1-2. (a) Kɛ́ Yehowa kwɛ mɛi akpekpei abɔ ni buaa amɛhe naa kɛhã Nuŋtsɔ lɛ Gbɛkɛ Niyeli lɛ, mɛni enaa? (Kwɛmɔ mfoniri ni yɔɔ wolo lɛ hiɛ lɛ.) (b) Mɛni he wɔbaasusu yɛ nikasemɔ nɛɛ mli?

KƐ́ Yehowa kwɛ mɛi akpekpei abɔ ni buaa amɛhe naa daa afi kɛhã Nuŋtsɔ lɛ Gbɛkɛ Niyeli lɛ, mɛni enaa? Ekɛ ejwɛŋmɔ yaa aŋkroaŋkroi ni eba lɛ anɔ, ni esusuɔ amɛteŋ mɔ fɛɛ mɔ he. Enaa mɛi ni baa daa afi lɛ, kɛ bɔ ni amɛteŋ mɛi komɛi miaa amɛhiɛ amɛbaa yɛ amɛyi ni awaa lɛ fɛɛ sɛɛ lɛ. Enaa mɛi ni efɔɔɔ asafoŋ kpeei baa, shi amɛnuɔ he akɛ Kaimɔ lɛ he miihia waa, ni no hewɔ lɛ, Kaimɔ ko Kaimɔ ko hooo amɛhe lɛ hu. Agbɛnɛ hu, enaa mɛi ni ekolɛ no ji be klɛŋklɛŋ ni amɛba Kaimɔ lɛ, ekolɛ koni amɛbakwɛ bɔ ni nifeemɔ lɛ baaya lɛ ehã lɛ.

² Yehowa náa miishɛɛ kɛ́ mɛi pii ba Kaimɔ lɛ. (Luka 22:19) Shi jeee mɛi abɔ ni baa Kaimɔ lɛ ji nɔ titri ni he hiaa Yehowa. Nɔ titri ni he hiaa lɛ ji nɔ hewɔ ni mɛi lɛ ba Kaimɔ lɛ. Yɛ nikasemɔ nɛɛ mli lɛ, wɔbaahã sanebimɔ ko ni he hiaa waa lɛ hetoo, no ji: Mɛni hewɔ wɔyaa Kaimɔ lɛ daa afi, ni agbɛnɛ hu, wɔyaa asafoŋ kpeei ni Yehowa hãa afeɔ daa otsi ahãa mɛi ni sumɔɔ lɛ lɛ?

3-4. (a) Mɛni hewɔ wɔyaa asafoŋ kpeei lɛ? (b) Kɛ́ wɔyaa asafoŋ kpeei lɛ, mɛni no hãa anaa yɛ wɔhe? (d) Yɛ nɔ ni awie yɛ 1 Korintobii 11:23-26 lɛ naa lɛ, mɛni hewɔ esaaa akɛ wɔhãa Kaimɔ ko Kaimɔ ko hoɔ wɔhe lɛ?

³ Nɔ titri hewɔ ni wɔyaa asafoŋ kpeei ji akɛ, efata nibii ni wɔfeɔ kɛjáa Yehowa lɛ ahe. Agbɛnɛ hu, wɔyaa asafoŋ kpeei ejaakɛ wɔmiitao Yehowa atsɔɔ wɔ nii. Mɛi ni woɔ amɛhe nɔ lɛ susuɔ akɛ amɛle nɔ fɛɛ nɔ, ni no hewɔ lɛ, ehe ehiaaa ni mɔ ko tsɔɔ amɛ nɔ ko. (3 Yoh. 9) Shi wɔfeee wɔnii nakai. Wɔmiisumɔ  ni Yehowa kɛ esafo lɛ atsɔɔ wɔ nii.​—Yes. 30:20; Yoh. 6:45.

⁴ Kɛ́ wɔyaa asafoŋ kpeei lɛ, etsɔɔ akɛ wɔmiisumɔ ni atsɔɔ wɔ nii, ni enɛ tsɔɔ akɛ wɔbaa wɔhe shi. Kɛ́ be shɛ ni abaaye Yesu gbele lɛ Kaimɔ lɛ, wɔyaa nifeemɔ ni he hiaa nɛɛ shishi, ejaakɛ wɔle akɛ esa akɛ wɔya. Shi nɔ kroko hewɔ ni wɔyaa ji akɛ, wɔbaa wɔhe shi ni wɔmiisumɔ ni wɔbo famɔ ni Yesu kɛhã lɛ toi, akɛ: “Nyɛfea enɛ kɛkaia mi.” (Kanemɔ 1 Korintobii 11:23-26.) Kaimɔ lɛ hãa wɔhiɛnɔkamɔ lɛ mli waa, ni ekaiɔ wɔ akɛ Yehowa sumɔɔ wɔ waa diɛŋtsɛ. Shi Yehowa le akɛ jeee shi kome pɛ yɛ afi lɛ mli esa akɛ ewo wɔ hewalɛ ni ewaje wɔ. No hewɔ lɛ, eto gbɛjianɔ ni afee asafoŋ kpeei daa otsi, ni ewoɔ wɔ hewalɛ ni wɔya kpeei nɛɛ ashishi. Akɛni wɔbaa wɔhe shi hewɔ lɛ, wɔboɔ lɛ toi ni wɔyaa. Daa otsi lɛ, wɔheɔ be kɛsaa wɔhe kɛhãa kpeei nɛɛ, ni wɔyaa.

5. Mɛni hewɔ mɛi ni baa amɛhe shi lɛ kpɛlɛɔ Yehowa ninefɔɔ lɛ nɔ lɛ?

⁵ Yehowa fɔ̃ɔ mɛi fɛɛ nine akɛ amɛba ni etsɔɔ amɛ nii, ni daa afi lɛ, mɛi babaoo hereɔ ninefɔɔ nɛɛ nɔ. (Yes. 50:4) Bei pii lɛ, amɛbaa Kaimɔ lɛ klɛŋklɛŋ, ni no sɛɛ lɛ, amɛbaa kpeei krokomɛi lɛ hu. (Zak. 8:20-23) Wɔ kɛ mɛi hei nɛɛ fɛɛ náa miishɛɛ akɛ Yehowa, ‘wɔyelikɛbualɔ kɛ wɔjielɔ’ lɛ miitsɔɔ wɔ nii ni eetsɔɔ wɔ gbɛ. (Lala 40:17) Anɔkwa, nɔ ko bɛ ni he hiaa loo ni hãa mɔ náa miishɛɛ fe ni wɔbaakpɛlɛ Yehowa ninefɔɔ lɛ nɔ koni lɛ kɛ e-Bi Yesu, mɔ ni esumɔɔ waa lɛ atsɔɔ wɔ nii!​—Mat. 17:5; 18:20; 28:20.

6. Mɛɛ gbɛ nɔ heshibaa ye ebua nuu ko ni eba Kaimɔ lɛ?

⁶ Daa afi lɛ, wɔbɔɔ mɔdɛŋ akɛ wɔbaafɔ̃ mɛi pii nine kɛba Yesu gbele lɛ Kaimɔ lɛ shishi. Mɛi pii ni baa amɛhe shi ehere ninefɔɔ nɛɛ nɔ ni amɛná he sɛɛ. Naa niiashikpamɔ ko ni tsɔɔ nakai. Afii pii ni eho nɛ lɛ, nyɛmi nuu ko kɛ Kaimɔ lɛ he ninefɔɔ wolo hã nuu ko, shi nuu lɛ kɛɛ lɛ akɛ enyɛŋ eba. Shi Kaimɔ gbi lɛ nɔ lɛ, nuu nɛɛ nyɛ eba, ni enɛ hã nyɛmi nuu lɛ naa kpɛ ehe waa. Nyɛmimɛi lɛ here nuu lɛ hiɛmɛɛ, ni enɛ ta etsuiŋ waa, aahu akɛ ebɔi asafoŋ kpeei baa daa otsi. Anɔkwa, yɛ afi mli lɛ, efolɔ asafoŋ kpeei amli shii etɛ pɛ. Mɛɛ su ye ebua lɛ ni etsake ejwɛŋmɔ ni ekpɛ eyiŋ akɛ ebaaba kpeei lɛ fɛɛ lɛ? Heshibaa. Sɛɛ mli lɛ, nyɛmi nuu lɛ ni fɔ̃ lɛ nine lɛ wie yɛ ehe akɛ, “Ebaa ehe shi waa.” Ekã shi faŋŋ akɛ, Yehowa ni gbala nuu nɛɛ kɛba koni ebajá lɛ, ni amrɔ nɛɛ abaptisi lɛ.​—2 Sam. 22:28; Yoh. 6:44.

7. Mɛɛ gbɛ nɔ nibii ni wɔkaseɔ yɛ asafoŋ kpeei ashishi kɛ nibii ni wɔkaneɔ yɛ Biblia lɛ mli lɛ yeɔ ebuaa wɔ ni wɔbaa wɔhe shi?

⁷ Nibii ni wɔkaseɔ yɛ asafoŋ kpeei ashishi, kɛ nibii ni wɔkaneɔ yɛ Biblia lɛ mli lɛ yeɔ ebuaa wɔ ni wɔbaa wɔhe shi. Bei pii lɛ, kɛ́ eshwɛ otsii fioo ni abaaye Kaimɔ lɛ, wɔkaseɔ Yesu kɛ bɔ ni eba ehe shi ni ekɛ ewala hã akɛ kpɔmɔnɔ yɛ wɔhewɔ lɛ he nii yɛ asafoŋ kpeei ashishi. Agbɛnɛ hu, kɛ́ eshwɛ gbii fioo ni Kaimɔ gbi lɛ baashɛ lɛ, awoɔ wɔ hewalɛ ni wɔkane Biblia mli saji ni kɔɔ Yesu gbele lɛ kɛ eshitee lɛ he. Nibii nɛɛ ni wɔkaneɔ yɛ Biblia lɛ mli, kɛ nibii ni wɔkaseɔ yɛ asafoŋ kpeei ashishi lɛ hãa wɔhiɛ sɔɔ afɔle ni Yesu shã yɛ wɔhewɔ lɛ waa diɛŋtsɛ. Enɛ tsirɛɔ wɔ ni wɔba wɔhe shi tamɔ lɛ, ni wɔfee Yehowa suɔmɔnaa nii, kɛ́ nakai feemɔ wa kɛhã wɔ po.​—Luka 22:41, 42.

8. Mɛni Yesu fee ni tsɔɔ akɛ eyɛ ekãa?

⁸ Kɛ́ wɔfee ekãa lɛ, no hu tsɔɔ akɛ wɔmiikase Yesu. Susumɔ bɔ ni efee ekãa be ni eshwɛ gbii fioo ni abaagbe lɛ lɛ he okwɛ. No mli lɛ,  ele waa akɛ etsɛŋ ehenyɛlɔi lɛ baashwie ehiɛ shi, amɛbaayi lɛ, ni amɛbaagbe lɛ. (Mat. 20:17-19) Shi ejooo foi. Be ni be lɛ shɛ lɛ, ekɛɛ ebɔfoi anɔkwafoi ni ekɛ amɛ yɔɔ Getsemane abɔɔ lɛ mli lɛ akɛ: “Nyɛtea shi, nyɛhãa wɔyaa. Naa! Mɔ ni baajie mi ehã lɛ eshɛ shi etã.” (Mat. 26:36, 46) Be ni ehenyɛlɔi lɛ ba koni amɛbamɔ lɛ lɛ, eyateee yɛ bɔfoi lɛ asɛɛ. Moŋ lɛ, eba hiɛ, ejie ehe shi, ni ekɛɛ asraafoi lɛ akɛ amɛhã ebɔfoi lɛ aya. (Yoh. 18:3-8) Yesu fee ekãa waa! Ŋmɛnɛ lɛ, Kristofoi ni afɔ amɛ mu lɛ kɛ gwantɛŋi krokomɛi lɛ hu bɔɔ mɔdɛŋ ni amɛfee ekãa tamɔ Yesu. Yɛ mɛɛ gbɛ nɔ?

9. (a) Mɛni hewɔ ekolɛ ehe baahia ni wɔfee ekãa dani wɔnyɛ wɔya asafoŋ kpeei daa lɛ? (b) Kɛ́ wɔnyɛmimɛi ni awo amɛ tsuŋ yɛ amɛhemɔkɛyeli lɛ hewɔ lɛ nu akɛ wɔmiisɔmɔ Yehowa yɛ naagbai ni wɔkɛkpeɔ lɛ fɛɛ sɛɛ lɛ, mɛɛ gbɛ nɔ ewoɔ amɛ hewalɛ?

⁹ Kɛ́ wɔbɛ ekãa lɛ, ekolɛ wɔbaafolɔ asafoŋ kpeei amli kɛ́ wɔkɛ shihilɛi ni mli wala kpe. Nyɛmimɛi komɛi yɛ ni agbo yɛ amɛnɔ, amɛnijiaŋ eje wui, loo helai miigba amɛnaa, shi fɛɛ sɛɛ lɛ, amɛyaa asafoŋ kpeei. Mɛi komɛi hu yɛ ni amɛwekumɛi loo amralofoi lɛ miite shi amɛmiiwo amɛ waa, shi fɛɛ sɛɛ lɛ, amɛfeɔ ekãa ni amɛyaa asafoŋ kpeei. Kɛ́ wɔnyɛmimɛi ni awo amɛ tsuŋ yɛ amɛhemɔkɛyeli lɛ hewɔ lɛ nu akɛ wɔmiiya nɔ wɔmiisɔmɔ Yehowa yɛ naagbai ni wɔkɛkpeɔ lɛ fɛɛ sɛɛ lɛ, ekã shi faŋŋ akɛ ewajeɔ amɛ, ni ewoɔ amɛ hewalɛ ni amɛya nɔ amɛná hemɔkɛyeli, amɛfee ekãa, ni amɛye Yehowa anɔkwa. (Heb. 13:3) Bɔfo Paulo ná enɛ mli niiashikpamɔ. Be ni awo lɛ tsuŋ yɛ Roma lɛ, ewie akɛ be fɛɛ be ni ebaanu akɛ enyɛmimɛi lɛ miisɔmɔ Nyɔŋmɔ ni amɛmiiye Nyɔŋmɔ anɔkwa lɛ, emii shɛɔ ehe waa. (Fip. 1:3-5, 12-14) Be ni eshwɛ fioo ni abaajie lɛ yɛ tsuŋwoo mli, loo be ni ajie lɛ lɛ sɛɛ nɔŋŋ lɛ, eŋma wolo emaje Hebribii lɛ. Yɛ nakai wolo lɛ mli lɛ, ewo Kristofoi anɔkwafoi nɛɛ hewalɛ ni ‘amɛya nɔ amɛjie nyɛmimɛi asuɔmɔ kpo,’ ni ‘amɛkakpa kpe ni amɛkpeɔ kutuu’ lɛ.​—Heb. 10:24, 25; 13:1.

10-11. (a) Namɛi esa akɛ wɔfɔ̃ amɛ nine kɛhã Kaimɔ lɛ? (b) Mɛɛ gbɛ nɔ Efesobii 1:7 lɛ hãa wɔnaa nɔ hewɔ ni esa akɛ wɔfɔ̃ mɛi nɛɛ nine lɛ?

¹⁰ Kɛ́ wɔfɔ̃ wɔwekumɛi, wɔnanemɛi nitsulɔi, kɛ wɔkutsoŋbii nine kɛhã Kaimɔ lɛ, no hu tsɔɔ akɛ wɔyɛ ekãa. Shi mɛni tsirɛɔ wɔ koni wɔfɔ̃ mɛi nɛɛ fɛɛ nine kɛba Kaimɔ lɛ? No ji hiɛsɔɔ kpele ni wɔyɔɔ kɛhã Yehowa kɛ Yesu yɛ nɔ ni amɛfee amɛhã wɔ lɛ hewɔ. Wɔmiisumɔ ni mɛi krokomɛi aba Kaimɔ lɛ koni amɛna bɔ ni amɛbaafee amɛná kpɔmɔnɔ ni Yehowa kɛdro wɔ lɛ he sɛɛ.​—Kanemɔ Efesobii 1:7; Kpo. 22:17.

¹¹ Kɛ́ wɔfee ekãa ni wɔtee asafoŋ kpeei lɛ, wɔjieɔ su kroko ni he hiaa hu kpo. Nyɔŋmɔ kɛ e-Bi Yesu fɛɛ jieɔ su nɛɛ kpo yɛ gbɛi ni sa kadimɔ waa anɔ.

12. (a) Mɛɛ gbɛ nɔ wɔkpeei lɛ hãa suɔmɔ ni wɔyɔɔ kɛhã Yehowa kɛ Yesu lɛ mli waa? (b) Mɛɛ gbɛ nɔ 2 Korintobii 5:14, 15 lɛ woɔ wɔ hewalɛ ni wɔkase Yesu?

¹² Suɔmɔ ni wɔyɔɔ kɛhã Yehowa kɛ Yesu lɛ tsirɛɔ wɔ ni wɔyaa asafoŋ kpeei. Ni kɛ́ wɔtee  asafoŋ kpeei lɛ, nibii ni wɔkaseɔ lɛ hãa nakai suɔmɔ lɛ mli waa. Be fɛɛ be ni wɔbaaya asafoŋ kpeei lɛ, wɔkaiɔ nɔ ni amɛfee amɛhã wɔ lɛ. (Rom. 5:8) Wɔkpeei lɛ ateŋ nɔ ni hãa wɔkaiɔ suɔmɔ kpele ni amɛjie lɛ kpo amɛtsɔɔ wɔ kɛ mɛi ni nuko kpɔmɔnɔ lɛ shishi jogbaŋŋ lɛ po lɛ waa ji Kaimɔ lɛ. Akɛni wɔhiɛ sɔɔ nɔ ni amɛfee amɛhã wɔ lɛ hewɔ lɛ, wɔbɔɔ mɔdɛŋ akɛ wɔbaakase Yesu, ni wɔhãa anaa enɛ yɛ bɔ ni wɔhiɔ shi wɔhãa lɛ mli. (Kanemɔ 2 Korintobii 5:14, 15.) Agbɛnɛ hu, wɔjɛɔ wɔtsuiŋ tɔ̃ɔ wɔjieɔ Yehowa yi akɛ ehã wɔ kpɔmɔnɔ lɛ. Gbɛ kome ni wɔbaanyɛ wɔtsɔ nɔ wɔjie eyi ji, ni wɔbaajɛ wɔtsuiŋ wɔhã saji ahetoo yɛ asafoŋ kpeei ashishi.

13. Mɛni wɔbaanyɛ wɔfee kɛtsɔɔ Yehowa kɛ e-Bi lɛ akɛ wɔsumɔɔ amɛ waa? Tsɔɔmɔ mli.

¹³ Kɛ́ wɔjɛ wɔtsuiŋ wɔkɛ nibii shã afɔle wɔhã Yehowa kɛ Yesu lɛ, no tsɔɔ akɛ wɔsumɔɔ amɛ waa. Bei pii lɛ, esa akɛ wɔkɛ nibii komɛi ashã afɔle koni wɔnyɛ wɔya asafoŋ kpeei. Akɛ nɔkwɛmɔnɔ lɛ, ekolɛ nyɛfeɔ nyɛsafoŋ kpeei lɛ ekome yɛ otsi lɛ teŋ be ni otee nitsumɔ okpa ni etɔ bo, ni nyɛfeɔ kpee kroko hu yɛ otsi lɛ naagbee, be ni ekolɛ obaasumɔ ni ojɔɔ ohe fioo. Kɛ̃lɛ, omiaa ohiɛ oyaa fɛɛ. Ani Yehowa naa mɔdɛŋ ni obɔɔ akɛ obaaya lɛ? Hɛɛ, enaa. Anɔkwa, kɛ́ omia ohiɛ otee asafoŋ kpeei yɛ tɔlɛ loo naagbai ni okɛkpeɔ lɛ fɛɛ sɛɛ lɛ, no hãa Yehowa naa akɛ osumɔɔ lɛ waa.​—Mar. 12:41-44.

14. Mɛɛ nɔkwɛmɔnɔ kpakpa Yesu fee ehã wɔ?

¹⁴ Akɛni Yesu sumɔɔ ekaselɔi lɛ asane hewɔ lɛ, ekɛ ehe shã afɔle ehã amɛ, ni enɛ ji nɔkwɛmɔnɔ kpakpa kɛhã wɔ. Ekɛ ewala tete shã afɔle yɛ amɛhewɔ. Shi dani ebaafee nakai po lɛ, daa gbi lɛ, efeɔ nibii ni hãa anaa akɛ esusuɔ amɛhe klɛŋklɛŋ dani esusuɔ lɛ diɛŋtsɛ ehe. Akɛ nɔkwɛmɔnɔ lɛ, be ni etɔ lɛ ni ehao waa po lɛ, ekɛ esɛɛnyiɛlɔi lɛ gba sane. (Luka 22:39-46) Yesu kwɛ nɔ ni ebaanyɛ efee ehã mɛi, shi jeee nɔ ni mɛi baanyɛ amɛfee amɛhã lɛ. (Mat. 20:28) Kɛ́ wɔsumɔɔ Yehowa kɛ wɔnyɛmimɛi Kristofoi lɛ waa lɛ, wɔbaafee bɔ fɛɛ bɔ ni wɔbaanyɛ koni wɔya Nuŋtsɔ lɛ Gbɛkɛ Niyeli lɛ kɛ asafoŋ kpeei lɛ fɛɛ.

15. Namɛi titri esa akɛ wɔye wɔbua?

 ¹⁵ Wɔle akɛ, wɔ pɛ wɔhiɛ anɔkwale lɛ, ni no hewɔ lɛ, wɔkɛ wɔbe pii shãa afɔle koni wɔkɛye wɔbua mɛi ni amɛbafata wɔhe. Shi mɛi titri ni esa akɛ wɔye wɔbua ji, “mɛi ni etsɔmɔ wɔwekumɛi yɛ hemɔkɛyeli lɛ mli” shi amɛkpa shiɛmɔ yaa loo amɛkpa asafoŋ kpeei baa. (Gal. 6:10) Mɛni wɔbaanyɛ wɔfee kɛtsɔɔ akɛ wɔsumɔɔ mɛi nɛɛ asane? Wɔbaanyɛ wɔwo amɛ hewalɛ ni amɛba wɔkpeei lɛ, titri lɛ, Kaimɔ lɛ. Kɛ́ nyɛmi ko ni ekpa shiɛmɔ yaa loo asafoŋ kpeei baa lɛ ku esɛɛ kɛba Yehowa, wɔ-Tsɛ kɛ wɔ-Tookwɛlɔ ni sumɔɔ wɔ lɛ ŋɔɔ lɛ, Yehowa kɛ Yesu fɛɛ náa miishɛɛ waa, ni wɔ hu wɔnáa miishɛɛ.​—Mat. 18:14.

16. (a) Mɛni wɔbaanyɛ wɔfee kɛwowoo wɔhe hewalɛ? Mɛni wɔkpeei lɛ baaye abua wɔ ni wɔfee? (b) Mɛni hewɔ be nɛɛ ji be ni sa jogbaŋŋ akɛ wɔkai Yesu wiemɔi ni yɔɔ Yohane 3:16 lɛ?

¹⁶ Yɛ otsii fioo ni eshwɛ dani Sohaa gbɛkɛ, April 19, 2019, ni ji Kaimɔ gbi lɛ baashɛ lɛ, bɔɔ mɔdɛŋ ni ofɔ̃ mɛi pii nine kɛhã Kaimɔ lɛ. (Kwɛmɔ akrabatsa ni yitso ji, “ Ani Obaafɔ̃ Amɛ Nine?”) Yɛ afi nɛɛ mli lɛ, nyɛhãa wɔ fɛɛ wɔwowoa wɔhe hewalɛ kɛtsɔ kpeei fɛɛ ni Yehowa eto he gbɛjianɔ ehã wɔ lɛ ashishi ni wɔbaaya lɛ nɔ. Naagbee lɛ ebɛŋkɛ, ni wɔkpeei lɛ ji nɔ ni baaye abua wɔ ni wɔba wɔhe shi, wɔfee ekãa, ni wɔjie suɔmɔ kpo daa. (1 Tes. 5:8-11) Nyɛhãa wɔjɛa wɔtsuiŋ tɔ̃ɔ wɔhãa Yehowa kɛ e-Bi lɛ ana akɛ wɔhiɛ sɔɔ suɔmɔ kpele ni amɛjie lɛ kpo amɛtsɔɔ wɔ lɛ waa!​—Kanemɔ Yohane 3:16.