Nɔ ko ni Jara Wa Kwraa Fe Shika Tsuru
Shika tsuru námɔ wa ni ejara hu wa. Shi mɛi akpekpei abɔ ená nɔ ko ni jara wa kwraa fe shika tsuru, nɔ ko ni “atseee shika aheee.” Ani ole nɔ ni ji? No ji Biblia mli nilee.—Hiob 28:12, 15.
WƆBAANYƐ wɔkɛ mɛi ni kɛ tsui krɔŋŋ kaseɔ Biblia lɛ ato mɛi ni miitao shika tsuru he. Mɛi ni tamɔ nɛkɛ lɛ, kɛ hiɛdɔɔ pɛiɔ Ŋmalɛi lɛ amli be fɛɛ be bɔ ni afee ni amɛná nilee ni nɔ bɛ ni yɔɔ mli lɛ he sɛɛ. Yɛ sane nɛɛ mli lɛ, wɔkɛ gbɛi ni wɔtsɔɔ nɔ wɔkaseɔ Biblia lɛ baato gbɛi srɔtoi etɛ komɛi ni atsɔɔ nɔ anáa shika tsuru lɛ he, ni wɔkwɛ nɔ ni wɔbaanyɛ wɔkase yɛ mli.
BE NI ONA ANƆKWALE LƐ KLƐŊKLƐŊ KWRAA
Bei komɛi lɛ, mɛi naa shika tsuru yɛ fai anaa kɛ hei krokomɛi ni tamɔ nakai. Shika tsuru ni anáa yɛ hei nɛɛ adalɛ fɛɛ baashɛ maŋtsɛsi yitso, ni eyɛ mli aahu dani anáa eko. Ekã shi faŋŋ akɛ, kɛ́ onyiɛ ni oyana eko nakai lɛ, omii baashɛ ohe waa, ni obaagbɛ ohiŋmɛiiaŋ jogbaŋŋ okwɛ jɛmɛ niiaŋ fɛɛ akɛ aleenɔ obaaná eko ofata he lo.
Eeenyɛ efee akɛ, nakai nɔŋŋ omii shɛ ohe waa gbi klɛŋklɛŋ ni Yehowa Odasefonyo ko ba oŋɔɔ koni ekɛ bo abasusu hiɛnɔkamɔ kpakpa ni yɔɔ Biblia lɛ mli lɛ he lɛ. Ŋwanejee ko bɛ he akɛ, okaiɔ nɔ klɛŋklɛŋ ni etsɔɔ bo kɛjɛ Biblia lɛ mli lɛ jogbaŋŋ. Ekolɛ, etsɔɔ bo Nyɔŋmɔ gbɛ́i Yehowa lɛ. (Lala 83:19) Aloo, ehã ole akɛ obaanyɛ obatsɔ Nyɔŋmɔ naanyo. (Yak. 2:23) Ekã shi faŋŋ akɛ, nɔ ni etsɔɔ bo lɛ ta otsuiŋ amrɔ nɔŋŋ, ni oshwe waa akɛ ole nibii krokomɛi yɛ Biblia lɛ mli.
BE NI AKƐ BO BƆI BIBLIA LƐ KASEMƆ
Anyɛɔ anáa shika tsuru yɛ fai kɛ nujɔi amli hu. Bei komɛi lɛ, shika tsuru ni yabuaa ehe naa yɛ hei nɛɛ fa waa. No hewɔ lɛ, kɛ́ mɔ ko mia ehiɛ etsa faa lɛ mli jogbaŋŋ lɛ, ebaanyɛ ená saŋŋ bɔ ni kɛ́ ehɔ̃ɔ lɛ, ebaaná dɔlai akpekpei abɔ.
Be ni Yehowa Odasefoi kɛ bo bɔi Biblia lɛ kasemɔ lɛ, ekolɛ onu he tamɔ mɔ ko ni miitao shika tsuru yɛ faa ko ni ale akɛ afɔɔ shika tsuru námɔ yɛ mli lɛ mli. Ojwɛŋ ŋmalɛi srɔtoi anɔ, ni enɛ hã Biblia mli nilee ni oyɔɔ lɛ tee hiɛ waa. Be ni okɛ miishɛɛ susuɔ nibii kpakpai ni okase yɛ Biblia lɛ mli lɛ ahe lɛ, oyɔse bɔ ni obaafee ohã wekukpaa ni yɔɔ okɛ Yehowa teŋ lɛ mli awa, oya nɔ ohi esuɔmɔ lɛ mli, ni oná naanɔ wala.—Yak. 4:8; Yuda 20, 21.
Ani okɛ hiɛdɔɔ kaseɔ Biblia lɛ tamɔ bɔ ni mɛi ni taoɔ shika tsuru lɛ gboɔ he deŋme lɛ?
Ekolɛ, okɛ hiɛdɔɔ pɛi Biblia lɛ mli, tamɔ bɔ ni mɛi ni yatsaa fai amli kɛtaoɔ shika tsuru lɛ kɛ hiɛdɔɔ Mat. 28:19, 20.
feɔ lɛ, koni ole nibii pii yɛ mli. Be ni okase Biblia mli shishijee anɔkwalei lɛ ogbe naa lɛ, ofee tsakemɔi yɛ oshihilɛ mli, ojɔɔ ohe nɔ ohã Yehowa, ni abaptisi bo.—YAA NƆ OKASE NII!
Bei komɛi lɛ, anáa shika tsuru yɛ tɛi amli. Mɛi tsaa tɛi nɛɛ, amɛjwaraa, ni amɛshiɔ ni eboɔ mɔnyɔmɔnyɔ bɔ ni afee ni amɛnyɛ amɛjie shika tsuru lɛ yɛ mli. Kɛ́ oyana tɛi lɛ ni aatsu amɛhe nii lɛ, obɔleŋ akɛ abaaná shika tsuru yɛ amɛmli. Shika tsuru bibioo pɛ anáa yɛ tɛi lɛ amli. Anɔkwa, kɛ́ ajwara tɛ ni tsiimɔ miihe ashɛ sɛmɛnti baagii enyɔ lɛ, ekolɛ shika tsuru ni abaaná yɛ mli lɛ tsiimɔ shɛɛɛ bleedi kome tsiimɔ! Fɛɛ sɛɛ lɛ, mɛi gboɔ deŋme amɛyatsaa.
Kɛ́ mɔ ko kase “Kristo lɛ he shishijee tsɔɔmɔ lɛ” egbe naa lɛ, esaaa akɛ ekɛwaa jɛmɛ; esa akɛ eya nɔ ekase nii. (Heb. 6:1, 2) Be fɛɛ be ni wɔbaakase Biblia lɛ, esa akɛ wɔbɔ mɔdɛŋ waa wɔtao nibii hei yɛ mli. Kɛ́ wɔkɛ afii pii ekase Biblia lɛ, ekolɛ wɔnáŋ enɛ feemɔ mlɛo. No hewɔ lɛ, mɛni baaye abua wɔ?
Be fɛɛ be ni obaakane Biblia lɛ, hã ehi ojwɛŋmɔŋ akɛ, nɔ ko hee yɛ ni obaanyɛ okase yɛ mli. Susumɔ nɔ fɛɛ nɔ ni awie yɛ nɔ ni okaneɔ lɛ mli lɛ he jogbaŋŋ. Kasemɔ nii waa, ni obaaná Nyɔŋmɔ he nilee babaoo. (Rom. 11:33) Dɛŋdadei ni Yehowa asafo lɛ kɛduro wɔ ni wɔkɛtao nibii amli lɛ hu baanyɛ aye abua bo ni ole babaoo. No hewɔ lɛ, okɛ fɛɛ atsu nii jogbaŋŋ. Kɛ́ ootao Biblia mli sanebimɔ ko hetoo lɛ, too otsui shi ni otao nii amli jogbaŋŋ. Bi mɛi krokomɛi ni amɛtsɔɔ bo ŋmalɛi kɛ asafo lɛ woji lɛ amli saji ni eye ebua amɛ ni ewo amɛ hewalɛ, ni ogba amɛ nibii ni oná he miishɛɛ be ni okaseɔ Nyɔŋmɔ Wiemɔ lɛ.
Shi jeee nilee lɛ ni obaaná lɛ babaoo lɛ ji nɔ ni he hiaa. Bɔfo Paulo kɛɛ “nilee woɔ ehe nɔ.” (1 Kor. 8:1) No hewɔ lɛ, yaa nɔ oba ohe shi, ni ofee nibii ni baahã ohemɔkɛyeli lɛ mli awa be fɛɛ be. Kɛ́ okɛ oweku lɛ fee ekome kɛkase Biblia lɛ daa otsi, ni ohe be kɛkase Biblia lɛ akɛ mɔ aŋkro lɛ, ebaaye ebua bo ni oya nɔ ohi shi yɛ Yehowa mlai kɛ eshishitoo mlai lɛ anaa, ni ebaatsirɛ bo ni oye obua mɛi krokomɛi. Nɔ ni fe fɛɛ lɛ, omii baashɛ ohe, ejaakɛ oná nɔ ko ni jara wa kwraa fe shika tsuru.—Abɛi 3:13, 14.