SANE ni wɔshiɛɔ lɛ he miihia ni ehe yɛ sɛɛnamɔ. Shi jeee mɛi fɛɛ naa lɛ nakai. Mɛi komɛi nyaa nɔ ni Biblia kɛɔ lɛ he, shi amɛnuuu he akɛ ehe miihia ni wɔkɛ amɛ akase Biblia lɛ.

Akɛ nɔkwɛmɔnɔ lɛ, susumɔ nuu ko ni atsɛɔ lɛ Gavin ni amrɔ nɛɛ ebatsɔ nyɛmi lɛ he okwɛ. Be ni Gavin bɔi Kristofoi akpeei baa yɛ Maŋtsɛyeli Asa lɛ nɔ lɛ, ekɛɛ esumɔɔɔ ni mɔ ko kɛ lɛ kaseɔ Biblia lɛ. Gavin wie akɛ: “No mli lɛ, mileee Biblia lɛ mli tsɔ, ni no hewɔ lɛ, mishe gbeyei akɛ mashwie mihiɛiaŋ shi. Mishe gbeyei akɛ abaalaka mi ni mikɛ mihe adɔmɔ asafo lɛ.” Eji bo okɛ Gavin kpe kulɛ, mɛni obaafee? Ani obaashi esane ohã lɛ? Kɛ́ wɔkɛ mɛi kase Biblia lɛ, ebaanyɛ eye ebua amɛ waa. Yehowa kɛɛ Israelbii lɛ akɛ: “Miwiemɔ lɛ aaanyɔ tamɔ bɔ́, tamɔ futufuli yɛ jwɛifɔ nɔ.” (5 Mose 31:19, 30; 32:2) Nyɛhãa wɔkasea bɔ́ he nii fioo, ni wɔkɛto wɔshiɛmɔ nitsumɔ lɛ he. Enɛ baaye abua wɔ ni wɔnyɛ wɔye wɔbua “gbɔmɛi srɔtoi fɛɛ” ni wɔkɛkpeɔ yɛ shiɛmɔ nitsumɔ lɛ mli.​—1 Timoteo 2:3, 4.

Bɔ́ enɛɛɛ gidigidi. Lamɔ ni yɔɔ kɔɔyɔɔ lɛ mli lɛ ji nɔ ni tsakeɔ fiofio ni enɛɔ akɛ bɔ́ lɛ. Mɛni hewɔ Yehowa wie akɛ ewiemɔ lɛ “aaanyɔ tamɔ bɔ́” lɛ? Yehowa jɛ mlihilɛ mli ekɛ ewebii lɛ wie. Eto etsui shi ehã amɛ, ni efeee amɛ gidigidi. Wɔbaanyɛ wɔkase lɛ kɛji wɔwieee nibii ni baahã mɛi anu he akɛ nibii ni amɛheɔ amɛyeɔ lɛ ji kwashiasane. Esa akɛ wɔwo mɛi hewalɛ ni amɛ diɛŋtsɛ amɛsusu nibii ni wɔkɛɔ amɛ lɛ he, ni amɛkpɛ amɛyiŋ kɛji amɛbaakpɛlɛ nɔ loo amɛkpɛlɛŋ nɔ. Kɛ́ wɔfee nakai lɛ, mɛi pii baabo wɔ toi, ni wɔshiɛmɔ nitsumɔ lɛ baaye omanye.

Bɔ́ hãa nibii feɔ frɔ̃frɔ̃, ni ehãa mɛi náa miishɛɛ. Kɛ́ wɔsusu gbɛi srɔtoi ni wɔbaanyɛ wɔtsɔ nɔ wɔye wɔbua mɛi lɛ ahe lɛ, wɔshiɛmɔ nitsumɔ lɛ baahã mɛi amii ashɛ amɛhe. Nyɛmi nuu ko ni atsɛɔ lɛ Chris lɛ, ji mɔ klɛŋklɛŋ ni kɛɛ Gavin akɛ ebaasumɔ ni ekɛ lɛ akase Biblia lɛ. Chris wie akɛ, enyɛɛɛ Gavin nɔ ni ekpɛlɛ ni ekɛ lɛ akase Biblia lɛ. Moŋ lɛ, etao gbɛ kroko ni ebaanyɛ etsɔ nɔ ehã Gavin aná he miishɛɛ akɛ ebaakase Biblia lɛ. Ekɛɛ Gavin akɛ, Biblia lɛ wieɔ sane oti ko he, ni ja ekase sane oti nɛɛ he nii dani kɛ́ eba asafoŋ kpeei lɛ ebaaná he sɛɛ jogbaŋŋ. No sɛɛ lɛ, ekɛɛ lɛ akɛ, bɔ ni Biblia mli gbalɛi baa mli lɛ ji nɔ ni hã lɛ Chris, ena akɛ Biblia lɛ jɛ Nyɔŋmɔ ŋɔɔ. Enɛ hã amɛsusu Biblia mli gbalɛi komɛi ni eba mli lɛ ahe. Sane ni Chris kɛ Gavin gba lɛ ta Gavin tsuiŋ, ni ekpɛlɛ ni akɛ lɛ akase Biblia lɛ.

Bɔ́ hewɔ lɛ, tsei kɛ fɔfɔi gboiii yɛ latsa beiaŋ. Yɛ blema Israel lɛ, kɛ́ shɛ latsa beiaŋ lɛ, bei komɛi lɛ nyɔji abɔ hoɔ ni nugbɔ enɛɛɛ. No hewɔ lɛ, bɔ́ ji nɔ ni hãa tsei lɛ nu koni amɛkagboi. Yehowa gba akɛ, yɛ wɔgbii nɛɛ amli lɛ, mɛi baaye nuhɔmɔ, kɛ shishinumɔ lɛ akɛ, “Yehowa wiemɔi lɛ atoiboo” he kumai baaye amɛ. (Amos 8:11) Shi Yehowa ewo shi hu akɛ, mɛi ni afɔ amɛ mu lɛ, baafee tamɔ “bɔ́ ní jɛ Yehowa ŋɔɔ.” Ni tsɔɔ akɛ, amɛ kɛ “gwantɛŋi krokomɛi” ni fata amɛhe lɛ baashiɛ Maŋtsɛyeli lɛ he sane kpakpa lɛ. (Mika 5:6; Yohane 10:16) Sane ni wɔshiɛɔ lɛ fata nibii ni hãa wekukpaa kpakpa bakãa Yehowa kɛ mɛi ni anɔkwale lɛ he kumai yeɔ amɛ lɛ ateŋ lɛ ahe. Ani onaa lɛ nakai?

Bɔ́ ji jɔɔmɔ ni jɛ Yehowa ŋɔɔ. (5 Mose 33:13) Yehowa baanyɛ atsɔ wɔshiɛmɔ nitsumɔ lɛ nɔ ejɔɔ mɛi. Biblia lɛ ni Gavin kase lɛ bafee jɔɔmɔ kɛhã lɛ, ejaakɛ eye ebua lɛ ni ená sanebimɔi komɛi ni gbaa enaa lɛ ahetoo. Gavin tee ehiɛ oyayaayai ni abaptisi lɛ. Amrɔ nɛɛ, ekɛ eŋa Joyce miishiɛ Maŋtsɛyeli lɛ he sane kpakpa lɛ kɛ miishɛɛ.

Kɛ́ wɔkɛ shiɛmɔ nitsumɔ lɛ to bɔ́ he lɛ, ebaaye ebua wɔ ni wɔna akɛ, nɔ ni wɔteŋ mɔ fɛɛ mɔ nyɛɔ etsuɔ yɛ shiɛmɔ nitsumɔ lɛ mli lɛ he yɛ sɛɛnamɔ. Mɛni hewɔ? Nu kuli kome nyɛŋ atsu nɔ ko tsɔ. Shi kɛ́ nu kulibii akpekpei abɔ nɛ akɛ bɔ́ lɛ, ehãa shikpɔŋ lɛ nu. Nakai nɔŋŋ eji yɛ wɔshiɛmɔ nitsumɔ lɛ gbɛfaŋ. Ekolɛ, wɔnaaa nɔ ni wɔnyɛɔ wɔtsuɔ yɛ shiɛmɔ nitsumɔ lɛ mli lɛ akɛ nɔ ko tsɔ. Shi kɛ́ akɛ no fata nɔ ni Yehowa tsuji akpekpei abɔ ni yɔɔ jeŋ fɛɛ lɛ nyɛɔ amɛtsuɔ lɛ he lɛ, ejeee nɔ ko flɛflɛ. Fioo ni onyɛɔ otsuɔ lɛ hu fata he ni anyɛɔ ayeɔ “jeŋmaji lɛ fɛɛ” odase. (Mateo 24:14) Kɛ́ wɔto wɔtsui shi wɔhã mɛi, wɔhã mɛi ná miishɛɛ, ni wɔye wɔbua amɛ koni wekukpaa kpakpa ahi amɛ kɛ Yehowa teŋ lɛ, mɛni baajɛ mli aba? Taakɛ eji yɛ bɔ́ ni shwieɔ shi lɛ gbɛfaŋ lɛ, Yehowa baatsɔ sane ni wɔshiɛɔ lɛ nɔ ejɔɔ amɛ!