• “Minu he akɛ miwu lɛ eje misɛɛ shii abɔ.”

• “Minu he akɛ mihiɛ eshwie shi, mihe bɛ fɛo, ni sɛɛnamɔ ko bɛ mihe.”

• “Minyɛɛɛ mikɛ mɔ ko mɔ ko agba he sane. Mikɛ bɔ ni nii lɛ dɔɔ mi ehãa lɛ wo mihe.”

• “Minu he akɛ Yehowa susuuu mihe.”

Nɛkɛ ji bɔ ni yei komɛi nu he be ni amɛwumɛi kwɛ ponografi lɛ. Ni kɛ́ nuu lɛ kwɛɔ yɛ teemɔŋ, ni ekolɛ efee nakai nyɔji abɔ loo afii abɔ lɛ, ekolɛ yoo lɛ heŋ lɛ eyeŋ dɔŋŋ. Yoo ko ni ebote gbalashihilɛ mli lɛ wie akɛ: “Mihiɛ fee mi yaa, ni mibi mihe akɛ, ‘Miwu lɛ nɔŋŋ nɛ? Ani nibii krokomɛi hu yɛ ni efeɔ ni mileee?’”

Aŋma sane nɛɛ ahã yei ni amɛwumɛi kwɛɔ ponografi lɛ. a Biblia mli shishitoo mlai ni yɔɔ sane nɛɛ mli lɛ baashɛje amɛmii, ebaahã amɛna akɛ Yehowa sumɔɔ amɛ ni eesumɔ ni eye ebua amɛ, ni agbɛnɛ hu lɛ, ebaaye ebua amɛ ni amɛtsɛ amɛtsui amɛŋmɛ amɛmli ni amɛya nɔ amɛsɔmɔ Yehowa. b

Eyɛ mli akɛ obɛ hewalɛ yɛ nɔ fɛɛ nɔ ni owu lɛ feɔ lɛ nɔ moŋ, shi nibii komɛi yɛ ni obaanyɛ ofee koni okahao fe nine ni otsui hu akaye fe nine. Nibii ni obaanyɛ ofee lɛ ekomɛi nɛ.

Kaanu he akɛ bo ejɛ. Yoo ko baanyɛ anu he akɛ lɛ ejɛ ni ewu lɛ kwɛɔ ponografi lɛ. Akɛ nɔkwɛmɔnɔ lɛ, yoo ko ni atsɛɔ lɛ Alice c lɛ nu he akɛ, ekolɛ ehe bɛ akɔnɔ. Ebi ehe akɛ, ‘Mɛni hewɔ miwu sumɔɔ ni ekwɛ yei krokomɛi moŋ fe mi?’ Yei komɛi hu nuɔ he akɛ bɔ ni amɛfeɔ amɛnii amɛhãa lɛ ehiii, ni no miiwo sane lɛ mli wu. Yoo ko ni atsɛɔ lɛ Danielle lɛ wie akɛ: “Bɔ ni mimli fuɔ lɛ sɔŋŋ hewɔ lɛ, minu he akɛ mi moŋ miifite wɔgbãla lɛ.”

Ani bo hu onuɔ he akɛ bo ejɛ ni owu lɛ kwɛɔ ponografi lɛ? Kɛ́ nakai ni lɛ, ná ole akɛ Yehowa enaaa lɛ akɛ bo ejɛ ni owu lɛ feɔ nakai lɛ. Yakobo 1:14 lɛ kɛɔ akɛ: “Mɔ fɛɛ mɔ lɛ, nɔ ni lɛ diɛŋtsɛ eshweɔ lɛ, no gbalaa lɛ ni elakaa lɛ.” (Rom. 14:12; Fip. 2:12) No hewɔ lɛ, Yehowa shwaaa bo kwraa. Moŋ lɛ, ehiɛ sɔɔ bo yɛ anɔkwa ni oyeɔ lɛ lɛ hewɔ.​—2 Kro. 16:9.

Agbɛnɛ hu, hã ehi ojwɛŋmɔ mli akɛ, kɛ́ owu lɛ kwɛɔ ponografi lɛ, no etsɔɔɔ akɛ ohe bɛ akɔnɔ. Mɛi ni ekase nɛkɛ naagba nɛɛ he nii lɛ kɛɔ akɛ, kɛ́ mɔ ko kwɛɔ ponografi lɛ, bɔlɛnamɔ he akɔnɔi ni  enáa lɛ, yoo ko yoo ko bɛ ni baanyɛ agbe nakai akɔnɔi lɛ.    

Kaaye otsui fe nine. Yoo ko ni atsɛɔ lɛ Catherine lɛ wie akɛ ejwɛŋ ponografi ni ewu kwɛɔ lɛ he aahu akɛ ehe ejwɛŋmɔ fɛɛ. Yoo ko ni atsɛɔ lɛ Frances lɛ hu wie akɛ: “Kɛ́ mileee he ni miwu lɛ yɔɔ lɛ, kɛkɛ lɛ mihao. Be fɛɛ be nɛɛ, mitsui miiye.” Yei komɛi hu wie akɛ kɛ́ amɛna amɛnyɛmi Kristofonyo ko ni le akɛ amɛwumɛi kwɛɔ ponografi lɛ, efeɔ amɛ hiɛgbele waa. Mɛi komɛi hu nuɔ he akɛ amɛhe efee shoo, ejaakɛ amɛsusuɔ akɛ mɔ ko mɔ ko nuuu bɔ ni amɛnuɔ he amɛhãa shishi.

Ewaaa akɛ bo hu obaanu he nakai. Shi kɛ́ otee nɔ ojwɛŋ enɛ he lɛ, ebaahã oye otsui waa. Moŋ lɛ, bɔɔ mɔdɛŋ ni okɛ ojwɛŋmɔ ama okɛ Yehowa teŋ wekukpaa lɛ nɔ, ni no baahã ofi shi.​—Lala 62:2; Efe. 6:10.

Awie yei komɛi ahe yɛ Biblia lɛ mli ni shihilɛ ni amɛyaje mli lɛ hã amɛhao waa, shi amɛsɔle amɛhã Yehowa ni eshɛje amɛmii. Kɛ́ okane yei nɛɛ ahe saji ni ojwɛŋ nɔ lɛ, ebaaye ebua bo waa. Jeee eko fɛɛ eko Yehowa jie naagba lɛ kɛje jɛmɛ. Shi yɛ fɛɛ mli lɛ, eye ebua amɛ ni amɛyeee amɛtsui tsɔ. Akɛ nɔkwɛmɔnɔ lɛ, Hana “werɛ ho ehe waa” yɛ shihilɛ ni eyɔɔ lɛ mli lɛ hewɔ. Shi ‘ekɛ be kplaŋŋ sɔle yɛ Yehowa hiɛ,’ ni no hewɔ lɛ, eyeee etsui dɔŋŋ, eyɛ mli akɛ no mli lɛ eleee bɔ ni eshihilɛ lɛ naa baayakpa ahã.​—1 Sam. 1:10, 12, 18; 2 Kor. 1:3, 4.

Hã asafoŋ onukpai lɛ aye abua bo. Amɛtamɔ “teemɔhe be ni kɔɔyɔɔ miitswa,” kɛ “abobaahe be ni nugbɔ miinɛ.” (Yes. 32:2) Ekolɛ amɛbaatsɔɔ bo nyɛmi yoo ko ni obaanyɛ ogba lɛ otsuiŋ sane ni baanyɛ ashɛje omii hu.​—Abɛi 17:17.

Ani obaanyɛ oye obua owu lɛ ni ekpa ponografi lɛ kwɛmɔ? Ekolɛ obaanyɛ oye obua lɛ, ejaakɛ Biblia lɛ kɛɛ, “mɛi enyɔ hi fe mɔ kome.” (Jaj. 4:9-12) Ni tsɔɔ akɛ, kɛ́ mɛi enyɔ fee ekome kɛtsu naagba ko he nii loo amɛte shi amɛwo henyɛlɔ ko ni he wa lɛ, amɛyeɔ kunim. Mɛi ni yeɔ amɛbuaa mɛi ni yɔɔ ponografi kwɛmɔ he naagba lɛ etsɔɔ akɛ, kɛ́ nuu ko kwɛɔ ponografi ni eŋa kɛ lɛ fee ekome koni eye ebua lɛ ni ekpa kwɛmɔ lɛ, bei pii lɛ eyeɔ omanye, ni agbɛnɛ hu, yoo lɛ nyɛɔ eheɔ ewu lɛ eyeɔ ekoŋŋ.

Shi kɛ́ owu lɛ baaye omanye lɛ, ebaadamɔ lɛ enɔ titri. Ja lɛ diɛŋtsɛ etswa efai shi waa akɛ eetao ekpa, ni agbɛnɛ hu, eefee bɔ fɛɛ bɔ ni ebaanyɛ koni ekpa. Ani ekɛ hiɛdɔɔ sɔleɔ ehãa Yehowa ni ehã lɛ nyɛmɔ lɛ ni enyɛ ekpa? Ni agbɛnɛ hu, ani eyana  asafoŋ onukpai lɛ koni amɛye amɛbua lɛ? (2 Kor. 4:7; Yak. 5:14, 15) Ani eefee nibii ni baaye abua lɛ ni ekɛ shihilɛ ko ni baahã ekwɛ ponografi akakpe? Akɛ nɔkwɛmɔnɔ lɛ, ani ekpɛ eyiŋ yɛ bɔ ni ekɛ kɔmpiuta, kɛ fon kɛ amɛhenɔi lɛ baatsu nii ahã lɛ he? Loo, ani ekpɛ eyiŋ yɛ nɔ ni ebaafee kɛ́ ekɛ shihilɛi komɛi ni baanyɛ ahã ekwɛ ponografi lɛ kpe lɛ ahe? (Abɛi 27:12) Ani eesumɔ ni oye obua lɛ, ni ekɛ nɔ ko nɔ ko eteee bo? Kɛ́ nakai lɛ, obaanyɛ oye obua lɛ.

Shi te obaafee lɛ ohã tɛŋŋ? Akɛ nɔkwɛmɔnɔ lɛ, nyɛmi yoo ko ni atsɛɔ lɛ Felicia lɛ kɛ shihilɛ nɛɛ eko kpe. Atsɛɔ nuu ni ekɛhi shi lɛ, Ethan. Ethan bɔi ponografi kwɛmɔ kɛjɛ egbekɛbiiashi tɔ̃ɔ, ni no hewɔ lɛ ekwɛmɔ eka ehe. Shi nɔ ni Felicia feɔ ji, etoɔ etsui shi eboɔ ewu lɛ toi be fɛɛ be ni ewu lɛ miitao ekɛ lɛ awie. Enɛ hewɔ lɛ, be fɛɛ be ni nuu lɛ baanu he akɛ ekwɛ ponografi lɛ, enyɛɔ ekɛɔ lɛ ni esheee gbeyei. Ethan wie akɛ: “Minyɛɔ mikɛɔ miŋa nɔ fɛɛ nɔ ni misheee gbeyei. Akɛni esumɔɔ mi hewɔ lɛ, eyeɔ ebuaa mi ni mikafee nibii ni baahã makwɛ ponografi. Ni be fɛɛ be lɛ, ebiɔ mi bɔ ni nibii yaa lɛ. Agbɛnɛ hu, eyeɔ ebuaa mi yɛ bɔ ni mikɛ Intanɛt lɛ tsuɔ nii mihãa lɛ mli.” Enɛ etsɔɔɔ akɛ edɔɔɔ Felicia akɛ ewu Ethan kwɛɔ ponografi. Felicia wie akɛ: “Mina akɛ, dɔlɛ kɛ mlifu ni yɔɔ mimli lɛ yeee ebuaa lɛ ni enyɛ ekpa ponografi lɛ kwɛmɔ. Be ni mikɛ lɛ susu nibii ahe lɛ, lɛ hu etswa efai shi akɛ ebaaye ebua mi ni majie dɔlɛ ni yɔɔ mimli lɛ yɛ mimli, ni mahe lɛ maye ekoŋŋ.”

Kɛ́ nuu ko ni kwɛɔ ponografi lɛ kɛ eŋa nyɛɔ amɛgbaa sane yɛ nɛkɛ gbɛ nɔ lɛ, no nyɛɔ eyeɔ ebuaa nuu lɛ ni ekpaa ponografi lɛ kwɛmɔ. Agbɛnɛ hu, enyɛɔ eyeɔ ebuaa yoo lɛ ni eheɔ ewu lɛ eyeɔ ekoŋŋ. Kɛ́ nuu lɛ hãa eŋa lɛ leɔ bɔ ni enuɔ he ehãa, he ni eyaa, kɛ nibii ni efeɔ lɛ, ewaŋ kɛhãŋ yoo lɛ akɛ ebaahe lɛ eye ejaakɛ ebaana akɛ nuu lɛ kɛ nɔ ko eteee lɛ.

Kɛ́ okwɛ lɛ, ani obaanyɛ otsɔ gbɛ ni tamɔ nɛkɛ nɔ oye obua owu lɛ? Kɛ́ nakai lɛ, obaanyɛ okɛ lɛ afee ekome ni nyɛkane sane nɛɛ ni nyɛsusu he. Esa akɛ ekɛfee oti ni ma ehiɛ akɛ, ebaakpa ponografi lɛ kwɛmɔ ni efee nibii ni baahã ohe lɛ oye ekoŋŋ. Yɛ nɔ najiaŋ ni emli baafu bo yɛ naagba lɛ ni otaoɔ okɛ lɛ awie he lɛ he lɛ, esa akɛ emia ehiɛ enu bɔ ni ponografi ni ekwɛɔ lɛ hãa onuɔ he ohãa lɛ shishi. Esa akɛ okɛfee oti ni ma ohiɛ akɛ, obaaye obua lɛ ni enyɛ efee nibii ni ekpɛ eyiŋ akɛ ebaafee koni no ahã ekpa ponografi lɛ kwɛmɔ lɛ, ni agbɛnɛ hu, ofee nibii ni baahã ena akɛ ootao ohe lɛ oye ekoŋŋ. Nɔ kroko ni nyɛbaanyɛ nyɛfee ji, ni nyɛbaafee ekome kɛtao nii amli koni nyɛle nibii ni hãa mɛi kwɛɔ ponografi kɛ nibii ni kɛ́ mɔ ko fee lɛ ebaahã eye nɔ. d

Kɛ́ onuɔ he akɛ kɛ́ okɛ lɛ bɔi sane nɛɛ he susumɔ lɛ ebaatsɔ béi lɛ, obaanyɛ ohã asafoŋ onukpa  ko afata nyɛhe be fɛɛ be ni nyɛbaasusu he. Esa akɛ asafoŋ onukpa nɛɛ afee mɔ ko ni egbaŋ nyɛteŋ mɔ ko mɔ ko naa akɛ ebaafata he ni nyɛsusu sane ni tamɔ nɛkɛ lɛ he. Obaanyɛ ohã efata nyɛhe kɛyashi be ko, dani agbɛnɛ lɛ, nyɛ sɔŋŋ nyɛgba he sane. Hã ehi ojwɛŋmɔ mli akɛ, kɛ́ owu lɛ kpa ponografi kwɛmɔ po lɛ, ekolɛ ebaahe be dani obaanyɛ ohe lɛ oye ekoŋŋ. Shi kaahã onijiaŋ je wui. Okɛ ohiɛ afɔ̃ shi koni ona nibii bibiibibii ni tsɔɔ akɛ nyɛgbãla lɛ miisɔ ekoŋŋ. Nyɛhea nyɛyea akɛ, kɛ́ nyɛ fɛɛ nyɛná tsui lɛ, fiofio lɛ, nibii baahi ekoŋŋ yɛ nyɛgbalashihilɛ lɛ mli.​—Jaj. 7:8; 1 Kor. 13:4.

Kɛ́ owu lɛ kpa ponografi kwɛmɔ, shi eyɛ mli aahu lɛ, esaa eyakwɛ ekoŋŋ lɛ, ani no tsɔɔ akɛ etsakeko etsui loo enyɛŋ etsake kɔkɔɔkɔ? Dabi, jeee doo. Kɛ́ ponografi lɛ kwɛmɔ eka ehe lɛ, ekolɛ ehe baahia ni emia ehiɛ ewu eshi su nɛɛ ewala gbii fɛɛ. Yɛ mɛi ni tamɔ nakai lɛ agbɛfaŋ lɛ, kɛ́ amɛkpa ponografi kwɛmɔ afii pii po lɛ, bei komɛi lɛ, amɛyakwɛɔ ekoŋŋ. Bɔ ni afee ni ekaya he dɔŋŋ lɛ, esa akɛ emia ehiɛ efee nibii ni hãŋ eyakwɛ ponografi. Akɛ nɔkwɛmɔnɔ lɛ, kɛ́ bianɛ lɛ enuɔ he akɛ eye nɔ kunim kwraa po lɛ, ekolɛ ebaabi ni eya nɔ efee nibii ni hã enyɛ eye nɔ lɛ. (Abɛi 28:14; Mat. 5:29; 1 Kor. 10:12) Agbɛnɛ hu, esa akɛ ‘etsake ejwɛŋmɔ’ ni ‘enyɛ efɔŋ.’ Ni tsɔɔ akɛ, enyɛ ponografi kɛ nifeemɔi krokomɛi ni he tseee, tamɔ mɔ he ni ekɛshwɛɔ kɛyashiɔ ehe baa lɛ. (Efe. 4:23; Lala 97:10; Rom. 12:9) Kɛ́ eemia ehiɛ ni efee nibii nɛɛ, no lɛ, fiofio lɛ, ebaanyɛ ekpa kwraa. e

Ni kɛ́ owu lɛ efeee nɔ ko kwraa ni tsɔɔ akɛ eesumɔ ni ekpa ponografi lɛ kwɛmɔ hu? Ekolɛ enɛ hewɔ lɛ, be fɛɛ be lɛ obaahao, omli baafu, ni ebaadɔ bo waa akɛ eefee bo nakai. Okɛ osane lɛ awo Yehowa dɛŋ, ni no baaye abua bo ni okahao fe nine. (1 Pet. 5:7) Daa gbi lɛ, kasemɔ Biblia lɛ ni ojwɛŋ nɔ, ni osɔle, ni no baahã obɛŋkɛ Yehowa kpaakpa. Be ni ofeɔ enɛ lɛ, ná nɔmimaa akɛ lɛ hu ebaatsi ebɛŋkɛ bo. Yesaia 57:15 lɛ kɛɔ akɛ, Yehowa kɛ “mɛi ni tsui ekumɔ ni amɛbaa amɛhe shi” lɛ hiɔ shi koni etsĩɛ amɛmumɔ hiɛ, loo ehã amɛná miishɛɛ ekoŋŋ. Miamɔ ohiɛ waa ni ojá Yehowa jogbaŋŋ. Hã asafoŋ onukpai lɛ aye amɛbua bo, ni oná hiɛnɔkamɔ akɛ wɔsɛɛ ko lɛ, ekolɛ owu lɛ baatsake.​—Rom. 2:4; 2 Pet. 3:9.