1, 2. (a) Mɛɛ susumɔi srɔtoi mɛi hiɛ yɛ hegbɛ ni wɔyɔɔ akɛ wɔ diɛŋtsɛ wɔkpɛɔ wɔyiŋ lɛ he? (b) Mɛni Biblia lɛ wieɔ yɛ sane nɛɛ he? Ni mɛɛ sanebimɔi wɔbaahã hetoo?

BE KO lɛ, yoo ko kɛɛ enaanyo ko akɛ: “Kaahã mijwɛŋ pii; tsɔɔmɔ mi nɔ ni mifee kɛkɛ. No baafee oya.” Yoo nɛɛ shwe akɛ enaanyo lɛ akpɛ yiŋ ahã lɛ, moŋ fe ni ekɛ hegbɛ ni Yehowa eduro wɔteŋ mɔ fɛɛ mɔ akɛ lɛ diɛŋtsɛ ekpɛ eyiŋ yɛ saji ahe lɛ baatsu nii. Ni bo hu? Te onaa hegbɛ nɛɛ ohãa tɛŋŋ? Ani bo diɛŋtsɛ okpɛɔ oyiŋ yɛ saji ahe, aloo ohãa mɛi krokomɛi kpɛɔ yiŋ amɛhãa bo?

² Mɛi hiɛ susumɔi srɔtoi yɛ sane nɛɛ he. Mɛi komɛi kɛɛ Nyɔŋmɔ hãko wɔ hegbɛ ni wɔ diɛŋtsɛ wɔkpɛ wɔyiŋ yɛ nɔ ko nɔ ko he, ejaakɛ etsɔ hiɛ ekpɛ yiŋ yɛ nɔ fɛɛ nɔ he ehã wɔ momo. Mɛi komɛi hu kɛɛ dani wɔbaanyɛ wɔkɛɛ akɛ wɔyɛ hegbɛ ni wɔ diɛŋtsɛ wɔkpɛɔ wɔyiŋ yɛ saji ahe lɛ, ja aŋmɛɛ wɔhe ni wɔfee nɔ fɛɛ nɔ ni wɔsumɔɔ. Shi nɔ ni Nyɔŋmɔ Wiemɔ, ni ji Biblia lɛ, wieɔ yɛ sane nɛɛ he lɛ ji nɔ ni esa akɛ wɔkɛtsu nii. Biblia lɛ hãa wɔleɔ akɛ, be ni Yehowa bɔ wɔ lɛ, eduro wɔ hegbɛ kɛ nyɛmɔi ni wɔ diɛŋtsɛ wɔkpɛ wɔyiŋ yɛ nilee mli. (Kanemɔ Yoshua 24:15.) Biblia lɛ hãa sanebimɔi ni nyiɛ sɛɛ nɛɛ hu ahetoo: Te esa akɛ wɔkɛ hegbɛ ni wɔyɔɔ akɛ wɔ diɛŋtsɛ wɔkpɛ wɔyiŋ yɛ saji ahe lɛ atsu nii ahã tɛŋŋ? Ani wɔbaanyɛ wɔfee nɔ fɛɛ nɔ ni wɔsumɔɔ? Mɛɛ gbɛ nɔ wɔbaanyɛ wɔkɛ hegbɛ nɛɛ atsu nii yɛ gbɛ ni baatsɔɔ akɛ wɔsumɔɔ Yehowa lɛ  nɔ? Mɛni wɔbaanyɛ wɔfee kɛtsɔɔ akɛ wɔkpɛlɛɔ nɔ akɛ mɛi krokomɛi hu yɛ hegbɛ nɛɛ eko?

3. Eyɛ mli akɛ Yehowa baanyɛ afee nɔ fɛɛ nɔ ni esumɔɔ moŋ, shi te ekpɛɔ eyiŋ ehãa tɛŋŋ?

³ Yehowa baanyɛ afee nɔ fɛɛ nɔ ni esumɔɔ. Kɛ̃lɛ, wɔbaanyɛ wɔkase nɔ ko yɛ bɔ ni ekpɛɔ eyiŋ ehãa lɛ mli. Akɛ nɔkwɛmɔnɔ lɛ, ehala Israel maŋ lɛ akɛ “lɛ diɛŋtsɛ emaŋ.” (5 Mose 7:6-8) Nɔ ko hewɔ Yehowa fee nakai lɛ. Efee nakai koni ekɛye shi ko ni ewo Abraham lɛ nɔ. (1 Mose 22:15-18) Kɛfata he lɛ, Yehowa lɛ, suɔmɔ ji lɛ, ni egbɛi fɛɛ ja, ni ehãa enɛ kudɔɔ yiŋ fɛɛ ni ekpɛɔ lɛ. Wɔnaa enɛ faŋŋ yɛ bɔ ni ekɛ Israelbii lɛ ye ehã lɛ mli. Kɛ́ amɛgbo enɔ toi lɛ, etsɔseɔ amɛ, shi kɛ́ amɛtsake amɛtsui lɛ, enaa amɛ mɔbɔ, ni ejieɔ suɔmɔ kpo etsɔɔ amɛ. Ewie yɛ amɛhe akɛ: “Matsa amɛsɛɛsɛɛyaa lɛ, masumɔ amɛ yɛ tsuijurɔ naa.” (Hosh. 14:5) Yehowa kpɛɔ eyiŋ bɔ ni mɛi krokomɛi baaná he sɛɛ, ni enɛ ji nɔkwɛmɔnɔ kpakpa kɛhã wɔ.

4, 5. (a) Namɔ ji mɔ klɛŋklɛŋ ni Nyɔŋmɔ duro lɛ hegbɛ akɛ lɛ diɛŋtsɛ ekpɛ eyiŋ? Ni te ekɛ hegbɛ nɛɛ tsu nii ehã tɛŋŋ? (b) Mɛɛ sane esa akɛ wɔteŋ mɔ fɛɛ mɔ abi ehe?

⁴ Be ni Yehowa bɔ ŋwɛibɔfoi kɛ adesai lɛ, ekpɛ eyiŋ akɛ ebaahã amɛ hegbɛ ni amɛ diɛŋtsɛ amɛkpɛ amɛyiŋ yɛ saji ahe. Mɔ klɛŋklɛŋ ni eduro lɛ hegbɛ nɛɛ ji ekromɔ-Bi Yesu, mɔ ni ebɔ yɛ ehenɔ lɛ. (Kol. 1:15) Yesu kɛ hegbɛ ni Yehowa kɛduro lɛ lɛ tsu nii jogbaŋŋ. Akɛ nɔkwɛmɔnɔ lɛ, dani ebaaba shikpɔŋ lɛ nɔ lɛ, ekpɛ eyiŋ akɛ, ebaaya nɔ eye e-Tsɛ lɛ anɔkwa, moŋ fe ni ebaayafata Satan, atuatselɔ lɛ he. Be ni eba shikpɔŋ lɛ nɔ hu lɛ, ekpoo Satan lakamɔi lɛ fɛɛ. (Mat. 4:10) Gbi gbɛkɛ ni enɔ jetsɛremɔ lɛ abaagbe lɛ lɛ, ekɛ hiɛdɔɔ sɔle ni ekɛɛ Yehowa akɛ, ebaafee esuɔmɔnaa nii. Esɔle akɛ: “Ataa, kɛ́ oosumɔ lɛ, jiemɔ kpulu nɛɛ kɛje minɔ. Kɛ̃lɛ, hã osuɔmɔnaa nii aba mli, jeee minɔ.” (Luka 22:42) Ani wɔbaanyɛ wɔkase Yesu, ni wɔ hu wɔtswa wɔfai shi akɛ, wɔkɛ hegbɛ ni Yehowa eduro wɔ lɛ baafee nɔ ni esumɔɔ koni wɔkɛwo ehiɛ nyam?

⁵ Hɛɛ, wɔbaanyɛ, ejaakɛ wɔ hu, Nyɔŋmɔ bɔ wɔ yɛ ehenɔ. (1 Mose 1:26) Shi akɛni Yehowa pɛ yɔɔ hegbɛ akɛ efeɔ nɔ fɛɛ nɔ ni esumɔɔ hewɔ lɛ, ehã wɔ husui; no ji, etsɔɔ wɔ he ni hegbɛ ni ekɛduro wɔ lɛ yawaa, ni esumɔɔɔ ni wɔtekeɔ husui nɛɛ. Akɛ nɔkwɛmɔnɔ lɛ, Biblia lɛ kɛɔ akɛ, “ŋamɛi aŋɔ amɛhe amɛwo amɛwumɛi ashishi,” ni bii hu aŋɔ amɛhe amɛwo amɛfɔlɔi ashishi. (Efe. 5:22; 6:1) Mɛɛ gbɛ nɔ husui nɛɛ saa bɔ ni wɔkɛ hegbɛ ni wɔyɔɔ akɛ wɔ diɛŋtsɛ wɔkpɛɔ wɔyiŋ yɛ nibii ahe lɛ tsuɔ nii wɔhãa lɛ he? Esa akɛ wɔle sane nɛɛ hetoo, ejaakɛ eji wala kɛ gbele sane.

6. Okɛ nɔkwɛmɔnɔ ko ahã kɛtsɔɔ nɔ hewɔ ni ehi akɛ abaawo mlai yɛ hegbɛi ni wɔyɔɔ lɛ ahe.

⁶ Shi kɛ́ hegbɛ ni Yehowa kɛduro wɔ lɛ yawaa he ko lɛ, ani wɔbaanyɛ wɔwie akɛ wɔyɛ heyeli lɛɛlɛŋ? Hɛɛ, wɔbaanyɛ! Mɛni hewɔ? Mlai ni awo yɛ hegbɛi ni wɔyɔɔ lɛ ahe lɛ buɔ wɔhe. Akɛ nɔkwɛmɔnɔ lɛ, wɔyɛ hegbɛ ni wɔfãa gbɛ kɛyaa he fɛɛ he ni wɔsumɔɔ. Shi eji tsɔnekudɔlɔi nyɛɔ amɛwoɔ amɛtsɔji lɛ foi bɔ ni amɛsumɔɔ, ni amɛnyɛɔ amɛnyiɛɔ gbɛ lɛ nɔ he fɛɛ he kɛkɛ ní mla ko kwraa kudɔɔɔ amɛ kulɛ, ani wɔbaaná hegbɛ ni wɔyɔɔ nɛɛ he sɛɛ? Dabi. Mlai yeɔ amɛbuaa wɔ ni wɔnáa hegbɛi ni wɔyɔɔ lɛ ahe sɛɛ. Wɔbaasusu bɔ ni mɛi komɛi ni awie amɛhe yɛ Biblia lɛ mli lɛ kɛ hegbɛ ni Yehowa kɛduro amɛ lɛ tsu nii amɛhã lɛ he, koni no ahã wɔna nɔ hewɔ ni nilee yɔɔ mli akɛ wɔbaahi shi yɛ husui ni Yehowa efolɔ lɛ anaa.

7. (a) Mɛni ji nɔ kome ni hã esoro Adam yɛ kooloi lɛ ahe? (b) Tsɔɔmɔ gbɛ kome ni Adam kɛ hegbɛ ni Nyɔŋmɔ kɛhã lɛ lɛ tsu nii ehã.

 ⁷ Be ni Nyɔŋmɔ bɔ Adam, ni ji klɛŋklɛŋ gbɔmɔ lɛ, eduro lɛ hegbɛ ni ekɛduro ŋwɛibɔfoi lɛ eko. No ji, ehã lɛ hegbɛ ni lɛ diɛŋtsɛ ekpɛ eyiŋ yɛ saji ahe. Enɛ hã esoro lɛ yɛ kooloi lɛ ahe, ejaakɛ Nyɔŋmɔ hãaa kooloi lɛ hegbɛ nɛɛ. Susumɔ gbɛ kome ni Adam kɛ hegbɛ nɛɛ tsu nii ehã yɛ nilee mli lɛ he okwɛ. Eyɛ mli akɛ Nyɔŋmɔ bɔ kooloi dani ebɔ Adam moŋ, shi ewooo amɛ gbɛ́i. Ekɛ amɛ ba Adam ŋɔɔ, “koni ekwɛ bɔ ni eeetsɛ amɛ ehã.” Adam kwɛ bɔ ni kooloi lɛ ateŋ eko fɛɛ eko feɔ enii ehãa, ni edamɔ no nɔ ewo lɛ gbɛ́i ni sa lɛ. Bɔ fɛɛ bɔ ni Adam baatsɛ “kooloo fɛɛ kooloo ni hiɛ kã lɛ, no nɔŋŋ ji egbɛ́i.” Yehowa tsakeee lɛ. Ekã shi faŋŋ akɛ, nitsumɔ nɛɛ hã Adam mii shɛ ehe waa.—1 Mose 2:19.

8. Mɛni Adam fee kɛtsɔɔ akɛ ekɛ heyeli ni Nyɔŋmɔ kɛhã lɛ lɛ tsuuu nii jogbaŋŋ? Ni mɛni jɛ yiŋ gbonyo ni ekpɛ lɛ mli kɛba?

⁸ Yehowa kɛɛ Adam akɛ, esaa shikpɔŋ lɛ nɔ fɛɛ ni etsɔ Paradeiso. Ekɛɛ lɛ akɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ, ni nyɛnaanaa nɔ, ni nyɛyea ŋshɔŋloi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.” (1 Mose 1:28) Dɔlɛ sane ji akɛ, Adam hiɛ eyasɔɔɔ nitsumɔ ni Yehowa kɛhã lɛ lɛ. Nyɔŋmɔ wo lɛ mla akɛ ekaye tso ko nɔ yibii. Shi eku mla nɛɛ mli, ni eye tso lɛ nɔ yibii lɛ eko. Ekɛ hegbɛ ni Nyɔŋmɔ kɛhã lɛ akɛ lɛ diɛŋtsɛ ekpɛ eyiŋ yɛ saji ahe lɛ tsuuu nii jogbaŋŋ. Nɔ ni efee nɛɛ ehã adesai fɛɛ ni ehi shi kɛjɛ nakai beiaŋ aahu kɛbashi ŋmɛnɛ lɛ miina nɔ. (Rom. 5:12) Kɛ́ wɔhã yiŋ gbonyo ni Adam kpɛ lɛ kɛ naagbai ni ejɛ mli kɛba lɛ hi wɔjwɛŋmɔ mli lɛ, no baatsirɛ wɔ ni wɔkɛ heyeli ni Nyɔŋmɔ kɛhã wɔ lɛ atsu nii jogbaŋŋ, ni wɔye mlai fɛɛ ni Yehowa ewo wɔ lɛ anɔ.

9. Mɛɛ hegbɛ Yehowa hã Israelbii lɛ? Shi te amɛfee amɛnii amɛhã tɛŋŋ?

⁹ Adam kɛ Hawa esha lɛ hewɔ lɛ, wɔ fɛɛ wɔyeee emuu ni wɔgboiɔ. Kɛ̃lɛ, Yehowa shɔ̃ko hegbɛ ni wɔyɔɔ akɛ wɔkpɛɔ wɔyiŋ yɛ saji ahe lɛ kɛjeko wɔdɛŋ. Wɔnaa enɛ yɛ bɔ ni ekɛ Israel maŋ lɛ ye ehã lɛ mli. Yehowa tsɔ etsulɔ Mose nɔ ehã amɛ hegbɛ ni amɛhala kɛji amɛmiisumɔ ni amɛtsɔ lɛ diɛŋtsɛ enɔ yɛ maji fɛɛ ateŋ. (2 Mose 19:3-6) Ani amɛkpɛlɛ Yehowa ninefɔ̃ɔ lɛ nɔ? Hɛɛ, amɛkpɛlɛ nɔ, ni amɛhala akɛ amɛkɛ gbɛtsɔɔmɔi fɛɛ ni ekɛbaahã amɛ lɛ baatsu nii. Amɛkɛ gbee kome wie akɛ: “Nibii fɛɛ ni Yehowa ewie lɛ wɔɔfee.” (2 Mose 19:8) Mɔbɔ sane ji akɛ, sɛɛ mli lɛ, amɛkpɛ amɛyiŋ akɛ amɛboŋ Yehowa toi dɔŋŋ. Amɛyeee shi ni amɛwo Nyɔŋmɔ lɛ nɔ. Nyɛkahãa wɔfea wɔnii tamɔ Israelbii lɛ. Moŋ lɛ, nyɛhãa wɔhia Yehowa masɛi daa, ni wɔbo gbɛtsɔɔmɔi fɛɛ ni ekɛhãa wɔ lɛ atoi. No baatsɔɔ akɛ wɔhiɛ sɔɔ hegbɛ ni ekɛhã wɔ lɛ.—1 Kor. 10:11.

10. Mɛɛ nɔkwɛmɔnii yɔɔ Biblia lɛ mli ni tsɔɔ akɛ adesai ni yeee emuu baanyɛ ajɛ amɛsuɔmɔ mli amɛwo Nyɔŋmɔ hiɛ nyam? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁰ Hebribii yitso 11 lɛ wieɔ Nyɔŋmɔ tsuji 16 ni hala akɛ amɛkɛ gbɛtsɔɔmɔi fɛɛ ni Nyɔŋmɔ ehã amɛ lɛ baatsu nii lɛ ahe. Enɛ ni amɛfee lɛ hewɔ lɛ, Yehowa jɔɔ amɛ waa, ni ehã amɛ hiɛnɔkamɔ. Akɛ nɔkwɛmɔnɔ lɛ, Noa jie hemɔkɛyeli kpele kpo. Be ni Nyɔŋmɔ kɛɛ lɛ akɛ ekpɛ adeka koni akɛbaa lɛ kɛ eweku lɛ yi, bɔ ni afee ni adesai ashishi akabule kɛje shikpɔŋ lɛ nɔ lɛ, ebo toi ni efee nakai. (Heb. 11:7) Abraham kɛ Sara hu jɛ amɛsuɔmɔ mli amɛbo Nyɔŋmɔ toi. Be ni Nyɔŋmɔ kɛɛ amɛ akɛ amɛfã kɛjɛ Ur ni amɛyahi shikpɔŋ ni ebaatsɔɔ amɛ lɛ nɔ lɛ, amɛfee nakai. Be ni amɛfãa gbɛ lɛ, amɛná hegbɛ ni amɛkɛbaaku amɛsɛɛ kɛya amɛmaŋ Ur, shi amɛfeee nakai. Moŋ lɛ, amɛkɛ amɛjwɛŋmɔ ma he kpakpa ni Nyɔŋmɔ ewo amɛ shi akɛ ekɛbaahã amɛ lɛ nɔ. (Heb. 11:8, 13, 15, 16) Mose kpoo Ejipt jwetrii lɛ, ni “ehala akɛ afee lɛ kɛ Nyɔŋmɔ webii lɛ niseniianii moŋ fe nɔ ni eeeye esha mli ŋɔɔmɔ  be kukuoo ko.” (Heb. 11:24-26) Nyɛhãa wɔkasea blema anɔkwafoi nɛɛ ahemɔkɛyeli lɛ, ni wɔ hu wɔjɛ wɔsuɔmɔ mli wɔfee Nyɔŋmɔ suɔmɔnaa nii.

11. (a) Kɛ́ wɔhala akɛ wɔbaasɔmɔ Yehowa lɛ, mɛɛ jɔɔmɔ kpele wɔbaaná? (b) Mɛni hewɔ oosumɔ ni okɛ hegbɛ ni Yehowa kɛduro bo lɛ atsu nii jogbaŋŋ lɛ?

¹¹ Ekolɛ wɔbaasumɔ ni mɛi krokomɛi akpɛ yiŋ amɛhã wɔ, kɛ jwɛŋmɔ lɛ akɛ no baafee oya. Shi kɛ́ wɔfee nakai lɛ, jɔɔmɔ kpele ko baaŋmɛɛ wɔ. Nakai jɔɔmɔ lɛ ji nɔ ni awie he yɛ 5 Mose 30:19, 20 lɛ. (Kanemɔ.) Yɛ kuku 19 lɛ, Yehowa kɛ nibii komɛi shwie Israelbii lɛ ahiɛ koni amɛhala emli nɔ ni amɛsumɔɔ. Yɛ kuku 20 lɛ, ehã amɛle akɛ, kɛji amɛhala akɛ amɛbaasɔmɔ lɛ lɛ, no tsɔɔ akɛ amɛsumɔɔ lɛ kɛ amɛtsui fɛɛ. Wɔ hu kɛ́ wɔhala akɛ wɔbaasɔmɔ Yehowa lɛ, no tsɔɔ akɛ, wɔsumɔɔ lɛ kɛ wɔtsui fɛɛ, ni wɔkɛ hegbɛ ni ekɛduro wɔ lɛ miitsu nii kɛmiiwo ehiɛ nyam!

12. Mɛni esaaa akɛ wɔfeɔ kɔkɔɔkɔ?

¹² Ŋɔɔ lɛ akɛ, oke onaanyo ko nɔ ko ni jara wa waa. Shi sɛɛ mli lɛ, oná ole akɛ eshɛ onikeenii lɛ efɔ̃, aloo ekɛpila mɔ ko. Te obaanu he ohã tɛŋŋ? Agbɛnɛ, susumɔ bɔ ni Yehowa hu baanu he ehã kɛji ekwɛ bɔ ni adesai babaoo kɛ hegbɛ ni ekɛduro amɛ lɛ feɔ nibii gbohii kɛ bɔ ni amɛkɛyeɔ mɛi krokomɛi awui lɛ he okwɛ. Biblia lɛ wieɔ akɛ, “naagbee gbii” lɛ amli lɛ, mɛi baafee “trumui,” ni no pɛpɛɛpɛ wɔnaa ŋmɛnɛ lɛ. (2 Tim. 3:1, 2) Ekaba kɔkɔɔkɔ akɛ wɔkɛ nikeenii ni jara wa nɛɛ ni Yehowa kɛduro wɔ lɛ baatsu nii yɛ gbɛ ni esaaa nɔ. Mɛni baaye abua wɔ ni wɔkafee nakai?

13. Mɛni ji gbɛ kome ni wɔbaanyɛ wɔtsɔ nɔ wɔtsɔɔ akɛ, wɔkɛ heyeli ni wɔyɔɔ akɛ Kristofoi lɛ miitsu nii jogbaŋŋ?

¹³ Wɔ fɛɛ wɔyɛ hegbɛ ni wɔhalaa mɛi ni wɔkɛbaabɔ naanyo, atadei ni wɔbaawo, bɔ ni wɔbaasaa wɔhe wɔhã, kɛ nibii ni wɔkɛbaajie wɔhiɛtserɛ. Shi kɛ́ wɔkwɛɛɛ ni ahi lɛ, wɔbaatsɔmɔ nyɔji wɔhã nibii ni wɔheloo lɛ shweɔ lɛ, loo wɔbaakase hiɛgbejianii ni mɛi ni leko Yehowa lɛ feɔ lɛ, ni wɔheyeli lɛ baatsɔ “nɔhaanɔ kɛhã efɔŋfeemɔ.” (Kanemɔ 1 Petro 2:16.) Yɛ nɔ najiaŋ ni ‘wɔkɛ wɔheyeli lɛ baatsu nii akɛ hegbɛ ni wɔná ni wɔkɛbaatiu nibii ni heloo lɛ shweɔ lɛ asɛɛ’ lɛ, nyɛhãa wɔtswaa wɔfai shi akɛ ‘wɔbaafee  nibii fɛɛ kɛwo Nyɔŋmɔ hiɛ nyam.’—Gal. 5:13; 1 Kor. 10:31.

14. Kɛ́ wɔkɛ wɔhiɛ fɔ̃ Yehowa nɔ lɛ, mɛɛ gbɛ nɔ no baatsɔɔ akɛ wɔkɛ heyeli ni ekɛduro wɔ lɛ miitsu nii jogbaŋŋ?

¹⁴ Gbɛ kroko ni wɔbaanyɛ wɔtsɔ nɔ wɔkɛ heyeli ni Yehowa kɛduro wɔ lɛ atsu nii jogbaŋŋ ji, ni wɔkɛ wɔhiɛ baafɔ̃ enɔ ni wɔkɛ egbɛtsɔɔmɔi lɛ atsu nii. Yehowa ji mɔ ni ‘tsɔɔ wɔ nii ni hi hã wɔ,’ ni lɛ ‘etsɔɔ wɔ gbɛ ni wɔnyiɛ nɔ.’ (Yes. 48:17) Esa akɛ wɔba wɔhe shi ni wɔkpɛlɛ nɔ akɛ, “gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi ehã lɛ, ebɛ edɛŋ.” (Yer. 10:23) Adam kɛ Israelbii atuatselɔi lɛ hala akɛ amɛkɛ amɛhe baakpasa amɛ diɛŋtsɛ amɛjwɛŋmɔ. Nyɛhãa wɔkasea nii kɛjɛa nɔ ni ba amɛnɔ lɛ mli, ni ‘wɔkɛ wɔhiɛ afɔ̃ Yehowa nɔ kɛ wɔtsui fɛɛ.’—Abɛi 3:5.

15. Mɛni wɔkaseɔ yɛ shishitoo mla ni yɔɔ Galatiabii 6:5 lɛ mli?

¹⁵ Nɔ kome ni esa akɛ wɔkpɛlɛ nɔ ji akɛ, mɔ fɛɛ mɔ yɛ hegbɛ akɛ lɛ diɛŋtsɛ ekpɛɔ eyiŋ yɛ saji ahe. No hewɔ lɛ, jeee be fɛɛ be Kristofoi krokomɛi ayiŋkpɛi kɛ wɔnɔ lɛ baakpã gbee. Yɛ saji tamɔ bɔ ni wɔbaa wɔjeŋ wɔhãa kɛ bɔ ni wɔsɔmɔɔ Yehowa wɔhãa lɛ amli po lɛ, ebaanyɛ esoro yiŋ ni Kristofonyo fɛɛ Kristofonyo baakpɛ. Kaimɔ shishitoo mla ni yɔɔ Galatiabii 6:5 lɛ. (Kanemɔ.) Kɛ́ wɔkpɛlɛ nɔ akɛ, “mɔ fɛɛ mɔ baatere lɛ diɛŋtsɛ ejatsu” lɛ, wɔkojoŋ wɔnyɛmimɛi Kristofoi lɛ yɛ yiŋ srɔtoi ni amɛkpɛɔ lɛ ahe.

16, 17. (a) Mɛɛ sane kulɛ eehe eja Korinto asafo lɛ mli enyɔ? (b) Te Paulo tsu naagba nɛɛ he nii ehã tɛŋŋ? Mɛni wɔkaseɔ yɛ mli?

¹⁶ Sane ko ni ba yɛ blema Korinto asafo lɛ mli lɛ baanyɛ aye abua wɔ ni wɔna nɔ hewɔ ni esaaa akɛ wɔkojoɔ wɔnyɛmimɛi lɛ. Nyɛmimɛi ni yɔɔ asafo nɛɛ mli ni be ko ni eho lɛ amɛji amagajalɔi lɛ, nu he akɛ esaaa akɛ amɛyeɔ loi ni ahɔ̃ɔ yɛ jaji anɔ lɛ. Loi nɛɛ ekomɛi yɛ ni eeenyɛ efee akɛ, aŋɔ ahã amagai akɛ afɔle dani akɛba jaji lɛ anɔ. No hewɔ lɛ, amɛnu he akɛ kɛ́ amɛye eko lɛ, belɛ, amagai lɛ nɔŋŋ amɛjáa lɛ. Shi nyɛmimɛi lɛ ekomɛi hu nu he akɛ ‘amaga jeee nɔ ko,’ ni no hewɔ lɛ, amɛbaanyɛ amɛjɛ henilee krɔŋŋ mli amɛye loi lɛ eko fɛɛ eko. (1 Kor. 8:4, 7) Shwɛ sharao kulɛ, sane nɛɛ ja asafo lɛ mli enyɔ. Mɛɛ gbɛ nɔ Paulo tsɔ eye ebua Kristofoi ni yɔɔ Korinto lɛ koni amɛna Nyɔŋmɔ susumɔ yɛ sane nɛɛ he?

¹⁷ Klɛŋklɛŋ lɛ, Paulo kai nyɛmimɛi lɛ fɛɛ akɛ, niyenii haŋ amɛbɛŋkɛ Nyɔŋmɔ fe tsutsu lɛ. (1 Kor. 8:8) No sɛɛ lɛ, ebɔ amɛ kɔkɔ ni amɛkahã ‘hegbɛ ni amɛyɔɔ akɛ amɛhalaa nɔ ni amɛsumɔɔ lɛ’ batsɔ “nanetɔ̃tɔmɔnɔ yɛ gbɛ ko nɔ” kɛhã mɛi ni egbede lɛ. (1 Kor. 8:9) Sɛɛ mli lɛ, ekɛɛ mɛi ni amɛhenilee eŋmɛɛɛ amɛ gbɛ ni amɛye loo lɛ akɛ amɛkakojo mɛi ni yeɔ lɛ. (1 Kor. 10:25, 29, 30) Looyeli sane nɛɛ yɛ hiɛdɔɔ waa, ejaakɛ ekɔɔ jamɔ ni amɛjáa Nyɔŋmɔ lɛ he. Kɛ̃lɛ, ehe bahia ni nyɛmimɛi lɛ ateŋ mɔ fɛɛ mɔ adamɔ ehenilee nɔ ekpɛ eyiŋ yɛ nɔ ni ebaafee he. Ŋmɛnɛ lɛ, saji ni esa akɛ wɔteŋ mɔ fɛɛ mɔ adamɔ ehenilee nɔ ekpɛ eyiŋ yɛ he lɛ ateŋ ekomɛi bɛ hiɛdɔɔ tamɔ nɛkɛ. No hewɔ lɛ, mɛni hewɔ esa akɛ wɔkojo wɔnyɛmimɛi lɛ yɛ he?—1 Kor. 10:32, 33.

18. Mɛni obaanyɛ ofee kɛtsɔɔ akɛ ohiɛ sɔɔ hegbɛ ni Nyɔŋmɔ kɛduro bo lɛ?

¹⁸ Yehowa ehã wɔteŋ mɔ fɛɛ mɔ hegbɛ ni lɛ diɛŋtsɛ ekpɛ eyiŋ yɛ saji ahe, ni hegbɛ nɛɛ ni ekɛduro wɔ lɛ hãa wɔnáa anɔkwa heyeli. (2 Kor. 3:17) Wɔhiɛ sɔɔ nikeenii ni jara wa nɛɛ, ejaakɛ wɔbaanyɛ wɔtsɔ yiŋ srɔtoi ni wɔkpɛɔ lɛ anɔ wɔhã Yehowa ana akɛ wɔsumɔɔ lɛ waa. No hewɔ lɛ, nyɛhãa wɔyaa nɔ wɔkpɛa yiŋ ni baawo Yehowa hiɛ nyam, ni wɔkakojo mɛi yɛ yiŋ srɔtoi ni amɛkpɛɔ lɛ ahe.