1. Mɛni hã Babilonbii lɛ ná gbalɔ Daniel he miishɛɛ?

 BE NI Babilonbii lɛ mɔ gbalɔ Daniel kɛjɛ Yerusalem kɛtee Babilon lɛ, no mli lɛ oblanyo ji lɛ. Ŋwanejee ko bɛ he akɛ, Babilonbii lɛ na ‘nɔ ni gbɔmɔ naa’ lɛ. (1 Sam. 16:7) Amɛna akɛ Daniel lɛ, ‘kpa ko bɛ ehe, ehe yɛ fɛo,’ ni ejɛ weku ni abuɔ waa mli, ni enɛ hã amɛná ehe miishɛɛ. Enɛ hewɔ lɛ, Babilonbii lɛ tsɔse lɛ bɔ ni afee ni eyasɔmɔ yɛ Babilon maŋtsɛ lɛ shĩa lɛ.​—Dan. 1:3, 4, 6.

2. Te Yehowa na Daniel ehã tɛŋŋ? (Ezekiel 14:14)

² Yehowa hu ná Daniel he miishɛɛ; shi lɛ lɛ, jeee Daniel he fɛo loo hegbɛ ni ená akɛ esɔmɔ yɛ maŋtsɛ lɛ shĩa lɛ hewɔ, shi moŋ yɛ nɔ gbɔmɔ ni eji lɛ hewɔ. Anɔkwa, be ni Yehowa wie nɔ ko ni tsɔɔ akɛ enaa Daniel tamɔ bɔ ni enaa Noa kɛ Hiob lɛ, no mli lɛ Daniel eye aaafee afii 20 pɛ. Enɛ hãa wɔnaa akɛ, be ni Daniel ji oblanyo po lɛ, Yehowa na lɛ akɛ jalɔ, tamɔ bɔ ni ena Noa kɛ Hiob ni kɛ afii babaoo sɔmɔ lɛ lɛ. (1 Mo. 5:32; 6:9, 10; Hiob 42:16, 17; kanemɔ Ezekiel 14:14.) Yehowa tee nɔ esumɔ Daniel yɛ Daniel wala shihilɛ mli fɛɛ.​—Dan. 10:11, 19.

3. Mɛni he wɔbaasusu yɛ nikasemɔ nɛɛ mli?

³ Yɛ nikasemɔ nɛɛ mli lɛ, wɔbaakwɛ sui enyɔ komɛi ni Daniel jie lɛ kpo ni hã Yehowa sumɔ esane waa lɛ. Klɛŋklɛŋ lɛ, wɔbaakwɛ su ni ejie lɛ kpo lɛ kɛ shihilɛ mli ni ejie nakai su lɛ kpo yɛ. No sɛɛ lɛ, wɔbaakwɛ nɔ ni ye ebua Daniel ni ená nakai su lɛ. Kɛkɛ lɛ, agbɛnɛ lɛ, wɔsusu bɔ ni wɔbaafee wɔkase lɛ lɛ he. Eyɛ mli akɛ nikasemɔ nɛɛ kɔɔ oblahii kɛ oblayei ahe moŋ, shi wɔ fɛɛ wɔbaanyɛ wɔkase nɔ ko kɛjɛ Daniel dɛŋ.

4. Mɛni Daniel fee ni tsɔɔ akɛ eyɛ ekãa?

⁴ Bei komɛi lɛ, mɛi ni yɔɔ ekãa lɛ po sheɔ gbeyei, shi amɛhãaa no ahã amɛfee nɔ ni ejaaa. Daniel ji oblanyo ko ni yɔɔ ekãa waa. Hã wɔsusu shihilɛi enyɔ komɛi amli ni etsɔɔ akɛ eyɛ ekãa lɛ ahe wɔkwɛ. Klɛŋklɛŋ nɔ lɛ ba aaafee afii enyɔ yɛ Yerusalem  hiɛkpatamɔ lɛ sɛɛ. Babilon maŋtsɛ Nebukadnezar la lamɔ ko ni kɔɔ amaga wulu ko he ni hã ehao waa. Ekɛɛ kɛ́ ehiɛshikalɔi lɛ, ni Daniel hu fata he lɛ, nyɛɛɛ atsɔɔ lɛ lamɔ lɛ kɛ eshishi lɛ, ebaagbe amɛ fɛɛ. (Dan. 2:3-5) Ehe bahia ni Daniel afee nɔ ko oya nɔŋŋ, kɛjeee nakai lɛ mɛi pii ahiɛ baakpãtã. Etee “eyakpa maŋtsɛ lɛ fai koni ehã lɛ be koni etsɔɔ maŋtsɛ lɛ lamɔ lɛ shishi.” (Dan. 2:16) Nɔ ni efee lɛ tsɔɔ akɛ, eyɛ ekãa kɛ hemɔkɛyeli waa. Mɛni hewɔ wɔkɛɔ nakai? Nɔ hewɔ lɛ ji akɛ, nɔ ko bɛ ni tsɔɔ akɛ Daniel etsɔɔ lamɔ ko shishi pɛŋ. Ekɛɛ enanemɛi ni ahã amɛ Babilonia gbɛ́i ni ji Shadrak, Meshak, kɛ Abednego lɛ akɛ, “amɛsɔle amɛkpa Nyɔŋmɔ ni yɔɔ ŋwɛi lɛ fai kɛhã mɔbɔnalɛ yɛ nɛkɛ teemɔŋ sane nɛɛ he.” (Dan. 2:18) Yehowa bo amɛsɔlemɔ lɛ toi, ni eye ebua Daniel ni enyɛ etsɔɔ Nebukadnezar lamɔ lɛ shishi. No hewɔ lɛ, agbeee Daniel kɛ enanemɛi lɛ.

5. Mɛɛ shihilɛ kroko Daniel kɛkpe ni bi ni efee ekãa?

⁵ Be ni Daniel tsɔɔ lamɔ ni kɔɔ amaga wulu lɛ he lɛ shishi lɛ, esaa ekɛ shihilɛ kroko kpe ni bi ni efee ekãa. Nebukadnezar la lamɔ kroko ko ni hã ehao waa. Yɛ elamɔ lɛ mli lɛ, ena tso agbo ko. Daniel tsɔɔ maŋtsɛ lɛ lamɔ lɛ shishi. Ehã ele akɛ, ebaaye sɛkɛ ni ebaakpa maŋtsɛ lɛ yeli kɛyashi be ko. (Dan. 4:25) Enɛ bi ekãa waa, ejaakɛ kulɛ maŋtsɛ lɛ baanyɛ anu he akɛ Daniel miitao ete shi ewo lɛ, ni kulɛ ebaanyɛ ehã agbe Daniel. Shi Daniel fee ekãa ni etsɔɔ lɛ lamɔ lɛ shishi.

6. Mɛni eeenyɛ efee akɛ no ye ebua Daniel ni efee ekãa lɛ?

⁶ Mɛni eeenyɛ efee akɛ no ye ebua Daniel ni enyɛ efee ekãa yɛ ewala shihilɛ mli fɛɛ? Ekã shi faŋŋ akɛ, be ni eji gbekɛ lɛ, emami kɛ epapa fee nɔkwɛmɔnɔ kpakpa amɛhã lɛ. Ŋwanejee ko bɛ he akɛ, amɛbo famɔ ni Yehowa kɛhã Israelbii ni ji fɔlɔi lɛ akɛ amɛtsɔɔ amɛbii Nyɔŋmɔ Mla lɛ toi. (5 Mo. 6:6-9) Jeee Kitãi Nyɔŋma lɛ pɛ Daniel le, shi ele nibii ni Mla lɛ ŋmɛɔ gbɛ akɛ Israelnyo aye kɛ nibii ni Mla lɛ eŋmɛɛɛ gbɛ akɛ eyeɔ hu. b  (3 Mo. 11:4-8; Dan. 1:8, 11-13) Daniel kase Yehowa webii lɛ ahe nii hu, ni ele nɔ ni baa amɛnɔ kɛ́ amɛhiii shi yɛ Yehowa shishitoo mlai lɛ anaa. (Dan. 9:10, 11) Shihilɛi ni Daniel tsɔ mli lɛ hã ena akɛ, ekɔɔɔ he eko nɔ ni baaba lɛ, Yehowa kɛ ebɔfoi lɛ baaye amɛbua lɛ.​—Dan. 2:19-24; 10:12, 18, 19.

7. Mɛni ekoŋŋ ye ebua Daniel ni enyɛ efee ekãa? (Kwɛmɔ mfoniri lɛ hu.)

⁷ Daniel kase woji ni Nyɔŋmɔ gbalɔi tamɔ Yeremia ŋmala lɛ. Enɛ hã sɛɛ mli lɛ, Daniel na akɛ etsɛŋ ni abaaŋmɛɛ Yudafoi ni aŋɔ amɛ nom yɛ Babilon afii pii lɛ ahe. (Dan. 9:2) Bɔ ni Daniel na akɛ Biblia mli gbalɛi baa mli lɛ hã ekɛ ehiɛ fɔ̃ Yehowa nɔ waa. Ni be fɛɛ be lɛ, mɛi ni kɛ amɛhiɛ fɔ̃ɔ Yehowa nɔ lɛ feɔ ekãa waa. (Okɛto Romabii 8:31, 32, 37-39 lɛ he.) Agbɛnɛ hu, nɔ ni fe fɛɛ lɛ, Daniel sɔleɔ ehãa e-Tsɛ ni yɔɔ ŋwɛi lɛ be fɛɛ be. (Dan. 6:10) Ejajeɔ ehe eshai etsɔɔ Yehowa ni ehãa Yehowa leɔ bɔ ni enuɔ he ehãa, ni ebiɔ lɛ ni eye ebua lɛ. (Dan. 9:4, 5, 19) Daniel ji gbɔmɔ tamɔ wɔ nɔŋŋ. No hewɔ lɛ, ekã shi faŋŋ akɛ, akɛ ekãa fɔɔɔ lɛ. Nɔ ni ye ebua lɛ ni ená su nɛɛ ji, Nyɔŋmɔ Wiemɔ lɛ ni ekase, sɔlemɔ ni esɔle, kɛ ehiɛ ni ekɛfɔ̃ Yehowa nɔ lɛ.

8. Mɛni kɛ́ wɔfee lɛ, wɔbaanyɛ wɔfee ekãa?

⁸ Mɛni esa akɛ wɔfee koni wɔfee ekãa? Wɔfɔlɔi baanyɛ awo wɔ hewalɛ ni wɔfee ekãa. Shi kɛ́ amɛyɛ ekãa po lɛ, amɛnyɛŋ amɛfee ekãa amɛhã wɔ. Kɛ́ mɔ ko miitao ni efee ekãa lɛ, etamɔ nɔ ni eetao ekase nitsumɔ hee ko. Bei pii kɛ́ mɔ ko miikase nitsumɔ hee ko lɛ, ekwɛɔ bɔ ni mɔ ni tsɔɔ lɛ lɛ feɔ lɛ ehãa lɛ, kɛkɛ lɛ, lɛ hu efee lɛ nakai. Nakai nɔŋŋ kɛ́ mɔ ko miitao efee ekãa lɛ, esa akɛ ekwɛ bɔ ni mɛi krokomɛi jie su nɛɛ kpo amɛhã ni ekase amɛ. No hewɔ lɛ, mɛni wɔkase kɛjɛ Daniel dɛŋ? Esa akɛ wɔkase Nyɔŋmɔ Wiemɔ lɛ jogbaŋŋ tamɔ bɔ ni efee lɛ. Esa akɛ wɔsɔle wɔhã Yehowa daa ni wɔkɛɛ lɛ bɔ ni wɔnuɔ he wɔhãa lɛ, koni naanyobɔɔ ni yɔɔ wɔ kɛ lɛ teŋ lɛ mli awa. Agbɛnɛ hu, esa akɛ wɔkɛ wɔhiɛ afɔ̃ Yehowa nɔ waa, ni wɔhe wɔye akɛ ebaaye ebua wɔ. Kɛ́ wɔfee nibii nɛɛ, no lɛ kɛ́ wɔkɛ shihilɛ ko ni miika wɔhemɔkɛyeli lɛ kpe lɛ, wɔbaanyɛ wɔfee ekãa.

9. Kɛ́ wɔfee ekãa lɛ, mɛɛ gbɛ nɔ wɔnáa he sɛɛ?

⁹ Kɛ́ wɔfee ekãa lɛ, wɔnáa he sɛɛ yɛ gbɛi babaoo anɔ. Niiashikpamɔ ni nyɛmi nuu ko ni atsɛɔ lɛ Ben lɛ ná lɛ hãa wɔnaa nakai. Etee skul yɛ Germany, ni mɔ fɛɛ mɔ ni yɔɔ eskul lɛ mli lɛ heɔ eyeɔ akɛ, nibii ni yɔɔ wala mli lɛ ba kɛtsɔ sutsakemɔ nɔ, ni nibii ni Biblia lɛ ewie yɛ adebɔɔ he lɛ ji adesã ko kɛkɛ. Gbi ko lɛ, ahã Ben hegbɛ ni etsɔɔ eklasbii lɛ nɔ hewɔ ni eheɔ eyeɔ akɛ mɔ ko ni bɔ nibii ni yɔɔ wala mli lɛ. Efee ekãa ni egbála nɔ ni eheɔ eyeɔ lɛ mli etsɔɔ eklasbii lɛ. Mɛni jɛ mli kɛba? Ben wie akɛ: “Mitsɔɔlɔ lɛ bo mi toi jogbaŋŋ, ni efee wolo ni mijɛ mli migbála sane lɛ mli mitsɔɔ miklasbii lɛ he fotokɔpe ni eja ehã amɛteŋ mɔ fɛɛ mɔ.” Te Ben klasbii lɛ fee amɛnii amɛhã tɛŋŋ? Ben wie akɛ: “Amɛteŋ mɛi pii bo mi toi, ni amɛwie akɛ amɛná mihe miishɛɛ waa.” Ben niiashikpamɔ lɛ hãa wɔnaa akɛ, bei pii lɛ, kɛ́ wɔfee ekãa lɛ ehãa mɛi buɔ wɔ. Agbɛnɛ hu, ebaanyɛ ehã mɛi ni hiɛ tsui kpakpa lɛ aná he miishɛɛ akɛ, akɛ amɛ akase Yehowa he nii. Enɛɛmɛi fɛɛ ji yiŋtoi kpakpai ahewɔ ni esa akɛ wɔfee ekãa.

10. Kɛ́ akɛɛ mɔ ko yeɔ anɔkwa lɛ, te atsɔɔ tɛŋŋ?

¹⁰ Yɛ Biblia lɛ mli lɛ, Hebri wiemɔ ni atsɔɔ shishi akɛ “anɔkwayeli” loo “suɔmɔ ni tsakeee” lɛ kɔɔ suɔmɔ ni mli wa ni mɔ ko yɔɔ kɛhã mɔ ko ni no hewɔ lɛ etuɔ ehe fɛɛ ehãa nakai mɔ lɛ he. Ni bei pii lɛ, wiemɔ nɛɛ ji wiemɔ ni akɛtsuɔ nii kɛtsɔɔ suɔmɔ ni Nyɔŋmɔ  yɔɔ kɛhã etsuji. Wiemɔ nɛɛ nɔŋŋ akɛtsuɔ nii kɛtsɔɔ suɔmɔ ni Nyɔŋmɔ tsuji yɔɔ kɛhã amɛhe. (2 Sam. 9:6, 7) Be ni be shwieɔ mli lɛ, wɔbaanyɛ wɔye mɔ ko anɔkwa waa fe bɔ ni wɔyeɔ lɛ anɔkwa tsutsu lɛ. Hã wɔkwɛ bɔ ni eba lɛ nakai yɛ Daniel gbɛfaŋ.

11. Mɛni Daniel fee yɛ egbɔlɛ beiaŋ ni tsɔɔ akɛ etee nɔ eye Yehowa anɔkwa? (Kwɛmɔ mfoniri ni yɔɔ wolo lɛ hiɛ lɛ.)

¹¹ Yɛ Daniel shihilɛ mli fɛɛ lɛ, ekɛ shihilɛi srɔtoisrɔtoi ni baanyɛ ahã ewa kɛhã mɔ ko akɛ ebaaye Yehowa anɔkwa lɛ kpe. Ekɛ shihilɛi nɛɛ ateŋ ekome ni wa waa lɛ kpe be ni eye fe afii 90 lɛ. Nakai beiaŋ lɛ, Mediabii lɛ kɛ Persiabii lɛ eye Babilon nɔ kunim, ni Maŋtsɛ Dario ji mɔ ni yeɔ nɔ. Dario maŋtsɛ shĩa onukpai lɛ sumɔɔɔ Daniel sane, ni amɛbuuu e-Nyɔŋmɔ lɛ hu. Enɛ hewɔ lɛ, amɛtsɔ̃ ŋaa koni agbe Daniel. Amɛhã maŋtsɛ lɛ wo mla ko ni baabi ni Daniel aye maŋtsɛ lɛ anɔkwa moŋ fe e-Nyɔŋmɔ lɛ. Yɛ mla lɛ naa lɛ, esaaa akɛ Daniel sɔleɔ ehãa Yehowa gbii 30, ni no baatsɔɔ akɛ eyeɔ maŋtsɛ lɛ anɔkwa tamɔ mɛi fɛɛ ni yɔɔ maŋtsɛ lɛ nɔyeli lɛ mli. Daniel yeee mla nɛɛ nɔ. Etee nɔ esɔle ehã Yehowa, ni no hewɔ lɛ, ashɛ lɛ afɔ̃ jatai abu mli. Shi anɔkwa ni Daniel ye lɛ hewɔ lɛ, Yehowa here lɛ kɛje jatai lɛ adɛŋ. (Dan. 6:12-15, 20-22) Mɛni wɔ hu wɔbaanyɛ wɔfee ni baahã wɔya nɔ wɔye Yehowa anɔkwa tamɔ Daniel fee lɛ?

12. Mɛni ye ebua Daniel ni etee nɔ eye Yehowa anɔkwa?

¹² Tamɔ bɔ ni wɔwie kɛtsɔ hiɛ lɛ, nɔ ni baaye abua mɔ ko ni eye Yehowa anɔkwa ji, kɛ́ esumɔɔ lɛ waa. Akɛni Daniel sumɔɔ Yehowa eŋwɛi Tsɛ lɛ waa hewɔ lɛ, etee nɔ eye lɛ anɔkwa. Nɔ ni ye ebua lɛ ni ená suɔmɔ nɛɛ ji, ejwɛŋ Yehowa sui lɛ kɛ bɔ ni ejieɔ lɛ kpo ehãa lɛ he. (Dan. 9:4) Agbɛnɛ hu, ejwɛŋ nibii kpakpai ni Yehowa efee ehã lɛ kɛ emaŋbii lɛ anɔ, ni ehiɛ sɔ enɛ waa.​—Dan. 2:20-23; 9:15, 16.

13. (a) Mɛɛ shihilɛi wɔnyɛmimɛi oblahii kɛ oblayei lɛ kɛkpeɔ ni baanyɛ ahã ewa kɛhã amɛ akɛ amɛbaaye anɔkwa? Okɛ enɛ he nɔkwɛmɔnɔ ahã. (Kwɛmɔ mfoniri lɛ hu.) (b) Kɛ́ mɔ ko bi bo akɛ, te Yehowa Odasefoi naa nifeemɔi tamɔ supi kɛ gay amɛhãa tɛŋŋ lɛ, mɛni obaakɛɛ lɛ yɛ nɔ ni ona yɛ vidio lɛ mli lɛ naa? (Kwɛmɔ vidio ni ji, “Nɔ Ni Baajɛ Anɔkwa Jalɛ Nifeemɔ Mli Aba Ji Toiŋjɔlɛ,” ni yɔɔ jw.org lɛ nɔ lɛ.)

¹³ Tamɔ eba lɛ yɛ Daniel gbɛfaŋ lɛ, mɛi ni wɔnyɛmimɛi oblahii kɛ oblayei lɛ kɛ shãraa lɛ ateŋ mɛi pii ebuuu Yehowa kɛ eshishitoo mlai lɛ. Bei pii lɛ, mɛi ni tamɔ nɛkɛ  lɛ sumɔɔɔ mɛi ni sumɔɔ Nyɔŋmɔ lɛ asane. Amɛteŋ mɛi komɛi po feɔ wɔnyɛmimɛi oblahii kɛ oblayei lɛ nibii ni esaaa yɛ anɔkwa ni amɛyeɔ Yehowa lɛ hewɔ. Naa shihilɛ ni nyɛmi nuu ko ni ji oblanyo ni atsɔɔ lɛ Graeme ni yɔɔ Australia lɛ kɛkpe be ni eyɔɔ sɛkɛndre skul lɛ. Amɛtsɔɔlɔ lɛ bi amɛ bɔ ni amɛbaafee amɛnii amɛhã kɛ́ amɛnaanyo ko kɛɛ amɛ yɛ teemɔŋ akɛ gay ji lɛ loo efeɔ supi. Tsɔɔlɔ lɛ kɛɛ amɛ akɛ, mɛi fɛɛ ni baana nɔ ni amɛnaanyo lɛ ekɛɛ amɛ lɛ akɛ naagba ko bɛ he lɛ ayadamɔ afã, ni mɛi fɛɛ ni baana lɛ akɛ naagba yɛ he lɛ ayadamɔ afã kroko. Graeme wie akɛ: “Miklasbii lɛ fɛɛ enaaa akɛ naagba ko yɛ he, no hewɔ lɛ amɛyadamɔ afã kome. Mi kɛ nyɛmi ko pɛ ni yadamɔ afã kroko lɛ.” Nɔ ni tee nɔ yɛ enɛ sɛɛ lɛ bafee kaa waa kɛhã Graeme akɛ ebaaya nɔ eye Yehowa anɔkwa. Ewie akɛ: “Miklasbii lɛ kɛ tsɔɔlɔ lɛ po jɛ wɔ ni amɛye wɔhe fɛo aaafee ŋmɛlɛtswaa kome sɔŋŋ kɛyashi egbe enitsɔɔmɔ lɛ naa. Mito mitsui shi migbála nɔ hewɔ ni minaa naagba yɛ nakai jeŋba lɛ he lɛ mli mitsɔɔ amɛ, shi amɛbooo mi toi.” Te nɔ ni tee nɔ lɛ hã Graeme nu he ehã tɛŋŋ? Ewie akɛ: “Edɔ mi waa akɛ miklasbii lɛ jɛ mi, shi eŋɔɔ minaa waa akɛ minyɛ migbála mihemɔkɛyeli lɛ mli mitsɔɔ amɛ ni mitee nɔ miye Yehowa anɔkwa.”

14. Kɛ́ wɔmiitao wɔya nɔ wɔye Yehowa anɔkwa lɛ, mɛni ni ji nɔ kome ni esa akɛ wɔfee?

¹⁴ Kɛ́ wɔmiitao wɔya nɔ wɔye Yehowa anɔkwa lɛ, belɛ esa akɛ wɔná suɔmɔ ni mli wa kɛhã lɛ tamɔ Daniel fee lɛ. Nɔ kome ni baaye ebua wɔ ni wɔná suɔmɔ ni tamɔ nɛkɛ ji, ni wɔbaakase Yehowa sui lɛ ahe nii. Akɛ nɔkwɛmɔnɔ lɛ, wɔbaanyɛ wɔkase nibii ni ebɔ lɛ ahe nii. (Rom. 1:20) Kɛ́ ootao osumɔ Yehowa waa ni obu lɛ lɛ, obaanyɛ okane saji ni yitso ji, “Ani Mɔ Ko Ni Fee?” loo okwɛ ehe vidioi lɛ. Agbɛnɛ hu, obaanyɛ okane broshuɔi ni ji, Was Life Created? kɛ The Origin of Life​—Five Questions Worth Asking lɛ. Naa nɔ ni nyɛmi yoo ko ni ji oblayoo ni jɛ Denmark ni atsɛɔ lɛ Esther lɛ wie yɛ woji nɛɛ ahe. Ewie akɛ: “Gbɛ ni atsɔɔ nɔ akɛ mɔ susuɔ nii ahe yɛ broshuɔi nɛɛ amli lɛ mli kã shi faŋŋ. Broshuɔi lɛ ekɛɛɛ bo akɛ hemɔ enɛ oye. Ehãa oleɔ anɔkwa saji lɛ kɛkɛ koni bo diɛŋtsɛ okpɛ oyiŋ.” Ben ni wɔtsĩ etã kɛtsɔ hiɛ lɛ wie akɛ: “Broshuɔi nɛɛ hãa mɔ hemɔkɛyeli mli waa waa. Ehã mina akɛ, Nyɔŋmɔ ni bɔ nibii ni yɔɔ wala mli lɛ.” Kɛ́ okase broshuɔi nɛɛ, obaana akɛ nɔ ni Biblia lɛ ewie yɛ Kpojiemɔ 4:11 lɛ ji anɔkwale. Jɛmɛ kɛɔ akɛ: “Yehowa wɔ-Nyɔŋmɔ, bo ji mɔ ni sa akɛ akɛ anunyam lɛ kɛ woo lɛ kɛ hewalɛ lɛ ahã, ejaakɛ bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.” c

15. Mɛni ji nɔ kroko ni kɛ́ wɔfee lɛ, ebaahã naanyobɔɔ ni yɔɔ wɔ kɛ Yehowa teŋ lɛ mli awa waa?

¹⁵ Nɔ kroko ni kɛ́ ofee lɛ, ebaahã suɔmɔ ni oyɔɔ kɛhã Yehowa lɛ mli awa ji, ni obaakase e-Bi Yesu he nii. Nakai ji bɔ ni nyɛmi yoo ko ni ji oblayoo ni atsɛɔ lɛ Samira ni yɔɔ Germany lɛ fee. Ewie akɛ: “Yesu he nii ni mikase lɛ hã mibale Yehowa jogbaŋŋ.” Be ni Samira ji gbekɛ lɛ, no mli lɛ ewa kɛhã lɛ akɛ ebaana Yehowa akɛ mɔ ko ni sumɔɔ lɛ ni ebaanyɛ ekɛ lɛ abɔ naanyo. Shi ena Yesu akɛ mɔ ko ni sumɔɔ gbɔmɔ. Ewie kɛfata he akɛ: “Misumɔɔ Yesu sane waa, ejaakɛ mɔ fɛɛ mɔ nyɛɔ ebɛŋkɛɔ lɛ, ni esumɔɔ gbekɛbii asane.” Akɛni ebale Yesu waa hewɔ lɛ, no hã ebale Yehowa jogbaŋŋ ni ebasumɔ lɛ. Mɛni hewɔ? Ewie akɛ: “Fiofio lɛ, mibana akɛ Yesu kase e-Tsɛ lɛ jogbaŋŋ kɛmɔ shi. Efeɔ enii tamɔ e-Tsɛ lɛ pɛpɛɛpɛ. Mina akɛ, enɛ ji yiŋtoo kome hewɔ ni  Yehowa tsu Yesu kɛba shikpɔŋ lɛ nɔ, koni ebatsɔɔ adesai Yehowa he nii ni amɛle lɛ jogbaŋŋ.” (Yoh. 14:9) Kɛ́ ootao ni naanyobɔɔ ni yɔɔ okɛ Yehowa teŋ lɛ mli awa lɛ, belɛ esa akɛ ohe be ni okase Yesu he nii jogbaŋŋ. Kɛ́ ofee nakai lɛ, suɔmɔ ni oyɔɔ kɛhã Yehowa lɛ mli baawa, ni obaaya nɔ oye lɛ anɔkwa.

16. Kɛ́ wɔyeɔ anɔkwa lɛ, mɛɛ gbɛ nɔ wɔnáa he sɛɛ? (Lala 18:25; Mika 6:8)

¹⁶ Kɛ́ wɔyeɔ anɔkwa lɛ, bei pii lɛ, wɔnáa nanemɛi hu ni yeɔ wɔ anɔkwa. (Rut 1:14-17) Agbɛnɛ hu, mɛi ni yeɔ Yehowa anɔkwa lɛ atsui nyɔɔ amɛmli yɛ amɛshihilɛ mli. Mɛni hewɔ? Ejaakɛ Yehowa ewo shi akɛ, ebaaye mɛi ni yeɔ lɛ anɔkwa lɛ anɔkwa. (Kanemɔ Lala 18:25; Mika 6:8.) Bo lɛ, susumɔ enɛ he okwɛ. Yehowa, mɔ ni bɔ nɔ fɛɛ nɔ lɛ miisumɔ ni ekɛ wɔ abɔ naanyo waa. Ni kɛ́ ekɛ wɔ bɔ naanyo lɛ, nɔ ko nɔ ko bɛ ni baanyɛ agbála wɔteŋ. Kaa jio, shiteekɛwoo jio, gbele po, nyɛŋ agbála wɔ kɛ lɛ teŋ. (Dan. 12:13; Luka 20:37, 38; Rom. 8:38, 39) Enɛ hãa wɔnaa akɛ, ehi waa akɛ wɔbaakase Daniel ni wɔya nɔ wɔye Yehowa anɔkwa.

17-18. Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁷ Yɛ nikasemɔ nɛɛ mli lɛ, wɔsusu sui ni Daniel yɔɔ lɛ ateŋ enyɔ pɛ ahe. Shi nibii babaoo yɛ ni wɔbaanyɛ wɔkase kɛjɛ edɛŋ. Akɛ nɔkwɛmɔnɔ lɛ, Yehowa jie ninai srɔtoi akpo etsɔɔ Daniel, ni ehã ela lamɔi srɔtoi, ni eye ebua lɛ ni enyɛ etsɔɔ gbalɛi komɛi ashishi. Gbalɛi nɛɛ ateŋ babaoo eba mli momo. Gbalɛi nɛɛ ekomɛi hu tsɔɔ nibii ni baaba wɔsɛɛ ni baasa adesai ni yɔɔ shikpɔŋ lɛ nɔ lɛ fɛɛ ahe.

¹⁸ Yɛ nikasemɔ ni nyiɛ sɛɛ lɛ mli lɛ, wɔbaasusu gbalɛi enyɔ komɛi ni Daniel gba lɛ ahe. Kɛ́ wɔnu gbalɛi nɛɛ ashishi lɛ, ebaaye ebua wɔ fɛɛ kɛ́ wɔda jio, kɛ́ wɔdako jio, koni wɔkpɛ yiŋ kpakpai bianɛ. Agbɛnɛ hu, gbalɛi nɛɛ baaye abua wɔ ni wɔfee ekãa ni wɔye anɔkwa, koni no asaa wɔ kɛhã kai ni etsɛŋ wɔkɛbaakpe lɛ.