Esoro Yesu fɔmɔ kɛ egbekɛbiiashi he saji ni yɔɔ Mateo Sanekpakpa lɛ mli lɛ yɛ nɔ ni yɔɔ Luka Sanekpakpa lɛ mli lɛ he, ejaakɛ esoro mɔ ni amɛteŋ mɔ fɛɛ mɔ gbala ejwɛŋmɔ kɛtee enɔ.

Mateo Sanekpakpa lɛ gbalaa jwɛŋmɔ kɛyaa saji ni kɔɔ Yosef he lɛ anɔ titri. Egbaa wɔ bɔ ni Yosef nu he ehã be ni ená ele akɛ Maria hiɛ hɔ lɛ, bɔ ni ŋwɛibɔfo ko gbala nɔ ni eba lɛ mli ehã lɛ yɛ lamɔ mli, kɛ bɔ ni ekɛ ŋwɛibɔfo lɛ gbɛtsɔɔmɔi lɛ tsu nii ehã. (Mat. 1:19-25) Kɛfata he lɛ, ehãa wɔleɔ akɛ ŋwɛibɔfo ko bɔ Yosef kɔkɔ yɛ lamɔ mli akɛ ejo foi kɛya Ejipt, ni akɛ, Yosef bo kɔkɔbɔɔ nɛɛ toi. Mateo gbaa wɔ akɛ, sɛɛ mli lɛ, ŋwɛibɔfo ko kɛɛ Yosef yɛ lamɔ mli akɛ eku esɛɛ kɛya Israel. Yosef fee nakai, ni ekɛ eweku lɛ yahi Nazaret. (Mat. 2:13, 14, 19-23) Yɛ Mateo Sanekpakpa lɛ klɛŋklɛŋ yitsei enyɔ lɛ amli lɛ, atsĩ Yosef gbɛ́i tã shii nɛɛhu, shi Maria nɔ lɛ je kpo shii ejwɛ pɛ.

Luka Sanekpakpa lɛ gbalaa jwɛŋmɔ kɛyaa Maria nɔ titri, shi jeee Yosef. Egbaa wɔ saramɔ ni bɔfo Gabriel yasara Maria lɛ he sane, ni ehãa wɔleɔ akɛ, Maria yasara ewekunyo ko ni atsɛɔ lɛ Elizabet. Maria jie Yehowa yi, ni aŋmala saji ni ewie kɛjie eyi lɛ yɛ Luka Sanekpakpa lɛ mli. (Luka 1:26-56) Kɛfata he lɛ, Luka hãa wɔleɔ nɔ ni Simeon kɛɛ Maria yɛ amane ni Yesu baana lɛ he. Be ni Luka wieɔ gbɛ ni Yesu weku lɛ fã kɛtee sɔlemɔwe lɛ be ni eye afii 12 lɛ he po lɛ, ehã wɔle nɔ ni Maria wie kɛ bɔ ni saji ni tee nɔ lɛ ná enɔ hewalɛ ehã, shi etsɔɔɔ wɔ nɔ ni Yosef wie. (Luka 2:19, 34, 35, 48, 51) Yɛ Luka Sanekpakpa lɛ klɛŋklɛŋ yitsei enyɔ lɛ amli lɛ, atsĩ Maria gbɛ́i tã shii 12, shi Yosef nɔ lɛ je kpo shii 3 pɛ. No hewɔ lɛ, Mateo wie nibii ni Yosef fee kɛ nibii ni esusu he lɛ ahe titri, shi Luka wie nibii ni tee nɔ yɛ Maria jwɛŋmɔŋ kɛ eshihilɛ mli lɛ ahe titri.

Nakai nɔŋŋ esoro Yesu wekutɔkpãa ni yɔɔ Mateo Sanekpakpa lɛ mli lɛ, yɛ nɔ ni yɔɔ Luka Sanekpakpa lɛ mli lɛ he. Mateo wie Yosef wekutɔkpãa lɛ he, ni etsɔɔ akɛ Yosef ji Maŋtsɛ David seshinyo kɛtsɔ ebinuu Solomon nɔ. Mɛni hewɔ efee nakai? Efee nakai koni ekɛtsɔɔ akɛ, akɛni Yosef ŋɔ Yesu efee ebi hewɔ lɛ, yɛ mla naa lɛ, Yesu yɛ hegbɛ akɛ eyeɔ maŋtsɛ. (Mat. 1:6, 16) Yɛ Luka gbɛfaŋ lɛ, ewie Maria wekutɔkpãa lɛ he, ni etsɔɔ akɛ Maria ji Maŋtsɛ David seshinyo kɛtsɔ ebinuu Natan nɔ. (Luka 3:31) Etamɔ nɔ ni efee nakai koni ekɛtsɔɔ akɛ Yesu yɛ hegbɛ akɛ etaa David maŋtsɛ sɛi lɛ nɔ, ejaakɛ “yɛ heloo gbɛfaŋ lɛ, ajɛ David seshi lɛ mli afɔ lɛ.” (Rom. 1:3) Heli bi ji Maria. Shi yɛ Luka Sanekpakpa lɛ mli lɛ, awie akɛ Yosef moŋ ji Heli bi. Mɛni hewɔ? Ejaakɛ aŋmaaa yei agbɛ́i yɛ maŋ lɛ wekutɔkpãa woji amli. No hewɔ lɛ, be ni Luka wie akɛ Yosef ji Heli bi lɛ, bɔ ni mɛi nu shishi ji akɛ, Yosef kɛ Heli biyoo ebote gbalashihilɛ mli.​—Luka 3:23.

Yesu wekutɔkpãa lɛ he saji ni yɔɔ Mateo kɛ Luka Sanekpakpai lɛ amli lɛ, fɛɛ maa nɔ mi akɛ Yesu ji Mesia ni Nyɔŋmɔ wo shi akɛ ebaaba lɛ. Anɔkwa, mɛi ni hi shi yɛ Yesu beiaŋ lɛ ateŋ mɛi babaoo kpɛlɛ nɔ akɛ Maŋtsɛ David seshinyo ji lɛ. Farisifoi kɛ Sadukifoi lɛ po ejeee enɛ he ŋwane. Kɛbashi ŋmɛnɛ lɛ, Yesu wekutɔkpãa lɛ he saji ni yɔɔ Mateo kɛ Luka Sanekpakpai lɛ amli lɛ fata nibii ni hãa wɔhemɔkɛyeli lɛ mli waa lɛ ahe, ni amɛhãa wɔnáa nɔmimaa akɛ, Nyɔŋmɔ shiwoi fɛɛ baaba mli.