1, 2. (a) Mɛɛ saji fɔlɔi komɛi ni ji Kristofoi lɛ biɔ amɛhe kɛji amɛbi ko kɛɛ eesumɔ ni abaptisi lɛ? (b) Mɛni hewɔ abiɔ mɛi ni miitao ni abaptisi amɛ lɛ kɛji amɛjɔɔ amɛhe nɔ amɛhã Yehowa lo? (Kwɛmɔ mfoniri ni yɔɔ nikasemɔ lɛ shishijee lɛ.)

FEEMƆ shihilɛ nɛɛ he mfoniri okwɛ. Ayaabaptisi oblayoo fioo ko ni atsɛɔ lɛ Maria lɛ. Ekɛ mɛi krokomɛi ni ayaabaptisi amɛ nakai gbi lɛ te shi amɛdamɔ shi. Wielɔ lɛ bi amɛ saji enyɔ, ni Maria kɛ gbee ni mli tse ni naa wa hã hetoo. No sɛɛ etsɛɛɛ lɛ, abaptisi lɛ. Maria fɔlɔi ji Yehowa Odasefoi, ni amɛye nifeemɔ nɛɛ he odase.

² Maria fɔlɔi ná he miishɛɛ waa akɛ amɛbiyoo lɛ ejɔɔ ehe nɔ kwraa ehã Yehowa ni ehã abaptisi lɛ. Shi be ni Maria mami na klɛŋklɛŋ kwraa akɛ ebi lɛ miisumɔ ni abaptisi lɛ lɛ, eye etsui fioo. Ebi ehe akɛ: ‘Maria ji gbekɛ lolo, no hewɔ lɛ, ani abaanyɛ abaptisi lɛ? Ani enuɔ shishi akɛ gbɛ ni etaoɔ ekɔ lɛ yɛ hiɛdɔɔ? Ani esa akɛ emɛ ni eda fioo efata he dani abaptisi lɛ?’ Fɔlɔi pii ni yɔɔ suɔmɔ lɛ biɔ amɛhe saji ni tamɔ enɛɛmɛi kɛji amɛbi ko kɛɛ amɛ akɛ eesumɔ ni abaptisi lɛ. (Jaj. 5:5) Ni enɛ bɛ naakpɛɛ,  ejaakɛ henɔjɔɔmɔ kɛ baptisimɔ ji yiŋ ni he hiaa fe fɛɛ ni Kristofoi kpɛɔ yɛ amɛshihilɛ mli.​—Kwɛmɔ akrabatsa ni yitso ji, “ Ani Ojɔɔ Ohe Nɔ Ohã Yehowa?”

3, 4. (a) Mɛni he bɔfo Petro kɛ baptisimɔ to koni wɔna akɛ ehe miihia waa? (b) Mɛni hewɔ Petro kɛ baptisimɔ to kpɛ ni Noa kpɛ adeka lɛ he?

³ Bɔfo Petro kɛ baptisimɔ to kpɛ ni Noa kpɛ adeka lɛ he. Ewie akɛ: “Amrɔ nɛɛ, nɔ ni nakai nifeemɔ lɛ feɔ he mfoniri, ni ji baptisimɔ lɛ hu miihere nyɛyiwala.” (Kanemɔ 1 Petro 3:20, 21.) Adeka lɛ ji nɔ ni hã mɛi fɛɛ na akɛ Noa miisumɔ ni ejɛ etsuiŋ fɛɛ efee Nyɔŋmɔ suɔmɔnaa nii. Noa he Yehowa nɔ eye, ni etsu nitsumɔ ni ekɛwo edɛŋ lɛ pɛpɛɛpɛ. No hewɔ lɛ, Noa fee nibii ni hã ana akɛ eyɛ hemɔkɛyeli, ni no hã ahere lɛ kɛ eweku lɛ yiwala be ni Nu Afua lɛ ba lɛ. Mɛni wɔbaanyɛ wɔkase yɛ nɔkwɛmɔnɔ ni Petro kɛtsu nii lɛ mli?

⁴ Adeka lɛ ni Noa kpɛ lɛ hã ana akɛ eheɔ Nyɔŋmɔ nɔ eyeɔ. Nakai nɔŋŋ kɛ́ mɛi na akɛ aabaptisi mɔ ko lɛ, amɛnaa akɛ mɔ lɛ yɛ Kristo, mɔ ni gbo ni atee lɛ shi lɛ mli hemɔkɛyeli, ni no hewɔ lɛ, ejɔɔ ewala nɔ ehã Nyɔŋmɔ. Kristofoi ni ejɔɔ amɛhe nɔ amɛhã Nyɔŋmɔ lɛ boɔ lɛ toi, tamɔ bɔ ni Noa fee lɛ, ni amɛtsuɔ nitsumɔ ni Nyɔŋmɔ kɛwo amɛdɛŋ lɛ. Bɔ ni Nyɔŋmɔ baa Noa yi be ni Nu Afua lɛ ba lɛ, nakai nɔŋŋ ebaabaa mɛi fɛɛ ni abaptisi amɛ ni baaye lɛ anɔkwa lɛ ayi be ni ekpãtãa jeŋ fɔŋ nɛɛ hiɛ lɛ. (Mar. 13:10; Kpo. 7:9, 10) Enɛ hãa wɔnaa faŋŋ akɛ, ehe miihia waa ni wɔjɔɔ wɔhe nɔ wɔhã Yehowa ni wɔhã abaptisi wɔ. Kɛ́ mɔ ko kɛ nibii ni he ehiaaa jiejie enaa koni akabaptisi lɛ lɛ, naanɔ wala baanyɛ aŋmɛɛ lɛ.

5. Mɛni he wɔbaasusu yɛ nikasemɔ nɛɛ mli?

⁵ Amrɔ nɛɛ ni wɔna akɛ baptisimɔ he miihia waa lɛ, esa akɛ wɔná sanebimɔi etɛ ni nyiɛ sɛɛ nɛɛ ahetoo: Mɛni Biblia lɛ kɛɔ  yɛ baptisimɔ he? Mɛni esa akɛ mɔ ko afee dani anyɛ abaptisi lɛ? Mɛni hewɔ kɛ́ wɔmiitsɔɔ wɔbi ko loo wɔ-Biblia mli nikaselɔ ko nii lɛ, esa akɛ wɔhã ehi wɔjwɛŋmɔ mli akɛ baptisimɔ he miihia waa?

6, 7. (a) Mɛni hewɔ mɛi hã Yohane baptisi amɛ? (b) Namɔ hu ba Yohane ŋɔɔ koni abaptisi lɛ? Mɛni hewɔ esoro baptisimɔ nɛɛ yɛ ekrokomɛi fɛɛ ni eshwɛ lɛ ahe?

⁶ Yohane Baptisilɔ lɛ ji klɛŋklɛŋ mɔ ni wɔkaneɔ ehe sane yɛ Biblia lɛ mli akɛ ebaptisi mɛi. (Mat. 3:1-6) Mɛi ni ba Yohane ŋɔɔ koni ebaptisi amɛ lɛ ba eŋɔɔ, ejaakɛ amɛtɔ̃ Mose Mla lɛ nɔ, shi agbɛnɛ lɛ, amɛtsake amɛtsui. Eyɛ mli akɛ Yohane nɔŋŋ ni baptisi Yesu, ni ji Nyɔŋmɔ Bi lɛ moŋ, shi esoro baptisimɔ ni he hiaa fe fɛɛ nɛɛ kwraa yɛ ekrokomɛi lɛ ahe. Yesu yeɔ emuu, ni esha ko kwraa bɛ ehe. No hewɔ lɛ, jeee tsuitsakemɔ hewɔ abaptisi lɛ. (Mat. 3:13-17; 1 Pet. 2:22) Yesu hã abaptisi lɛ koni ekɛtsɔɔ akɛ efee klalo akɛ ebaafee Nyɔŋmɔ suɔmɔnaa nii.​—Heb. 10:7.

⁷ Be ni Yesu bɔi shiɛmɔ lɛ, ekaselɔi lɛ hu baptisi mɛi. (Yoh. 3:22; 4:1, 2) Mɛi ni Yesu kaselɔi lɛ baptisi amɛ lɛ hã abaptisi amɛ ejaakɛ amɛ hu amɛtɔ̃ Mose Mla lɛ nɔ shi amɛtsake amɛtsui, tamɔ bɔ ni eji yɛ mɛi ni ba Yohane ŋɔɔ lɛ agbɛfaŋ lɛ nɔŋŋ. Shi be ni Yesu gbo ni atee lɛ shi lɛ, mɛi fɛɛ ni miisumɔ ni amɛnyiɛ esɛɛ lɛ hãa abaptisiɔ amɛ yɛ yiŋtoo kroko hewɔ.

8. (a) Yɛ Yesu shitee lɛ sɛɛ lɛ, mɛni efã esɛɛnyiɛlɔi lɛ akɛ amɛfee? (b) Mɛni hewɔ esa akɛ Kristofoi ahã abaptisi amɛ?

⁸ Yesu shitee lɛ sɛɛ etsɛɛɛ yɛ afi 33 Ŋ.B. lɛ, ejie ehe kpo etsɔɔ mɛi ni fa fe 500 ni ebabua amɛhe naa. Hii, yei, kɛ ekolɛ gbekɛbii po fata mɛi ni babua amɛhe naa lɛ ahe. Eeenyɛ efee akɛ, henaabuamɔ nɛɛ shishi Yesu kɛɛ esɛɛnyiɛlɔi lɛ akɛ: “Nyɛyaa nyɛyafea mɛi ni jɛ jeŋmaji lɛ fɛɛ amli lɛ kaselɔi, nyɛbaptisia amɛ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli, nyɛtsɔa amɛ ni amɛye nii fɛɛ ni mifã nyɛ lɛ nɔ.” (Mat. 28:19, 20; 1 Kor. 15:6) Yesu fã esɛɛnyiɛlɔi lɛ akɛ amɛfee mɛi ekaselɔi. Ewie hu akɛ, esa akɛ abaptisi mɔ fɛɛ mɔ ni miitao ewo ‘ekɔɔŋtso lɛ’ efɔ̃ enɔ, loo etsɔ ekaselɔ lɛ. (Mat. 11:29, 30) Dani mɔ ko jamɔ baasa Nyɔŋmɔ hiɛ lɛ, esa akɛ mɔ lɛ akpɛlɛ nɔ akɛ Yesu ji mɔ ni Nyɔŋmɔ miitsɔ enɔ ehã eyiŋtoo aba mli. Kɛ́ mɔ lɛ kpɛlɛ enɛ nɔ lɛ, abaanyɛ abaptisi lɛ agbɛnɛ. Nu mli baptisimɔ ni tamɔ nɛkɛ lɛ pɛ ji nɔ ni saa Nyɔŋmɔ hiɛ. Biblia mli saji babaoo hãa wɔnaa akɛ, mɛi ni batsɔmɔ Kristo kaselɔi yɛ blema lɛ le akɛ baptisimɔ he miihia waa. Amɛkɛ nibii ni he ehiaaa ejiejieee amɛnaa koni amɛkɛtsi amɛbaptisimɔ lɛ amɛto.​—Bɔf. 2:41; 9:18; 16:14, 15, 32, 33.

9, 10. Mɛni Etiopianyo lɛ kɛ bɔfo Paulo sane lɛ tsɔɔ wɔ yɛ baptisimɔ he?

⁹ Kanemɔ Bɔfoi 8:35, 36. Be ko lɛ, Etiopianyo ko ni emɔ Yudafoi ajamɔ lɛ mli lɛ etee Yerusalem eyajá Yehowa ni eeku esɛɛ kɛmiiya shĩa. Yehowa bɔfo ko hã Filipo tee Etiopianyo nɛɛ ŋɔɔ ni eyashiɛ “Yesu he sane kpakpa lɛ” etsɔɔ lɛ. Etiopianyo lɛ na faŋŋ akɛ ehe miihia waa ni ekpɛlɛ Yesu nɔ akɛ e-Nuŋtsɔ, ni ená he miishɛɛ waa hu akɛ ebaafee nɔ ni Yehowa biɔ ni Kristofoi afee lɛ. Enɛ hewɔ lɛ, ehã Filipo baptisi lɛ amrɔ nɔŋŋ.

¹⁰ Susumɔ Yudanyo ko ni atsɛɔ lɛ Saul lɛ hu he okwɛ. Ewa blema Kristofoi lɛ ayi waa, ejaakɛ esusu akɛ Yudafoi lɛ ajamɔ lɛ hi fe Kristofoi lɛ anɔ lɛ. Yudafoi lɛ, ni ji maŋ muu lɛ fɛɛ, ejɔɔ amɛhe nɔ amɛhã Nyɔŋmɔ. Shi Nyɔŋmɔ kwa amɛ, ejaakɛ amɛbooo lɛ toi. Fɛɛ sɛɛ lɛ, Saul tee nɔ ehe eye akɛ Yudafoi lɛ ajamɔ lɛ ji anɔkwa jamɔ lɛ, kɛyashi be ko lɛ, Yesu, mɔ ni gbo ni atee lɛ shi lɛ, jɛ ŋwɛi ekɛ lɛ wie tɛ̃ɛ.  Mɛni Saul fee? Ekpɛlɛ ni Kristofonyo ko ni atsɛɔ lɛ Anania lɛ ye ebua lɛ. Biblia lɛ kɛɛ no sɛɛ lɛ, “ete shi ni abaptisi lɛ.” (Bɔf. 9:17, 18; Gal. 1:14) Saul nɛɛ ji mɔ ni sɛɛ mli lɛ, afɔɔ lɛ tsɛmɔ akɛ bɔfo Paulo lɛ. Kadimɔ akɛ, be ni ená ele akɛ Yesu ji mɔ ni Nyɔŋmɔ miitsɔ enɔ ehã eyiŋtoo aba mli lɛ, efiteee be kwraa. Ehã abaptisi lɛ amrɔ nɔŋŋ.​—Kanemɔ Bɔfoi 22:12-16.

11. (a) Ŋmɛnɛ lɛ, mɛni hewɔ Biblia mli nikaselɔi hãa abaptisiɔ amɛ? (b) Kɛ́ wɔna ni aabaptisi mɔ ko lɛ, te wɔnuɔ he wɔhãa tɛŋŋ?

¹¹ Ŋmɛnɛ lɛ, mɛi ni wɔkɛ amɛ kaseɔ Biblia lɛ ateŋ mɛi pii, gbekɛbii kɛ onukpai fɛɛ, feɔ amɛnii tamɔ bɔ ni Etiopianyo lɛ kɛ Paulo fee amɛnii lɛ. Akɛni amɛyɛ hemɔkɛyeli ni amɛhiɛ sɔɔ Biblia mli anɔkwalei ni amɛkase lɛ ahewɔ lɛ, amɛshashaooo shi kwraa akɛ amɛbaajɔɔ amɛwala nɔ amɛhã Yehowa ni amɛhã abaptisi amɛ. Kɛ́ wɔtee kpee ni be shɛ ni abaahã baptisimɔ wiemɔ lɛ, wɔmii shɛɔ wɔhe waa. Kɛ́ Biblia mli nikaselɔ ko mɔ anɔkwale lɛ mli ni ekpɛ eyiŋ akɛ ebaasumɔ ni abaptisi lɛ lɛ, wɔnáa miishɛɛ waa. Fɔlɔi ni ji Kristofoi lɛ hu amii shɛɔ amɛhe waa kɛ́ amɛbii kpɛ amɛyiŋ akɛ amɛbaasumɔ ni abaptisi amɛ. Yɛ afi 2017 sɔɔmɔ afi lɛ mli lɛ, abaptisi mɛi fe 284,000 ni yɔɔ “tsui kpakpa” lɛ kɛtsɔɔ akɛ amɛjɔɔ amɛhe nɔ amɛhã Yehowa. (Bɔf. 13:48) Ekã shi faŋŋ akɛ, kaselɔi hei nɛɛ na akɛ ehe miihia ni abaptisi Kristofoi fɛɛ. Shi mɛni amɛfee koni amɛsa kɛhã baptisimɔ?

12. Mɛni esa akɛ Biblia mli nikaselɔ ko afee dani anyɛ abaptisi lɛ?

¹² Dani abaanyɛ abaptisi mɔ ko ni wɔkɛkaseɔ Biblia lɛ, esa akɛ mɔ lɛ aná Nyɔŋmɔ he nilee krɔŋŋ, ni ele nɔ hewɔ ni Nyɔŋmɔ bɔ shikpɔŋ lɛ kɛ adesai, kɛ gbɛjianɔ ni eto ni ekɛbaahere adesai ayiwala. (1 Tim. 2:3-6) No sɛɛ lɛ, esa akɛ ená hemɔkɛyeli, ejaakɛ no baaye abua lɛ ni ebo Nyɔŋmɔ mlai lɛ atoi ni ekpa nibii ni Nyɔŋmɔ sumɔɔɔ lɛ feemɔ. (Bɔf. 3:19) Enɛ he miihia, ejaakɛ kɛji mɔ ko miiya nɔ eefee esha ni ejɔɔ ehe nɔ ehã Nyɔŋmɔ lɛ, Nyɔŋmɔ ekpɛlɛŋ ehenɔjɔɔmɔ lɛ nɔ. (1 Kor. 6:9, 10) Shi yɛ Yehowa jeŋba he mlai lɛ ni mɔ ko baahi shi yɛ naa lɛ sɛɛ lɛ, nibii krokomɛi yɛ ni esa akɛ mɔ lɛ afee dani abaanyɛ abaptisi lɛ. Esa akɛ mɔ lɛ aya asafoŋ kpeei ni ekɛ ehe awo shiɛmɔ kɛ kaselɔfeemɔ nitsumɔ lɛ mli jogbaŋŋ. Yesu kɛɛ esa akɛ mɔ fɛɛ mɔ ni miitao atsɔ ekaselɔ lɛ atsu nitsumɔ nɛɛ. (Bɔf. 1:8) Ja mɔ ko efee nibii nɛɛ fɛɛ dani ebaanyɛ esɔle kɛjɔɔ ehe nɔ ehã Yehowa, ni no sɛɛ lɛ, ehã abaptisi lɛ koni mɛi fɛɛ ana akɛ ejɔɔ ehe nɔ ehã Yehowa.

13. Kɛ́ wɔkɛ mɛi miikase Biblia lɛ, mɛni hewɔ esa akɛ wɔhã ehi wɔjwɛŋmɔ mli akɛ dani mɔ ko baanyɛ abatsɔ anɔkwa Kristofonyo lɛ, esa akɛ abaptisi lɛ?

¹³ Be ni wɔyeɔ wɔbuaa wɔbii kɛ mɛi krokomɛi ni wɔkɛkaseɔ Biblia lɛ koni amɛfee nibii ni he hiaa ni wɔwie kɛtsɔ hiɛ lɛ, esa akɛ wɔhã ehi wɔjwɛŋmɔ mli akɛ, esa akɛ abaptisi mɔ fɛɛ mɔ ni miitao anyiɛ Yesu sɛɛ lɛ. Kɛ́ wɔhã enɛ hi wɔjwɛŋmɔ mli lɛ, wɔshashaoŋ shi kwraa akɛ wɔkɛ amɛ baasusu nɔ hewɔ ni henɔjɔɔmɔ kɛ baptisimɔ he hiaa lɛ he be fɛɛ be ni wɔbaaná hegbɛ lɛ. Wɔmiisumɔ ni wɔbii kɛ wɔ-Biblia mli nikaselɔi lɛ aya amɛhiɛ ni abaptisi amɛ, aloo jeee nakai?

14. Mɛni hewɔ esaaa akɛ wɔnyɛɔ mɔ ko mɔ ko nɔ akɛ ehã abaptisi lɛ?

¹⁴ Shi no hu etsɔɔɔ akɛ esa akɛ wɔnyɛ wɔbii, wɔ-Biblia mli nikaselɔi, loo mɛi krokomɛi anɔ akɛ amɛhã abaptisi amɛ. Yehowa sumɔɔɔ nakai. (1 Yoh. 4:8) Yɛ nɔ najiaŋ ni wɔbaanyɛ mɛi anɔ akɛ amɛhã abaptisi amɛ lɛ, esa akɛ wɔye wɔbua amɛ ni amɛna akɛ ehe miihia ni wekukpaa kpakpa ahi amɛ kɛ Nyɔŋmɔ teŋ. Kɛ́ mɔ lɛ na bɔ ni anɔkwale  lɛ jara wa hã, ni ená he miishɛɛ akɛ ebaafee nibii fɛɛ ni esa akɛ Kristofoi afee lɛ, ebaasumɔ ni abaptisi lɛ.​—2 Kor. 5:14, 15.

15, 16. (a) Ani ayɛ afii pɔtɛɛ ko ni esa akɛ mɔ ko aye dani abaptisi lɛ? Tsɔɔmɔ mli. (b) Kɛ́ abaptisi Biblia mli nikaselɔ ko yɛ sɔlemɔ kroko mli po lɛ, mɛni hewɔ esa akɛ abaptisi lɛ ekoŋŋ akɛ Yehowa Odasefonyo?

¹⁵ Abɛ afii pɔtɛɛ ko ni esa akɛ mɔ ko aye dani abaptisi lɛ. Gbɔmɛi amli yɛ srɔtoi, ni esoro mɔ fɛɛ mɔ kɛ be abɔ ni ebaahe lɛ dani enu anɔkwale lɛ shishi jogbaŋŋ. Mɛi pii yɛ ni abaptisi amɛ be ni amɛdarako ni amɛtee nɔ amɛye Yehowa anɔkwa. Mɛi komɛi hu yɛ ni abaptisi amɛ be ni amɛgbɔlɔ, ejaakɛ nakai beiaŋ akɛ amɛ kase Biblia lɛ. Mɛi komɛi po yɛ ni abaptisi amɛ be ni amɛye fe afii 100!

¹⁶ Be ko lɛ, yoo ko ni eshwɛ fioo ni ebaaye afii 80 lɛ bi mɔ ni kɛ lɛ kaseɔ nii lɛ kɛji ehe miihia ni abaptisi lɛ ekoŋŋ. Yoo nɛɛ nu he akɛ akɛni abaptisi lɛ yɛ sɔlemɔi srɔtoi amli be ko ni eho lɛ hewɔ lɛ, ehe ehiaaa ni abaptisiɔ lɛ ekoŋŋ. Shi mɔ ni kɛ lɛ kaseɔ nii lɛ jɛ Ŋmalɛ lɛ mli eye ebua lɛ ni ena akɛ, esa akɛ abaptisi lɛ. No sɛɛ etsɛɛɛ lɛ, yoo onukpa nɛɛ hã abaptisi lɛ. Eyɛ mli akɛ eda moŋ, shi enuuu he akɛ ehe ehiaaa ni abaptisiɔ lɛ. Mɛni wɔkaseɔ yɛ niiashikpamɔ nɛɛ mli? Ja wɔyɛ Yehowa he anɔkwa nilee dani kɛ́ abaptisi wɔ lɛ, ebaakpɛlɛ nɔ. No hewɔ lɛ, kɛ́ abaptisi mɔ ko yɛ sɔlemɔ ko mli, ni no sɛɛ dani akɛ lɛ bɔi Biblia lɛ kasemɔ lɛ, esa akɛ abaptisi lɛ ekoŋŋ akɛ Yehowa Odasefonyo.​—Kanemɔ Bɔfoi 19:3-5.

17. Mɛni nɔ esa akɛ mɔ ko ajwɛŋ yɛ ebaptisimɔ gbi lɛ nɔ?

¹⁷ Gbi ni abaabaptisi mɔ ko lɛ ji miishɛɛ gbi. Shi yɛ nakai beiaŋ nɔŋŋ lɛ, eji gbi ni esa akɛ ejwɛŋ nɔ ni ehenɔjɔɔmɔ kɛ ebaptisimɔ lɛ biɔ ni efee lɛ nɔ jogbaŋŋ. Ebiɔ ni mɔ abɔ ehe mɔdɛŋ waa dani ebaanyɛ efee nibii fɛɛ ni ehenɔjɔɔmɔ kɛ ebaptisimɔ lɛ biɔ ni efee lɛ. No hewɔ ni Yesu kɛto kɔɔŋtso teremɔ he lɛ. Kɛ́ mɔ ko batsɔ Yesu kaselɔ lɛ, esaaa akɛ ‘ehiɛ kãa ehãa lɛ diɛŋtsɛ ehe dɔŋŋ, shi moŋ lɛ, esa akɛ ehiɛ akã ahã mɔ ni gbo kɛhã lɛ ni atee lɛ shi lɛ.’​—2 Kor. 5:15; Mat. 16:24.

18. Mɛɛ sanebimɔi ahe wɔbaasusu yɛ nikasemɔ ni nyiɛ sɛɛ lɛ mli?

¹⁸ Nikasemɔ nɛɛ ehã wɔna akɛ, yiŋ ni akpɛɔ akɛ abaanyiɛ Yesu sɛɛ lɛ, ji yiŋkpɛɛ ni yɔɔ hiɛdɔɔ. Enɛ hewɔ Maria mami bibii ehe saji ni wɔwie he yɛ nikasemɔ nɛɛ shishijee lɛ. Kɛ́ fɔlɔ ji bo lɛ, ekolɛ obi ohe saji nɛɛ, akɛ: ‘Ani mibi lɛ eshɛ mɔ ni abaptisiɔ lɛ? Ani enu nibii ashishi jogbaŋŋ bɔ ni ebaanyɛ ejɔɔ ehe nɔ ehã Yehowa? Ani esa akɛ emɛ ni egbe skul naa ni ebɔi nitsumɔ dani ehã abaptisi lɛ? Ni kɛ́ abaptisi mibi lɛ ni eyafee esha ko ni yɔɔ hiɛdɔɔ hu?’ Wɔbaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli, ni wɔbaana nɔ ni esa akɛ fɔlɔi afee koni amɛná jwɛŋmɔ ni ja yɛ baptisimɔ he.