1. Mɛni wɔteŋ mɔ fɛɛ mɔ shweɔ ehãa ewekumɛi?

NYƐMI yoo ko ni atsɛɔ lɛ Pauline * lɛ wie akɛ: “Kɛjɛ be ni mibana anɔkwale lɛ tɔ̃ɔ lɛ, nɔ ni mishweɔ ji ni mi kɛ miweku lɛ mli bii fɛɛ ahi Paradeiso.” Ewie kɛfata he akɛ: “Miwu, Wayne, kɛ wɔbinuu fioo lɛ ji mɛi titri ni mishwe waa akɛ amɛbafata mihe kɛsɔmɔ Yehowa.” Ni bo hu? Ani oyɛ wekumɛi * ni sɔmɔɔɔ Yehowa? Kɛ́ nakai ni lɛ, belɛ ekolɛ bo hu onuɔ he tamɔ bɔ ni Pauline nu he lɛ.

2. Mɛɛ sanebimɔi wɔbaahã hetoo yɛ nikasemɔ nɛɛ mli?

² Wɔnyɛŋ wɔkɛ sane kpakpa lɛ afi wɔwekumɛi lɛ anɔ. Kɛ̃lɛ, nibii komɛi yɛ ni wɔbaanyɛ wɔfee kɛwo amɛ hewalɛ ni amɛná sane kpakpa lɛ he miishɛɛ. (2 Tim. 3:14, 15) Mɛni hewɔ esa akɛ wɔye wɔwekumɛi odase? Mɛni hewɔ ehe miihia ni wɔnu amɛ shishi lɛ? Mɛni wɔbaanyɛ wɔfee kɛye wɔbua amɛ ni amɛbasumɔ Yehowa tamɔ bɔ ni wɔ hu wɔsumɔɔ lɛ lɛ? Ni mɛni asafoŋbii lɛ baanyɛ afee kɛye amɛbua?

3. Yɛ nɔ ni aŋma yɛ 2 Petro 3:9 lɛ naa lɛ, mɛni hewɔ esa akɛ wɔye wɔwekumɛi odase?

³ Etsɛŋ, Yehowa baakpãtã jeŋ fɔŋ nɛɛ hiɛ. Mɛi ni ‘yɔɔ anɔkwale lɛ he tsui kpakpa lɛ’ pɛ yiwala abaahere. (Bɔf. 13:48) Wɔkɛ wɔbe kɛ wɔhewalɛ shãa afɔle ni wɔyashiɛɔ wɔhãa mɛi kpɔji yɛ maŋ lɛ mli. No hewɔ lɛ, ebɛ naakpɛɛ kwraa akɛ wɔbaasumɔ  ni wɔwekumɛi lɛ hu abakase anɔkwale lɛ ni amɛkɛ wɔ fɛɛ asɔmɔ Yehowa. Yehowa, wɔ-Tsɛ ni yɔɔ suɔmɔ lɛ, sumɔɔɔ akɛ “akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.”​—Kanemɔ 2 Petro 3:9.

4. Mɛɛ tɔmɔ wɔteŋ mɛi komɛi tɔ̃ɔ kɛ́ wɔmiishiɛ wɔmiihã wɔwekumɛi?

⁴ Esa akɛ wɔhã ehi wɔjwɛŋmɔ mli be fɛɛ be akɛ, ayɛ gbɛ ni ja ni atsɔɔ nɔ ashiɛɔ sane kpakpa lɛ, ni ayɛ gbɛ ni ejaaa hu. Bei pii lɛ, kɛ́ wɔmiishiɛ wɔmiihã mɛi yɛ maŋ lɛ mli lɛ, wɔtoɔ wɔtsui shi ni wɔkwɛɔ wɔwiemɔ jogbaŋŋ. Shi ekolɛ jeee nakai wɔfeɔ kɛ́ wɔmiishiɛ wɔmiihã wɔwekumɛi.

5. Kɛ́ wɔyaashiɛ wɔhã wɔwekumɛi lɛ, mɛni esa akɛ wɔhã ehi wɔjwɛŋmɔ mli?

⁵ Wɔteŋ mɛi pii yɛ ni kɛ́ wɔkai bɔ ni wɔfee wɔnii wɔhã be klɛŋklɛŋ ni wɔka akɛ wɔbaaye wɔwekumɛi lɛ odase lɛ, edɔɔ wɔ waa, ni wɔná kulɛ, wɔfeee wɔnii nakai. Bɔfo Paulo wo Kristofoi ŋaa akɛ: “Nyɛhãa nyɛwiemɔ he abaa nyam daa, kɛ́ wɔɔkɛɛ lɛ, ŋoo ahi mli, koni nyɛle bɔ ni sa akɛ nyɛhã mɔ fɛɛ mɔ hetoo.” (Kol. 4:5, 6) Esa akɛ wɔkai ŋaawoo nɛɛ kɛ́ wɔkɛ wɔwekumɛi lɛ yaagba Biblia lɛ he sane, kɛjeee nakai lɛ, wɔbaahã amɛmli afu wɔ moŋ fe ni amɛbaabo wɔ toi.

6-7. Okɛ nɔkwɛmɔnɔ ahã kɛtsɔɔ nɔ hewɔ ni ehe miihia ni wɔkɛ wɔhe awo wɔhefatalɔi ni bɛ anɔkwale lɛ mli lɛ ashihilɛ mli.

⁶ Okɛ ohe awo amɛshihilɛ mli. Pauline, ni wɔtsĩ etã kɛtsɔ hiɛ lɛ, wie akɛ: “Shishijee mli lɛ, Nyɔŋmɔ kɛ Biblia lɛ he sane sɔŋŋ mikɛ miwu lɛ gbaa. Wɔgbaaa nibii krokomɛi ahe sane.” Shi no mli lɛ, nɔ ko fioo pɛ Pauline wu, Wayne, le yɛ Biblia lɛ he, ni no hewɔ lɛ, enuuu nibii ni Pauline kɛ lɛ gbaa lɛ  ashishi. Enu he akɛ ejamɔ lɛ miiye lɛ sɛkɛ, ni akɛ, ekɛ ehe eyadɔmɔ kuu ko ni yɔɔ oshãra, ni aalaka lɛ.

⁷ Nakai beiaŋ lɛ, Pauline efɔɔɔ shĩa hilɛ gbɛkɛgbɛkɛ kɛ Hɔɔ kɛ Hɔgbaa. Kɛjeee shiɛmɔ loo asafoŋ kpeei etee lɛ, belɛ etee eyaasara nyɛmi ko. Ewie akɛ: “Bei komɛi lɛ, be ni Wayne baaba shĩa lɛ, mɔ ko mɔ ko bɛ shĩa, ni ehe feɔ shoo.” Wayne ná kulɛ, eŋa lɛ kɛ ebinuu lɛ ta shĩa fioo. No mli lɛ, eleee mɛi ni amɛkɛbɔɔ, ni enu he akɛ eŋa lɛ buɔ enanemɛi hei lɛ akɛ amɛhe miihia fe lɛ. No hewɔ lɛ, ekɛɛ Pauline akɛ kɛ́ ekɛ amɛ kpaaa bɔɔ lɛ, ebaatse lɛ gbãla. Ani oona nibii komɛi ni kulɛ Pauline baanyɛ afee kɛtsɔɔ akɛ ekɛ ehe miiwo ewu lɛ shihilɛ mli?

8. Mɛɛ gbɛ nɔ 1 Petro 3:1, 2 lɛ hãa wɔnaa nɔ titri ni baanyɛ aná wɔwekumɛi lɛ anɔ hewalɛ kpakpa?

⁸ Ba ojeŋ jogbaŋŋ. Bei pii lɛ, wɔnifeemɔ náa wɔwekumɛi lɛ anɔ hewalɛ waa fe wɔwiemɔ. (Kanemɔ 1 Petro 3:1, 2.) Pauline bayɔse enɛ. Ewie akɛ: “Mile akɛ Wayne sumɔɔ wɔ, ni akɛ, yɛ etsui mli lɛ, esumɔŋ ni etse mi gbãla. Shi nɔ ni ewie lɛ hã mina akɛ, mikɛ ŋaa ni Yehowa woɔ wɔ yɛ gbalashihilɛ he lɛ tsuuu nii, ni esa akɛ matsake. Mina akɛ, kɛ́ miba mijeŋ jogbaŋŋ lɛ, no baanyɛ aye abua lɛ waa fe ni mashiɛ mahã lɛ be fɛɛ be.” No hewɔ lɛ, Pauline kɛ Wayne bɔi nibii krokomɛi hu ahe sane gbaa, moŋ fe ni ekɛ lɛ baagba Biblia lɛ mli sane sɔŋŋ. Wayne na akɛ, agbɛnɛ lɛ, Pauline kɛ lɛ etaaa saji anaa tamɔ be ko ni eho, ni amɛbinuu lɛ hu jeŋba efee fɛo. (Abɛi 31:18, 27, 28) Ena akɛ, Biblia lɛ miiye eebua eŋa lɛ kɛ ebinuu lɛ. Enɛ hewɔ lɛ, egbele etsui kɛ ejwɛŋmɔ naa ehã Nyɔŋmɔ Wiemɔ lɛ.​—1 Kor. 7:12-14, 16.

9. Mɛni hewɔ esaaa akɛ wɔnijiaŋ jeɔ wui lɛ?

 ⁹ Kaahã onijiaŋ je wui. Yehowa feɔ nɔkwɛmɔnɔ kpakpa yɛ enɛ gbɛfaŋ. Ehãa mɛi fɛɛ hegbɛ shii abɔ ni amɛbo sane kpakpa lɛ toi koni ahere amɛ yiwala. (Yer. 44:4) Bɔfo Paulo hu wo Timoteo ŋaa ni eya nɔ eye ebua mɛi, ni ekahã etɔ lɛ kɛ nakai feemɔ. Mɛni hewɔ? Ejaakɛ kɛ́ efee nakai lɛ, ‘ebaahere lɛ diɛŋtsɛ kɛ mɛi ni boɔ lɛ toi lɛ fɛɛ yiwala.’ (1 Tim. 4:16) Wɔsumɔɔ wɔwekumɛi lɛ, ni wɔmiisumɔ ni amɛbale Nyɔŋmɔ Wiemɔ lɛ mli anɔkwalei lɛ. Pauline wiemɔi kɛ enifeemɔi ná ewu lɛ nɔ hewalɛ kpakpa. Sɛɛ mli lɛ, Wayne bamɔ anɔkwale lɛ mli, ni amrɔ nɛɛ ekɛ lɛ fɛɛ miisɔmɔ Yehowa kɛ miishɛɛ akɛ gbɛgbalɔi. Kɛfata he lɛ, Wayne miisɔmɔ akɛ asafoŋ onukpa.

10. Mɛni hewɔ ehe miihia ni wɔto wɔtsui shi wɔhã wɔwekumɛi lɛ?

¹⁰ Too otsui shi. Akɛni wɔkɛ Nyɔŋmɔ gbɛtsɔɔmɔi tsuɔ nii yɛ wɔshihilɛ mli hewɔ lɛ, esoro wɔhemɔkɛyeli kɛ bɔ ni wɔhiɔ shi wɔhãa, ni ekolɛ wɔwekumɛi lɛ nuŋ wɔ shishi. Bei pii lɛ, nɔ klɛŋklɛŋ ni amɛyɔseɔ ji akɛ, wɔyeee Blonya kɛ gbii juji krokomɛi ni tsutsu ko lɛ wɔkɛ amɛ fɛɛ yeɔ lɛ dɔŋŋ, ni agbɛnɛ hu, wɔkɛ wɔhe wooo pɔlitis mli dɔŋŋ. Ekolɛ shishijee lɛ, amɛteŋ mɛi komɛi po amli baafu wɔ. (Mat. 10:35, 36) Shi esa akɛ wɔná amɛhe tsui ni wɔya nɔ wɔye wɔbua amɛ. Kɛ́ wɔkɛɛ wɔgbalaŋ nibii amli wɔtsɔŋ amɛ dɔŋŋ lɛ, belɛ etsɔɔ akɛ wɔkojo amɛ akɛ mɛi ni esaaa naanɔ wala. Shi Yehowa kɛ nakai nitsumɔ lɛ hãko wɔ; ekɛwo Yesu dɛŋ. (Yoh. 5:22) Kɛ́ wɔto wɔtsui shi wɔhã wɔwekumɛi lɛ, namɔ aaale akɛ wɔsɛɛ ko lɛ, amɛbaabo wɔ toi?​—Kwɛmɔ akrabatsa ni yitso ji, “ Okɛ Wɔwɛbsaiti Lɛ Atsu Nii.”

11-13. Mɛni okaseɔ yɛ bɔ ni Alice kɛ efɔlɔi lɛ ye ehã lɛ mli?

¹¹ Okɛ ŋaa atsu nii, shi kaaŋmɛɛ saji ahe kɛsaa. (Abɛi 15:2) Susumɔ nyɛmi yoo ko ni atsɛɔ lɛ Alice lɛ niiashikpamɔ lɛ he okwɛ. Be ni akɛ lɛ bɔi Biblia lɛ kasemɔ lɛ, no mli lɛ, eyɛ maŋsɛɛ. Ena akɛ, esa akɛ egba amɛ nibii kpakpai ni ekaseɔ lɛ amrɔ nɔŋŋ. Ewie akɛ: “Kɛ́ omɛ ni etsɛ dani ohã owekumɛi lɛ le tsakemɔi ni ofee yɛ nibii ni oheɔ oyeɔ kɛ bɔ ni ohiɔ shi ohãa lɛ mli lɛ, ebaagba amɛnaa waa fe kɛ́ ohã amɛle mra.” Shi Alice fɔlɔi heee amɛyeee akɛ Nyɔŋmɔ yɛ, ni amɛsumɔɔ pɔlitis waa. No hewɔ lɛ, nɔ ni efee ji, eŋmala amɛ woji, ni ehã amɛle nɔ ni Biblia lɛ wieɔ yɛ suɔmɔ kɛ saji krokomɛi ni ele akɛ amɛbaanya he lɛ ahe, ni ebi amɛ amɛsusumɔ yɛ he. (1 Kor. 13:1-13) Eda efɔlɔi lɛ shi akɛ amɛkwɛ lɛ ni amɛtsɔse lɛ jogbaŋŋ, ni ekɛ nikeenii maje amɛ. Kɛ́ eyasara amɛ lɛ, efeɔ nɔ fɛɛ nɔ ni ebaanyɛ kɛyeɔ ebuaa emami kɛtsuɔ shĩa nii. Fɛɛ sɛɛ lɛ, efɔlɔi lɛ eyanyaaa Biblia lɛ mli sane lɛ he.

¹² Be fɛɛ be ni Alice baayasara efɔlɔi lɛ, ekɛ e-Biblia lɛ kanemɔ shwɛɛɛ kwraa; ekaneɔ daa gbi. Alice wie akɛ: “Enɛ hã mimami na akɛ, Biblia lɛ he miihia mi waa.” Alice papa hu kpɛ eyiŋ akɛ ebaakase Biblia lɛ koni ekwɛ nɔ kwraa ni yɔɔ mli ni ehã ebiyoo lɛ etsake nakai lɛ. Agbɛnɛ hu, ekɛma ehiɛ akɛ, ebaatao tɔmɔi yɛ Biblia lɛ he. Alice wie akɛ: “Mihã lɛ Biblia lɛ eko, ni miŋma nɔ ko fioo ni baata etsuiŋ yɛ mli mihã lɛ.” Ani ole nɔ ni jɛ mli kɛba? Alice papa enaaa tɔmɔ ko kwraa yɛ Biblia lɛ he. Moŋ lɛ, nibii ni ekane yɛ mli lɛ ta etsuiŋ waa.

¹³ Eyɛ mli akɛ esa akɛ wɔkɛ ŋaa atsu nii moŋ, shi ekɔɔɔ he eko nɔ ni baaba lɛ, esaaa akɛ wɔŋmɛɔ saji ahe kɛsaa. (1 Kor. 4:12b) Alice wie akɛ: “Be ni abaptisi mi lɛ, mimami kɛɛ mi akɛ ‘gbekɛ gbonyo’ ji mi.” Te Alice fee enii ehã tɛŋŋ? Ewie akɛ: “Nɔ najiaŋ ni mamua minaa lɛ, mijɛ bulɛ mli mihã mimami le akɛ, mikpɛ miyiŋ akɛ matsɔ Yehowa Odasefonyo, ni nɔ ko bɛ ni baatsake  mijwɛŋmɔ. Mihã ele hu akɛ, misumɔɔ lɛ waa. Wɔ fɛɛ wɔfó, ni mihoo niyenii ko ni ŋɔɔ waa mihã lɛ. Fiofio lɛ, mimami bana akɛ Biblia lɛ miiná minɔ hewalɛ kpakpa.”

14. Mɛni hewɔ esaaa akɛ wɔhãa wɔwekumɛi lɛ nyɛɔ wɔnɔ ni wɔŋmɛɛ saji ahe kɛsaa?

¹⁴ Ekolɛ ebaahe be dani wɔwekumɛi lɛ baana akɛ Yehowa sɔɔmɔ lɛ he miihia wɔ fe nibii krokomɛi fɛɛ yɛ shihilɛ mli. Akɛ nɔkwɛmɔnɔ lɛ, Alice fɔlɔi shwe ni eya yunivɛsiti koni ená nitsumɔ ni baahã ená shika pii. No hewɔ lɛ, be ni ekpɛ eyiŋ akɛ ebaatsu gbɛgbamɔ nitsumɔ lɛ moŋ lɛ, emami jwa yaafo ekoŋŋ. Shi Alice hãaa no atsake ejwɛŋmɔ. Ewie akɛ: “Kɛ́ ohã amɛnyɛ onɔ ni oŋmɛɛ saji ahe kɛsaa yɛ nɔ kome mli lɛ, amɛbaanyɛ onɔ ni ofee nakai nɔŋŋ yɛ saji krokomɛi hu amli. Shi kɛ́ ojɛ bulɛ mli okɛ amɛ wie, ni kɛ̃lɛ, oŋmɛɛɛ saji ahe kɛsaaa lɛ, ekolɛ amɛteŋ mɛi komɛi baabo bo toi.” Nakai eba lɛ yɛ Alice gbɛfaŋ. Ŋmɛnɛ lɛ, emami kɛ epapa fɛɛ miisɔmɔ akɛ gbɛgbalɔi, ni epapa miisɔmɔ akɛ asafoŋ onukpa.

15. Yɛ nɔ ni aŋma yɛ Mateo 5:14-16 kɛ 1 Petro 2:12 lɛ naa lɛ, mɛɛ gbɛ nɔ nyɛmimɛi krokomɛi ‘anitsumɔi kpakpai’ lɛ baanyɛ aye abua wɔwekumɛi lɛ?

¹⁵ Yehowa tsɔɔ ‘nitsumɔi kpakpai’ ni Kristofoi asafo lɛ tsuɔ lɛ nɔ egbalaa mɛi kɛbaa eŋɔɔ. (Kanemɔ Mateo 5:14-16; 1 Petro 2:12.) Kɛ́ ohefatalɔ lɛ jeee Yehowa Odasefonyo lɛ, ani okɛ nyɛmimɛi ni yɔɔ osafo lɛ mli lɛ ateŋ mɛi komɛi eŋa lɛ? Pauline, ni wɔtsĩ etã kɛtsɔ hiɛ lɛ, fɔ̃ nyɛmimɛi komɛi nine ni amɛbasara lɛ yɛ shĩa koni ewu, Wayne, ale amɛ. Wayne kaiɔ nɔ ko ni nyɛmi nuu ko fee ni hã etsake jwɛŋmɔ ni ejaaa ni ehiɛ yɛ Yehowa Odasefoi ahe lɛ kwraa. Ewie akɛ: “Ehe gbi  kome yɛ nitsumɔ mli koni ebafata mihe yɛ shĩa ni wɔkwɛ bɔɔl. Miwie yɛ miyitsoŋ akɛ, ‘Etamɔ mi nɔŋŋ!’”

16. Mɛni hewɔ esa akɛ wɔfɔ̃ wɔwekumɛi lɛ nine kɛba asafoŋ kpeei ashishi?

¹⁶ Gbɛ kome ni hi waa ni wɔbaanyɛ wɔtsɔ nɔ wɔye wɔbua wɔwekumɛi lɛ ji, ni wɔbaafɔ̃ amɛ nine kɛba asafoŋ kpeei. (1 Kor. 14:24, 25) Klɛŋklɛŋ asafoŋ kpee ni Wayne tee ji Kaimɔ lɛ, ejaakɛ gbɛkɛ afee, be ni ekpa nitsumɔ, ni esɛɛ kɛɛɛ. Ewie akɛ: “Minuuu nibii ni awie yɛ maŋshiɛmɔ lɛ mli lɛ shishi jogbaŋŋ, shi mikaiɔ bɔ ni mɛi lɛ kɛ mi ye hã lɛ. Amɛba amɛbata midɛ̃ waa, ni amɛhere mi atuu. Enɛ hã mina akɛ, gbɔmɛi kpakpai ji amɛ.” No mli lɛ, nyɛmi nuu ko kɛ eŋa yeɔ amɛbuaa Pauline waa; kɛ́ atee asafoŋ kpeei loo shiɛmɔ lɛ, amɛmɔɔ ebinuu lɛ mli amɛhãa lɛ. No hewɔ lɛ, be ni Wayne kpɛ eyiŋ akɛ ebaasumɔ ni akɛ lɛ akase Biblia lɛ, ekɛɛ nyɛmi nuu lɛ akɛ ekɛ lɛ akase.

17. Mɛni esaaa akɛ wɔshwaa wɔhe yɛ he? Ni mɛni hewɔ esa akɛ wɔya nɔ wɔye wɔbua wɔwekumɛi lɛ ni amɛbale Yehowa?

¹⁷ Wɔshwelɛ ji akɛ, wɔwekumɛi lɛ fɛɛ baaba amɛbafata wɔhe kɛsɔmɔ Yehowa. Shi yɛ mɔdɛŋ ni wɔbaabɔ kɛye wɔbua amɛ lɛ fɛɛ sɛɛ lɛ, ekolɛ amɛbaŋ anɔkwale lɛ mli. Kɛ́ eba lɛ nakai yɛ ogbɛfaŋ lɛ, esaaa akɛ oshwaa ohe. Amɛ amɛyiŋkpɛɛ ni. Onyɛŋ onyɛ amɛnɔ ni amɛmɔ anɔkwale lɛ mli. Shi, kɛ́ amɛnáaa amɛmɔ mli po lɛ, ná ole akɛ, bɔ ni okɛ miishɛɛ sɔmɔɔ Yehowa lɛ baanyɛ aná amɛnɔ hewalɛ kpakpa. No hewɔ lɛ, kaahã onijiaŋ je wui. Sɔlemɔ ohã amɛ, ni otsɔ ŋaa gbɛ nɔ okɛ amɛ awie anɔkwale lɛ he. (Bɔf. 20:20) Ná nɔmimaa akɛ, Yehowa baajɔɔ omɔdɛŋbɔi lɛ anɔ. Ni kɛ́ owekumɛi lɛ bo bo toi lɛ, abaahere amɛyiwala!