Ani Ole?
Mɛni hewɔ mɛi ni jeee Israelbii fata Maŋtsɛ David asraafoi lɛ ahe lɛ?
HII ni jeee Israelbii ni fata David asraafoi lɛ ahe lɛ ekomɛi ji Zelek, Amonnyo lɛ, Uria, Hitnyo lɛ, kɛ Itma, Moabnyo lɛ. a (1 Kro. 11:39, 41, 46) ‘Keretifoi lɛ, kɛ Peletifoi lɛ, kɛ Gatbii lɛ’ hu fata David asraafoi lɛ ahe. (2 Sam. 15:18) Etamɔ nɔ ni Keretifoi lɛ kɛ Peletifoi lɛ kɛ Filistibii lɛ yɛ tsakpaa waa. (Eze. 25:16) Gatbii lɛ hu jɛ Filistibii lɛ amaŋ ko ni atsɛɔ lɛ Gat lɛ mli.—Yos. 13:2, 3; 1 Sam. 6:17, 18.
Mɛni hewɔ David ŋmɛ gbɛ ni hii ni jeee Israelbii lɛ bafata esraafoi lɛ ahe? David le hii nɛɛ jogbaŋŋ ni ele akɛ amɛyeɔ lɛ anɔkwa, ni nɔ ni fe fɛɛ lɛ, amɛyeɔ Yehowa hu anɔkwa. Akɛ nɔkwɛmɔnɔ lɛ, The New Interpreter’s Dictionary of the Bible lɛ wie yɛ Keretifoi lɛ kɛ Peletifoi lɛ ahe akɛ: “Be ni nibii amli bawa waa yɛ David nɔyeli lɛ mli lɛ, amɛye lɛ anɔkwa.” Mɛni amɛfee ni tsɔɔ nakai? Be ni “Israel hii lɛ fɛɛ” je Maŋtsɛ David sɛɛ kɛyanyiɛ sanetsɛ ko ni “atsɛɔ lɛ Sheba” lɛ sɛɛ lɛ, Keretifoi lɛ kɛ Peletifoi lɛ ejeee David sɛɛ, moŋ lɛ amɛye amɛbua kɛku Sheba atuatsemɔ lɛ naa. (2 Sam. 20:1, 2, 7) Be ko hu lɛ, Maŋtsɛ David binuu Adonia ka akɛ ebaashɔ̃ maŋtsɛyeli lɛ. Shi Keretifoi lɛ kɛ Peletifoi lɛ tee nɔ amɛfi David sɛɛ, ni amɛye amɛbua ni awó Solomon, mɔ ni Yehowa ehala akɛ eye David sɛɛ lɛ, maŋtsɛ.—1 Maŋ. 1:24-27, 38, 39.
Mɔ kroko hu ni jeee Israelnyo shi eye David anɔkwa waa ji Itai, Gatnyo lɛ. Be ni Maŋtsɛ David binuu Absalom dɔ Israel hii lɛ atsui koni amɛwó lɛ maŋtsɛ yɛ etsɛ David najiaŋ lɛ, Itai kɛ ehii kãkãlɔi 600 lɛ ye amɛbua David. Kulɛ, David sumɔɔɔ ni Itai wuɔ ehãa lɛ, ejaakɛ ejeee Israelnyo. Shi Itai kɛɛ lɛ akɛ: “Gbii abɔ ni Yehowa hiɛ kã ni minuŋtsɔ maŋtsɛ hu hiɛ kã nɛɛ, he fɛɛ he ni minuŋtsɔ maŋtsɛ baahi lɛ, gbele mli jio, wala mli jio, jɛmɛ otsulɔ baahi!”—2 Sam. 15:6, 18-21.
Itai ye David, mɔ ni Yehowa ehala akɛ maŋtsɛ lɛ anɔkwa
Eyɛ mli akɛ Keretifoi lɛ, Peletifoi lɛ, kɛ Gatbii lɛ jeee Israelbii moŋ, shi amɛhe amɛye akɛ Yehowa ji anɔkwa Nyɔŋmɔ lɛ, ni David ji mɔ ni Yehowa ehala akɛ eye maŋtsɛ. Ŋwanejee ko bɛ he akɛ, David hiɛ sɔ hii ni ye lɛ anɔkwa nɛɛ waa!
a Yɛ 5 Mose 23:3-6 lɛ, Nyɔŋmɔ wo mla akɛ, Amonbii kɛ Moabbii akaba Israelbii lɛ ateŋ. Etamɔ nɔ ni mla nɛɛ etsɔɔɔ akɛ mɛi ni jɛ maji nɛɛ anɔ lɛ nyɛŋ amɛkɛ Nyɔŋmɔ webii lɛ abɔ loo amɛhi amɛteŋ. Nɔ moŋ ni etsɔɔ ji, jeee nibii fɛɛ ni Israelbii lɛ feɔ lɛ aŋmɛɔ amɛ gbɛ ni amɛfee. Yaa saneyitso ni ji, “Ammonites” ni yɔɔ Insight on the Scriptures wolo lɛ mli lɛ, ni okwɛ saneyitso fioo ni ji, “Intermarriage With Israelites” lɛ.
