1. Mɛni baanyɛ ahã onya Biblia mli gbalɛi akasemɔ he?

 NYƐMI nuu oblanyo ko ni atsɛɔ lɛ Ben lɛ wie akɛ: “Misumɔɔ ni makase Biblia mli gbalɛi waa.” Ani bo hu osumɔɔ Biblia mli gbalɛi kasemɔ? Aloo onuɔ he akɛ Biblia mli gbalɛi lɛ ashishinumɔ wa tsɔ? Ekolɛ onuɔ he po akɛ ekasemɔ nyinaa mɔ hiɛ. Shi kɛ́ oná ole yiŋtoo hewɔ ni Yehowa hã aŋmala awo Biblia lɛ mli lɛ, obaanya ekasemɔ he waa.

2. Mɛni he wɔbaasusu yɛ nikasemɔ nɛɛ mli?

² Yɛ nikasemɔ nɛɛ mli lɛ, wɔbaana nɔ hewɔ ni esa akɛ wɔkase Biblia mli gbalɛi kɛ bɔ ni akaseɔ lɛ ahãa. No sɛɛ lɛ, wɔbaasusu gbalɛi enyɔ komɛi ni yɔɔ Daniel wolo lɛ mli lɛ ahe ni wɔkwɛ bɔ ni kɛ́ wɔnu shishi lɛ, no baanyɛ aye abua wɔ bianɛ.

3. Kɛ́ wɔmiitao wɔnu Biblia mli gbalɛi ashishi lɛ, mɛni esa akɛ wɔfee?

³ Ja wɔhã Yehowa eye ebua wɔ dani wɔbaanyɛ wɔnu Biblia mli gbalɛi ashishi. Naa nɔkwɛmɔnɔ ko ni baahã wɔnu enɛ shishi. Kɛ́ ooya he ko ni oleee jɛmɛ, shi onaanyo ko ni le jɛmɛ waa lɛ fata ohe ni ele he ni nyɛshɛ kɛ he ni gbɛ lɛ eko fɛɛ eko ni nyɛbaatsɔ nɔ lɛ kɛ nyɛ baayaje lɛ, te obaanu he ohã tɛŋŋ? Ebaaŋɔɔ onaa waa akɛ onaanyo lɛ fata ohe. Yehowa tamɔ nakai naanyo lɛ, ele he ni wɔshɛ yɛ je lɛ mli kɛ nɔ ni kã wɔhiɛ ni baaba hu. No hewɔ lɛ, kɛ́ wɔmiitao wɔnu Biblia mli gbalɛi ashishi lɛ, esa akɛ wɔba wɔhe shi ni wɔbi lɛ ni eye ebua wɔ.​—Dan. 2:28; 2 Pet. 1:19, 20.

4. Mɛni hewɔ Yehowa hã aŋmala gbalɛi yɛ e-Wiemɔ lɛ mli lɛ? (Yeremia 29:11) (Kwɛmɔ mfoniri lɛ hu.)

⁴ Fɔlɔi sumɔɔ ni amɛbii aná shihilɛ kpakpa wɔsɛɛ, ni nakai nɔŋŋ Yehowa hu sumɔɔ ni wɔná shihilɛ kpakpa wɔsɛɛ. (Kanemɔ Yeremia 29:11.) Shi nɔ ko yɛ ni Yehowa baanyɛ afee ni  fɔlɔi nyɛŋ afee. No ji, enyɛɔ etsɔɔ nɔ ni baaba wɔsɛɛ lɛ fitsofitso, ni ebaa mli hu. Yehowa hã aŋmala gbalɛi srɔtoi yɛ e-Wiemɔ lɛ mli koni wɔle nibii ni he hiaa waa ni baaba wɔsɛɛ lɛ dani amɛba. (Yes. 46:10) Biblia mli gbalɛi ji nikeenii ni wɔ-Tsɛ ni yɔɔ ŋwɛi ni sumɔɔ wɔ lɛ kɛdro wɔ. Shi te obaafee tɛŋŋ ohe oye akɛ nibii ni Biblia lɛ egba lɛ baaba mli lɛɛlɛŋ?

5. Mɛni oblahii kɛ oblayei baanyɛ akase yɛ Max sane lɛ mli?

⁵ Yɛ maji pii anɔ lɛ, mɛi ni wɔnyɛmimɛi oblahii kɛ oblayei lɛ kɛyaa skul lɛ ateŋ mɛi babaoo enaaa Biblia lɛ akɛ Nyɔŋmɔ Wiemɔ. Amɛbuɔ lɛ akɛ wolo ko kɛkɛ. Bei pii lɛ, nibii ni amɛwieɔ kɛ nibii ni amɛfeɔ lɛ baanyɛ ahã wɔnyɛmimɛi oblahii kɛ oblayei lɛ ajwɛŋmɔ afee amɛ enyɔnyɔɔnyɔ yɛ anɔkwale lɛ he. Naa nyɛmi nuu ko ni atsɛɔ lɛ Max lɛ niiashikpamɔ. Ewie akɛ: “Be ni miyaa skul lɛ, ebashɛ he ko ni minu he akɛ jamɔ mli ni mi kɛ mifɔlɔi yɔɔ lɛ jeee anɔkwa jamɔ lɛ, ni Biblia lɛ hu jɛɛɛ Nyɔŋmɔ ŋɔɔ.” Mɛni efɔlɔi fee? Ewie akɛ: “Eyɛ mli akɛ mifɔlɔi atsui fã waa moŋ, shi amɛto amɛtsui shi amɛhã mi.” Max fɔlɔi jɛ Biblia lɛ mli amɛhã esanebimɔi ahetoo. Shi Max hu fee nɔ ko. Ewie akɛ: “Mi diɛŋtsɛ mikase Biblia mli gbalɛi lɛ, ni mikɛ oblahii kɛ oblayei krokomɛi ni yɔɔ asafo lɛ mli lɛ gba he sane.” Mɛni jɛ mli kɛba? Max wie akɛ: “Agbɛnɛ lɛ, mibahe miye akɛ Biblia lɛ jɛ Nyɔŋmɔ ŋɔɔ!”

6. Kɛ́ oyiŋ miifee bo enyɔnyɔɔnyɔ yɛ anɔkwale lɛ he lɛ, mɛni esa akɛ ofee, ni mɛni hewɔ?

⁶ Kɛ́ bo hu onuɔ he akɛ Biblia lɛ jeee Nyɔŋmɔ Wiemɔ, tamɔ bɔ ni Max nu he lɛ, kaaye otsui. Nɔ ko yɛ ni obaanyɛ ofee ni baaye abua bo. Bɔ ni kɛ́ dade ko bɔ ŋkanale ni afeee he nɔ ko lɛ efiteɔ dade lɛ kwraa lɛ, nakai nɔŋŋ kɛ́ bo hu oyiŋ miifee bo enyɔnyɔɔnyɔ ni ofeee nɔ ko yɛ he lɛ, ohemɔkɛyeli lɛ baagbo kwraa. No hewɔ lɛ, bi ohe akɛ, ‘Ani miheɔ miyeɔ akɛ nibii ni Biblia lɛ kɛɛ ebaaba wɔsɛɛ lɛ baaba lɛɛlɛŋ?’ Kɛ́ oheee oyeee akɛ ebaaba lɛ, no lɛ, ebaahi waa akɛ obaakase Biblia mli gbalɛi ni eba mli momo lɛ. Te esa akɛ ofee lɛ ohã tɛŋŋ?

7. Te Daniel kase gbalɛi ni yɔɔ Nyɔŋmɔ Wiemɔ lɛ mli lɛ ehã tɛŋŋ? (Daniel 12:10) (Kwɛmɔ mfoniri lɛ hu.)

⁷ Bɔ ni Daniel kase gbalɛi ni yɔɔ Nyɔŋmɔ Wiemɔ lɛ mli lɛ ehã lɛ ye ebua lɛ ni enu shishi jogbaŋŋ, ni wɔbaanyɛ wɔkase lɛ. Klɛŋklɛŋ lɛ, ekase kɛ jwɛŋmɔ kpakpa. Daniel kɛma ehiɛ akɛ, eekase gbalɛi lɛ koni ele anɔkwale lɛ. Nɔ ni ji enyɔ lɛ, Daniel ba ehe shi. Eyɔse akɛ, kɛ́ etee nɔ ekɛ Yehowa nyiɛ ni ebo lɛ toi lɛ, ebaaye ebua lɛ ni enu gbalɛi lɛ ashishi. (Dan. 2:27, 28; kanemɔ Daniel 12:10.) Nɔ kroko ni efee kɛtsɔɔ akɛ ebaa ehe shi ji, esɔle ebi Yehowa dɛŋ yelikɛbuamɔ. (Dan. 2:18) Nɔ ni ji etɛ lɛ, Daniel kase gbalɛi lɛ jogbaŋŋ. Bɔ ni efee lɛ ji, etao gbalɛi lɛ ahe saji amli fitsofitso yɛ Biblia lɛ fãi ni yɔɔ yɛ ebeiaŋ lɛ amli. (Yer. 25:11, 12; Dan. 9:2) Mɛɛ gbɛ nɔ obaanyɛ okase Daniel?  

8. Mɛɛ jwɛŋmɔ ni ejaaa mɛi komɛi kɛkaseɔ Biblia mli gbalɛi?

⁸ Kwɛmɔ akɛ mɛɛ jwɛŋmɔ okɛkaseɔ Biblia mli gbalɛi lɛ. Ani ookase koni ole anɔkwale lɛ?  Kɛ́ nakai ni lɛ, Yehowa baaye ebua bo. (Yoh. 4:23, 24; 14:16, 17) Shi mɛi komɛi yɛ ni esoro jwɛŋmɔ ni amɛkɛkaseɔ Biblia mli gbalɛi lɛ kwraa. Amɛ lɛ, jwɛŋmɔ ni amɛkɛkaseɔ ji, amɛmiitao amɛna nɔ ko yɛ mli ni amɛbaanyɛ amɛdamɔ nɔ amɛwie akɛ Biblia lɛ jɛɛɛ Nyɔŋmɔ ŋɔɔ. Amɛsusuɔ akɛ kɛ́ amɛnyɛ amɛna nɔ ko ni tsɔɔ akɛ Biblia lɛ jɛɛɛ Nyɔŋmɔ ŋɔɔ lɛ, agbɛnɛ lɛ, amɛbaanyɛ amɛhi shi bɔ ni amɛ diɛŋtsɛ amɛsumɔɔ. Shi esaaa akɛ wɔkɛ nakai jwɛŋmɔ kaseɔ Biblia mli gbalɛi lɛ. Agbɛnɛ hu, kɛ́ wɔmiikase Biblia mli gbalɛi lɛ, ja wɔná su ko dani wɔbaanyɛ wɔnu shishi. Mɛni ji nakai su lɛ?

9. Mɛɛ su kɛ́ wɔná lɛ ebaaye ebua wɔ ni wɔnu Biblia mli gbalɛi ashishi? Ni mɛni hewɔ okɛɔ nakai?

⁹ Ba ohe shi. Yehowa ewo shi akɛ, ebaaye ebua mɛi ni baa amɛhe shi lɛ. (Yak. 4:6) No hewɔ lɛ, esa akɛ wɔsɔle wɔbi lɛ ni eye ebua wɔ ni wɔnu Biblia mli gbalɛi ashishi. Agbɛnɛ hu, esa akɛ wɔyɔse akɛ, nyɔŋ anɔkwafo lɛ pɛ nɔ Yehowa tsɔɔ eyeɔ ebuaa ewebii lɛ koni amɛnu nibii ni yɔɔ Biblia lɛ mli lɛ ashishi. (Luka 12:42) Yehowa jeee basabasafeemɔ Nyɔŋmɔ. No hewɔ lɛ, nilee yɛ mli akɛ ebaatsɔ gbɛ kome pɛ nɔ eye ebua wɔ ni wɔnu nibii ni yɔɔ e-Wiemɔ lɛ mli lɛ ashishi.​—1 Kor. 14:33; Efe. 4:4-6.

10. Mɛni okaseɔ yɛ Esther sane lɛ mli?

¹⁰ Kasemɔ Biblia mli gbalɛi lɛ jogbaŋŋ. Kɔ gbalɛ ko ni osumɔɔ waa ni otao nii amli yɛ he. Nakai ji bɔ ni nyɛmi yoo ko ni atsɛɔ lɛ Esther lɛ fee. No mli lɛ, eetao ekase gbalɛi ni wie akɛ Mesia lɛ baaba lɛ ahe nii waa. Ewie akɛ: “Be ni miná afii 15 lɛ, mibɔi niiamlitaomɔ koni maná nɔmimaa akɛ agba gbalɛi nɛɛ dani afɔ Yesu.” Nibii ni ekase yɛ Ŋshɔ Ni Egbo Wolokpoi lɛ ahe lɛ hã ená nɔmimaa akɛ, agba gbalɛi nɛɛ dani afɔ Yesu. Ewie akɛ: “Aŋma wolokpoi nɛɛ ekomɛi dani afɔ Yesu. No hewɔ lɛ, ekã shi faŋŋ akɛ, gbalɛi ni yɔɔ mli lɛ jɛ Nyɔŋmɔ ŋɔɔ.” Ekɛfata he akɛ: “Nibii nɛɛ ekomɛi yɛ ni mikane shii abɔ dani minu shishi.” Shi eŋɔɔ enaa waa akɛ ehãaa enɛ aje enijiaŋ wui. Esther kase Biblia mli gbalɛi babaoo ahe nii fitsofitso, ni no hewɔ lɛ, ewie akɛ: “Agbɛnɛ, mi diɛŋtsɛ mibana faŋŋ akɛ, saji ni yɔɔ Biblia lɛ mli lɛ ji anɔkwale!”

11. Kɛ́ wɔtao nii amli ni wɔna akɛ saji ni yɔɔ Biblia lɛ mli lɛ ji anɔkwale lɛ, mɛɛ gbɛ nɔ wɔnáa he sɛɛ?

¹¹ Kɛ́ wɔna bɔ ni gbalɛi ni yɔɔ Nyɔŋmɔ Wiemɔ lɛ mli lɛ ekomɛi eba mli momo lɛ, ehãa wɔkɛ wɔhiɛ fɔ̃ɔ Yehowa nɔ waa ni wɔboɔ gbɛtsɔɔmɔi ni ekɛhãa wɔ lɛ toi. Kɛfata he lɛ, ehãa wɔnáa hiɛnɔkamɔ akɛ, ekɔɔɔ he eko naagbai ni wɔkɛkpeɔ bianɛ lɛ, wɔsɛɛ lɛ, nibii baahi. Nyɛhãa wɔsusua gbalɛi enyɔ komɛi ni Daniel gba ni miiba mli bianɛ lɛ ahe wɔkwɛa. Kɛ́ wɔnu gbalɛi nɛɛ ashishi lɛ, ebaawa wɔ ni wɔkpɛ yiŋ kpakpai.

12. Mɛni amaga lɛ nanetokotai lɛ ni akɛ ‘dade ni akɛ sũ ni akpɔtɔ efutu’ fee lɛ damɔ shi kɛhã? (Daniel 2:41-43)

¹² Kanemɔ Daniel 2:41-43. Be ko lɛ, Maŋtsɛ Nebukadnezar la lamɔ ko ni Daniel tsɔɔ shishi. Yɛ lamɔ lɛ mli lɛ, maŋtsɛ lɛ na amaga wulu ko ni enanetokotai lɛ akɛ ‘dade ni akɛ sũ  ni akpɔtɔ efutu’ fee. Kɛ́ wɔkɛ gbalɛ nɛɛ to gbalɛi krokomɛi ni yɔɔ Daniel wolo lɛ kɛ Kpojiemɔ wolo lɛ mli lɛ ahe lɛ, wɔbaanyɛ wɔmu sane naa akɛ, amaga lɛ nanetokotai lɛ damɔ shi kɛhã Anglo-Amerika Jeŋ Hewalɛ lɛ, ni ji United States kɛ Britain ni efee ekome kɛmiitsu nii ŋmɛnɛ akɛ jeŋ hewalɛ lɛ. Daniel gba akɛ, jeŋ hewalɛ nɛɛ “fã baawa, ni fã hu lɛ ewaŋ akɛ ebaajwa.” Mɛni hewɔ ewaŋ akɛ fã lɛ baajwa lɛ? Ejaakɛ sũ ni akpɔtɔ lɛ, ni ji mɛi ni yɔɔ nɔyeli nɛɛ shishi lɛ, hãaa enyɛ ekɛ edade hewalɛ lɛ atsu nii. b

13. Mɛɛ nibii ni he hiaa wɔkaseɔ kɛjɛɔ gbalɛ nɛɛ mli?

¹³ Bɔ ni Daniel tsɔɔ amaga lɛ he lamɔ lɛ shishi lɛ hãa wɔkaseɔ nibii pii. Nɔ ni ewie yɛ nanetokotai lɛ ahe lɛ hãa wɔleɔ nibii komɛi ni he hiaa waa. Klɛŋklɛŋ lɛ, ehãa wɔnaa akɛ, Anglo-Amerika Jeŋ Hewalɛ lɛ yɛ hewalɛ waa. Akɛ nɔkwɛmɔnɔ lɛ, jeŋ hewalɛ nɛɛ fata maji ni ye kunim yɛ Klɛŋklɛŋ Jeŋ Ta lɛ kɛ Jeŋ Ta Ni Ji Enyɔ lɛ mli lɛ ahe. Shi akɛni jeŋ hewalɛ nɛɛ shishi bii lɛ kɛ amɛhe tswaa ni amɛkɛ amralo lɛ hu tswaa hewɔ lɛ, jeŋ hewalɛ nɛɛ nyɛɛɛ afee nibii ni etaoɔ efee lɛ. Nɔ ni ji enyɔ lɛ, ehãa wɔnaa akɛ, Anglo-Amerika Jeŋ Hewalɛ lɛ ji jeŋ hewalɛ ni baahi shi be ni Nyɔŋmɔ Maŋtsɛyeli lɛ baafo adesai anɔyelii fɛɛ sɛɛ lɛ. Eyɛ mli akɛ maji komɛi kɛ Anglo-Amerika Jeŋ Hewalɛ lɛ miitswa moŋ, shi amɛbayeŋ enajiaŋ. Nɔ hewɔ ni wɔwieɔ nakai lɛ ji akɛ, “tɛ” lɛ ni damɔ shi kɛhã Nyɔŋmɔ Maŋtsɛyeli lɛ, baajwara amaga lɛ nanetokotai lɛ ni damɔ shi kɛhã Anglo-Amerika Jeŋ Hewalɛ lɛ.​—Dan. 2:34, 35, 44, 45.

14. Kɛ́ wɔnu gbalɛ ni kɔɔ amaga lɛ nanetokotai lɛ ni fã dade ni fã hu su lɛ he lɛ shishi lɛ, mɛɛ gbɛ nɔ ebaaye ebua wɔ ni wɔkpɛ yiŋ kpakpai?

¹⁴ Ani oheɔ oyeɔ akɛ nɔ ni Daniel wie yɛ amaga lɛ nanetokotai lɛ ni fã dade ni fã hu sũ lɛ he lɛ ji anɔkwale? Kɛ́ oheɔ oyeɔ lɛ, no baasa bɔ ni ohiɔ shi ohãa lɛ he. Okɛfeŋ oti ni ma ohiɛ akɛ esa akɛ oná shika loo heloonaa nibii babaoo, ejaakɛ ole akɛ, etsɛŋ abaakpãtã jeŋ fɔŋ nɛɛ hiɛ. (Luka 12:16-21; 1 Yoh. 2:15-17) Agbɛnɛ hu, kɛ́ onu gbalɛ nɛɛ shishi lɛ, ebaaye ebua bo ni ona akɛ, ehe miihia ni ashiɛ ni atsɔɔ mɛi nii waa bianɛ. (Mat. 6:33; 28:18-20) Amrɔ nɛɛ ni onu gbalɛ nɛɛ shishi lɛ, bi ohe akɛ, ‘Ani yiŋ ni mikpɛɔ lɛ tsɔɔ akɛ miheɔ miyeɔ akɛ etsɛŋ Nyɔŋmɔ Maŋtsɛyeli lɛ baafo adesai nɔyelii fɛɛ sɛɛ?’ 

15. Yɛ wɔbei nɛɛ amli lɛ, namɔ ji “kooyigbɛ maŋtsɛ lɛ,” ni namɔ ji “wuoyigbɛ maŋtsɛ lɛ”? (Daniel 11:40)

¹⁵ Kanemɔ Daniel 11:40. Daniel yitso 11 lɛ wieɔ maŋtsɛmɛi enyɔ loo nɔyelii enyɔ komɛi ni kɛ amɛhe miitswa koni amɛye je lɛ nɔ lɛ ahe. Kɛ́ wɔkɛ gbalɛ nɛɛ to gbalɛi krokomɛi ni yɔɔ Biblia lɛ mli lɛ ahe lɛ, ehãa wɔnaa akɛ, Russia kɛ maji ni fata ehe lɛ ji “kooyigbɛ maŋtsɛ lɛ,” ni Anglo-Amerika Jeŋ Hewalɛ lɛ ji “wuoyigbɛ maŋtsɛ lɛ.” c

16. Mɛɛ naagbai nyɛmimɛi ni yɔɔ hei ni “kooyigbɛ maŋtsɛ lɛ” yeɔ nɔ lɛ kɛkpeɔ?

¹⁶ “Kooyigbɛ maŋtsɛ lɛ” miiwa Nyɔŋmɔ webii ni yɔɔ hei ni eyeɔ nɔ yɛ lɛ ayi waa. Ayiɔ Yehowa Odasefoi lɛ ekomɛi ni awoɔ amɛ tsuŋ yɛ amɛhemɔkɛyeli lɛ hewɔ. Shi nibii ni “kooyigbɛ maŋtsɛ lɛ” feɔ wɔnyɛmimɛi lɛ hãaa amɛnijiaŋ aje wui, moŋ lɛ, ehãa amɛhemɔkɛyeli lɛ mli waa. Mɛni hewɔ? Ejaakɛ wɔnyɛmimɛi lɛ le akɛ, amɛyi ni awaa lɛ miihã Daniel gbalɛ lɛ miiba mli. d (Dan. 11:41) Enɛ ni wɔle lɛ hãa wɔ  hu wɔhiɛnɔkamɔ mli waa ni wɔyaa nɔ wɔyeɔ Yehowa anɔkwa.

17. Mɛɛ naagbai Nyɔŋmɔ webii ni yɔɔ maji ni “wuoyigbɛ maŋtsɛ lɛ” yeɔ nɔ lɛ anɔ lɛ kɛkpe?

¹⁷ “Wuoyigbɛ maŋtsɛ lɛ” hu ewa Nyɔŋmɔ webii lɛ ayi be ko ni eho. Akɛ nɔkwɛmɔnɔ lɛ, be ni awuɔ Klɛŋklɛŋ Jeŋ Ta lɛ kɛ Jeŋ Ta Ni Ji Enyɔ lɛ, awo nyɛmimɛi babaoo tsuŋ akɛni amɛkɛ amɛhe wooo ta lɛ mli hewɔ, ni ashwie Odasefoi abii babaoo kɛje skul akɛni amɛkɛɛɛ plɛj ni amɛkɛ amɛhe wooo jakumaŋ nifeemɔi krokomɛi amli lɛ hewɔ. Eyɛ mli akɛ nyɛsɛɛ nɛɛ, awaaa Yehowa tsuji ni yɔɔ maji ni wuoyigbɛ maŋtsɛ lɛ yeɔ nɔ lɛ anɔ lɛ ayi moŋ, shi amɛkɛ shihilɛi ni baanyɛ ahã ewa kɛhã amɛ akɛ amɛbaaye Yehowa anɔkwa lɛ kpeɔ. Akɛ nɔkwɛmɔnɔ lɛ, kɛ́ aafɔ̃ oshiki ni Kristofonyo ko kwɛɛɛ jogbaŋŋ lɛ, ebaafĩ maŋkwramɔ kuu ko sɛɛ, loo mɛi ni damɔ shi akɛ afɔ̃ oshiki ahã amɛ lɛ ateŋ mɔ ko sɛɛ. Ekolɛ eyafɔ̃ŋ oshiki lɛ eko moŋ, shi yɛ ejwɛŋmɔ mli kɛ etsui mli lɛ, ená kulɛ, kuu nɛɛ aloo ashimashi nɛɛ ye kunim. Ehe miihia waa ni wɔkwɛ jogbaŋŋ koni wɔkɛ wɔhe akawo pɔlitis mli yɛ  wɔtsui kɛ wɔjwɛŋmɔ mli po!​—Yoh. 15:18, 19; 18:36.

18. Te esa akɛ nɔ ni yaa nɔ yɛ “wuoyigbɛ maŋtsɛ lɛ” kɛ “kooyigbɛ maŋtsɛ lɛ” teŋ lɛ ahã wɔnu he wɔhã tɛŋŋ? (Kwɛmɔ mfoniri lɛ hu.)

¹⁸ Kɛ́ mɛi ni heee gbalɛi ni yɔɔ Biblia lɛ mli lɛ amɛyeee lɛ na akɛ “wuoyigbɛ maŋtsɛ lɛ” kɛ “kooyigbɛ maŋtsɛ lɛ” ‘miishishii amɛhe’ lɛ, amɛtsui fãa waa. (Dan. 11:40) Mɛni hewɔ? Ejaakɛ maŋtsɛmɛi enyɔ nɛɛ yɛ okplɛmii wujiwuji ni baanyɛ akpãtã nɔ fɛɛ nɔ hiɛ yɛ shikpɔŋ lɛ nɔ. Shi wɔle akɛ, Yehowa eŋmɛŋ gbɛ ni nɔ ko tamɔ nakai aba. (Yes. 45:18) No hewɔ lɛ, nɔ ni yaa nɔ yɛ “wuoyigbɛ maŋtsɛ lɛ” kɛ “kooyigbɛ maŋtsɛ lɛ” teŋ lɛ wooo wɔhe gbeyei. Moŋ lɛ, ehãa wɔhemɔkɛyeli lɛ mli waa, ejaakɛ ehãa wɔnaa faŋŋ akɛ je lɛ naagbee lɛ ebɛŋkɛ.   

19. Mɛni wɔbaanyɛ wɔwie yɛ Biblia mli gbalɛi lɛ ahe?

¹⁹ Wɔleee bɔ ni Biblia mli gbalɛi komɛi baaba mli amɛhã. Gbalɔ Daniel po nuuu nibii komɛi ni eŋmala lɛ ashishi. (Dan. 12:8, 9) Shi kɛ́ wɔleee bɔ ni gbalɛ ko baaba mli ehã lɛ, no etsɔɔɔ akɛ ebaŋ mli. Wɔheɔ wɔyeɔ akɛ, kɛ́ be ni sa lɛ shɛ lɛ, Yehowa baahã wɔnu shishi tamɔ bɔ ni efee yɛ blema lɛ.​—Amos 3:7.

20. Mɛɛ gbalɛi etsɛŋ amɛbaaba mli? Ni mɛni esa akɛ wɔya nɔ wɔfee?

²⁰ Etsɛŋ, gbalɛ ni kɛɔ akɛ abaakɛɛ “toiŋjɔlɛ kɛ shweshweeshwe” lɛ baaba mli. (1 Tes. 5:3) No sɛɛ lɛ, je lɛŋ nɔyelii lɛ baatutua amale jamɔ ni amɛbaakpãtã hiɛ. (Kpo. 17:16, 17) Kɛkɛ lɛ, amɛtutua Nyɔŋmɔ webii lɛ. (Eze. 38:18, 19) Enɛ kɛ naagbee ta lɛ, ni ji Harmagedon ta lɛ baaba. (Kpo. 16:14, 16) Wɔyɛ nɔmimaa waa akɛ, etsɛŋ ni nibii nɛɛ baaba. Shi kɛyashi amɛbaaba lɛ, nyɛhãa wɔyaa nɔ wɔkasea gbalɛi ni yɔɔ Biblia lɛ mli lɛ, ni wɔye wɔbua mɛi krokomɛi ni amɛ hu amɛfee nakai. Enɛ baatsɔɔ akɛ, wɔhiɛ sɔɔ nikeenii nɛɛ ni wɔ-Tsɛ ni yɔɔ ŋwɛi ni sumɔɔ wɔ lɛ kɛdro wɔ lɛ.