1, 2. (a) Mɛɛ tsakpãa yɔɔ suɔmɔ kɛ hemɔkɛyeli teŋ? (b) Mɛɛ sanebimɔi wɔbaahã hetoo?

WƆSUMƆƆ Yehowa, “ejaakɛ lɛ klɛŋklɛŋ esumɔ wɔ.” (1 Yoh. 4:19) Nɔ kome ni Yehowa efee kɛtsɔɔ akɛ esumɔɔ wɔ ji akɛ, ewo wɔ shi akɛ kɛ́ wɔye lɛ anɔkwa lɛ, ebaajɔɔ wɔ. Kɛ́ wɔfee nibii ni baahã suɔmɔ ni wɔyɔɔ kɛhã Yehowa lɛ mli awa lɛ, hemɔkɛyeli ni wɔyɔɔ akɛ eyɛ lɛ hu mli baawa, ni wɔyiŋ efeŋ wɔ kɔshikɔshi bibioo po akɛ ejuroɔ mɛi ni esumɔɔ lɛ.​—Kanemɔ Hebribii 11:6.

² Mɛi fɛɛ ni le Yehowa jogbaŋŋ lɛ le akɛ nɔ kome ni enyaa efeemɔ he waa ji ni ebaajuro mɛi. Wɔnyɛŋ wɔkɛɛ akɛ wɔyɛ hemɔkɛyeli kɛji wɔbɛ nɔmimaa akɛ Nyɔŋmɔ baajuro mɛi fɛɛ ni kɛ hiɛdɔɔ taoɔ esɛɛ gbɛ lɛ, ejaakɛ “hemɔkɛyeli ji nɔmimaa ni akɛkwɛɔ nii ni hiɛ kã nɔ lɛ gbɛ.” (Heb. 11:1) Mɛi ni yɔɔ hemɔkɛyeli lɛ kɛ nɔmimaa kpaa nibii kpakpai ni Nyɔŋmɔ ewo shi akɛ ebaafee ehã adesai lɛ gbɛ. Shi mɛɛ gbɛ nɔ wɔnáa shi ni Yehowa ewo akɛ ebaajuro etsuji lɛ he sɛɛ? Mɛɛ gbɛ nɔ Yehowa juro etsuji ni hi shi yɛ blema lɛ? Ni mɛɛ gbɛ nɔ ejuroɔ etsuji ni yɔɔ ŋmɛnɛ lɛ? Nyɛhãa wɔkwɛa.

3. Mɛɛ shiwoo yɔɔ Maleaki 3:10 lɛ?

³ Yehowa Nyɔŋmɔ ewo shi akɛ ebaajuro etsuji fɛɛ ni yeɔ lɛ  anɔkwa lɛ. Yɛ Biblia lɛ mli lɛ, ehãa wɔleɔ akɛ, kɛ́ wɔsɔmɔ lɛ kɛ wɔtsui fɛɛ lɛ, ebaajɔɔ wɔ. Ekɛɔ wɔ akɛ: ‘Nyɛkaa mi nyɛkwɛa, akɛ migbeleŋ ŋwɛi samfɛji lɛ mihaŋ nyɛ, ni mifɔseŋ jɔɔmɔ mihaŋ nyɛ ní ateke nɔ lo?’ (Mal. 3:10) Kɛ́ wɔbo Yehowa toi, ni wɔka lɛ wɔkwɛ lɛ, no baatsɔɔ akɛ wɔhiɛ sɔɔ nɔ ni ewo shi akɛ ebaafee ehã wɔ lɛ waa.

4. Mɛni hewɔ wɔheɔ Yesu shiwoo ni yɔɔ Mateo 6:33 lɛ wɔyeɔ lɛ?

⁴ Yesu wo ekaselɔi lɛ shi akɛ, kɛ́ amɛhã Maŋtsɛyeli lɛ he hia amɛ fe nibii krokomɛi fɛɛ lɛ, Nyɔŋmɔ baawa amɛ. (Kanemɔ Mateo 6:33.) Yesu le akɛ Yehowa yeɔ eshiwoi fɛɛ nɔ, ni no hewɔ enyɛ ená ekãa ni ekɛɛ ekaselɔi lɛ nakai lɛ. (Yes. 55:11) Wɔ hu wɔbaanyɛ wɔná nɔmimaa akɛ, kɛ́ wɔhe Yehowa nɔ wɔye kɛ wɔtsui fɛɛ lɛ, ebaaye shi ni ewo wɔ akɛ, ‘eshiŋ wɔ, ni ekwaŋ wɔ kɔkɔɔkɔ’ lɛ nɔ. (Heb. 13:5) Shiwoo nɛɛ ji nɔ kome ni hãa wɔheɔ nɔ ni Yesu wie yɛ Mateo 6:33 lɛ wɔyeɔ.

5. Mɛɛ gbɛ nɔ hetoo ni Yesu hã Petro lɛ wajeɔ wɔ?

⁵ Be ko lɛ, bɔfo Petro bi Yesu akɛ: “Wɔshi nibii fɛɛ ni wɔbanyiɛ osɛɛ; belɛ mɛni wɔbaaná?” (Mat. 19:27) Ani Yesu kã Petro hiɛ yɛ sane nɛɛ ni ebi lɛ lɛ hewɔ? Dabi. Moŋ lɛ, ekɛɛ lɛ kɛ bɔfoi krokomɛi lɛ akɛ, abaajuro amɛ yɛ nibii ni amɛkɛshã afɔle lɛ hewɔ. Ekɛɛ amɛ akɛ, wɔsɛɛ lɛ, amɛ kɛ anɔkwafoi krokomɛi baafata ehe kɛye nɔ akɛ maŋtsɛmɛi yɛ ŋwɛi. Shi dani nakai be lɛ baashɛ lɛ, mɛni amɛbaaná? Yesu kɛɛ amɛ akɛ: “Mɔ fɛɛ mɔ ni eshi shĩai loo nyɛmimɛi hii loo nyɛmimɛi yei loo tsɛ loo nyɛ loo bii loo ŋmɔji yɛ migbɛ́i  lɛ hewɔ lɛ, abaato lɛ najiaŋ toi oha, ni ebaaná naanɔ wala.” (Mat. 19:29) Mɛi fɛɛ ni kɛ nibii shãa afɔle yɛ Maŋtsɛyeli lɛ hewɔ lɛ baaná jɔɔmɔi ni fa kwraa fe nibii ni amɛkɛshã afɔle lɛ. Ani tsɛmɛi, nyɛmɛi, nyɛmimɛi hii, kɛ nyɛmimɛi yei ni wɔnáa yɛ Kristofoi asafo lɛ mli lɛ ajara waaa kwraa fe nibii fɛɛ ni wɔkɛshã afɔle lɛ?

6. Mɛni hewɔ Yehowa ewo mɛi fɛɛ ni jáa lɛ lɛ shi akɛ ebaajuro amɛ lɛ?

⁶ Yehowa le akɛ, shi ni ewo akɛ ebaajuro mɛi fɛɛ ni jáa lɛ lɛ baawaje wɔ ni wɔnyɛ wɔkpee kai anaa. Yɛ jɔɔmɔi ni wɔnáa mli ŋɔɔmɔ ŋmɛnɛ lɛ asɛɛ lɛ, wɔkɛ miishɛɛ miikpa jɔɔmɔi ni nɔ bɛ ni wɔbaaná wɔsɛɛ lɛ hu gbɛ. (1 Tim. 4:8) Kɛ́ wɔná hemɔkɛyeli ni mli wa akɛ Yehowa ji “mɛi ni kɛ hiɛdɔɔ taoɔ esɛɛ gbɛ lɛ ajurolɔ” lɛ, wɔbaaya nɔ wɔye lɛ anɔkwa.​—Heb. 11:6.

7. Mɛɛ gbɛ nɔ wɔbaanyɛ wɔkɛ hiɛnɔkamɔ ato sɛ́kɛ he?

⁷ Yɛ Yesu Gɔŋ nɔ Shiɛmɔ lɛ mli lɛ, ewie akɛ: “Nyɛmii ashɛa nyɛhe ní nyɛmli afilia nyɛ, akɛni nyɛjuromɔnɔ lɛ fa babaoo yɛ ŋwɛi lɛ hewɔ, ejaakɛ nakai nɔŋŋ amɛwa gbalɔi ni tsɔ nyɛhiɛ lɛ ayi.” (Mat. 5:12) Nyɔŋmɔ tsuji komɛi baaná naanɔ wala yɛ ŋwɛi, ni mɛi komɛi hu baaná naanɔ wala yɛ Paradeiso lɛ mli yɛ shikpɔŋ lɛ nɔ. Kɛ̃lɛ, ekɔɔɔ he eko hiɛnɔkamɔ ni amɛyɔɔ lɛ, ‘amɛmii shɛɔ amɛhe ni amɛmli filiɔ amɛ.’ (Lala 37:11; Luka 18:30) Wɔhiɛnɔkamɔ lɛ tamɔ “sɛ́kɛ ní tseee ní tsɛkɛɔ shi shiŋŋ” kɛhã wɔsusuma lɛ. (Heb. 6:17-20) Tamɔ bɔ ni kɛ́ ahum ko miitswa lɛ, aŋmɛɔ meelei sɛ́kɛ bɔ ni afee ni amɛkabutu lɛ, nakai nɔŋŋ wɔhiɛnɔkamɔ lɛ baanyɛ aye abua wɔ ni wɔkagbugbaa kɛ́ wɔkɛ kai kpe. Ebaanyɛ eye ebua wɔ ni wɔfi shi shiŋŋ.

8. Mɛɛ gbɛ nɔ wɔhiɛnɔkamɔ lɛ baanyɛ aye abua wɔ ni wɔkafee yeyeeye tsɔ?

⁸ Wɔhiɛnɔkamɔ lɛ baanyɛ aye abua wɔ ni wɔkafee yeyeeye tsɔ yɛ wɔnaagbai ahe. Nibii ni Nyɔŋmɔ ewo wɔ shi akɛ ebaafee ehã wɔ lɛ shɛjeɔ wɔmii kɛ́ wɔhao. Wɔle akɛ, kɛ́ ‘wɔshɛrɛ wɔjatsui lɛ wɔshwie Yehowa nɔ lɛ, ebaahiɛ wɔmli,’ ni enɛ shɛjeɔ wɔmii waa! (Lala 55:23) Wɔyɛ nɔmimaa akɛ, Nyɔŋmɔ baanyɛ “efee babaoo kɛteke nɔ ní esaa eteke nɔ kwraa fe nibii ni wɔbiɔ loo ebaa wɔyiŋ lɛ.” (Efe. 3:20) Hɛɛ, Yehowa baaye abua wɔ, ni ebaafee nakai ni ‘eteke nɔ’ ni esaa eteke nɔ kwraa fe bɔ ni wɔsusuɔ po!

9. Mɛni kɛ́ wɔfee lɛ, wɔbaanyɛ wɔná nɔmimaa akɛ Yehowa baajɔɔ wɔ?

⁹ Shi ja wɔhe Yehowa nɔ wɔye kɛ wɔtsui fɛɛ ni wɔbo egbɛtsɔɔmɔi lɛ atoi dani wɔnine baashɛ juromɔnɔ lɛ nɔ. Mose kɛɛ Israelbii lɛ akɛ: “Jɔɔmɔ Yehowa aaajɔɔo yɛ shikpɔŋ ní Yehowa, o-Nyɔŋmɔ lɛ, kɛhãa bo ní oŋɔ akɛ ogbɛfaŋnɔ lɛ nɔ, kɛji ooobo Yehowa, o-Nyɔŋmɔ lɛ, gbee toi ní ojwɛŋ nɔ ní oye kita fɛɛ kita ní miwoɔo ŋmɛnɛ gbi nɛɛ lɛ nɔ kɛkɛ lɛ. Ejaakɛ Yehowa, o-Nyɔŋmɔ lɛ, aaajɔɔo, taakɛ bɔ ni ewo bo shi lɛ.” (5 Mose 15:4-6) Obaanyɛ oná nɔmimaa akɛ, kɛ́ otee nɔ oye Yehowa anɔkwa ni osɔmɔ lɛ lɛ, ebaajɔɔ bo. Ani oheɔ enɛ oyeɔ kɛ otsui fɛɛ?

10, 11. Mɛɛ gbɛ nɔ Yehowa juro Yosef?

¹⁰ Wɔ hewɔ Yehowa hã aŋma Biblia lɛ. Saji babaoo yɛ Biblia lɛ mli ni hãa wɔnaa akɛ, lɛɛlɛŋ, Nyɔŋmɔ juroɔ etsuji fɛɛ ni yeɔ lɛ anɔkwa lɛ. (Rom. 15:4) Saji nɛɛ ateŋ ekome ni sa kadimɔ waa ji Yosef sane lɛ. Yosef nyɛmimɛi lɛ hɔ̃ɔ lɛ akɛ nyɔŋ kɛtee Ejipt. Be ni eyɔɔ jɛmɛ lɛ, enuŋtsɔ lɛ ŋa lɛ folɔ enaa, ni no hã awo lɛ tsuŋ. Shi ani Nyɔŋmɔ hiɛ kpa enɔ? Dabi  kwraa! Biblia lɛ kɛɔ akɛ: “Yehowa kɛ Yosef yɛ, ni ena lɛ mɔbɔ.” Yehowa hã nɔ fɛɛ nɔ ni efee lɛ shwere. (1 Mose 39:21-23) Be ni Yosef naa nɔ lɛ, eto etsui shi emɛ Nyɔŋmɔ.

¹¹ Afii komɛi asɛɛ lɛ, Farao jie Yosef kɛje tsuŋwoohe lɛ, ni ehã ebatsɔ esɛɛmɔ. (1 Mose 41:1, 37-43) Sɛɛ mli lɛ, Yosef ŋa lɛ fɔ bihii enyɔ ehã lɛ. “Yosef wo ekromɔbi lɛ Manase, ni ekɛɛ: Ejaakɛ Nyɔŋmɔ ehã mihiɛ ekpa mihaomɔ lɛ fɛɛ kɛ mitsɛ we lɛ fɛɛ nɔ. Ni ewo mɔ ni ji enyɔ lɛ Efraim, ni ekɛɛ: Ejaakɛ Nyɔŋmɔ ehã miwo shwiei yɛ mimanehulu shikpɔŋ lɛ nɔ.” (1 Mose 41:51, 52) Akɛni Yosef tee nɔ eye Nyɔŋmɔ anɔkwa hewɔ lɛ, Nyɔŋmɔ jɔɔ lɛ, ni no hã etsɛ Yakob weku lɛ kɛ Ejiptbii lɛ fɛɛ yi ná wala. Yosef yɔse akɛ Yehowa ji mɔ ni ejuro lɛ ni ejɔɔ lɛ lɛ.​—1 Mose 45:5-9.

12. Mɛni ye ebua Yesu ni enyɛ eye Nyɔŋmɔ anɔkwa be ni ekɛ kai kpeɔ lɛ?

¹² Yesu Kristo hu tee nɔ ebo Nyɔŋmɔ toi yɛ kai srɔtoi ni ekɛkpe lɛ fɛɛ mli. Enɛ hewɔ lɛ, Yehowa juro lɛ. Mɛni ye ebua lɛ ni enyɛ eye Nyɔŋmɔ anɔkwa? Nyɔŋmɔ Wiemɔ lɛ kɛɔ akɛ: “Miishɛɛ ni kã ehiɛ lɛ hewɔ lɛ, efi shi yɛ piŋmɔ tso nɔ, ni ebuuu hiɛgbele.” (Heb. 12:2) Yesu le akɛ enɔkwayeli lɛ baahã atse Nyɔŋmɔ gbɛ́i lɛ he, ni ekã shi faŋŋ akɛ enɛ hã emii shɛ ehe waa. Kɛfata he lɛ, e-Tsɛ lɛ ná ehe miishɛɛ ni ehã lɛ hegbɛi wuji pii. Biblia lɛ hãa wɔleɔ akɛ, “eyata shi yɛ Nyɔŋmɔ maŋtsɛ sɛi lɛ ninejurɔ nɔ.” Agbɛnɛ hu, “Nyɔŋmɔ wó enɔ ni ehã lɛ gbɛhe ni nɔ kwɔ, ni ejɛ mlihilɛ mli ehã lɛ gbɛ́i ni ta gbɛ́i krokomɛi fɛɛ nɔ.”​—Fil. 2:9.

13, 14. Kɛ́ wɔfee nɔ ko wɔhã Yehowa lɛ, te enuɔ he ehãa tɛŋŋ?

¹³ Wɔbaanyɛ wɔná nɔmimaa akɛ, Yehowa hiɛ sɔɔ nibii fɛɛ ni wɔfeɔ wɔhãa lɛ lɛ. Eeenyɛ efee akɛ, bei komɛi lɛ wɔnuɔ he akɛ wɔsaaa mɛi ni sɔmɔɔ lɛ, ni akɛ wɔnyɛŋ wɔsa ehiɛ kɔkɔɔkɔ. Yehowa le enɛ. Kɛ́ nitsumɔ loo shika he naagbai hã wɔfee yeyeeye lɛ, enuɔ he ehãa wɔ. Nakai nɔŋŋ kɛ́ hela loo naagbai krokomɛi hãaa wɔnyɛ wɔtsu babaoo yɛ esɔɔmɔ lɛ mli tamɔ be ko ni eho lɛ, enuɔ wɔ shishi. Wɔbaanyɛ wɔná nɔmimaa akɛ, Yehowa hiɛ sɔɔ mɔdɛŋ fɛɛ ni wɔbɔɔ koni wɔya nɔ wɔye lɛ anɔkwa lɛ waa.​—Kanemɔ Hebribii 6:10, 11.

¹⁴ Kɛfata he lɛ, esa akɛ wɔhã ehi wɔjwɛŋmɔŋ akɛ, kɛji wɔkɛ wɔhaomɔi lɛ shwie Yehowa hiɛ lɛ, ebaaye ebua wɔ, ejaakɛ ‘eboɔ sɔlemɔi atoi.’ (Lala 65:3) “Musuŋtsɔlɛi a-Tsɛ lɛ kɛ miishɛjemɔ fɛɛ Nyɔŋmɔ lɛ” baaduro wɔ nɔ fɛɛ nɔ ni he hiaa wɔ koni wɔnyɛ wɔhi emasɛi daa. Bei komɛi lɛ, ebaanyɛ etsɔ wɔnyɛmimɛi Kristofoi lɛ anɔ efee nakai. (2 Kor. 1:3) Kɛ́ wɔmusuŋ tsɔ wɔ yɛ mɛi krokomɛi ahewɔ lɛ, etaa Yehowa tsuiŋ waa. Ŋmalɛi lɛ kɛɔ akɛ: “Mɔ ni naa ohiafo mɔbɔ lɛ, ekɛmiifa Yehowa; ni nɔ ni eŋɔhã lɛ lɛ, eeeto lɛ najiaŋ ekoŋŋ.” (Abɛi 19:17; Mat. 6:3, 4) No hewɔ lɛ, kɛ́ wɔjɛ wɔtsuiŋ wɔye wɔbua mɛi ni efi amɛ lɛ, Yehowa naa lɛ tamɔ nɔ ni wɔfa lɛ nɔ ko, ni ewo shi akɛ, ebaato wɔ ejurɔ ni wɔfee lɛ najiaŋ.

15. Mɛɛ jɔɔmɔ okpaa gbɛ wɔsɛɛ? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁵ Kristofoi ni afɔ amɛ mu lɛ yɛ hiɛnɔkamɔ akɛ wɔsɛɛ lɛ, Nuŋtsɔ Yesu, ni ji “jalɛ kojolɔ lɛ,” baahã amɛ “jalɛ akekere lɛ.” (2 Tim. 4:7, 8) Shi kɛ́ shikpɔŋ lɛ nɔ Paradeiso lɛ mli wɔbaahi lɛ, no etsɔɔɔ akɛ Nyɔŋmɔ eshishiu wɔ, ejaakɛ nakai hiɛnɔkamɔ lɛ hu jara wa. Yesu “gwantɛŋi krokomɛi” akpekpei abɔ lɛ  baahi shi kɛya naanɔ, ni “amɛmii baashɛ amɛhe yɛ hejɔlɛ babaoo mli.”​—Yoh. 10:16; Lala 37:11.

16. Mɛɛ gbɛ nɔ wiemɔi yɔɔ 1 Yohane 3:19, 20 lɛ shɛjeɔ wɔmii?

¹⁶ Bei komɛi lɛ, wɔbaanyɛ wɔnu he akɛ nɔ ni wɔfeɔ wɔhãa Yehowa lɛ faaa, ni akɛ nɔ ni wɔtsuɔ yɛ esɔɔmɔ lɛ mli lɛ jeee nɔ ko kwraa yɛ ehiɛ. Ekolɛ wɔbaanu he po akɛ, wɔsaaa mɛi ni ejɔɔ amɛ. Shi esaaa akɛ wɔhiɛ kpaa nɔ kɔkɔɔkɔ akɛ, “Nyɔŋmɔ da fe wɔtsuii, ni ele nɔ fɛɛ nɔ.” (Kanemɔ 1 Yohane 3:19, 20.) Kɛ́ wɔhe lɛ wɔye, wɔsumɔ lɛ, ni wɔsɔmɔ lɛ kɛ wɔtsui fɛɛ lɛ, ebaajɔɔ wɔ, ekɔɔɔ he eko bɔ ni wɔsusuɔ akɛ nibii ni wɔtsuɔ wɔhãa lɛ lɛ yɔɔ bibioo hã.​—Mar. 12:41-44.

17. Tsɔɔmɔ jɔɔmɔi komɛi ni wɔnáa amrɔ nɛɛ.

¹⁷ Yɛ Satan shihilɛ gbɛjianɔtoo fɔŋ lɛ naagbee gbii nɛɛ amli po lɛ, Yehowa kã he eejɔɔ ewebii ni yɔɔ jeŋ fɛɛ lɛ. Ehã amɛnu e-Wiemɔ lɛ shishi jogbaŋŋ, ni amɛfee ekome kɛmiisɔmɔ lɛ kɛ miishɛɛ. (Yes. 54:13) Tamɔ bɔ ni Yesu wo shi lɛ, Yehowa miijɔɔ wɔ amrɔ nɛɛ po. Eduro wɔ nyɛmimɛi Kristofoi ni sumɔɔ wɔsane. (Mar. 10:29, 30) Kɛfata he lɛ, Yehowa hãa mɛi ni kɛ hiɛdɔɔ taoɔ esɛɛ gbɛ lɛ atoiaŋ jɔɔ amɛ, amɛtsui nyɔɔ amɛmli, ni amɛnáa miishɛɛ.​—Fil. 4:4-7.

18, 19. Te Yehowa tsuji nuɔ he amɛhãa tɛŋŋ yɛ jɔɔmɔi ni amɛnine shɛɔ nɔ kɛjɛɔ edɛŋ lɛ ahe?

¹⁸ Yehowa tsuji ni yɔɔ jeŋ fɛɛ lɛ baanyɛ awie kɛ nɔmimaa akɛ, Yehowa ejɔɔ amɛ waa. Akɛ nɔkwɛmɔnɔ lɛ, nyɛmi yoo ko ni jɛ Germany ni atsɛɔ lɛ Bianca lɛ wie akɛ: “Mileee nɔ ni mawie kɛda Yehowa shi yɛ bɔ ni eyeɔ ebuaa mi ni minyɛɔ mikpeɔ naagbai ni mikɛkpeɔ daa gbi lɛ anaa lɛ hewɔ. Je lɛ mli eyi tɔ kɛ naagbai babaoo, ni mɛi bɛ miishɛɛ. Shi akɛni mikɛ Yehowa efee ekome kɛmiitsu nii hewɔ lɛ, mile akɛ ebaaye ebua mi, ni no hewɔ lɛ, mifeee yeyeeye. Be fɛɛ be ni mikɛ nɔ ko baashã afɔle mahã lɛ lɛ, ejɔɔ mi ni etoɔ mi najiaŋ toi oha.”

¹⁹ Susumɔ nyɛmiyoo Paula ni jɛ Canada ni eye afii 70 lɛ nɔkwɛmɔnɔ lɛ he okwɛ. Nyɛmi yoo nɛɛ miiye hela ko yɛ esɛɛ wu lɛ mli, ni enɛ ehã nyiɛmɔ ewa ehã lɛ. Ewie akɛ: “Eyɛ mli akɛ minyɛɛɛ manyiɛ pii tamɔ mɛi krokomɛi moŋ, shi no esaaa mishiɛmɔ nitsumɔ lɛ he. Mitsɔɔ tɛlifoŋ nɔ odaseyeli kɛ odaseyeli gbɛi krokomɛi anɔ mishiɛɔ, ni miŋɔɔ hegbɛ fɛɛ hegbɛ ni mináa lɛ kɛshiɛɔ. Miyɛ wolo ko ni miŋmala ŋmalɛi kɛ asafo lɛ woji lɛ amli saji komɛi miwo mli, ni mikwɛɔ mli yɛ be kɛ beiaŋ, koni mikɛwo mihe hewalɛ. Miwo wolo nɛɛ gbɛ́i akɛ, ‘Wolo ni Hãa Miyaa nɔ Mifiɔ Shi.’ Wɔnijiaŋ baanyɛ aje wui yɛ be kɛ beiaŋ, shi kɛ́ wɔkɛ wɔjwɛŋmɔ ma Yehowa shiwoi lɛ anɔ lɛ, wɔbaaná hewalɛ hee. Yehowa efee klalo akɛ ebaaye ebua wɔ be fɛɛ be, ekɔɔɔ he eko shihilɛ mli ni wɔbaayaje.” Ekolɛ esoro naagba ni okɛkpeɔ lɛ yɛ Bianca kɛ Paula nɔ lɛ he. Shi ekã shi faŋŋ akɛ, bo hu oyɔse akɛ, Yehowa etsɔ gbɛi srɔtoi anɔ ejɔɔ bo kɛ mɛi krokomɛi ni bɛŋkɛ bo lɛ, aloo jeee nakai? Kɛ́ ohe be kɛsusu gbɛi ni Yehowa tsɔɔ nɔ ejɔɔ bo amrɔ nɛɛ, kɛ bɔ ni ebaajuro bo wɔsɛɛ lɛ he lɛ, obaaná he sɛɛ waa.

20. Kɛ́ wɔtee nɔ wɔsɔmɔ Yehowa kɛ wɔtsui fɛɛ lɛ, mɛni wɔbaaná?

²⁰ Kaahã ohiɛ kpa nɔ kɔkɔɔkɔ akɛ, kɛ́ ofɔse otsuiŋ fɛɛ oshwie Nyɔŋmɔ hiɛ yɛ sɔlemɔ mli lɛ, ebaajɔɔ bo waa. Obaanyɛ oná nɔmimaa akɛ, ‘be ni ofee Nyɔŋmɔ suɔmɔnaa nii ogbe naa lɛ, onine baashɛ shiwoo lɛ mlibaa lɛ nɔ.’ (Heb. 10:35, 36) No hewɔ lɛ, nyɛhãa wɔfea nibii ni baahã wɔhemɔkɛyeli lɛ mli awa, ni wɔjɛ wɔtsuiŋ fɛɛ wɔsɔmɔ Yehowa. Wɔle akɛ kɛ́ wɔfee nakai lɛ, Yehowa baajuro wɔ!​—Kanemɔ Kolosebii 3:23, 24.