1. Ani nibii ni wɔtaoɔ wɔná lɛ fɛɛ ahe miihia wɔ lɛɛlɛŋ? Tsɔɔmɔ mli.

NIBII fioo komɛi pɛ he hiaa adesai, shi nibii ni adesai taoɔ lɛ fa babaoo diɛŋtsɛ. Etamɔ nɔ ni mɛi pii leee nibii pɔtɛi ni he hiaa amɛ yɛ shihilɛ mli. Nibii ni he hiaa wɔ lɛɛlɛŋ lɛ ji nibii ni kɛ́ wɔnáaa lɛ wɔbaagboi, tamɔ niyenii, atade, kɛ he ni wɔbaawɔ. No hewɔ lɛ, jeee nibii ni wɔtaoɔ wɔná lɛ fɛɛ ji nibii ni he hiaa wɔ yɛ shihilɛ mli.

2. Mɛni ji nibii komɛi ni mɛi baasumɔ ni amɛná?

² Bei komɛi lɛ, esoro nibii ni ohiafoi taoɔ amɛná lɛ kwraa yɛ nibii ni shikatsɛmɛi taoɔ amɛná lɛ ahe. Ohiafoi pii yɛ ni nɔ pɛ ni amɛtaoɔ ji, ni amɛná shika kɛhe mobail foŋ, moto, loo shikpɔŋ. Yɛ shikatsɛmɛi agbɛfaŋ lɛ, ekolɛ amɛbaasumɔ ni amɛhehee atadei ni jara wawai, amɛmamɔ tsũi wujiwuji, loo amɛhe tsɔji ni jara wa fe nɔ ni amɛhiɛ bianɛ lɛ. Kɛ̃lɛ, tsɔne ko yɛ ni baanyɛ adu ohiafoi kɛ shikatsɛmɛi fɛɛ, ni no ji, ni mɔ ko baashwe heloonaa nibii babaoo ni he ehiaaa lɛ loo ni eshika shɛɛɛ.

3. Mɛni ji heloonaa nibii asɛɛtiumɔ?

³ Mɛni ji heloonaa nibii asɛɛtiumɔ? Kɛ́ mɔ ko hã shika kɛ heloonaa nibii ahe bahia lɛ fe wekukpaa ni yɔɔ ekɛ Yehowa teŋ lɛ, belɛ eetiu heloonaa nibii asɛɛ. Mɛi ni tiuɔ heloonaa nibii asɛɛ lɛ amii shɛɛɛ nibii ni amɛyɔɔ momo lɛ ahe. Daa nɛɛ amɛmiishwe ni amɛná nibii babaoo amɛfata nɔ ni amɛyɔɔ lɛ he. Shikatsɛmɛi kɛ ohiafoi fɛɛ baanyɛ agbee kaa nɛɛ mli, ejaakɛ kɛ́ mɔ ko yɛ shika pii jio, ebɛ shika pii jio lɛ, ebaanyɛ ekɛ heloonaa nibii abaye Maŋtsɛyeli lɛ gbɛhe yɛ eshihilɛ mli.​—Heb. 13:5.

4. Mɛɛ gbɛ nɔ Satan tsɔɔ nibii ni “hiŋmɛii lɛ shweɔ” lɛ anɔ elakaa wɔ?

⁴ Satan miisumɔ ni wɔhe wɔye akɛ, ja wɔná heloonaa nibii babaoo dani wɔshihilɛ baaŋɔɔ. No hewɔ lɛ, etsɔɔ nibii ni “hiŋmɛii lɛ shweɔ” lɛ anɔ elakaa wɔ. (1 Yoh. 2:15-17; 1 Mose 3:6; Abɛi 27:20) Nibii ni atswaa he adafi yɛ adafitswaa woji amli, kɛ agbɛnɛ hu yɛ redio, TV, kɛ Intanɛt lɛ nɔ lɛ fa waa, ni amɛgbalaa mɔ. Ekomɛi ahe yɛ sɛɛnamɔ, shi ekomɛi hu ahe bɛ sɛɛnamɔ kwraa. Bei komɛi lɛ, nibii komɛi nyɛɔ efeɔ wɔ fɛo aahu, kɛkɛ lɛ wɔyahe. Shi sɛɛ mli kɛ́ wɔta shi diŋŋ wɔsusu he lɛ, wɔnaa akɛ amɛhe ehiaaa wɔ, ni eji wɔheee kulɛ wɔgbooo. Nibii ni tamɔ nakai lɛ batsɔmɔɔ jatsui amɛhãa wɔ ni amɛwoɔ wɔ nitsumɔ efolo. Amɛfiteɔ wɔbe, ni amɛhãaa wɔná dekã ni wɔkɛkase Biblia lɛ, loo ni wɔkɛsaa wɔhe kɛhã asafoŋ kpeei. Kɛ́ wɔkwɛɛɛ ni ahi lɛ, amɛbaahã wɔsafoŋ kpeeiyaa, kɛ shiɛmɔyaa po afee basaa. Kaimɔ akɛ bɔfo Yohane bɔ Kristofoi kɔkɔ akɛ: “Je lɛ kɛ nɔ fɛɛ nɔ ni yɔɔ mli ni mɛi shweɔ lɛ miiho kɛmiiya.”

5. Mɛni baanyɛ aba mɛi ni kɛ amɛhewalɛ fɛɛ tiuɔ heloonaa nibii asɛɛ lɛ anɔ?

⁵ Satan miisumɔ ni wɔkɛ wɔhewalɛ fɛɛ atiu shika kɛ heloonaa nibii asɛɛ, moŋ fe ni wɔkɛbaasɔmɔ Yehowa. (Mat. 6:24) Mɛi ni fiteɔ amɛhewalɛ kɛbuaa heloonaa nibii pii anaa amɛhãa amɛhe lɛ anii feɔ mɔbɔ, ejaakɛ yɛ naagbee lɛ, amɛnine nyɛɔ shi, amɛhe fiɔ amɛ, ni bei komɛi po lɛ, amɛkɛ amɛhemɔkɛyeli lɛ yashaa shi. (1 Tim. 6:9, 10; Kpoj. 3:17) Yɛ Yesu abɛbua ni kɔɔ nidulɔ lɛ he lɛ mli lɛ, ewie akɛ mɛi komɛi hãa “nibii krokomɛi fɛɛ ni eshwɛ lɛ ahe akɔnɔi lɛ boteɔ amɛmli,” ni no hãaa amɛnyɛ amɛya amɛhiɛ yɛ mumɔŋ.​—Mar. 4:14, 18, 19.

6. Mɛni wɔkaseɔ yɛ Baruk sane lɛ mli?

⁶ Hã wɔsusu Baruk, ni ji Yeremia woloŋmalɔ lɛ he fioo wɔkwɛ. Be ko lɛ, ebɔi ‘nibii wuji’ taomɔ. Shi Yehowa hã ele akɛ, eshwɛ fioo ni abaakpãtã Yerusalem maŋ lɛ hiɛ, ni akɛ kɛ́ akpãtã maŋ lɛ hiɛ lɛ, nɔ pɛ ni baashwɛ ahã lɛ ji ewala. (Yer. 45:1-5) Yehowa etooo gbɛjianɔ kɛhã heloonaa nibii ayibaamɔ, no hewɔ lɛ, kulɛ esaaa akɛ Baruk shweɔ nibii wuji ehãa ehe. (Yer. 20:5) Ŋmɛnɛ lɛ, wɔ hu wɔbɛŋkɛ jeŋ fɔŋ nɛɛ naagbee lɛ. No hewɔ lɛ, jeee be nɛɛ ji be ni akɛtĩaa heloonaa nibii anaa. Kɛ́ nibii nɛɛ ajara wa, loo amɛkã wɔtsui nɔ tamɔ mɛni, wɔkakpa gbɛ akɛ wɔkɛ amɛ baafo amanehulu kpeteŋkpele lɛ sɔkee kɛyabote jeŋ hee lɛ mli.​—Abɛi 11:4; Mat. 24:21, 22; Luka 12:15.

7. Mɛni he wɔbaasusu? Ni mɛɛ gbɛ nɔ ebaaye ebua wɔ?

⁷ No hewɔ lɛ, mɛni baaye abua wɔ ni wɔnyɛ wɔkwɛ wɔhe ni yɛ nakai beiaŋ nɔŋŋ lɛ, wɔkɛ mumɔŋ nibii aye klɛŋklɛŋ gbɛhe yɛ wɔshihilɛ mli? Mɛni baaye abua wɔ ni wɔkatiu heloonaa nibii asɛɛ? Ni mɛni baaye abua wɔ ni wɔkaye wɔtsui  tuutu loo wɔfee yeyeeye yɛ wɔhiamɔ nii ahe? Yɛ Yesu Gɔŋ nɔ Shiɛmɔ lɛ mli lɛ, etsɔɔ wɔ nɔ ni hi fe fɛɛ ni baaye abua wɔ yɛ enɛ gbɛfaŋ. (Mat. 6:19-21) No hewɔ lɛ, wɔbaakane Mateo 6:25-34 lɛ, ni wɔsusu he. Enɛ baaye abua wɔ ni wɔná nɔmimaa akɛ, esa akɛ wɔya nɔ wɔtao Maŋtsɛyeli lɛ, jeee heloonaa nibii.​—Luka 12:31.

8, 9. (a) Mɛni hewɔ esaaa akɛ wɔyeɔ wɔtsui tuutu yɛ wɔhiamɔ nii ahe lɛ? (b) Mɛni Yesu le yɛ adesai ahe?

⁸ Kanemɔ Mateo 6:25. Yesu le akɛ, ekaselɔi lɛ feɔ yeyeeye loo amɛgbaa amɛhe naa yɛ nɔ ni amɛbaaye, nɔ ni amɛbaanu, kɛ nɔ ni amɛbaawo he, ni enɛ hewɔ ekɛɛ amɛ akɛ ‘amɛkpa yeyeeye ni amɛfeɔ lɛ.’ Ele akɛ kɛ́ amɛye amɛtsui tuutu yɛ nibii ni he hiaa nɛɛ po ahewɔ lɛ, ebaanyɛ egbala amɛjwɛŋmɔ kɛje Yehowa sɔɔmɔ lɛ nɔ. Akɛni kaselɔi lɛ asane kã Yesu tsui nɔ waa hewɔ lɛ, yɛ eshiɛmɔ lɛ mli lɛ, esaa ebɔ amɛ kɔkɔ yɛ oshara nɛɛ he shii ejwɛ sɔŋŋ.​—Mat. 6:27, 28, 31, 34.

⁹ Shi mɛni hewɔ Yesu kɛɛ wɔkaye wɔtsui yɛ nɔ ni wɔbaaye, loo nɔ ni wɔbaanu, loo nɔ ni wɔbaawo hewɔ lɛ? Ani nibii nɛɛ ahe ehiaaa wɔ? Amɛhe miihia wɔ, ni Yesu hu le nakai. Ele nibii ni he hiaa wɔ daa gbi, ni ele akɛ, kɛ́ wɔnáaa shika ni wɔkɛbaahe nibii nɛɛ, wɔbaahao. Kɛfata he lɛ, ele akɛ yɛ “naagbee gbii lɛ amli lɛ, bei krɛdɛɛ ní jaraa baaba,” ni nibii amli baawa. (2 Tim. 3:1) Wɔmiiye enɛ he odase ŋmɛnɛ; nitsumɔi ahe esɛ̃, nibii ajara ewa, mɛi pii miiye ohia futaa ni amɛnáaa niyenii kpakpa amɛye loo amɛkɛ amɛmusuŋ hɔmɔ yawɔɔ. Fɛɛ sɛɛ lɛ, Yesu kɛɛ ‘wala jara wa fe niyenii, ni gbɔmɔtso lɛ hu jara wa fe atade.’

10. Be ni Yesu tsɔɔ ekaselɔi lɛ bɔ ni asɔleɔ ahãa lɛ, mɛɛ nibii ekɛɛ esa akɛ nomɛi ahe ahia amɛ fe nibii krokomɛi fɛɛ?

¹⁰ Dani Yesu baawie sane nɛɛ, no mli lɛ etsɔ hiɛ etsɔɔ ekaselɔi lɛ akɛ kɛ́ amɛmiisɔle lɛ, amɛkpa amɛ-Tsɛ ni yɔɔ ŋwɛi lɛ fai ni eduro amɛ amɛhiamɔ nii. Ekɛɛ amɛ akɛ, amɛbaanyɛ amɛkpa Nyɔŋmɔ fai amɛkɛɛ: “Hã wɔ aboloo ni he hiaa wɔ kɛhã ŋmɛnɛ gbi nɛɛ.” (Mat. 6:11) Be kroko lɛ, naa bɔ ni ekɛɛ amɛ akɛ amɛbaanyɛ amɛwie lɛ amɛhã: “Daa gbi lɛ, hã wɔ wɔboloo yɛ wɔhiamɔ nii kɛhã gbi lɛ naa.” (Luka 11:3) Shi enɛ etsɔɔɔ akɛ esa akɛ wɔhã wɔheloonaa hiamɔ nii ahe wɔjwɛŋmɔ fɛɛ. Be ni Yesu tsɔɔ ekaselɔi lɛ bɔ ni asɔleɔ ahãa lɛ, ewie saji ni kɔɔ Nyɔŋmɔ Maŋtsɛyeli lɛ he lɛ ahe klɛŋklɛŋ dani ewie nibii krokomɛi ahe. (Mat. 6:10; Luka 11:2) Bɔ ni afee ni ekaselɔi lɛ akaye amɛtsui tsɔ yɛ heloonaa nibii ahe lɛ, Yesu kai amɛ nibii ni tsɔɔ akɛ Yehowa ji wɔ-Durolɔ.

11, 12. Mɛni wɔkaseɔ yɛ bɔ ni Yehowa kwɛɔ ŋwɛi loofɔji lɛ ehãa lɛ mli? (Kwɛmɔ mfoniri ni yɔɔ nikasemɔ lɛ shishijee lɛ.)

¹¹ Kanemɔ Mateo 6:26. Yesu kɛɛ ‘wɔkwɛ ŋwɛi loofɔji lɛ jogbaŋŋ.’ Eji loofɔji dara tamɔ adesai kulɛ, amɛbaaye nii kwraa fe adesai. Kooloi bibii nɛɛ yeɔ niyenii srɔtoi pii tamɔ aduawai, dumɔwui, filikilɔi, kɛ gɔgɔmii. Shi amɛhuuu, ni asaŋ amɛduuu nii. Yehowa duroɔ amɛ nibii fɛɛ ni he hiaa amɛ. (Lala 147:9) Eyɛ mli akɛ Yehowa kɛ niyenii lɛ ebawooo amɛdaaŋ moŋ, shi eto he gbɛjianɔ bɔ ni kɛ́ amɛtao lɛ, amɛbaana.

¹² No hewɔ lɛ, Yesu enaaa nɔ hewɔ ni Yehowa baalɛ loofɔji ni eshi adesai ni hɔmɔ aye amɛ. ^[1] (1 Pet. 5:6, 7) Wɔ-Tsɛ ni yɔɔ ŋwɛi lɛ kɛ niyenii lɛ ebawoŋ wɔdaaŋ, shi kɛ́ wɔbɔ mɔdɛŋ wɔhu ŋmɔ loo wɔtsu nii bɔ ni afee ni wɔná shika kɛhe  nɔ ko wɔye lɛ, ebaajɔɔ wɔmɔdɛŋbɔi lɛ anɔ. Ni kɛ́ wɔhe fi wɔ lɛ, ebaanyɛ eta mɔ ko tsuiŋ ni ehã wɔ nɔ ko. Eyɛ mli akɛ Yesu ewieee akɛ Yehowa hãa loofɔji lɛ he ko amɛwɔɔ moŋ, shi no etsɔɔɔ akɛ amɛbɛ wɔɔhe. Yehowa eduro amɛ jwɛŋmɔ kɛ nibii ni he baahia amɛ koni amɛnyɛ amɛfee tsũi ni amɛhi mli. Ani enyɛŋ eye ebua wɔ hu ni wɔná he ko ni wɔ kɛ weku lɛ baawɔ?

13. Mɛni hewɔ wɔyɔɔ nɔmimaa akɛ wɔjara wa fe loofɔji lɛ?

¹³ Be ni Yesu wie bɔ ni Yehowa lɛɔ loofɔji lɛ ehãa lɛ he egbe naa lɛ, ebi mɛi ni boɔ lɛ toi lɛ akɛ: “Ani nyɛjara waaa kwraa fe amɛ?” (Okɛto Luka 12:6, 7 lɛ he.) Eeenyɛ efee akɛ, be ni Yesu bi sane nɛɛ, nɔ ni yɔɔ ejwɛŋmɔŋ ji bɔ ni etsɛŋ ebaagbo ni ekɛ ewala asha afɔle ehã adesai lɛ. Yesu ebagbooo ehãaa ŋwɛi loofɔji loo kooloi krokomɛi. Ebagbo ehã wɔ, koni wɔná naanɔ wala.​—Mat. 20:28.

14. Kɛ́ mɔ ko ye etsui tamɔ mɛni, mɛni enyɛŋ efee kɔkɔɔkɔ?

¹⁴ Kanemɔ Mateo 6:27. Mɛni Yesu tsɔɔ be ni ewie akɛ wɔteŋ mɔ ko mɔ ko nyɛŋ ekɛ yeyeeyefeemɔ atsa ewalasɛɛkɛlɛ nɔ ninetalɔ kome po lɛ? Nɔ ni etsɔɔ ji akɛ, kɛ́ wɔye wɔtsui yɛ wɔhiamɔ nii ahe lɛ, no haŋ wɔwala sɛɛ atsɛ. Kɛ́ wɔyeɔ wɔtsui tuutu yɛ nibii ahe lɛ, ebaanyɛ egbe wɔ po.

15, 16. (a) Mɛni wɔkaseɔ yɛ bɔ ni Yehowa wulaa koo mli fɔfɔii lɛ ehãa lɛ mli? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛɛ saji ekolɛ ehe baahia ni wɔbi wɔhe? Ni mɛni hewɔ?

¹⁵ Kanemɔ Mateo 6:28-30. Wɔ fɛɛ wɔmiisumɔ ni wɔwo atadei fɛfɛji, titri lɛ kɛ́ wɔmiiya shiɛmɔ, wɔmiiya asafoŋ  kpeei, loo wɔmiiya Kristofoi ahenaabuamɔi krokomɛi. Shi ani no tsɔɔ akɛ esa akɛ “wɔfee yeyeeye yɛ atade he”? Dabi. Yesu kai ekaselɔi lɛ bɔ ni Yehowa kwɛɔ nibii ni ebɔ lɛ anɔ ehãa, ni ekɛ koo mli fɔfɔii fee enɛ he nɔkwɛmɔnɔ. Fɔfɔii nɛɛ yɛ fɛo waa. Shi amɛtsɛ̃ɛɛ kpãa, aahu ni amɛbaakpɛ loo amɛloo atadei amɛhã amɛhe. Yesu wie yɛ amɛhe akɛ, yɛ “Solomon anunyam lɛ fɛɛ sɛɛ” po lɛ, ewulaaa tamɔ amɛteŋ ekome!

¹⁶ Nɔ ni Yesu wie yɛ enɛ sɛɛ lɛ ji oti lɛ. Ebi ekaselɔi lɛ akɛ: “Kɛji nɛkɛ Nyɔŋmɔ wulaa koo mli kwɛ̃ɛ nii . . . lɛ, ani ewulaŋ nyɛ babaoo, nyɛ ni nyɛhemɔkɛyeli faaa?” Ŋwanejee ko bɛ he akɛ ebaawula amɛ tsɔ! Naagba lɛ ji akɛ, no mli lɛ kaselɔi lɛ ahemɔkɛyeli faaa. (Mat. 8:26; 14:31; 16:8; 17:20) No hewɔ lɛ, ehe bahia ni amɛhã amɛhemɔkɛyeli lɛ mli awa, ni amɛkɛ amɛhiɛ afɔ̃ Yehowa nɔ. Ni wɔ hu? Ani wɔheɔ wɔyeɔ kɛ wɔtsui fɛɛ akɛ Yehowa baakwɛ wɔ?

17. Mɛni baanyɛ ahã wekukpaa kpakpa ni yɔɔ wɔ kɛ Yehowa teŋ lɛ afite?

¹⁷ Kanemɔ Mateo 6:31, 32. Esaaa akɛ wɔkaseɔ jeŋmajiaŋbii lɛ. Amɛ lɛ, amɛheee Nyɔŋmɔ nɔ amɛyeee, no hewɔ lɛ yɛ nɔ najiaŋ ni amɛbaatao Maŋtsɛyeli lɛ klɛŋklɛŋ lɛ, amɛkɛ amɛhewalɛ fɛɛ tiuɔ shika kɛ heloonaa nibii asɛɛ. Kɛ́ wɔkase amɛ lɛ, wekukpaa kpakpa ni yɔɔ wɔ kɛ Yehowa teŋ lɛ baafite. Wɔle akɛ Yehowa ji wɔ-Tsɛ, ni esumɔɔ wɔ. Ni wɔyɛ nɔmimaa akɛ, kɛ́ wɔkɛ mumɔŋ nibii ye klɛŋklɛŋ gbɛhe lɛ, ekɛ nɔ kpakpa ko nɔ kpakpa ko kamaŋ wɔ. Kɛ́ wɔhã enɛ hi wɔjwɛŋmɔ mli lɛ, kɛ́ “niyenii kɛ atade” pɛ po wɔyɔɔ lɛ, wɔmii baashɛ he.​—1 Tim. 6:6-8.

18. Mɛni Yehowa le yɛ wɔhe? Ni mɛni ebaafee ehã wɔ?

¹⁸ Kanemɔ Mateo 6:33. Esa akɛ wɔkɛ Maŋtsɛyeli lɛ aye klɛŋklɛŋ gbɛhe yɛ wɔshihilɛ mli be fɛɛ be. Yesu kɛɛ kɛ́ wɔfee nakai lɛ, ‘abaaŋɔ nibii krokomɛi nɛɛ fɛɛ afata he ahã wɔ.’ Mɛni hewɔ wɔbaanyɛ wɔhe wiemɔi nɛɛ wɔye? Yɛ kuku ni tsɔ hiɛ lɛ mli lɛ, Yesu wie akɛ, ‘wɔ-Tsɛ ni yɔɔ ŋwɛi lɛ le nibii fɛɛ ni he hiaa wɔ lɛ.’ Dani wɔjwɛŋmɔ baaba nɔ akɛ nɔ ko he miihia wɔ lɛ, Yehowa le momo. (Fil. 4:19) Ele be ni ehe baahia ni wɔná atade hee, kɛ be ni ehe baahia ni wɔná nɔ ko wɔye. Agbɛnɛ hu, ele akɛ esa akɛ wɔná he ko ni wɔ kɛ wɔweku lɛ baawɔ. No hewɔ lɛ, ebaakwɛ ni wɔnine ashɛ nibii ni he hiaa wɔ lɛɛlɛŋ lɛ anɔ.

19. Mɛni hewɔ esaaa akɛ wɔyeɔ wɔtsui tuutu yɛ wɔsɛɛ he lɛ?

¹⁹ Kanemɔ Mateo 6:34. Kadimɔ akɛ, enɛ ji shii enyɔ nɔ ni Yesu miikɛɛ ekaselɔi lɛ akɛ: “Nyɛkafea yeyeeye.” Eetao ni esɛɛnyiɛlɔi lɛ kɛ amɛhiɛ afɔ̃ Yehowa nɔ akɛ, daa gbi lɛ, ebaaduro amɛ nibii ni he hiaa amɛ kɛhã nakai gbi lɛ. Kɛ́ wɔye wɔtsui tuutu yɛ wɔsɛɛ he lɛ, ewaaa akɛ wɔkɛ wɔhe baafɔ̃ wɔ diɛŋtsɛ wɔhe nɔ, moŋ fe ni wɔkɛ wɔhiɛ baafɔ̃ Yehowa nɔ. Ni enɛ baanyɛ afite wekukpaa ni yɔɔ wɔ kɛ Yehowa teŋ lɛ.​—Abɛi 3:5, 6; Fil. 4:6, 7.

20. (a) Mɛɛ mumɔŋ oti obaanyɛ okɛma ohiɛ? (b) Mɛni obaanyɛ ofee koni oshihilɛ afee mlɛo?

²⁰ Sɛɛnamɔ ko kwraa bɛ he akɛ wɔkɛ mumɔŋ nibii baashã afɔle yɛ heloonaa nibii pii ni wɔtaoɔ wɔná lɛ hewɔ. Yɛ nɔ najiaŋ ni wɔbaafee nakai lɛ, esa akɛ wɔmia wɔhiɛ wɔtsu babaoo yɛ Yehowa sɔɔmɔ lɛ mli. Akɛ nɔkwɛmɔnɔ lɛ, wɔbaanyɛ wɔfã kɛya he ko ni shiɛlɔi ayi faaa yɛ ni wɔyaye wɔbua yɛ jɛmɛ, loo wɔbaanyɛ wɔsɔmɔ akɛ daa gbɛgbalɔi. Kɛ́ wɔmiisɔmɔ akɛ daa gbɛgbalɔi momo lɛ, wɔbaanyɛ wɔkɛfee oti akɛ wɔbaaya Skul Kɛhã Maŋtsɛyeli Sane Kpakpa Jajelɔi lɛ eko. Agbɛnɛ hu, wɔbaanyɛ wɔkɔlɔ gbii komɛi yɛ otsi lɛ mli ni wɔkɛyaye wɔbua yɛ Betel loo wiemɔ shishitsɔɔmɔ ɔfis ko. Aloo wɔbaanyɛ wɔyaye wɔbua yɛ hei ni aamamɔ Maŋtsɛyeli Asai, Kpee Asai, loo tsũi krokomɛi ni akɛsɔmɔɔ Yehowa yɛ lɛ. Esa akɛ wɔteŋ mɔ fɛɛ mɔ akwɛ nɔ ni ebaanyɛ efee koni ená be babaoo kɛsɔmɔ Yehowa. Atsɔɔ nibii komɛi ni wɔbaanyɛ wɔfee lɛ yɛ akrabatsa ni yitso ji, “ Bɔ ni Obaafee Ohã Oshihilɛ Afee Mlɛo” lɛ mli. Sɔlemɔ ni Yehowa aye abua bo ni okɛ ŋaawoi ni yɔɔ akrabatsa nɛɛ mli lɛ atsu nii.

21. Mɛni baahã wekukpaa ni yɔɔ okɛ Yehowa teŋ lɛ mli awa?

²¹ Ŋaa ni Yesu wo wɔ akɛ wɔtao Maŋtsɛyeli lɛ, shi jeee heloonaa nibii lɛ nɔ bɛ. Kɛ́ wɔbo ŋaawoo nɛɛ toi ni wɔkɛtsu nii lɛ, wɔfeŋ yeyeeye kɔkɔɔkɔ yɛ heloonaa hiamɔ nii ahe. Moŋ lɛ, wɔkɛ wɔhiɛ baafɔ̃ Yehowa nɔ kwraa, ni no baahã wekukpaa ni yɔɔ wɔ kɛ lɛ teŋ lɛ mli awa. Kɛfata he lɛ, ebaahã wɔle wɔhe nɔkwɛmɔ, ni no hewɔ lɛ wɔheŋ nibii kɛkɛ, kɛ́ wɔyɛ shika ni wɔkɛbaahe po. Kɛ́ wɔhã wɔshihilɛ fee mlɛo lɛ, ebaaye ebua wɔ ni ‘wɔmɔ wala diɛŋtsɛ ni Yehowa ewo shi akɛ ekɛbaaduro wɔ lɛ mli kpɛŋŋ’.​—1 Tim. 6:19.