SHƆ leebi, January 24, 2018 lɛ, ahã United States Betel weku lɛ kɛ Canada Betel weku lɛ le akɛ ahala Nyɛminuu Kenneth Cook, Jr., afata Yehowa Odasefoi a-Gbɛtsɔɔmɔ Kuu lɛ he. Adafitswaa krɛdɛɛ nɛɛ hã amɛná miishɛɛ waa.

Afɔ Nyɛminuu Cook yɛ Pennsylvania, yɛ U.S.A. Be ni eshwɛ fioo ni ebaagbe sɛkɛndre skul naa lɛ, eklasbii lɛ ateŋ mɔ kome kɛ lɛ kase Biblia lɛ ni abaptisi lɛ June 7, 1980. Yɛ September 1, 1982 lɛ, eje gbɛgbamɔ nitsumɔ lɛ shishi. Afii enyɔ sɛɛ yɛ October 12, 1984 lɛ, afɔ̃ lɛ nine ni ebasɔmɔ yɛ Betel, ni he klɛŋklɛŋ ni esɔmɔ yɛ ji Wallkill Betel, yɛ New York.

Nyɛminuu Cook sɔmɔ yɛ Wallkill Betel afii 25, ni ahã etsu nitsumɔi srɔtoi yɛ Woji Akalamɔhe lɛ kɛ agbɛnɛ hu, yɛ Betel Ɔfis. Yɛ afi 1996 lɛ, ekɛ nyɛmi yoo ko ni atsɛɔ lɛ Jamie lɛ bote gbalashihilɛ mli. Ahã Jamie bafata ehe yɛ Wallkill Betel lɛ ni amɛ fɛɛ amɛsɔmɔ yɛ jɛmɛ. Yɛ December 2009 lɛ, ajie Nyɛminuu kɛ Nyɛmiyoo Cook kɛtee Watchtower Educational Center lɛ, yɛ Patterson, yɛ New York, ni ahã Nyɛminuu Cook bɔi nitsumɔ yɛ Writing Correspondence Department lɛ. Nyɛminuu kɛ Nyɛmiyoo Cook ku amɛsɛɛ kɛba Wallkill, shi etsɛɛɛ nɔŋŋ ni ajie amɛ kɛtee Brooklyn, yɛ New York, yɛ April 2016. No sɛɛ nyɔji enumɔ lɛ, amɛfã kɛtee nitsumɔhe yitso lɛ yɛ Warwick, yɛ New York. Yɛ January 2017 lɛ, ahala Nyɛminuu Cook akɛ yelikɛbualɔ kɛhã Gbɛtsɔɔmɔ Kuu lɛ Niŋmaa Ajinafoi Akuu lɛ.