1, 2. (a) Te wɔfeɔ tɛŋŋ wɔleɔ akɛ adesai komɛi batsɔmɔ Nyɔŋmɔ nanemɛi? (b) Mɛni he wɔbaasusu yɛ nikasemɔ nɛɛ mli?

KƐJƐ be ni wɔba jeŋ, aahu kɛyashi be ni wɔbaagboi lɛ, suɔmɔ he miihia wɔ. Jeee nuu kɛ yoo teŋ suɔmɔ pɛ, shi moŋ suɔmɔ ni yɔɔ nanemɛi ni bɛŋkɛ kpaakpa ateŋ lɛ hu. Suɔmɔ kroko ko hu yɛ ni he hiaa wɔ fe suɔmɔi krokomɛi fɛɛ. No ji Yehowa suɔmɔ lɛ. Akɛni Nyɔŋmɔ ji Ofe, ni agbɛnɛ hu, anaaa lɛ hewɔ lɛ, mɛi pii heee amɛyeee akɛ adesai baanyɛ abatsɔmɔ enanemɛi ni bɛŋkɛ lɛ kpaakpa. Shi wɔle akɛ, jeee nakai kwraa sane lɛ ji!

² Biblia lɛ gbaa wɔ adesai komɛi ni batsɔmɔ Nyɔŋmɔ nanemɛi lɛ ahe sane. Esa akɛ wɔkase amɛ. Mɛni hewɔ? Ejaakɛ nɔ ko bɛ ni he hiaa yɛ shihilɛ mli fe ni wɔkɛ Nyɔŋmɔ baabɔ naanyo. Mɛi ni kɛ Nyɔŋmɔ bɔ naanyo lɛ ateŋ mɔ kome ji Abraham. (Kanemɔ Yakobo 2:23.) Te fee tɛŋŋ ni Abraham batsɔ Nyɔŋmɔ naanyo lɛ? Abraham hemɔkɛyeli lɛ ji nɔ ni hã ebatsɔ Nyɔŋmɔ naanyo. Biblia lɛ kɛɔ akɛ, lɛ ji ‘mɛi fɛɛ ni  yɔɔ hemɔkɛyeli lɛ atsɛ.’ (Romabii 4:11) Yɛ nikasemɔ nɛɛ mli lɛ, wɔbaasusu nibii komɛi ni tee nɔ yɛ Abraham shihilɛ mli lɛ he. Be ni wɔfeɔ nakai lɛ, bi ohe akɛ, ‘Mɛɛ gbɛ nɔ manyɛ makase Abraham hemɔkɛyeli lɛ koni naanyobɔɔ ni yɔɔ mi kɛ Yehowa teŋ lɛ mli awa?’

3, 4. (a) Mɛɛ shihilɛ eeenyɛ efee akɛ no ji shihilɛ ni ka Abraham hemɔkɛyeli fe fɛɛ? (b) Mɛni hewɔ Abraham bo Nyɔŋmɔ toi be ni ekɛɛ lɛ akɛ ekɛ Isak ayashã afɔle lɛ?

³ Feemɔ Abraham he mfoniri ni enyiɛ blɛoo kɛmiikwɔ gɔŋ ko. ^[1] (Kwɛmɔ shishigbɛ niŋmaa ni yɔɔ sane lɛ naagbee lɛ.) Ehiɛ kakla kɛ nibii ni ebaanyɛ ekɛtsɛ̃ la. Ebi Isak tere lai kɛnyiɛ esɛɛ. Eeenyɛ efee akɛ, gbɛfãa nɛɛ ji gbɛfãa ni wa hã lɛ fe fɛɛ yɛ eshihilɛ mli. Be ni Abraham fãa gbɛ nɛɛ, no mli lɛ egbɔ, eye aaafee afii 125. Shi jeee no hewɔ gbɛfãa lɛ wa hã lɛ lɛ, ejaakɛ eyɛ gbɔmɔtsoŋ hewalɛ lolo. Nɔ moŋ ni ehã gbɛfãa lɛ ewa ji akɛ, Yehowa kɛɛ ekɛ ebi Isak ni eye aaafee afii 25 lɛ ayashã afɔle!​—1 Mose 22:1-8.

⁴ Eeenyɛ efee akɛ, shihilɛ nɛɛ ji shihilɛ ni ka Abraham hemɔkɛyeli fe shihilɛi krokomɛi fɛɛ ni ekɛkpe. Mɛi komɛi kɛɛ Nyɔŋmɔ yitsoŋ wa, ni no hewɔ ekɛɛ Abraham akɛ ekɛ ebi lɛ ayashã afɔle lɛ. Mɛi komɛi hu kɛɛ Abraham sumɔɔɔ ebi lɛ, ni no hewɔ ekpɛlɛ nɔ akɛ ekɛ lɛ baashã afɔle lɛ. Mɛi ni wieɔ nibii ni tamɔ nɛkɛ lɛ bɛ hemɔkɛyeli, ni amɛnuuu nɔ ni hemɔkɛyeli ji lɛ shishi jogbaŋŋ. (1 Korintobii 2:14-16) Abraham susu nɔ ni Nyɔŋmɔ kɛɛ lɛ akɛ eyafee lɛ he jogbaŋŋ, dani ekpɛ eyiŋ akɛ ebaayafee. Ebo Nyɔŋmɔ toi, ejaakɛ ehemɔkɛyeli lɛ mli wa. Ele akɛ, Yehowa ekɛŋ lɛ ni eyafee nɔ ko ni baaye lɛ awui kɛya naanɔ kɔkɔɔkɔ. Abraham le akɛ, kɛ́ ebo Yehowa toi lɛ, Yehowa baajɔɔ lɛ kɛ Isak fɛɛ. Mɛni hã Abraham ná hemɔkɛyeli ni mli wa nakai? Nilee kɛ niiashikpamɔ.

5. Mɛɛ gbɛ nɔ eeenyɛ efee akɛ Abraham tsɔ ebale Yehowa? Ni mɛni nɔ ni ekase yɛ Yehowa he lɛ hã efee?

⁵ Nilee. Abraham da yɛ maŋ ko ni atsɛɔ  lɛ Ur lɛ mli. Mɛi ni yɔɔ Ur maŋ lɛ mli, ni Abraham papa hu fata he lɛ, jáa amale nyɔŋmɔi. (Yoshua 24:2) No hewɔ lɛ, te fee tɛŋŋ ni Abraham bale Yehowa? Biblia lɛ hãa wɔnaa akɛ, Noa binuu Shem ji Abraham wekunyo. Shem gbo be ni Abraham eye aaafee afii 150. Shem he Yehowa nɔ eye waa diɛŋtsɛ, ni eeenyɛ efee akɛ, egba ewekumɛi Yehowa he sane. Ekolɛ, nɛkɛ ji bɔ ni fee ni Abraham bale Yehowa. Nɔ ni Abraham kase yɛ Yehowa he lɛ, hã ebasumɔ Yehowa waa, ni ehe enɔ eye.

6, 7. Mɛɛ gbɛ nɔ niiashikpamɔi ni Abraham ná lɛ hã ehemɔkɛyeli lɛ mli wa?

⁶ Niiashikpamɔ. Mɛi komɛi kɛɔ akɛ, kɛ́ osusu nɔ ko he aahu lɛ, oshweɔ, ni kɛ́ oshwe nɔ ko lɛ, ofeɔ. Nibii ni Abraham kase yɛ Nyɔŋmɔ he lɛ ta etsuiŋ. Ehã ebu “Yehowa ŋwɛi flooflo Nyɔŋmɔ ni ji ŋwɛi kɛ shikpɔŋ tsɛ lɛ” waa. (1 Mose 14:22) Bulɛ ni tamɔ nɛkɛ ji nɔ ni Biblia lɛ tsɛɔ lɛ ‘Nyɔŋmɔ gbeyeishemɔ’ lɛ. (Hebribii 5:7) Nyɔŋmɔ gbeyeishemɔ ji nɔ ni hãa mɔ ko nyɛɔ ekɛ Nyɔŋmɔ bɔɔ naanyo gbagbalii. (Lala 25:14) Ni su nɛɛ ji nɔ ni tsirɛ Abraham ni ebo Yehowa toi lɛ. Shi mɛɛ niiashikpamɔ hã hemɔkɛyeli ni eyɔɔ yɛ Yehowa mli lɛ mli wa?

⁷ Nyɔŋmɔ kɛɛ Abraham kɛ Sara akɛ amɛfã kɛjɛ Ur maŋ lɛ mli, he ni amɛyɔɔ lɛ, ni amɛyahi maŋ kroko nɔ. Yɛ nɔ ni Nyɔŋmɔ kɛɛ amɛ lɛ naa lɛ, belɛ ebaabi ni nuumo kɛ yoomo nɛɛ ahi bui amli kɛyashi amɛbaagboi. Abraham le akɛ gbɛfãa nɛɛ kɛ amɛwala baawo oshãra mli shii abɔ. Fɛɛ sɛɛ lɛ, etswa efai shi akɛ ebaabo Yehowa toi. Enɛ hewɔ lɛ, Yehowa jɔɔ lɛ ni ebu ehe. Akɛ nɔkwɛmɔnɔ lɛ, Sara hefɛo lɛ hewɔ lɛ, maŋtsɛmɛi enyɔ sɔŋŋ ŋɔ lɛ, ni kulɛ amɛmiitao ebatsɔ amɛŋa. Enɛ kɛ Abraham wala wo oshãra mli. Shi Yehowa tsɔ naakpɛɛ gbɛ nɔ ebu Abraham kɛ Sara he shii enyɔ lɛ fɛɛ. (1 Mose 12:10-20; 20:2-7, 10-12, 17, 18) Niiashikpamɔi nɛɛ hã Abraham hemɔkɛyeli lɛ mli bawa waa.

8. Te wɔbaafee tɛŋŋ wɔná nilee kɛ niiashikpamɔ koni naanyobɔɔ ni yɔɔ wɔ kɛ Yehowa teŋ lɛ mli awa?

⁸ Ani wɔbaanyɛ wɔkɛ Yehowa abɔ naanyo gbagbalii? Hɛɛ, wɔbaanyɛ! Esa akɛ wɔkase Yehowa he nii taakɛ Abraham fee lɛ. Kɛ́ wɔfee nakai lɛ, wɔbaaná nilee kɛ niiashikpamɔi ni baaye abua wɔ ni wɔkɛ Yehowa abɔ naanyo. Ŋmɛnɛ lɛ, wɔyɛ Biblia lɛ, ni Biblia lɛ hãa wɔleɔ nibii pii ni Abraham náaa ale. (Daniel 12:4; Romabii 11:33) Biblia lɛ mli eyi obɔ kɛ Yehowa, ni ji “ŋwɛi kɛ shikpɔŋ tsɛ lɛ,” he  nilee. Kɛ́ wɔkase Biblia lɛ, wɔbaasumɔ Yehowa, ni no baahã wɔbu lɛ waa diɛŋtsɛ. Nɛkɛ suɔmɔ kɛ bulɛ nɛɛ baatsirɛ wɔ ni wɔbo lɛ toi. Ni kɛ́ wɔbo lɛ toi lɛ, wɔbaaná niiashikpamɔi pii, ejaakɛ ebaabu wɔhe ni ebaajɔɔ wɔ. Ni niiashikpamɔi nɛɛ baahã wɔhemɔkɛyeli lɛ mli awa. Kɛ́ wɔkɛ wɔnyɛmɔ fɛɛ sɔmɔ Yehowa lɛ, wɔtsui baanyɔ wɔmli, wɔtoiŋ baajɔ wɔ, ni wɔmii baashɛ wɔhe. (Lala 34:9; Abɛi 10:22) Kɛ́ wɔtee nɔ wɔkase Yehowa he nii, ni wɔna bɔ ni ejɔɔ wɔ ni ebuɔ wɔhe lɛ, wɔ kɛ lɛ teŋ naanyobɔɔ lɛ mli baawa waa.

9, 10. (a) Kɛ́ wɔmiisumɔ ni mɔ ko aya nɔ afee wɔnaanyo lɛ, mɛni esa akɛ wɔfee? (b) Mɛni tsɔɔ akɛ Abraham hiɛ sɔ Yehowa naanyo ni eji lɛ, ni efee nibii ni baahã nakai naanyobɔɔ lɛ aya nɔ ahi shi?

⁹ Naanyobɔɔ kpakpa tamɔ jwetri ko ni jara wa. (Kanemɔ Abɛi 17:17.) Shi kɛ́ wɔkwɛɛɛ jwetri nɛɛ nɔ jogbaŋŋ lɛ, ebaafite. Etamɔ fɔfɔi fɛfɛo ko ni esa akɛ ashwie nɔ nu, ni hiŋmɛi ahi he be fɛɛ be koni ekaŋala. Abraham hiɛ sɔ Yehowa naanyo ni eji lɛ waa, ni efee nibii ni baahã nakai naanyobɔɔ lɛ aya nɔ ahi shi. Mɛni ji nibii nɛɛ ekomɛi?

¹⁰ Abraham tee nɔ efee nibii ni baahã eya nɔ eshe Nyɔŋmɔ gbeyei ni ebo lɛ toi. Akɛ nɔkwɛmɔnɔ lɛ, kɛjɛ be ni ekɛ eweku lɛ kɛ etsuji lɛ fã akɛ amɛmiiya Kanaan lɛ, aahu kɛyashi be ni amɛyashɛ jɛmɛ lɛ, ebi Yehowa gbɛtsɔɔmɔ yɛ yiŋ srɔtoi fɛɛ ni ekpɛ lɛ amli. Afi kome dani abaafɔ Isak lɛ, Yehowa kɛɛ Abraham akɛ efolɔ hii fɛɛ ni yɔɔ eshĩa lɛ ketia. No mli lɛ, eye afii 99. Ani Abraham ta Yehowa daaŋ yɛ nɔ ni efã lɛ akɛ efee lɛ hewɔ? Ani ekɛ saji jiejie enaa koni ekabo gbɛtsɔɔmɔ nɛɛ toi? Dabi, efeee nakai. Ekɛ ehiɛ fɔ̃ Yehowa nɔ, ni etsu nɔ ni afã lɛ akɛ efee lɛ he nii “yɛ nakai gbi lɛ nɔ nɔŋŋ.”​—1 Mose 17:10-14, 23.

11. Mɛni hã Abraham ye etsui be ni Yehowa kɛɛ ebaakpãtã Sodom kɛ Gomora hiɛ lɛ? Mɛɛ gbɛ nɔ Yehowa tsɔ ejaje ejwɛŋmɔ?

¹¹ Akɛni Abraham bo Yehowa toi be fɛɛ be yɛ nibii ni abuɔ akɛ amɛjeee nɔ ko tsɔ lɛ amli po hewɔ lɛ, amɛnaanyobɔɔ lɛ mli bawa. Enyɛ ekɛ Yehowa gba nɔ fɛɛ nɔ he sane, ni kɛ́ enuuu nɔ ko shishi lɛ, ebiɔ lɛ. Akɛ nɔkwɛmɔnɔ lɛ, be ni Yehowa wie akɛ ebaakpãtã Sodom kɛ Gomora hiɛ lɛ, sane lɛ gba Abraham naa. Eyasusu akɛ mɛi kpakpai komɛi baagboi be ni akpãtãa nakai maji fɔji lɛ ahiɛ lɛ. Ekolɛ eshe gbeyei ehã enyɛmi nuu Haran bi Lot kɛ eweku lɛ, ejaakɛ no mli lɛ amɛyɛ Sodom. Abraham jɛ heshibaa mli ekɛ Yehowa, ni ji “shikpɔŋ fɛɛ nɔ kojolɔ lɛ” wie sane lɛ he, ejaakɛ ehe eye akɛ, Yehowa baafee nɔ ni ja. Yehowa to etsui shi ehã enaanyo lɛ, ni eye ebua lɛ ni ena akɛ, enaa mɔbɔ. Yehowa hã Abraham le akɛ, kɛ́ eba lɛ akɛ ebaakpãtã mɛi ahiɛ lɛ, ekpãtãaa jalɔi ahiɛ efutuuu mɛi fɔji.​—1 Mose 18:22-33.

12, 13. (a) Mɛɛ gbɛ nɔ Abraham nilee kɛ eniiashikpamɔ lɛ ye ebua lɛ sɛɛ mli? (b) Mɛni hewɔ wɔbaanyɛ wɔkɛɛ akɛ Abraham he Yehowa nɔ eye lɛ?

 ¹² No hewɔ lɛ, wɔnaa faŋŋ akɛ, nilee kɛ niiashikpamɔi ni Abraham ná lɛ ye ebua lɛ ni efee nibii ni baahã ekɛ Yehowa teŋ naanyobɔɔ lɛ mli aya nɔ awa. Ebale Yehowa akɛ mɔ ko ni toɔ etsui shi, ni naa mɔbɔ, mɔ ko ni buɔ etsuji ahe ni ebaanyɛ ekɛ ehiɛ afɔ̃ enɔ. Enɛ hewɔ lɛ, sɛɛ mli be ni Yehowa kɛɛ lɛ akɛ ekɛ ebi lɛ ayashã afɔle lɛ, ebaaa eyiŋ akɛ Yehowa yitsoŋ wa loo ebɛ musuŋtsɔlɛ. Ele akɛ, Yehowa nyɛŋ etsake trukaa nakai. Mɛni Abraham wie ni hãa wɔnaa nakai?

¹³ Dani Abraham baashi etsuji lɛ, ekɛɛ amɛ akɛ: “Nyɛkɛ teji lɛ ahia biɛ; ni mikɛ oblanyo lɛ aya jɛi, ni wɔyasɔle, ni wɔku wɔsɛɛ wɔba nyɛŋɔɔ ekoŋŋ.” (1 Mose 22:5) Ani no mli lɛ lakamɔ Abraham lakaa etsuji lɛ? Dabi. Biblia lɛ kɛɔ akɛ, Abraham le akɛ Yehowa baanyɛ atee Isak shi kɛjɛ gbohii ateŋ. (Kanemɔ Hebribii 11:19.) Abraham le akɛ, Yehowa hã lɛ hewalɛ ni enyɛ efɔ be ni ekɛ Sara fɛɛ egbɔlɔ. (Hebribii 11:11, 12, 18) No hewɔ lɛ, eyɔse akɛ nɔ ko nɔ ko bɛ ni Yehowa nyɛŋ afee. No mli lɛ, Abraham leee bɔ ni nibii anaa baayakpa ahã. Shi ená hemɔkɛyeli akɛ, kɛ́ ebi lɛ gbo po, Yehowa baatee lɛ shi, bɔ ni afee ni Nyɔŋmɔ shiwoi lɛ fɛɛ aba mli. Enɛ hewɔ atsɛɔ Abraham akɛ ‘mɛi fɛɛ ni yɔɔ hemɔkɛyeli lɛ atsɛ’ lɛ.

14. Mɛni ji nibii komɛi ni ole akɛ Yehowa miisumɔ ni ofee shi efeemɔ wa hã bo? Mɛɛ gbɛ nɔ Abraham nɔkwɛmɔnɔ lɛ baanyɛ aye abua bo?

¹⁴ Ŋmɛnɛ lɛ, Yehowa ekɛŋ wɔ ni wɔkɛ wɔbii ayashã afɔle wɔhã lɛ. Kɛ̃lɛ, eekpa gbɛ akɛ wɔbaabo emlai lɛ fɛɛ toi. Bei komɛi lɛ, wɔnuŋ nɔ hewɔ ni Yehowa kɛɔ wɔ akɛ wɔfee nɔ ko lɛ shishi, aloo ekolɛ wɔbaanu he akɛ nɔ ni etaoɔ wɔfee lɛ wa tsɔ. Ani bei komɛi lɛ, onuɔ he nakai? Mɛi komɛi yɛ ni shiɛmɔ nitsumɔ lɛ wa hã amɛ. Ekolɛ, amɛhiɛ gboɔ, ni ewa kɛhã amɛ akɛ amɛkɛ mɛi ni amɛleee amɛ lɛ baawie. Mɛi komɛi hu yɛ ni ewa kɛhã amɛ akɛ amɛbaatsi amɛhe kɛje nibii komɛi ni mɛi ni amɛkɛyaa skul loo amɛkɛtsuɔ nii lɛ feɔ lɛ ahe. (2 Mose 23:2; 1 Tesalonikabii 2:2) Kɛ́ ewa kɛhã bo akɛ obaafee nɔ ko ni Yehowa efã bo akɛ ofee lɛ, susumɔ hemɔkɛyeli kɛ ekãa ni sa kadimɔ ni Abraham jie lɛ kpo lɛ he. Kɛ́ wɔsusu hii kɛ yei anɔkwafoi ni hi shi yɛ blema lɛ anɔkwɛmɔnɔ lɛ he lɛ, ebaanyɛ ekanya wɔ ni wɔkase amɛ. Ni no baahã wekukpaa ni yɔɔ wɔ kɛ Yehowa, ni ji wɔ-Naanyo lɛ teŋ lɛ mli awa.​—Hebribii 12:1, 2.

15. Mɛni hewɔ wɔbaanyɛ wɔkɛɛ kɛ nɔmimaa akɛ Abraham shwaaa ehe kɔkɔɔkɔ akɛ ebo Yehowa toi be fɛɛ be lɛ?

¹⁵ Ani Abraham shwa ehe akɛ ebo Yehowa toi be fɛɛ be? Dabi. Biblia lɛ kɛɔ akɛ, Abraham ye afii 175 dani egbo, ni akɛ, “ehi shi jogbaŋŋ” ni “etsui nyɔ emli.” (1 Mose 25:8, NWT) Ni tsɔɔ akɛ, be ni nuumo Abraham susu bɔ ni ehi shi  ehã lɛ he lɛ, etsui nyɔ emli waa. Mɛni hewɔ? Ejaakɛ kɛyashi egbo lɛ, ehãaa nɔ ko nɔ ko he ahia lɛ fe naanyobɔɔ ni yɔɔ ekɛ Yehowa teŋ lɛ. Eyɛ mli akɛ, Biblia lɛ kɛɛ be ni Abraham gbo lɛ “nuumo ni, ni etsui nyɔ emli” moŋ, shi no etsɔɔɔ akɛ, no mli lɛ esumɔɔɔ ni ehiɔ shi kɛyaa naanɔ.

16. Mɛni ji nibii komɛi ni baahã Abraham mii ashɛ ehe waa kɛ́ atee lɛ shi kɛba Paradeiso lɛ mli?

¹⁶ Biblia lɛ kɛɔ akɛ, no mli lɛ, Abraham miimɛ “maŋ ni yɔɔ faneshii diɛŋtsɛ ní ehe ŋaatolɔ kɛ emalɔ ji Nyɔŋmɔ lɛ.” (Hebribii 11:10) Abraham ná hemɔkɛyeli akɛ, wɔsɛɛ lɛ, Nyɔŋmɔ Maŋtsɛyeli lɛ, ni ji maŋ ni emɛɔ lɛ, baaye shikpɔŋ lɛ fɛɛ nɔ, ni ebaahi nakai Maŋtsɛyeli lɛ shishi. Ni ŋwanejee ko bɛ he akɛ, ebaahi shishi hu lɛɛlɛŋ! Feemɔ bɔ ni Abraham mii baashɛ ehe kɛ́ atee lɛ shi kɛba shikpɔŋ nɔ Paradeiso lɛ mli lɛ he mfoniri okwɛ. Emii baashɛ ehe waa akɛ ená hegbɛ akɛ ebaaya nɔ ehã ekɛ Nyɔŋmɔ teŋ naanyobɔɔ lɛ mli awa. Emii baashɛ ehe akɛ enɔkwɛmɔnɔ kpakpa lɛ eye ebua Nyɔŋmɔ tsuji afii akpei abɔ! Kɛ́ atee lɛ shi lɛ, ebaaná ele akɛ, afɔle ni eyashã yɛ Moria Gɔŋ lɛ nɔ lɛ feɔ nɔ ko ni he hiaa fe no kwraa he mfoniri. (Hebribii 11:19) Ni ebaaná ele hu akɛ, bɔ ni enu he ehã be ni efimɔɔ ebi Isak koni ekɛ lɛ ashã afɔle lɛ, ye ebua hii kɛ yei anɔkwafoi akpekpei abɔ. Eye ebua amɛ ni amɛnu bɔ ni Yehowa nu he ehã be ni ekɛ e-Bi Yesu Kristo hã akɛ kpɔmɔnɔ kɛhã adesai lɛ shishi. (Yohane 3:16) Abraham nɔkwɛmɔnɔ lɛ eye ebua wɔ fɛɛ. Ehã wɔhiɛ esɔ kpɔmɔnɔ lɛ, ni ji gbɛ ni fe fɛɛ ni Nyɔŋmɔ etsɔ nɔ ejie suɔmɔ kpo etsɔɔ wɔ lɛ waa!

17. Mɛni otswa ofai shi akɛ obaafee? Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁷ Nyɛhãa wɔtswaa wɔfai shi akɛ, wɔbaakase Abraham hemɔkɛyeli lɛ. Nilee kɛ niiashikpamɔ ye ebua Abraham, ni nomɛi nɔŋŋ baaye abua wɔ. Kɛ́ wɔtee nɔ wɔkase Yehowa he nii, ni wɔbo lɛ toi lɛ, ebaajɔɔ wɔ ni ebaabu wɔhe. (Kanemɔ Hebribii 6:10-12.) Nyɛhãa wɔyaa nɔ wɔfea nibii ni baahã Yehowa afee wɔ-Naanyo kɛya naanɔ! Yɛ nikasemɔ ni nyiɛ sɛɛ lɛ mli lɛ, wɔbaasusu mɛi etɛ komɛi hu ni batsɔmɔ Nyɔŋmɔ nanemɛi ni bɛŋkɛ lɛ kpaakpa lɛ ahe.