1. Be ni Adam tse atua yɛ Eden abɔɔ lɛ mli lɛ, mɛɛ shi Yehowa wo? Mɛni hewɔ shiwoo nɛɛ woɔ adesai hewalɛ lɛ?

KƐJƐ be ni Adam fee esha ni ekɛ esha tsɛŋe adesai fɛɛ lɛ nɔ kɛbaa lɛ, Yehowa ehã ana akɛ eji Nyɔŋmɔ ni woɔ mɔ hewalɛ. Be ni Adam tse atua yɛ Eden abɔɔ lɛ mli lɛ sɛɛ nɔŋŋ lɛ, Yehowa fee nɔ ko ni baashɛje Adam seshibii ni baaba yɛ sɛɛ mli lɛ amii. Yehowa wo shi yɛ Eden abɔɔ lɛ mli akɛ be ni yi aaawula shi lɛ, ekpãtã Satan Abonsam, ni ji “blema onufu lɛ,” kɛ enitsumɔi gbohii lɛ fɛɛ ahiɛ. Aŋma shiwoo ni ji gbalɛ nɛɛ yɛ 1 Mose 3:15. Shiwoo nɛɛ tsɔɔ akɛ eshiii adesai ajeŋ ehãaa amɛ, ni ele akɛ, kɛ́ adesai banu shiwoo nɛɛ shishi lɛ, ebaawo amɛ hewalɛ waa.​—Kpo. 12:9; 1 Yoh. 3:8.

2. Mɛɛ gbɛ nɔ Yehowa wo Noa hewalɛ?

² Yehowa tsulɔ Noa yinɔbii lɛ efeee Nyɔŋmɔ suɔmɔnaa nii. No mli lɛ, Noa kɛ eweku lɛ pɛ jáa Yehowa. Akɛni Noa yinɔbii  lɛ fee yiwalɛ nii ni amɛkɛ amɛhe wo jeŋba sha mli waa hewɔ lɛ, kulɛ enijiaŋ baanyɛ aje wui. (1 Mo. 6:4, 5, 11; Yuda 6) Shi Yehowa kɛɛ lɛ nɔ ko ni wo lɛ hewalɛ waa koni ekɛ ‘Nyɔŋmɔ anyiɛ’ kɛyashi naagbee. (1 Mo. 6:9) Yehowa kɛɛ Noa akɛ ebaakpãtã nakai yinɔbii fɔji lɛ ahiɛ, ni etsɔɔ Noa nɔ ni efee koni ekɛbaa lɛ kɛ eweku lɛ yi. (1 Mo. 6:13-18) Yehowa hã Noa na akɛ eji Nyɔŋmɔ ni woɔ mɔ hewalɛ.

3. Mɛni Yehowa fee kɛwo Yoshua hewalɛ? (Kwɛmɔ mfoniri ni yɔɔ nikasemɔ lɛ shishijee lɛ.)

³ Afii ohai abɔ sɛɛ lɛ, Nyɔŋmɔ kpɛ eyiŋ akɛ ekɛ nitsumɔ wulu ko baawo Yoshua dɛŋ akɛ enyiɛ E-webii lɛ ahiɛ kɛya Shiwoo Shikpɔŋ lɛ nɔ koni amɛyahi jɛmɛ. Enɛ baabi ni Yoshua kɛ jeŋmaji ni yɔɔ Shiwoo Shikpɔŋ lɛ nɔ lɛ awu ta ni eye amɛnɔ kunim. Yoshua náŋ enɛ mlɛo ejaakɛ jeŋmaji nɛɛ ahe wala waa. Kulɛ, Yoshua baanyɛ ajo nitsumɔ nɛɛ naa foi. Akɛni Yehowa le enɛ hewɔ lɛ, etsɔ Mose nɔ ewo Yoshua hewalɛ. Nyɔŋmɔ kɛɛ Mose akɛ: “Wó Yoshua hiɛnyiɛlɔ, ní owo lɛ hewalɛ ní owaje lɛ, ejaakɛ lɛ ji mɔ ni baanyiɛ maŋ nɛɛ hiɛ kɛfo mli kɛya, ni lɛ nɔŋŋ ji mɔ ni baahã amɛŋɔ shikpɔŋ ni obaana lɛ.” (5 Mo. 3:28) Yehowa wo Yoshua hewalɛ dani eje enitsumɔ lɛ shishi. Ekɛɛ lɛ akɛ: “Ani jeee mi mifã bo? Feemɔ ekãa, ni owaje ohe. Otsui akafã, ni kaashe gbeyei hu, ejaakɛ he fɛɛ he ni oyaa lɛ, Yehowa, o-Nyɔŋmɔ lɛ, kɛ bo yɛ.” (Yos. 1:1, 9) Wiemɔi nɛɛ wo Yoshua hewalɛ waa!

4, 5. (a) Mɛni Yehowa fee kɛwo ewebii ni hi shi yɛ blema lɛ hewalɛ? (b) Mɛɛ gbɛ nɔ Yehowa wo e-Bi lɛ hewalɛ?

⁴ Jeee aŋkroaŋkroi pɛ Yehowa wo amɛ hewalɛ, ewo ewebii lɛ hu hewalɛ akɛ kuu. Yehowa gba gbalɛ ko ni kɛ́ aŋɔ Yudafoi lɛ nom kɛtee Babilon lɛ, ebaashɛje amɛmii. Ekɛ amɛ wie akɛ kuu ekɛɛ: “Kaashe gbeyei, ejaakɛ mikɛ bo yɛ. Kaaye otsui, ejaakɛ miji o-Nyɔŋmɔ lɛ, mawaje bo, anɔkwa, maye mabua bo, lɛɛlɛŋ, mikɛ mijalɛ ninejurɔ lɛ baahiɛ omli kpɛŋŋ.” (Yes. 41:10) Nyɔŋmɔ wo blema Kristofoi lɛ hu hewalɛ, ni ŋmɛnɛ hu lɛ, ewoɔ E-webii lɛ hewalɛ.​—Kanemɔ 2 Korintobii 1:3, 4.

⁵ Be ni Yesu yɔɔ shikpɔŋ lɛ nɔ lɛ, e-Tsɛ lɛ wo lɛ hewalɛ. Be ni abaptisi Yesu lɛ, enu gbee ko jɛ ŋwɛi kɛɛ: “Mɔ nɛ ji mi-Bi ni misumɔɔ lɛ lɛ, mɔ ni miná ehe miishɛɛ lɛ.” (Mat. 3:17) Ekã shi faŋŋ akɛ, wiemɔi nɛɛ wo Yesu hewalɛ waa ni enyɛ efi shi kɛyashi naagbee!

6. Mɛɛ gbɛ nɔ talɛnta he abɛbua lɛ woɔ mɔ hewalɛ?

⁶ Yesu kase e-Tsɛ, ni lɛ hu ewo mɛi hewalɛ. Yesu gba gbalɛ ko ni kɔɔ je nɛŋ naagbee gbii lɛ ahe. Yɛ nakai gbalɛ lɛ mli lɛ, egba abɛbua ko ni kɔɔ talɛnta he, ni abɛbua lɛ mli wiemɔi lɛ woɔ mɔ hewalɛ ni eye anɔkwa kɛyashi naagbee. Nuŋtsɔ lɛ ni awie ehe yɛ abɛbua lɛ mli lɛ wo enyɔji anɔkwafoi lɛ ateŋ mɔ fɛɛ mɔ hiɛ nyam, ni ekɛɛ lɛ akɛ: “Aekoo, nyɔŋ kpakpa kɛ anɔkwafo! Oye anɔkwa yɛ nii fioo he. Mikɛ bo baato nibii babaoo nɔ. Botemɔ onuŋtsɔ miishɛɛ lɛ mli.” (Mat. 25:21, 23) Wiemɔi nɛɛ woɔ mɔ hewalɛ waa koni eya nɔ eye Yehowa anɔkwa!

7. Mɛɛ gbɛ nɔ Yesu wo ebɔfoi lɛ hewalɛ? Ni mɛni efee kɛwo Petro hu hewalɛ?

⁷ Yesu bɔfoi lɛ je ŋwane shii abɔ yɛ amɛteŋ yɛ mɔ ni ji agbo fe fɛɛ yɛ amɛteŋ lɛ he, shi Yesu to etsui shi ewo amɛ hewalɛ koni amɛba amɛhe shi ni amɛfee amɛnii tamɔ tsuji, shi jeee nuŋtsɔmɛi. (Luka 22:24-26) Petro fee nibii ni kumɔ Yesu tsui shii abɔ. (Mat. 16: 21-23; 26:31-35, 75) Shi Yesu kwaaa Petro, moŋ lɛ, ewo lɛ hewalɛ, ni ekɛ nitsumɔ wo Petro dɛŋ akɛ ewo enyɛmimɛi Kristofoi lɛ hewalɛ.​—Yoh. 21:16.

8. Mɛɛ gbɛ nɔ Hezekia wo Yuda tatsɛmɛi lɛ kɛ maŋbii lɛ hewalɛ?

⁸ Dani Yehowa baatsu e-Bi lɛ kɛba shikpɔŋ lɛ nɔ ni ebafee bɔ ni afeɔ awoɔ mɔ hewalɛ lɛ he nɔkwɛmɔnɔ ni yeɔ emuu lɛ po lɛ, Yehowa tsuji anɔkwafoi lɛ le akɛ ehe miihia ni awo mɛi hewalɛ. Be ni Asiriabii lɛ bawo Yudabii lɛ ahe gbeyei lɛ, Hezekia bua tatsɛmɛi kɛ maŋbii lɛ anaa koni ewo amɛ hewalɛ. “Ni [ewiemɔi] lɛ wo maŋbii lɛ hewalɛ.”​—Kanemɔ 2 Kronika 32:6-8.

9. Mɛni Hiob wolo lɛ tsɔɔ wɔ yɛ hewalɛwoo he?

⁹ Wɔbaanyɛ wɔkase bɔ ni awoɔ mɔ hewalɛ kɛjɛ Hiob dɛŋ. Hiob tsɔɔ enanemɛi etɛ komɛi ni ba eŋɔɔ akɛ amɛmiiba amɛbashɛje emii lɛ bɔ ni ashɛjeɔ mɔ mii. Ekɛɛ amɛ akɛ eji amɛ amɛyɔɔ eshihilɛ lɛ mli kulɛ, ebaawie nibii ni baawo amɛ hewalɛ ni baahã amɛhe ajɔ amɛ, shi jeee nibii ni baakumɔ amɛtsui. (Hiob 16:1-5) Naagbee lɛ, Elihu wo Hiob hewalɛ, ni Yehowa diɛŋtsɛ hu fee nakai.​—Hiob 33:24, 25; 36:1, 11; 42:7, 10.

10, 11. (a) Mɛni hewɔ ehe bahia ni awo Yefta biyoo lɛ hewalɛ? (b) Ŋmɛnɛ lɛ, namɛi hu esa akɛ awo amɛ hewalɛ?

¹⁰ Mɔ kroko ni hi shi yɛ blema ni ehe bahia ni awo lɛ hewalɛ ji Yefta biyoo lɛ. Be ni Kojolɔ Yefta kɛ Amonbii lɛ yaawu lɛ, ewo Yehowa shi akɛ kɛ́ eye ebua lɛ ni eye Amonbii lɛ anɔ kunim lɛ, ebaahã mɔ klɛŋklɛŋ ni baaje kpo kɛjɛ eshĩa lɛ mli abakpee lɛ lɛ ayasɔmɔ yɛ Yehowa sɔlemɔ buu lɛ mli ewala beiaŋ fɛɛ. Yehowa ye ebua Israelbii lɛ ni amɛye kunim. Be ni Yefta ku esɛɛ lɛ, ebiyoo, ni ji ebi koome lɛ ji mɔ klɛŋklɛŋ ni je kpo ebakpee lɛ. Enɛ kumɔ Yefta tsui. Shi eye eshiwoo lɛ nɔ ni ehã ebiyoo lɛ tee Shilo eyasɔmɔ yɛ sɔlemɔ buu lɛ mli ewala gbii fɛɛ.​—Koj. 11:30-35.

¹¹ Ŋwanejee ko bɛ he akɛ, sane nɛɛ gba Yefta naa waa, ni ekã shi faŋŋ akɛ, egba ebiyoo lɛ naa waa fe lɛ po. Fɛɛ sɛɛ lɛ, Yefta biyoo lɛ jɛ esuɔmɔ mli ekpɛlɛ yiŋ ni epapa kpɛ lɛ nɔ. (Koj. 11:36, 37) Sɔɔmɔ ni eyaasɔmɔ yɛ sɔlemɔ buu lɛ mli lɛ hewɔ lɛ, eboteŋ gbalashihilɛ mli ni efɔŋ, ni no hewɔ lɛ, etsɛ gbɛ́i baalaaje. Ehe bahia ni ashɛje emii ni awo lɛ hewalɛ waa. Biblia lɛ kɛɔ akɛ: “Ebatsɔ kusum yɛ Israel akɛ: Afi fɛɛ afi lɛ, Israel oblayei lɛ baaya ni amɛyajie Yefta, Gileadnyo lɛ biyoo lɛ yi, gbii ejwɛ yɛ afi mli.” (Koj. 11:39, 40) Ŋmɛnɛ lɛ, nyɛmimɛi komɛi ni ji oshijafoi lɛ kɛ amɛbe kɛ amɛhewalɛ tsuɔ babaoo yɛ Yehowa sɔɔmɔ lɛ mli. Amɛ hu amɛsa yijiemɔ kɛ hewalɛwoo, aloo jeee nakai?​—1 Kor. 7:32-35.

12, 13. Mɛɛ gbɛ nɔ Petro ‘wo enyɛmimɛi lɛ hewalɛ’?

¹² Gbi gbɛkɛ ni enɔ jetsɛremɔ lɛ abaagbe Yesu lɛ, ekɛɛ bɔfo Petro akɛ: “Simon, Simon, naa! Satan ebi koni ahã esha nyɛ fɛɛ nyɛmli tamɔ wiiti. Shi misɔle kɛkpa fai mihã bo koni ohemɔkɛyeli akatã; ni bo hu, kɛ́ oku osɛɛ lɛ, wo onyɛmimɛi lɛ hewalɛ.”​—Luka 22:31, 32.

¹³ Petro fata mɛi ni abu amɛ akɛ akulashiŋi yɛ blema Kristofoi asafo lɛ mli lɛ ahe. (Gal. 2:9) Efee ekãa waa yɛ Pentekoste gbi lɛ nɔ kɛ no sɛɛ fɛɛ, ni enɛ wo enyɛmimɛi Kristofoi lɛ hewalɛ waa. Be ni ekɛ afii pii esɔmɔ sɛɛ lɛ, eŋma enyɛmimɛi Kristofoi lɛ wolo akɛ: “Miŋma nyɛ wiemɔi fioo nɛɛ bɔ ni afee ni  mikɛwo nyɛ hewalɛ ni mikɛye odase kɛ hiɛdɔɔ akɛ enɛ ji Nyɔŋmɔ anɔkwa dromɔ lɛ. Nyɛdamɔa shi shiŋŋ yɛ mli.” (1 Pet. 5:12) Woji ni Petro ŋmala lɛ wo Kristofoi ni hi shi yɛ ebeiaŋ lɛ hewalɛ. Hewalɛwoo he miihia wɔ waa ŋmɛnɛ, ni Petro woji lɛ baanyɛ awo wɔ hewalɛ be ni wɔmɛɔ jeŋ hee ni etsɛŋ ebaaba lɛ.​—2 Pet. 3:13.

14, 15. Mɛɛ gbɛ nɔ woji ni bɔfo Yohane ŋmala lɛ ewo Kristofoi hewalɛ kɛjɛ blema kɛbashi ŋmɛnɛ?

¹⁴ Bɔfo Yohane hu fata mɛi ni abu amɛ akɛ akulashiŋi yɛ blema Kristofoi asafo lɛ mli lɛ ahe. Yesu he Sanekpakpa ni eŋma lɛ yɛ miishɛɛ waa, ni kɛjɛ be ni eŋma lɛ tɔ̃ɔ kɛbashi ŋmɛnɛ lɛ, e-Sanekpakpa lɛ ewo Kristofoi hewalɛ waa. Yohane Sanekpakpa lɛ mli pɛ wɔnaa wiemɔi ni Yesu wie akɛ suɔmɔ ji su titri ni anɔkwa Kristofoi baajie lɛ kpo lɛ yɛ.​—Kanemɔ Yohane 13:34, 35.

¹⁵ Nibii kpakpai pii yɛ ni wɔbaanyɛ wɔkase yɛ woji etɛ krokomɛi ni Yohane ŋmala lɛ amli. Akɛ nɔkwɛmɔnɔ lɛ, kɛ́ wɔwerɛ ho wɔhe waa yɛ wɔtɔmɔi ahewɔ lɛ, wiemɔi ni Yohane wie akɛ “Yesu lá lɛ hãa wɔhe tseɔ kɛjeɔ esha fɛɛ esha mli” lɛ shɛjeɔ wɔmii waa, aloo jeee nakai? (1 Yoh. 1:7) Agbɛnɛ hu, kɛ́ wɔhenilee tee nɔ ebu wɔ fɔ yɛ eshai ni wɔfee be ko ni eho lɛ ahewɔ lɛ, ani wiemɔi ni Yohane wie akɛ “Nyɔŋmɔ da fe wɔtsuii” lɛ eshɛjeee wɔmii? (1 Yoh. 3:20) Yɛ mɛi fɛɛ ni ŋma Biblia lɛ ateŋ lɛ, Yohane pɛ ŋma akɛ “Nyɔŋmɔ lɛ, suɔmɔ ji lɛ.” (1 Yoh. 4:8, 16) Yɛ wolo ni ji enyɔ kɛ wolo ni ji etɛ ni Yohane ŋmala lɛ amli lɛ, ejie Kristofoi ni “miiya nɔ amɛmiinyiɛ yɛ anɔkwale lɛ mli” lɛ ayi.​—2 Yoh. 4; 3 Yoh. 3, 4.

16, 17. Mɛɛ gbɛ nɔ bɔfo Paulo wo Kristofoi ni hi shi yɛ blema lɛ hewalɛ?

¹⁶ Yɛ bɔfoi lɛ fɛɛ ateŋ lɛ, etamɔ nɔ ni bɔfo Paulo ji mɔ ni wo blema Kristofoi lɛ  hewalɛ fe fɛɛ. Yɛ Yesu gbele lɛ sɛɛ nɔŋŋ lɛ, bɔfoi lɛ ateŋ mɛi babaoo tee nɔ amɛhi Yerusalem, ni ji he ni no mli lɛ gbɛtsɔɔmɔ kuu lɛ yɔɔ lɛ. (Bɔf. 8:14; 15:2) Mɛi ni Kristofoi ni yɔɔ Yudea lɛ shiɛ Kristo he sane amɛtsɔɔ lɛ ateŋ mɛi babaoo heɔ amɛyeɔ akɛ Nyɔŋmɔ kome pɛ ni yɔɔ. Shi mɛi ni yɔɔ hei ni mumɔ krɔŋkrɔŋ lɛ tsɔɔ akɛ bɔfo Paulo ayashiɛ yɛ lɛ ateŋ mɛi babaoo jeee Yudafoi, ni amɛjáa nyɔŋmɔi srɔtoisrɔtoi pii.​—Gal. 2:7-9; 1 Tim. 2:7.

¹⁷ Paulo fã gbɛ eyashiɛ yɛ maji pii ni yɔɔ ŋmɛnɛŋmɛnɛ beiaŋ Turkey, Grees, kɛ Italy lɛ anɔ. Eshiɛ ehã mɛi ni jeee Yudafoi ni yɔɔ jɛmɛ lɛ, ni eto Kristofoi asafoi pii ashishi. Asafoi hei nɛɛ amli bii lɛ ‘na amanehulu yɛ amɛ diɛŋtsɛ amɛmaŋbii lɛ adɛŋ,’ ni no hewɔ lɛ, ehe bahia ni awo amɛ hewalɛ. (1 Tes. 2:14) Yɛ aaafee afi 50 Ŋ.B. lɛ, Paulo ŋma wolo eyahã asafo hee ni yɔɔ Tesalonika lɛ. Ekɛɛ amɛ akɛ: “Be fɛɛ be ni wɔtsĩɔ nyɛ fɛɛ nyɛtã yɛ wɔsɔlemɔi amli lɛ, wɔdaa Nyɔŋmɔ shi, ejaakɛ wɔyaa nɔ wɔkaiɔ nyɛhemɔkɛyeli nitsumɔ, kɛ nyɛsuɔmɔ mli ni nyɛjɛɔ nyɛtsuɔ nii waa, kɛ nyɛshifimɔ [lɛ].” (1 Tes. 1:2, 3) Agbɛnɛ hu, ekɛɛ amɛ akɛ amɛwowoo amɛhe hewalɛ. Eŋma akɛ: “Nyɛyaa nɔ nyɛwowoa nyɛhe hewalɛ, ni nyɛtswaa nyɛhe nyɛmaa shi.”​—1 Tes. 5:11.

18. Mɛni blema gbɛtsɔɔmɔ kuu lɛ fee kɛwo Filipo hewalɛ?

¹⁸ Yehowa tsɔ gbɛtsɔɔmɔ kuu lɛ nɔ ewo mɛi ni nyiɛ hiɛ yɛ blema Kristofoi asafoi lɛ amli lɛ kɛ Kristofoi krokomɛi lɛ fɛɛ hewalɛ. Akɛ nɔkwɛmɔnɔ lɛ, be ni Filipo yashiɛ Kristo he sane etsɔɔ Samariabii lɛ, gbɛtsɔɔmɔ kuu lɛ mli bii lɛ fi esɛɛ. Amɛtsu amɛteŋ mɛi enyɔ, ni ji Petro kɛ Yohane kɛtee ní amɛyasɔle amɛhã Kristo kaselɔi hei ni yɔɔ jɛmɛ lɛ koni amɛná mumɔ krɔŋkrɔŋ lɛ. (Bɔf. 8:5, 14-17) Ekã shi faŋŋ akɛ, yelikɛbuamɔ ni gbɛtsɔɔmɔ kuu lɛ kɛhã Filipo kɛ kaselɔi hei lɛ wo amɛ hewalɛ waa!

19. Be ni blema Kristofoi lɛ kane wolo ni jɛ gbɛtsɔɔmɔ kuu lɛ ŋɔɔ lɛ, te amɛnu he amɛhã tɛŋŋ?

¹⁹ Sɛɛ mli lɛ, ehe bahia ni gbɛtsɔɔmɔ kuu lɛ akpɛ yiŋ yɛ sane ko ni he hiaa lɛ he; ani esa akɛ afo Kristofoi ni jeee Yudafoi lɛ ketia tamɔ bɔ ni Mose Mla lɛ biɔ ni afee lɛ? (Bɔf. 15:1, 2) Gbɛtsɔɔmɔ kuu lɛ sɔle amɛbi ni Yehowa kɛ emumɔ krɔŋkrɔŋ lɛ atsɔɔ amɛ gbɛ, ni no sɛɛ lɛ, amɛpɛi Ŋmalɛ lɛ mli jogbaŋŋ. No hewɔ lɛ, mɛɛ yiŋ amɛkpɛ? Amɛkpɛ yiŋ akɛ ehe ehiaaa ni afolɔɔ Kristofoi ni jeee Yudafoi lɛ ketia. Amɛŋma wolo ko ni kɔɔ yiŋ ni amɛkpɛ lɛ he ni amɛkɛtsu nyɛmimɛi hii komɛi koni amɛkɛyahã asafoi lɛ. Be ni asafoi lɛ anine shɛ wolo nɛɛ nɔ ni amɛkane lɛ, “amɛmii shɛ amɛhe waa diɛŋtsɛ yɛ hewalɛwoo lɛ hewɔ.”​—Bɔf. 15:27-32.

20. (a) Mɛɛ gbɛi anɔ Gbɛtsɔɔmɔ Kuu ni yɔɔ ŋmɛnɛ lɛ woɔ wɔ fɛɛ hewalɛ? (b) Mɛɛ sanebimɔ abaahã hetoo yɛ nikasemɔ ni nyiɛ sɛɛ lɛ mli?

²⁰ Ŋmɛnɛ lɛ, Yehowa Odasefoi Agbɛtsɔɔmɔ Kuu lɛ woɔ Betel weku lɛ mli bii lɛ, mɛi ni yɔɔ be fɛɛ sɔɔmɔ krɛdɛɛ lɛ mli shi amɛbɛ Betel lɛ, kɛ nyɛmimɛi krokomɛi fɛɛ ni yɔɔ jeŋ fɛɛ lɛ hewalɛ. Ni tamɔ bɔ ni eba lɛ yɛ blema Kristofoi lɛ abeiaŋ lɛ, Kristofoi ni yɔɔ ŋmɛnɛ lɛ hu amii shɛɔ amɛhe waa yɛ hewalɛwoo lɛ hewɔ! Agbɛnɛ hu, yɛ afi 2015 lɛ, Gbɛtsɔɔmɔ Kuu lɛ fee wolo ko ni yitso ji Kuu Osɛɛ Kɛba Yehowa Ŋɔɔ. Wolo nɛɛ ewo mɛi pii ni yɔɔ jeŋ fɛɛ lɛ hewalɛ waa. Shi ani mɛi ni nyiɛ hiɛ yɛ asafo lɛ mli lɛ pɛ esa akɛ amɛkase Yehowa ni amɛwo mɛi hewalɛ? Abaahã sanebimɔ nɛɛ hetoo yɛ nikasemɔ ni nyiɛ sɛɛ lɛ mli.