NYƐSƐƐ afi lɛ, ahole hii akpei abɔ akɛ asafoŋ onukpai kɛ sɔɔlɔi yɛ Yehowa Odasefoi ateŋ yɛ jeŋ fɛɛ. Ani ofata nyɛmimɛi hii nɛɛ ahe? Kɛ́ nakai ni lɛ, belɛ ekã shi faŋŋ akɛ, oná miishɛɛ waa akɛ oná sɔɔmɔ hegbɛ nɛɛ.

Shi yɛ nakai beiaŋ nɔŋŋ lɛ, eeenyɛ efee akɛ otsui fã fioo, ni enɛ bɛ naakpɛɛ. Nakai Mose kɛ Yeremia hu nu he be ni Yehowa kɛ nitsumɔi wo amɛdɛŋ lɛ. (2 Mo. 4:10; Yer. 1:6) Nyɛmi nuu ko ni edako tsɔ ni awó lɛ asafoŋ onukpa etsɛko ni atsɛɔ lɛ Jason lɛ wie akɛ: “Be ni awó mi asafoŋ onukpa lɛ, minu he akɛ nitsumɔi kɛ sɔ̃i ni ebajwere minɔ lɛ fa fe mi.” Kɛ́ bo hu onuɔ he nakai lɛ, mɛni obaanyɛ ofee koni onyɛ oye henumɔ nɛɛ nɔ ni onyɛ otsu osɔ̃i lɛ ahe nii jogbaŋŋ? Blema Kristofonyo ko ni atsɛɔ lɛ Timoteo lɛ niiashikpamɔ lɛ baanyɛ aye abua bo.​—Bɔf. 16:1-3.

Eeenyɛ efee akɛ, be ni bɔfo Paulo kɛɛ Timoteo akɛ ebafata ehe koni amɛyashiɛ yɛ maŋsɛɛ lɛ, no mli lɛ Timoteo eye aaafee afii 20 loo nɔ. Akɛni no mli lɛ, Timoteo edako tsɔ hewɔ lɛ, ekolɛ esheɔ ehe gbeyei, ni no hewɔ lɛ, ekolɛ enáaa ekãa kɛtsu sɔ̃i ni tere lɛ lɛ ahe nii. (1 Tim. 4:11, 12; 2 Tim. 1:1, 2, 7) Shi afii nyɔŋma sɛɛ lɛ, nibii tsake, ni wɔnaa enɛ yɛ wolo ni Paulo ŋma eyahã asafo ni yɔɔ Filipi lɛ mli. Ekɛɛ amɛ akɛ: “Mihiɛ kã nɔ yɛ Nuŋtsɔ Yesu mli akɛ etsɛŋ ni matsu Timoteo kɛba nyɛŋɔɔ . . . Ejaakɛ mibɛ mɔ ko ni subaŋ tamɔ enɔ lɛ.”​—Fip. 2:19, 20.

Mɛni hã Timoteo nyɛ etsu enitsumɔ akɛ asafoŋ onukpa lɛ jogbaŋŋ lɛ? Naa sui ekpaa ni ejie lɛ kpo ni wɔbaanyɛ wɔkase.

1. Efo mɛi krokomɛi anɔ mli. Paulo kɛɛ nyɛmimɛi ni yɔɔ Filipi lɛ akɛ: “[Timoteo] baajɛ tsui krɔŋŋ mli etsu nyɛsaji ahe nii.” (Fip. 2:20) Akɛni Timoteo jwɛŋɔ mɛi ahe hewɔ lɛ, efo mɛi krokomɛi anɔ mli, ni eshwe waa akɛ eye ebua amɛ ni amɛhemɔkɛyeli lɛ mli awa, ni ejɛ etsuiŋ ekɛ ebe kɛ ehewalɛ shã afɔle ehã nyɛmimɛi lɛ.

Kɛ́ asafoŋ onukpa loo sɔɔlɔ ji bo lɛ, kaafee onii tamɔ bɔs draiva ko ni miiye oyai ni eshɛ he ni eyaa lɛ aahu akɛ, eshi mɛi ni esa akɛ ehole kɛya lɛ yɛ sɛɛ. Nyɛmi nuu ko ni bɔɔ mɔdɛŋ waa, ni atsɛɔ lɛ William, ni kɛ nɔ ni fe afii 20 esɔmɔ akɛ asafoŋ onukpa lɛ wo mɛi ni ahole amɛ akɛ asafoŋ onukpai loo sɔɔlɔi etsɛko lɛ ŋaa akɛ: “Nyɛsumɔa nyɛmimɛi lɛ. Nyɛhãa amɛhiamɔ nii lɛ ahe ahiaa nyɛ fe asafo lɛ nibii ahe gbɛjianɔ ni nyɛbaato ni nyɛkwɛ nɔ.”

2. Ehã shiɛmɔ nitsumɔ lɛ he hia lɛ waa. Paulo tsɔɔ nɔ ko ni hã esoro Timoteo yɛ mɛi krokomɛi ahe. Ewie akɛ: “Mɛi krokomɛi lɛ fɛɛ miitao amɛ diɛŋtsɛ amɛnii, shi jeee Yesu Kristo nii.” (Fip. 2:21) Paulo ŋma sane nɛɛ yɛ Roma, ni ena akɛ nyɛmimɛi hii ni yɔɔ jɛmɛ lɛ kɛ amɛjwɛŋmɔ tee amɛ diɛŋtsɛ amɛhiamɔ nii anɔ waa fe sɔɔmɔ nitsumɔ lɛ. No ji, amɛkɛ ekãa tsuuu shiɛmɔ nitsumɔ lɛ. Shi Timoteo efeee nakai kwraa! Be ni ená hegbɛ akɛ ebaalɛɛ esɔɔmɔ nitsumɔ lɛ mli lɛ, eshashaooo shi. Moŋ lɛ, efee enii tamɔ Yesaia, mɔ ni kɛɛ akɛ, “Naa mi! Tsu mi!” lɛ.​—Yes. 6:8.

Te ooofee tɛŋŋ otsu shiɛmɔ nitsumɔ lɛ kɛ ekãa ni yɛ nakai beiaŋ nɔŋŋ lɛ, otsu bo diɛŋtsɛ ohiamɔ nii ahe nii? Klɛŋklɛŋ lɛ, bo ŋaa ni Paulo wo lɛ toi. Ewo ŋaa akɛ: “Nyɛkwɛa ni nyɛna nibii ni he hiaa waa lɛ.” (Fip. 1:10) No hewɔ lɛ, tsu nibii ni he hiaa waa lɛ, ni ji nibii ni he hiaa Yehowa waa lɛ, ahe nii klɛŋklɛŋ. Nɔ ni ji enyɔ lɛ, okɛ jatsui pii akashwie onɔ. Jiemɔ nibii ni baanyɛ afite obe kɛ ohewalɛ lɛ kɛje ogbɛ nɔ. Paulo wo Timoteo ŋaa ni ‘ejo  nibii ni ashweɔ yɛ oblahiiaŋ lɛ anaa foi, ni etiu jalɛ, kɛ hemɔkɛyeli, kɛ suɔmɔ, kɛ toiŋjɔlɛ moŋ sɛɛ.’​—2 Tim. 2:22.

3. Efeee anihao yɛ Yehowa sɔɔmɔ lɛ mli. Paulo kɛɛ Kristofoi ni yɔɔ Filipi lɛ akɛ: “Nyɛle odase ni [Timoteo] diɛŋtsɛ eye yɛ ehe, akɛ, tamɔ bi kɛ epapa lɛ, ekɛ mi sɔmɔ akɛ nyɔŋ koni sane kpakpa lɛ ashwere.” (Fip. 2:22) Timoteo efeee anihao. Ekɛ Paulo fee ekome kɛtsu nii waa, ni enɛ hã naanyobɔɔ ni kã amɛteŋ lɛ mli wa.

Ŋmɛnɛ lɛ, nitsumɔi pii yɛ ni atsuɔ yɛ Yehowa asafo lɛ mli. Kɛ́ mɔ ko tsu nitsumɔi nɛɛ eko lɛ, etsui baanyɔ emli ni ebaaná nanemɛi pii yɛ asafo lɛ mli. No hewɔ lɛ, tswaa ofai shi akɛ, be fɛɛ be lɛ, ‘obaatsu babaoo yɛ Nuŋtsɔ lɛ nitsumɔ lɛ mli.’​—1 Kor. 15:58.

4. Ekɛ nibii ni ekase lɛ tsu nii. Yɛ wolo ko ni Paulo ŋma Timoteo lɛ mli lɛ, ekɛɛ lɛ akɛ: “Onyiɛ mitsɔɔmɔ, kɛ mishihilɛ gbɛ, kɛ miyiŋtoo, kɛ mihemɔkɛyeli, kɛ mitsuishitoo, kɛ misuɔmɔ, kɛ mishifimɔ lɛ sɛɛ kpaakpa.” (2 Tim. 3:10) Timoteo kɛ nibii ni ekase lɛ tsu nii, ni enɛ hewɔ lɛ, anyɛ atu sɔ̃i krokomɛi ni tsiitsii awo edɛŋ.​—1 Kor. 4:17.

Ani oyɛ naanyo ko ni ji nyɛmi ni yɛ niiashikpamɔ fe bo ni woɔ bo ŋaa yɛ be kɛ beiaŋ? Kɛ́ obɛ eko lɛ, belɛ ehi akɛ obaatao eko. Nyɛmi nuu ko ni atsɛɔ lɛ Tom ni kɛ afii pii esɔmɔ akɛ asafoŋ onukpa lɛ wie akɛ: “Asafoŋ onukpa ko ni yɔɔ niiashikpamɔ lɛ kɛ mi bɔ naanyo ni etsɔɔ mi nibii pii. Mibi lɛ ŋaawoo yɛ nibii pii amli, ni mikɛ ŋaa ni ewo mi lɛ tsu nii. Enɛ hewɔ lɛ, eyeee be ko ni mihe sa ni minyɛ mitsu minitsumɔ akɛ asafoŋ onukpa lɛ jogbaŋŋ.”

5. Etee nɔ etsɔse ehe. Paulo kɛɛ Timoteo akɛ: “Okɛma ohiɛ akɛ okɛ Nyɔŋmɔjamɔ baatsɔse ohe.” (1 Tim. 4:7) Kɛ́ foidalɔ ko yɛ mɔ ko ni tsɔseɔ lɛ lɛ, no etsɔɔɔ akɛ ehe ehiaaa ni lɛ diɛŋtsɛ hu etsɔseɔ ehe. Paulo kɛɛ Timoteo akɛ: “Yaa nɔ okɛ ojwɛŋmɔ ama nikanemɔ yɛ mɛi ahiɛ, kɛ wiemɔkɛtsɔɔmɔ, kɛ nitsɔɔmɔ nɔ. . . . Jwɛŋmɔ nibii nɛɛ anɔ; okɛ ohe awo mli kwraa, koni mɛi fɛɛ ana ohiɛyaa lɛ faŋŋ.”​—1 Tim. 4:13-15.

No hewɔ lɛ, yaa nɔ otsɔse ohe koni ohe asa waa. Kasemɔ nii waa koni ohemɔkɛyeli lɛ mli awa fe tsutsu lɛ, ni agbɛnɛ hu ole gbɛtsɔɔmɔi hei kɛ tsakemɔi ni afee yɛ asafo lɛ gbɛjianɔtoo mli. Kaahe ohe oye fe nine. Kɛ́ oyaatsu sane ko he nii lɛ, taomɔ nii amli jogbaŋŋ dani otsu he nii. Kaasusu kɔkɔɔkɔ akɛ, akɛni osɔmɔ etsɛ hewɔ lɛ, ehe ehiaaa ni ofeɔ nakai. Kasemɔ Timoteo ni ohã “ohiɛ ahi ohe nɔ kɛ onitsɔɔmɔ lɛ nɔ be fɛɛ be.”​—1 Tim. 4:16.

6. Ehã Yehowa mumɔ lɛ ye ebua lɛ. Paulo kɛɛ Timoteo akɛ: “Tsɔ mumɔ krɔŋkrɔŋ ni hiɔ wɔmli lɛ nɔ obu nɔ kpakpa ni akɛwo odɛŋ nɛɛ he.” (2 Tim. 1:14) Nɔ kpakpa nɛɛ ji sɔɔmɔ nitsumɔ ni atu awo Timoteo dɛŋ lɛ. Timoteo ŋmɛ gbɛ ni Nyɔŋmɔ mumɔ lɛ ye ebua lɛ. Enɛ hewɔ lɛ, miishɛɛ ni eyɔɔ yɛ nitsumɔ ni akɛwo edɛŋ lɛ he lɛ baaa shi, ni enyɛ etee nɔ etsu.

Nyɛmi nuu ko ni atsɛɔ lɛ Donald, ni kɛ afii pii esɔmɔ akɛ asafoŋ onukpa lɛ wie akɛ: “Esa akɛ asafoŋ sɔɔlɔi kɛ onukpai ahã wekukpaa ni yɔɔ amɛ kɛ Nyɔŋmɔ teŋ lɛ he ahia amɛ waa diɛŋtsɛ. Kɛ́ amɛfee nakai lɛ, ‘amɛbaanyiɛ kɛjɛ hewalɛ mli kɛya hewalɛ mli.’ Kɛ́ amɛsɔle amɛbi Nyɔŋmɔ ni edro amɛ emumɔ lɛ, ni amɛbɔ mɔdɛŋ amɛwo mumɔ lɛ yibii lɛ, nyɛmimɛi lɛ baaná amɛhe sɛɛ waa diɛŋtsɛ.”​—Lala 84:7; 1 Pet. 4:11.

Eji miishɛɛ sane diɛŋtsɛ akɛ, Yehowa kɛ bo kɛ asafoŋ sɔɔlɔi kɛ onukpai hei pii ni ahole lɛ miitsu nii waa. Jason ni wɔtsi etã yɛ sane nɛɛ shishijee lɛ wie akɛ: “Kɛjɛ be ni awó mi asafoŋ onukpa nɛɛ, mikase nibii babaoo ni no ehã misheee mihe gbeyei dɔŋŋ tamɔ tsutsu ko lɛ. Bianɛ lɛ, minitsumɔ lɛ etse minaa, ni minaa lɛ akɛ eji hegbɛ ni nɔ bɛ ni miná!”

Ani obaahã Yehowa aya nɔ ekɛ bo atsu nii? Belɛ, tswaa ofai shi akɛ obaakase Timoteo. Kɛ́ ofee nakai lɛ, Nyɔŋmɔ webii lɛ baaná ohe sɛɛ waa.