjeɔ fɛɛ mli.” (Lala 34:19) No hewɔ lɛ, nyɛhãa wɔyaa nɔ wɔkɛ wɔjwɛŋmɔ amaa Yehowa, mɔ ni yeɔ ebuaa wɔ lɛ nɔ, moŋ fe ni wɔkɛ wɔjwɛŋmɔ baama wɔnaagbai lɛ anɔ. Kɛ́ wɔfee nakai lɛ, wɔ hu wɔbaanyɛ wɔwie nɔ ni bɔfo Paulo wie lɛ nɔŋŋ. Ewie akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”​—Fip. 4:13.