Ani okane Buu-Mɔɔ srɔtoi ni ba nyɛsɛɛ nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Mɛɛ nibii ejwɛ wɔbaanyɛ wɔfee koni wɔnyɛ wɔlá jogbaŋŋ?

Esa akɛ wɔdamɔ shi jaŋŋ ni wɔwó wɔlala wolo lɛ nɔ kɛya ŋwɛi. Agbɛnɛ hu, esa akɛ wɔmu jogbaŋŋ, wɔgbɛ wɔdaaŋ waa, ni wɔkɛ gbee ni wa alá.​—w17.11, bf. 5.

Mɛni sa kadimɔ yɛ maji ni ahala akɛ abobaa maji yɛ blema Israel lɛ kɛ gbɛjegbɛi ni yaa jɛmɛ lɛ ahe?

Hei ni maji ekpaa nɛɛ yɔɔ lɛ ahewɔ lɛ, ewaaa tsɔ akɛ mɔ ko baasha foi kɛya eko mli oya nɔŋŋ. Agbɛnɛ hu, asaa gbɛjegbɛi ni yaa jɛmɛ lɛ anɔ jogbaŋŋ.​—w17.11, bf. 14.

Mɛni hewɔ kpɔmɔnɔ lɛ ni Nyɔŋmɔ tsɔ Yesu nɔ ekɛhã lɛ ji nikeenii ni fe fɛɛ?

Wɔmiisumɔ ni wɔhi shi kɛya naanɔ ni wɔye wɔhe kɛje esha kɛ gbele he. Nikeenii nɛɛ baahã nibii ni wɔshweɔ nɛɛ aba mli. Akɛni Nyɔŋmɔ sumɔɔ Adam seshibii lɛ hewɔ lɛ, be ni wɔkã he wɔji eshafeelɔi lɛ, ehã Yesu bagbo ehã wɔ.​—wp17.6, bf. 6-7.

Mɛɛ gbɛ nɔ agba yɛ Lala 118:22 lɛ akɛ Yesu baate shi?

Yudafoi lɛ ahiɛnyiɛlɔi lɛ kpoo Yesu, ni ji Mesia lɛ ni amɛhã agbe lɛ. Dani Yesu baanyɛ abatsɔ “koŋtɛ titri lɛ,” esa akɛ atee lɛ shi.​—w17.12, bf. 9-10.

Ani akpa gbɛ akɛ mɛi ni yɔɔ Mesia lɛ wekutɔkpaa lɛ mli lɛ afee mɛi ni hiɛ kromɔbi hegbɛi sɔŋŋ?

Mɛi ni yɔɔ Yesu wekutɔkpaa lɛ mli lɛ ateŋ mɛi komɛi ji kromɔbii, shi jeee amɛ fɛɛ. David fata mɛi ni Mesia lɛ tsɔ amɛnɔ kɛba lɛ ahe, ni kɛ̃lɛ, jeee lɛ ji epapa Yishai kromɔbi.​—w17.12, bf. 14-15.

Mɛɛ helatsamɔ he saji yɔɔ Biblia lɛ mli?

Mose Mla lɛ tsɔɔ akɛ esaaa akɛ mɛi ni miiye helai komɛi lɛ futuɔ mɛi. Mla lɛ bi ni kɛ́ mɔ ko ta gbonyo he lɛ eju ehe. Agbɛnɛ hu, ewie akɛ atsa shi ni afu wamɔ. Nyɔŋmɔ Mla lɛ kɛɛ kɛ́ afɔ binuu lɛ, afo lɛ ketia yɛ gbi ni ji kpaanyɔ lɛ nɔ. Enɛ sa jogbaŋŋ, ejaakɛ kɛ́ afɔ gbekɛ lɛ, otsi sɛɛ dani elá nyɛɔ ewɔɔ.​—wp18.1, bf. 7.

Mɛni hewɔ tɔmɔ bɛ he akɛ Kristofonyo baasumɔ ehe lɛ?

Esa akɛ wɔsumɔ wɔnyɛmi gbɔmɔ tamɔ wɔ diɛŋtsɛ wɔhe. (Mar. 12:31) Esa akɛ “wumɛi asumɔ amɛŋamɛi tamɔ amɛ diɛŋtsɛ amɛgbɔmɔtsei.” (Efe. 5:28) Shi eji tɔmɔ akɛ wɔbaasumɔ wɔhe fe nine.​—w18.01, bf. 23.

Mɛɛ nibii kɛ́ wɔfee lɛ, wɔbaaya wɔhiɛ yɛ mumɔŋ?

Esa akɛ wɔkase Nyɔŋmɔ Wiemɔ lɛ ni wɔjwɛŋ nɔ ni wɔkɛtsu nii. Agbɛnɛ hu, esa akɛ wɔfee nibii ni baahã mumɔ krɔŋkrɔŋ lɛ akudɔ wɔjwɛŋmɔ kɛ wɔtsui, ni wɔkpɛlɛ yelikɛbuamɔ ni mɛi krokomɛi kɛhãa wɔ lɛ anɔ ni wɔda amɛ shi.​—w18.02, bf. 26.

Mɛni hewɔ ŋulamiiaŋkwɛmɔ kɛ klamɔ nyɛŋ aye abua wɔ ni wɔle nɔ ni baaba wɔsɛɛ?

Nibii pii yɛ ni tsɔɔ nakai, shi amɛmli otu ji akɛ Biblia lɛ wieɔ eshiɔ nifeemɔi nɛɛ.​—wp18.2, bf. 4-5.

Kɛ́ mɔ ko fɔ̃ wɔ nine kɛhã niyeli ni wɔkpɛlɛ nɔ lɛ, te esa akɛ wɔfee wɔnii yɛ he wɔhã tɛŋŋ?

Kɛ́ wɔkpɛlɛ ninefɔɔ lɛ nɔ lɛ, esaaa akɛ wɔtsakeɔ wɔnaabu, ja ekolɛ nɔ ko kwraa bɛ ni wɔbaanyɛ wɔfee yɛ he. (Lala 15:4) Ekolɛ mɔ ni baafee wɔ gbɔ lɛ egbo deŋme kɛsara wɔsɛɛ.​—w18.03, bf. 18.

Mɛni asafoŋ onukpai kɛ asafoŋ sɔɔlɔi baanyɛ akase kɛjɛ Timoteo dɛŋ?

Timoteo fo mɛi krokomɛi anɔ mli, ni ehã shiɛmɔ nitsumɔ lɛ he hia lɛ waa. Agbɛnɛ hu, efeee anihao yɛ Yehowa sɔɔmɔ lɛ mli, ni ekɛ nibii ni ekase lɛ tsu nii. Etee nɔ etsɔse ehe, ni ehã Yehowa mumɔ lɛ ye ebua lɛ. Asafoŋ onukpai kɛ nyɛmimɛi krokomɛi baanyɛ akase lɛ.​—w18.04, bf. 13-14.