1, 2. (a) Mɛɛ sane ni he hiaa waa esa akɛ adesai fɛɛ asusu he? (b) Mɛni hewɔ esa akɛ wɔhã sane nɛɛ he ahia wɔ lɛ?

ŊMƐNƐ lɛ, mɛi pii naa shika akɛ no ji nɔ ni he hiaa fe fɛɛ yɛ shihilɛ mli. No hewɔ lɛ, daa nɛɛ amɛjwɛŋmɔ yɛ bɔ ni amɛbaafee amɛná shika pii loo amɛbaa nɔ ni amɛyɔɔ lɛ yi. Mɛi komɛi hu nuɔ he akɛ nɔ ni he hiaa fe yɛ shihilɛ mli ji, amɛweku, amɛgbɔmɔtsoŋ hewalɛ, loo otii komɛi ni amɛkɛmamɔ amɛhiɛ.

² Shi nɔ ko yɛ ni he miihia fe nibii nɛɛ fɛɛ. No ji, ni wɔkɛ wɔnifeemɔi baatsɔɔ akɛ wɔkpɛlɛɔ nɔ akɛ Yehowa pɛ ji mɔ ni sa akɛ eyeɔ jeŋ muu lɛ fɛɛ nɔ. Shi kɛ́ wɔkwɛɛɛ jogbaŋŋ lɛ, wɔhiɛ baanyɛ akpa sane ni he hiaa nɛɛ nɔ. Nibii ni wɔfeɔ daa gbi kɛ kai kɛ shihilɛi ni jaraa ni wɔkɛkpeɔ lɛ baanyɛ ahe wɔjwɛŋmɔ aahu akɛ, wɔnaŋ sane nɛɛ akɛ nɔ ko ni he hiaa waa dɔŋŋ. Shi kɛ́ wɔhã ehi wɔjwɛŋmɔŋ be fɛɛ be akɛ sane nɛɛ he miihia waa lɛ, ebaaye ebua wɔ ni wɔnyɛ wɔkpee naagbai ni wɔkɛkpeɔ daa gbi lɛ anaa, ni ebaahã wekukpaa ni yɔɔ wɔ kɛ Yehowa teŋ lɛ mli awa.

3. Mɛni Satan ewie yɛ Nyɔŋmɔ nɔyeli lɛ he?

³ Satan Abonsam kɛɛ Yehowa jeee mɔ ni sa akɛ eyeɔ jeŋ muu  lɛ fɛɛ nɔ. Ekɛɛ Nyɔŋmɔ jeee Nɔyelɔ kpakpa, ni ekɛ nibii kpakpai kamaa eshishi bii. Yɛ nɔ ni Abonsam tsɔɔ lɛ naa lɛ, kɛ́ adesai diɛŋtsɛ ye amɛhe nɔ lɛ, amɛbaaná miishɛɛ ni amɛhe baajɔ amɛ waa. (1 Mose 3:1-5) Kɛfata he lɛ, Satan kɛɛ adesa ko bɛ ni baajɛ etsuiŋ eye Nyɔŋmɔ anɔkwa, ni akɛ kɛ́ nibii amli wa hã adesai lɛ, amɛbaakpoo Yehowa nɔyeli lɛ. (Hiob 2:4, 5) No hewɔ lɛ, Yehowa ehã be pii eshwie mli koni adesai ana faŋŋ akɛ, ja lɛ eye amɛnɔ dani nibii baaya nɔ jogbaŋŋ ahã amɛ.

4. Mɛni hewɔ esa akɛ adesai kɛ ŋwɛibɔfoi fɛɛ akpɛlɛ nɔ akɛ, Yehowa pɛ ji mɔ ni sa akɛ eyeɔ jeŋ muu lɛ fɛɛ nɔ?

⁴ Yehowa le faŋŋ akɛ, nibii ni Abonsam ewie lɛ bɛ mli. No hewɔ lɛ, mɛni hewɔ eŋmɛ Satan gbɛ koni Satan atsɔɔ kɛji esane ja loo ejaaa? Sanebimɔ nɛɛ hetoo lɛ kɔɔ adesai kɛ ŋwɛibɔfoi fɛɛ ahe. (Kanemɔ Lala 83:19.) Adam kɛ Hawa kɛ amɛnifeemɔ tsɔɔ akɛ amɛsumɔɔɔ Yehowa nɔyeli lɛ, ni mɛi pii enyiɛ amɛnɔkwɛmɔnɔ gbonyo lɛ sɛɛ. Enɛ hewɔ lɛ, ekolɛ mɛi komɛi baanu he akɛ Abonsam sane ja. Kɛyashi be ni adesai kɛ ŋwɛibɔfoi fɛɛ baana faŋŋ akɛ Abonsam sane ejaaa lɛ, toiŋjɔlɛ kɛ ekomefeemɔ nyɛŋ ahi majimaji, wekui, mɛi ni yɔɔ hewolonɔ sui srɔtoi, kɛ aŋkroaŋkroi ateŋ. Kɛ́ adesai kɛ ŋwɛibɔfoi fɛɛ kpɛlɛ nɔ akɛ Yehowa pɛ ji mɔ ni sa akɛ eyeɔ jeŋ muu lɛ fɛɛ nɔ lɛ, amɛ fɛɛ amɛbaaba amɛhe shi amɛhã lɛ kɛya naanɔ, ni toiŋjɔlɛ baaba he fɛɛ he.—Efe. 1:9, 10.

5. Mɛni wɔbaanyɛ wɔfee kɛtsɔɔ akɛ wɔfiɔ Nyɔŋmɔ nɔyeli lɛ sɛɛ?

⁵ Be baashɛ ni ebaafee faŋŋ akɛ, Nyɔŋmɔ ji mɔ ni sa akɛ eyeɔ jeŋ muu lɛ fɛɛ nɔ. Abaajie Satan kɛ adesai anɔyelii fɛɛ kɛya, ejaakɛ amɛyeŋ omanye. Mesia Maŋtsɛyeli lɛ, ni ji gbɛ ni Nyɔŋmɔ tsɔɔ nɔ eyeɔ nɔ lɛ, baaye omanye. No mli lɛ, adesai anɔkwafoi ehã ana faŋŋ akɛ, adesai baanyɛ afi Nyɔŋmɔ nɔyeli lɛ sɛɛ. (Yes. 45:23, 24) Ani obaasumɔ ni ofata anɔkwafoi nɛɛ ahe? Ŋwanejee ko bɛ he akɛ obaasumɔ. Enɛ hewɔ esa akɛ ohã Nyɔŋmɔ nɔyeli lɛ sɛɛ ni obaafi lɛ he ahia bo waa, ni ojwɛŋ nɔ be fɛɛ be lɛ.

6. Na ni abaana faŋŋ akɛ Yehowa ji mɔ ni sa akɛ eyeɔ jeŋ muu lɛ fɛɛ nɔ lɛ he miihia fe mɛni?

⁶ Ŋmɛnɛ lɛ, wɔbɛ hejɔlɛ yɛ je lɛ mli. Shi na ni abaana faŋŋ akɛ Yehowa ji mɔ ni sa akɛ eyeɔ jeŋ muu lɛ fɛɛ nɔ lɛ he miihia fe ni wɔhe baajɔ wɔ. Tamɔ bɔ ni wɔwie kɛtsɔ hiɛ lɛ, ehe miihia fe nibii krokomɛi fɛɛ. Ani no tsɔɔ akɛ naanɔ wala ni wɔbaaná lɛ he ehiaaa, aloo akɛ, Yehowa susuuu wɔhe? Dabi kwraa. Mɛni hewɔ?

7, 8. Mɛɛ tsakpaa yɔɔ Nyɔŋmɔ shiwoi lɛ anɔ ni ebaaye kɛ na ni abaana akɛ lɛ ji mɔ ni sa akɛ eyeɔ jeŋ muu lɛ fɛɛ nɔ lɛ teŋ?

⁷ Yehowa sumɔɔ adesai waa diɛŋtsɛ. Wɔjara wa hã lɛ aahu akɛ, ejɛ esuɔmɔ mli etsu e-Bi lɛ kɛba koni wɔnyɛ wɔná naanɔ wala. (Yoh. 3:16; 1 Yoh. 4:9) Satan kɛɛ Nyɔŋmɔ ji amalelɔ, ekɛ nibii kpakpai teɔ eshishi bii, ni eyeee adesai anɔ jogbaŋŋ. Mɛi komɛi hu teɔ shi amɛwoɔ Yehowa, ni amɛwieɔ yɛ eshiwoi lɛ ahe akɛ: “Nɛgbɛ be ni eba ni awo he shi lɛ yɔɔ? Naa, kɛjɛ beyinɔ ni wɔtsɛmɛi lɛ yawɔwɔi yɛ gbele mli nɛɛ, nibii fɛɛ miiya nɔ tamɔ bɔ ni amɛji kɛjɛ adebɔɔ shishijee mli lɛ nɔŋŋ.” (2 Pet. 3:3, 4) No hewɔ lɛ, kɛ́ Yehowa yeee eshiwoi lɛ anɔ lɛ, belɛ nɔ ni Satan kɛ mɛi ni teɔ shi amɛwoɔ Nyɔŋmɔ lɛ wieɔ yɛ ehe lɛ baafee anɔkwale. Shi Yehowa hãŋ eba lɛ nakai. Eto gbɛjianɔ koni naanɔ wala ni adesai ni boɔ lɛ toi lɛ baaná lɛ afata nibii ni baahã ana faŋŋ akɛ lɛ pɛ ji mɔ ni sa akɛ eyeɔ jeŋ muu lɛ fɛɛ nɔ lɛ ahe. (Kanemɔ Yesaia 55:10, 11.) Kɛfata he  lɛ, suɔmɔ ji nɔ titri ni kadiɔ Yehowa nɔyeli lɛ. No hewɔ lɛ, wɔbaanyɛ wɔná nɔmimaa akɛ, suɔmɔ ni eyɔɔ kɛhã etsuji ni yeɔ lɛ anɔkwa lɛ sɛɛ efoŋ, ni ehiɛ baasɔ amɛ kɛya naanɔ.—2 Mose 34:6.

⁸ No hewɔ lɛ, eyɛ mli akɛ Yehowa nɔyeli lɛ ji sane ko ni he hiaa waa moŋ, shi no etsɔɔɔ akɛ naanɔ wala ni wɔbaaná lɛ he ehiaaa lɛ, aloo akɛ esusuuu wɔhe. Nɔ pɛ ni etsɔɔ ji akɛ, Yehowa nɔyeli lɛ he miihia fe naanɔ wala ni wɔbaaná. Esa akɛ wɔhã anɔkwa sane nɛɛ ahi wɔjwɛŋmɔŋ be fɛɛ be, ni wɔya nɔ wɔfi Yehowa nɔyeli lɛ sɛɛ.

9. Mɛni Satan wie yɛ Hiob he? (Kwɛmɔ mfoniri ni yɔɔ nikasemɔ lɛ shishijee lɛ.)

⁹ Hiob wolo lɛ, ni ji Biblia mli woji ni etsɛ waa lɛ ateŋ ekome lɛ, hãa wɔnaa nɔ hewɔ ni esa akɛ wɔhã sane ni kɔɔ jeŋ muu fɛɛ nɔyeli he lɛ ahi wɔjwɛŋmɔŋ daa. Wolo nɛɛ hãa wɔleɔ akɛ, be ko lɛ, Satan wie akɛ kɛ́ Hiob na nɔ waa lɛ, ebaakwa Nyɔŋmɔ. Ekɛɛ Yehowa po akɛ epiŋ Hiob. Yehowa efeee nakai, shi eŋmɛ Satan gbɛ ní eka Hiob. Ekɛɛ Satan akɛ: “Nɔ fɛɛ nɔ ní eyɔɔ lɛ eyɛ odɛŋ.” (Kanemɔ Hiob 1:7-12.) Yɛ be kukuoo mli lɛ, Hiob tsuji kɛ ebii nyɔŋma lɛ fɛɛ gboi, ni enibii fɛɛ ahiɛ kpãtã. Satan hã efee tamɔ nɔ ni Nyɔŋmɔ ji mɔ ni hɔ naagbai nɛɛ fɛɛ asɛɛ. (Hiob 1:13-19) No sɛɛ lɛ, ehã hela ko ni yɔɔ nyaŋemɔ ni waa mɔ he mɔ Hiob. (Hiob 2:7) Nɔ ni fite sane lɛ kwraa ji akɛ, Hiob ŋa kɛ hii etɛ komɛi ni kɛɛ amɛnaanyo ji lɛ lɛ wie nibii kɛje enijiaŋ wui.—Hiob 2:9; 3:11; 16:2.

10. (a) Mɛni Hiob fee kɛtsɔɔ akɛ eyeɔ Nyɔŋmɔ anɔkwa? (b) Mɛni hewɔ ehe bahia ni ajaje lɛ lɛ?

¹⁰ Yɛ naagbai nɛɛ ni Hiob kɛkpe lɛ fɛɛ sɛɛ lɛ, ekwaaa Nyɔŋmɔ. Enɛ hã efee faŋŋ akɛ, nɔ ni Satan wie yɛ ehe lɛ ji amale. (Hiob 27:5) Shi Hiob hiɛ kpa sane ni kɔɔ Yehowa nɔyeli lɛ he lɛ nɔ be kukuoo ko. Ewie nibii ni tsɔɔ akɛ eebu ehe jalɔ, ni ebi po ni ahã ele nɔ ni efee hewɔ ni epiŋɔ nakai lɛ. (Hiob 7:20; 13:24) Kɛ́ wɔkwɛ naagbai abɔ ni Hiob kɛkpe lɛ, ekolɛ wɔbaanu lɛ shishi. Kɛ̃lɛ, Yehowa na akɛ susumɔ ni ehiɛ lɛ ejaaa, no hewɔ lɛ, ejaje lɛ. Mɛni ekɛɛ lɛ?

11, 12. Mɛɛ gbɛ nɔ Yehowa ye ebua Hiob? Ni te Hiob fee enii ehã tɛŋŋ?

¹¹ Aŋmala saji ni Nyɔŋmɔ kɛɛ Hiob lɛ yɛ Hiob yitso 38 kɛyashi 41. Nyɔŋmɔ etsɔɔɔ Hiob nɔ hewɔ ni epiŋɔ lɛ, ejaakɛ jeee no hewɔ ekɛ lɛ wie lɛ. Moŋ lɛ, eye ebua lɛ koni ena akɛ, kɛ́ akɛ lɛ to Nyɔŋmɔ he lɛ, ejeee mɔ ko kwraa. Ehã Hiob na akɛ, saji komɛi yɛ ni he miihia fe naagbai ni ekɛkpeɔ lɛ. (Kanemɔ Hiob 38:18-21.) Enɛ ye ebua Hiob ni ená jwɛŋmɔ ni ja yɛ saji ahe.

 ¹² Ekolɛ obaakɛɛ akɛ, bɔ ni Yehowa jaje Hiob lɛ naa wa tsɔ, ejaakɛ Hiob kɛ naagbai ni naa wala waa kpe. Shi jeee nakai eji, ni Hiob hu enaaa lɛ nakai. Yɛ naagbai ni ekɛkpe lɛ fɛɛ asɛɛ lɛ, ehiɛ sɔ nibii ni Nyɔŋmɔ kɛɛ lɛ lɛ. Ekpɛlɛ ŋaawoo ni yɔɔ tɛ̃ɛ ni Yehowa jɛ suɔmɔ mli ekɛhã lɛ nɔ, ni ewie po akɛ: “Eedɔ mi ni miishwa mihe yɛ sũ kɛ lamulu mli!” (Hiob 42:1-6) Dani Yehowa kɛ Hiob baawie lɛ, oblanyo ko ni atsɛɔ lɛ Elihu lɛ hu ye ebua Hiob koni ejaje susumɔ ni ehiɛ lɛ. (Hiob 32:5-10) Hiob kpɛlɛ ŋaa ni awo lɛ lɛ fɛɛ nɔ, ni ejaje esusumɔ. Enɛ hewɔ lɛ, Yehowa hã mɛi krokomɛi le akɛ ehiɛ esɔ Hiob anɔkwayeli lɛ.—Hiob 42:7, 8.

13. Be ni Hiob naagbai lɛ fɛɛ sɛɛ fo po lɛ, mɛɛ gbɛ nɔ ená Yehowa ŋaawoo lɛ he sɛɛ?

¹³ Be ni Hiob naagbai lɛ asɛɛ fo po lɛ, etee nɔ ená Yehowa ŋaawoo lɛ he sɛɛ. Yɛ mɛɛ gbɛ nɔ? Eyɛ mli akɛ Biblia lɛ kɛɔ akɛ, “Yehowa jɔɔ Hiob sɛɛkpee be lɛ fe etsutsu be lɛ” moŋ, shi ŋwanejee ko bɛ he akɛ, ehe be dani enine shɛ nibii ni ŋmɛɛ lɛ lɛ anɔ ekoŋŋ. Sɛɛ mli lɛ, “esaa efɔ bihii kpawo kɛ biyei etɛ.” (Hiob 42:12-14) Shi ekã shi faŋŋ akɛ, ehiɛ tse ebii ni gboi be ni Satan hã ena nɔ lɛ. Kɛfata he lɛ, ekolɛ ehiɛ kpaaa nibii gbohii ni nina lɛ kɛ eweku lɛ anɔ. Wɔleee kɛji sɛɛ mli lɛ Hiob ná ele nɔ hewɔ ni ekɛ naagbai nɛɛ fɛɛ kpe. Shi kɛ́ ená ele po lɛ, ekolɛ ebaabi ehe nɔ hewɔ ni Nyɔŋmɔ ŋmɛ gbɛ ni epiŋ waa nakai. Bɔ fɛɛ bɔ ni sane lɛ ji lɛ, Hiob baanyɛ akai Nyɔŋmɔ ŋaawoo lɛ, ni kɛ́ efee nakai lɛ, ebaaye ebua lɛ ni ená jwɛŋmɔ ni ja yɛ saji ahe, ni no baashɛje emii.—Lala 94:19.

14. Mɛni wɔkaseɔ yɛ Hiob sane lɛ mli?

¹⁴ Kɛ́ wɔjwɛŋ Hiob sane lɛ nɔ lɛ, ebaaye ebua wɔ ni wɔná jwɛŋmɔ ni ja yɛ wɔnaagbai lɛ ahe, ni no baashɛje wɔmii. Yehowa hã aŋma Hiob wolo lɛ “koni etsɔɔ wɔ nii, koni kɛtsɔ wɔshifimɔ kɛ agbɛnɛ hu kɛtsɔ Ŋmalɛi lɛ amli miishɛjemɔ lɛ nɔ lɛ, wɔná hiɛnɔkamɔ.” (Rom. 15:4) Mɛni wɔkaseɔ yɛ Hiob sane lɛ mli? Nɔ ni wɔkaseɔ ji akɛ, ekɔɔɔ he eko naagbai ni wɔkɛbaakpe yɛ shihilɛ mli lɛ, esaaa akɛ wɔhiɛ kpaa sane ni he hiaa waa nɛɛ nɔ, no ji, na ni abaana akɛ Yehowa pɛ ji mɔ ni sa akɛ eyeɔ jeŋ muu lɛ fɛɛ nɔ. Tamɔ bɔ ni Hiob fee lɛ, kɛ́ wɔtee nɔ wɔye anɔkwa yɛ shihilɛi ni jaraa amli lɛ, no baatsɔɔ akɛ wɔfiɔ Yehowa nɔyeli lɛ sɛɛ.

15. Kɛ́ wɔye Nyɔŋmɔ anɔkwa yɛ naagbai ni wɔkɛkpeɔ lɛ amli lɛ, mɛɛ sɛɛnamɔi jɛɔ mli kɛbaa?

¹⁵ Hiob sane lɛ baanyɛ ashɛje wɔmii, ejaakɛ ehãa wɔnaa akɛ, naagbai ni wɔkɛkpeɔ lɛ etsɔɔɔ akɛ Yehowa mli efũ wɔ. Moŋ lɛ, naagbai nɛɛ hãa wɔnáa hegbɛ kɛtsɔɔ akɛ wɔfiɔ Nyɔŋmɔ nɔyeli lɛ sɛɛ.  (Abɛi 27:11) Kɛ́ wɔtee nɔ wɔfi shi lɛ, esaa Yehowa hiɛ, ni wɔhiɛnɔkamɔ lɛ mli waa. (Kanemɔ Romabii 5:3-5.) Hiob sane lɛ hãa wɔnaa akɛ, “Yehowa dɔɔ mɔ he waa, ni enaa mɔbɔ hu.” (Yak. 5:11) No hewɔ lɛ, wɔbaanyɛ wɔná nɔmimaa akɛ, kɛ́ wɔfi enɔyeli lɛ sɛɛ lɛ, ebaajɔɔ wɔ. Enɛ ni wɔle lɛ yeɔ ebuaa wɔ koni wɔkɛ “tsuishitoo kɛ miishɛɛ afi shi kɛwula shi.”—Kol. 1:11.

16. Mɛni hewɔ esa akɛ wɔkai wɔhe akɛ na ni abaana faŋŋ akɛ Yehowa pɛ ji mɔ ni sa akɛ eyeɔ jeŋ muu lɛ fɛɛ nɔ lɛ he miihia waa lɛ?

¹⁶ Bei komɛi lɛ, naagbai ni wɔkɛkpeɔ lɛ baanyɛ asu wɔtsui aahu akɛ, ebaawa kɛhã wɔ akɛ wɔbaahã wɔjwɛŋmɔ ahi sane ni he hiaa waa nɛɛ, ni ji, na ni abaana faŋŋ akɛ Yehowa pɛ ji mɔ ni sa akɛ eyeɔ jeŋ muu lɛ fɛɛ nɔ lɛ nɔ. Kɛ́ wɔjwɛŋ naagbai bibii ni wɔkɛkpeɔ lɛ po ahe fe nine lɛ, wɔbaana amɛ tamɔ naagbai wuji. No hewɔ lɛ, ekɔɔɔ he eko naagba ni wɔkɛbaakpe lɛ, esa akɛ wɔkai wɔhe be fɛɛ be akɛ, Nyɔŋmɔ nɔyeli lɛ sɛɛ ni wɔbaafi lɛ he miihia fe nibii krokomɛi fɛɛ.

17. Kɛ́ wɔkɛ ekãa tsu nitsumɔ ni Yehowa kɛwo wɔdɛŋ lɛ, mɛɛ gbɛ nɔ no baanyɛ aye abua wɔ ni wɔjwɛŋmɔ ahi sane ni kɔɔ jeŋ muu fɛɛ nɔyeli he lɛ nɔ?

¹⁷ Kɛ́ wɔkɛ ekãa tsu nitsumɔ ni Yehowa kɛwo wɔdɛŋ lɛ, no baanyɛ aye abua wɔ ni wɔhã wɔjwɛŋmɔ ahi sane ni kɔɔ jeŋ muu fɛɛ nɔyeli he lɛ nɔ. Nyɛmi yoo ko ni atsɛɔ lɛ Renee lɛ ná enɛ mli niiashikpamɔ. No mli lɛ, ená strok kɛ kansa, ni daa nɛɛ enuɔ piŋmɔ he. Renee tee helatsamɔhei srɔtoi, ni he fɛɛ he ni ebaaya lɛ, eyeɔ mɛi ni tsuɔ nii yɛ jɛmɛ lɛ, helatsɛmɛi lɛ, kɛ mɛi ni basaraa helatsɛmɛi lɛ odase. Be ko be ni ayatsĩ enaa otsii enyɔ kɛ fã yɛ helatsamɔhe ko lɛ, ekɛ ŋmɛlɛtswai 80 shiɛ. Renee na faŋŋ akɛ ebaagbo, shi ehãaa ehiɛ akpa nɔ akɛ, Yehowa pɛ ji mɔ ni sa akɛ eyeɔ jeŋ muu lɛ fɛɛ nɔ. Enɛ ye ebua lɛ koni ekahao fe nine yɛ enaagbai lɛ ahe.

18. Mɛɛ gbɛ nɔ nyɛmi yoo ko niiashikpamɔ hãa wɔnaa nɔ hewɔ ni sɛɛnamɔ yɔɔ he akɛ wɔbaafi Yehowa nɔyeli lɛ sɛɛ?

¹⁸ Wɔbaanyɛ wɔfi Yehowa nɔyeli lɛ sɛɛ kɛ́ wɔkɛ daa gbi shihilɛ mli naagbai hu miikpe. Nakai nyɛmi yoo ko ni atsɛɔ lɛ Jennifer lɛ fee. Be ko lɛ, eye gbii etɛ yɛ kɔɔyɔŋ lɛji adaamɔhe ko, ejaakɛ enáaa kɔɔyɔŋ lɛlɛ ni kɛ lɛ baaku sɛɛ kɛya emaŋ. Eko fɛɛ eko ni ebaaná lɛ, naagba ko baa, kɛkɛ lɛ enáaa efã dɔŋŋ. Enɛ hã etɔ Jennifer ni ehe fee shoo. Shi yɛ nɔ najiaŋ ni ebaahã enii afee ehe mɔbɔ lɛ, esɔle ni Yehowa aye abua lɛ koni enyɛ eshiɛ ehã mɛi krokomɛi ni miimɛ yɛ kɔɔyɔŋ lɛji adaamɔhe lɛ. Ani ole nɔ ni ba? Eye mɛi pii odase, ni ehã woji babaoo. Ewie akɛ, “Minu he akɛ Yehowa ejɔɔ mi yɛ naagba ni mikɛkpe lɛ fɛɛ sɛɛ, ni ehã mi nyɛmɔ koni mahi shi yɛ egbɛ́i ni kã minɔ lɛ naa.” Ekɛ ejwɛŋmɔ ma Yehowa yiŋtoo lɛ nɔ.

19. Mɛni ji nɔ kome ni hãa ayɔseɔ anɔkwa jamɔ lɛ mli bii?

¹⁹ Nyɔŋmɔ webii lɛ pɛ le bɔ ni enɔyeli lɛ he hiaa waa hã. Enɛ ji nɔ kome ni hãa esoroɔ anɔkwa jamɔ lɛ mli bii lɛ yɛ jamɔi krokomɛi ni eshwɛ lɛ amli bii lɛ ahe. Esa akɛ wɔteŋ mɔ fɛɛ mɔ atswa efai shi akɛ ebaaya nɔ efi Yehowa nɔyeli lɛ sɛɛ.

20. Te Yehowa nuɔ he ehãa tɛŋŋ yɛ nibii fɛɛ ni ofeɔ kɛfiɔ enɔyeli lɛ sɛɛ lɛ ahe?

²⁰ Ná nɔmimaa akɛ, Yehowa hiɛ sɔɔ bɔ ni oyeɔ lɛ anɔkwa kɛ bɔ ni ofiɔ shi yɛ kai amli kɛfiɔ enɔyeli lɛ sɛɛ lɛ. (Lala 18:26) Nikasemɔ ni nyiɛ sɛɛ lɛ baahã wɔna yiŋtoi krokomɛi ahewɔ ni esa akɛ wɔfi Yehowa nɔyeli lɛ sɛɛ, kɛ nibii ni wɔbaanyɛ wɔfee kɛtsɔɔ nakai.