YƐ November 1932 naagbee gbɛ lɛ, akɛ traffic light mamɔ gbɛjegbɛi lɛ ahe yɛ Mexico City, ni maŋ lɛ adafitswaa nitsumɔhei lɛ kɛ miishɛɛ tswa enɛ he adafi. Amrɔ nɛɛ, otsi ebaho, ni nɔ kroko ehe mɛi fe akpei akpe kome ni yɔɔ maŋ nɛɛ mli lɛ ajwɛŋmɔ. No ji akɛ, gbɔ krɛdɛɛ ko miiba maŋ lɛ mli kɛhã Yehowa Odasefoi agbii etɛ kpee wulu ko. Mɛi ni tsuɔ nii amɛhãa adafitswaa nitsumɔhei srɔtoi lɛ kɛ kamerai etee oketekei adaamɔhe lɛ koni amɛyasha gbɔ krɛdɛɛ nɛɛ, ni Odasefoi ni yɔɔ jɛmɛ lɛ hu etee koni amɛyakpee lɛ. Shi namɔ ni? Lɛ ji Joseph F. Rutherford, ni ji Watch Tower Society lɛ sɛinɔtalɔ lɛ.

The Golden Age magazin lɛ wie akɛ: “Ŋwanejee ko bɛ he akɛ, kpee wulu nɛɛ baafee nifeemɔ ko ni sa kadimɔ waa yɛ asafo lɛ yinɔsane mli yɛ Mexico.” Shi mɛi 150 pɛ ba kpee wulu nɛɛ. No hewɔ lɛ, mɛni hã ebafee nifeemɔ ko ni sa kadimɔ waa lɛ?

Dani abaafee kpee nɛɛ, anɔkwale lɛ shwereee ekpakpa ko yɛ Mexico. Kɛjɛ afi 1919 lɛ, afee kpeei bibii srɔtoi yɛ maŋ nɛɛ mli, shi yɛ nɔ najiaŋ ni asafoi lɛ ayi baafa lɛ, afii komɛi asɛɛ lɛ, amɛnɔ gbɔ moŋ. Yɛ afi 1929 lɛ, agbele nitsumɔhe nine yɛ Mexico City, ni no hã asafo lɛ bɔi shweremɔ ekoŋŋ. Kɛ̃lɛ, nyɛmimɛi lɛ kɛ naagbai komɛi kpe. Akɛ nɔkwɛmɔnɔ lɛ, be ni asafo lɛ kɛ gbɛtsɔɔmɔ hã akɛ esaaa akɛ gbɛgbalɔi kɛ amɛhe woɔ heloonaa nitsumɔ mli be ni amɛnyiɛ shiɛmɔ nɔ lɛ, gbɛgbalɔ kome mli fu ni lɛ diɛŋtsɛ eyatse e-Biblia kasemɔ kuu. Nakai beiaŋ nɔŋŋ lɛ, ehe bahia ni atsake nitsumɔhe nine nɔkwɛlɔ lɛ, ejaakɛ ana akɛ ekɛ ehe miiwo nifeemɔ ko ni esaaa Kristofoi lɛ mli. Ehe bahia ni awo Odasefoi anɔkwafoi ni yɔɔ Mexico lɛ hewalɛ.

Nyɛminuu Rutherford hã maŋshiɛmɔi enyɔ ni kanyaa mɔ waa yɛ kpee wulu lɛ shishi, ni esaa ehã wiemɔi enumɔ yɛ redio lɛ nɔ kɛwo anɔkwafoi ni yɔɔ Mexico lɛ hewalɛ waa. Enɛ ji be klɛŋklɛŋ ni atsɔ redio nɔ ashiɛ sane kpakpa lɛ yɛ Mexico fɛɛ. Yɛ kpee lɛ sɛɛ lɛ, awó nitsumɔhe nine nɔkwɛlɔ hee koni eto nitsumɔ lɛ he gbɛjianɔ. Nyɛmimɛi lɛ kɛ ekãa hee shiɛ ni Yehowa jɔɔ amɛ.

Enɔ afi lɛ, afee kpeei wuji enyɔ sɔŋŋ yɛ Mexico. Afee ekome yɛ Veracruz ni afee ekroko lɛ yɛ Mexico City. Hiɛdɔɔ kɛ ekãa ni nyɛmimɛi lɛ kɛshiɛ lɛ wo yibii kpakpai. Yɛ afi 1931 lɛ, shiɛlɔi 82 yɔɔ Mexico. Shi be ni shɛɔ afi 1941 lɛ, amɛyifalɛ lɛ eku ebɔ he toi nyɔŋma! Ni mɛi aaafee 1,000 ba Mexico City kɛhã Teokrase Kpee ni afee yɛ afi 1941 lɛ.

Yɛ afi 1943 lɛ, nyɛmimɛi lɛ tswa “Maŋ Ni Eye Ehe” Teokrase Kpee lɛ he adafi. * Afee kpee nɛɛ yɛ maji 12 anɔ yɛ Mexico, ni bɔ ni nyɛmimɛi lɛ fee amɛtswa he adafi nɛ: Amɛkɛ kpãi ŋmɔlɔ taoi enyɔ ni aŋmala kpee lɛ he saji yɛ nɔ lɛ abiɛ kɛ biɛ ni amɛtsotsoro yɛ amɛhiɛ kɛ amɛsɛɛ. Gbɛ nɛɛ nɔ Odasefoi  tsɔ amɛtswa amɛkpeei wuji ahe adafi kɛjɛ afi 1936 kɛbaa.

Magazin ko ni atsɛɔ lɛ La Nación lɛ wie bɔ ni ta ni afã yɛ Mexico City lɛ ye omanye ehã lɛ he akɛ: “Yɛ [kpee lɛ] klɛŋklɛŋ gbi lɛ nɔ lɛ, akɛɛ [Odasefoi lɛ] akɛ amɛyafɔ̃ mɛi babaoo nine kɛba. Enɔ jetsɛremɔ lɛ, mɛi ba aahu akɛ amɛhooo he ni afeɔ kpee lɛ yɛ lɛ.” Enɛ eyaŋɔɔɔ Katolik Sɔlemɔ lɛ naa kwraa. No hewɔ lɛ, amɛte shi amɛwo Odasefoi lɛ. Shi nyɛmimɛi lɛ hãaa enɛ aje amɛnijiaŋ wui. Amɛtee nɔ amɛtswa kpee lɛ he adafi. La Nación magazin lɛ wie kɛfata he akɛ: “Maŋ muu lɛ fɛɛ na amɛ [ni ji Odasefoi hii kɛ yei fɛɛ], ni amɛtsotsoro taoi kɛmiitswa [amɛkpee lɛ] he adafi.” Akɛ nyɛmimɛi lɛ ahe mfoniri ko ni asha ni amɛdamɔ Mexico City gbɛjegbɛi lɛ ahe wo magazin lɛ mli, ni aŋma yɛ shishi akɛ: “Amɛhe gbɛjegbɛi lɛ yɛ wɔdɛŋ.”

Nakai afii lɛ amli lɛ, Odasefoi babaoo kɛ nibii pii shã afɔle koni amɛnyɛ amɛya kpeei wuji enyɔoo ko ni afee yɛ Mexico lɛ. Nyɛmimɛi lɛ ateŋ mɛi pii jɛ akrowai ni yɔɔ shɔŋŋshɔŋŋ amɛba kpeei lɛ. Amɛteŋ mɛi komɛi yɛ ni hei ni amɛjɛ lɛ, lɔlei loo oketekei eyaaa jɛmɛ. No hewɔ lɛ, amɛtara tejii anɔ loo amɛnyiɛ gbii abɔ dani amɛná oketekei kɛtee hei ni afeɔ kpeei lɛ yɛ lɛ.

No beiaŋ lɛ, nyɛmimɛi lɛ ateŋ mɛi pii miiye ohia aahu akɛ, ekpakpa ko dani amɛnáa shika kɛfoɔ tsɔne kɛyaa kpeei lɛ ashishi. Amɛteŋ mɛi pii yɛ ni kɛ́ amɛyashɛ lɛ, amɛyatoɔ Odasefoi ni yɔɔ hei ni afeɔ kpeei lɛ yɛ lɛ aŋɔɔ. Nyɛmimɛi nɛɛ jɛ suɔmɔ mli amɛhere gbɛfalɔi lɛ atuu kɛba amɛshĩai amli. Gbɛfãlɔi lɛ ekomɛi hu wɔ Maŋtsɛyeli Asai anɔ. Be ko lɛ, nyɛmimɛi aaafee 90 yato nitsumɔhe nine lɛ, ni ahã amɛteŋ mɔ fɛɛ mɔ wolo adekai 20 koni eto ni ekã nɔ. Be ni abɔɔ enɛ he amaniɛ yɛ Yearbook lɛ mli lɛ, awie akɛ nyɛmimɛi lɛ ahiɛ sɔ gbɛjianɔ ni ato ahã amɛ lɛ waa, ejaakɛ ehi kwraa fe ni amɛbaakãmɔ shikpɔŋ.

Ŋwanejee ko bɛ he akɛ, nyɛmimɛi nɛɛ ahiɛ sɔ hegbɛ ni amɛná akɛ amɛkɛ amɛnyɛmimɛi Kristofoi lɛ baakpe kɛ miishɛɛ lɛ waa, ni no hewɔ amɛfee bɔ fɛɛ bɔ ni amɛbaanyɛ koni ekaŋmɛɛ amɛ lɛ. Ŋmɛnɛ lɛ, Odasefoi aaafee akpei akpe kome ni yɔɔ Mexico, ni tamɔ bɔ ni eji yɛ nyɛmimɛi ni tsɔ amɛhiɛ lɛ agbɛfaŋ lɛ, amɛ hu amɛhiɛ sɔɔ wɔkpeei srɔtoi lɛ. * Yɛ afi 1949 amaniɛbɔɔ ni Mexico nitsumɔhe nine lɛ kɛmaje lɛ mli lɛ, amɛwie yɛ nyɛmimɛi ni yɔɔ jɛmɛ lɛ ahe akɛ: “Naagbai ni mli wala ni amɛkɛkpeɔ lɛ hãaa amɛnijiaŋ aje wui. Nɔ hewɔ ni wɔkɛɔ nakai ji akɛ, nyɛmimɛi lɛ yaa nɔ amɛgbaa kpee fɛɛ kpee ni amɛbaaya lɛ he sane gbii pii, ni sane ni amɛfɔɔ bimɔ ji, Mɛɛ be wɔbaaya kpee ekoŋŋ?”​—Ajie kɛjɛ wɔnitoohe ni yɔɔ Central America lɛ.