1, 2. (a) Mɛɛ sane ni ejaaa akɛye Nabot kɛ ebihii lɛ? (b) Mɛɛ sui enyɔ ahe wɔbaasusu?

FEEMƆ sane nɛɛ ni ba lɛɛlɛŋ lɛ he mfoniri okwɛ. Be ko lɛ, hii yakagbɔmɛi enyɔ komɛi folɔ nuu ko naa akɛ efee esha ko ni yɔɔ hiɛdɔɔ waa. Nɔ ni amɛwie yɛ nuu lɛ he lɛ bɛ mli. Fɛɛ sɛɛ lɛ, abu nuu lɛ fɔ, ni agbe lɛ kɛ ebihii lɛ. Sane lɛ fee ewekumɛi, enanemɛi, kɛ mɛi fɛɛ ni sumɔɔ ni aye jalɛsane lɛ naakpɛɛ waa. Anɔkwa, edɔ amɛ diɛŋtsɛ. Nuu ni akɛ sane nɛɛ ye lɛ ji Yehowa tsulɔ anɔkwafo ko ni hi shi be ni Maŋtsɛ Ahab yeɔ Israel nɔ lɛ, ni egbɛ́i ji Nabot.—1 Maŋ. 21:11-13; 2 Maŋ. 9:26.

² Yɛ nikasemɔ nɛɛ mli lɛ, wɔbaasusu Nabot sane lɛ, kɛ agbɛnɛ hu, tɔmɔ ko ni yɔɔ hiɛdɔɔ ni asafoŋ onukpa anɔkwafo ko ni hi shi yɛ blema Kristofoi lɛ abeiaŋ lɛ tɔ̃ lɛ he. Biblia mli saji nɛɛ baahã wɔna akɛ, ja wɔba wɔhe shi ni wɔjɛ wɔtsuiŋ wɔkɛ eshai eke, dani susumɔ ni wɔhiɛ yɛ jalɛsaneyeli he lɛ kɛ Yehowa nɔ lɛ baakpã gbee.

3, 4. Mɛni hã esoro Nabot yɛ mɛi ni hi shi yɛ ebeiaŋ lɛ ateŋ mɛi babaoo ahe? Mɛni hewɔ ehɔ̃ɔɔ ewain abɔɔ lɛ ehãaa Maŋtsɛ Ahab lɛ?

³ Yɛ Nabot beiaŋ lɛ, no mli lɛ Israelbii lɛ ateŋ mɛi babaoo  miijá Baal. Amɛnyiɛ Maŋtsɛ Ahab kɛ eŋa, Maŋnyɛ Yezebel yitsoŋwalɔ lɛ nɔkwɛmɔnɔ gbonyo lɛ sɛɛ. Baal jálɔi nɛɛ ebuuu Yehowa amɛhãaa nɔ ko nɔ ko, ni amɛkɛ emlai kɛ eshishitoo mlai lɛ hu tsuuu nii. Shi Nabot efeee enii tamɔ amɛ. Eye Yehowa anɔkwa, ni ebu wekukpaa ni yɔɔ ekɛ Yehowa teŋ lɛ akɛ ejara wa fe ewala tete.

⁴ Kanemɔ 1 Maŋtsɛmɛi 21:1-3. Be ni Ahab kɛɛ Nabot akɛ ehɔ̃ɔ ewain abɔɔ lɛ ehã lɛ, loo ekɛhã lɛ koni eyakɔ ekroko ni hi fe no lɛ, Nabot ekpɛlɛɛɛ. Ejɛ bulɛ mli ekɛɛ maŋtsɛ lɛ akɛ: “Yehowa akahã enɛ miigbale mi fɔ̃ɔŋfɔ̃ akɛ maŋɔ mitsɛmɛi agboshinii lɛ mahão.” Mɛni hewɔ Nabot hã hetoo nakai lɛ? Yɛ Mla ni Yehowa kɛhã Israelbii lɛ mli lɛ, ekɛɛ amɛ akɛ amɛkahɔ̃ɔ amɛkutso lɛ shikpɔŋ lɛ kwrakwra amɛhã mɔ ko mɔ ko. (3 Mose 25:23; 4 Mose 36:7) Eyɛ faŋŋ akɛ, Nabot kɛ Yehowa gbɛtsɔɔmɔ lɛ tsu nii.

5. Mɛni Yezebel fee koni agbe Nabot?

⁵ Dɔlɛ sane ji akɛ, nɔ ni Maŋtsɛ Ahab kɛ eŋa lɛ fee yɛ kpɛlɛmɔ ni Nabot ekpɛlɛɛɛ akɛ ebaahɔ̃ɔ ebɔɔ lɛ he lɛ, ehiii kwraa. Yezebel hã afolɔ Nabot naa ni agbe lɛ kɛ ebihii lɛ, bɔ ni afee ni enine ashɛ wain abɔɔ lɛ nɔ ni ekɛhã ewu lɛ. Mɛni Yehowa baafee yɛ sane ni ejaaa nɛɛ ni akɛye etsulɔ lɛ he?

6, 7. Mɛni Yehowa fee kɛtsɔɔ akɛ esumɔɔ jalɛsaneyeli? Mɛni hewɔ eeenyɛ efee akɛ enɛ hã Nabot wekumɛi kɛ enanemɛi atsui nyɔ amɛmli lɛ?

⁶ Yehowa tsu Elia kɛtee Ahab ŋɔɔ oya nɔŋŋ. Elia kɛɛ Ahab akɛ gbɔmɔgbelɔ kɛ julɔ ji lɛ. Kɛkɛ ni ehã ele Yehowa fɔbuu kojomɔ lɛ. No ji akɛ, bɔ ni agbe Nabot kɛ ebihii lɛ, nakai nɔŋŋ Ahab, eŋa lɛ, kɛ ebihii lɛ hu baagboi.—1 Maŋ. 21:17-25.

⁷ Nabot wekumɛi kɛ enanemɛi ye awerɛho waa yɛ nibii gbohii ni Ahab efee lɛ ahewɔ. No hewɔ lɛ, ekã shi faŋŋ akɛ be ni amɛnu akɛ Yehowa etsu sane fɔŋ ni akɛye amɛ lɛ he nii oya nɔŋŋ lɛ, amɛtsui nyɔ amɛmli fioo. Shi eeenyɛ efee akɛ, saji ni tee nɔ yɛ enɛ sɛɛ lɛ, hã ana kɛji amɛbaa amɛhe shi ni amɛheɔ Yehowa amɛyeɔ lɛɛlɛŋ.

8. Be ni Ahab nu nɔ ni Yehowa ekpɛ eyiŋ akɛ ebaafee lɛ kɛ eweku lɛ, mɛni efee? Mɛni Yehowa fee yɛ he?

⁸ Be ni Ahab nu nɔ ni Yehowa ekpɛ eyiŋ akɛ ebaafee lɛ kɛ eweku lɛ, “egbala etadei ni ebu kpekpe, ni ehi ŋmaa, ni ekɛ kpekpe lɛ wɔ, ni kɛ́ enyiɛ lɛ, enyiɛɔ kpookpoo.” Ahab ba ehe shi. Edɔ lɛ waa yɛ etsuiŋ akɛ efee nibii gbohii. Ani ole nɔ ni Yehowa fee yɛ sane lɛ he? Ekɛɛ Elia akɛ: “Akɛni ebaa ehe shi yɛ mihiɛ hewɔ lɛ, mihãŋ efɔŋ lɛ aba yɛ eyinɔ nɛɛ; shi ebi lɛ yinɔ moŋ mahã efɔŋ lɛ aba ewe lɛ nɔ yɛ.” (1 Maŋ. 21:27-29; 2 Maŋ. 10:10, 11, 17) Yehowa, “mɔ ni kaa tsuii ekwɛɔ” lɛ, na Ahab mɔbɔ fioo.—Abɛi 17:3.

9. Mɛɛ gbɛ nɔ eeenyɛ efee akɛ heshibaa bu Nabot wekumɛi kɛ enanemɛi lɛ ahe?

⁹ Eeenyɛ efee akɛ, mɔbɔnalɛ ni Yehowa jie lɛ kpo etsɔɔ Ahab lɛ ka Nabot wekumɛi kɛ enanemɛi lɛ ahemɔkɛyeli. Kɛ́ nakai eba lɛ lɛ, belɛ ehe bahia ni amɛba amɛhe shi. Su nɛɛ baaye abua amɛ ni amɛya nɔ amɛsɔmɔ Yehowa, ni amɛná nɔmimaa akɛ, enyɛŋ eye sane ni ejaaa kɔkɔɔkɔ. No ji, ebaabu amɛhe, ni ebaahã amɛya nɔ amɛhiɛ amɛhemɔkɛyeli lɛ mli. (Kanemɔ 5 Mose 32:3, 4.) Wɔsɛɛ lɛ, Yehowa baatee Nabot kɛ ebihii lɛ ashi kɛba wala mli ekoŋŋ. Enɛ baahã Nabot, ebihii lɛ, kɛ ewekumɛi lɛ fɛɛ ana akɛ, Yehowa yeɔ jalɛsane yɛ nibii fɛɛ amli. (Hiob 14:14, 15; Yoh. 5:28, 29) Mɔ ni baa ehe shi lɛ kaiɔ be fɛɛ be akɛ, “Nyɔŋmɔ baakojo nitsumɔ fɛɛ nitsumɔ kɛ teemɔ sane fɛɛ teemɔ sane hu, ekpakpa jio, efɔŋ jio.” (Jaj. 12:14) Nibii ni Yehowa kwɛɔ dani ekojoɔ sane ko lɛ ekomɛi  yɛ ni wɔleee. No hewɔ lɛ, heshibaa ji nɔ ni baaye abua wɔ ni wɔkafee nɔ ko ni tsɔɔ akɛ wɔheee enɔ wɔyeee dɔŋŋ.

10, 11. (a) Mɛɛ shihilɛi amli ekolɛ wɔbaanu he akɛ ayeee jalɛsane? (b) Mɛɛ gbɛi anɔ heshibaa baabu wɔhe?

¹⁰ Kɛ́ asafoŋ onukpai lɛ kpɛ yiŋ ko ni onuuu shishi aloo ekolɛ okɛ amɛ kpãaa gbee yɛ he lɛ, mɛni obaafee? Akɛ nɔkwɛmɔnɔ lɛ, kɛ́ ahe bo loo mɔ ko ni osumɔɔ esane waa lɛ sɔɔmɔ hegbɛ yɛ edɛŋ lɛ, mɛni obaafee? Ni kɛ́ ashwie ohefatalɔ, obinuu, obiyoo, loo onaanyo ko ni osumɔɔ esane waa lɛ kɛje asafo lɛ mli hu? Mɛni obaafee kɛji okɛ asafoŋ onukpai lɛ kpãaa gbee yɛ eshwiemɔ lɛ he? Ekolɛ, mɔ ko eyafee esha ko ni yɔɔ hiɛdɔɔ ni ookpa gbɛ akɛ abaashwie lɛ, shi asafoŋ onukpai lɛ ena lɛ mɔbɔ ni ashwieee lɛ. No hu mɛni obaafee? Shihilɛi ni tamɔ enɛɛmɛi baanyɛ ahã ewa kɛhã wɔ akɛ wɔbaaya nɔ wɔkɛ wɔhiɛ afɔ̃ Yehowa kɛ gbɛjianɔi srɔtoi ni eto yɛ asafo lɛ mli lɛ anɔ. Shi mɛɛ gbɛ nɔ heshibaa baanyɛ abu wɔhemɔkɛyeli lɛ he yɛ shihilɛi ni tamɔ enɛɛmɛi lɛ amli? Hã wɔsusu gbɛi enyɔ komɛi ahe wɔkwɛa.

¹¹ Klɛŋklɛŋ lɛ, kɛ́ wɔbaa wɔhe shi lɛ, wɔbaakpɛlɛ nɔ akɛ jeee sane lɛ he nɔ fɛɛ nɔ wɔle. Esa akɛ wɔkai akɛ, kɛ́ efeɔ wɔ akɛ wɔle sane lɛ mli fɛɛ po lɛ, Yehowa pɛ le nɔ ni yɔɔ mɔ ko tsui mli. (1 Sam. 16:7) Kɛ́ wɔkpɛlɛ anɔkwa sane ni anyɛŋ aje he ŋwane  nɛɛ nɔ lɛ, ebaatsirɛ wɔ ni wɔba wɔhe shi. Wɔbaayɔse akɛ sane lɛ he nɔ ko kɛ̃ yɛ ni wɔleee, ni no baahã wɔjaje jwɛŋmɔ ni wɔhiɛ yɛ he lɛ. Nɔ ni ji enyɔ lɛ, kɛ́ wɔba wɔhe shi lɛ, wɔkɛ gbɛtsɔɔmɔi ni akɛbaahã lɛ baatsu nii ni wɔbaato wɔtsui shi wɔmɛ Yehowa ni etsu saji ahe nii kɛ́ aye wɔ sane ni ejaaa lɛɛlɛŋ po. Biblia lɛ kɛɔ akɛ: “Mɛi ni sheɔ Nyɔŋmɔ gbeyei, ní amɛsheɔ gbeyei yɛ ehiɛ lɛ, aaahi ahã amɛ. Shi ehiŋ hãŋ mɔ fɔŋ, ni etsɛŋ yɛ jeŋ.” (Jaj. 8:12, 13) Kɛ́ wɔba wɔhe shi lɛ, wɔ kɛ mɛi krokomɛi fɛɛ ni sane lɛ kɔɔ amɛhe eko lɛ baaná he sɛɛ.—Kanemɔ 1 Petro 5:5.

12. Mɛɛ sane he wɔbaasusu amrɔ nɛɛ? Ni mɛni hewɔ?

¹² Yɛ Kristofoi ni hi shi yɛ Siria Antiokia yɛ klɛŋklɛŋ afii 100 lɛ mli lɛ agbɛfaŋ lɛ, nɔ kroko yɛ ni ehe bahia ni amɛfee yɛ amɛhe shi ni amɛbaaba lɛ sɛɛ. Ehe bahia ni amɛjɛ amɛtsuiŋ amɛkɛ eshai ake hu. Nyɛhãa wɔsusua shihilɛ ni amɛkɛkpe lɛ he wɔkwɛa. Be ni wɔfeɔ nakai lɛ, bi ohe akɛ, ‘Eji mi miyɔɔ amɛshihilɛ lɛ mli kulɛ, ani mikɛ eshai baake?’ Amɛsane lɛ baaye abua wɔ ni wɔna akɛ, Yehowa baanyɛ ekɛ eshai ake ni yɛ nakai beiaŋ nɔŋŋ lɛ, eye jalɛsane.

13, 14. Mɛɛ hegbɛi Petro ná? Mɛni efee ni tsɔɔ akɛ eyɛ ekãa?

¹³ Bɔfo Petro ji asafoŋ onukpai ni Kristofoi ni hi shi yɛ blema lɛ le waa lɛ ateŋ mɔ kome. Yesu naanyo ji lɛ, ni atu sɔ̃i ni tsiitsii awo edɛŋ. (Mat. 16:19) Akɛ nɔkwɛmɔnɔ lɛ, yɛ afi 36 Ŋ.B. lɛ, Petro ná hegbɛ eshiɛ ehã Kornelio kɛ eshĩabii lɛ. Enɛ ji nɔ ko ni sa kadimɔ waa, ejaakɛ Kornelio lɛ, Jeŋmajiaŋnyo ji lɛ, ni afoko lɛ ketia. Be ni Nyɔŋmɔ fɔse emumɔ krɔŋkrɔŋ lɛ eshwie Kornelio kɛ eshĩabii lɛ anɔ lɛ, Petro wie akɛ: “Ani mɔ ko baanyɛ nu naa atsĩ koni akabaptisi mɛnɛɛmɛi ní amɛná mumɔ krɔŋkrɔŋ lɛ tamɔ wɔ nɔŋŋ lɛ?”—Bɔf. 10:47.

¹⁴ Yɛ afi 49 Ŋ.B. lɛ, bɔfoi lɛ kɛ onukpai lɛ ni yɔɔ Yerusalem lɛ kpe koni amɛkwɛ kɛji ehe baahia ni afolɔ Jeŋmajiaŋbii ni miitao amɛtsɔmɔ Kristofoi lɛ ketia. Yɛ kpee nɛɛ shishi lɛ, Petro fee ekãa ni ekai nyɛmimɛi lɛ akɛ, afii komɛi ni eho lɛ, ehiɛ nɔŋŋ ni Nyɔŋmɔ fɔse mumɔ krɔŋkrɔŋ lɛ eshwie Jeŋmajiaŋbii komɛi ni afolɔko amɛ ketia lɛ anɔ. Eniiashikpamɔ lɛ ye ebua klɛŋklɛŋ afii 100 lɛ mli gbɛtsɔɔmɔ kuu lɛ waa ni amɛnyɛ amɛkpɛ yiŋ ni ja yɛ sane nɛɛ he. (Bɔf. 15:6-11, 13, 14, 28, 29) Kwɛ bɔ ni Yudafoi kɛ Jeŋmajiaŋbii ni ji Kristofoi lɛ amii baashɛ amɛhe akɛ Petro fee ekãa ni ewie sane nɛɛ he! Ŋwanejee ko bɛ he akɛ, amɛteŋ mɛi babaoo mu amɛfɔ̃ enɔ ni amɛna lɛ akɛ mɔ ko ni eda yɛ mumɔŋ.—Heb. 13:7.

15. Mɛɛ tɔmɔ Petro tɔ̃ be ni eyɔɔ Siria Antiokia lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁵ Kpee nɛɛ sɛɛ etsɛɛɛ lɛ, Petro tee Siria Antiokia. Be ni etee lɛ, ekɛ enyɛmimɛi Kristofoi ni ji Jeŋmajiaŋbii lɛ bɔ waa, ni ekã shi faŋŋ akɛ, nyɛmimɛi nɛɛ ná enilee kɛ niiashikpamɔi srɔtoi ni ená lɛ ahe sɛɛ. Shi trukaa lɛ, Petro kɛ amɛ kpa niyeli. Kwɛ bɔ ni enɛ baahã nyɛmimɛi lɛ anaa akpɛ amɛhe ahã! Eeenyɛ efee akɛ, nɔ ni efee lɛ gba amɛteŋ mɛi komɛi anaa waa. Anɔkwa, nɔ ni Petro fee lɛ ná Yudafoi krokomɛi ni yɔɔ asafo lɛ mli lɛ, kɛ Barnaba po nɔ hewalɛ ni ehã amɛgbala amɛhe shi kɛje amɛnyɛmimɛi lɛ ahe. Tɔmɔ nɛɛ ni Petro tɔ̃ lɛ yɛ hiɛdɔɔ waa, ejaakɛ kulɛ ebaanyɛ ekɛ mligbalamɔ aba asafo lɛ mli. Shi mɛni hã asafoŋ onukpa nɛɛ ni eda yɛ mumɔŋ lɛ tɔ̃ tɔmɔ agbo ni tamɔ nɛkɛ? Nɔ ni fe fɛɛ, mɛni wɔbaanyɛ wɔkase yɛ etɔmɔ lɛ mli ni baaye abua wɔ kɛji asafoŋ onukpa ko wie loo efee nɔ ko ni gba wɔnaa waa?

16. Mɛɛ gbɛ nɔ akã Petro hiɛ? Mɛɛ sanebimɔi enɛ teɔ lɛ shi?

¹⁶ Kanemɔ Galatiabii 2:11-14. Gbɔmɔ  shemɔ ji nɔ ni tsɔ Petro tsɔne lɛ. (Abɛi 29:25) Petro le faŋŋ akɛ Yehowa ehã Jeŋmajiaŋbii lɛ hegbɛ ni amɛbatsɔmɔ Kristofoi, shi no mli lɛ eeshe gbeyei akɛ kɛ́ nyɛmimɛi Yudafoi ni jɛ Yerusalem lɛ na ni ekɛ amɛ miibɔ lɛ, amɛbaawie amɛshi lɛ. Bɔfo Paulo kã Petro hiɛ, ni ekɛɛ lɛ akɛ eefee osato. Mɛni hewɔ? Ejaakɛ lɛ hu etee kpee ni afee yɛ Yerusalem yɛ afi 49 Ŋ.B. lɛ eko, ni eyɛ jɛmɛ be ni Petro fãa Jeŋmajiaŋbii lɛ ahe lɛ. (Bɔf. 15:12) Te Kristofoi ni jɛ Jeŋmajiaŋbii lɛ ateŋ lɛ baafee amɛnii amɛhã tɛŋŋ yɛ sane ni ejaaa ni Petro kɛye amɛ lɛ he? Ani amɛbaahã etɔmɔ lɛ atɔ̃tɔ amɛnane? Ani Petro sɔɔmɔ hegbɛi baaŋmɛɛ lɛ yɛ nɔ ni efee lɛ hewɔ?

17. Mɛɛ gbɛ nɔ Petro ná Yehowa eshaifaa lɛ he sɛɛ?

¹⁷ Petro baa ehe shi, no hewɔ lɛ, ŋwanejee ko bɛ he akɛ be ni Paulo kã ehiɛ lɛ ekpɛlɛ nɔ. Shi Ŋmalɛi lɛ ewieee akɛ Petro sɔɔmɔ hegbɛi ŋmɛɛ lɛ. Anɔkwa, sane nɛɛ sɛɛ lɛ, Nyɔŋmɔ mumɔ krɔŋkrɔŋ lɛ tsirɛ lɛ ni eŋmala Biblia mli woji enyɔ. Nɔ kome ni sa kadimɔ ji akɛ, yɛ ewolo ni ji enyɔ lɛ mli lɛ, etsɛ Paulo akɛ “wɔnyɛmi ni wɔsumɔɔ.” (2 Pet. 3:15) Ekolɛ tɔmɔ ni Petro tɔ̃ lɛ gba Jeŋmajiaŋbii ni yɔɔ asafo lɛ mli lɛ anaa waa. Kɛ̃lɛ, Yesu, ni ji asafo lɛ yitso lɛ, tee nɔ ekɛ lɛ tsu nii. (Efe. 1:22) Nyɛmimɛi ni yɔɔ asafo lɛ mli lɛ ná hegbɛ akɛ amɛbaakase Yesu kɛ Yehowa kɛtsɔ Petro eshai lɛ ni amɛkɛbaake lɛ lɛ nɔ. Kɛ́ amɛteŋ mɔ ko hã Petro, ni ji adesa ni yeee emuu lɛ, tɔmɔ lɛ tɔ̃tɔ enane jiŋŋ, wɔleee, shi wɔheɔ wɔyeɔ amɛhãaa eba lɛ nakai.

18. Mɛɛ shihilɛi baanyɛ ahã wɔná hegbɛ kɛtsɔɔ akɛ susumɔ ni wɔhiɛ yɛ jalɛsaneyeli he lɛ kɛ Yehowa nɔ lɛ kpãa gbee?

¹⁸ Asafoŋ onukpai ni yɔɔ ŋmɛnɛ lɛ yeee emuu tamɔ asafoŋ onukpai ni hi shi yɛ klɛŋklɛŋ afii 100 lɛ mli lɛ nɔŋŋ, “ejaakɛ wɔ fɛɛ wɔtɔ̃ɔ babaoo.” (Yak. 3:2) Wɔ fɛɛ wɔkpɛlɛɔ anɔkwa sane nɛɛ nɔ. Shi etamɔ nɔ ni kɛ́ nyɛmi ko fee nɔ ko ni egba wɔnaa lɛ, wɔhiɛ kpaa nɔ akɛ eyeee emuu. Kɛ́ eba lɛ nakai lɛ, ani wɔkɛ wɔnifeemɔ baatsɔɔ akɛ susumɔ ni wɔhiɛ yɛ jalɛsaneyeli he lɛ kɛ Yehowa nɔ lɛ kpãa gbee? Akɛ nɔkwɛmɔnɔ lɛ, kɛ́ asafoŋ onukpa ko wie mɛi pɔtɛi komɛi ahe efɔŋ yɛ he ni amɛjɛ, amɛhewolonɔ su, loo nɔ kroko ni tamɔ nakai lɛ hewɔ lɛ, te obaafee onii ohã tɛŋŋ? Kɛ́ asafoŋ onukpa ko kɛ bo wie bɔ ni esaaa lɛ, ani obaahã no atɔ̃tɔ onane? Yɛ nɔ najiaŋ ni okɛ oyaiyeli baamu sane naa akɛ esa akɛ ahe esɔɔmɔ hegbɛ lɛ yɛ edɛŋ lɛ, ani obaaná tsui omɛ Yesu, ni ji asafo lɛ yitso lɛ, koni etsu sane lɛ he nii? Yɛ nɔ najiaŋ ni okɛ ojwɛŋmɔ baama nyɛmi lɛ tɔmɔ lɛ nɔ lɛ, ani obaasusu sui kpakpai ni eyɔɔ lɛ, kɛ ekolɛ afii abɔ ni ekɛsɔmɔ Yehowa yɛ anɔkwayeli mli lɛ he? Kɛ́ ahã nyɛmi nuu ko ni etɔ̃ onɔ lɛ tee nɔ esɔmɔ akɛ asafoŋ onukpa loo ahã lɛ sɔɔmɔ hegbɛi krokomɛi afata nɔ ni eyɔɔ momo lɛ ahe lɛ, ani okɛ lɛ baanya? Kɛ́ wɔjɛ wɔsuɔmɔ mli wɔkɛ eshai ke lɛ, no tsɔɔ akɛ susumɔ ni wɔhiɛ yɛ jalɛsaneyeli he lɛ kɛ Yehowa nɔ lɛ kpãa gbee.—Kanemɔ Mateo 6:14, 15.

19. Mɛni esa akɛ wɔtswa wɔfai shi akɛ wɔbaafee?

¹⁹ Satan kɛ jeŋ fɔŋ nɛɛ ehã atsɔ jalɛsane hiɛ abu shi. Shi mɛi fɛɛ ni sumɔɔ jalɛsaneyeli lɛ le akɛ, be ko baaba ni Yehowa baahã jalɛsane ni ayeee fɛɛ sɛɛ afo, ni amɛmiikpa be nɛɛ gbɛ waa. (Yes. 65:17) Shi kɛyashi nakai be lɛ baaba lɛ, nyɛhãa wɔtswaa wɔfai shi akɛ, be fɛɛ be ni wɔbaanu he akɛ aye wɔ loo mɔ kroko sane ni ejaaa lɛ, wɔbaaba wɔhe shi ni wɔkai akɛ ekolɛ wɔleee sane lɛ mli fɛɛ, ní agbɛnɛ hu, wɔjɛ wɔtsuiŋ wɔkɛ mɛi ni tɔ̃ɔ wɔnɔ lɛ atɔmɔi ake amɛ. Kɛ́ wɔfee nakai lɛ, no baatsɔɔ akɛ susumɔ ni wɔhiɛ yɛ jalɛsaneyeli he lɛ kɛ Yehowa nɔ lɛ kpãa gbee.