1. Mɛni hewɔ ewa kɛhã nyɛmimɛi komɛi akɛ amɛbaaná miishɛɛ yɛ shiɛmɔ nitsumɔ lɛ mli lɛ? (Kwɛmɔ mfoniri lɛ hu.)

 AKƐ Yehowa webii lɛ, wɔshiɛɔ wɔhãa mɛi ejaakɛ wɔsumɔɔ wɔ-Tsɛ ni yɔɔ ŋwɛi lɛ, ni wɔmiisumɔ ni wɔye wɔbua mɛi ni yɔɔ wɔshikpɔŋkuku lɛ mli lɛ koni amɛbale lɛ. Nyɛmimɛi babaoo náa miishɛɛ waa kɛ́ amɛtee shiɛmɔ. Shi mɛi komɛi hu náaa miishɛɛ kwraa yɛ shiɛmɔ nitsumɔ lɛ mli. Mɛni hewɔ amɛnáaa miishɛɛ lɛ? Nɔ hewɔ lɛ ji, mɛi komɛi ahiɛ gboɔ waa ni amɛnuɔ he akɛ amɛhe esako kɛ nitsɔɔmɔ. Ewa kɛhã mɛi komɛi hu akɛ amɛbaaya mɔ ko ni amɛleee lɛ lɛ shĩa be ni mɔ lɛ tsɛko amɛ jɛmɛ. Mɛi komɛi hu sheɔ gbeyei akɛ kɛ́ amɛtee lɛ, abaashwie amɛ. Mɛi komɛi hu sumɔɔɔ ni amɛfeɔ nibii ni baahã mɛi amli afu amɛ. Nyɛmimɛi nɛɛ sumɔɔ Yehowa waa, shi ewa kɛhã amɛ akɛ amɛbaayashiɛ sane kpakpa lɛ amɛhã mɔ ko ni amɛleee. Fɛɛ sɛɛ lɛ, akɛni amɛle akɛ shiɛmɔ nitsumɔ lɛ he hiaa waa hewɔ lɛ, amɛyaa shiɛmɔ daa. Enɛ hewɔ lɛ, Yehowa sumɔɔ amɛsane waa!

2. Kɛ́ onáaa miishɛɛ yɛ shiɛmɔ nitsumɔ lɛ mli lɛ, mɛni hewɔ esaaa akɛ ohãa no gbaa onaa?

² Ani bo hu bei komɛi lɛ, nibii ni wɔwie kɛtsɔ hiɛ lɛ ekomɛi ahewɔ lɛ, onáaa miishɛɛ yɛ shiɛmɔ nitsumɔ lɛ mli? Kɛ́ nakai lɛ, kaaye otsui. Bɔ ni onuɔ he ohãa lɛ baanyɛ atsɔɔ akɛ obaa ohe shi, osumɔɔɔ ni ogbalaa jwɛŋmɔ kɛbaa onɔ, ni osumɔɔɔ ni okɛ mɛi taa saji anaa. Agbɛnɛ hu, mɔ ko mɔ ko bɛ ni baasumɔ ni efee nɔ ko ni baahã mɔ ko mli afu lɛ, titri lɛ kɛji eebɔ mɔdɛŋ akɛ efee nɔ ko kpakpa ko ehã nakai mɔ lɛ. Yehowa, o-Tsɛ ni yɔɔ ŋwɛi lɛ le bɔ ni onuɔ he ohãa lɛ waa, ni eesumɔ ni efee nɔ fɛɛ nɔ ni ebaanyɛ kɛye ebua bo. (Yes. 41:13) Yɛ nikasemɔ nɛɛ mli lɛ, wɔbaakwɛ ŋaawoi enumɔ ni baaye abua bo ni okanu he nakai, ni agbɛnɛ hu, ona nibii ni kɛ́ ofee lɛ obaaná miishɛɛ yɛ shiɛmɔ nitsumɔ lɛ mli.

 KASEMƆ NYƆŊMƆ WIEMƆ LƐ KONI EWAJE BO

3. Mɛni ye ebua gbalɔ Yeremia ni enyɛ eshiɛ ehã mɛi?

³ Kɛjɛ blema fɛɛ lɛ, Nyɔŋmɔ Wiemɔ lɛ ji nɔ ni wajeɔ Yehowa tsuji kɛ́ akɛ nitsumɔ ko ni wa wo amɛdɛŋ. Akɛ nɔkwɛmɔnɔ lɛ, be ni Yehowa kɛ nitsumɔ wo gbalɔ Yeremia dɛŋ koni eshiɛ lɛ, no mli lɛ ewa kɛhã lɛ akɛ ebaafee nakai. Yeremia wie akɛ: “Mileee wiemɔ, ejaakɛ midako.” (Yer. 1:6) Mɛni ye ebua lɛ ni eye egbeyeishemɔ lɛ nɔ? Yehowa wiemɔ lɛ waje lɛ. Ewie akɛ: “Wiemɔ lɛ tsɔ tamɔ la ni miitso ni atsĩ naa awo miwui amli, ni minyɛɛɛ naa matsĩ dɔŋŋ.” (Yer. 20:​8, 9) Eyɛ mli akɛ mɛi booo Yeremia toi moŋ, shi wiemɔ ni akɛhã lɛ ni eshiɛ lɛ waje lɛ ni enyɛ etsu nitsumɔ lɛ.

4. Kɛ́ wɔkane Nyɔŋmɔ Wiemɔ lɛ ni wɔjwɛŋ nɔ lɛ, mɛɛ gbɛ nɔ no baaye abua wɔ? (Kolosebii 1:​9, 10)

⁴ Nyɔŋmɔ Wiemɔ lɛ ji nɔ ni wajeɔ Kristofoi. Be ni bɔfo Paulo ŋma wolo eyahã Kristofoi ni yɔɔ Kolose lɛ, ekɛɛ amɛ akɛ kɛ́ amɛná Nyɔŋmɔ he nilee krɔŋŋ lɛ, no baawaje amɛ ni ‘amɛnyiɛ bɔ ni sa Yehowa,’ ni amɛya nɔ ‘amɛwo yibii yɛ nitsumɔ kpakpa fɛɛ nitsumɔ kpakpa mli.’ (Kanemɔ Kolosebii 1:​9, 10.) Sane kpakpa lɛ shiɛmɔ lɛ hu fata nakai nitsumɔ kpakpa lɛ he. No hewɔ lɛ, kɛ́ wɔkane Nyɔŋmɔ Wiemɔ lɛ, ni wɔjwɛŋ nɔ jogbaŋŋ lɛ, no baahã hemɔkɛyeli ni wɔyɔɔ yɛ Yehowa mli lɛ mli awa, ni agbɛnɛ hu, wɔbaanu nɔ hewɔ ni ehe hiaa ni wɔshiɛ Maŋtsɛyeli lɛ he sane kpakpa lɛ shishi jogbaŋŋ.

5. Mɛni kɛ́ wɔfee lɛ, ebaahã wɔná Biblia lɛ kanemɔ kɛ ekasemɔ he sɛɛ?

⁵ Kɛ́ ootao oná Nyɔŋmɔ Wiemɔ lɛ he sɛɛ jogbaŋŋ lɛ, no lɛ kɛ́ ookane jio, ookase jio, oojwɛŋ nɔ jio lɛ, kaafee lɛ kpalakpala. Too otsui shi. Kɛ́ okane ŋmalɛ ko ni onuuu shishi lɛ, kaaku ohiɛ ofɔ̃ nɔ. Moŋ lɛ, okɛ Watch Tower Publications Index lɛ loo Niiamlitaomɔ Wolo Kɛhã Yehowa Odasefoi lɛ atsu nii kɛtao nakai ŋmalɛ lɛ mli jogbaŋŋ. Kɛ́ oto otsui shi okase Nyɔŋmɔ Wiemɔ lɛ, no baahã ohe oye waa akɛ, nibii ni awie yɛ Biblia lɛ mli lɛ ji anɔkwale. (1 Tes. 5:21) Kɛ́ ohe nibii ni yɔɔ Biblia lɛ mli lɛ oye waa lɛ, no baahã oná he miishɛɛ akɛ okɛ mɛi baagba he sane.

SAAMƆ OHE JOGBAŊŊ KƐHÃ SHIƐMƆ NITSUMƆ LƐ

6. Mɛni hewɔ esa akɛ wɔsaa wɔhe jogbaŋŋ kɛhã shiɛmɔ nitsumɔ lɛ?

⁶ Kɛ́ osaa ohe jogbaŋŋ kɛhã shiɛmɔ nitsumɔ lɛ, no baaye abua bo ni onyɛ okɛ mɛi awie ni  osheee gbeyei. Yesu ye ebua ekaselɔi lɛ ni amɛsaa amɛhe kɛhã shiɛmɔ nitsumɔ lɛ dani etsu amɛ ni amɛyashiɛ. (Luka 10:​1-11) Akɛni kaselɔi lɛ kɛ nɔ ni Yesu tsɔɔ amɛ lɛ tsu nii hewɔ lɛ, amɛnyɛ amɛfee nibii kpakpai pii yɛ shiɛmɔ nitsumɔ lɛ mli, ni enɛ hã amɛná miishɛɛ waa.—Luka 10:17.

7. Mɛni wɔbaanyɛ wɔfee kɛsaa wɔhe kɛhã shiɛmɔ nitsumɔ lɛ? (Kwɛmɔ mfoniri lɛ hu.)

⁷ Mɛni wɔbaanyɛ wɔfee kɛsaa wɔhe kɛhã shiɛmɔ nitsumɔ lɛ? Esa akɛ wɔsusu nɔ ni wɔtaoɔ wɔkɛɛ mɛi lɛ he, ni wɔkwɛ bɔ ni kɛ́ wɔwie lɛ lɛ, ewaŋ kɛhãŋ wɔ. Agbɛnɛ hu, wɔbaanyɛ wɔsusu bɔ ni mɛi baanyɛ afee amɛnii amɛhã yɛ shikpɔŋkuku lɛ mli lɛ he, ni wɔkwɛ nɔ ni wɔbaafee yɛ eko fɛɛ eko he. Kɛkɛ lɛ, kɛ́ wɔkɛ mɔ ko miigba sane lɛ, no hãŋ wɔtsui afã, ni wɔbaanyɛ wɔfee wɔhiɛ ŋmɔlɔŋmɔlɔ ni wɔkɛ mɔ lɛ agba sane tamɔ wɔnaanyo.

8. Mɛɛ gbɛ nɔ Kristofoi tamɔ sũ nii ni bɔfo Paulo wie he yɛ enɔkwɛmɔnɔ lɛ mli lɛ?

⁸ Bɔfo Pulo kɛɛ enyɛmimɛi Kristofoi lɛ akɛ: “Wɔyɛ jwetri nɛɛ yɛ sũ nii amli.” (2 Kor. 4:7) Mɛni ji jwetri ni Paulo wieɔ he lɛ? No ji, Maŋtsɛyeli lɛ he sane ni ashiɛɔ ni baanyɛ ahere mɛi ayiwala lɛ. (2 Kor. 4:1) Ni sũ nii lɛ ni ewie he lɛ hu? No damɔ shi kɛhã Nyɔŋmɔ tsuji ni shiɛɔ sane kpakpa lɛ. Yɛ Paulo beiaŋ lɛ, jarayelɔi kɛ nibii ni he hiaa waa, tamɔ niyenii, wain, kɛ shika woɔ sũ nii amli kɛfãa gbɛ. Nakai nɔŋŋ Yehowa hu kɛ nɔ ko ni he hiaa waa, ni ji sane kpakpa lɛ ewo wɔdɛŋ. Ni ebaaye ebua wɔ ni wɔnyɛ wɔkɛ sane kpakpa lɛ ayahã mɛi.

SƆLEMƆ NI ONÁ EKÃA

9. Mɛni baaye abua wɔ koni wɔkashe gbeyei akɛ mɛi boŋ wɔ toi, loo amɛbaate shi amɛwo wɔ? (Kwɛmɔ mfoniri lɛ hu.)

⁹ Bei komɛi lɛ, wɔnuɔ he akɛ mɛi boŋ wɔ toi, loo amɛbaate shi amɛwo wɔ po. Mɛni baaye abua wɔ ni wɔye gbeyeishemɔ nɛɛ nɔ? Wɔbaanyɛ wɔkase Yesu bɔfoi lɛ. Be ko be ni afã amɛ ni amɛkpa shiɛmɔ lɛ, amɛhãaa gbeyei amɔ amɛ. Moŋ lɛ, amɛsɔle amɛbi Yehowa ni eye ebua amɛ koni ‘amɛya nɔ amɛwie ewiemɔ lɛ kɛ ekãa babaoo.’ Yehowa bo amɛsɔlemɔ lɛ toi amrɔ nɔŋŋ. (Bɔf. 4:​18, 29, 31) Kɛ́ bei komɛi lɛ, wɔsheɔ gbeyei akɛ mɛi boŋ wɔ toi, loo amɛbaate shi amɛwo wɔ lɛ, esa akɛ wɔ hu wɔsɔle wɔhã Yehowa ni wɔbi lɛ ni ehã wɔjwɛŋ suɔmɔ ni wɔyɔɔ kɛhã mɛi lɛ he koni wɔkashe gbeyei.

10. Mɛɛ gbɛ nɔ Yehowa yeɔ ebuaa wɔ koni wɔya nɔ wɔye ehe odase? (Yesaia 43:​10-12)

 ¹⁰ Yehowa kɛɛ wɔji e-Dasefoi, ni ewo shi akɛ ebaaye ebua wɔ ni wɔfee ekãa. (Kanemɔ Yesaia 43:​10-12.) Naa gbɛi ni Yehowa tsɔɔ nɔ efeɔ nakai lɛ ateŋ ejwɛ. Klɛŋklɛŋ lɛ, be fɛɛ be ni wɔbaashiɛ sane kpakpa lɛ, Yesu fata wɔhe. (Mat. 28:​18-20) Nɔ ni ji enyɔ lɛ, Yehowa tsɔɔ ŋwɛibɔfoi lɛ anɔ eyeɔ ebuaa wɔ. (Kpo. 14:6) Nɔ ni ji etɛ lɛ, Yehowa kɛ emumɔŋ krɔŋkrɔŋ lɛ yeɔ ebuaa wɔ koni wɔkai nibii ni wɔkase lɛ. (Yoh. 14:​25, 26) Nɔ ni ji ejwɛ lɛ, Yehowa edro wɔ nyɛmimɛi ni fataa wɔhe kɛyaa shiɛmɔ. Yelikɛbuamɔ ni Yehowa kɛhãa wɔ nɛɛ kɛ bɔ ni wɔnyɛmimɛi ni sumɔɔ wɔ lɛ hu yeɔ amɛbuaa wɔ lɛ hewɔ lɛ, wɔbaanyɛ wɔfee ekãa ni wɔya nɔ wɔshiɛ.

KAAHÃ EWA KƐHÃ BO AKƐ OBAATSAKE OSHIƐMƆ LƐ MLI, NI TSAKEMƆ JWƐŊMƆ NI OHIƐ YƐ SHIƐMƆ NITSUMƆ LƐ HE

11. Te obaafee tɛŋŋ onine ashɛ mɛi pii anɔ yɛ shiɛmɔ nitsumɔ lɛ mli? (Kwɛmɔ mfoniri lɛ hu.)

¹¹ Bei pii kɛ́ otee shiɛmɔ ni onaaa mɔ ko yɛ shĩa lɛ, ani no hãa omiishɛɛ tãa? Kɛ́ eba lɛ nakai lɛ, bi ohe akɛ: ‘Nɛgbɛ manyɛ mana mɛi lɛ yɛ bianɛ?’ (Bɔf. 16:13) ‘Ani benɛ amɛtee nitsumɔ loo amɛtee amɛmiiye jara?’ Kɛ́ nakai ni lɛ, ekolɛ ebaafee nɔ ni hi moŋ akɛ obaayaye odase yɛ shwapoi anaa kɛ nitsumɔhei. Nyɛmi nuu ko ni atsɛɔ lɛ Joshua lɛ wie akɛ, “Bei pii kɛ́ mitee jarayelihei loo hei ni mɛi fɔɔ yaa lɛ, mináa hegbɛ miyeɔ mɛi odase yɛ jɛmɛ.” Ekɛ eŋa Bridget ena akɛ, kɛ́ amɛtee shiɛmɔ gbɛkɛnaashi loo Hɔgbaa shwane lɛ, amɛnaa mɛi pii yɛ shĩa.—Efe. 5:​15, 16.

12. Mɛni obaanyɛ ofee koni okɛna nɔ ni amɛbaasumɔ ni okɛ amɛ agba he sane loo nɔ ni mɛi heɔ amɛyeɔ?

¹² Kɛ́ ona akɛ mɛi nyaaa wɔsane lɛ he tsɔ yɛ nyɛshikpɔŋkuku lɛ mli lɛ, mɛni obaanyɛ ofee koni okɛna nɔ ni amɛbaasumɔ ni okɛ amɛ agba he sane loo nɔ ni amɛheɔ amɛyeɔ? Joshua kɛ Bridget kɛ sanebimɔ ni yɔɔ wɔtrati lɛ ahiɛ lɛ fɔɔ nitsumɔ. Akɛ nɔkwɛmɔnɔ lɛ, kɛ́ amɛkɛ trati ni yitso ji, Te Onaa Biblia Lɛ Ohãa Tɛŋŋ? lɛ miitsu nii lɛ, amɛwieɔ nɔ ko tamɔ nɛkɛ: “Mɛi komɛi naa Biblia lɛ akɛ wolo ni jɛ Nyɔŋmɔ ŋɔɔ, mɛi komɛi hu enaaa lɛ nakai. Te bo hu onaa lɛ tɛŋŋ?” Bei pii lɛ, enɛ gbeleɔ gbɛ ni amɛnyɛɔ amɛkɛ mɔ lɛ gbaa sane.

13. Mɛni hewɔ kɛ́ wɔtee shiɛmɔ ni mɛi booo wɔ toi po lɛ, esaaa akɛ wɔhãa no fiteɔ wɔmiishɛɛ lɛ? (Abɛi 27:11)

 ¹³ Kɛ́ mɛi booo wɔ toi po lɛ, esaaa akɛ wɔhãa no fiteɔ wɔmiishɛɛ. Mɛni hewɔ? Ejaakɛ wɔtsu nɔ ni Yehowa kɛ e-Bi lɛ kɛɛ wɔtsu lɛ, no ji wɔye odase. (Bɔf. 10:42) No hewɔ lɛ, kɛ́ wɔyanaaa mɔ ko loo mɛi lɛ booo wɔ toi po lɛ, esa akɛ wɔná miishɛɛ, ejaakɛ wɔfee nɔ ni sa wɔ-Tsɛ ni yɔɔ ŋwɛi lɛ hiɛ.—Kanemɔ Abɛi 27:11.

14. Mɛni hewɔ esa akɛ wɔná miishɛɛ kɛ́ shiɛlɔ ko ná mɔ ko yɛ shikpɔŋkuku lɛ mli ni ekɛ lɛ bɔi nikasemɔ?

¹⁴ Kɛ́ shiɛlɔ ko ná mɔ ko yɛ shikpɔŋkuku lɛ mli ni ekɛ lɛ bɔi nikasemɔ lɛ, esa akɛ no hu ahã wɔná miishɛɛ. Mɛni hewɔ? Buu-Mɔɔ ko kɛ wɔshiɛmɔ nitsumɔ lɛ to mɛi komɛi ni miitao gbekɛ ko ni elaaje lɛ he. Mɛi babaoo ni yataoɔ gbekɛ lɛ, ni esoro he ni mɔ fɛɛ mɔ taoɔ lɛ yɛ. Kɛ́ ana gbekɛ lɛ, jeee mɔ ni na lɛ lɛ pɛ ni náa miishɛɛ, shi moŋ lɛ, mɛi fɛɛ ni yatao lɛ lɛ. Nakai nɔŋŋ mɛi ni yɔɔ asafo lɛ mli lɛ fɛɛ yaa amɛyataoɔ mɛi ni baanyɛ atsɔmɔ Yesu kaselɔi lɛ. Mɔ fɛɛ mɔ tsuɔ nii yɛ shikpɔŋkuku lɛ mli hei srɔtoi, ni kɛ́ aná mɔ hee ko ni ebɔi asafoŋ kpeeibaa lɛ, mɔ fɛɛ mɔ náa miishɛɛ.

OKƐ OJWƐŊMƆ AMA SUƆMƆ NI OYƆƆ KƐHÃ YEHOWA KƐ ONYƐMI GBƆMƆ LƐ NƆ

15. Kɛ́ wɔkɛ wiemɔi ni yɔɔ Mateo 22:​37-39 lɛ tsu nii lɛ, mɛɛ gbɛ nɔ ebaaye ebua wɔ ni wɔná miishɛɛ yɛ shiɛmɔ nitsumɔ lɛ mli? (Kwɛmɔ mfoniri lɛ hu.)

¹⁵ Kɛ́ wɔkɛ wɔjwɛŋmɔ ma suɔmɔ ni wɔyɔɔ kɛhã Yehowa kɛ wɔnyɛmi gbɔmɔ nɔ lɛ, no baahã wɔná miishɛɛ pii yɛ shiɛmɔ lɛ mli. (Kanemɔ Mateo 22:​37-39.) Okɛ ojwɛŋmɔ ama bɔ ni Yehowa náa miishɛɛ ehãa kɛ́ ena akɛ wɔmiitsu nitsumɔ lɛ kɛ bɔ ni mɛi náa miishɛɛ kɛ́ amɛhã wɔkɛ amɛ bɔi Biblia lɛ kasemɔ lɛ nɔ. Agbɛnɛ hu, hã ehi ojwɛŋmɔ mli akɛ, mɛi ni baabo wɔsane lɛ toi ni amɛbasɔmɔ Yehowa lɛ, baahi shi kɛya naanɔ.—Yoh. 6:40; 1 Tim. 4:16.

16. Kɛ́ shihilɛ ko hewɔ lɛ wɔka tsũ mli lɛ, te wɔbaafee tɛŋŋ wɔná miishɛɛ yɛ shiɛmɔ nitsumɔ lɛ mli? Gbaa niiashikpamɔ ko ni tsɔɔ nakai.

¹⁶ Ani shihilɛ ko hewɔ lɛ oka tsũ mli? Kɛ́ nakai lɛ, kwɛmɔ akɛ mɛni obaanyɛ ofee kɛtsɔɔ akɛ osumɔɔ Yehowa kɛ onyɛmi gbɔmɔ. Akɛ nɔkwɛmɔnɔ lɛ, be ni COVID-19 hela lɛ ba lɛ, Samuel kɛ eŋa Dania nyɛɛɛ aje kpo kɛya he ko he ko. Yɛ be ni mli wa nɛɛ mli lɛ, amɛtsɔ tɛlifoŋ kɛ lɛtaŋmaa nɔ amɛye mɛi odase, ni amɛkɛ mɛi kase Biblia lɛ kɛtsɔ Zoom nɔ. Akɛni  Samuel miiye kansa hewɔ lɛ, yɛ be kɛ beiaŋ lɛ, eyaa helatsamɔhe lɛ ni akwɛɔ lɛ. Be fɛɛ be ni ebaaya jɛmɛ lɛ, eyeɔ mɛi ni ekɛkpeɔ yɛ jɛmɛ lɛ odase. Ewie akɛ: “Kɛ́ wɔmiitsɔ shihilɛ ko ni mli wa mli lɛ, bei pii lɛ, wɔyeɔ wɔtsui waa, wɔnuɔ tɔlɛ he, ni ewaa kɛhãa wɔ akɛ wɔbaafi shi. No hewɔ lɛ, esa akɛ wɔfee nibii ni baahã wɔná miishɛɛ yɛ Yehowa sɔɔmɔ lɛ mli.” Yɛ nakai be lɛ mli nɔŋŋ lɛ, eŋa Dania gbee shi ni eka saa mli nyɔji etɛ. Sɛɛ mli be ni ekɔ nɔ saŋŋ lɛ, ehe bahia ni eta helatsɛmɛi ashwiili mli kɛya kɛba, ni efee enɛ nyɔji ekpaa. Dania wie akɛ: “Mifeɔ nɔ fɛɛ nɔ ni manyɛ yɛ mishihilɛ lɛ naa. Miye nɛɛsifonyo ni bakwɛɔ mi yɛ shĩa lɛ odase, ni mikɛ mɛi ni kɛ nibii bahãa wɔ yɛ shĩa lɛ hu gbaa sane. Agbɛnɛ hu, mikɛ yoo ko ni tsuɔ nii yɛ he ko ni ahɔ̃ɔ nibii ni akɛkwɛɔ helatsɛmɛi yɛ lɛ gba sane jogbaŋŋ yɛ tɛlifoŋ nɔ.” Eyɛ mli akɛ Samuel kɛ Dania shihilɛ lɛ hewɔ lɛ, amɛnyɛɛɛ amɛtsu babaoo tamɔ tsutsu lɛ moŋ, shi amɛfee nɔ ni amɛbaanyɛ, ni amɛná miishɛɛ waa.

17. Mɛni baaye abua bo ni oná ŋaawoi ni akɛhã yɛ nikasemɔ nɛɛ mli lɛ ahe sɛɛ jogbaŋŋ?

¹⁷ Nɔ ni baahã oná ŋaawoi enumɔ ni awie he yɛ nikasemɔ nɛɛ mli lɛ ahe sɛɛ jogbaŋŋ ji, ni okɛ fɛɛ baatsu nii. Amɛtamɔ nibii srɔtoisrɔtoi ni akɛhoɔ nii. Ja okɛ nakai nibii lɛ fɛɛ efutu kɛhoo nii lɛ, dani niyenii lɛ ŋɔɔ waa. Kɛ́ okɛ ŋaawoi nɛɛ fɛɛ tsu nii lɛ, no baaye abua bo ni onyɛ oye nibii ni hãa shiɛmɔ nitsumɔ lɛ waa kɛhãa bo lɛ anɔ, ni obaaná miishɛɛ waa yɛ shiɛmɔ nitsumɔ lɛ mli.