1. Kɛ́ wɔjwɛŋ nibii fɛɛ ni Yehowa ebɔ lɛ ahe lɛ, mɛni ekolɛ wɔbaabi wɔhe?

KƐ́ WƆHE be wɔsusu nibii fɛɛ ni Yehowa ebɔ lɛ ahe lɛ, ekolɛ wɔbaabi sane ni lalatsɛ David bi lɛ eko. Ebi Yehowa yɛ sɔlemɔ mli akɛ: “Kɛ́ mikwɛ oŋwɛii lɛ, oninenaa nitsumɔi lɛ, nyɔɔŋtsere kɛ ŋulamii ni osaa oto lɛ, mɛni ji gbɔmɔ adesa ni ojwɛŋɔ ehe, kɛ gbɔmɔ bi hu, ni ogbaa ohe naa yɛ ehe?” (Lala 8:3, 4) Kɛ́ wɔ hu wɔkɛ wɔhe to ŋulamii kɛ nibii wuji krokomɛi ni Yehowa ebɔ lɛ ahe lɛ, ekolɛ efeɔ wɔ naakpɛɛ akɛ Yehowa jwɛŋɔ wɔhe. Shi nikasemɔ nɛɛ baahã wɔna akɛ, Yehowa jwɛŋɔ wɔhe waa. Ejwɛŋɔ wɔhe aahu akɛ, be ni ebɔ klɛŋklɛŋ adesai lɛ, ni ji Adam kɛ Hawa lɛ, ebu amɛ akɛ ebii.

2. Mɛɛ nitsumɔ Yehowa kɛwo Adam kɛ Hawa dɛŋ?

² Yehowa bafee Adam kɛ Hawa Tsɛ ni sumɔɔ amɛ waa, ni amɛ hu amɛbaafee eklɛŋklɛŋ bii yɛ shikpɔŋ lɛ nɔ. Yehowa kɛ nitsumɔ wo Adam kɛ Hawa dɛŋ. Ekɛɛ amɛ akɛ: “Nyɛfɔa ní nyɛyi afaa, ni nyɛyia shikpɔŋ lɛ nɔ obɔ ni nyɛkwɛa nɔ.” (1 Mo. 1:28) No hewɔ lɛ, nitsumɔ ni ekɛwo amɛdɛŋ ji, ni amɛfɔ ni amɛkwɛ shikpɔŋ lɛ nɔ. Eji amɛbo Yehowa toi, ni amɛfee nɔ fɛɛ nɔ ni ekɛɛ amɛ akɛ amɛfee lɛ kulɛ, amɛ kɛ amɛbii lɛ baahi eweku lɛ mli kɛya naanɔ.

3. Mɛni hewɔ wɔbaanyɛ wɔkɛɛ akɛ Yehowa wo Adam kɛ Hawa hiɛ nyam waa yɛ eweku lɛ mli?

³ Yehowa wo Adam kɛ Hawa hiɛ nyam waa yɛ eweku lɛ mli. Yɛ Lala 8:5 lɛ, David wie yɛ bɔ ni Yehowa bɔ gbɔmɛi ehã lɛ he  akɛ: “Shwɛ fioo ni ohã ekɛ ŋwɛibɔfoi fee pɛpɛɛpɛ, ni okɛ anunyam kɛ agbojee efi lɛ akekere.” Ŋwɛibɔfoi yɛ hewalɛ, amɛle nii, ni amɛyɛ nyɛmɔi komɛi ni adesai bɛ. (Lala 103:20) Shi nɔ ni David wie lɛ hãa wɔnaa akɛ, nɔ ko fioo pɛ amɛkɛfe adesai. Ani enɛ bɛ naakpɛɛ? Yehowa wo klɛŋklɛŋ adesai ni ebɔ lɛ ahiɛ nyam waa.

4. Mɛni Yehowa fee Adam kɛ Hawa be ni amɛgbo enɔ toi lɛ? Ni mɛni he wɔbaasusu yɛ nikasemɔ nɛɛ mli?

 ⁴ Dɔlɛ sane ji, Adam kɛ Hawa eyabooo Yehowa toi, ni no hewɔ lɛ, eshwie amɛ kɛje eweku lɛ mli. Enɛ ye amɛbii lɛ awui waa tamɔ bɔ ni wɔbaana sɛɛ mli yɛ nikasemɔ nɛɛ mli lɛ. Shi yiŋtoo hewɔ ni Yehowa bɔ adesai lɛ baaba mli. Ebaahã adesai ni boɔ lɛ toi lɛ abatsɔmɔ ebii kɛya naanɔ. Shi klɛŋklɛŋ lɛ, nyɛhãa wɔkwɛa nɔ ni Yehowa efee kɛwo wɔhiɛ nyam. No sɛɛ lɛ, wɔbaakwɛ nɔ ni esa akɛ wɔfee bianɛ kɛtsɔɔ akɛ wɔmiisumɔ ni wɔhi eweku lɛ mli. Naagbee kwraa lɛ, wɔbaakwɛ nibii kpakpai ni Yehowa baafee ehã ebii ni baahi shikpɔŋ lɛ nɔ kɛya naanɔ lɛ.

5. Mɛni wɔbaanyɛ wɔfee kɛtsɔɔ akɛ wɔhiɛ sɔɔ Yehowa waa yɛ bɔ ni ebɔ wɔ ehã lɛ hewɔ ni wɔkɛwo ehiɛ nyam?

⁵ Nɔ kome ni Yehowa efee kɛwo wɔhiɛ nyam ji, ebɔ wɔ tamɔ bɔ ni eyɔɔ lɛ. (1 Mo. 1:26, 27) Enɛ hewɔ lɛ, wɔbaanyɛ wɔkase lɛ ni wɔjie sui tamɔ suɔmɔ kɛ musuŋtsɔlɛ kpo, ni wɔye anɔkwa, ni wɔfee nɔ ni ja. (Lala 86:15; 145:17) Kɛ́ wɔjie sui nɛɛ akpo lɛ, no baahã wɔwo Yehowa hiɛ nyam, ni ebaatsɔɔ hu akɛ, wɔhiɛ sɔɔ bɔ ni ebɔ wɔ ehã lɛ. (1 Pet. 1:14-16) Kɛ́ wɔfee nɔ ni Yehowa, wɔ-Tsɛ ni yɔɔ ŋwɛi lɛ sumɔɔ lɛ, wɔmii baashɛ wɔhe ni wɔtsui baanyɔ wɔmli. Akɛni Yehowa bɔ wɔ tamɔ bɔ ni eyɔɔ lɛ hewɔ lɛ, wɔbaanyɛ wɔfee nibii ni baahã wɔhi eweku lɛ mli.

6. Be ni Yehowa bɔ shikpɔŋ lɛ, mɛni efee kɛwo adesai ahiɛ nyam?

⁶ Nɔ kroko ni Yehowa efee kɛwo wɔhiɛ nyam ji, efee shikpɔŋ lɛ fɛfɛo ehã wɔ koni wɔhi nɔ. Be ni Yehowa ebɔko adesai beebe lɛ, esaa shikpɔŋ lɛ eto amɛ. (Hiob 38:4-6; Yer. 10:12) Akɛni Yehowa susuɔ wɔhe ni emli hi hewɔ lɛ, edro wɔ nibii kpakpai pii yɛ shikpɔŋ lɛ nɔ koni wɔná miishɛɛ. (Lala 104:14, 15, 24) Yehowa kwɛ nibii ni efee lɛ, ni ‘ena akɛ ehi.’ (1 Mo. 1:10, 12, 31) Kɛkɛ ni ekɛ nibii ni ebɔ yɛ shikpɔŋ lɛ nɔ lɛ fɛɛ wo adesai adɛŋ akɛ amɛkwɛ nɔ. Kwɛ bɔ ni Yehowa wo adesai ahiɛ nyam! (Lala 8:6) Nyɔŋmɔ ewo shi akɛ wɔsɛɛ lɛ, adesai ni yeɔ emuu baakwɛ shikpɔŋ lɛ nɔ kɛya naanɔ, ni amɛbaaná miishɛɛ. Ani odaa Yehowa shi daa gbi yɛ shiwoo nɛɛ hewɔ?

7. Mɛni awie yɛ Yoshua 24:15 ni hãa wɔnaa akɛ Yehowa edro adesai heyeli?

⁷ Nɔ kroko ni Yehowa efee kɛwo wɔhiɛ nyam ji, ehã wɔ hegbɛ ni wɔ diɛŋtsɛ wɔkpɛ wɔyiŋ yɛ saji ahe. Wɔbaanyɛ wɔkpɛ yiŋ fɛɛ yiŋ ni wɔsumɔɔ yɛ shihilɛ mli. (Kanemɔ Yoshua 24:15.) Hegbɛ nɛɛ ni Yehowa ehã wɔ lɛ ji nɔ ni afɔɔ lɛ tsɛmɔ akɛ heyeli lɛ. Kɛ́ wɔkpɛ wɔyiŋ akɛ wɔbaasɔmɔ Yehowa lɛ, ebaaná miishɛɛ waa. (Lala 84:11; Abɛi 27:11) Heyeli ni Yehowa ehã wɔ lɛ hewɔ lɛ, wɔbaanyɛ wɔkpɛ yiŋ kpakpai krokomɛi hu. Hã wɔkwɛ nɔkwɛmɔnɔ kpakpa ni Yesu fee yɛ enɛ mli.

8. Tsɔɔmɔ gbɛ kome ni Yesu kɛ heyeli ni eyɔɔ lɛ tsu nii ehã.

⁸ Yesu kɛ mɛi ahiamɔ nii ye enɔ lɛ hiɛ, ni wɔ hu wɔbaanyɛ wɔfee nakai. Be ko be ni etɔ Yesu kɛ ebɔfoi lɛ waa lɛ, amɛtee he ko koni amɛyajɔɔ amɛhe. Shi amɛyanáaa hegbɛ amɛfee nakai. Ani ole nɔ hewɔ? Mɛi babaoo ba he ni amɛyɔɔ lɛ koni Yesu atsɔɔ amɛ nii. Ani Yesu mli fu amɛ? Dabi kwraa. Moŋ lɛ, amɛnii fee lɛ mɔbɔ “ni ebɔi amɛ nibii pii tsɔɔmɔ.” (Mar. 6:30-34) Kɛ́ wɔkase Yesu, ni wɔ hu wɔkɛ wɔbe  kɛ wɔhewalɛ ye wɔbua mɛi lɛ, belɛ wɔmiiwo wɔ-Tsɛ ni yɔɔ ŋwɛi lɛ hiɛ nyam. (Mat. 5:14-16) Ebaatsɔɔ hu akɛ, wɔmiitao wɔhi Yehowa weku lɛ mli.

9. Mɛɛ hegbɛ krɛdɛɛ Yehowa kɛdro adesai ni ekɛdroko ŋwɛibɔfoi?

⁹ Nɔ kroko ni Yehowa efee kɛwo wɔhiɛ nyam ji, ebɔ wɔ bɔ ni wɔbaanyɛ wɔfɔ, ni ehã wɔ hegbɛ akɛ wɔtsɔɔ wɔbii lɛ koni amɛsumɔ lɛ ni amɛsɔmɔ lɛ. Kɛ́ fɔlɔ ji bo lɛ, ani ohiɛ sɔɔ hegbɛ krɛdɛɛ nɛɛ? Eyɛ mli akɛ Yehowa ejɔɔ ŋwɛibɔfoi lɛ waa moŋ, shi Yehowa ebɔɔɔ amɛ ni amɛfɔ. No hewɔ lɛ, kɛ́ oyɛ bii lɛ, esa akɛ ona lɛ akɛ hegbɛ kpele diɛŋtsɛ. Fɔlɔi, Yehowa kɛ nitsumɔ ni he hiaa waa ewo nyɛdɛŋ akɛ, nyɛkwɛ nyɛbii lɛ “yɛ Yehowa tsɔsemɔ kɛ eŋaawoo lɛ mli.” (Efe. 6:4; 5 Mo. 6:5-7; Lala 127:3) Yehowa asafo lɛ ejɛ Biblia lɛ mli efee nibii pii ni baanyɛ aye abua fɔlɔi. Ekomɛi ji, woji, vidioi, lalai, kɛ saji ni akɛwo wɔwɛbsaiti srɔtoi lɛ anɔ lɛ. Enɛ hãa wɔnaa faŋŋ akɛ, Yehowa, wɔ-Tsɛ ni yɔɔ ŋwɛi lɛ, kɛ e-Bi lɛ sumɔɔ gbekɛbii asane waa. (Luka 18:15-17) Kɛ́ fɔlɔi kɛ amɛhiɛ fɔ̃ Yehowa nɔ, ni amɛfee nɔ fɛɛ nɔ ni amɛbaanyɛ kɛkwɛ amɛbii lɛ jogbaŋŋ lɛ, Yehowa náa miishɛɛ waa. Agbɛnɛ hu, ebaaye ebua amɛbii lɛ koni wɔsɛɛ lɛ, amɛbafata Yehowa weku lɛ he kɛya naanɔ!

10-11. Mɛɛ gbɛjianɔ Yehowa etsɔ kpɔmɔnɔ lɛ nɔ eto ehã wɔ?

¹⁰ Yehowa kɛ e-Bi ni esumɔɔ waa lɛ ehã wɔ koni wɔnyɛ wɔbatsɔmɔ eweku lɛ mli bii ekoŋŋ, ni enɛ ji nɔ kroko ni efee kɛwo wɔhiɛ nyam. Tamɔ bɔ ni wɔna yɛ  kuku 4 lɛ mli lɛ, be ni Adam kɛ Hawa fee esha lɛ, hegbɛ ni amɛyɔɔ lɛ akɛ amɛhiɔ Yehowa weku lɛ mli lɛ ŋmɛɛ amɛ kɛ amɛbii lɛ fɛɛ. (Rom. 5:12) Adam kɛ Hawa hiɛ kã he waa ni amɛgbo Nyɔŋmɔ nɔ toi lɛ, no hewɔ lɛ eja gbɛ akɛ ejie amɛ kɛje eweku lɛ mli. Shi amɛbii lɛ hu? Suɔmɔ ni Yehowa yɔɔ lɛ hewɔ lɛ, eto gbɛjianɔ koni Adam kɛ Hawa bii lɛ ateŋ mɛi ni baabo lɛ toi lɛ abafata eweku lɛ he ekoŋŋ. Ehã e-Bi koome Yesu Kristo bagbo kɛkpɔ̃ amɛ. (Yoh. 3:16; Rom. 5:19) Yesu kpɔmɔ afɔleshaa lɛ hewɔ lɛ, Nyɔŋmɔ eŋɔ adesai anɔkwafoi 144,000 akɛ ebii.​—Rom. 8:15-17; Kpo. 14:1.

¹¹ Agbɛnɛ hu, adesai anɔkwafoi akpekpei abɔ miibo Yehowa toi ni amɛmiifee esuɔmɔnaa nii ŋmɛnɛ. Wɔsɛɛ kɛ́ amɛfo naagbee kaa lɛ yɛ afii akpe lɛ sɛɛ lɛ, amɛbaatsɔmɔ Nyɔŋmɔ weku lɛ mli bii. (Lala 25:14; Rom. 8:20, 21) Hiɛnɔkamɔ nɛɛ hewɔ lɛ, amrɔ nɛɛ po lɛ, amɛnyɛɔ amɛtsɛɔ Yehowa amɛ-Bɔlɔ lɛ akɛ ‘amɛ-Tsɛ.’ (Mat. 6:9) Mɛi ni abaatee amɛ shi lɛ hu baaná hegbɛ amɛkase Yehowa he nii koni amɛle bɔ ni eesumɔ ni amɛhi shi amɛhã. Amɛteŋ mɛi ni baabo Yehowa toi lɛ hu baatsɔmɔ Yehowa weku lɛ mli bii.

12. Mɛɛ sanebimɔ wɔbaahã hetoo bianɛ?

¹² Kɛbashi biɛ lɛ, wɔna nibii pii ni Yehowa efee kɛwo adesai ahiɛ nyam. Agbɛnɛ hu, wɔna akɛ, eŋɔ mɛi ni afɔ amɛ mu lɛ akɛ ebii ni ehã “asafoku babaoo” lɛ ená hiɛnɔkamɔ akɛ, wɔsɛɛ lɛ, amɛbaatsɔmɔ ebii yɛ jeŋ hee lɛ mli. (Kpo. 7:9) Mɛni wɔbaanyɛ wɔfee bianɛ kɛtsɔɔ Yehowa akɛ wɔmiisumɔ ni wɔfata eweku lɛ he kɛya naanɔ?

13. Kɛ́ wɔmiitao wɔfata Yehowa weku lɛ he lɛ, mɛni esa akɛ wɔfee? (Marko 12:30)

¹³ Sɔɔmɔ Yehowa kɛ otsui muu fɛɛ kɛtsɔɔ akɛ osumɔɔ lɛ. (Kanemɔ Marko 12:30.) Yehowa edro wɔ nibii babaoo ni nɔ bɛ, ni amɛteŋ ekome ji hegbɛ ni ehã wɔ akɛ wɔjá lɛ lɛ. Kɛ́ ‘wɔye Yehowa kitãi lɛ anɔ’ lɛ, no baahã ena akɛ wɔsumɔɔ lɛ. (1 Yoh. 5:3) Ekitãi lɛ ateŋ ekome ni eetao ni wɔye nɔ ji, famɔ ni Yesu fã wɔ akɛ wɔfee mɛi kaselɔi ni wɔbaptisi amɛ lɛ. (Mat. 28:19) Ekroko hu ji famɔ akɛ wɔsumɔ  wɔhe lɛ. (Yoh. 13:35) Yehowa baahere mɛi fɛɛ ni yeɔ ekitãi lɛ anɔ lɛ atuu kɛbafata mɛi ni jɛ je lɛŋ hei srɔtoisrɔtoi ni efee ekome tamɔ weku kɛmiijá lɛ lɛ ahe.​—Lala 15:1, 2.

14. Mɛni wɔbaanyɛ wɔfee kɛtsɔɔ akɛ wɔsumɔɔ mɛi? (Mateo 9:36-38; Romabii 12:10)

¹⁴ Jiemɔ suɔmɔ kpo otsɔɔ mɛi krokomɛi. Suɔmɔ ji Yehowa sui lɛ ateŋ nɔ ni fe fɛɛ. (1 Yoh. 4:8) Be ni wɔbaleko Yehowa po lɛ, esumɔɔ wɔ. (1 Yoh. 4:9, 10) Kɛ́ wɔjie suɔmɔ kpo wɔtsɔɔ mɛi lɛ, belɛ, wɔmiikase lɛ. (Efe. 5:1) Nɔ kome ni hi waa ni wɔbaanyɛ wɔfee kɛtsɔɔ akɛ wɔsumɔɔ mɛi ji, ni wɔbaaye wɔbua amɛ ni amɛle Yehowa dani naagbee lɛ aba. (Kanemɔ Mateo 9:36-38.) Kɛ́ wɔfee nakai lɛ, no baahã amɛle nɔ ni esa akɛ amɛfee koni abaptisi amɛ ni amɛbatsɔmɔ Nyɔŋmɔ weku lɛ mli bii. Yɛ amɛbaptisimɔ sɛɛ lɛ, esa akɛ wɔya nɔ wɔsumɔ amɛ ni wɔbu amɛ. (1 Yoh. 4:20, 21) Mɛni wɔbaanyɛ wɔfee kɛtsɔɔ nakai? Ekome ji, ni wɔbaahe amɛ wɔye, ni wɔná amɛhe jwɛŋmɔ kpakpa. Akɛ nɔkwɛmɔnɔ lɛ, kɛ́ amɛteŋ mɔ ko fee nɔ ko ni wɔnuuu shishi lɛ, wɔyeŋ wɔhe oyai ni wɔbaajwɛŋ wɔhã lɛ. Moŋ lɛ, wɔkɛ woo baahã wɔnyɛmi lɛ, ni wɔbaabu lɛ akɛ enɔ kwɔ fe wɔ.​—Kanemɔ Romabii 12:10; Fip. 2:3.

15. Namɛi esa akɛ wɔna amɛ mɔbɔ ni wɔmli ahi yɛ amɛnɔ?

¹⁵ Omli ahi yɛ mɛi fɛɛ anɔ ni ona amɛ mɔbɔ. Kɛ́ wɔmiisumɔ ni wɔhi Yehowa weku lɛ mli kɛya naanɔ lɛ, belɛ, esa akɛ wɔkɛ e-Wiemɔ lɛ atsu nii yɛ wɔshihilɛ mli. Akɛ nɔkwɛmɔnɔ lɛ, Yesu tsɔɔ wɔ akɛ wɔmli ahi yɛ mɛi fɛɛ anɔ ni wɔna amɛ mɔbɔ kɛ́ amɛsumɔɔɔ wɔsane po. (Luka 6:32-36) Bei komɛi lɛ, enɛ feemɔ wa hã wɔ. No hewɔ lɛ, nɔ ni baaye abua wɔ ji, ni wɔbaasusu nii ahe tamɔ bɔ ni Yesu susu nii ahe lɛ, ni wɔfee wɔnii tamɔ lɛ. Kɛ́ wɔmia wɔhiɛ wɔbo Yehowa toi ni wɔkase Yesu lɛ, no baahã wɔ-Tsɛ ni yɔɔ ŋwɛi lɛ ana akɛ wɔmiisumɔ ni wɔhi eweku lɛ mli kɛya naanɔ.

16. Mɛni esa akɛ wɔfee koni akawie Yehowa asafo lɛ he efɔŋ?

¹⁶ Kaafee nɔ ko ni baahã awie Yehowa weku lɛ he efɔŋ. Efɔɔ kaa akɛ gbekɛbii kaseɔ amɛnyɛmimɛi onukpai. Akɛ nɔkwɛmɔnɔ lɛ, bei pii lɛ, kɛ́ gbekɛ ko na akɛ enyɛmi nukpa kɛ Biblia mli shishitoo mlai miitsu nii lɛ, ekaseɔ lɛ. Shi kɛ́ onukpa lɛ fee nibii gbohii lɛ, bei pii lɛ, gbekɛ lɛ kaseɔ. Nakai nɔŋŋ eji yɛ Yehowa weku lɛ mli. Kɛ́ mɔ ko ni be ko ni eho lɛ eyeɔ Yehowa anɔkwa lɛ bɔi nibii ni teɔ shi ewoɔ nibii ni atsɔɔ wɔ lɛ wiemɔ, loo ekɔ jeŋba gbonyo ko lɛ, ewaaa akɛ mɛi krokomɛi baakase lɛ. Kɛ́ mɔ ko fee nɔ ko tamɔ nɛkɛ lɛ, ebaanyɛ ehã mɛi awie Yehowa asafo lɛ he efɔŋ. (1 Tes. 4:3-8) Esa akɛ wɔkwɛ jogbaŋŋ ni wɔkakase mɛi ni ehiii shi yɛ Biblia mli shishitoo mlai anaa lɛ, ni wɔkahã nɔ ko nɔ ko gbala wɔ kɛje Yehowa wɔ-Tsɛ ni yɔɔ ŋwɛi ni sumɔɔ wɔ lɛ he.

17. Mɛɛ susumɔ esaaa akɛ wɔnáa yɛ heloonaa nibii ahe? Ni mɛni hewɔ?

¹⁷ Okɛ ohiɛ afɔ̃ Yehowa nɔ, jeee heloonaa nibii anɔ. Yehowa ewo shi akɛ, kɛ́ wɔtao e-Maŋtsɛyeli lɛ kɛ ejalɛ lɛ klɛŋklɛŋ lɛ, ebaahã wɔ niyenii, atade, kɛ he ni wɔbaawɔ. (Lala 55:22; Mat. 6:33) Kɛ́ wɔheɔ wɔyeɔ akɛ Yehowa baaye shiwoo nɛɛ nɔ lɛ, wɔnuŋ he akɛ ja wɔná nibii pii yɛ je nɛɛ mli dani wɔbaanyɛ wɔná miishɛɛ ni wɔhi shi ni wɔsheee sane fɔŋ ko gbeyei. Wɔle akɛ, nɔ pɛ ni baanyɛ ahã wɔtoiŋ ajɔ wɔ ji, ni wɔbaafee Yehowa suɔmɔnaa nii. (Fip. 4:6, 7) Kɛ́ wɔyɛ shika ni wɔbaanyɛ wɔkɛhé nibii pii po lɛ, esa akɛ wɔkwɛ akɛ, ani wɔbaaná dekã kɛ hewalɛ ni wɔkɛ nibii nɛɛ atsu nii ni wɔkwɛ nɔ? Ni kɛ́ wɔhé heloonaa nibii pii lɛ, ani nibii ni wɔyɔɔ lɛ heŋ wɔtsui? Esa akɛ wɔhã ehi wɔjwɛŋmɔ mli be fɛɛ be akɛ, Nyɔŋmɔ ehã wɔ nitsumɔ ni wɔtsu yɛ eweku lɛ mli. Ni no hewɔ lɛ, esaaa akɛ wɔhãa nɔ ko nɔ ko gbalaa wɔjwɛŋmɔ. Wɔsumɔŋ ni wɔfee wɔnii tamɔ oblanyo lɛ ni hã heloonaa nibii he etsui aahu akɛ, ehã  hegbɛ ni ená akɛ ebaasɔmɔ Yehowa ni ebatsɔ ebi lɛ lɛ ŋmɛɛ lɛ lɛ!​—Mar. 10:17-22.

18. Mɛɛ hegbɛ kpele kɛ jɔɔmɔi adesai ni boɔ Yehowa toi lɛ baaná kɛya naanɔ?

¹⁸ Adesai ni boɔ Yehowa toi lɛ baasumɔ Yehowa ni amɛjá lɛ kɛya naanɔ. Enɛ ji hegbɛ ni fe fɛɛ ni adesa ko baanyɛ aná. Mɛi ni baahi shikpɔŋ lɛ nɔ lɛ baaná hegbɛ amɛkwɛ shikpɔŋ fɛfɛo ni Yehowa bɔ koni adesai ahi nɔ lɛ nɔ, ni amɛbaaná miishɛɛ waa. Etsɛŋ Nyɔŋmɔ Maŋtsɛyeli lɛ baahã shikpɔŋ lɛ kɛ nibii fɛɛ ni yɔɔ nɔ lɛ afee fɛo ekoŋŋ. Yesu baatsu naagbai fɛɛ ni ba be ni Adam kɛ Hawa gbo Nyɔŋmɔ nɔ toi ni amɛje eweku lɛ mli lɛ ahe nii. Yehowa baatee mɛi akpekpei abɔ shi, ni amɛbaaná hegbɛ amɛhi shi kɛya naanɔ yɛ shikpɔŋ ni asaa nɔ fɛfɛo ni etsɔ paradeiso lɛ nɔ, ni hela mɔŋ amɛ dɔŋŋ. (Luka 23:42, 43) Fiofio lɛ, Yehowa tsuji fɛɛ ni yɔɔ shikpɔŋ lɛ nɔ ni efee ekome akɛ weku kɛmiijá lɛ lɛ baaye emuu, ni Yehowa kɛ “anunyam kɛ agbojee” ni David wie he lɛ baafi amɛ akekere.​—Lala 8:5.

19. Mɛni esaaa akɛ wɔhiɛ kpaa nɔ kɔkɔɔkɔ?

¹⁹ Kɛ́ ofata “asafoku babaoo” lɛ he lɛ, oyɛ hiɛnɔkamɔ ni nɔ bɛ! Nyɔŋmɔ sumɔɔ bo; ni eetao otsɔ eweku lɛ mli nyo. No hewɔ lɛ, bɔɔ mɔdɛŋ fɛɛ ni obaanyɛ ni ofee nibii ni sa ehiɛ. Daa gbi lɛ, jwɛŋmɔ nibii ni Yehowa ewo shi akɛ ebaafee ehã bo lɛ ahe, ni ohã amɛkã otsui nɔ. Ohiɛ asɔ hegbɛ ni oná akɛ obaajá Yehowa wɔ-Tsɛ ni yɔɔ ŋwɛi ni sumɔɔ wɔ lɛ, kɛ agbɛnɛ hu, hiɛnɔkamɔ ni oyɔɔ akɛ obaajie eyi kɛya naanɔ lɛ!