1. Kɛ́ akɛɛ mɔ ko etsake etsui lɛ, te atsɔɔ tɛŋŋ?

 KƐ́ WƆTƆ̃ lɛ, ehe miihia ni wɔtsake wɔtsui. Yɛ Biblia lɛ mli lɛ, kɛ́ akɛɛ mɔ ko etsake etsui lɛ, etsɔɔ akɛ etsake ejwɛŋmɔ yɛ gbɛ gbonyo ko ni ekɔ lɛ he, etsi ehe kɛje nakai gbɛ lɛ he, ni etswa efai shi akɛ ekɔŋ nakai gbɛ lɛ dɔŋŋ.—Kwɛmɔ Biblia Mli Wiemɔi Titrii Amligbalamɔ, “Tsuitsakemɔ.”

2. Mɛni hewɔ ehe miihia ni wɔ fɛɛ wɔkase tsuitsakemɔ he nii lɛ? (Nehemia 8:​9-11)

² Ehe miihia ni adesai fɛɛ akase tsuitsakemɔ he nii. Mɛni hewɔ? Ejaakɛ wɔ fɛɛ wɔtɔ̃ɔ daa gbi. Adam kɛ Hawa bii ji wɔ, no hewɔ lɛ, wɔ fɛɛ wɔná esha kɛ gbele akɛ gboshinii. (Rom. 3:23; 5:12) Mɔ ko mɔ ko nyɛŋ akɛɛ akɛ, lɛ lɛ, etɔ̃ɔɔ, ni no hewɔ lɛ tsuitsakemɔ he ehiaaa lɛ. Bɔfo Paulo kɛ mɛi krokomɛi ni hemɔkɛyeli mli wa lɛ po náaa lɛ mlɛo akɛ amɛbaafee nɔ ni ja be fɛɛ be. (Rom. 7:​21-24) Anɔkwa, eshafeelɔi ni wɔji lɛ hewɔ lɛ, wɔnii yɛ mɔbɔ. Shi ani enɛ hewɔ lɛ, esa akɛ wɔwerɛ aho wɔhe daa gbi? Dabi, Yehowa naa mɔbɔ, ni eesumɔ ni wɔná miishɛɛ. Nɔ ko ni ba yɛ Nehemia gbii lɛ amli lɛ hãa wɔnaa enɛ. (Kanemɔ Nehemia 8:​9-11.) Yudafoi lɛ awerɛ ho amɛhe waa yɛ eshai ni amɛfee be ko ni eho lɛ ahewɔ. Shi Yehowa hã amɛle akɛ, eesumɔ ni amɛkɛ miishɛɛ asɔmɔ lɛ. Yehowa le akɛ tsuitsakemɔ hãa mɔ náa miishɛɛ, ni no hewɔ etsɔɔ wɔ tsuitsakemɔ he nii lɛ. Kɛ́ wɔtsake wɔtsui lɛ, Yehowa, wɔ-Tsɛ ni naa mɔbɔ lɛ, kɛ wɔhe eshai lɛ baake wɔ.

3. Mɛni he wɔbaasusu yɛ nikasemɔ nɛɛ mli?

³ Yɛ nikasemɔ nɛɛ mli lɛ, wɔbaakase nibii etɛ yɛ tsuitsakemɔ he. Klɛŋklɛŋ lɛ, wɔbaakwɛ nɔ ni Yehowa tsɔɔ Israelbii lɛ yɛ tsuitsakemɔ he. No sɛɛ lɛ, wɔbaakwɛ nɔ ni Yehowa fee kɛye  ebua mɛi yɛ blema koni amɛtsake amɛtsui. Naagbee lɛ, wɔbaakwɛ nɔ ni Yesu tsɔɔ esɛɛnyiɛlɔi lɛ yɛ tsuitsakemɔ he.

NƆ NI YEHOWA TSƆƆ ISRAELBII LƐ YƐ TSUITSAKEMƆ HE

4. Mɛni Yehowa tsɔɔ Israelbii lɛ yɛ tsuitsakemɔ he?

⁴ Be ni Yehowa hala Israelbii lɛ akɛ emaŋ lɛ, ekɛ amɛ fee kpaŋmɔ. Ehã amɛle akɛ, kɛ́ amɛye emlai lɛ anɔ lɛ, ebaabu amɛhe ni ebaajɔɔ amɛ, ni amɛwo lɛ shi akɛ amɛbaaye nɔ. Ekɛɛ amɛ akɛ: “Agbɛnɛ, kitã nɛɛ ni miwoɔ bo ŋmɛnɛ gbi nɛɛ, ejeee nɔ ko ni wa tsɔ kɛhã bo, ni ejeee nɔ ko ni onine nyɛŋ ashɛ nɔ hu.” (5 Mo. 30:​11, 16) Yehowa hã amɛle hu akɛ, kɛ́ amɛyeee emlai lɛ anɔ, ni amɛyajá nyɔŋmɔi krokomɛi lɛ, ebuŋ amɛhe dɔŋŋ, ni ebaatɔ amɛ. Shi kɛ́ eba lɛ nakai po lɛ, eshɛŋ amɛ efɔŋ. Amɛbaanyɛ ‘amɛku amɛsɛɛ kɛba Yehowa, amɛ-Nyɔŋmɔ lɛ, ŋɔɔ ni amɛbo egbee toi.’ (5 Mo. 30:​1-3, 17-20) Kɛ́ wɔɔwie yɛ gbɛ kroko nɔ lɛ, amɛbaanyɛ amɛtsake amɛtsui. Kɛ́ amɛfee nakai lɛ, Yehowa baaná amɛhe miishɛɛ, ni ebaajɔɔ amɛ ekoŋŋ.

5. Be ni Yehowa webii lɛ gbo enɔ toi lɛ, mɛni efee ni hãa wɔnaa akɛ eshiii amɛsane ehãaa amɛ? (2 Maŋtsɛmɛi 17:​13, 14)

⁵ Israelbii lɛ gbo Yehowa nɔ toi shii abɔ. Amɛjá amagai ni amɛfee nibii gbohii krokomɛi ni ehiii kwraa. Enɛ hewɔ lɛ, amɛná naagbai pii. Shi Yehowa shiii amɛsane ehãaa amɛ; etee nɔ eye ebua amɛ koni amɛbajá lɛ ekoŋŋ. Etsu gbalɔi kɛtee amɛŋɔɔ shii abɔ koni amɛwo amɛ hewalɛ ni amɛtsake amɛtsui ni amɛku amɛsɛɛ kɛba eŋɔɔ.—Kanemɔ 2 Maŋtsɛmɛi 17:​13, 14.

6. Mɛɛ gbɛ nɔ Yehowa tsɔ egbalɔi lɛ anɔ eye ebua ewebii lɛ koni amɛna nɔ hewɔ ni esa akɛ amɛtsake amɛtsui? (Kwɛmɔ mfoniri lɛ hu.)

⁶ Bei pii lɛ, kɛ́ Yehowa webii lɛ gbo enɔ toi lɛ, etsuɔ egbalɔi lɛ kɛyaa amɛŋɔɔ koni amɛyabɔ amɛ kɔkɔ ni amɛjaje amɛ. Akɛ nɔkwɛmɔnɔ lɛ, Nyɔŋmɔ tsɔ gbalɔ Yeremia nɔ ekɛɛ ewebii lɛ akɛ: “Bo atuatselɔ Israel, kuu osɛɛ . . . Mituŋ mihiɛ miwoŋ nyɛ, ejaakɛ anɔkwafo ji mi . . . Mimli fuŋ kɛyaŋ naanɔ. Kpɛlɛmɔ otɔmɔ lɛ nɔ kɛkɛ, ejaakɛ otse Yehowa, o-Nyɔŋmɔ lɛ, hiɛ atua.” (Yer. 3:​12, 13) Yehowa tsɔ Yoel hu  nɔ ekɛɛ ewebii lɛ akɛ: “Nyɛkua nyɛsɛɛ kɛbaa miŋɔɔ kɛ nyɛtsui fɛɛ.” (Yoel 2:​12, 13) Etsɔ Yesaia nɔ ewie akɛ: “Nyɛhãa nyɛhe atsea; nyɛjiea nyɛnifeemɔi fɔji lɛ kɛjea mihiɛ. Nyɛkpaa efɔŋfeemɔ.” (Yes. 1:​16-19) Ni etsɔ Ezekiel hu nɔ ekɛɛ amɛ akɛ: “Kɛ́ efɔŋfeelɔ gbo lɛ, ani mináa he miishɛɛ? . . . Ani jeee nɔ ni misumɔɔ moŋ ji, ni etsi ehe kɛje egbɛi lɛ anɔ ni eya nɔ ehi shi? Mináaa mɔ ko mɔ ko gbele he miishɛɛ, . . . no hewɔ lɛ, nyɛkua nyɛsɛɛ ni nyɛná wala.” (Eze. 18:​23, 32) Kɛ́ mɛi tsake amɛtsui lɛ, Yehowa náa miishɛɛ waa, ejaakɛ eesumɔ ni amɛhi shi kɛya naanɔ! Yehowa taaa shi emɛɛɛ ni efɔŋfeelɔi atsake amɛtsui dani eye ebua amɛ. Naa nɔkwɛmɔnii krokomɛi ni tsɔɔ nakai.

7. Mɛni Yehowa tsɔ gbalɔ Hosea kɛ eŋa lɛ sane lɛ nɔ ehã ewebii lɛ na?

⁷ Yehowa tsɔ gbalɔ Hosea kɛ eŋa Gomer nɔ etsɔɔ Israelbii lɛ nɔ ko ni he hiaa waa. Gomer je ewu Hosea sɛɛ ni ekɛ nuu kroko yahi shi. Shi mɛni Yehowa fee? Yehowa, mɔ ni naa adesai atsui mli lɛ, kɛɛ Hosea akɛ: “Yaa shi kome ekoŋŋ ni oyasumɔ yoo lɛ ní nuu kroko sumɔɔ lɛ ní eji gbalafitelɔ lɛ, tamɔ bɔ pɛ ni Yehowa sumɔɔ Israelbii lɛ, be mli ni amɛ lɛ amɛyanyiɛɔ nyɔŋmɔi krokomɛi asɛɛ.” (Hos. 3:1; Abɛi 16:2) Kadimɔ akɛ, no mli lɛ, Hosea ŋa lɛ efeko nɔ ko ni tsɔɔ akɛ etsake etsui. Shi Yehowa kɛɛ Hosea akɛ, ekɛ esha ni yɔɔ hiɛdɔɔ ni eŋa lɛ efee lɛ ake lɛ ni ehã eku esɛɛ eba. a Yehowa tsɔ Hosea kɛ eŋa lɛ sane lɛ nɔ ehã Israelbii lɛ na akɛ, ekpooko amɛjeŋ ehãko amɛ. Eyɛ mli akɛ eshai ni amɛfeɔ lɛ yɛ hiɛdɔɔ moŋ, shi Yehowa sumɔɔ amɛ lolo, ni eesumɔ ni eye ebua amɛ ni amɛtsake amɛtsui ni amɛkpa nibii fɔji ni amɛfeɔ lɛ. Ani sane nɛɛ tsɔɔ akɛ Yehowa, mɔ ni le adesa fɛɛ adesa tsui mli lɛ, baaye abua mɔ ko ni kã he eefee esha ni yɔɔ hiɛdɔɔ lɛ koni etsake etsui? (Abɛi 17:3) Nyɛhãa wɔkwɛa.

NƆ NI YEHOWA FEƆ KƐYEƆ EBUAA MƐI KONI AMƐTSAKE AMƐTSUI

8. Mɛni Yehowa fee kɛye ebua Kain koni etsake etsui? (1 Mose 4:​3-7) (Kwɛmɔ mfoniri lɛ hu.)

⁸ Kain, ni ji Adam kɛ Hawa kromɔbi lɛ, ná esha kɛjɛ efɔlɔi aŋɔɔ. Shi Kain miaaa ehiɛ koni eye esha nɔ kunim. Biblia lɛ kɛɛ: “Lɛ diɛŋtsɛ enitsumɔi lɛ, nitsumɔi fɔji ni.” (1 Yoh. 3:12) Eeenyɛ efee akɛ, no hewɔ Yehowa “náaa Kain kɛ efɔle lɛ he miishɛɛ” lɛ. Shi nɔ najiaŋ ni Kain baatsake egbɛi lɛ, ‘emli fu waa ni ehao.’ No hewɔ lɛ, mɛni Yehowa fee? Ekɛ Kain wie. (Kanemɔ 1 Mose 4:​3-7.) Ŋmalɛ nɛɛ hãa wɔnaa akɛ, Yehowa jɛ naajɔlɛ mli ekɛ Kain susu nii ahe ni ekɛɛ lɛ akɛ kɛ́ efee ekpakpa lɛ ebaajɔɔ lɛ. Agbɛnɛ hu, ebɔ lɛ kɔkɔ akɛ, bɔ ni emli efu lɛ, kɛ́ ekwɛɛɛ ni ahi lɛ, ebaafee nɔ ko gbonyo. Dɔlɛ sane ji, Kain booo Yehowa toi. Yehowa bɔ mɔdɛŋ akɛ ebaaye ebua lɛ koni etsake, shi ekpɛlɛɛɛ. Ani bɔ ni Kain fee enii lɛ hewɔ lɛ, Yehowa kpɛ eyiŋ akɛ eyeŋ ebuaŋ efɔŋfeelɔ ko dɔŋŋ koni etsake etsui? Dabi, efeee nakai!

9. Mɛni Yehowa fee kɛye ebua David koni etsake etsui?

⁹ Yehowa sumɔɔ Maŋtsɛ David sane waa. Yehowa wie po akɛ, ‘eji etsuinaa nuu.’ (Bɔf. 13:22) Shi David fee eshai ni yɔɔ hiɛdɔɔ; efite gbãla, ni egbe gbɔmɔ po. Yɛ Mose Mla lɛ naa lɛ, kulɛ esa akɛ agbe David. (3 Mo. 20:10; 4 Mo. 35:31) Shi Yehowa kɛ ehe wo sane lɛ mli. b Etsu gbalɔ Natan kɛtee David ŋɔɔ, eyɛ mli akɛ no mli lɛ, David efeko nɔ ko nɔ ko ni  tsɔɔ akɛ etsake etsui. Natan kɛ nɔkwɛmɔnɔ ko tsu nii kɛye ebua David koni ena akɛ eshai ni efee lɛ yɛ hiɛdɔɔ waa. Edɔ David waa akɛ efee nɔ ko ni Yehowa miihi, no hewɔ lɛ, etsake etsui. (2 Sam. 12:​1-14) David fo lala ko ni hãa wɔnaa akɛ, edɔ lɛ waa akɛ efee eshai ni tamɔ nɛkɛ eshi Yehowa. (Lala 51, yiteŋgbɛ niŋmaa) Lala nɛɛ mli wiemɔi eshɛje mɛi pii ni efee esha lɛ amii, ni eye ebua amɛ ni amɛtsake amɛtsui. Eŋɔɔ wɔnaa waa akɛ, Yehowa ye ebua etsulɔ David ni etsake etsui.

10. Kɛ́ osusu bɔ ni Yehowa toɔ etsui shi kɛ bɔ ni ekɛ eshai keɔ lɛ he lɛ, mɛni no tsirɛɔ bo ni ofee?

¹⁰ Yɛ Yehowa hiɛ lɛ, esha fɛɛ esha lɛ, esha ni, ni eehi. (Lala 5:​4, 5) Shi Yehowa sumɔɔ wɔ, ni no hewɔ lɛ, kɛ́ wɔfee esha lɛ, eyeɔ ebuaa wɔ koni wɔtsake. Ebɔɔ mɔdɛŋ ni eye ebua mɛi ni efee eshai ni yɔɔ hiɛdɔɔ lɛ po koni amɛtsake amɛtsui ni amɛsaa amɛ kɛ lɛ teŋ. Enɛ ni wɔle lɛ shɛjeɔ wɔmii waa! Kɛ́ wɔsusu bɔ ni Yehowa toɔ etsui shi kɛ bɔ ni ekɛ eshai keɔ lɛ he lɛ, no woɔ wɔ hewalɛ ni wɔmia wɔhiɛ wɔye lɛ anɔkwa, ni wɔtsake wɔtsui oya kɛ́ wɔfee esha. Agbɛnɛ, nyɛhãa wɔkwɛa nɔ ni Yesu tsɔɔ esɛɛnyiɛlɔi lɛ yɛ tsuitsakemɔ he.

NƆ NI YESU TSƆƆ ESƐƐNYIƐLƆI LƐ YƐ TSUITSAKEMƆ HE

11-12. Mɛɛ nɔkwɛmɔnɔ Yesu gba koni ekɛye ebua wɔ koni wɔna akɛ, Yehowa sumɔɔ waa ni ekɛ eshai ake? (Kwɛmɔ mfoniri lɛ.)

¹¹ Be ni eshwɛ fioo ni Mesia lɛ baapue lɛ, Yehowa hã Yohane Baptisilɔ lɛ shiɛ ehã Israelbii lɛ ni ekɛɛ amɛ akɛ amɛtsake amɛtsui. Be ni Yesu je esɔɔmɔ nitsumɔ lɛ shishi lɛ, lɛ hu etsɔɔ mɛi akɛ ehe miihia ni amɛtsake amɛtsui.—Mat. 3:​1, 2; 4:17.

¹² Be ni Yesu yɔɔ shikpɔŋ lɛ nɔ lɛ, ehã mɛi le akɛ e-Tsɛ lɛ sumɔɔ waa ni ekɛ eshai ake. Egba nɔkwɛmɔnɔ ko ni sa kadimɔ waa ni kɔɔ sane ni he hiaa nɛɛ he; no ji bi ni laaje lɛ he nɔkwɛmɔnɔ lɛ. Yɛ nɔkwɛmɔnɔ lɛ mli lɛ, oblanyo ko shi shĩa ni eyafee nibii gbohii pii. Sɛɛ mli lɛ, “ehiɛ ba ehe nɔ” ni eku esɛɛ akɛ eeya shĩa. Te epapa fee enii ehã tɛŋŋ? Yesu kɛɛ ‘be ni oblanyo lɛ nyiɛ shɔŋŋ kɛbaa lɛ, epapa hiŋmɛi gba enɔ ni emusuŋ tsɔ lɛ, ni esha foi ni eyafua lɛ atuu ni ekɛ suɔmɔ shɔ enaa.’ Oblanyo lɛ  kpaaa gbɛ kwraa akɛ epapa kɛ ehe baake lɛ, no hewɔ lɛ ekɛɛ epapa ni ekɛ lɛ afee tamɔ epaafoi lɛ ateŋ mɔ ko. Shi epapa kɛ ehe ke lɛ kwraa. Etsɛ lɛ “mibinuu,” ni ewie yɛ ehe akɛ: “Elaaje ni ana lɛ.” (Luka 15:​11-32) Ŋwanejee ko bɛ he akɛ, be ni Yesu yɔɔ ŋwɛi lɛ, ena bɔ ni e-Tsɛ lɛ musuŋ tsɔ lɛ yɛ mɛi pii ni efee esha shi amɛtsake amɛtsui lɛ ahe kɛ bɔ ni ekɛ amɛtɔmɔi ke amɛ oya lɛ. Bi ni laaje lɛ he nɔkwɛmɔnɔ ni Yesu gba lɛ taa mɔ tsuiŋ, ni ehãa wɔnaa akɛ Yehowa, wɔ-Tsɛ ni yɔɔ ŋwɛi lɛ, naa mɔbɔ waa!

13-14. Mɛni bɔfo Petro kase yɛ tsuitsakemɔ he? Ni mɛni etsɔɔ mɛi yɛ tsuitsakemɔ he? (Kwɛmɔ mfoniri lɛ hu.)

¹³ Bɔfo Petro kase bɔ ni Yehowa kɛ eshai keɔ mɛi ni etsake amɛtsui lɛ he nii waa kɛjɛ Yesu ŋɔɔ. Petro tɔ̃ shii abɔ, shi Yesu kɛke lɛ tswaa. Akɛ nɔkwɛmɔnɔ lɛ, be ko lɛ Petro tso shii etɛ akɛ eleee e-Nuŋtsɔ lɛ, ni sɛɛ mli lɛ, ewerɛ ho ehe waa yɛ nɔ ni efee lɛ hewɔ. (Mat. 26:​34, 35, 69-75) Shi be ni atee Yesu shi lɛ, ejie ehe kpo etsɔɔ Petro ni ekɛ lɛ wie be ni mɔ ko mɔ ko bɛ jɛmɛ. (Luka 24:​33, 34; 1 Kor. 15:​3-5) Ekã shi faŋŋ akɛ, Yesu hã Petro le akɛ ena akɛ etsake etsui, ni no hewɔ lɛ, ekɛ ehe esha lɛ eke lɛ.

¹⁴ Petro na bɔ ni kɛ́ mɔ ko tsake etsui ni akɛ ehe eshai ke lɛ lɛ enuɔ he ehãa, ni no hewɔ lɛ enyɛ etsɔɔ mɛi nibii nɛɛ ahe nii jogbaŋŋ. Be ni aye Pentekoste gbi jurɔ lɛ sɛɛ lɛ, Petro hã Yudafoi pii komɛi le akɛ, amɛ ni amɛgbe Mesia lɛ. Kɛkɛ ni ekɛɛ amɛ akɛ: “No hewɔ lɛ, nyɛtsakea nyɛtsui ni nyɛkua nyɛsɛɛ koni agbe nyɛhe eshai lɛ, koni Yehowa diɛŋtsɛ ahã nyɛ hejɔlɛ daa.” (Bɔf. 3:​14, 15, 17, 19) Nɔ ni Petro wie nɛɛ hãa wɔnaa akɛ, kɛ́ eshafeelɔ ko tsake etsui lɛ, ekuɔ esɛɛ. Nɔ ni enɛ tsɔɔ ji, etsakeɔ susumɔ ni ejaaa ni ehiɛ lɛ, ekpaa nibii fɔji ni efeɔ lɛ, ni efeɔ nibii ni sa Nyɔŋmɔ hiɛ. Petro wie hu akɛ, Yehowa baagbe amɛhe eshai lɛ, ni tsɔɔ akɛ ekɛbaake amɛ kwraa. Afii babaoo sɛɛ lɛ, Petro kɛɛ Kristofoi lɛ akɛ: ‘Yehowa eto  etsui shi ehã nyɛ, ejaakɛ esumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.’ (2 Pet. 3:9) Enɛ hewɔ lɛ, kɛ́ wɔfee esha, ni eji esha ni yɔɔ hiɛdɔɔ po lɛ, wɔle akɛ wɔgbeko wɔjeŋ naa!

15-16. (a) Mɛni ba ni hã Paulo na akɛ Yehowa kɛ Yesu kɛ eshai keɔ waa? (1 Timoteo 1:​12-15) (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁵ Dani Paulo batsɔ Kristofonyo lɛ, efee nibii gbohii pii. Akɛ nɔkwɛmɔnɔ lɛ, ewa Kristo sɛɛnyiɛlɔi lɛ ayi. (Bɔf. 7:58–8:3) Eeenyɛ efee akɛ, Kristofoi pii na lɛ akɛ mɔ ko ni nyɛŋ atsake kɔkɔɔkɔ. Shi jeee nakai kwraa Yesu na lɛ; ena lɛ akɛ mɔ ko ni baanyɛ atsake. Ekɛ e-Tsɛ Yehowa na sui kpakpai ni Paulo yɔɔ lɛ. Yesu wie akɛ: “Mɔ nɛ ji dɛŋdade ko ni ahala ahã mi.” (Bɔf. 9:15) Yesu tsɔ naakpɛɛ nii po nɔ ehã Paulo tsake etsui. (Bɔf. 9:​1-9, 17-20) Be ni Paulo batsɔ Kristofonyo lɛ, Yesu kɛ nitsumɔ krɛdɛɛ ko wo edɛŋ koni esɔmɔ akɛ bɔfo. Paulo wie shii abɔ akɛ, ehiɛ sɔɔ bɔ ni Yehowa kɛ Yesu na lɛ mɔbɔ ni amɛye amɛbua lɛ lɛ waa. (Kanemɔ 1 Timoteo 1:​12-15.) Ewie akɛ: “Nyɔŋmɔ miibɔ mɔdɛŋ ni enyiɛ ohiɛ kɛya tsuitsakemɔ mli yɛ emlihilɛ lɛ naa.”—Rom. 2:4.

¹⁶ Be ko lɛ, Paulo nu akɛ nyɛmi nuu ko ni yɔɔ Korinto asafo lɛ mli lɛ miibɔ ajwamaŋ ni nyɛmimɛi lɛ tsuko nɔ ko yɛ he. Mɛni ekɛɛ amɛ akɛ amɛfee? Nɔ ni ekɛɛ amɛ lɛ baanyɛ aye abua wɔ ni wɔna bɔ ni Yehowa jieɔ suɔmɔ kpo kɛ́ eetsɔse etsuji kɛ bɔ ni enaa mɛi ni etsake amɛtsui lɛ mɔbɔ ehãa. Ni wɔbaana bɔ ni wɔbaafee wɔkase lɛ. Wɔbaasusu sane nɛɛ he jogbaŋŋ yɛ nikasemɔ ni nyiɛ sɛɛ lɛ mli.