1, 2. (a) Mɛni Yehowa egba akɛ ebaaya nɔ yɛ wɔbei nɛɛ amli? (b) Mɛɛ sanebimɔi ahe wɔbaasusu yɛ nikasemɔ nɛɛ mli? (Kwɛmɔ mfoniri ni yɔɔ nikasemɔ lɛ shishijee lɛ.)

YEHOWA egba akɛ, yɛ wɔbei nɛɛ amli lɛ, “hii nyɔŋma ni jɛ jeŋmaji anɔ wiemɔi srɔtoi fɛɛ mli aaamɔ Yudanyo kome atade naamuu mli, amɛaakɛɛ: Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” (Zakaria 8:23) “Yudanyo” lɛ damɔ shi kɛhã mɛi ni Nyɔŋmɔ kɛ emumɔ krɔŋkrɔŋ lɛ efɔ amɛ mu lɛ. Gbɛ́i kroko ni akɛle amɛ ji “Nyɔŋmɔ Israel.” (Galatiabii 6:16) “Hii nyɔŋma” lɛ damɔ shi kɛhã mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ. Amɛle akɛ, Yehowa ejɔɔ mɛi ni afɔ amɛ mu lɛ, ni amɛnuɔ he akɛ, eji hegbɛ kpele ni amɛná akɛ amɛkɛ mɛi ni afɔ amɛ mu lɛ baafee ekome kɛsɔmɔ lɛ.

² Yesu wie nɔ ko ni kɛ gbalɛ nɛɛ kpãa gbee. Ewie akɛ Nyɔŋmɔ webii fɛɛ baafee ekome kɛsɔmɔ lɛ. Etsɛ mɛi ni baaya ŋwɛi lɛ “tooku bibioo,” ni etsɛ mɛi ni baahi shikpɔŋ lɛ nɔ lɛ “gwantɛŋi krokomɛi.” Shi ewie akɛ kui enyɔ nɛɛ baatsɔ “tooku kome,” ni amɛbaahi “tookwɛlɔ kome” shishi. Tookwɛlɔ kome nɛɛ ji lɛ, Yesu lɛ. (Luka 12:32; Yohane 10:16) Enɛ hewɔ lɛ, ekolɛ mɔ ko baabi akɛ: (1) Ani esa akɛ gwantɛŋi krokomɛi lɛ ale mɛi fɛɛ ni  afɔ amɛ mu ni yɔɔ ŋmɛnɛ lɛ agbɛ́i? (2) Te esa akɛ mɛi ni afɔ amɛ mu lɛ afee amɛnii amɛhã tɛŋŋ? (3) Kɛ́ mɛi ni yɔɔ misafo lɛ mli lɛ ateŋ mɔ ko bɔi aboloo lɛ yeli kɛ wain lɛ numɔ yɛ Kaimɔ lɛ shishi lɛ, te esa akɛ mafee minii mahã tɛŋŋ yɛ ehe? (4) Kɛ́ mina akɛ mɛi ni yeɔ aboloo lɛ ni amɛnuɔ wain lɛ yɛ Kaimɔ lɛ shishi lɛ ayi miifa lɛ, mɛni hewɔ esaaa akɛ egbaa minaa? Nikasemɔ nɛɛ baahã sanebimɔi nɛɛ ahetoo.

3. Mɛni hewɔ wɔnyɛŋ wɔkɛɛ kɛ nɔmimaa akɛ mɔ ko fata mɛi 144,000 lɛ ahe lɛ?

³ Ani esa akɛ gwantɛŋi krokomɛi lɛ ale mɛi fɛɛ ni afɔ amɛ mu ni yɔɔ ŋmɛnɛ lɛ agbɛ́i? Dabi. Mɛni hewɔ? Ejaakɛ wɔnyɛŋ wɔwie kɛ nɔmimaa akɛ mɛi ni afɔ amɛ mu lɛ ateŋ mɔ fɛɛ mɔ nine baashɛ ejuromɔnɔ lɛ nɔ. [1] (Kwɛmɔ shishigbɛ niŋmaa ni yɔɔ sane lɛ naagbee lɛ.) Eyɛ mli akɛ Nyɔŋmɔ ehala amɛ akɛ amɛbaaya ŋwɛi moŋ, shi ja amɛye anɔkwa kɛyawula shi dani amɛnine baashɛ amɛjuromɔnɔ lɛ nɔ. Satan le enɛ, ni no hewɔ ebɔɔ mɔdɛŋ akɛ ebaatsɔ “amale gbalɔi” anɔ elaka amɛ lɛ. (Mateo 24:24) Kristofoi ni afɔ amɛ mu lɛ diɛŋtsɛ po nyɛŋ awie kɛ nɔmimaa akɛ amɛnine baashɛ amɛjuromɔnɔ lɛ nɔ. Esa akɛ amɛmɛ kɛyashi Yehowa diɛŋtsɛ baahã amɛle faŋŋ akɛ, amɛji anɔkwafoi. Enɛ ji nɔ ni atsɛɔ lɛ naagbee naasɔomɔ lɛ. Yɛ mɛi ni gboiɔ dani “amanehulu kpeteŋkpele” lɛ baaje shishi lɛ agbɛfaŋ lɛ, Yehowa sɔoɔ amɛnaa nɔ ni ji naagbee nɔ dani amɛgboiɔ. Yɛ mɛi ni eshwɛ lɛ agbɛfaŋ lɛ, ebaafee nakai be ni eshwɛ fioo ni amanehulu kpeteŋkpele lɛ baaje shishi.​—Kpojiemɔ 2:10; 7:3, 14.

4. Kɛ́ wɔnyɛŋ wɔle mɛi fɛɛ ni afɔ amɛ mu ni yɔɔ shikpɔŋ lɛ nɔ ŋmɛnɛ lɛ agbɛ́i lɛ, belɛ, te wɔbaafee tɛŋŋ ‘wɔkɛ amɛ aya’ lɛ?

⁴ Kɛ́ wɔnyɛŋ wɔle mɛi fɛɛ ni afɔ amɛ mu ni yɔɔ shikpɔŋ lɛ nɔ ŋmɛnɛ lɛ agbɛ́i lɛ, belɛ, te gwantɛŋi krokomɛi lɛ baafee tɛŋŋ ‘amɛkɛ amɛ aya’ lɛ? Biblia lɛ wie yɛ “hii nyɔŋma” lɛ ahe akɛ, amɛbaamɔ “Yudanyo kome atade naamuu mli, amɛaakɛɛ: Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” Ŋmalɛ lɛ tsĩ Yudanyo kome tã. Shi wɔle akɛ akɛ wiemɔ ni ji “nyɛ” lɛ tsuɔ nii ahãa mɛi pii. Ni tsɔɔ akɛ, Yudanyo kome lɛ damɔ shi kɛhã kuu ko, ni ji mɛi fɛɛ ni afɔ amɛ mu lɛ. Gwantɛŋi krokomɛi lɛ nuɔ ŋmalɛ nɛɛ shishi, ni no hewɔ amɛkɛ kuu nɛɛ feɔ ekome kɛsɔmɔɔ Yehowa lɛ. Ehe ehiaaa ni amɛle kuu nɛɛ mli bii lɛ ateŋ mɔ fɛɛ mɔ gbɛ́i, ni amɛnyiɛ amɛ fɛɛ amɛsɛɛ. Yesu ji wɔ-Hiɛnyiɛlɔ, ni Biblia lɛ kɛɔ akɛ, esa akɛ wɔnyiɛ lɛ pɛ esɛɛ.​—Mateo 23:10.

5. Mɛɛ kɔkɔbɔɔ esa akɛ mɛi ni afɔ amɛ mu lɛ kɛ hiɛdɔɔ asusu he? Ni mɛni hewɔ esa akɛ amɛfee nakai?

⁵ Esa akɛ mɛi ni afɔ amɛ mu lɛ kɛ hiɛdɔɔ asusu kɔkɔbɔɔ ni yɔɔ 1 Korintobii 11:27-29 lɛ he. (Kanemɔ.) Mɛni baatsɔɔ akɛ mɔ ko ni afɔ lɛ mu lɛ ‘miiye aboloo lɛ ni eenu wain lɛ bɔ ni esaaa’? Kɛ́ eyeee Yehowa  anɔkwa, ni wekukpãa kpakpa bɛ ekɛ lɛ teŋ, ni fɛɛ sɛɛ lɛ, eye aboloo lɛ ni enu wain lɛ yɛ Kaimɔ lɛ shishi lɛ, belɛ eeye ni eenu bɔ ni esaaa. (Hebribii 6:4-6; 10:26-29) Kɔkɔbɔɔ nɛɛ yɛ hiɛdɔɔ waa, ni esa akɛ ekai mɛi fɛɛ ni afɔ amɛ mu lɛ akɛ, esa akɛ amɛye anɔkwa kɛyawula shi, kɛjeee nakai lɛ, amɛnine shɛŋ ‘juromɔnɔ ni ji ŋwɛi tsɛmɔ ní Nyɔŋmɔ tsɔɔ Kristo Yesu nɔ etsɛɔ amɛ lɛ nɔ.’​—Filipibii 3:13-16.

6. Te esa akɛ Kristofoi ni afɔ amɛ mu lɛ afee amɛnii amɛhã tɛŋŋ?

⁶ Paulo kɛɛ Kristofoi ni afɔ amɛ mu lɛ akɛ: “Mi, ní miji gboklɛfonyo yɛ Nuŋtsɔ lɛ mli lɛ, miikpa nyɛ fai ni nyɛnyiɛ bɔ ni sa tsɛmɔ ni aŋɔtsɛ nyɛ lɛ.” Mɛɛ sui esa akɛ amɛjie lɛ kpo be ni amɛfeɔ nakai lɛ? Paulo tsɔɔ mli akɛ: “Yɛ heshibaa kɛ mlijɔlɛ fɛɛ mli, yɛ tsuishitoo mli, ní nyɛná tsui nyɛhãhãa nyɛhe yɛ suɔmɔ mli, ni nyɛbɔa mɔdɛŋ waa nyɛhiɛa ekomefeemɔ ní nyɛtsɔ mumɔ lɛ nɔ nyɛná lɛ mli, yɛ toiŋjɔlɛ ni ji kpãa ni fiɔ nyɛ efeɔ nyɛ ekome lɛ mli.” (Efesobii 4:1-3) Yehowa mumɔ krɔŋkrɔŋ lɛ hãa etsuji baa amɛhe shi, ehãaa amɛwo amɛhe nɔ. (Kolosebii 3:12) No hewɔ lɛ, esaaa akɛ mɛi ni afɔ amɛ mu lɛ nuɔ he akɛ amɛhi fe mɛi krokomɛi. Ejaakɛ amɛle akɛ, kɛ́ afɔ mɔ ko mu lɛ, no etsɔɔɔ akɛ Yehowa ehã lɛ mumɔ krɔŋkrɔŋ lɛ babaoo fe etsuji krokomɛi ni eshwɛ lɛ. Agbɛnɛ hu, esaaa akɛ amɛnuɔ he akɛ amɛnuɔ Biblia lɛ shishi jogbaŋŋ fe mɔ fɛɛ mɔ. Ekaba kɔkɔɔkɔ akɛ mɔ ko ni afɔ lɛ mu lɛ baakɛɛ mɛi krokomɛi akɛ afɔ amɛ mu, ni no hewɔ lɛ esa akɛ amɛye aboloo lɛ ni amɛnu wain lɛ eko yɛ Kaimɔ lɛ shishi. Mɛi ni afɔ amɛ mu lɛ baa amɛhe shi, ni amɛkpɛlɛɔ nɔ akɛ, Yehowa pɛ ji mɔ ni yɔɔ hegbɛ akɛ ehalaa mɛi kɛhã ŋwɛi hiɛnɔkamɔ lɛ.

7, 8. Mɛni esaaa akɛ Kristofoi ni afɔ amɛ mu lɛ kpaa gbɛ? Ni mɛni hewɔ?

⁷ Eji hegbɛ kpele ni mɛi ni afɔ amɛ mu lɛ ená akɛ amɛbaaya ŋwɛi. Shi esaaa akɛ amɛkpaa gbɛ akɛ mɛi kɛ woo srɔto ko baahã amɛ yɛ hegbɛ nɛɛ ni amɛná lɛ hewɔ. (Efesobii 1:18, 19; kanemɔ Filipibii 2:2, 3.) Be ni Yehowa fɔ amɛ mu lɛ, etswaaa he adafi etsɔɔɔ je lɛ fɛɛ. No hewɔ lɛ, esaaa akɛ efeɔ amɛ naakpɛɛ akɛ, jeee mɛi fɛɛ baahe aye amrɔ nɔŋŋ akɛ afɔ amɛ mu. Biblia lɛ woɔ wɔ ŋaa akɛ, kɛ́ mɔ ko kɛɛ Nyɔŋmɔ ehala lɛ kɛhã nitsumɔ krɛdɛɛ ko lɛ, esaaa akɛ wɔheɔ nɔ ni ewieɔ lɛ wɔyeɔ oya nɔŋŋ. (Kpojiemɔ 2:2) Mɛi ni afɔ amɛ mu lɛ kpaaa gbɛ akɛ mɛi kɛ amɛ baaye yɛ gbɛ krɛdɛɛ nɔ. No hewɔ lɛ, kɛ́ amɛmiijie amɛhe shi amɛmiitsɔɔ mɔ ko lɛ, ehe ehiaaa ni amɛtsĩɔ tã amɛtsɔɔ mɔ lɛ akɛ afɔ amɛ mu. Ni yɛ anɔkwale mli lɛ, ekolɛ ehe ebahiaŋ po ni amɛtsĩ tã amɛtsɔɔ mɔ ko mɔ ko. Kɛfata he lɛ, esaaa akɛ amɛshwãa yɛ nibii wuji ni amɛbaatsu yɛ ŋwɛi lɛ ahe.​—1 Korintobii 1:28, 29; kanemɔ 1 Korintobii 4:6-8.

⁸ Kristofoi ni afɔ amɛ mu lɛ ateŋ mɔ ko mɔ ko ebuuu ehe akɛ eji kuu krɛdɛɛ ko mli nyo. Enɛ hewɔ lɛ, jeee mɛi krokomɛi ni afɔ amɛ mu lɛ pɛ amɛkɛbɔɔ. Moŋ lɛ, amɛkɛ amɛnyɛmimɛi Kristofoi lɛ fɛɛ bɔɔ. Ehe ehiaaa ni amɛyatao Kristofoi krokomɛi ni afɔ amɛ mu ni amɛkɛ amɛ asusu amɛmufɔɔ lɛ he, loo amɛkɛ amɛ afee ekome kɛkase Biblia lɛ. (Galatiabii 1:15-17) Kɛ́ mɛi ni afɔ amɛ mu lɛ tse kui ni tamɔ nɛkɛ lɛ, ekɛ mligbalamɔi baaba asafo lɛ mli. Ni ebaatsɔɔ akɛ, amɛmiite shi amɛmiiwo mumɔ krɔŋkrɔŋ lɛ. Ejaakɛ mumɔ krɔŋkrɔŋ lɛ ji nɔ ni yeɔ ebuaa Nyɔŋmɔ webii lɛ koni toiŋjɔlɛ kɛ ekomefeemɔ ahi amɛteŋ.​—Kanemɔ Romabii 16:17, 18.

9. Mɛni hewɔ esa akɛ okwɛ jogbaŋŋ yɛ bɔ ni okɛ mɛi ni yeɔ aboloo lɛ ni amɛnuɔ wain lɛ yɛ Kaimɔ lɛ shishi lɛ yeɔ hãa lɛ he? (Kwɛmɔ akrabatsa ni ji “ Suɔmɔ ‘Efeee Nii ni Bulɛ Bɛ He.’”)

⁹ Te esa akɛ okɛ nyɛmimɛi ni afɔ amɛ mu lɛ aye ohã tɛŋŋ? Yesu kɛɛ ekaselɔi lɛ akɛ: “Nyɛ fɛɛ lɛ, nyɛmimɛi ji nyɛ.” Kɛkɛ ni ekɛfata he akɛ: “Mɔ fɛɛ mɔ ni wóɔ ehe nɔ lɛ abaaba lɛ shi, ni mɔ fɛɛ mɔ ni baa ehe shi lɛ abaawó enɔ.” (Mateo 23:8-12) No hewɔ lɛ, kɛ́ mɔ ko fata Kristo nyɛmimɛi ni afɔ amɛ mu lɛ ahe jio, efataaa amɛhe jio lɛ, esaaa akɛ wɔkɛ woo srɔto ko hãa lɛ. Eji anɔkwale akɛ, Biblia lɛ woɔ wɔ hewalɛ ni wɔkase asafoŋ onukpai lɛ ahemɔkɛyeli, shi ewieee akɛ wɔwó adesa ko akɛ wɔhiɛnyiɛlɔ. (Hebribii 13:7) Biblia lɛ kɛɔ hu akɛ, Kristofoi komɛi sa “woo toi enyɔ.” Shi kadimɔ akɛ, jeee mu ni afɔ amɛ lɛ hewɔ akɛɛ amɛsa woo lɛ. Moŋ lɛ, bɔ ni ‘amɛkwɛɔ wɔnɔ jogbaŋŋ,’ kɛ bɔ ni ‘amɛtsuɔ nii waa yɛ wiemɔ kɛ nitsɔɔmɔ mli’ lɛ hewɔ. (1 Timoteo 5:17) Kɛ́ wɔjie mɛi ni afɔ amɛ mu lɛ ayi fe nine loo wɔnya amɛhe fe nine lɛ, ebaanyɛ egba amɛnaa waa, loo ehã amɛwo amɛhe nɔ po. (Romabii 12:3) Ni ekã shi faŋŋ akɛ, wɔteŋ mɔ ko mɔ ko sumɔŋ ni efee nɔ ko ni baanyɛ atɔ̃tɔ̃ Kristo nyɛmimɛi ni afɔ amɛ mu lɛ ateŋ mɔ ko nane!​—Luka 17:2.

10. Mɛni wɔbaanyɛ wɔfee kɛtsɔɔ akɛ wɔbuɔ mɛi ni Yehowa efɔ amɛ mu lɛ?

¹⁰ Mɛni wɔbaanyɛ wɔfee kɛtsɔɔ akɛ wɔbuɔ mɛi ni Yehowa efɔ amɛ mu lɛ? Esaaa akɛ wɔbiɔ amɛ bɔ ni fee ni afɔ amɛ mu. Enɛ jeee wɔhe sane; amɛ kɛ Yehowa teŋ sane ni. (1 Tesalonikabii 4:11; 2 Tesalonikabii 3:11) Agbɛnɛ hu, esaaa akɛ wɔnáa jwɛŋmɔ lɛ akɛ mɛi ni afɔ amɛ mu lɛ ahefatalɔi, amɛfɔlɔi, loo amɛwekumɛi krokomɛi hu fata mɛi ni afɔ amɛ mu lɛ ahe. Mufɔɔ lɛ, akɛfɔɔɔ mɔ, ni asaŋ jeee gbalashihilɛ nɔ atsɔɔ anáa. (1 Tesalonikabii 2:12) Kɛfata he lɛ, esaaa akɛ wɔbiɔ saji ni baanyɛ awo mɛi awerɛho. Akɛ nɔkwɛmɔnɔ lɛ, esaaa akɛ wɔbiɔ mɔ ko ni afɔ lɛ mu lɛ ŋa loo ewu bɔ ni enuɔ he ehãa kɛji esusu bɔ ni shihilɛ baafee yɛ jeŋ hee lɛ mli, be ni ehefatalɔ lɛ bɛ shikpɔŋ nɛɛ nɔ dɔŋŋ lɛ he. Wɔle akɛ, bɔ fɛɛ bɔ ni fee lɛ, yɛ jeŋ hee lɛ mli lɛ, Yehowa baahã ‘nɔ fɛɛ nɔ ní hiɛ kã atɔ kɛ nii ní etaoɔ.’​—Lala 145:16.

11. Kɛ́ ‘wɔnya mɛi ahe’ fe nine lɛ, mɛɛ oshãra ebaanyɛ ekɛba?

¹¹ Kɛ́ wɔbuuu mɛi ni afɔ amɛ mu lɛ akɛ amɛhe hiaa fe mɛi krokomɛi lɛ, ebuɔ wɔhe. Yɛ mɛɛ gbɛ nɔ? Biblia lɛ ehã wɔle akɛ, “amale nyɛmimɛi” baanyɛ abote asafo lɛ mli, ni amɛteŋ mɛi komɛi po baanyɛ akɛɛ akɛ afɔ amɛ mu. (Galatiabii 2:4, 5; 1 Yohane 2:19) Agbɛnɛ hu, mɛi ni afɔ amɛ mu lɛ ateŋ mɛi komɛi baanyɛ akpa Yehowa jamɔ. (Mateo 25:10-12; 2 Petro 2:20, 21) No hewɔ lɛ, kɛ́ ‘wɔnya mɛi ahe’ fe nine, mɛi ni afɔ amɛ mu jio, mɛi ni ale jogbaŋŋ yɛ asafo lɛ mli jio, mɛi ni kɛ afii pii esɔmɔ Yehowa jio lɛ, ebaanyɛ etsɔ̃ wɔ tsɔne. Wɔsɛɛ, kɛ́ ekolɛ, mɛi nɛɛ eyayeee Yehowa anɔkwa loo amɛshi asafo lɛ, wɔbaayanyiɛ amɛsɛɛ. Ni no baanyɛ ahã wɔhemɔkɛyeli lɛ agbɔjɔ, loo wɔkpa Yehowa sɔɔmɔ po.​—Yuda 16, shishigbɛ niŋmaa.

12, 13. Mɛni hewɔ esaaa akɛ wɔyeɔ wɔtsui yɛ mɛi abɔ ni yeɔ Kaimɔ lɛ he okadi nibii lɛ eko lɛ he lɛ?

¹² Be ko ni eho lɛ, daa afi lɛ, mɛi ni yeɔ Kaimɔ lɛ he okadi nibii lɛ ayifalɛ lɛ nɔ gbɔɔ. Shi nyɛsɛɛ nɛɛ, etamɔ nɔ ni daa afi lɛ, amɛyi miifa moŋ. Ani esa akɛ wɔye wɔtsui yɛ enɛ he? Dabi. Hã wɔkwɛ nɔ hewɔ.

 ¹³ “Yehowa le mɛi ni ji enii lɛ.” (2 Timoteo 2:19) Yehowa le mɛi ni efɔ amɛ mu lɛ fɛɛ. Shi mɛi ni kaneɔ mɛi ni yeɔ Kaimɔ lɛ he okadi nibii lɛ nyɛŋ atsɔɔ mɛi ni afɔ amɛ mu lɛɛlɛŋ kɛ mɛi ni afɔko amɛ mu. No hewɔ lɛ, mɛi komɛi ni afɔko amɛ mu, shi amɛ amɛsusuɔ akɛ afɔ amɛ mu lɛ, fata mɛi ni akaneɔ lɛ ahe. Mɛi komɛi yɛ ni amɛyeɔ aboloo lɛ ni amɛnuɔ wain lɛ eko, kɛkɛ lɛ, sɛɛ mli lɛ amɛkpa. Mɛi komɛi hu yɛ ni amɛyɛ jwɛŋmɔŋ loo henumɔŋ naagba, ni no hewɔ lɛ, efeɔ amɛ akɛ amɛkɛ Kristo baaye nɔ yɛ ŋwɛi. Nibii nɛɛ fɛɛ hãa wɔnaa akɛ, wɔnyɛŋ wɔtsɔɔ mɛi abɔ ni afɔ amɛ mu ni yɔɔ shikpɔŋ lɛ nɔ lolo.

14. Mɛni Biblia lɛ kɛɔ yɛ mɛi ni afɔ amɛ mu ni baahi shikpɔŋ lɛ nɔ be ni amanehulu kpeteŋkpele lɛ baaje shishi lɛ ayifalɛ lɛ he?

¹⁴ Mɛi ni afɔ amɛ mu ni Yesu baaŋɔ kɛya ŋwɛi kɛ́ eba lɛ, baajɛ shikpɔŋ lɛ nɔ hei srɔtoi babaoo. Biblia lɛ kɛɔ akɛ, Yesu baatsu “ebɔfoi lɛ kɛ tɛtɛrɛmantɛrɛ gbɛɛmɔ ni naa wa, ni amɛbaabua ehalamɔbii lɛ anaa kɛaajɛ kɔɔyɔi ejwɛ lɛ anɔ, kɛjɛ ŋwɛi naagbeehe kome kɛyashi naagbeehe kroko.” (Mateo 24:31) Biblia lɛ hãa wɔleɔ hu akɛ, mɛi ni afɔ amɛ mu lɛ ateŋ mɛi fioo baahi shikpɔŋ lɛ nɔ yɛ naagbee gbii lɛ amli. (Kpojiemɔ 12:17) Shi etsɔɔɔ mɛi abɔ ni afɔ amɛ mu ni baashwɛ be ni amanehulu kpeteŋkpele lɛ baaje shishi.

15, 16. Mɛni esa akɛ wɔhã ehi wɔjwɛŋmɔŋ yɛ bɔ ni Yehowa halaa mɛi 144,000 lɛ he?

¹⁵ Yehowa baanyɛ ahala mɛi kɛhã ŋwɛi hiɛnɔkamɔ lɛ be fɛɛ be ni esumɔɔ. (Romabii 8:28-30) Yehowa bɔi mɛi ni afɔ amɛ mu lɛ halamɔ yɛ Yesu shitee lɛ sɛɛ. Eeenyɛ efee akɛ, klɛŋklɛŋ afii 100 lɛ mli Kristofoi lɛ fɛɛ fata mɛi ni afɔ amɛ mu lɛ ahe. Kɛjɛ no sɛɛ aahu kɛbashi naagbee gbii lɛ je shishi  lɛ, mɛi fioo ko pɛ ji mɛi ni Yehowa fɔ amɛ mu. Mɛni hewɔ? Ejaakɛ mɛi ni kɛɛ Kristofoi ji amɛ yɛ nakai beiaŋ lɛ ateŋ mɛi babaoo ehiii shi yɛ Kristo tsɔɔmɔi lɛ anaa. Wɔbaanyɛ wɔkɛ mɛi fioo ni afɔ amɛ mu yɛ nakai beiaŋ lɛ ato “ŋmaa” ni Yesu wie akɛ ekɛ jwɛi lɛ fɛɛ baada lɛ he. (Mateo 13:24-30) Yɛ naagbee gbii nɛɛ amli lɛ, Yehowa miiya nɔ eehala mɛi akɛ mɛi 144,000 lɛ mli bii. [2] (Kwɛmɔ shishigbɛ niŋmaa ni yɔɔ sane lɛ naagbee lɛ.) No hewɔ lɛ, kɛ́ ekpɛ eyiŋ akɛ ebaahala mɛi komɛi be ni eshwɛ fioo ni naagbee lɛ baaba lɛ, mɛni hewɔ esa akɛ egba wɔnaa? Ani wɔle nii fe Yehowa? (Yesaia 45:9; Daniel 4:35; kanemɔ Romabii 9:11, 16.) [3] (Kwɛmɔ shishigbɛ niŋmaa ni yɔɔ sane lɛ naagbee lɛ.) Esa akɛ wɔkwɛ jogbaŋŋ ni wɔkafee wɔnii tamɔ nitsulɔi ni bɔi tɔkemɔ yɛ nyɔmɔwoo ni amɛnuŋtsɔ lɛ kɛhã nitsulɔi komɛi ni ba be ni eshwɛ fioo ni abaagbe nitsumɔ lɛ naa lɛ he lɛ.​—Kanemɔ Mateo 20:8-15.

¹⁶ Jeee mɛi fɛɛ ni yɔɔ hiɛnɔkamɔ akɛ amɛbaaya ŋwɛi lɛ fata mɛi ni feɔ “nyɔŋ anɔkwafo kɛ hiɛshikalɔ lɛ” ahe. (Mateo 24:45-47) Taakɛ Yehowa kɛ Yesu fee yɛ klɛŋklɛŋ afii 100 lɛ mli lɛ, ŋmɛnɛ lɛ, amɛmiitsɔ mɛi fioo ko pɛ nɔ amɛmiitsɔɔ mɛi pii nii. Kristofoi ni hi shi yɛ klɛŋklɛŋ afii 100 lɛ mli lɛ ateŋ mɛi fioo komɛi pɛ Yehowa kɛtsu nii kɛŋma Kristofoi A-Hela Ŋmalɛi lɛ. Ni ŋmɛnɛ lɛ, Kristofoi ni afɔ amɛ mu lɛ ateŋ mɛi fioo ko pɛ ji mɛi ni ekɛ nitsumɔ ewo amɛdɛŋ akɛ, amɛhã ewebii lɛ “niyenii yɛ be ni sa mli.”

17. Mɛni okase?

¹⁷ No hewɔ lɛ, mɛni wɔkase? Wɔkase akɛ, Yehowa ekpɛ eyiŋ akɛ, ebaahã ewebii lɛ ateŋ mɛi komɛi ahi shi kɛya naanɔ yɛ shikpɔŋ lɛ nɔ, ni ebaahã mɛi komɛi hu ayafata Yesu he yɛ ŋwɛi, ni amɛkɛ lɛ aye nɔ akɛ maŋtsɛmɛi. Yehowa baajuro etsuji fɛɛ, ekɔɔɔ he eko kɛ́ amɛfata mɛi ni feɔ “Yudanyo” lɛ ahe, loo amɛfata mɛi ni feɔ “hii nyɔŋma” lɛ ahe. Ehã amɛ fɛɛ mlai kome too lɛ nɔŋŋ, ni eesumɔ ni amɛye anɔkwa kɛyawula shi. Esa akɛ amɛ fɛɛ amɛba amɛhe shi, ni amɛfee ekome kɛsɔmɔ lɛ. Esa akɛ amɛ fɛɛ amɛfee bɔ fɛɛ bɔ ni amɛaanyɛ ni amɛhã toiŋjɔlɛ aya nɔ ahi asafo lɛ mli. Naagbee lɛ miibɛŋkɛ, no hewɔ lɛ, nyɛhãa wɔ fɛɛ wɔyaa nɔ wɔsɔmɔa Yehowa, ni wɔya nɔ wɔnyiɛ Kristo sɛɛ akɛ tooku kome.