1. Yɛ nɔ ni awie yɛ 1 Tesalonikabii 5:11 lɛ naa lɛ, mɛɛ nitsumɔ esa akɛ wɔ fɛɛ wɔtsu?

 ANI nyɛsafo lɛ ema Maŋtsɛyeli Asa hee loo nyɛsaa eko pɛŋ? Kɛ́ nakai lɛ, ani okaiɔ bɔ ni onu he ohã be ni nyɛtee asafoŋ kpee yɛ nakai Maŋtsɛyeli Asa lɛ nɔ klɛŋklɛŋ kwraa lɛ? Ŋwanejee ko bɛ he akɛ, omii shɛ ohe waa ni oda Yehowa shi. Ekolɛ oná miishɛɛ aahu akɛ, oohe ofó po, ni no hewɔ lɛ be ni aláa lɛ onyɛɛɛ olá. Maŋtsɛyeli Asai ni wɔmamɔɔ lɛ ahe yɛ sɛɛnamɔ waa, ni amɛhãa ajieɔ Yehowa yi. Shi nɔ ko ni sɛɛnamɔ yɔɔ he ni hãa ajieɔ Yehowa yi fe bɔ ni tsũi nɛɛ hãa ajieɔ eyi lɛ ji, ni wɔbaatswa wɔnyɛmimɛi lɛ, ni ji, mɛi ni baa Maŋtsɛyeli Asai lɛ anɔ lɛ wɔma shi. Enɛ yɔɔ bɔfo Paulo jwɛŋmɔ mli be ni ewie wiemɔi ni yɔɔ 1 Tesalonikabii 5:11 lɛ, ni ji ŋmalɛ ni wɔnikasemɔ lɛ damɔ nɔ lɛ.​—Kanemɔ.

2. Mɛni he wɔbaasusu yɛ nikasemɔ nɛɛ mli? 

² Mɔ ko ni tswa enyɛmimɛi Kristofoi lɛ ema shi waa ni wɔbaanyɛ wɔkase lɛ ji, bɔfo Paulo. Paulo nu he ehã enyɛmimɛi lɛ waa. Yɛ nikasemɔ nɛɛ mli lɛ, wɔbaakwɛ nɔ ni efee kɛye ebua amɛ koni (1) amɛfi shi kɛ́ amɛkɛ naagbai kpe, (2) amɛkɛ amɛhe ahi shi yɛ toiŋjɔlɛ mli, kɛ (3) amɛhe Yehowa amɛye waa. Nyɛhãa wɔkwɛa bɔ ni wɔbaafee wɔkase lɛ ni wɔtswa wɔnyɛmimɛi Kristofoi lɛ wɔma shi.​—1 Kor. 11:1.

3. Mɛni hãa wɔnaa akɛ Paulo ŋmɛ pɛpɛɛpɛ yɛ shihilɛ mli?

³ Paulo sumɔɔ enyɛmimɛi Kristofoi lɛ waa. Paulo kɛ naagbai pii kpe yɛ eshihilɛ mli. Enɛ hewɔ lɛ, enu he ehã nyɛmimɛi ni kɛ naagbai kpe lɛ, ni emusuŋ tsɔ lɛ yɛ amɛhewɔ. Be ko lɛ, Paulo shika fɛɛ tã yɛ ehe. Enɛ hewɔ lɛ, ehe bahia ni etsu nii kɛkwɛ ehe  kɛ mɛi ni fata ehe lɛ. (Bɔf. 20:34) Nitsumɔ ni etsuɔ ji, efeɔ mama tsũi. No hewɔ lɛ, be ni ebashɛ Korinto lɛ, ekɛ Akwila kɛ Priskila ni amɛ hu amɛfeɔ mama tsũi lɛ fee ekome kɛtsu nii. Shi yɛ “Hejɔɔmɔ Gbi fɛɛ Hejɔɔmɔ Gbi nɔ lɛ,” eyashiɛɔ ehãa Yudafoi lɛ kɛ Greekbii lɛ. Sɛɛ mli be ni Sila kɛ Timoteo ba Korinto lɛ, “Paulo kɛ be babaoo shiɛ wiemɔ lɛ.” (Bɔf. 18:2-5) Paulo hãaa nɔ ko nɔ ko agbala ejwɛŋmɔ kɛje Yehowa sɔɔmɔ nɔ, ejaakɛ no ji nɔ ni he hiaa fe fɛɛ yɛ eshihilɛ mli. Bɔ ni Paulo tsu nii waa kɛkwɛ ehe ni yɛ nakai beiaŋ nɔŋŋ lɛ ekɛ hiɛdɔɔ tsu shiɛmɔ nitsumɔ lɛ hewɔ lɛ, enyɛ ewo enyɛmimɛi Kristofoi lɛ ŋaa. Ekɛɛ amɛ akɛ, amɛkwɛ jogbaŋŋ ni nibii ni amɛfeɔ kɛkwɛɔ amɛhe kɛ amɛweku lɛ akahe amɛbe kɛ amɛjwɛŋmɔ fɛɛ aahu akɛ, amɛnáaa be ni amɛkɛfee “nibii ni he hiaa waa lɛ,” ni ji nibii ni kɔɔ Yehowa jamɔ he lɛ.​—Fip. 1:10.

4. Mɛni Paulo kɛ Timoteo fee kɛye amɛbua nyɛmimɛi ni aawa amɛ yi lɛ?

⁴ Be ni ato asafo ni yɔɔ Tesalonika lɛ shishi lɛ sɛɛ etsɛɛɛ lɛ, ate shi awo Kristofoi ni yɔɔ jɛmɛ lɛ waa. Be ko lɛ, mɛi komɛi ni feɔ basabasa lɛ ka akɛ amɛbaamɔ Paulo kɛ Sila. Shi be ni amɛnine shɛɛɛ amɛnɔ lɛ, amɛmɔmɔ ‘nyɛmimɛi lɛ ekomɛi kɛtee maŋ nɔyelɔi lɛ ahiɛ,’ ni amɛbolɔ amɛkɛɛ: “Hii nɛɛ fɛɛ teɔ shi amɛwoɔ famɔi ni Kaisare kɛhã lɛ.” (Bɔf. 17:6, 7) Ŋwanejee ko bɛ he akɛ, bɔ ni maŋbii lɛ te shi amɛwo nyɛmimɛi nɛɛ ni ba asafo lɛ mli etsɛko lɛ hã gbeyei mɔ nyɛmimɛi lɛ waa. Kulɛ enɛ baanyɛ ahã nyɛmimɛi lɛ ahe ajɔ yɛ Yehowa sɔɔmɔ lɛ mli. Shi Paulo fee nɔ ko kɛye ebua amɛ koni ekaba lɛ nakai. Eto gbɛjianɔ koni anyɛ awo nyɛmimɛi ni yɔɔ asafo hee nɛɛ mli lɛ hewalɛ ejaakɛ ekɛ Sila nyɛŋ aya nɔ ahi jɛmɛ. Sɛɛ mli lɛ, Paulo kɛɛ Tesalonikabii lɛ akɛ: “Wɔtsu Timoteo, ni ji wɔnyɛmi nuu . . . lɛ, koni ebawo nyɛ hewalɛ ni eshɛje nyɛmii yɛ nyɛhemɔkɛyeli lɛ hewɔ, koni amanehului nɛɛ akahoso mɔ ko mɔ ko.” (1 Tes. 3:2, 3) Eeenyɛ efee akɛ, awa nyɛmimɛi ni yɔɔ Timoteo maŋ Listra lɛ hu yi. No hewɔ lɛ, Timoteo le bɔ ni eyɔɔ hã kɛji aawa mɔ ko yi. Ele bɔ ni Paulo waje nyɛmimɛi ni yɔɔ jɛmɛ lɛ kɛ bɔ ni Yehowa ye ebua amɛ ehã. Enɛ hewɔ lɛ, enyɛ ehã nyɛmimɛi ni yɔɔ Tesalonika lɛ tsui, ni ehã amɛle akɛ Yehowa baaye ebua amɛ hu.​—Bɔf. 14:8, 19-22; Heb. 12:2.

5. Mɛɛ gbɛ nɔ asafoŋ onukpa ko ye ebua nyɛmi nuu ko ni atsɛɔ lɛ Bryant lɛ? Ni mɛɛ gbɛ nɔ ená he sɛɛ?

⁵ Mɛni ekoŋŋ Paulo fee kɛwaje enyɛmimɛi Kristofoi lɛ? Be ni Paulo kɛ Barnaba ku amɛsɛɛ amɛyasara nyɛmimɛi ni yɔɔ Listra, Ikonium, kɛ Antiokia lɛ, “amɛhole onukpai amɛhã amɛ yɛ asafo fɛɛ asafo mli.” (Bɔf. 14:21-23) Ŋwanejee ko bɛ he akɛ onukpai nɛɛ ye amɛbua nyɛmimɛi lɛ ni amɛwo amɛ hewalɛ tamɔ bɔ ni asafoŋ onukpai ni yɔɔ ŋmɛnɛ lɛ feɔ lɛ. Naa nyɛmi nuu ko ni atsɛɔ lɛ Bryant lɛ niiashikpamɔ ni kɔɔ enɛ he. Ewie akɛ: “Be ni miye afii 15 lɛ, mipapa shi shĩa ni ashwie mimami kɛje asafo lɛ mli. Minu he akɛ mibɛ mɔ ko ni minijiaŋ je wui.” Mɛni ye ebua Bryant ni etee nɔ esɔmɔ Yehowa yɛ shihilɛ ni mli wa nɛɛ mli? Ewie akɛ: “Asafoŋ onukpa ko ni atsɛɔ lɛ Tony lɛ kɛ mi gbaa sane kɛ́ atee asafoŋ kpeei, ni ebiɔ mishi yɛ be kɛ beiaŋ. Egba mi mɛi komɛi ni kɛ shihilɛi ni mli wawai ekpe shi amɛyɛ miishɛɛ lɛ aniiashikpamɔi. Ekɛ mi susu Lala 27:10 lɛ he, ni kɛ́ efee lɛ, ekɛ mi susuɔ Hezekia, mɔ ni ye Yehowa anɔkwa yɛ nɔkwɛmɔnɔ kpakpa ni epapa efeee lɛ fɛɛ sɛɛ lɛ he.” Mɛɛ gbɛ nɔ nɔ ni asafoŋ onukpa nɛɛ fee lɛ ye ebua Bryant? Bryant wie akɛ: “Tony ye ebua mi waa. Enɛ hewɔ lɛ, mitee mihiɛ waa ni mibatsɔ gbɛgbalɔ.” Asafoŋ onukpai, nyɛkɛ nyɛhiɛ afɔa shi koni nyɛna mɛi ni yelikɛbuamɔ he hiaa amɛ lɛ ni nyɛkɛ “wiemɔ kpakpa” awo amɛ hewalɛ tamɔ afee ahã Bryant lɛ.​—Abɛi 12:25.

6. Mɛɛ gbɛ nɔ Paulo kɛ Nyɔŋmɔ tsuji anɔkwafoi awala shihilɛ he saji wo enyɛmimɛi Kristofoi lɛ hewalɛ?

 ⁶ Paulo kai enyɛmimɛi Kristofoi lɛ akɛ, Yehowa waje “odasefoi babaoo tamɔ atatu” ni amɛnyɛ amɛfi shi yɛ shihilɛi ni mli wawai ni amɛkɛkpe lɛ fɛɛ sɛɛ. (Heb. 12:1) Paulo le akɛ, mɛi ni hi shi yɛ blema ni tee nɔ amɛsɔmɔ Yehowa yɛ shihilɛi ni mli wawai ni amɛkɛkpe lɛ fɛɛ sɛɛ lɛ anɔkwɛmɔnɔ lɛ baanyɛ awo enyɛmimɛi Kristofoi lɛ hewalɛ ni eye ebua amɛ ni amɛkɛ amɛjwɛŋmɔ ama “Nyɔŋmɔ hiɛkãalɔ lɛ maŋ” lɛ nɔ. (Heb. 12:22) Nakai nɔŋŋ ŋmɛnɛ lɛ, kɛ́ wɔkane bɔ ni Yehowa ye ebua Gideon, Barak, David, Samuel, kɛ anɔkwafoi krokomɛi lɛ ewoɔ wɔ hewalɛ. (Heb. 11:32-35) Ni anɔkwafoi ni yɔɔ wɔbe nɛɛ mli lɛ hu? Amɛ hu amɛnɔkwɛmɔnɔ lɛ baanyɛ awo wɔ hewalɛ. Bei pii lɛ, nyɛmimɛi ŋmaa nitsumɔhe yitso lɛ woji kɛtsɔɔ bɔ ni nyɛmimɛi anɔkwafoi nɛɛ awala shihilɛ he saji lɛ ehã amɛhemɔkɛyeli lɛ mli ewa ehã.

7. Mɛni okaseɔ yɛ ŋaa ni Paulo wo yɛ Romabii 14:19-21 lɛ mli?

⁷ Kɛ́ wɔwie loo wɔfee nibii ni baahã toiŋjɔlɛ ahi asafo lɛ mli lɛ, ebaatswa wɔnyɛmimɛi lɛ ema shi. Kɛ́ esoro wɔsusumɔ yɛ wɔnyɛmimɛi lɛ anɔ he po lɛ, esaaa akɛ wɔhãa no fiteɔ wɔ kɛ amɛ teŋ. Agbɛnɛ hu, esaaa akɛ wɔfeɔ kpɛŋŋ yɛ saji ni eteee shi ewooo Biblia mli shishitoo mlai lɛ ahe. Naa enɛ he nɔkwɛmɔnɔ ko. No mli lɛ, Kristofoi ni yɔɔ Roma lɛ ateŋ mɛi komɛi ji Yudafoi, ni amɛteŋ mɛi komɛi hu lɛ, Jeŋmajiaŋbii ji amɛ. Be ni akɛ Mose Mla lɛ kpa nitsumɔ lɛ, ehe ebahiaaa dɔŋŋ ni Yehowa tsuji aye mlai ni kɔɔ niyenii komɛi ni amɛbaanyɛ amɛye kɛ niyenii komɛi ni esaaa akɛ amɛyeɔ lɛ he lɛ anɔ dɔŋŋ. (Mar. 7:19) Kɛjɛ no nɔ kɛyaa lɛ, Kristofoi ni ji Yudafoi lɛ ateŋ mɛi komɛi enaaa naagba yɛ he akɛ amɛbaaye niyenii fɛɛ niyenii ni amɛsumɔɔ. Shi amɛteŋ mɛi komɛi hu nu he akɛ amɛbɛ hegbɛ akɛ amɛfeɔ nakai. Enɛ kɛ mligbalamɔ ba asafo lɛ mli. No hewɔ lɛ, mɛni Paulo fee kɛye ebua amɛ? Ehã amɛna akɛ, ehe miihia waa ni amɛhã toiŋjɔlɛ ahi asafo lɛ mli. Ekɛɛ amɛ akɛ: “Ehi akɛ okaye loo ko, loo okanu wain, loo okafee nɔ kroko ni baatɔ̃tɔ onyɛmi nane.” (Kanemɔ Romabii 14:19-21.) Nɔ ni ewie nɛɛ hã enyɛmimɛi Kristofoi lɛ na akɛ, kɛ́ amɛkɛ amɛhe taa naa yɛ saji ni tamɔ nɛkɛ ahe lɛ, ebaaye amɛnyɛmimɛi lɛ kɛ asafo muu lɛ fɛɛ awui waa. Agbɛnɛ hu, ehã amɛna faŋŋ akɛ, kɛ́ nɔ ko ni efeɔ lɛ baatɔ̃tɔ enyɛmimɛi lɛ ateŋ mɔ ko nane lɛ, ebaakpa. (1 Kor. 9:19-22) Kɛ́ wɔ hu wɔfee nibii ni baahã toiŋjɔlɛ ahi asafo lɛ mli, ni wɔfeee kpɛŋŋ yɛ saji ni eteee shi ewooo Biblia mli shishitoo mlai ahe lɛ, wɔbaatswa wɔnyɛmimɛi lɛ wɔma shi.

8. Be ni sane ko ni he hiaa waa miihe afite toiŋjɔlɛ ni yɔɔ asafo lɛ mli lɛ, mɛni Paulo fee?

⁸ Kɛ́ mɛi kɛ wɔ kpãaa gbee yɛ saji ni he hiaa waa lɛ ahe po lɛ, esa akɛ wɔfee nɔ fɛɛ nɔ ni wɔbaanyɛ kɛbaa toiŋjɔlɛ ni yɔɔ asafo lɛ mli lɛ yi. Paulo fee nɔkwɛmɔnɔ kpakpa yɛ enɛ mli. Akɛ nɔkwɛmɔnɔ lɛ, be ko lɛ blema Kristofoi lɛ ateŋ mɛi komɛi ma nɔ mi veveeve akɛ esa akɛ afolɔ Jeŋmajiaŋbii ni ebatsɔmɔ Kristofoi lɛ ketia. Eeenyɛ efee akɛ amɛfee nakai koni Yudafoi lɛ akawie amɛshi amɛ. (Gal. 6:12) Paulo kɛ amɛkpãaa gbee kwraa yɛ sane nɛɛ he. Shi nɔ najiaŋ ni ebaanyɛ amɛnɔ ni amɛkpɛlɛ nɔ ni ekɛɔ amɛ lɛ nɔ lɛ, ejɛ heshibaa mli ekɛɛ amɛ ni amɛkɛ sane lɛ ayahã bɔfoi lɛ kɛ onukpai lɛ ni yɔɔ Yerusalem lɛ. (Bɔf. 15:1, 2) Bɔ ni Paulo fee enii ehã yɛ sane nɛɛ he lɛ ye ebua ni miishɛɛ kɛ toiŋjɔlɛ tee nɔ ehi asafo lɛ mli.​—Bɔf. 15:30, 31.

9. Mɛni kɛ́ wɔfee lɛ, no baatsɔɔ akɛ wɔmiikase Paulo?

⁹ Kɛ́ sane ko ni he hiaa waa te shi ni wɔkɛ wɔnyɛmimɛi lɛ kpãaa gbee yɛ bɔ ni atsu he nii  ahã lɛ he lɛ, mɛni wɔbaanyɛ wɔfee koni toiŋjɔlɛ aya nɔ ahi asafo lɛ mli. Esa akɛ wɔtao gbɛtsɔɔmɔ kɛjɛ mɛi ni Yehowa kɛto asafo lɛ nɔ lɛ aŋɔɔ. Bei pii lɛ, kɛ́ wɔkwɛ asafo lɛ woji lɛ loo nibii krokomɛi ni asafo lɛ kɛhã lɛ amli lɛ, wɔbaanyɛ wɔna gbɛtsɔɔmɔi ni ajɛ Biblia lɛ mli akɛhã yɛ saji ahe. Kɛ́ wɔkɛ gbɛtsɔɔmɔi nɛɛ tsu nii moŋ fe ni wɔbaafee nɔ ni wɔ diɛŋtsɛ wɔsusuɔ akɛ ehi lɛ, ebaahã toiŋjɔlɛ ahi asafo lɛ mli.

10. Mɛni ji nɔ kroko ni Paulo fee koni toiŋjɔlɛ ahi asafo lɛ mli?

¹⁰ Nɔ kroko ni Paulo fee ni hã toiŋjɔlɛ tee nɔ ehi asafo lɛ mli ji, ewie enyɛmimɛi lɛ asui kpakpai lɛ ahe shi jeee amɛfatɔi lɛ. Akɛ nɔkwɛmɔnɔ lɛ, be ni eemu wolo ni eŋma eyahã Romabii lɛ naa lɛ, etsĩ mɛi pii agbɛ́i tã, ni yɛ amɛteŋ mɛi babaoo agbɛfaŋ lɛ, ewie nibii kpakpai ni ele yɛ amɛhe efata he. Te wɔbaafee tɛŋŋ wɔkase Paulo? Esa akɛ wɔtswa wɔfai shi akɛ, kɛ́ wɔkɛ wɔnyɛmimɛi lɛ miigba sane lɛ, wɔbaawie nibii kpakpai ni wɔle yɛ wɔnyɛmimɛi krokomɛi ahe lɛ wɔtsɔɔ amɛ. Kɛ́ wɔfee nakai lɛ, ebaahã amɛsumɔ nyɛmimɛi nɛɛ asane waa, ni ebaatswa asafo lɛ ema shi.

11. Kɛ́ naagba ba wɔ kɛ nyɛmi ko teŋ lɛ, te wɔbaafee tɛŋŋ wɔsaa wɔ kɛ lɛ teŋ koni wɔhã toiŋjɔlɛ aya nɔ ahi asafo lɛ mli?

¹¹ Bei komɛi lɛ, sane baanyɛ aba nyɛmimɛi ni etee amɛhiɛ yɛ asafo lɛ mli lɛ po ateŋ, loo amɛbaanyɛ amɛkɛ amɛhe ataa naa yɛ sane ko he. Nɔ ko ni tamɔ nakai ba Paulo kɛ enaanyo kpaakpa Barnaba teŋ. Be ni amɛfãa gbɛ nɔ ni ji shii enyɔ nɔ ni amɛyashiɛ lɛ, amɛkɛ amɛhe eyakpãaa gbee kɛji amɛkɛ Marko afata amɛhe kɛya loo amɛkɛ lɛ akafata amɛhe. Biblia lɛ kɛɛ be ni eba lɛ nakai lɛ, “mlifu ni naa wa te shi yɛ amɛteŋ” ni no hã amɛgbála amɛmli. (Bɔf. 15:37-39) Shi Paulo, Barnaba, kɛ Marko saa amɛteŋ, ni no tsɔɔ akɛ amɛna akɛ toiŋjɔlɛ kɛ ekomefeemɔ ni baahi asafo lɛ mli lɛ he hiaa waa. Sɛɛ mli lɛ, Paulo wie nibii kpakpai yɛ Barnaba kɛ Marko he. (1 Kor. 9:6; Kol. 4:10) Kɛ́ naagba ko ba wɔ kɛ nyɛmi ko teŋ lɛ, esa akɛ wɔ hu wɔkwɛ ni wɔsaa ni wɔkɛ wɔjwɛŋmɔ ama wɔnyɛmimɛi lɛ asui kpakpai lɛ anɔ. Kɛ́ wɔfee nakai lɛ, toiŋjɔlɛ kɛ ekomefeemɔ baahi asafo lɛ mli.​—Efe. 4:3.

12. Mɛɛ naagbai wɔnyɛmimɛi lɛ ekomɛi kɛkpeɔ?

¹² Kɛ́ wɔye wɔbua wɔnyɛmimɛi lɛ koni amɛhemɔkɛyeli lɛ mli awa lɛ, belɛ wɔmiitswa amɛ wɔmiima shi ji no. Wɔnyɛmimɛi lɛ ekomɛi yɛ ni amɛwekumɛi ni jeee Odasefoi loo mɛi ni amɛkɛtsuɔ nii loo mɛi ni amɛkɛyaa skul lɛ yeɔ amɛhe fɛo. Amɛteŋ mɛi komɛi yɛ ni hela ko ni naa wa miigba amɛnaa loo nyɛmi ko efee amɛ nɔ ko ni edɔ amɛ waa. Amɛteŋ mɛi komɛi hu yɛ ni abaptisi amɛ nɛ lɛ, jeee ŋmɛnɛ, ni amɛmɛ jeŋ fɔŋ nɛɛ naagbee lɛ aahu shi naagbee lɛ bako. Naagbai ni wɔtsĩtsĩi tã nɛɛ baanyɛ ahã wɔnyɛmimɛi lɛ ahemɔkɛyeli lɛ mli agbɔjɔ. Kristofoi ni hi shi yɛ blema lɛ hu kɛ shihilɛi ni tamɔ nɛkɛ kpe. Mɛni Paulo fee kɛye ebua amɛ koni amɛhemɔkɛyeli lɛ mli akagbɔjɔ?

13. Mɛni Paulo fee kɛye ebua nyɛmimɛi ni ayeɔ amɛhe fɛo yɛ amɛhemɔkɛyeli lɛ hewɔ lɛ?

¹³ Paulo tsɔɔ enyɛmimɛi lɛ ŋmalɛi lɛ amli ni no hã amɛhemɔkɛyeli lɛ mli wa. Akɛ nɔkwɛmɔnɔ lɛ, eeenyɛ efee akɛ Kristofoi komɛi ni ji Yudafoi lɛ leee nɔ ni amɛbaakɛɛ amɛwekumɛi ni jeee Kristofoi lɛ ni kɛɛ Yudafoi ajamɔ lɛ hi fe Kristojamɔ lɛ. No hewɔ lɛ, ekã shi faŋŋ akɛ, wolo ni Paulo ŋma eyahã Hebribii lɛ ye ebua nyɛmimɛi nɛɛ waa. (Heb. 1:5, 6; 2:2, 3; 9:24, 25) Ehã amɛná saji ni amɛbaanyɛ amɛkɛku mɛi ni wieɔ amɛshiɔ amɛ lɛ anaa. Ŋmɛnɛ lɛ, wɔ hu wɔbaanyɛ wɔye wɔbua wɔnyɛmimɛi Kristofoi lɛ koni amɛjɛ asafo lɛ woji lɛ amli amɛgbala nibii ni wɔheɔ wɔyeɔ lɛ amli amɛtsɔɔ mɛi ni yeɔ amɛhe fɛo lɛ. Wɔnyɛmimɛi bibii lɛ ekomɛi  yɛ ni ayeɔ amɛhe fɛo akɛni amɛheɔ amɛyeɔ akɛ Nyɔŋmɔ ni bɔ nibii fɛɛ lɛ hewɔ. Wɔbaanyɛ wɔye wɔbua amɛ ni amɛkɛ saji ni yɔɔ broshuɔi ni ji, Was Life Created? kɛ The Origin of Life​—Five Questions Worth Asking lɛ amli lɛ atsɔɔ nɔ hewɔ ni amɛheɔ amɛyeɔ akɛ Nyɔŋmɔ ni bɔ nibii lɛ mli amɛtsɔɔ mɛi.

14. Eyɛ mli akɛ Paulo kɛ be pii tsu shiɛmɔ kɛ nitsɔɔmɔ nitsumɔ lɛ moŋ, shi mɛni efee kɛye ebua enyɛmimɛi lɛ?

¹⁴ Paulo wo enyɛmimɛi lɛ hewalɛ ni amɛtsu “nitsumɔi kpakpai” kɛtsɔɔ akɛ amɛyɛ suɔmɔ. (Heb. 10:24) Jeee nɔ ni ewie lɛ pɛ nɔ etsɔ eye ebua amɛ ni amɛfee nakai. Shi etsɔ enifeemɔ hu nɔ efee nakai. Akɛ nɔkwɛmɔnɔ lɛ, be ni hɔmɔ ba Yudea lɛ, Paulo ye ebua ni akɛ nibii yahã nyɛmimɛi ni yɔɔ jɛmɛ lɛ. (Bɔf. 11:27-30) Eyɛ mli akɛ Paulo kɛ be pii tsu shiɛmɔ nitsumɔ lɛ moŋ, shi be fɛɛ be lɛ, ekwɛɔ gbɛi ni ebaanyɛ etsɔ nɔ eye ebua nyɛmimɛi ni efi amɛ yɛ heloo gbɛfaŋ lɛ. (Gal. 2:10) Enɛ ni efee lɛ hã enyɛmimɛi lɛ ná nɔmimaa akɛ Yehowa baakwɛ amɛ. Kɛ́ wɔ hu wɔkɛ wɔbe, wɔhewalɛ, kɛ wɔhesai ye wɔbua nyɛmimɛi ni oshãra enina amɛ lɛ, no baahã amɛ hu amɛhemɔkɛyeli lɛ mli awa. Kɛ́ wɔtsu onia kɛye wɔbua jeŋ muu fɛɛ nitsumɔ lɛ, no hu baanyɛ ahã wɔnyɛmimɛi lɛ ahemɔkɛyeli lɛ mli awa. Kɛ́ wɔfee nibii ni tamɔ nɛkɛ lɛ, no baahã wɔnyɛmimɛi lɛ ahe aye waa akɛ, kɛ́ amɛkɛ naagbai kpe lɛ, Yehowa kwaŋ amɛ kɔkɔɔkɔ.

15-16. Mɛni wɔbaanyɛ wɔfee kɛye wɔbua mɛi ni egbɔjɔ yɛ hemɔkɛyeli lɛ mli lɛ?

¹⁵ Paulo tee nɔ eye ebua nyɛmimɛi ni egbɔjɔ yɛ hemɔkɛyeli lɛ mli lɛ. Enu he ehã nyɛmimɛi nɛɛ ni ekɛ amɛ wie wiemɔi ni baahã amɛna akɛ ele akɛ amɛyɛ tsui kpakpa ni esumɔɔ amɛ. (Heb. 6:9; 10:39) Akɛ nɔkwɛmɔnɔ lɛ, yɛ wolo ni eŋma eyahã Hebribii lɛ mli lɛ, bei pii lɛ ekɛ wiemɔ ni ji ‘wɔ’ lɛ tsuɔ nii ni enɛ hãa wɔnaa akɛ ele akɛ ŋaawoo ni ekɛhãa amɛ lɛ kɔɔ lɛ hu ehe. (Heb. 2:1, 3) Wɔ hu esa akɛ  wɔya nɔ wɔye wɔbua mɛi ni egbɔjɔ yɛ hemɔkɛyeli lɛ mli lɛ ni wɔtswa amɛ wɔma shi. Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaahã amɛna akɛ wɔsusuɔ amɛhe. Kɛ́ wɔfee nakai lɛ, no baatsɔɔ akɛ wɔsumɔɔ amɛ lɛɛlɛŋ. Kɛ́ amɛnu yɛ wɔgbee mli akɛ wɔsusuɔ amɛhe lɛ, no baanyɛ ahã wiemɔi ni wɔkɛ amɛwieɔ lɛ ashɛ amɛtsui he.

¹⁶ Paulo hã enyɛmimɛi lɛ na akɛ, Yehowa kaiɔ amɛnitsumɔi kpakpai lɛ. (Heb. 10:32-34) Wɔ hu wɔbaanyɛ wɔfee nakai kɛ́ wɔmiiye wɔmiibua wɔnyɛmi ko ni egbɔjɔ yɛ hemɔkɛyeli lɛ mli lɛ. Wɔbaanyɛ wɔbi lɛ ni egba wɔ bɔ ni fee ni ebale anɔkwale lɛ, loo wɔhã egba wɔ nibii komɛi ni etee nɔ yɛ eshihilɛ mli ni hã ena Yehowa nine faŋŋ. No sɛɛ lɛ, wɔbaanyɛ wɔhã ele akɛ, Yehowa hiɛ kpako suɔmɔ ni ejie kpo etsɔɔ lɛ be ko ni eho lɛ nɔ ni ekwaŋ lɛ kɔkɔɔkɔ hu. (Heb. 6:10; 13:5, 6) Sanegbaa ni tamɔ nɛkɛ lɛ baawo wɔnyɛmi lɛ hewalɛ ni eya nɔ esɔmɔ Yehowa.

17. Mɛni wɔbaanyɛ wɔya nɔ wɔfee koni wɔtswa wɔnyɛmimɛi lɛ wɔma shi?

¹⁷ Bɔ ni fiofio lɛ, tsumalɔi ahe saa yɛ amɛnitsumɔ lɛ mli lɛ, nakai nɔŋŋ wɔ hu wɔbaanyɛ wɔya wɔhiɛ yɛ nibii ni wɔfeɔ kɛtswaa wɔnyɛmimɛi lɛ wɔmaa shi lɛ amli. Kɛ́ nyɛmi ko yaje shihilɛ ko ni mli wa mli lɛ, wɔbaanyɛ wɔgba lɛ mɛi ni enyɛ amɛfi shi yɛ shihilɛi ni mli wawai amli lɛ ahe sane koni no awaje lɛ ni enyɛ efi shi. Agbɛnɛ hu, wɔbaanyɛ wɔwie sui kpakpai ni wɔnyɛmimɛi lɛ yɔɔ lɛ ahe, wɔfee nibii ni baahã toiŋjɔlɛ aya nɔ ahi asafo lɛ mli, ni kɛ́ naagba ko fite toiŋjɔlɛ ni yɔɔ wɔ kɛ nyɛmi ko teŋ lɛ, wɔkwɛ ni wɔsaa. Kɛ́ wɔye wɔbua wɔnyɛmimɛi lɛ kɛ Biblia mli saji, wɔwa amɛ kɛ́ efi amɛ, ni wɔye wɔbua mɛi ni egbɔjɔ yɛ hemɔkɛyeli lɛ mli lɛ, ebaatswa wɔnyɛmimɛi lɛ ema shi.

18. Mɛni otswa ofai shi akɛ obaafee?

¹⁸ Mɛi ni yayeɔ amɛbuaa kɛ asafo lɛ tsũi amaamɔ lɛ náa miishɛɛ ni amɛtsui nyɔɔ amɛmli. Kɛ́ wɔ hu wɔtswa wɔnyɛmimɛi lɛ wɔma shi lɛ, wɔbaaná miishɛɛ ni wɔtsui baanyɔ wɔmli. Tsũi fiteɔ, shi kɛ́ wɔtswa wɔnyɛmimɛi lɛ wɔma shi lɛ, amɛbaanyɛ amɛná he sɛɛ kɛya naanɔ. No hewɔ lɛ, nyɛhãa wɔtswaa wɔfai shi akɛ, wɔbaaya nɔ ‘wɔwowoo wɔhe hewalɛ ni wɔtswa wɔhe wɔma shi.’​—1 Tes. 5:11.