Yehowa ‘Susuɔ Ohe’
ŊWANEJEE ko bɛ he akɛ, oheɔ wiemɔi nɛɛ oyeɔ. Wɔ fɛɛ wɔle akɛ Yehowa susuɔ wɔhe lɛɛlɛŋ. Mɛni hewɔ? Nɔ kome ji akɛ, Biblia lɛ ewie tɛ̃ɛ akɛ Yehowa susuɔ wɔhe. Ŋmalɛ ni yɔɔ 1 Petro 5:7 lɛ kɛɔ akɛ: ‘Nyɛshɛrɛa nyɛyeyeeyefeemɔi lɛ fɛɛ nyɛshwiea enɔ, ejaakɛ esusuɔ nyɛhe.’ Mɛni tsɔɔ akɛ Yehowa Nyɔŋmɔ susuɔ wɔhe lɛɛlɛŋ?
NYƆŊMƆ HÃA WƆ NIBII NI HE HIAA WƆ
Yehowa ji naanyo kpakpa, ejaakɛ emli hi ni efeɔ wɔ ejurɔ
Sui ni hãa mɛi batsɔmɔɔ nanemɛi kpakpai lɛ ekomɛi ji mlihilɛ kɛ ejurɔfeemɔ, ni Nyɔŋmɔ jieɔ sui nɛɛ akpo etsɔɔ wɔ. Yehowa mli hi, ni efeɔ adesai ejurɔ gbi fɛɛ gbi. Akɛ nɔkwɛmɔnɔ lɛ, Biblia lɛ wieɔ akɛ: “Ehãa ehulu teɔ shi yɛ mɛi fɔji kɛ mɛi kpakpai fɛɛ nɔ, ni ehãa nugbɔ nɛɔ shwieɔ jalɔi kɛ mɛi ni ejaaa fɛɛ nɔ.” (Mat. 5:45) Mɛni hulu kɛ nugbɔ feɔ ehãa wɔ? Hulu kɛ nugbɔ hãa tsei kwɛ̃ɔ ni wɔnáa niyenii babaoo wɔyeɔ, ni nibii ni hãa wɔmii shɛɔ wɔhe waa lɛ ateŋ ekome ji, ni wɔbaaná niyenii kpakpa ko wɔye. (Bɔf. 14:17) No hewɔ lɛ, Yehowa hãa shikpɔŋ lɛ baa niyenii babaoo ehãa wɔ.
Kɛ́ nakai ni lɛ, mɛni hewɔ hɔmɔ yeɔ mɛi babaoo nakai? Naagba lɛ jɛ adesai nɔyelɔi. Adesai nɔyelɔi yeɔ amɛwebii lɛ amim, ejaakɛ nɔ pɛ ni amɛsusuɔ he ji, bɔ ni amɛbaafee amɛya nɔ amɛta sɛi lɛ nɔ ni amɛná shika. Amɛsusuuu amɛmaŋbii lɛ ahe kɛ bɔ ni amɛbaafee amɛye amɛbua amɛ. Etsɛŋ kwraa, Yehowa baatsu naagba nɛɛ he nii. Ebaajie adesai anɔyelii fɛɛ kɛje shikpɔŋ nɛɛ nɔ, ni ekɛ eŋwɛi Maŋtsɛyeli lɛ baaye amɛnajiaŋ. E-Bi Yesu baaye nɔ akɛ Maŋtsɛ, ni ebaakwɛ ni mɔ fɛɛ mɔ aná niyenii eye. Shi kɛyashi Maŋtsɛyeli lɛ baaba lɛ, Nyɔŋmɔ baaya nɔ ekwɛ etsuji anɔkwafoi. (Lala 37:25) Ani enɛ etsɔɔɔ akɛ esusuɔ wɔhe?
YEHOWA YƐ WƆHE DEKÃ
Yehowa ji naanyo kpakpa, ejaakɛ eyɛ wɔhe dekã
Nanemɛi kpakpai náa dekã amɛhãa amɛhe. Amɛbaanyɛ amɛgba sane ŋmɛlɛtswai abɔ ni ejieee amɛ. Kɛ́ onaanyo ko miigba bo enaagbai lɛ, ofeɔ diŋŋ ni oboɔ lɛ toi jogbaŋŋ. Ani wɔbaanyɛ wɔwie nɔ ko ni tamɔ nakai yɛ Yehowa he? Hɛɛ, wɔbaanyɛ! Yehowa boɔ wɔsɔlemɔi atoi jogbaŋŋ. Enɛ hewɔ lɛ, Biblia lɛ woɔ wɔ hewalɛ ni ‘wɔhiɛ sɔlemɔ mli daa.’ Ekɛɛ ‘wɔsɔle ni wɔkafɔ̃ɔ.’—Rom. 12:12; 1 Tes. 5:17.
Be enyiɛ wɔbaanyɛ wɔkɛsɔle? Yesu he sane ko ni agba wɔ yɛ Biblia lɛ mli lɛ hãa wɔ sanebimɔ nɛɛ hetoo. Dani Yesu baahala ebɔfoi lɛ, “esɔle ehã Nyɔŋmɔ nyɔɔŋ lɛ mli fɛɛ.” (Luka 6:12) Eeenyɛ efee akɛ, yɛ nakai sɔlemɔ lɛ mli lɛ, Yesu tsĩ ekaselɔi lɛ ateŋ mɛi babaoo atã etsɔɔ Yehowa. Ekolɛ etsɛ amɛgbɛ́i, ewie amɛsui kpakpai kɛ amɛfatɔi ahe etsɔɔ lɛ, ni ebi lɛ ni eye ebua lɛ koni enyɛ ehala mɛi ni sa. Enɛ hewɔ lɛ, Yesu ná nɔmimaa akɛ, mɛi ni ehala akɛ ebɔfoi lɛ ji mɛi ni sa jogbaŋŋ kɛhã nakai nitsumɔ lɛ. Yehowa, ‘sɔlemɔ Toibolɔ lɛ,’ boɔ mɛi fɛɛ ni fɔseɔ amɛtsuiŋ amɛshwieɔ ehiɛ lɛ toi. (Lala 65:3) No hewɔ lɛ, kɛ́ wɔkɛ ŋmɛlɛtswai abɔ sɔle wɔhã Yehowa yɛ sane ko ni miigba wɔnaa waa lɛ he lɛ, Yehowa baaná dekã ebo wɔ toi aahu.
EKƐ ESHAI KEƆ
Yehowa ji naanyo kpakpa, ejaakɛ ekɛ eshai keɔ
Bei komɛi lɛ, ewa kɛhã nanemɛi kpakpai po akɛ amɛkɛ eshai baake. Mɛi ni ehi shi akɛ nanemɛi afii pii lɛ po ateŋ nyɛɔ efiteɔ yɛ sane ko ni ba ni ewa kɛhã amɛ akɛ amɛkɛbaake lɛ hewɔ. Shi Yehowa bɛ nakai. Biblia lɛ kɛɔ mɛi fɛɛ ni hiɛ tsui krɔŋŋ lɛ akɛ, kɛ́ amɛtɔ̃ Yehowa nɔ, ni amɛbi edɛŋ eshaifaa lɛ, ‘ekɛbaafa amɛ aahu.’ (Yes. 55:6, 7) Mɛni hewɔ Nyɔŋmɔ kɛ eshai keɔ tswaa nakai lɛ?
Nɔ hewɔ lɛ ji akɛ, esumɔɔ wɔ waa. Esumɔɔ je lɛ jogbaŋŋ aahu akɛ eŋɔ e-Bi Yesu ehã wɔ, koni ekpɔ̃ wɔ kɛjɛ esha kɛ nibii fɔji ni jɛɔ mli kɛbaa lɛ amli. (Yoh. 3:16) Shi jeee no pɛ. Kɛtsɔ Kristo kpɔmɔ afɔle lɛ nɔ lɛ, Nyɔŋmɔ nyɛɔ ekɛ mɛi fɛɛ ni esumɔɔ lɛ atɔmɔi keɔ amɛ tswaa. Bɔfo Yohane ŋma akɛ: “Kɛ́ wɔjaje wɔhe eshai lɛ wɔtsɔɔ lɛ, anɔkwafo kɛ jalɔ ji lɛ, ni no hewɔ lɛ, ekɛ wɔhe eshai lɛ baafa wɔ.” (1 Yoh. 1:9) Eji Yehowa kɛ wɔhe eshai ekeee wɔ kulɛ, wɔ kɛ lɛ teŋ naanyobɔɔ lɛ baafite. Kɛ́ wɔsusu bɔ ni Nyɔŋmɔ kɛ eshai keɔ lɛ he lɛ, wɔbaana faŋŋ akɛ, esusuɔ wɔhe waa.
EWAA WƆ KƐ́ YELIKƐBUAMƆ HE MIIHIA WƆ
Yehowa ji naanyo kpakpa, ejaakɛ ewaa wɔ kɛ́ yelikɛbuamɔ he miihia wɔ
Kɛ́ onaanyo kpakpa ko he fi lɛ lɛ, oyeɔ obuaa lɛ. Nakai nɔŋŋ Yehowa feɔ ehãa wɔ. Biblia lɛ kɛɔ akɛ, kɛ́ Nyɔŋmɔ tsulɔ ko gbee shi tete lɛ, “ekaŋ shi kwraa, ejaakɛ Yehowa hiɛ enine mli.” (Lala 37:24) Yehowa yeɔ ebuaa etsuji yɛ gbɛi srɔtoi anɔ. Niiashikpamɔ ni nyiɛ sɛɛ nɛɛ maa enɛ nɔ mi. Eba yɛ ŋshɔkpɔ ko ni yɔɔ Caribbean ŋshɔ lɛ mli, ni atsɛɔ lɛ St. Croix lɛ nɔ.
Be ni oblayoo fioo ko nanemɛi skulbii wie amɛshi lɛ yɛ aflaŋaa lɛ ni eŋaaa lɛ hewɔ lɛ, esɔle yɛ sane lɛ he, ni ekpɛ eyiŋ akɛ ebaagbala nibii amli etsɔɔ amɛ. No hewɔ lɛ, be ko be ni akɛɛ lɛ akɛ eyatao sane ko mli ni ebagba eklasbii lɛ, eŋɔ hegbɛ lɛ ni ekɛtsɔɔ amɛ nɔ hewɔ ni eŋaaa aflaŋaa lɛ. Egba amɛ Shadrak, Meshak, kɛ Abednego he sane ni aŋma yɛ Mi-Wolo ni Gbaa Biblia Mli Saji wolo lɛ mli lɛ, ni edamɔ no nɔ etsɔɔ amɛ nɔ hewɔ ni eŋaaa aflaŋaa lɛ. Ekɛɛ amɛ akɛ, “Hebribii etɛ nɛɛ jáaa amaga lɛ, ni no hewɔ Yehowa bu amɛhe lɛ.” No sɛɛ lɛ, ebi amɛ kɛji amɛbaasumɔ ni ehã amɛ wolo lɛ eko. Amɛteŋ mɛi 11 wie akɛ amɛbaasumɔ. Oblayoo fioo nɛɛ mii shɛ ehe waa, ejaakɛ eyɔse akɛ, Yehowa ji mɔ ni hã lɛ ekãa kɛ nilee ni ekɛgbala sane nɛɛ mli etsɔɔ eskulbii lɛ.
Kɛ́ be ko shɛ, ni oyiŋ miifee bo kɔshikɔshi kɛji Yehowa susuɔ ohe lɛ, jwɛŋmɔ ŋmalɛi ni nyiɛ sɛɛ nɛɛ kɛ ekrokomɛi ni tamɔ nakai lɛ anɔ: Lala 34:18-20; 55:23; kɛ 145:18, 19. Bi nyɛmimɛi ni kɛ afii pii esɔmɔ Yehowa lɛ nibii ni amɛna ni ehã amɛná nɔmimaa akɛ Yehowa susuɔ amɛhe. Kɛ́ sane ko miigba onaa lɛ, sɔlemɔ obi Nyɔŋmɔ dɛŋ yelikɛbuamɔ. Kɛ́ ofee nibii nɛɛ, eyeŋ be ko ni obaana akɛ Yehowa ‘susuɔ ohe.’