Amɛhã Amɛshihilɛ Fee Mlɛo Ni Amɛná Miishɛɛ Waa
DANIEL KƐ MIRIAM bote gbalashihilɛ mli yɛ September 2000 ni amɛyahi Barcelona maŋ lɛ mli yɛ Spain. Daniel wie akɛ: “Nitsumɔi ni wɔtsuɔ lɛ hewɔ lɛ, wɔnyɛɔ wɔjeɔ kpo wɔyayeɔ nii yɛ niyelihei fɛfɛji, wɔfãa gbɛ kɛyaa maŋsɛɛ, ni wɔwoɔ atadei kpakpai. Agbɛnɛ hu, wɔfɔɔ shiɛmɔ yaa.” No ji, amɛhi shi jogbaŋŋ diɛŋtsɛ. Shi nɔ ko ba ni tsake amɛshihilɛ.
Wiemɔ ko ni ahã yɛ kpee wulu ko ni afee yɛ afi 2006 lɛ, ta Daniel tsuiŋ waa. Yɛ wiemɔ lɛ mli lɛ, abi akɛ: “Ani wɔmiibɔ mɔdɛŋ fɛɛ ni wɔɔnyɛ koni wɔye wɔbua ‘mɛi ni didãa yɛ gbee gbɛ lɛ nɔ lɛ’ ni amɛbanyiɛ gbɛ ni kɛ mɔ yaa naanɔ wala mli lɛ nɔ?” (Abɛi 24:11) Yɛ wiemɔ lɛ mli lɛ, ahã efee faŋŋ akɛ, sɔ̃ kã wɔnɔ akɛ wɔhã mɛi ale Biblia lɛ mli sane lɛ, ejaakɛ ebaanyɛ ehã amɛná wala. (Bɔf. 20:26, 27) Daniel wie akɛ: “Minu he akɛ mi Yehowa kɛwieɔ lɛ.” Yɛ wiemɔ lɛ mli lɛ, awie hu akɛ kɛ́ wɔtsu babaoo yɛ Yehowa sɔɔmɔ lɛ mli lɛ, wɔmii baashɛ wɔhe waa. Daniel ejeee enɛ he ŋwane kwraa, ejaakɛ no mli lɛ, Miriam ebɔi gbɛgbamɔ nitsumɔ lɛ ni ená miishɛɛ waa.
Daniel wie akɛ: “Mikpɛ miyiŋ akɛ, be eshɛ ni esa akɛ matsake mishihilɛ kwraa.” Ni nakai pɛpɛɛpɛ efee. Etse be ni ekɛtsuɔ nii lɛ nɔ, ebɔi gbɛgbamɔ nitsumɔ lɛ, ni esusu bɔ ni ekɛ Miriam fɛɛ baaná miishɛɛ kɛ́ amɛyasɔmɔ yɛ he ko ni Maŋtsɛyeli sane kpakpa shiɛlɔi ahe miihia waa yɛ lɛ he.
KLƐŊKLƐŊ LƐ WƆKƐ NAAGBAI KPE—KƐKƐ NI WƆNU SANE KPAKPA KO
Yɛ May 2007 lɛ, Daniel kɛ Miriam kpa amɛnitsumɔi lɛ ni amɛfã kɛtee Panama. Daniel kɛ Miriam etee Panama pɛŋ. Ahã amɛ Bocas del Toro Ŋshɔkpɔi lɛ ni yɔɔ Caribbean Ŋshɔ lɛ mli lɛ ekomɛi akɛ amɛtsu mli nii. Mɛi titri ni yɔɔ ŋshɔkpɔi nɛɛ anɔ ji Ngabebii. Daniel kɛ Miriam bu akɔntaa ni amɛna akɛ, amɛbaanyɛ amɛkɛ shika ni amɛkɛto lɛ akwɛ amɛhe aaafee nyɔji kpaanyɔ.
Kɛ́ amɛjɛ ŋshɔkpɔ kome nɔ amɛmiiya ekroko nɔ lɛ, amɛtaa lɛlɛ mli, ni kɛ́ amɛyashɛ lɛ, amɛkɛ baisiko tsaa gbɛfãa lɛ nɔ. Amɛhiɛ kpaŋ be klɛŋklɛŋ ni amɛta baisiko kɛfo gbɛ kilomitai 32 kɛtsɔ gɔji anɔ yɛ hulu ni tsoɔ gbaŋgbaŋ lɛ nɔ lɛ nɔ kɔkɔɔkɔ. Etɔ Daniel aahu akɛ, shwɛ sharao ni nɔ anyɔ enɔ. Shi Ngabe wekui ni amɛkɛkpe yɛ gbɛ lɛ nɔ lɛ here amɛ hiɛmɛɛ, titri lɛ, be ni amɛkase wiemɔi kukuji komɛi yɛ Ngabebii awiemɔ lɛ mli lɛ. Eyeee be ko ni amɛná Biblia mli nikaselɔi 23 sɔŋŋ.
Be ni amɛshika lɛ fɛɛ tã lɛ, mɛni ba? Daniel wie akɛ: “Wɔhiŋmɛiiaŋ tɛo nu be ni wɔna akɛ ehe baahia ni wɔku wɔsɛɛ kɛya Spain lɛ. Edɔ wɔ waa akɛ wɔbaashi wɔ-Biblia mli nikaselɔi lɛ.” Shi nyɔɔŋ kome sɛɛ lɛ, amɛnu sane kpakpa ko. Miriam wie akɛ: “Ahã wɔle akɛ, abaasumɔ ni wɔsɔmɔ yɛ jɛmɛ akɛ gbɛgbalɔi krɛdɛi. Wɔmii shɛ wɔhe waa akɛ wɔbaaya nɔ wɔhi Panama!”
NƆ NI HÃ AMƐMII SHƐ AMƐHE FE FƐƐ
Yɛ afi 2015 lɛ, ahã Daniel kɛ Miriam bɔi sɔɔmɔ akɛ daa gbɛgbalɔi yɛ tsakemɔi komɛi ni afee yɛ asafo lɛ gbɛjianɔtoo mli lɛ hewɔ. Agbɛnɛ lɛ, mɛni amɛbaafee? Amɛkɛ amɛhiɛ fɔ̃ shiwoo ni yɔɔ Lala 37:5 lɛ nɔ. Jɛmɛ kɛɔ akɛ: “Gbɛ ní onyiɛ nɔ lɛ, ŋɔɔfɔ̃ Yehowa nɔ, ní oŋɔ ohiɛ hu ofɔ̃ enɔ, ni eeefee.” Amɛtao nitsumɔ ko ni amɛkɛbaakwɛ amɛhe be ni amɛtsuɔ gbɛgbamɔ nitsumɔ lɛ, ni ŋmɛnɛ lɛ, amɛmiisɔmɔ yɛ asafo ko ni yɔɔ Veraguas kpokpaa lɛ nɔ yɛ Panama.
Daniel wie akɛ: “Dani wɔbaashi Spain lɛ, wɔnu he akɛ kɛ́ wɔhã wɔshihilɛ fee mlɛo lɛ, ekolɛ wɔhe baafi wɔ. Ŋmɛnɛ lɛ, wɔhã wɔshihilɛ efee mlɛo, shi nɔ ko nɔ ko bɛ ni he hiaa wɔ lɛɛlɛŋ ni wɔnáaa.” Mɛni hãa amɛnáa miishɛɛ fe fɛɛ? Amɛkɛɛ: “Nɔ ko bɛ ni hãa wɔnáa miishɛɛ fe ni wɔbaaye wɔbua mɛi ni baa amɛhe shi lɛ koni amɛbale Yehowa!”
