MƐƐ gbi ji gbi ni omii shɛ ohe fe fɛɛ yɛ shihilɛ mli? Yɛ mɛi komɛi agbɛfaŋ lɛ, no ji gbi ni amɛbote gbalashihilɛ mli, loo gbi ni amɛfɔ amɛkromɔ bi lɛ. Shi kɛ́ abaptisi bo lɛ, eeenyɛ efee akɛ, gbi ni abaptisi bo lɛ ji gbi ni he hiaa fe fɛɛ ni omii shɛ ohe fe fɛɛ yɛ shihilɛ mli. Nakai gbi lɛ, onyɛmimɛi Kristofoi lɛ amii shɛ amɛhe waa akɛ, ohã amɛna faŋŋ akɛ, osumɔɔ Nyɔŋmɔ kɛ otsui muu fɛɛ, osusuma muu fɛɛ, ojwɛŋmɔ muu fɛɛ, kɛ onyɛmɔ fɛɛ!​—Marko 12:30.

Ekã shi faŋŋ akɛ, kɛjɛ nakai gbi lɛ nɔ kɛbaa nɛɛ, okɛ miishɛɛ miisɔmɔ Yehowa. Shi, shiɛlɔi komɛi amiishɛɛ etã. Te eba lɛ tɛŋŋ? Ni mɛɛ yiŋtoi ahewɔ esa akɛ wɔya nɔ wɔsɔmɔ Yehowa kɛ miishɛɛ lɛ?

Maŋtsɛyeli lɛ he sane lɛ hãa wɔmii shɛɔ wɔhe waa. Mɛni hewɔ? Ejaakɛ wɔle akɛ Yehowa baatsɔ Maŋtsɛyeli lɛ nɔ ejie efɔŋfeemɔ fɛɛ ni yaa nɔ yɛ jeŋ fɔŋ nɛɛ mli lɛ kɛya, ní ekɛ jeŋ hee lɛ aba. Zefania 1:14 lɛ kɛɔ akɛ: “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa.” Shi kɛ́ efeɔ wɔ akɛ Yehowa gbi lɛ etsɛ kɛbaa lɛ, ebaanyɛ efite wɔmiishɛɛ. Ni kɛ́ eba lɛ nakai lɛ, ekãa ni wɔkɛsɔmɔɔ Nyɔŋmɔ lɛ naa baaba shi.​—Abɛi 13:12.

Kɛ́ wɔkɛ wɔnyɛmimɛi lɛ shara lɛ, ewoɔ wɔ hewalɛ ni wɔya nɔ wɔsɔmɔ Yehowa kɛ miishɛɛ. Eeenyɛ efee akɛ, bɔ ni Yehowa webii lɛ baa amɛjeŋ jogbaŋŋ lɛ ji nɔ ni gbala wɔ kɛba anɔkwale lɛ mli, ni no nɔŋŋ eye ebua wɔ ni wɔkɛ miishɛɛ miisɔmɔ Nyɔŋmɔ lɛ. (1 Petro 2:12) No hewɔ lɛ, kɛ́ wɔnyɛmimɛi lɛ ateŋ mɔ ko yagbo Nyɔŋmɔ nɔ toi, ni atsɔse lɛ lɛ, ebaanyɛ etɔ̃tɔ̃ wɔnane loo efite wɔmiishɛɛ po.

Nɔ kroko ni baanyɛ afite wɔmiishɛɛ ji, heloonaa nibii asɛɛtiumɔ. Nibii pii yɛ jeŋ fɔŋ nɛɛ mli ni he ehiaaa wɔ. Shi kɛ́ wɔkwɛɛɛ ni ahi lɛ, bɔ ni atswaa nibii nɛɛ ahe adafi lɛ baahã wɔsusu akɛ amɛhe miihia wɔ, ni esa akɛ wɔná eko. No hewɔ lɛ, nyɛhãa wɔkaia nɔ ni Yesu wie lɛ, akɛ: “Mɔ ko nyɛŋ atsɔ nyɔŋ ehã nuŋtsɔmɛi enyɔ; ejaakɛ no lɛ ebaanyɛ mɔ kome ni ebaasumɔ mɔ kroko lɛ, aloo ebaakpɛtɛ mɔ kome he ni ebaagbe mɔ kroko lɛ he guɔ. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.” (Mateo 6:24) Wɔnyɛŋ wɔtiu heloonaa nibii asɛɛ, ni yɛ nakai beiaŋ nɔŋŋ lɛ, wɔkɛ miishɛɛ asɔmɔ Yehowa.

Yehowa sɔɔmɔ jeee jatsu kɛhã mɛi ni sumɔɔ lɛ lɛ. (1 Yohane 5:3) Kaimɔ nɔ ni Yesu wie lɛ, akɛ: “Nyɛbaa miŋɔɔ, nyɛ mɛi fɛɛ ni eetɔ nyɛ, ní nyɛtere jatsui ni tsiitsii, ni mahã nyɛhe ajɔ nyɛ. Nyɛwóa mikɔɔŋtso lɛ nyɛfɔ̃a nyɛnɔ, ní nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ. Ejaakɛ mikɔɔŋtso lɛ teremɔ waaa, ni mijatsu lɛ etsiii.” (Mateo 11:28-30) Anɔkwa Kristofoi ni wɔji lɛ hãa wɔtsui nyɔɔ wɔmli, ni wɔmii shɛɔ wɔhe. No hewɔ lɛ, wɔyɛ yiŋtoi kpakpai pii ahewɔ  ni esa akɛ wɔkɛ miishɛɛ asɔmɔ Yehowa. Nyɛhãa wɔsusua amɛmli etɛ komɛi ahe wɔkwɛa.​—Habakuk 3:18.

Mɔ ni wɔsɔmɔɔ lɛ ji mɔ ni hã wɔ wala, ni lɛ nɔŋŋ ji miishɛɛ Nyɔŋmɔ lɛ. (Bɔfoi 17:28; 1 Timoteo 1:11) Yehowa ji mɔ ni bɔ wɔ. Eji jeee lɛ kulɛ, nɛgbɛ wɔyɔɔ? No hewɔ lɛ, nyɛhãa wɔyaa nɔ wɔsɔmɔa lɛ kɛ miishɛɛ, ekɔɔɔ he eko afii abɔ ni wɔkɛhi anɔkwale lɛ mli.

Susumɔ nyɛmi nuu ko ni atsɛɔ lɛ Héctor lɛ he okwɛ. Ekɛ afii 40 esɔmɔ Yehowa akɛ nɔkwɛlɔ gbɛfalɔ. Amrɔ nɛɛ egbɔ, shi ekã he eesɔmɔ Yehowa kɛ miishɛɛ. (Lala 92:13-15) Bianɛ lɛ, Héctor ŋa bɛ hewalɛ, ni enɛ hewɔ lɛ, enyɛɛɛ efee babaoo yɛ Yehowa sɔɔmɔ lɛ mli tamɔ be ko ni eho. Fɛɛ sɛɛ lɛ, ekɛ miishɛɛ miisɔmɔ Nyɔŋmɔ. Ewie akɛ: “Eyɛ mli akɛ hela ehã miŋa miigbɔjɔ, ni mináaa ekwɛmɔ mlɛo moŋ, shi mihãaa enɛ afite miishɛɛ ni mikɛsɔmɔɔ anɔkwa Nyɔŋmɔ lɛ. Le ni mile akɛ Yehowa ji mɔ ni bɔ mi, ni akɛ nɔ ko hewɔ ebɔ adesai lɛ pɛ kɛkɛ po hewɔ lɛ, misumɔɔ lɛ waa, ni mijɛɔ mitsuiŋ misɔmɔɔ lɛ. Mibɔɔ mɔdɛŋ ni mikɛ ekãa atsu shiɛmɔ nitsumɔ lɛ, ni miyaa nɔ misusuɔ Maŋtsɛyeli lɛ he hiɛnɔkamɔ lɛ he, bɔ ni afee ni mimiishɛɛ akatã.”

Yehowa ehã Yesu kɛ ewala ebashã afɔle ehã wɔ koni wɔná miishɛɛ yɛ shihilɛ mli. Anɔkwa, “Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala.” (Yohane 3:16) Kɛ́ wɔkɛ wɔnifeemɔ tsɔɔ akɛ wɔheɔ wɔyeɔ akɛ Nyɔŋmɔ baanyɛ atsɔ kpɔmɔnɔ lɛ nɔ ekɛ wɔhe eshai afa wɔ lɛ, ekɛ baafa wɔ lɛɛlɛŋ ni wɔbaaná naanɔ wala. Ani esaaa akɛ wɔhiɛ sɔɔ nɔ kpakpa nɛɛ ni Nyɔŋmɔ efee ehã wɔ lɛ? Kɛ́ wɔhiɛ sɔɔ kpɔmɔnɔ lɛ, no baatsirɛ wɔ ni wɔsɔmɔ Yehowa kɛ miishɛɛ.

Nyɛmi nuu ko ni kulɛ eyɔɔ Mexico, ni atsɛɔ lɛ Jesús lɛ wie akɛ: “Minitsumɔ lɛ ye mi nyɔŋ, ni bei komɛi lɛ mikɛ ŋmɛlɛtswai babaoo tsu nii kɛtsara nɔ gbii abɔ, tsɛbelɛ mɔ ko ekɛko mi akɛ mifee nakai. Mifee nakai koni maná shika pii. Kɛkɛ ni mibakase Yehowa he nii, ni mina bɔ ni ekɛ e-Bi koome lɛ hã yɛ adesai ahewɔ. Enɛ hã mishwe waa akɛ masɔmɔ lɛ. No hewɔ lɛ, mijɔɔ miwala nɔ mihã Yehowa, mikpa nitsumɔ lɛ, eyɛ mli akɛ mikɛ afii 28 sɔŋŋ etsu moŋ, ni mikɛ mihe wo be fɛɛ sɔɔmɔ nitsumɔ lɛ mli.” Jesús kɛ afii babaoo sɔmɔ Yehowa kɛ miishɛɛ.

Wɔbaa wɔjeŋ jogbaŋŋ, ni no hãa wɔmii shɛɔ wɔhe. Ani okaiɔ bɔ ni oshihilɛ ji dani obale Yehowa lɛ? Bɔfo Paulo kai Kristofoi ni yɔɔ Roma lɛ akɛ, tsutsu ko lɛ, amɛji “esha nyɔji,” shi amrɔ nɛɛ amɛbatsɔmɔ “jalɛ nyɔji,” ejaakɛ amɛmiiba amɛjeŋ  jogbaŋŋ. Ewie akɛ enɛ hewɔ lɛ, amɛná naanɔ wala he hiɛnɔkamɔ. (Romabii 6:17-22) Wɔ hu wɔhiɔ shi yɛ Yehowa shishitoo mlai anaa, ni wɔbaa wɔjeŋ jogbaŋŋ. Enɛ hewɔ lɛ, wɔye wɔhe kɛjɛ naagbai ni mɛi ni baa amɛjeŋ basabasa lɛ náa lɛ ahe. Ani enɛ jeee miishɛɛ sane?

Susumɔ nyɛmi nuu ko ni atsɛɔ lɛ Jaime lɛ he okwɛ. Dani ebaabale anɔkwale lɛ, no mli lɛ, eheɔ sutsakemɔ tsɔɔmɔ lɛ eyeɔ, ni eheee eyeee akɛ Nyɔŋmɔ ko yɛ. Nakai beiaŋ hu lɛ, enɔɔ atswɛrɛ. Be ni ebɔi Kristofoi akpeei yaa lɛ, suɔmɔ ni nyɛmimɛi lɛ jieɔ lɛ kpo lɛ ta etsuiŋ waa. Jaime kpa Yehowa fai ni eye ebua lɛ ni ehe enɔ eye, ni no dani enyɛ etsake eshihilɛ. Ewie akɛ: “Fiofio lɛ, mibana akɛ Nyɔŋmɔ mɔbɔnalɔ ko yɛ, ni eji Tsɛ ni yɔɔ suɔmɔ.” Ewie kɛfata he akɛ: “Yehowa mlai kɛ eshishitoo mlai ni mikɛtsu nii lɛ ebu mihe. Eji jeee no kulɛ, benɛ agbe mi, tamɔ bɔ ni agbe minanemɛi ni be ko ni eho lɛ mikɛ amɛ nɔɔ atswɛrɛ lɛ. Yehowa ni misɔmɔɔ amrɔ nɛɛ ehã miná miishɛɛ waa.”

Mɛɛ jwɛŋmɔ esa akɛ wɔná be ni wɔmɛɔ jeŋ fɔŋ nɛɛ naagbee lɛ? Esa akɛ wɔkai akɛ, Nyɔŋmɔ suɔmɔnaa nii wɔfeɔ lɛ, ni akɛ, no baahã wɔná naanɔ wala. “No hewɔ lɛ, nyɛkahãa ekpakpafeemɔ miitɔa wɔ, ejaakɛ kɛ́ efeemɔ etɔɔɔ wɔ lɛ, wɔbaakpa eyibii yɛ be ni sa mli.” (Galatiabii 6:8, 9) Nyɛhãa wɔkpaa Yehowa fai ni eye ebua wɔ ni wɔfi shi, wɔmia wɔhiɛ wɔjie sui ni baahã abaa wɔyi kɛfo “amanehulu kpeteŋkpele” lɛ kpo, ni wɔya nɔ wɔkɛ miishɛɛ asɔmɔ lɛ.​—Kpojiemɔ 7:9, 13, 14; Yakobo 1:2-4.

Wɔle akɛ kɛ́ wɔfi shi lɛ, Yehowa baajɔɔ wɔ, ejaakɛ ele deŋme ni wɔgboɔ kɛ suɔmɔ ni wɔjieɔ lɛ kpo yɛ lɛ kɛ egbɛ́i lɛ hewɔ lɛ. Kɛ́ wɔtee nɔ wɔsɔmɔ Yehowa kɛ miishɛɛ lɛ, wɔ hu wɔbaanyɛ wɔwie, taakɛ lalatsɛ David wie lɛ, akɛ: “Mikɛ Yehowa toɔ mihiɛ daa: ní eyɔɔ mininejurɔ nɔ nɛɛ, mididãŋ. Hewɔ lɛ mitsui enyɔ mimli, ni minunyam lɛ miinya, ni miheloo hu aaahi shi shweshweeshwe.”​—Lala 16:8, 9.