1, 2. (a) Mɛni hewɔ esaaa akɛ efeɔ wɔ naakpɛɛ akɛ bei komɛi lɛ wɔfeɔ yeyeeye lɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni he wɔbaasusu yɛ nikasemɔ nɛɛ mli?

SATAN ABONSAM mli efu waa, ni enyiɛ “tamɔ jata ni miihũu, ni eetao mɔ ko emi.” (1 Pet. 5:8; Kpoj. 12:17) Enɛ hewɔ lɛ, ŋmɛnɛ lɛ, je lɛ mli eyi tɔ kɛ naagbai ni baanyɛ ahã Nyɔŋmɔ tsuji po afee yeyeeye. Nyɔŋmɔ tsuji anɔkwafoi tamɔ Maŋtsɛ David kɛ mɛi krokomɛi ni hi shi yɛ blema lɛ hu fee yeyeeye bei komɛi. (Lala 13:3) Bɔfo Paulo ‘fee yeyeeye yɛ asafoi lɛ fɛɛ ahe.’ (2 Kor. 11:28) No hewɔ lɛ, kɛ́ naagbai su wɔtsui ni wɔfee yeyeeye lɛ, mɛni baaye abua wɔ?

² Yehowa, wɔ-Tsɛ ni yɔɔ suɔmɔ lɛ, ye ebua etsuji ni hi shi yɛ blema ni fee yeyeeye lɛ, ni eesumɔ ni efee nakai nɔŋŋ ehã wɔ ŋmɛnɛ. Biblia lɛ woɔ wɔ hewalɛ ni ‘wɔshɛrɛ wɔyeyeeyefeemɔi loo wɔgbeyeishemɔi kɛ wɔnaagbai lɛ fɛɛ wɔshwie Yehowa nɔ, ejaakɛ esusuɔ wɔhe.’ (1 Pet. 5:7, sh. niŋ.) Mɛni baaye abua wɔ ni wɔkaye wɔtsui tuutu? Nibii ejwɛ ni nyiɛ sɛɛ nɛɛ baanyɛ aye abua wɔ: (1) Wɔbaanyɛ wɔsɔle, (2) wɔkane Nyɔŋmɔ Wiemɔ lɛ ni wɔjwɛŋ nɔ, (3) wɔhã Yehowa mumɔ krɔŋkrɔŋ lɛ aye abua wɔ, kɛ (4) wɔkɛ wɔnaanyo ko ni bɛŋkɛ wɔ waa lɛ agba wɔnaagba lɛ he sane. Be ni wɔsusuɔ otii ejwɛ nɛɛ ahe lɛ, kwɛmɔ bɔ  ni obaafee okɛ amɛ atsu nii jogbaŋŋ fe bɔ ni ofeɔ bianɛ lɛ po.

3. Mɛɛ gbɛ nɔ obaanyɛ otsɔ oshɛ “ojatsu lɛ ofɔ̃ Yehowa nɔ”?

³ Kɛ́ naagba ko miihao wɔ ni ehã wɔfee yeyeeye lɛ, nɔ klɛŋklɛŋ ni wɔbaanyɛ wɔfee ji, ni wɔbaajɛ wɔtsuiŋ wɔsɔle ni wɔkɛ sane lɛ fɛɛ afɔ̃ wɔ-Tsɛ ni yɔɔ ŋwɛi lɛ hiɛ. David fo lala ko, ni yɛ lala lɛ mli lɛ ekpa Yehowa fai akɛ: “Nyɔŋmɔ, feemɔ toi ohã misɔlemɔ lɛ.” Yɛ nakai lala lɛ nɔŋŋ mli lɛ, ewie akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli.” (Lala 55:2, 23) No hewɔ lɛ, yɛ nɔ najiaŋ ni obaaye otsui yɛ naagba ko ni obɔ he mɔdɛŋ aahu shi eyaaa lɛ he lɛ, jɛɛ otsuiŋ osɔle yɛ he. Shi mɛɛ gbɛ nɔ sɔlemɔ baanyɛ aye abua bo ni okaye otsui fe nine?​—Lala 94:18, 19.

4. Kɛ́ wɔfee yeyeeye lɛ, mɛni hewɔ ehe miihia ni wɔsɔle?

⁴ Kanemɔ Filipibii 4:6, 7. Kɛ́ wɔjɛ wɔtsuiŋ wɔsɔle daa lɛ, Yehowa baabo wɔ toi ni ehã wɔsɔlemɔi lɛ ahetoo. Yɛ mɛɛ gbɛ nɔ? Ebaahã wɔjwɛŋmɔŋ akã wɔ shi, ni wɔtsui aŋmɛ dɛmm koni wɔkahao. Nyɛmimɛi pii ená enɛ mli niiashikpamɔ. Be ni amɛsɔle yɛ amɛnaagbai lɛ ahe lɛ, “Nyɔŋmɔ toiŋjɔlɛ ni fe niiashishinumɔi fɛɛ lɛ” bu amɛtsuii ahe koni amɛkafee yeyeeye tuutu. Yehowa baanyɛ afee nakai nɔŋŋ ehã bo. Kɛ́ naagba ni okɛkpeɔ lɛ naa wa tamɔ mɛ, “Nyɔŋmɔ toiŋjɔlɛ” lɛ baanyɛ aye abua bo ni odamɔ naa. Yehowa kɛɛ: “Kaakwɛkwɛɛ ohe [aloo, kaaye otsui], shi mi ji o-Nyɔŋmɔ lɛ! Mawajeo, ni maye mabuao.” Obaanyɛ okɛ ohiɛ afɔ̃ shiwoo nɛɛ nɔ kɛ otsui fɛɛ.​—Yes. 41:10.

5. Mɛɛ gbɛ nɔ Nyɔŋmɔ Wiemɔ lɛ baanyɛ aye abua wɔ ni wɔkaye wɔtsui tsɔ?

⁵ Nɔ ni ji enyɔ ni wɔbaanyɛ wɔfee kɛ́ wɔhao ji, ni wɔbaahala ŋmalɛi komɛi ni wɔkane ni wɔjwɛŋ nɔ. Mɛni hewɔ enɛ he hiaa lɛ? Ŋaawoi kɛ gbɛtsɔɔmɔi ni yɔɔ Biblia lɛ mli lɛ jɛ Nyɔŋmɔ, mɔ ni bɔ wɔ lɛ ŋɔɔ. No hewɔ lɛ, kɛ́ wɔhe be kɛjwɛŋ nɔ lɛ, ebaanyɛ eye ebua wɔ ni wɔkafee yeyeeye. Agbɛnɛ hu, kɛ́ nɔ ko ehã wɔfee yeyeeye lɛ, ebaanyɛ ejɔɔ wɔtsui kɛ wɔjwɛŋmɔ he. Kɛfata he lɛ, Ŋmalɛi lɛ baanyɛ aye abua wɔ ni wɔye wɔhe kɛjɛ naagbai komɛi ahe. Kɛ́ ojwɛŋ Nyɔŋmɔ Wiemɔ lɛ nɔ, ni okwɛ bɔ ni obaafee okɛ emli ŋaawoi lɛ atsu nii lɛ, ebaawaje bo waa. Yehowa eje gbɛ ewie akɛ, e-Wiemɔ lɛ baanyɛ ahã ‘wɔfee ekãa,’ ni ‘ŋmiŋmi akamɔ’ wɔ.​—Yosh. 1:7-9.

6. Mɛɛ gbɛ nɔ obaanyɛ oná Yesu wiemɔi lɛ ahe sɛɛ?

⁶ Nyɔŋmɔ Wiemɔ lɛ mli nɔŋŋ aŋmala Yesu wiemɔi ni shɛjeɔ mɔ mii lɛ yɛ. Mɛi ni bo Yesu toi lɛ atsui nyɔ amɛmli waa. Yesu shɛje mɛi amii, ewo amɛ hewalɛ, ni ehã mɛi ni ehao lɛ tsui. Enɛ hewɔ lɛ, mɛi pii ba eŋɔɔ koni amɛbabo lɛ toi. (Kanemɔ Mateo 11:28-30.) Yesu nu he ehã mɛi waa. (Mar. 6:30-32) Eyɛ mli akɛ Yesu bɛ shikpɔŋ lɛ nɔ ŋmɛnɛ moŋ, shi ekã he eeye eebua wɔ, tamɔ bɔ ni ewo ebɔfoi lɛ shi akɛ ebaafee ehã amɛ lɛ. Amrɔ nɛɛ, Yesu miiye Maŋtsɛ yɛ ŋwɛi, shi esusuɔ wɔhe lolo. Kɛ́ naagba ko hã ofee yeyeeye lɛ, ebaana bo mɔbɔ ni ‘ebaaye ebua bo yɛ be ni sa mli.’ Ebaawaje bo ni ehã oná hiɛnɔkamɔ, koni onyɛ okpee shihilɛ lɛ naa.​—Heb. 2:17, 18; 4:16.

7. Kɛ́ wɔbi Nyɔŋmɔ mumɔ krɔŋkrɔŋ lɛ ni ekɛduro wɔ lɛ, mɛɛ gbɛ nɔ wɔbaaná he sɛɛ?

⁷ Nɔ ni ji etɛ ni baaye abua wɔ ni wɔkafee yeyeeye fe nine ji, mumɔ lɛ yibii lɛ. Yesu ewo wɔ shi akɛ, kɛ́ wɔkpa wɔ-Tsɛ ni  yɔɔ ŋwɛi lɛ fai ni ehã wɔ mumɔ krɔŋkrɔŋ lɛ, ebaahã wɔ aahu. (Luka 11:10-13) Mɛɛ gbɛ nɔ mumɔ krɔŋkrɔŋ lɛ baanyɛ aye abua wɔ? Mumɔ krɔŋkrɔŋ lɛ waa wɔ ni wɔjieɔ mumɔ lɛ yibii lɛ, ni ji sui ni Nyɔŋmɔ Ofe lɛ yɔɔ lɛ akpo. (Kanemɔ Galatiabii 5:22, 23; Kol. 3:10) Sui kpakpai nɛɛ baaye abua wɔ ni wɔkɛ mɛi krokomɛi ahi shi yɛ toiŋjɔlɛ kɛ suɔmɔ mli, ni kɛ́ wɔkɛ mɛi hi shi yɛ toiŋjɔlɛ mli lɛ, naagbai ni hãa wɔfeɔ yeyeeye lɛ anɔ baagbɔ kwraa. Nyɛhãa wɔsusua bɔ ni sui nɛɛ baanyɛ aye abua wɔ ahã lɛ he kuku.

8-12. Mɛɛ gbɛ nɔ Nyɔŋmɔ mumɔ lɛ yibii lɛ baanyɛ aye abua wɔ ni wɔkaná naagbai pii loo wɔhao fe nine?

⁸ “Suɔmɔ, miishɛɛ, toiŋjɔlɛ.” Kɛ́ wɔbuɔ mɛi lɛ, wɔfeŋ yeyeeye tsɔ. Mɛni hewɔ? Ejaakɛ shihilɛi ni baanyɛ ahã wɔmli afu amɛ, amɛsane aje wɔtsine, loo wɔhao yɛ amɛ hewɔ lɛ anɔ baagbɔ kwraa. Kɛ́ wɔsumɔ wɔnyɛmimɛi Kristofoi lɛ, wɔdɔ amɛhe, ni wɔwo amɛ lɛ, wɔkɛ amɛ baahi shi yɛ toiŋjɔlɛ mli.​—Rom. 12:10.

⁹ “Tsuishitoo, mlihilɛ, ekpakpafeemɔ.” Biblia lɛ kɛɔ akɛ: “Nyɛmli ahia ahãhãa nyɛhe, nyɛmusuŋ atsɔtsɔa nyɛ yɛ nyɛhe, nyɛkɛfafaa nyɛhe tswaa.” (Efe. 4:32) Kɛ́ wɔbo ŋaawoo nɛɛ toi lɛ, wɔkɛ mɛi krokomɛi baahi shi yɛ toiŋjɔlɛ mli, ni wɔbaajo naagbai ni baanyɛ ahã wɔfee yeyeeye lɛ pii anaa foi. Kɛfata he lɛ, ebaaye ebua wɔ ni wɔnyɛ wɔtsu naagbai ni baa wɔ kɛ mɛi ateŋ yɛ emuu ni wɔyeee lɛ hewɔ lɛ ahe nii oya.

¹⁰ “Hemɔkɛyeli.” Ŋmɛnɛ lɛ, nibii ni hãa wɔyeɔ wɔtsui waa lɛ kɔɔ shika kɛ heloonaa nibii ahe titri. (Abɛi 18:11) Shi kɛ́ wɔkɛ wɔhiɛ fɔ̃ Yehowa nɔ kwraa akɛ ebaajɛ suɔmɔ mli ekwɛ wɔ lɛ, kɛ́ wɔhe fi wɔ po lɛ, wɔfeŋ yeyeeye. Mɛni hewɔ? Ejaakɛ wɔbaabo ŋaa ni Paulo wo lɛ toi, akɛ: “Nyɛmii ashɛa nibii ni yɔɔ amrɔ nɛɛ he. Ejaakɛ [Nyɔŋmɔ] ekɛɛ: ‘Mishiŋ bo, ni mikwaŋ bo kɔkɔɔkɔ.’ Koni wɔná ekãa babaoo ni wɔkɛɛ: ‘Yehowa ji miyelikɛbualɔ; misheŋ gbeyei. Mɛni gbɔmɔ baanyɛ afee mi?’”​—Heb. 13:5, 6.

¹¹ “Mlijɔlɛ, henɔyeli.” Sui nɛɛ baanyɛ aye abua wɔ yɛ nibii pii amli. Kɛ́ wɔmli jɔ ni wɔyeɔ wɔhe nɔ lɛ, wɔbaakwɛ wɔwiemɔ kɛ wɔnifeemɔ jogbaŋŋ, ni no hewɔ lɛ, wɔnaŋ naagbai pii, no ji wɔfeŋ yeyeeye. Kɛfata he lɛ, wɔbaakwa “mlijoomɔ, mlila, mlifu, bolɔmɔ, kɛ wiemɔ fɔŋ srɔtoi fɛɛ.”​—Efe. 4:31.

¹² Ja wɔba wɔhe shi, dani wɔbaanyɛ wɔkɛ wɔhiɛ afɔ̃ Nyɔŋmɔ nɔ akɛ, ekɛ ‘enine ni wa lɛ’ baaye abua wɔ. Anɔkwa, su nɛɛ nɔŋŋ baahã ‘wɔshɛrɛ wɔyeyeeyefeemɔi fɛɛ wɔshwie enɔ.’ (1 Pet. 5:6, 7) Kɛ́ wɔbaa wɔhe shi lɛ, wɔbaakpɛlɛ nɔ akɛ, jeee nɔ fɛɛ nɔ wɔbaanyɛ wɔfee. (Mika 6:8) Kɛ́ wɔkpɛlɛ enɛ nɔ lɛ, wɔkɛ wɔhe baakpasa Nyɔŋmɔ moŋ fe wɔ diɛŋtsɛ wɔhe, ni ebaajɛ suɔmɔ mli eye ebua wɔ. Enɛ hewɔ lɛ, wɔfeŋ yeyeeye fe nine.

13. Be ni Yesu wie akɛ ‘wɔkafee yeyeeye kɔkɔɔkɔ’ lɛ, no mli lɛ, mɛni etsɔɔ lɛ?

¹³ Yɛ Mateo 6:34 lɛ (kanemɔ), Yesu wo wɔ ŋaa ni he hiaa waa nɛɛ, akɛ: ‘Nyɛkafea yeyeeye kɔkɔɔkɔ.’ Ekolɛ wɔbaanu he akɛ wɔnyɛŋ wɔbo ŋaawoo nɛɛ toi. Shi hã wɔsusu nɔ ni Yesu wiemɔi lɛ tsɔɔ lɛ he wɔkwɛ. Yesu etsɔɔɔ akɛ mɛi ni sɔmɔɔ Nyɔŋmɔ lɛ efeŋ yeyeeye yɛ shihilɛ mli kɔkɔɔkɔ. Tamɔ bɔ ni wɔna momo lɛ, David kɛ Paulo fɛɛ fee yeyeeye. Nɔ moŋ ni etsɔɔ ji akɛ, kɛ́ wɔye wɔtsui fe nine, loo wɔye wɔtsui yɛ nibii ni he ehiaaa ahe lɛ, ewaŋ wɔ. Gbi fɛɛ gbi kɛ emli naagbai. No hewɔ lɛ, esaaa akɛ wɔkɛ naagbai ni  ba nyɛ, kɛ naagbai ni baaba wɔ́ lɛ ahe ŋkɔmɔyeli bafataa ŋmɛnɛ nɔ lɛ he. Te wɔbaafee tɛŋŋ wɔkɛ Yesu ŋaawoo nɛɛ atsu nii koni wɔkahao wɔhe tsɔ yɛ nibii ahe?

14. Kɛ́ nɔ ko ni ofee be ko ni eho lɛ miiye otsui lɛ, mɛni obaanyɛ ofee?

¹⁴ Bei komɛi lɛ, mɛi yeɔ amɛtsui yɛ tɔmɔi ni amɛtɔ̃ be ko ni eho lɛ ahewɔ. Ekolɛ afii pii eshwie mli, shi amɛhenilee kã he eeyi amɛ. Maŋtsɛ David nu he bei komɛi akɛ ‘enishaianii lɛ miisu lɛ.’ Ewie akɛ: “Mitsuiŋ hũumɔ hewɔ lɛ mijwa yaafó.” (Lala 38:4, 5, 9, 19) Mɛni David fee? Ekɛ ehiɛ fɔ̃ Yehowa nɔ akɛ ebaana lɛ mɔbɔ ni ekɛ ehe eshai lɛ ake lɛ. Ekɛ nɔmimaa wie akɛ: “Ajɔɔ mɔ ni aŋɔ enɔtɔmɔ afa lɛ.”​—Kanemɔ Lala 32:1-3, 5.

15. (a) Mɛni hewɔ esaaa akɛ wɔfeɔ yeyeeye yɛ naagbai ni wɔkɛkpeɔ amrɔ nɛɛ ahewɔ lɛ? (b) Mɛni wɔbaanyɛ wɔfee koni wɔkaye wɔtsui tuutu? (Kwɛmɔ akrabatsa ni ji, “ Nibii Komɛi ni Wɔbaanyɛ Wɔfee Koni Wɔkaye Wɔtsui Fe Nine.”)

¹⁵ Bei komɛi hu lɛ, wɔyeɔ wɔtsui yɛ shihilɛ ko ni wɔkɛmiikpe lɛ hewɔ. Akɛ nɔkwɛmɔnɔ lɛ, be ni David ŋma Lala 55 lɛ, no mli lɛ eeshe gbeyei akɛ abaagbe lɛ. (Lala 55:3-6) Fɛɛ sɛɛ lɛ, ekɛ ehiɛ fɔ̃ Yehowa nɔ, ni efeee yeyeeye fe nine. David sɔle waa ni Yehowa aye abua lɛ. Kɛ̃lɛ, etaaa shi efolo; eyɔse akɛ ehe miihia ni efee nɔ ko yɛ naagba lɛ he. (2 Sam. 15:30-34) Mɛni wɔkaseɔ yɛ David sane nɛɛ mli? Yɛ nɔ najiaŋ ni wɔbaaye wɔtsui tuutu yɛ wɔnaagbai lɛ ahe lɛ, nyɛhãa wɔtsua amɛhe nii bɔ ni wɔbaanyɛ, ni wɔkɛ wɔhiɛ afɔ̃ Yehowa nɔ akɛ, ebaatsu nɔ ni eshwɛ lɛ ehã wɔ.

16. Kɛ́ onuɔ Nyɔŋmɔ gbɛ́i lɛ shishi lɛ, mɛɛ gbɛ nɔ ebaanyɛ ehã ohemɔkɛyeli lɛ mli awa?

¹⁶ Bei komɛi lɛ, Kristofoi komɛi feɔ yeyeeye yɛ naagbai komɛi ni amɛsusuɔ akɛ amɛkɛbaakpe wɔsɛɛ lɛ ahewɔ. Shi esaaa akɛ wɔfeɔ nakai. Mɛni hewɔ? Ejaakɛ wɔleee wɔ́ sane. Ekolɛ naagbai ni wɔsusuɔ akɛ wɔkɛbaakpe wɔsɛɛ lɛ baŋ kwraa. Shi kɛ́ naagbai lɛ ba po lɛ, wɔle akɛ nɔ ko nɔ ko shɛɛɛ Nyɔŋmɔ, mɔ ni wɔshɛrɛɔ wɔyeyeeyefeemɔi fɛɛ wɔshwieɔ enɔ lɛ feemɔ. Kaimɔ akɛ, Nyɔŋmɔ gbɛ́i lɛ shishinumɔ kome ji, “Ehãa Etsɔɔ.” (2 Mose 3:14) Enɛ hãa wɔnaa akɛ, bɔ fɛɛ bɔ ni fee lɛ, Nyɔŋmɔ yiŋtoo kɛhã adesai lɛ baaba mli. No hewɔ lɛ, ná nɔmimaa akɛ, kɛ́ oye Nyɔŋmɔ anɔkwa lɛ, ebaajɔɔ bo, ni ebaaye ebua bo ni okafee yeyeeye fe nine yɛ naagbai ni eba momo, nɔ ni okɛkpeɔ ŋmɛnɛ, kɛ nɔ ni ekolɛ okɛbaakpe wɔsɛɛ lɛ ahe.

17, 18. Kɛ́ wɔfee yeyeeye lɛ, mɛni hewɔ ehi akɛ wɔkɛ mɔ ko baagba nɔ ni haoɔ wɔ lɛ he sane?

¹⁷ Nɔ ni ji ejwɛ ni wɔbaanyɛ wɔfee koni wɔkaye wɔtsui tsɔ ji, ni wɔkɛ mɔ ko ni wɔbaanyɛ wɔmu wɔfɔ̃ enɔ lɛ baagba nɔ ni haoɔ wɔ lɛ he sane. Kɛ́ okɛ oŋa loo owu,  onaanyo ko ni osumɔɔ esane waa, loo asafoŋ onukpa ko gba onaagba lɛ he sane lɛ, mɔ lɛ baanyɛ aye abua bo ni oná jwɛŋmɔ ni ja yɛ he. Biblia lɛ kɛɔ akɛ: “Gbɔmɔ tsui mli ŋkɔmɔyeli hãa edɔɔ kɔmɔɔ; shi wiemɔ kpakpa hãa emii shɛɔ ehe.” (Abɛi 12:25) Kɛ́ ojɛ otsuiŋ okɛ mɔ ko gba onaagba lɛ he sane ni oshiuuu lɛ nɔ ko nɔ lɛ, ebaanyɛ eye ebua bo ni onyɛ okpee naa. Biblia lɛ kɛɔ akɛ: “Kɛ́ ajinatoo bɛ lɛ, yiŋtoi feɔ yaka; shi kɛ́ ŋaawolɔi pii yɛ lɛ, amɛdamɔɔ shi shiŋŋ.”​—Abɛi 15:22.

¹⁸ Yehowa tsɔɔ asafoŋ kpeei ni wɔyaa daa otsi lɛ hu anɔ eyeɔ ebuaa wɔ ni wɔkafee yeyeeye. Kɛ́ wɔtee asafoŋ kpeei lɛ, wɔnáa hegbɛ wɔkɛ wɔnyɛmimɛi Kristofoi lɛ sharaa. Wɔnyɛmimɛi lɛ susuɔ wɔhe, ni amɛwoɔ wɔ hewalɛ. (Heb. 10:24, 25) Kɛ́ “wɔwowoo wɔhe hewalɛ” lɛ, ewajeɔ wɔ ni wɔnyɛɔ wɔdamɔɔ wɔnaagbai lɛ anaa.​—Rom. 1:12.

19. Mɛni hewɔ obaanyɛ oná nɔmimaa akɛ kɛ́ ofee nibii ni baahã wekukpaa ni yɔɔ okɛ Yehowa teŋ lɛ mli awa lɛ, ebaawaje bo lɛ?

¹⁹ Ehe miihia waa ni wɔshɛrɛ wɔyeyeeyefeemɔi lɛ wɔshwie Yehowa nɔ. Asafoŋ onukpa ko ni yɔɔ Canada lɛ niiashikpamɔ lɛ hãa wɔnaa enɛ faŋŋ. Nyɛmi nuu nɛɛ tsɔɔ nii, ni ewoɔ skulbii ŋaa, ni nitsumɔ nɛɛ hãa etɔɔ lɛ bliboo. Kɛfata he lɛ, eeye hela ko ni hãa mɔ feɔ yeyeeye. Mɛni eye ebua lɛ ni enyɛ ekpee naagbai nɛɛ anaa? Ewie akɛ: “Miyɔse akɛ, kɛ́ mibɔ mɔdɛŋ waa akɛ mafee nibii ni baahã wekukpaa ni yɔɔ mi kɛ Yehowa teŋ lɛ mli awa lɛ, no wajeɔ mi waa ni mikafee yeyeeye tsɔ. Kɛ́ mihao lɛ, minyɛmimɛi Kristofoi lɛ yeɔ amɛbuaa mi waa. Mihãa miŋa leɔ bɔ ni minuɔ he mihãa, ni mishiuuu lɛ nɔ ko nɔ. Minyɛmimɛi asafoŋ onukpai lɛ kɛ wɔkpokpaa nɔkwɛlɔ lɛ ye amɛbua mi waa ni miná jwɛŋmɔ ni ja yɛ mishihilɛ lɛ he. Mikɛ datrɛfonyo ko gba mihela lɛ he sane, ni mikwɛ bɔ ni mikɛ mibe tsuɔ nii mihãa lɛ jogbaŋŋ, koni maná be kɛjɔɔ mihe ni mikɛgbɔle mikpɔiaŋ. Fiofio lɛ, yeyeeyefeemɔ lɛ naa eba shi. Kɛ́ mikɛ naagba ko ni minyɛŋ he nɔ ko mafee lɛ kpe lɛ, mishiɔ mihãa Yehowa.”

20. (a) Mɛɛ gbɛi anɔ wɔbaanyɛ wɔtsɔ wɔshɛrɛ wɔyeyeeyefeemɔi wɔshwie Nyɔŋmɔ nɔ? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

²⁰ Yɛ nikasemɔ nɛɛ mli lɛ, wɔna akɛ wɔbaanyɛ wɔshɛrɛ wɔyeyeeyefeemɔi lɛ wɔshwie Nyɔŋmɔ nɔ kɛtsɔ sɔlemɔ kɛ Biblia lɛ kanemɔ kɛ enɔjwɛŋmɔ nɔ. Wɔna hu akɛ, kɛ́ wɔwo mumɔ lɛ yibii lɛ, wɔkɛ wɔnaanyo ko gba wɔnaagbai lɛ ahe sane, ni wɔtee asafoŋ kpeei lɛ, ebaaye ebua wɔ ni wɔkpee wɔnaagbai lɛ anaa. Nikasemɔ ni nyiɛ sɛɛ lɛ baahã wɔna bɔ ni hiɛnɔkamɔ ni Yehowa ehã wɔ lɛ baanyɛ awaje wɔ.​—Heb. 11:6.