1-2. Mɛni he wɔbaasusu yɛ nikasemɔ nɛɛ mli?

KƐ́ OOMƐ ni mɔ ko kɛ nɔ ko ni he hiaa bo waa lɛ abahã bo, shi omɛ aahu ebaaa lɛ, te obaanu he ohã tɛŋŋ? Ŋwanejee ko bɛ he akɛ obaahao. Tamɔ bɔ ni awie yɛ Abɛi 13:12 lɛ: “Kɛ́ aakwɛ nɔ ko gbɛ ni ebaaa mli mra lɛ, ewoɔ tsui hela.” Shi kɛ́ sɛɛ mli lɛ oná ole akɛ, yiŋtoi kpakpai komɛi ahewɔ onine shɛko nii lɛ nɔ yɛ be ni okpaa gbɛ lɛ mli hu? Ekolɛ agbɛnɛ lɛ, ewaŋ kɛhãŋ bo akɛ obaato otsui shi omɛ.

² Yɛ nikasemɔ nɛɛ mli lɛ, wɔbaakwɛ Biblia mli shishitoo mlai komɛi ni baanyɛ aye abua wɔ ni ‘wɔto wɔtsui shi wɔmɛ.’ (Mika 7:7) No sɛɛ lɛ, wɔbaakwɛ nibii enyɔ amli ni esa akɛ wɔto wɔtsui shi wɔmɛ Yehowa. Naagbee kwraa lɛ, wɔbaasusu jɔɔmɔi ni mɛi ni baaya nɔ amɛmɛ Yehowa lɛ baaná lɛ ahe.

3. Mɛni wɔbaanyɛ wɔkase yɛ Abɛi 13:11 lɛ mli?

³ Ŋmalɛ ko ni hãa wɔnaa akɛ esa akɛ wɔto wɔtsui shi ji Abɛi 13:11. Jɛmɛ kɛɔ akɛ: “Nii ni anáa lɛ oya lɛ, ebaatã, shi mɔ ni buaa nii anaa fiofio lɛ, ebaaná nii pii.” Mɛni wɔkaseɔ yɛ ŋmalɛ nɛɛ mli? No ji akɛ, kɛ́ wɔmiifee nɔ ko ni wɔto wɔtsui shi fiofio ni wɔfee lɛ jogbaŋŋ lɛ, ewoɔ yibii kpakpai.

4. Mɛni wɔbaanyɛ wɔkase yɛ Abɛi 4:18 lɛ mli?

⁴ Abɛi 4:18 lɛ hu kɛɔ wɔ akɛ, “Jalɔi agbɛ lɛ tamɔ leebi la ni yaa nɔ ekpɛɔ fiofio kɛyashiɔ shwane fintiŋŋ.” Ŋmalɛ nɛɛ hãa  wɔnaa faŋŋ akɛ, Yehowa yeɔ ebuaa ewebii lɛ ni amɛnuɔ nɔ ni eto eyiŋ akɛ ebaafee lɛ shishi fiofio. Shi ŋmalɛ nɛɛ baanyɛ aye abua wɔ ni wɔnu bɔ ni Kristofonyo ko yaa ehiɛ lɛ shishi. Ehãa wɔnaa akɛ eheɔ be, ni anyɛŋ awo lɛ foi. Kɛ́ wɔkase Nyɔŋmɔ Wiemɔ lɛ jogbaŋŋ, ni wɔkɛ nibii ni asafo lɛ hu tsɔɔ wɔ lɛ tsu nii lɛ, fiofio lɛ, wɔbaasusu nii ahe ni wɔbaafee wɔnii tamɔ Kristo. Agbɛnɛ hu, wɔbaale Yehowa jogbaŋŋ. Naa nɔkwɛmɔnɔ ko ni Yesu kɛtsɔɔ oti nɛɛ mli.

5. Mɛɛ nɔkwɛmɔnɔ Yesu kɛtsɔɔ akɛ eheɔ be dani mɔ ko nyɛɔ efeɔ tsakemɔi yɛ eshihilɛ mli?

⁵ Yesu gba nɔkwɛmɔnɔ ko kɛtsɔɔ akɛ Maŋtsɛyeli sane lɛ tamɔ dumɔwu bibioo ko ni daa yɛ mɛi ni sumɔɔ ni amɛfee nɔ ni ja lɛ atsui mli. Ewie akɛ: “Dumɔwui lɛ kwɛ̃ɔ ni amɛdaraa​—shi [nidulɔ lɛ leee] bɔ ni feɔ ni ebaa lɛ nakai. Fiofio lɛ, shikpɔŋ lɛ diɛŋtsɛ woɔ yibii, klɛŋklɛŋ lɛ, jwɛi fɔ lɛ kwɛ̃ɔ, no sɛɛ lɛ, ŋmaa tso lɛ, naagbee lɛ ŋmaa lɛ woɔ yɛ ŋmaa tso lɛ yi.” (Mar. 4:27, 28) Mɛni nɔ ni Yesu wie nɛɛ tsɔɔ? Bɔ ni kɛ́ adu nii lɛ ekwɛ̃ɔ fiofio lɛ, nakai nɔŋŋ mɔ ko ni mɔɔ Maŋtsɛyeli sane lɛ mli lɛ hu yaa ehiɛ ni efeɔ tsakemɔi fiofio. Akɛ nɔkwɛmɔnɔ lɛ, kɛ́ wekukpaa ni yɔɔ wɔ-Biblia mli nikaselɔ ko kɛ Yehowa teŋ lɛ mli bɔi waa fiofio lɛ, wɔnaa akɛ efeɔ tsakemɔi fiofio yɛ eshihilɛ mli. (Efe. 4:22-24) Shi esa ni wɔkai akɛ Yehowa ji mɔ ni hãa nɔ ni adu yɛ etsui mli lɛ yaa nɔ edaa.​—1 Kor. 3:7.

6-7. Mɛni wɔkaseɔ kɛjɛɔ bɔ ni Yehowa bɔ shikpɔŋ lɛ ehã lɛ mli?

⁶ Kɛ́ Yehowa miifee nɔ ko lɛ, etoɔ etsui shi ni efeɔ lɛ jogbaŋŋ. Efeɔ nakai koni ekɛwo egbɛ́i lɛ hiɛ nyam, ni agbɛnɛ hu, mɛi aná nɔ ni efeɔ lɛ he sɛɛ. Akɛ nɔkwɛmɔnɔ lɛ, bo lɛ susumɔ bɔ ni Yehowa to etsui shi esaa shikpɔŋ lɛ nɔ fiofio ehã adesai lɛ he okwɛ.

⁷ Biblia lɛ hãa wɔleɔ akɛ be ni Yehowa bɔɔ shikpɔŋ lɛ, ‘ekpã susumɔ kpãa mli’ kɛsusu, ekɛ “enɔdaamɔnii lɛ hɔlɔ” shi, ni ekɛ “ekoŋtɛ lɛ ma shi.” (Hiob 38:5, 6) Ehãa wɔleɔ po akɛ, kɛ́ Yehowa bɔ nɔ ko egbe naa lɛ, eheɔ be kɛkwɛɔ nɔ ni ebɔ lɛ ni enaa akɛ ehi dani etsaa nɔ. (1 Mo. 1:10, 12) Kɛ́ okwɛ lɛ, te ŋwɛibɔfoi lɛ  nu he amɛhã tɛŋŋ be fɛɛ be ni amɛna akɛ Yehowa ebɔ nɔ ko hee lɛ? Ŋwanejee ko bɛ he akɛ, amɛná miishɛɛ waa. Anɔkwa, Biblia lɛ kɛɛ ŋwɛibɔfoi lɛ “bolɔ kɛ miishɛɛ.” (Hiob 38:7) Mɛni wɔkaseɔ yɛ enɛ mli? Be ni Yehowa bɔɔ shikpɔŋ lɛ kɛ ŋulamii lɛ kɛ nibii krokomɛi fɛɛ ni yɔɔ wala mli lɛ, ehe lɛ afii akpei abɔ dani egbe naa. Shi be ni Yehowa kwɛ nibii fɛɛ ni eto etsui shi efee lɛ, ewie akɛ “ehi jogbaŋŋ diɛŋtsɛ.”​—1 Mo. 1:31.

8. Mɛni wɔbaasusu he agbɛnɛ?

⁸ Nɔkwɛmɔnii srɔtoi ni wɔsusu he kɛtsɔ hiɛ lɛ ehã wɔna akɛ, shishitoo mlai pii yɛ Nyɔŋmɔ Wiemɔ lɛ mli ni hãa wɔnaa akɛ esa akɛ wɔto wɔtsui shi. Agbɛnɛ, nyɛhãa wɔkwɛa shihilɛi enyɔ amli ni ehe baahia ni wɔto wɔtsui shi wɔmɛ Yehowa.

9. Mɛɛ shihilɛ mli esa akɛ wɔto wɔtsui shi wɔmɛ Yehowa?

⁹ Esa akɛ wɔto wɔtsui shi wɔmɛ Yehowa ni ehã wɔsɔlemɔi lɛ ahetoo. Kɛ́ wɔsɔle wɔbi Yehowa ni eye ebua wɔ koni wɔnyɛ wɔdamɔ naagba ko naa loo wɔnyɛ wɔkpa nɔ ko ni wɔfeɔ ni esaaa ehiɛ lɛ, ekolɛ wɔbaanu he akɛ Yehowa sɛɛ miitsɛ kɛ wɔsɔlemɔ lɛ hetoo hãmɔ. Mɛni hewɔ Yehowa hãaa wɔsɔlemɔi lɛ eko fɛɛ eko hetoo amrɔ nɔŋŋ?

10. Mɛni hewɔ esa akɛ wɔto wɔtsui shi wɔmɛ Yehowa ni ehã wɔsɔlemɔi lɛ ahetoo?

¹⁰ Yehowa boɔ wɔsɔlemɔi atoi jogbaŋŋ. (Lala 65:2) Kɛ́ wɔsɔle wɔhã Yehowa ni wɔgba lɛ wɔnaagbai lɛ, no hãa enaa akɛ wɔheɔ lɛ wɔyeɔ. (Heb. 11:6) Agbɛnɛ hu, kɛ́ wɔsɔle wɔhã Yehowa ni eye ebua wɔ ni wɔfee nɔ ni sa ehiɛ lɛ, eesumɔ ni ena akɛ wɔmiifee bɔ fɛɛ bɔ ni wɔbaanyɛ koni wɔsa ehiɛ. (1 Yoh. 3:22) No hewɔ lɛ, be fɛɛ be ni wɔbaasɔle wɔhã Yehowa ni eye ebua wɔ ni wɔkpa nɔ ko ni wɔfeɔ ni esaaa ehiɛ lɛ, esa akɛ wɔto wɔtsui shi ni wɔfee bɔ fɛɛ bɔ ni wɔbaanyɛ koni wɔkpa nakai nii lɛ feemɔ. Yesu wie nɔ ko ni hãa wɔ naa akɛ jeee be fɛɛ be kɛ́ wɔsɔle lɛ, Yehowa baahã hetoo amrɔ nɔŋŋ. Ewie akɛ: “Nyɛyaa nɔ nyɛbia, ni abaahã nyɛ; nyɛyaa nɔ nyɛtaoa, ni nyɛbaana; nyɛyaa nɔ nyɛshia, ni abaagbele ahã nyɛ; ejaakɛ mɔ fɛɛ mɔ ni biɔ lɛ, nine shɛɔ nɔ, ni mɔ fɛɛ mɔ ni taoɔ lɛ naa, ni mɔ fɛɛ mɔ ni shiɔ lɛ, agbeleɔ ahãa lɛ.” (Mat. 7:7, 8) Kɛ́ wɔbo ŋaawoo nɛɛ toi ni ‘wɔhiɛ sɔlemɔ mli daa’ lɛ, wɔbaanyɛ wɔhe wɔye akɛ Yehowa, wɔ-Tsɛ ni yɔɔ ŋwɛi lɛ baabo wɔ toi ni ehã wɔsɔlemɔi lɛ ahetoo.​—Kol. 4:2.

11. Mɛɛ gbɛ nɔ Hebribii 4:16 lɛ baanyɛ aye abua wɔ kɛ́ wɔsɔle yɛ nɔ ko he ni efee tamɔ nɔ ni hetoo lɛ sɛɛ miitsɛ?

¹¹ Eyɛ mli akɛ wɔbaanyɛ wɔnu he akɛ Yehowa etsɛ kɛ wɔsɔlemɔ ko hetoo hãmɔ moŋ, shi ewo shi akɛ ebaahã hetoo “yɛ be ni sa mli.” (Kanemɔ Hebribii 4:16.) No hewɔ ni esaaa akɛ wɔshwaa Yehowa kɔkɔɔkɔ kɛ́ wɔsɔle yɛ nɔ ko he ni wɔmiinu he akɛ esɛɛ miitsɛ lɛ. Akɛ nɔkwɛmɔnɔ lɛ, mɛi pii esɔle afii abɔ nɛ ni Nyɔŋmɔ Maŋtsɛyeli lɛ abakpãtã jeŋ fɔŋ nɛɛ hiɛ. Yesu po kɛɛ wɔsɔle yɛ enɛ he. (Mat. 6:10) Shi ani nilee yɛ mli akɛ mɔ ko baahã ehemɔkɛyeli mli agbɔjɔ akɛni naagbee lɛ baaa be ni lɛ loo mɔ kroko susuɔ akɛ esa akɛ eba lɛ hewɔ? Dabi, nilee bɛ mli kwraa! (Hab. 2:3; Mat. 24:44) No hewɔ lɛ, nilee yɛ mli akɛ wɔbaato wɔtsui shi wɔmɛ Yehowa ni wɔya nɔ wɔsɔle, ni wɔhe wɔye akɛ ebaahã wɔsɔlemɔi lɛ ahetoo. Yehowa eto ‘gbi kɛ ŋmɛlɛtswaa’ ni naagbee lɛ baaba, ni ebaaba nakai be lɛ pɛpɛɛpɛ. Ni nakai be lɛ baafee be ni hi jogbaŋŋ kɛhã mɛi fɛɛ ni sumɔɔ Yehowa lɛ.​—Mat. 24:36; 2 Pet. 3:15.

12. Mɛɛ be ebaanyɛ ewa waa kɛhã wɔ akɛ wɔbaato wɔtsui shi wɔmɛ?

¹² Esa akɛ wɔto wɔtsui shi wɔmɛ Yehowa  kɛji aaye wɔ sane fɔŋ ko. Yɛ je lɛ mli lɛ, bei pii lɛ akɛ mɛi yeee jogbaŋŋ yɛ nuu loo yoo ni amɛji, amɛhewolonɔ su, he ni amɛjɛ, weku mli ni amɛjɛ, loo maŋ nɔ ni amɛjɛ lɛ hewɔ. Mɛi komɛi hu yɛ ni kpa ko ni amɛje loo jwɛŋmɔŋ naagba ko ni amɛyɔɔ lɛ hewɔ lɛ, mɛi kɛ amɛ yeee jogbaŋŋ. Akɛni Yehowa Odasefoi hiɔ shi yɛ nibii ni amɛkase yɛ Biblia lɛ mli lɛ anaa hewɔ lɛ, akɛ amɛteŋ mɛi babaoo yeee jogbaŋŋ. Kɛ́ mɛi kɛ wɔ yeee jogbaŋŋ lɛ, esa akɛ wɔkai sane ko ni Yesu wie lɛ. Ewie akɛ: “Mɔ ni baafi shi kɛbaaya naagbee lɛ, lɛ eyiwala abaahere.” (Mat. 24:13) Shi kɛ́ oná ole akɛ onyɛmi Kristofonyo ko efee esha ko ni yɔɔ hiɛdɔɔ hu? Be ni abɔ asafoŋ onukpai lɛ sɛɛ lɛ, mɛni esa akɛ ofee? Esa akɛ oto otsui shi omɛ be ni asafoŋ onukpai lɛ tsuɔ sane lɛ he nii bɔ ni Yehowa miisumɔ ni amɛtsu he nii amɛhã lɛ. Mɛni hewɔ?

13. Kɛ́ mɔ ko fee esha ko ni yɔɔ hiɛdɔɔ lɛ, te Yehowa miisumɔ ni asafoŋ onukpai lɛ atsu he nii amɛhã tɛŋŋ?

¹³ Kɛ́ asafoŋ onukpai lɛ ná amɛle akɛ nyɛmi ko efee esha ko ni yɔɔ hiɛdɔɔ lɛ, amɛsɔleɔ amɛbiɔ Yehowa “hiɛshikamɔ ni jɛ ŋwɛi lɛ” koni amɛnyɛ amɛna sane lɛ bɔ ni lɛ enaa lɛ lɛ. (Yak. 3:17) Oti ni ma amɛhiɛ ji, ni amɛye amɛbua mɔ ni etɔ̃ lɛ koni eku esɛɛ kɛje ‘gbɛ gbonyo ni ekɔ lɛ nɔ.’ (Yak. 5:19, 20) Agbɛnɛ hu, amɛmiisumɔ ni amɛfee nɔ fɛɛ nɔ ni amɛbaanyɛ kɛbu asafo lɛ he, ni amɛshɛje mɛi ni efɔŋfeemɔ lɛ esa amɛhe lɛ amii. (2 Kor. 1:3, 4) Kɛ́ asafoŋ onukpai lɛ ná amɛle akɛ mɔ ko efee esha ko ni yɔɔ hiɛdɔɔ lɛ, klɛŋklɛŋ lɛ, amɛtaoɔ sane lɛ mli koni amɛle anɔkwale fɛɛ ni yɔɔ mli, ni bei komɛi lɛ enɛ heɔ be. No sɛɛ lɛ, amɛsɔleɔ ni amɛjɛɔ Ŋmalɛ lɛ mli amɛkɛ ŋaawoo ni sa hãa mɔ ni efee efɔŋ lɛ ni amɛjajeɔ lɛ “bɔ ni sa kɛkɛ.” (Yer. 30:11) Kɛ́ sane ko tamɔ nɛkɛ ba lɛ, asafoŋ onukpai lɛ tsiii be amɛwooo be mli, shi amɛyeee amɛhe oyai amɛkojooo sane lɛ hu. Kɛ́ asafoŋ onukpai lɛ tsu sane he nii bɔ ni Yehowa etsɔɔ akɛ atsu he nii lɛ, asafo muu lɛ fɛɛ náa he sɛɛ. Shi bei komɛi lɛ, be ni atsu sane lɛ he nii nɛkɛ fɛɛ sɛɛ lɛ, mɛi ni efɔŋfeemɔ lɛ esa amɛhe lɛ baaya nɔ anu dɔlɛ he. Kɛ́ eba lɛ nakai yɛ ogbɛfaŋ lɛ, mɛni obaanyɛ ofee kɛba dɔlɛ lɛ shi?

14. Kɛ́ onyɛmi Kristofonyo ko efee bo nɔ ko ni ehiii kwraa ni edɔ bo waa lɛ, mɛɛ Biblia mli sane ko baanyɛ aye abua bo?

¹⁴ Ani mɔ ko efee bo nɔ ko ni ehiii kwraa ni  edɔ bo waa? Ani mɔ lɛ onyɛmi Kristofonyo po ni? Saji pii yɛ Nyɔŋmɔ Wiemɔ lɛ mli ni baanyɛ ahã wɔna nɔ ni esa akɛ wɔfee kɛmɛ Yehowa koni etsu saji ahe nii. Ekome ji Yosef sane lɛ. Lɛ diɛŋtsɛ enyɛmimɛi fee lɛ nibii ni ehiii kwraa. Shi ebɛɛɛ amɛ ewooo emli. Moŋ lɛ, etee nɔ ekɛ enyɛmɔ fɛɛ sɔmɔ Yehowa, ni Yehowa jɔɔ lɛ waa yɛ bɔ ni eto etsui shi ni efi shi lɛ hewɔ. (1 Mo. 39:21) Be ni be shwie mli lɛ, Yosef kɛ enyɛmimɛi lɛ ahe ke amɛ ni ekɛ ejwɛŋmɔ ma bɔ ni Yehowa ejɔɔ lɛ ehã lɛ nɔ. (1 Mo. 45:5) Wɔ hu kɛ́ wɔtsi wɔbɛŋkɛ Yehowa kpaakpa, ni wɔshi sane lɛ wɔhã lɛ ni etsu he nii lɛ, ebaashɛje wɔmii tamɔ bɔ ni eshɛje Yosef mii lɛ.​—Lala 7:17; 73:28.

15. Mɛni ye ebua nyɛmi yoo ko be ni mɔ ko fee lɛ nɔ ko ni dɔ lɛ lɛ?

¹⁵ Eyɛ mli akɛ ekolɛ sane fɔŋ ni akɛbaaye wɔ lɛ naa waŋ tamɔ nɔ ni akɛye Yosef lɛ moŋ, shi bɔ fɛɛ bɔ ni fee lɛ ebaadɔ wɔ kɛ̃. Kɛ́ sane ba wɔ kɛ mɔ ko teŋ, mɔ lɛ Yehowa jálɔ ni jio, jeee Yehowa jálɔ ni jio, ni wɔkɛ Biblia mli shishitoo mlai tsu nii lɛ, wɔbaaná he sɛɛ. (Fip. 2:3, 4) Naa niiashikpamɔ ko ni tsɔɔ nakai. Nyɛmi yoo ko ná ele akɛ mɔ ko ni ekɛ lɛ tsuɔ nii lɛ gbɛɔ ehe saji fɔji eshwãa, ni enɛ dɔ lɛ waa. Shi nɔ najiaŋ ni ebaaye ehe oyai ni eyanina mɔ lɛ yɛ sane lɛ he lɛ, eto etsui shi ejwɛŋ nɔkwɛmɔnɔ ni Yesu fee lɛ he. Be ni ajɛɔ Yesu lɛ, ejɛɛɛ mɔ ko etooo najiaŋ. (1 Pet. 2:21, 23) Enɛ hewɔ lɛ, nyɛmi yoo lɛ kpɛ eyiŋ akɛ ebaaŋmɛɛ sane lɛ he kɛkɛ. Sɛɛ mli lɛ, ená ele akɛ mɔ ni yawie ehe lɛ miiye hela ko ni naa wa waa, ni ehao. No hewɔ lɛ emu sane naa akɛ, shihilɛ mli ni mɔ lɛ yɔɔ lɛ hewɔ ewie nibii ni ewie lɛ, ni ená miishɛɛ waa akɛ efi shi ni eto etsui shi yɛ nɔ ni mɔ lɛ fee lɛ fɛɛ sɛɛ. Ni enɛ hã etsui nyɔ emli.

16. Kɛ́ aye bo sane fɔŋ ko lɛ, mɛni baanyɛ ashɛje omii? (1 Petro 3:12)

¹⁶ Kɛ́ aye bo sane fɔŋ ko loo mɔ ko efee bo nɔ ko ni edɔ bo waa lɛ, esa akɛ okai akɛ Yehowa yɛ “mɛi ni tsui ekumɔ lɛ” amasɛi. (Lala 34:18) Esumɔɔ bo waa yɛ bɔ ni oto otsui shi ni oshɛ ojatsu lɛ ofɔ̃ enɔ lɛ hewɔ. (Lala 55:22) Lɛ ji shikpɔŋ lɛ fɛɛ Kojolɔ, ni enaa nɔ fɛɛ nɔ. (Kanemɔ 1 Petro 3:12.) No hewɔ lɛ, kɛ́ naagba ko miisu otsui waa ni onyɛɛɛ he nɔ ko ofee lɛ, ani obaato otsui shi omɛ Yehowa ni etsu he nii ehã bo?

17. Mɛni Yehowa ewo shi yɛ Yesaia 30:18 lɛ akɛ ebaafee ehã wɔ?

¹⁷ Etsɛŋ Yehowa wɔ-Tsɛ ni yɔɔ ŋwɛi lɛ baatsɔ e-Maŋtsɛyeli lɛ nɔ ejɔɔ wɔ waa. Yesaia 30:18 lɛ kɛɔ akɛ: “Yehowa eto etsui shi eemɛ koni edro nyɛ, ni ebaate shi ni ena nyɛ mɔbɔ. Ejaakɛ Yehowa lɛ, Nyɔŋmɔ ni yeɔ jalɛ sane ji lɛ. Mɛi fɛɛ ni mɛɔ lɛ waa lɛ yɛ miishɛɛ.” Mɛi ni mɛɔ Yehowa lɛ baaná jɔɔmɔi pii bianɛ kɛ agbɛnɛ hu wɔsɛɛ yɛ jeŋ hee lɛ mli.

18. Mɛɛ jɔɔmɔi wɔbaaná wɔsɛɛ?

¹⁸ Kɛ́ Nyɔŋmɔ webii lɛ yashɛ jeŋ hee lɛ mli lɛ, nibii ni hãa amɛhaoɔ kɛ naagbai ni amɛkɛkpeɔ ŋmɛnɛ lɛ fɛɛ sɛɛ baafo. Ayeŋ mɔ ko sane fɔŋ, ni mɔ ko hu piŋŋ dɔŋŋ. (Kpo. 21:4) Nakai beiaŋ lɛ, wɔyeŋ wɔtsui dɔŋŋ ejaakɛ wɔbaaná nɔ fɛɛ nɔ ni wɔtaoɔ lɛ ni eteke nɔ, ni nɔ ko nɔ ko ehiaŋ wɔ dɔŋŋ. (Lala 72:16; Yes. 54:13) Wɔhe baajɔ wɔ diɛŋtsɛ!

19. Yehowa miisaa wɔ fiofio kɛhã mɛni?

¹⁹ Bianɛ lɛ, Yehowa miiye eebua wɔ ni wɔye wɔsui gbohii lɛ anɔ ni wɔná sui kpakpai koni wɔhi enɔyeli lɛ shishi. No hewɔ lɛ, kaahã onijiaŋ je wui, ni kaakpa Yehowa sɔɔmɔ hu. Yehowa esaa nibii kpakpai pii eto wɔ. Hiɛnɔkamɔ nɛɛ hewɔ lɛ, nyɛhãa wɔyaa nɔ wɔtoa wɔtsui shi kɛ miishɛɛ ni wɔmɛ Yehowa ni egbe nibii fɛɛ ni etsuɔ lɛ naa!