NIKASEMƆ 31
LALA 12 Yehowa Ji Nyɔŋmɔ Ofe
Nɔ Ni Yehowa Efee Koni Enyɛ Ehere Wɔ Kɛje Esha Kɛ Gbele Mli
“Nyɔŋmɔ sumɔɔ je lɛ aahu akɛ ekɛ e-Bi koome lɛ hã.” —YOH. 3:16.
NƆ NI WƆBAAKASE
Wɔbaana nɔ ni Yehowa efee kɛye ebua wɔ koni wɔwu wɔshi esha ni wɔfee nɔ ni sa ehiɛ, kɛ gbɛjianɔ ni eto koni wɔye emuu ni wɔhi shi kɛya naanɔ.
1-2. (a) Mɛni ji esha? (Kwɛmɔ “Wiemɔ Ni Atsɔɔ Mli” lɛ hu.) Ni mɛni hewɔ wɔnyɛŋ wɔwu wɔshi esha yɛ wɔ diɛŋtsɛ wɔhewalɛ naa? (b) Mɛni he wɔbaasusu yɛ nikasemɔ nɛɛ kɛ nikasemɔi krokomɛi ni yɔɔ Buu-Mɔɔ nɛɛ mli lɛ amli? (Kwɛmɔ sane ni ji, “Mɔ Ni Kaneɔ Lɛ Akadi” ni yɔɔ Buu-Mɔɔ nɛɛ mli lɛ hu.)
ANI obaasumɔ ni ole bɔ ni suɔmɔ ni Yehowa yɔɔ kɛhã bo lɛ mli wa hã? Nɔ kome ni baaye abua bo ni ona ji, ni obaakase nɔ ni Yehowa efee koni ekɛhere bo kɛje esha kɛ gbele mli lɛ he nii. Esha a he wa waa, ni kɛ́ ayeee abuaaa wɔ lɛ, wɔnyɛŋ wɔye enɔ kunim kɔkɔɔkɔ. Wɔ fɛɛ lɛ, eshafeelɔi ji wɔ; wɔfeɔ esha daa gbi. Ni akɛni eshafeelɔi ji wɔ hewɔ lɛ, wɔgboiɔ. (Rom. 5:12) Shi miishɛɛ sane ko yɛ. No ji, Yehowa baanyɛ eye ebua wɔ ni wɔye esha nɔ kunim, ni ewo shi akɛ ebaafee nakai ehã wɔ.
2 Yehowa kɛ aaafee afii 6,000 eye ebua adesai koni amɛkɛ lɛ abɔ naanyo yɛ emuu ni amɛyeee lɛ fɛɛ sɛɛ. Mɛni hewɔ? Ejaakɛ esumɔɔ wɔ. Yehowa sumɔɔ adesai kɛjɛ be ni ebɔ amɛ lɛ beebe. No hewɔ lɛ, efee nɔ fɛɛ nɔ ni ebaanyɛ kɛye ebua amɛ koni amɛwu amɛshi esha. Nyɔŋmɔ le akɛ, esha hewɔ adesai gboiɔ, shi esumɔɔɔ ni wɔgboiɔ. Eesumɔ ni wɔhi shi kɛya naanɔ. (Rom. 6:23) Eesumɔ ni wɔ fɛɛ, ni bo, mɔ ni okaneɔ sane nɛɛ hu fata he lɛ, ahi shi kɛya naanɔ. Yɛ nikasemɔ nɛɛ mli lɛ, wɔbaahã sanebimɔi etɛ ahetoo. Nomɛi ji: (1) Mɛɛ hiɛnɔkamɔ Yehowa hã adesai ná be ni amɛbatsɔmɔ eshafeelɔi lɛ? (2) Yɛ blema lɛ, mɛni ebi ni adesai afee koni Yehowa aná amɛhe miishɛɛ yɛ emuu ni amɛyeee lɛ fɛɛ sɛɛ? (3) Mɛni Yesu fee kɛhere adesai kɛje esha kɛ gbele mli?
MƐƐ HIƐNƆKAMƆ YEHOWA HÃ ADESAI NÁ BE NI AMƐBATSƆMƆ ESHAFEELƆI LƐ?
3. Te fee tɛŋŋ ni Adam kɛ Hawa fee esha?
3 Be ni Yehowa bɔ Adam kɛ Hawa lɛ, ehã amɛ nibii ni baahã amɛná miishɛɛ. Ehã amɛ he ko fɛfɛo ni amɛhi, efee amɛ ekome akɛ wu kɛ ŋa, ni ehã amɛ nitsumɔ ni hãa mɔ tsui nyɔɔ emli. Ekɛɛ amɛ akɛ, amɛfɔ ni amɛyi shikpɔŋ lɛ nɔ obɔ, ni amɛsaa shikpɔŋ muu lɛ fɛɛ nɔ fɛfɛo ni etsɔ tamɔ Eden abɔɔ lɛ. Kɛkɛ ni ehã amɛ kitã kome ko pɛ kɛkɛ, ni ebɔ amɛ kɔkɔ akɛ, kɛ́ amɛku nakai kitã lɛ mli lɛ, amɛbaagboi. Shi wɔle nɔ ni ba. Ŋwɛibɔfo fɔŋ ko ni sumɔɔɔ Nyɔŋmɔ kɛ adesai asane lɛ yaka Adam kɛ Hawa, ni amɛgbee kaa lɛ mli; amɛfee nɔ ni Nyɔŋmɔ kɛɛ amɛkafee lɛ. Amɛtsɔɔ akɛ amɛheee Yehowa, amɛ-Tsɛ ni sumɔɔ amɛ waa lɛ, amɛyeee. Amɛfee esha, ni no hewɔ lɛ, nɔ ni Yehowa kɛɛ ebaaba amɛnɔ lɛ ba amɛnɔ. Kɛjɛ nakai gbi lɛ nɔ kɛyaa lɛ, amɛna nɔ waa; amɛgbɔlɔ, ni naagbee kwraa lɛ, amɛgboi.—1 Mo. 1:28, 29; 2:8, 9, 16-18; 3:1-6, 17-19, 24; 5:5.
4. Mɛni hewɔ Yehowa nyɛɔ esha? (Romabii 8:20, 21)
4 Yehowa hã aŋma mɔbɔ sane nɛɛ yɛ Biblia lɛ mli koni no aye abua wɔ ni wɔna nɔ hewɔ ni enyɛɔ esha waa nakai lɛ. Esha fiteɔ wɔ kɛ wɔ-Tsɛ Yehowa teŋ, ni ekɛ mɔ yaa gbele mli. (Yes. 59:2) Enɛ hewɔ ni Satan, mɔ ni yatsɛ naagbai nɛɛ fɛɛ kɛba lɛ, sumɔɔ esha ni daa nɛɛ eeka mɛi ni amɛfee esha lɛ. Be ni Adam kɛ Hawa fee esha lɛ, ekolɛ Satan yasusu akɛ eye kunim, ni tsɔɔ akɛ, ehã yiŋtoo hewɔ ni Yehowa bɔ adesai kɛ shikpɔŋ lɛ efee efolo. Shi eji ele bɔ ni Yehowa sumɔɔ adesai waa kulɛ, ebaana akɛ egba ehe naa efolo, ejaakɛ Yehowa tsakeee yiŋtoo hewɔ ni ebɔ adesai lɛ. Yehowa sumɔɔ adesai waa, no hewɔ lɛ efee nɔ ko amrɔ nɔŋŋ koni amɛná hiɛnɔkamɔ. (Kanemɔ Romabii 8:20, 21.) Yehowa le akɛ, adesai komɛi baasumɔ lɛ, ni amɛbaabi edɛŋ yelikɛbuamɔ koni amɛnyɛ amɛwu amɛshi esha. Ebaahã mɛi nɛɛ abatsɔmɔ enanemɛi, ni ebaahã amɛye amɛhe kɛjɛ esha kɛ gbele dɛŋ. Shi te Yehowa baafee tɛŋŋ efee nakai?
5. Mɛɛ be ji klɛŋklɛŋ be ni Yehowa wie nɔ ko ni hã adesai na akɛ amɛyɛ hiɛnɔkamɔ? Ni mɛni ewie? (1 Mose 3:15)
5 Kanemɔ 1 Mose 3:15. Klɛŋklɛŋ be ni Yehowa wie nɔ ko ni hã adesai na akɛ amɛyɛ hiɛnɔkamɔ ji be ni ebuɔ Satan fɔ lɛ. Egba akɛ, ebaatsɔ ‘seshi’ ko nɔ ehere adesai ayiwala. Seshi nɛɛ baakpãtã Satan hiɛ, ni ebaatsu naagbai fɛɛ ni ejɛ Adam kɛ Hawa atuatsemɔ lɛ mli kɛba lɛ ahe nii. (1 Yoh. 3:8) Shi klɛŋklɛŋ lɛ, Satan baatswa seshi lɛ nɔ, ni tsɔɔ akɛ, ebaahã agbe lɛ. Enɛ baakumɔ Yehowa tsui waa. Shi Yehowa etsĩŋ naa, ejaakɛ ele akɛ ja eba lɛ nakai dani ebaanyɛ ekpɔ̃ adesai kɛje esha kɛ gbele mli.
YƐ BLEMA LƐ, MƐNI EBI NI ADESAI AFEE KONI YEHOWA ANÁ AMƐHE MIISHƐƐ YƐ EMUU NI AMƐYEEE LƐ FƐƐ SƐƐ?
6. Mɛni hii anɔkwafoi tamɔ Habel kɛ Noa fee koni amɛnyɛ amɛkɛ Yehowa abɔ naanyo?
6 Yehowa ye ebua adesai koni fiofio lɛ, amɛna nɔ ni esa akɛ amɛfee koni wekukpaa kpakpa abakã lɛ kɛ amɛ teŋ yɛ emuu ni amɛyeee lɛ fɛɛ sɛɛ. Habel, ni ji Adam kɛ Hawa binuu ni ji enyɔ nɔ lɛ, ji klɛŋklɛŋ adesa ni he Yehowa nɔ eye yɛ atua ni atse yɛ Eden abɔɔ lɛ mli lɛ sɛɛ. Habel sumɔɔ Yehowa waa, ni eesumɔ ni efee Yehowa suɔmɔnaa nii ni ekɛ lɛ abɔ naanyo. Enɛ hewɔ lɛ, ekɛ nɔ ko shã afɔle ehã Yehowa. No mli lɛ, tookwɛlɔ ji lɛ, no hewɔ lɛ, emɔmɔ egwantɛŋbii lɛ eko ni egbe amɛ ni ekɛ amɛ hã Yehowa akɛ afɔle. Ani Yehowa ná efɔle lɛ he miishɛɛ? Hɛɛ, “Yehowa ná Habel kɛ efɔle lɛ he miishɛɛ.” (1 Mo. 4:4) Yehowa ná mɛi krokomɛi hu ni sumɔɔ lɛ ni amɛheɔ enɔ amɛyeɔ lɛ afɔlei lɛ ahe miishɛɛ. Mɛi nɛɛ ateŋ mɔ kome ji, Noa. (1 Mo. 8:20, 21) Enɛ hãa wɔnaa akɛ, nɔ ko yɛ ni adesai baanyɛ afee koni Yehowa aná amɛhe miishɛɛ ni ekɛ amɛ abɔ naanyo yɛ emuu ni amɛyeee lɛ fɛɛ sɛɛ. b
7. Mɛni kpɛlɛmɔ ni Abraham kpɛlɛ nɔ akɛ ekɛ ebi lɛ baashã afɔle lɛ tsɔɔ wɔ yɛ Yehowa he?
7 Abraham yɛ hemɔkɛyeli ni mli wa waa yɛ Yehowa mli. Gbi ko lɛ, Yehowa kɛɛ lɛ ni efee nɔ ko ni wa waa. Ekɛɛ lɛ akɛ ekɛ ebinuu Isak ashã afɔle ehã lɛ. Ŋwanejee ko bɛ he akɛ, enɛ gba Abraham naa waa diɛŋtsɛ. Fɛɛ sɛɛ lɛ, ekpɛlɛ nɔ akɛ ebaafee nɔ ni Yehowa ekɛɛ lɛ lɛ. Shi be ni ewó kakla lɛ nɔ ni eyaagbe ebinuu lɛ, Yehowa kɛɛ lɛ akɛ ekagbe lɛ. Abraham sane lɛ yeɔ ebuaa mɛi fɛɛ ni yɔɔ hemɔkɛyeli lɛ ni amɛnuɔ nɔ ni Yehowa fee sɛɛ mli lɛ shishi jogbaŋŋ. Yehowa jɛ esuɔmɔ mli ehã ebi ni esumɔɔ lɛ lɛ kɛ ewala shã afɔle ehã adesai. Enɛ hãa wɔnaa akɛ, Yehowa sumɔɔ adesai asane waa diɛŋtsɛ.—1 Mo. 22:1-18.
8. Mɛni afɔlei pii ni Mla lɛ bi ni Israelbii lɛ ashã lɛ hã ana? (3 Mose 4:27-29; 17:11)
8 Be ni Yehowa kɛ Mla lɛ hã Israelbii lɛ, ehã amɛle akɛ kɛ́ amɛfee esha lɛ, esa akɛ amɛkɛ kooloi abashã afɔle amɛhã lɛ koni ekɛ amɛhe eshai lɛ ake amɛ. (Kanemɔ 3 Mose 4:27-29; 17:11.) Yehowa tsɔ afɔlei nɛɛ ni ehã amɛshã lɛ anɔ ehã ana akɛ, ekɛ afɔle kome ni hi kwraa fe nomɛi baahã ni ekɛhere adesai kɛje esha mli shi kome nyɔŋlo. Nyɔŋmɔ kɛ emumɔ lɛ tsirɛ egbalɔi lɛ ni amɛwie akɛ, seshi ni awo ehe shi lɛ, ni ji Nyɔŋmɔ Bi ni eshwɛɛɛ ehe kwraa lɛ, baapiŋ ni abaagbe lɛ. Abaagbe lɛ tamɔ agbeɔ gwantɛŋi ni akɛshãa afɔle lɛ. (Yes. 53:1-12) Bo lɛ, susumɔ enɛ he okwɛ: Yehowa to gbɛjianɔ koni e-Bi ni esumɔɔ lɛ lɛ kɛ ewala abashã afɔle koni ekɛhere adesai, ni bo hu ofata he lɛ, kɛje esha kɛ gbele mli!
MƐNI YESU FEE KƐHERE ADESAI KƐJE ESHA MLI?
9. Mɛni Yohane Baptisilɔ lɛ wie yɛ Yesu he? (Hebribii 9:22; 10:1-4, 12)
9 Yɛ afi 29 Ŋ.B. lɛ, Yohane Baptisilɔ lɛ na Yesu ni jɛ Nazaret lɛ, ni ewie akɛ: “Naa, Nyɔŋmɔ Gwantɛŋbi ni wóɔ je lɛ he esha lɛ kɛyaa lɛ!” (Yoh. 1:29) Sane nɛɛ ni ewie lɛ hã ana akɛ, Yesu ji seshi ni Nyɔŋmɔ ejɛ jeeŋmɔ ewo shi akɛ ebaaba lɛ, ni akɛ, Yesu kɛ ewala baashã afɔle ehã adesai. Agbɛnɛ be eshɛ ni abaaye abua adesai koni amɛye esha nɔ kunim kwraa.—Kanemɔ Hebribii 9:22; 10:1-4, 12.
10. Mɛni Yesu fee kɛtsɔɔ akɛ, ‘eba eshafeelɔi atsɛmɔ’?
10 Yesu kɛ ejwɛŋmɔ ma mɛi ni ehao waa yɛ amɛhe eshai lɛ ahewɔ lɛ anɔ titri, ni eye ebua amɛ koni amɛbatsɔmɔ esɛɛnyiɛlɔi. Yesu le akɛ, esha hewɔ adesai kɛ naagbai fɛɛ ni amɛkɛkpeɔ lɛ kpeɔ. No hewɔ lɛ, ekɛ ejwɛŋmɔ ma mɛi ni ale akɛ eshafeelɔi ji amɛ lɛ anɔ ni eye ebua amɛ. Ewie akɛ: “Mɛi ni yɔɔ hewalɛ lɛ, datrɛfonyo he ehiaaa amɛ, shi mɛi ni bɛ hewalɛ lɛ moŋ ehe hiaa.” Kɛkɛ ni ekɛfata he akɛ: “Mibaaa jalɔi atsɛmɔ, shi moŋ eshafeelɔi.” (Mat. 9:12, 13) Ni nakai pɛpɛɛpɛ Yesu fee. Akɛ nɔkwɛmɔnɔ lɛ, be ni yoo ko ni ale lɛ akɛ eji eshafeelɔ lɛ kɛ eyaafonui fɔ enaji ahe lɛ, enyafiii lɛ, shi moŋ, ekɛ ehe eshai lɛ ke lɛ. (Luka 7:37-50) Agbɛnɛ hu, etsɔɔ Samariayoo lɛ nibii komɛi ni he hiaa waa, tsɛ lɛ ele akɛ, nuu ni yoo lɛ kɛ lɛ yɔɔ lɛ jeee ewu. (Yoh. 4:7, 17-19, 25, 26) Nyɔŋmɔ hã Yesu hewalɛ ni ekɛye gbele, ni ji naagba ni naa wa fe fɛɛ ni jɛɔ esha mli kɛbaa lɛ, nɔ kunim. Yɛ mɛɛ gbɛ nɔ? Ehã lɛ hewalɛ ni ekɛtee hii, yei, gbekɛbii, kɛ onukpai ni egboi ashi.—Mat. 11:5.
11. Mɛni hewɔ mɛi ni feɔ nibii gbohii po nyɛ amɛbɛŋkɛ Yesu?
11 Yesu musuŋ tsɔ lɛ yɛ mɛi ni kã esha mli po lɛ ahe, ni efeee amɛ hãihãi. Enɛ hewɔ lɛ, amɛnyɛ amɛbɛŋkɛ lɛ, ejaakɛ amɛna akɛ enuɔ amɛ shishi. (Luka 15:1, 2) Yesu na hu akɛ, amɛyɛ hemɔkɛyeli, ni no hewɔ lɛ, ejie amɛ yi ni ekɛ amɛ ye jogbaŋŋ. (Luka 19:1-10) Yesu na mɛi mɔbɔ, tamɔ bɔ ni e-Tsɛ lɛ naa mɔbɔ lɛ pɛpɛɛpɛ. (Yoh. 14:9) Bɔ ni ekɛ mɛi wie ehã kɛ bɔ ni ekɛ amɛ ye ehã lɛ hãa wɔnaa akɛ, e-Tsɛ Yehowa naa mɔbɔ waa, esumɔɔ adesai yɛ emuu ni amɛyeee lɛ fɛɛ sɛɛ, ni eesumɔ ni eye ebua amɛ koni amɛye esha nɔ kunim. Yesu ye ebua eshafeelɔi koni amɛná he miishɛɛ akɛ amɛbaatsake amɛgbɛi ni amɛbanyiɛ esɛɛ.—Luka 5:27, 28.
12. Mɛni Yesu hã esɛɛnyiɛlɔi lɛ le yɛ egbele lɛ he?
12 Yesu le akɛ ekɛ ewala baashã afɔle ehã adesai. Ekɛɛ ekaselɔi lɛ shii abɔ akɛ, abaatsɔɔ esɛɛgbɛ, ni abaagbe lɛ yɛ tso jaŋŋ nɔ. (Mat. 17:22; 20:18, 19) Yesu le hu akɛ, efɔleshaa lɛ nɔ abaatsɔ ajie je lɛ he eshai lɛ kɛya, tamɔ bɔ ni Yohane wie ni gbalɔi lɛ hu gba amɛfɔ̃ shi lɛ. Yesu wie hu akɛ, kɛ́ ekɛ ewala shã afɔle egbe naa lɛ, ‘ebaagbala mɛi srɔtoi fɛɛ kɛba eŋɔɔ.’ (Yoh. 12:32) Mɔ fɛɛ mɔ ni baahe Yesu nɔ eye, ni eye ekitãi lɛ anɔ, ni enyiɛ enanemaahei lɛ asɛɛ lɛ, Yehowa baaná ehe miishɛɛ, ni naagbee kwraa lɛ, ‘ebaaye ehe kɛjɛ esha dɛŋ.’ (Rom. 6:14, 18, 22; Yoh. 8:32) No hewɔ lɛ, eyɛ mli akɛ gbɛ ni abaatsɔ nɔ agbe Yesu lɛ yɛ musuŋshãa moŋ, shi efee ekãa ni ejɛ esuɔmɔ mli ekɛ ewala fɔ̃ shi.—Yoh. 10:17, 18.
13. Mɛni mli Yesu tsɔ dani egbo? Ni mɛni hewɔ Yehowa ŋmɛ enɛ gbɛ? (Kwɛmɔ mfoniri lɛ hu.)
13 Yesu nanemɛi ni bɛŋkɛ lɛ kpaakpa lɛ ateŋ mɔ kome tsɔɔ esɛɛgbɛ, kɛkɛ ni Yesu henyɛlɔi lɛ mɔ lɛ, amɛjɛ lɛ, amɛkɛ sane fɔ̃ enɔ, amɛbu lɛ fɔ, ni amɛpiŋ lɛ. No sɛɛ lɛ, akɛ lɛ wo asraafoi adɛŋ ni amɛkala lɛ amɛkpɛtɛ tso jaŋŋ nɔ koni egbo. Anɔkwa, Yesu piŋ waa diɛŋtsɛ, shi emia ehiɛ efi shi. Ni kɛ̃lɛ, mɔ ko yɛ ni piŋ waa fe lɛ po. Lɛ ji, Yehowa Nyɔŋmɔ. Yehowa sumɔɔ e-Bi lɛ waa, ni wɔle hu akɛ, eyɛ hewalɛ ni kulɛ ebaanyɛ ehã aŋmɛɛ Yesu he ni akagbe lɛ, shi efeee nakai. Mɛni hewɔ? Ejaakɛ esumɔɔ wɔ. Yesu wie akɛ: “Nyɔŋmɔ sumɔɔ je lɛ aahu akɛ ekɛ e-Bi koome lɛ hã, koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.”—Yoh. 3:16.
Yehowa tsui kumɔ waa be ni agbeɔ e-Bi lɛ, shi emia ehiɛ edamɔ naa koni enyɛ ehere wɔ kɛje esha kɛ gbele mli (Kwɛmɔ kuku 13)
14. Mɛni Yesu wala ni ekɛbashã afɔle lɛ hãa onaa yɛ Yehowa he?
14 Yesu wala ni ekɛshã afɔle lɛ ji nɔ ni fe fɛɛ ni tsɔɔ akɛ Yehowa sumɔɔ adesai asane waa diɛŋtsɛ. Esumɔɔ wɔteŋ mɔ fɛɛ mɔ, ni bo hu ofata he lɛ, sane waa diɛŋtsɛ. Yehowa kɛ e-Bi ni esumɔɔ waa lɛ hã yɛ ohewɔ. Etsui kumɔ waa be ni agbeɔ e-Bi lɛ, shi emia ehiɛ edamɔ naa koni enyɛ ehere bo kɛje esha kɛ gbele mli. (1 Yoh. 4:9, 10) Enɛ hãa wɔnaa akɛ, eesumɔ ni eye ebua wɔteŋ mɔ fɛɛ mɔ koni ewu eshi esha ni eye nɔ kunim!
15. Kɛ́ wɔmiitao wɔná Yesu kpɔmɔ afɔleshaa lɛ he sɛɛ lɛ, mɛni esa akɛ wɔfee?
15 Yesu kpɔmɔ afɔleshaa lɛ ji nikeenii ni jɛ Nyɔŋmɔ ŋɔɔ, ni nikeenii nɛɛ hewɔ lɛ, Nyɔŋmɔ baanyɛ ekɛ wɔhe eshai ake wɔ. Shi kɛ́ wɔmiitao ni Nyɔŋmɔ kɛ wɔhe eshai ake wɔ lɛ, nɔ ko yɛ ni esa akɛ wɔfee. Ani ole nɔ ni ji? No ji nɔ ni Yohane Baptisilɔ lɛ kɛ Yesu Kristo fɛɛ wie he lɛ. Amɛwie akɛ: “Nyɛtsakea nyɛtsui, ejaakɛ ŋwɛi Maŋtsɛyeli lɛ eshɛ shi etã.” (Mat. 3:1, 2; 4:17) No hewɔ lɛ, kɛ́ wɔmiitao Yehowa kɛ wɔhe eshai ake wɔ koni wekukpaa kpakpa ahi wɔ kɛ lɛ teŋ lɛ, esa akɛ wɔtsake wɔtsui. Shi kɛ́ akɛɛ wɔtsake wɔtsui lɛ, te atsɔɔ tɛŋŋ? Ni mɛɛ gbɛ nɔ no yeɔ ebuaa wɔ koni wɔsa Yehowa hiɛ yɛ emuu ni wɔyeee lɛ fɛɛ sɛɛ? Abaahã sanebimɔi nɛɛ ahetoo yɛ nikasemɔ ni nyiɛ sɛɛ lɛ mli.
LALA 18 Wɔhiɛ Sɔɔ Kpɔmɔnɔ Lɛ Waa
a WIEMƆ NI ATSƆƆ MLI: Yɛ Biblia lɛ mli lɛ, kɛ́ akɛɛ mɔ ko efee “esha” lɛ, ebaanyɛ etsɔɔ akɛ mɔ lɛ efeee nɔ ko ni Yehowa kɛɛ afee loo efee nɔ ko ni Yehowa kɛɛ akafee. Shi wiemɔ ni ji “esha” lɛ baanyɛ akɔ kpa loo “esha” ni wɔná kɛjɛ Adam ŋɔɔ lɛ hu he. Esha ni wɔná kɛjɛ Adam ŋɔɔ lɛ hewɔ wɔ fɛɛ wɔgboiɔ lɛ.
