1, 2. Mɛɛ gbɛ nɔ Romabii 5:12 lɛ baanyɛ aye abua wɔ?

EJI akɛɛ otsɛ ŋmalɛi komɛi ni Yehowa Odasefoi le jogbaŋŋ ni amɛkɛfɔɔ nitsumɔ kulɛ, ekolɛ Romabii 5:12 lɛ baafata klɛŋklɛŋ ŋmalɛi ni obaatsɛ lɛ ahe. Ŋmalɛ nɛɛ kɛɔ akɛ: “Enɛ hewɔ lɛ, bɔ ni gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” Ekã shi faŋŋ akɛ, okɛ ŋmalɛ nɛɛ mli wiemɔi lɛ etsu nii shii abɔ.

² Ŋmalɛ nɛɛ jeɔ kpo shii abɔ yɛ Mɛni Biblia lɛ Tsɔɔ Diɛŋtsɛ? wolo lɛ mli. Kɛ́ okɛ obii lɛ loo mɛi krokomɛi miikase wolo nɛɛ yitso 3, 5, kɛ 6 lɛ, ekolɛ nyɛbaakane Romabii 5:12 lɛ, koni amɛna nɔ hewɔ ni shikpɔŋ lɛ jeee paradeiso, nɔ hewɔ ni kpɔmɔnɔ lɛ he miihia wɔ, kɛ nɔ hewɔ ni adesai gboiɔ. Shi ani ole akɛ ŋmalɛ nɛɛ baanyɛ aye abua wɔ yɛ gbɛi krokomɛi hu anɔ? Ebaanyɛ eye ebua wɔ ni wɔhiɛ asɔ wekukpaa ni yɔɔ wɔ kɛ Yehowa teŋ lɛ, wɔhã wɔfai shi ni wɔtswa akɛ wɔbaafee esuɔmɔnaa nii lɛ mli awa, ni wɔmɔ wɔhiɛnɔkamɔ lɛ mli kpɛŋŋ.

3. Mɛni wɔfeɔ daa gbi? Ni mɛni hewɔ?

³ Mɔbɔ sane ji akɛ, wɔ fɛɛ lɛ, eshafeelɔi ji wɔ. Wɔtɔ̃ɔ daa gbi. Shi Nyɔŋmɔ naa wɔ mɔbɔ, ejaakɛ ekaiɔ akɛ sũ kɛkɛ ji wɔ.  (Lala 103:13, 14) Yɛ sɔlemɔ he nɔkwɛmɔnɔ lɛ mli lɛ, Yesu kɛɛ wɔkpa Nyɔŋmɔ fai ni ekɛ “wɔhe eshai afa wɔ.” (Luka 11:2-4) Kɛ́ Nyɔŋmɔ kɛ wɔhe eshai fa wɔ lɛ, esaaa akɛ wɔyaa nɔ wɔbuɔ wɔhe fɔ. Kɛ̃lɛ, sɛɛnamɔ yɛ he akɛ wɔbaasusu nɔ hewɔ ni Yehowa kɛ wɔhe eshai lɛ fa wɔ kɛ gbɛ ni etsɔ nɔ efee nakai lɛ he.

4, 5. (a) Mɛni baaye abua wɔ ni wɔnu Romabii 5:12 lɛ shishi jogbaŋŋ? (b) Te obaatsɔɔ wiemɔ ni ji “duromɔ” ni akɛtsu nii yɛ Romabii 3:24 lɛ mli ohã tɛŋŋ?

⁴ Saji krokomɛi ni bɔfo Paulo wie yɛ Romabii awolo lɛ mli, titri lɛ yɛ yitso 6 lɛ, yeɔ ebuaa wɔ ni wɔnuɔ nɔ ni ewie yɛ Romabii 5:12 lɛ shishi jogbaŋŋ. Kɛ́ wɔnu ŋmalɛ nɛɛ shishi jogbaŋŋ lɛ, ebaaye ebua wɔ ni wɔle nɔ hewɔ ni Yehowa kɛ eshai faa kɛ gbɛ ni etsɔɔ nɔ efeɔ nakai. Romabii yitso 3 lɛ hãa wɔleɔ akɛ, “mɛi fɛɛ efee esha . . . , ni eji duromɔ keenɔ akɛ abuɔ amɛ jalɔi yɛ eduromɔ lɛ [ni ji Yehowa duromɔ lɛ] naa, kɛtsɔ kpɔ̃ ni atsɔ kpɔmɔnɔ ni Kristo Yesu wo lɛ nɔ akpɔ̃ amɛ lɛ nɔ.” (Rom. 3:23, 24) Niiamlitaomɔ wolo ko wie akɛ, Hela wiemɔ ni Paulo kɛtsu nii yɛ ŋmalɛ nɛɛ mli, ni atsɔɔ shishi akɛ “duromɔ” lɛ baanyɛ atsɔɔ “ejurɔ ko ni ajɛ suɔmɔ mli afee mɔ ko, ni akpaaa gbɛ akɛ mɔ lɛ baafee nɔ ko kɛto najiaŋ.” Eji nɔ ko ni mɔ lɛ gboko he deŋme, ni asaŋ, esaaa lɛ.

⁵ Woloŋlelɔ ko ni atsɛɔ lɛ John Parkhurst lɛ wie akɛ: “Kɛ́ akɛ [Hela wiemɔ nɛɛ] tsu nii ahã Nyɔŋmɔ loo Kristo lɛ, bei pii lɛ, ekɔɔ amɛsuɔmɔ mli ni amɛjɛ amɛkpɔ̃ adesai loo amɛhere amɛyiwala yɛ amɛduromɔ loo mlihilɛ lɛ naa lɛ he.” No hewɔ lɛ, eja gbɛ akɛ atsɔɔ Hela wiemɔ nɛɛ shishi akɛ “duromɔ” yɛ Kristofoi A-Hela Ŋmalɛi​—Jeŋ Hee Shishitsɔɔmɔ lɛ mli. Shi mɛɛ gbɛ nɔ Nyɔŋmɔ tsɔ ejie mlihilɛ kpele ni tamɔ nɛkɛ kpo etsɔɔ wɔ? Ni mɛɛ gbɛ nɔ ebaanyɛ esa wekukpaa ni yɔɔ wɔ kɛ lɛ teŋ lɛ, kɛ wɔhiɛnɔkamɔ lɛ he? Nyɛhãa wɔkwɛa.

6. Namɛi baanyɛ aná Nyɔŋmɔ duromɔ lɛ he sɛɛ? Ni mɛɛ hiɛnɔkamɔ enɛ baanyɛ ahã amɛná?

⁶ “Gbɔmɔ kome” lɛ ni atsĩ etã yɛ Romabii 5:12 lɛ ji Adam. Lɛ enɔ esha kɛ gbele “tsɔ kɛba je lɛ mli.” Esha ni Adam fee lɛ hewɔ lɛ, gbele tsɔ enɔ ‘eye maŋtsɛ.’ Shi Nyɔŋmɔ “duromɔ ní fa kɛteke nɔ lɛ” hewɔ lɛ, etsɔ “mɔ kome,” ni ji Yesu Kristo nɔ ekpɔ̃ adesai fɛɛ. (Rom. 5:12, 15, 17) Biblia lɛ kɛɔ akɛ: “Gbɔmɔ kome lɛ toiboo lɛ baahã mɛi pii atsɔmɔ jalɔi.” Mɛi nɛɛ baanyɛ aná hiɛnɔkamɔ akɛ amɛbaaná “naanɔ wala” kɛtsɔ Yesu Kristo nɔ.​—Rom. 5:19, 21.

7. Mɛni hewɔ wɔbaanyɛ wɔkɛɛ akɛ kpɔmɔnɔ lɛ ji duromɔ kpele lɛ?

⁷ Yehowa jie mlihilɛ kpele kpo akɛ ehã e-Bi lɛ bagbo kɛkpɔ̃ wɔ, ejaakɛ nɔ ko fĩii enɔ akɛ efee nakai. Nikeenii ni nɔ bɛ nɛɛ esaaa wɔ, ejaakɛ wɔyeee emuu ni wɔfeɔ esha. No hewɔ lɛ, nɔ ni Nyɔŋmɔ kɛ Yesu fee amɛhã wɔ lɛ ji duromɔ kpele. Kpɔmɔnɔ lɛ hewɔ lɛ, Nyɔŋmɔ nyɛɔ ekɛ wɔhe eshai keɔ wɔ, ni wɔyɛ hiɛnɔkamɔ akɛ wɔbaahi shi kɛya naanɔ. Esa akɛ wɔhiɛ asɔ nɔ ni amɛfee amɛhã wɔ lɛ waa, ni wɔhã esa nɔ fɛɛ nɔ ni wɔfeɔ yɛ shihilɛ mli lɛ he.

8. Mɛɛ susumɔ ni ejaaa esa akɛ wɔkwɛ wɔhe nɔ jogbaŋŋ yɛ he?

⁸ Adam seshibii ji wɔ. Enɛ hewɔ lɛ, wɔyeee emuu, ni ewaaa akɛ wɔbaafee eshai; eshai bibii kɛ nɔ ni yɔɔ hiɛdɔɔ fɛɛ. Shi wɔle akɛ, Yehowa duromɔ lɛ hewɔ lɛ, ekɛ wɔhe eshai fɛɛ baafa wɔ. Kɛ̃lɛ, esaaa akɛ wɔkɛ enɛ jieɔ wɔnaa kɛfeɔ nibii gbohii. Mɔbɔ sane ji akɛ, Kristofoi komɛi ni hi  shi yɛ klɛŋklɛŋ afii 100 lɛ mli, be ni bɔfoi lɛ ateŋ mɛi komɛi yɔɔ wala mli lolo lɛ po ná jwɛŋmɔ gbonyo nɛɛ. (Kanemɔ Yuda 4.) Ŋmɛnɛ lɛ, esa akɛ wɔkwɛ wɔhe nɔ jogbaŋŋ koni mɛi akadu susumɔ ni ejaaa nɛɛ amɛwo wɔjwɛŋmɔ mli ni ená wɔnɔ hewalɛ.

9, 10. Mɛɛ gbɛ nɔ Paulo kɛ mɛi krokomɛi ye amɛhe kɛjɛ esha kɛ gbele nyɔŋyeli mli?

⁹ Esaaa akɛ wɔnáa jwɛŋmɔ lɛ akɛ, akɛni Nyɔŋmɔ kɛ eshai faa hewɔ lɛ, wɔbaanyɛ wɔya nɔ wɔfee esha. Paulo hã enɛ fee faŋŋ. Ekɛɛ enyɛmimɛi Kristofoi lɛ akɛ: “Wɔgboi yɛ esha gbɛfaŋ.” (Kanemɔ Romabii 6:1, 2.) Mɛni hewɔ ewie akɛ ‘amɛgboi yɛ esha gbɛfaŋ,’ be mli ni amɛyɔɔ wala mli lolo yɛ shikpɔŋ nɛɛ nɔ lɛ?

¹⁰ Yesu kpɔmɔ afɔleshaa lɛ hewɔ lɛ, Yehowa kɛ Paulo kɛ mɛi krokomɛi ni hi shi yɛ ebeiaŋ lɛ ahe eshai fa amɛ, efɔ amɛ mu kɛ mumɔ krɔŋkrɔŋ lɛ, ni eŋɔ amɛ akɛ ebii. Amɛná hiɛnɔkamɔ akɛ, kɛji amɛtee nɔ amɛye Yehowa anɔkwa lɛ, amɛbaahi ŋwɛi ni amɛkɛ Kristo baaye maŋtsɛ. Shi be ni amɛyɔɔ wala mli lolo yɛ shikpɔŋ lɛ nɔ lɛ, Paulo wie akɛ ‘amɛgboi yɛ esha gbɛfaŋ.’ Mɛni hewɔ? Paulo kɛ Yesu gbele lɛ kɛ eshitee lɛ fee nɔkwɛmɔnɔ kɛgbala sane nɛɛ mli. Ewie akɛ be ni Yesu gbo ni atee lɛ shi kɛtee ŋwɛi akɛ mumɔŋ bɔɔnɔ ni nyɛŋ agbo lɛ, gbele náaa enɔ hewalɛ dɔŋŋ. Nakai nɔŋŋ eji yɛ Kristofoi ni afɔ amɛ mu lɛ agbɛfaŋ. Amɛhãaa esha he akɔnɔi aye amɛnɔ dɔŋŋ. Moŋ lɛ, amɛmiaa amɛhiɛ waa amɛfeɔ nɔ ni Yehowa sumɔɔ. Amɛtsakeɔ amɛjeŋba kwraa. Enɛ hewɔ Paulo wie akɛ ‘amɛgboi yɛ esha gbɛfaŋ, shi amɛhiɛ kamɔ hã Nyɔŋmɔ yɛ Kristo Yesu mli’ lɛ.​—Rom. 6:9, 11.

11. Mɛɛ gbɛ nɔ Kristofoi ni yɔɔ ŋmɛnɛ lɛ hu ‘egboi yɛ esha gbɛfaŋ’?

¹¹ Ni wɔ hu? Ekolɛ, dani wɔbatsɔmɔ Kristofoi lɛ, wɔ hu wɔfeɔ eshai. Eeenyɛ efee po akɛ, nibii komɛi yɛ ni no mli lɛ wɔfeɔ shi wɔleee akɛ Nyɔŋmɔ hiɛ lɛ esha ni. No mli lɛ, wɔtamɔ “nyɔji” kɛhã “muji nii kɛ mlatɔmɔ.” Wɔji “esha nyɔji.” (Rom. 6:19, 20) Shi be ni akɛ wɔ kase Biblia lɛ, wɔbale anɔkwale lɛ, wɔtsake wɔjeŋba, wɔjɔɔ wɔhe nɔ wɔhã Nyɔŋmɔ, ni abaptisi wɔ. Kɛjɛ nakai be lɛ kɛbaa lɛ, wɔmii shɛɔ he waa akɛ ‘wɔbaajɛ wɔtsuiŋ’ wɔbo nibii ni Nyɔŋmɔ tsɔɔ wɔ lɛ toi ni wɔye emlai kɛ eshishitoo mlai lɛ anɔ. ‘Wɔye wɔhe kɛjɛ esha dɛŋ,’ ni ‘wɔbatsɔmɔ jalɛ nyɔji.’ (Rom. 6:17, 18) Yɛ gbɛ ko nɔ lɛ, wɔ hu ‘wɔgboi yɛ esha gbɛfaŋ.’

12. Mɛni Paulo wiemɔ ni yɔɔ Romabii 6:12 lɛ tsɔɔ?

¹² Agbɛnɛ, susumɔ wiemɔi ni nyiɛ sɛɛ nɛɛ ni Paulo wie lɛ ahe okwɛ. Ewie akɛ: “Nyɛkahãa esha yaa nɔ eyeɔ maŋtsɛ yɛ nyɛgbɔmɔtsei ni baagboi lɛ amli ní nyɛbo nyɛgbɔmɔtsei lɛ akɔnɔi lɛ atoi.” (Rom. 6:12) Paulo kɛɛ ‘wɔkahã esha tee nɔ eye wɔnɔ,’ ni tsɔɔ akɛ, kɛji esha baaya nɔ aye wɔnɔ maŋtsɛ jio, efeŋ nakai jio lɛ, fɛɛ damɔ wɔ diɛŋtsɛ wɔnɔ. No hewɔ lɛ, bi ohe akɛ: ‘Kɛ́ minu he yɛ mitsui mli akɛ mifee nɔ ko ni ejaaa lɛ, ani mijieɔ nakai akɔnɔ fɔŋ lɛ yɛ mitsui mli amrɔ nɔŋŋ, aloo miyaa nɔ mijwɛŋɔ nɔ aahu kɛyashi mayafee?’ Kɛ́ wɔhiɛ sɔɔ Nyɔŋmɔ duromɔ lɛ waa lɛ, wɔbaamia wɔhiɛ waa wɔfee nibii ni sa ehiɛ.

13. Mɛni hãa wɔnáa nɔmimaa akɛ, wɔbaanyɛ wɔye esha nɔ kunim?

¹³ Nyɛmimɛi ni hi shi yɛ blema Korinto asafo lɛ mli lɛ ateŋ mɛi komɛi yɛ ni dani amɛbatsɔmɔ Kristofoi lɛ, no mli lɛ amɛji amagajalɔi, gbalafitelɔi, hii ni kɛ hii krokomɛi náa bɔlɛ, julɔi, kɛ dãatɔlɔi. Shi be ni atsɔɔ amɛ Yehowa he nii, ni amɛbasumɔ lɛ lɛ, amɛtsake amɛjeŋba. Anɔkwa,  yibii ni amɛwoɔ tsutsu lɛ fee amɛ hiɛgbele po. Amɛbana faŋŋ akɛ, eji amɛtsakeee amɛjeŋba kulɛ, amɛhiɛ baakpãtã. (Rom. 6:21; 1 Kor. 6:9-11) Eeenyɛ efee akɛ, ehe bahia ni nyɛmimɛi ni yɔɔ Roma asafo lɛ mli lɛ hu afee tsakemɔi yɛ amɛshihilɛ mli. Paulo kɛɛ amɛ akɛ: “Nyɛkayaa nɔ nyɛŋɔa nyɛgbɔmɔtsei lɛ nyɛhãa esha akɛ nii ni ejaaa lɛ atawuu nii, shi nyɛŋɔa nyɛhe nyɛhãa Nyɔŋmɔ akɛ mɛi ni hiɛ etsɛ̃ kɛjɛ gbohii ateŋ, ni agbɛnɛ hu, nyɛŋɔa nyɛgbɔmɔtsei lɛ nyɛhãa Nyɔŋmɔ akɛ jalɛ tawuu nii.” (Rom. 6:13) Paulo ná nɔmimaa akɛ, amɛbaanyɛ amɛya nɔ amɛtsi amɛhe kɛje efɔŋ he, koni amɛya nɔ amɛná Nyɔŋmɔ duromɔ lɛ he sɛɛ.

14, 15. Kɛ́ wɔmiitao wɔle kɛji wɔmiijɛ wɔtsui mli wɔmiibo Nyɔŋmɔ toi lɛ, mɛni esa akɛ wɔbi wɔhe?

¹⁴ Ŋmɛnɛ lɛ, nyɛmimɛi komɛi yɛ ni be ko ni eho lɛ, amɛbaa amɛjeŋ tamɔ blema Korintobii lɛ nɔŋŋ. Shi amɛ hu amɛtsake. Amɛkwa nibii gbohii ni amɛfeɔ lɛ, ni ‘aju amɛhe ni amɛhe etse.’ Wɔteŋ mɔ fɛɛ mɔ fee tsakemɔ ko kɛ̃ yɛ eshihilɛ mli dani ebatsɔ Yehowa tsulɔ. No hewɔ lɛ, bi ohe akɛ, ‘Ani miiya nɔ miihi shi bɔ ni sa Nyɔŋmɔ hiɛ? Amrɔ nɛɛ ni Nyɔŋmɔ duromɔ naa lɛ, ekɛ mihe eshai efa mi lɛ, ani mitswa mifai shi akɛ, mafee nɔ ni esumɔɔ be fɛɛ be, ni miŋɔŋ migbɔmɔtso lɛ mihaŋ esha dɔŋŋ?’

¹⁵ Ekã shi faŋŋ akɛ, dani wɔbaanyɛ wɔsa Nyɔŋmɔ hiɛ lɛ, esa akɛ wɔbɔ mɔdɛŋ fɛɛ ni wɔbaanyɛ ni wɔtsi wɔhe kɛje eshai ni yɔɔ hiɛdɔɔ ni mɛi ni yɔɔ Korinto lɛ fee be ko ni eho lɛ ahe. Ja wɔfee nakai dani wɔbaanyɛ wɔwie akɛ wɔkpɛlɛ Nyɔŋmɔ duromɔ lɛ nɔ ni ‘esha yeee wɔnɔ nuŋtsɔ.’ Shi kɛfata he lɛ, esa akɛ wɔjɛ wɔtsui mli wɔbo Nyɔŋmɔ toi. No hewɔ lɛ, bi ohe akɛ, ‘Ani mitswa mifai shi akɛ, mafee bɔ fɛɛ bɔ ni manyɛ koni mikafee eshai ni mɛi komɛi enaaa lɛ nɔ ko tsɔ lɛ po?’​—Rom. 6:14, 17.

16. Mɛni hãa wɔnaa akɛ jeee eshai ni atsĩtsĩi tã yɛ 1 Korintobii 6:9-11 lɛ pɛ esa akɛ wɔmia wɔhiɛ waa akɛ wɔfeŋ?

¹⁶ Susumɔ bɔfo Paulo he okwɛ. Wɔle akɛ Paulo efeee eshai ni yɔɔ hiɛdɔɔ ni atsĩtsĩi tã yɛ 1 Korintobii 6:9-11 lɛ. Kɛ̃lɛ, nibii komɛi yɛ ni efee ni ebu nomɛi hu akɛ eshai. Ewie akɛ: “Heloŋ gbɔmɔ ji mi, ni ahɔ̃ɔ mi awo esha shishi. Ejaakɛ minuuu nɔ ni mifeɔ lɛ shishi. Ejaakɛ nɔ ni misumɔɔ lɛ, jeee no mifeɔ, shi nɔ ni minyɛɔ lɛ, no moŋ mifeɔ.” (Rom. 7:14, 15) Paulo mia ehiɛ koni eye sui gbohii nɛɛ hu anɔ. (Kanemɔ Romabii 7:21-23.) Nyɛhãa wɔkasea lɛ, ni wɔmia wɔhiɛ waa ‘wɔbo Yehowa toi kɛ wɔtsui fɛɛ.’

17. Mɛni hewɔ oosumɔ ni oye anɔkwa lɛ?

¹⁷ Akɛ nɔkwɛmɔnɔ lɛ, wɔle akɛ Yehowa miikpa gbɛ akɛ wɔye anɔkwa, no hewɔ lɛ, wɔmaleee. (Kanemɔ Abɛi 14:5; Efesobii 4:25.) Wɔsumɔŋ ni wɔkase Satan, ni ji “malemɔ tsɛ lɛ,” loo Anania kɛ eŋa lɛ, ni gboi be ni amɛmale lɛ. (Yoh. 8:44; Bɔf. 5:1-11) Shi ani no pɛ kɛkɛ fa? Dabida. Kɛ́ wɔhiɛ sɔɔ Nyɔŋmɔ duromɔ lɛ, nɔ kroko hu yɛ ni wɔfeŋ.

18, 19. Yɛ malemɔ sɛɛ lɛ, mɛni hu kɛ́ wɔfee lɛ, ebaatsɔɔ akɛ wɔyeee anɔkwa?

¹⁸ Kɛ́ mɔ ko wie nɔ ko ni bɛ mli lɛ, emale. Eyeee anɔkwa. Ni kɛ́ nɔ ni mɔ lɛ wieɔ lɛ yɛ mli, shi ewie lɛ bɔ ni baahã mɛi amu sane naa yɛ gbɛ ni ejaaa nɔ hu? No hu eyeee anɔkwa, ejaakɛ elaka amɛ. Sane ko ni Yehowa kɛɛ Israelbii lɛ hãa wɔnaa enɛ faŋŋ. Ekɛɛ amɛ akɛ: “Nyɛfea nyɛhe krɔŋkrɔŋ, ejaakɛ mi, Yehowa, nyɛ-Nyɔŋmɔ lɛ, mɔ krɔŋkrɔŋ ji mi.” Kɛkɛ ni etsɔɔ amɛ nibii komɛi ni baahã amɛfee krɔŋkrɔŋ. Ekɛɛ amɛ akɛ: “Kaaju, kaashishiu onaanyo gbɔmɔ, kaalaka lɛ.”​—3 Mose 19:2, 11, Ga Biblia hee.

 ¹⁹ Akɛ nɔkwɛmɔnɔ lɛ, ŋɔɔ lɛ akɛ nuu ko miitao ekɛ eweku lɛ ayashara shi yɛ ŋshɔ lɛ naa. No hewɔ lɛ, gbi ni enɔ jetsɛremɔ lɛ amɛbaaya lɛ, ekɛɛ enitsumɔtsɛ lɛ kɛ mɛi ni ekɛtsuɔ nii akɛ ebaŋ nitsumɔ. Shi yɛ nɔ najiaŋ ni ebaakɛɛ amɛ nɔ tuuntu hewɔ ni ebaŋ lɛ, ekɛɛ amɛ akɛ ebaaya helatsamɔhe lɛ. No hewɔ lɛ, enɔ jetsɛremɔ lɛ, eyatsɔ helatsamɔhe lɛ shwiaa eyahe tsofai, kɛkɛ ni eyawo eweku lɛ ni amɛtee ŋshɔ lɛ naa. Eyɛ mli akɛ nuu lɛ ná etee helatsamɔhe lɛ moŋ, shi ani anɔkwale lɛ ewie lɛ? Dabi. Ekolɛ ole gbɛi krokomɛi ni mɛi tsɔɔ nɔ amɛlakaa mɛi koni amɛnine ashɛ nɔ ko ni amɛtaoɔ lɛ nɔ loo amɛjo toigbalamɔ naa foi. Kɛ́ wɔ hu wɔfee nibii ni tamɔ nakai lɛ, wɔmiigbo Nyɔŋmɔ nɔ toi. Biblia lɛ woɔ wɔ hewalɛ ni wɔfee nɔ ni ja yɛ Yehowa hiɛ koni wɔya nɔ wɔfee krɔŋkrɔŋ.​—Romabii 6:19.

20, 21. Kɛ́ wɔhiɛ sɔɔ Nyɔŋmɔ duromɔ lɛ, mɛni wɔbaafee?

²⁰ Oti ni yɔɔ sane lɛ fɛɛ mli ji akɛ, kɛ́ wɔhiɛ sɔɔ Nyɔŋmɔ duromɔ lɛ lɛɛlɛŋ lɛ, jeee gbalafitemɔ, dãatɔɔ, kɛ eshai krokomɛi ni yɔɔ hiɛdɔɔ lɛ pɛ ahe wɔbaatsi wɔhe kɛje, shi moŋ wɔbaatsi wɔhe kɛje nibii krokomɛi fɛɛ ni esaaa Yehowa hiɛ lɛ ahe. Akɛ nɔkwɛmɔnɔ lɛ, jeee bɔlɛnamɔ jeŋba sha pɛ he wɔbaatsi wɔhe kɛje, shi moŋ wɔbaakwa hiɛtserɛjiemɔi fɛɛ ni teɔ bɔlɛnamɔ akɔnɔi ashi lɛ hu. Agbɛnɛ hu, jeee dãatɔɔ pɛ wɔbaakwa, shi moŋ wɔnuŋ dãa kɛyashi he ni wɔbaana akɛ wɔmiihe wɔtɔ dani wɔkpa. Ekolɛ wɔnáŋ lɛ mlɛo akɛ wɔbaawu wɔshi sui gbohii nɛɛ, shi kɛ́ wɔmia wɔhiɛ waa lɛ, wɔbaaye kunim.

²¹ Esa akɛ efee oti ni ma wɔhiɛ akɛ, jeee eshai ni yɔɔ hiɛdɔɔ waa lɛ pɛ ahe wɔbaatsi wɔhe kɛje, shi moŋ wɔbaatsi wɔhe kɛje eshai bibii hu ahe. Wɔyeee emuu, no hewɔ lɛ, wɔbaafee esha kɛ̃. Kɛ̃lɛ, esa akɛ wɔmia wɔhiɛ wɔwu wɔshi esha, tamɔ bɔ ni Paulo fee lɛ. Ewo enyɛmimɛi Kristofoi lɛ hewalɛ akɛ: “Nyɛkahãa esha yaa nɔ eyeɔ maŋtsɛ yɛ nyɛgbɔmɔtsei ni baagboi lɛ amli ní nyɛbo nyɛgbɔmɔtsei lɛ akɔnɔi lɛ atoi.” (Rom. 6:12; 7:18-20) Kɛ́ wɔtee nɔ wɔwu wɔshi esha fɛɛ esha lɛ, no baatsɔɔ lɛɛlɛŋ akɛ wɔhiɛ sɔɔ Nyɔŋmɔ duromɔ lɛ ni etsɔ Kristo nɔ ekɛhã lɛ.

22. Mɛni mɛi fɛɛ ni kɛ amɛnifeemɔ tsɔɔ akɛ amɛhiɛ sɔɔ Nyɔŋmɔ duromɔ lɛ lɛɛlɛŋ lɛ baaná wɔsɛɛ?

²² Nyɔŋmɔ duromɔ lɛ hewɔ lɛ, ekɛ wɔhe eshai lɛ eke wɔ, ni ebaaya nɔ efee nakai. Wɔhiɛ sɔɔ enɛ waa. Belɛ, nyɛhãa wɔmiaa wɔhiɛ waa akɛ wɔfeŋ eshai ni mɛi buɔ akɛ ejeee nɔ ko lɛ po. Paulo tsɔɔ juromɔnɔ ni wɔbaaná wɔsɛɛ kɛji wɔtee nɔ wɔfee nakai, ewie akɛ: “Amrɔ nɛɛ ní ahã nyɛye nyɛhe kɛjɛ esha dɛŋ ni nyɛtsɔmɔ Nyɔŋmɔ nyɔji nɛɛ, nyɛmiiwo nyɛyibii yɛ krɔŋkrɔŋfeemɔ gbɛ nɔ, ni enaagbee ji naanɔ wala.”​—Rom. 6:22.