Fɔlɔi ni feɔ nɔkwɛmɔnɔ kpakpa lɛ hiɔ shi yɛ nibii ni amɛtsɔɔ amɛbii lɛ naa. Akɛ nɔkwɛmɔnɔ lɛ, kɛ́ mɔ ko ba bo taomɔ yɛ shĩa ni obi lɛ nu ni ookɛɛ ayakɛɛ mɔ lɛ akɛ, “Mibɛ shĩa” lɛ, ebaawa akɛ obi lɛ baakase bɔ ni awieɔ anɔkwale.

“Fɔlɔi pii fɔɔ kɛɛmɔ akɛ, ‘Feemɔ nɔ ni mikɛɔ bo akɛ ofee lɛ, jeee nɔ ni onaa ni mifeɔ lɛ.’ Shi atsɔseee bii yɛ nɛkɛ gbɛ nɔ. Amɛtamɔ kotsa, amɛgbalaa nɔ fɛɛ nɔ ni amɛnuɔ kɛ nɔ ni amɛnaa ni wɔfeɔ lɛ kɛwoɔ amɛmli, ni kɛ́ wɔnifeemɔ kɛ nɔ ni wɔtsɔɔ amɛ lɛ kpãaa gbee lɛ, amɛbaakɛɛ wɔ.”​—David

BIBLIA MLI SHISHITOO MLA: “Bo mɔ ni oshiɛɔ akɛ, ‘Kaaju’ lɛ, ani ojuɔ?”​—Romabii 2:21.

Fɔlɔi anifeemɔi náa amɛbii anɔ hewalɛ kwraa fe bɔ ni mɛi krokomɛi, tamɔ amɛtipɛŋfoi náa amɛnɔ hewalɛ. Enɛ tsɔɔ akɛ, nyɛ fɔlɔi lɛ titri ji mɛi ni baanyɛ atsɔɔ nyɛbii lɛ gbɛ ni sa akɛ amɛnyiɛ nɔ. Shi, ja nyɛhi shi yɛ nibii ni nyɛtsɔɔ amɛ lɛ naa.

“Wɔbaanyɛ wɔkɛɛ wɔbi lɛ nɔ ko shii abɔ ni wɔbaasusu akɛ eebo toi, shi kɛ́ wɔ diɛŋtsɛ lɛ wɔhiii shi yɛ nɔ ni wɔkɛɔ lɛ naa shi kome ko po lɛ, wɔbi lɛ baakɛɛ wɔ. Gbekɛbii naa nɔ fɛɛ nɔ ni wɔfeɔ lɛ, kɛ́ wɔjwɛŋmɔ bɛ nɔ akɛ amɛmiikwɛ wɔ po.”​—Nicole.

BIBLIA MLI SHISHITOO MLA: “Hiɛshikamɔ ni jɛ ŋwɛi lɛ . . . efeee osato.”​—Yakobo 3:17.

Nyɛpɛia shishitoo mlai ni nyɛhiɔ shi yɛ naa lɛ mli nyɛkwɛa. Mɛɛ nibii nyɛkwɛɔ yɛ TV lɛ nɔ kɛjieɔ nyɛhiɛtserɛ? Te okɛ ohefatalɔ lɛ kɛ obii lɛ yeɔ ohãa tɛŋŋ? Namɛi ji onanemɛi? Ani osusuɔ mɛi krokomɛi ahe? Oti lɛ ji, ani obaasumɔ ni obii lɛ aba amɛjeŋ tamɔ bɔ ni obaa ojeŋ ohãa lɛ?

“Mi kɛ miwu lɛ, wɔbiii ni wɔbii lɛ ahi shi yɛ shishitoo mlai ni wɔ diɛŋtsɛ lɛ wɔhiii shi yɛ naa lɛ anaa.”​—Christine.

Kɛ́ nyɛtɔ̃ lɛ nyɛkpaa he fai. Nyɛbii lɛ le momo akɛ nyɛyeee emuu. No hewɔ lɛ, kɛ otɔ̃ ohefatalɔ loo obi lɛ nɔ ni okpa he fai lɛ, ootsɔɔ obi lɛ bɔ ni ayeɔ anɔkwa ni abaa he shi.

“Kɛ́ wɔtɔ̃ lɛ esa akɛ wɔbii lɛ ana akɛ wɔkpɛlɛ wɔtɔmɔ lɛ nɔ, ni amɛnu hu akɛ wɔkpa he fai. Kɛ́ wɔfeee nakai lɛ amɛbaakase akɛ kɛ́ amɛtɔ̃ lɛ esa akɛ amɛtsimɔ amɛtɔmɔ lɛ nɔ.”​—Robin.