JEŊ fɔŋ mli wɔyɔɔ lɛ, ni no hewɔ lɛ, etɔɔ wɔ waa dani wɔtoiŋ jɔɔ wɔ. Shi bei pii lɛ, toiŋjɔlɛ fioo ni wɔnáa lɛ po sɛɛ etsɛɛɛ. Mɛni Biblia lɛ etsɔɔ akɛ no baanyɛ aye abua wɔ ni wɔtoiŋ ajɔ wɔ waa, ni agbɛnɛ hu, nakai toiŋjɔlɛ lɛ sɛɛ akafo? Ni mɛɛ gbɛ nɔ wɔbaanyɛ wɔye wɔbua mɛi krokomɛi koni amɛ hu amɛtoiŋ ajɔ amɛ?

Kɛ́ akɛɛ mɔ ko toiŋ ejɔ lɛ waa lɛ, mɛni etsɔɔ? Etsɔɔ akɛ mɔ lɛ yeee etsui yɛ nɔ ko nɔ ko he, ni enuɔ he akɛ eyɛ shweshweeshwe. Agbɛnɛ hu, etsɔɔ akɛ mɔ lɛ yɛ nanemɛi ni sumɔɔ esane waa. Nɔ ni fe fɛɛ lɛ, etsɔɔ akɛ wekukpaa kpakpa yɛ mɔ lɛ kɛ Nyɔŋmɔ teŋ. No hewɔ lɛ, te wɔbaafee tɛŋŋ wɔná toiŋjɔlɛ nɛɛ eko?

Kɛ́ wɔye Yehowa mlai ni ja lɛ anɔ, ni wɔkɛ eshishitoo mlai lɛ tsu nii lɛ, no tsɔɔ akɛ wɔkɛ wɔhiɛ fɔ̃ɔ enɔ ni wɔmiisumɔ ni wekukpaa kpakpa ahi wɔ kɛ lɛ teŋ. (Yer. 17:7, 8; Yak. 2:22, 23) Kɛ́ wɔfee nakai lɛ, lɛ hu ebaabɛŋkɛ wɔ, ebaajɔɔ wɔ, ni ebaahã wɔtoiŋ ajɔ wɔ ni wɔtsui anyɔ wɔmli. Yesaia 32:17 lɛ kɛɔ akɛ: “Nɔ ni baajɛ anɔkwa jalɛ nifeemɔ mli aba ji toiŋjɔlɛ, ni yibii ni anɔkwa jalɛ nifeemɔ baawo ji, ebaahã mɛi atsui anyɔ amɛmli ni amɛhi shi shweshweeshwe daa.” Kɛ́ wɔjɛ wɔtsuiŋ tɔ̃ɔ wɔbo Yehowa toi lɛ, wɔtoiŋ baajɔ wɔ lɛɛlɛŋ.​—Yes. 48:18, 19.

Yehowa, wɔ-Tsɛ ni yɔɔ ŋwɛi lɛ eke wɔ nɔ ko ni nɔ bɛ ni baanyɛ aye abua wɔ ni wɔtoiŋ ajɔ wɔ daa, no ji emumɔ krɔŋkrɔŋ lɛ.​—Bɔf. 9:31.

Be ni bɔfo Paulo tsɔɔ sui ni feɔ mumɔ lɛ yibii lɛ, toiŋjɔlɛ ji su ni ji etɛ ni etsĩ tã. (Gal. 5:22, 23) Akɛni Nyɔŋmɔ mumɔ lɛ ni hãa mɔ toiŋ jɔɔ lɛ hewɔ lɛ, esa akɛ wɔŋmɛ gbɛ ni mumɔ krɔŋkrɔŋ lɛ akudɔ wɔ koni wɔná toiŋjɔlɛ diɛŋtsɛ. Nyɛhãa wɔkwɛa gbɛi enyɔ ni Nyɔŋmɔ mumɔ lɛ tsɔɔ nɔ eyeɔ ebuaa wɔ koni wɔná toiŋjɔlɛ.

Klɛŋklɛŋ lɛ, kɛ́ wɔkane Nyɔŋmɔ Wiemɔ ni ajɛ emumɔ lɛ mli aŋma lɛ daa lɛ, no baaye abua wɔ  koni wɔná toiŋjɔlɛ. (Lala 1:2, 3) Kɛ́ wɔjwɛŋ nibii ni wɔkaneɔ yɛ Biblia lɛ mli lɛ anɔ lɛ, Nyɔŋmɔ mumɔ lɛ baaye abua wɔ ni wɔna Yehowa susumɔ yɛ saji pii ahe. Akɛ nɔkwɛmɔnɔ lɛ, wɔbaana nɔ hewɔ ni Yehowa hãaa nɔ ko nɔ ko afite etoiŋjɔlɛ lɛ, kɛ nɔ hewɔ ni esumɔɔ toiŋjɔlɛ waa nakai lɛ. Kɛ́ wɔkɛ nibii ni wɔkaseɔ yɛ Nyɔŋmɔ Wiemɔ lɛ mli lɛ tsu nii lɛ, wɔtoiŋ baajɔ wɔ waa yɛ shihilɛ mli.​—Abɛi 3:1, 2.

Nɔ ni ji enyɔ lɛ, esa akɛ wɔsɔle wɔbi Nyɔŋmɔ koni ehã wɔ mumɔ krɔŋkrɔŋ lɛ. (Luka 11:13) Nyɔŋmɔ ewo shi akɛ, kɛ́ wɔsɔle wɔbi lɛ ni eye ebua wɔ lɛ, ‘Nyɔŋmɔ toiŋjɔlɛ ni fe niiashishinumɔi fɛɛ lɛ baatsɔ Kristo Yesu nɔ abu wɔtsuii kɛ wɔjwɛŋmɔi ahe.’ (Fip. 4:6, 7) Kɛ́ wɔsɔle daa ni wɔbi Yehowa ni ehã wɔ mumɔ krɔŋkrɔŋ lɛ, wɔ-Nyɔŋmɔ lɛ baahã wɔtoiŋ ajɔ wɔ waa diɛŋtsɛ, ejaakɛ ehãa mɛi fɛɛ ni ebuɔ amɛ akɛ enanemɛi lɛ toiŋjɔlɛ.​—Rom. 15:13.

Mɛi komɛi yɛ ni bɔ ni amɛba amɛjeŋ amɛhã lɛ hewɔ lɛ, be ko ni eho lɛ amɛbɛ toiŋjɔlɛ. Shi amrɔ nɛɛ, amɛbatsɔmɔ Yehowa nanemɛi, ni enɛ hewɔ lɛ, amɛyeee amɛtsui fe nine, ni toiŋjɔlɛ yɛ amɛ kɛ mɛi krokomɛi ateŋ. Mɛɛ gbɛ nɔ ŋaawoi ni yɔɔ Biblia lɛ mli lɛ ye ebua amɛ ni amɛtsake amɛjeŋba?

Mɛi komɛi ni be ko ni eho lɛ ‘amɛmli fuɔ mramra lɛ’ etsake amɛsubaŋ ni amɛba Kristofoi asafo lɛ mli. Amrɔ nɛɛ, amɛsusuɔ mɛi krokomɛi ahe, amɛmli hi, amɛtoɔ amɛtsui shi, ni amɛkɛ mɛi krokomɛi hiɔ shi yɛ toiŋjɔlɛ mli. * (Abɛi 29:22) Naa amɛteŋ mɛi enyɔ aniiashikpamɔ.

Be ko ni eho lɛ, nuu ko ni atsɛɔ lɛ David lɛ mli fuɔ mramra, ni enɛ sa bɔ ni ekɛ mɛi wieɔ ehãa lɛ he. Ewie mɛi ahe nyanyaanya, ni ekɛ efɔlɔi kɛ enyɛmimɛi lɛ wie basabasa. Shi sɛɛ mli lɛ, David tsake ejeŋba, ejɔɔ ehe nɔ ehã Yehowa, ni emia ehiɛ waa akɛ ekɛ mɛi baahi shi yɛ toiŋjɔlɛ mli. Mɛni ye ebua lɛ ni enyɛ efee nakai? Ewie akɛ, “Mikɛ shishitoo mlai ni yɔɔ Biblia lɛ mli lɛ bɔi nitsumɔ, ni enɛ hã mijie bulɛ kpo mitsɔɔ mifɔlɔi kɛ minyɛmimɛi lɛ, ni amɛ hu amɛjie bulɛ kpo amɛtsɔɔ mi.”

He ni Rachel da yɛ lɛ ná bɔ ni efeɔ enii ehãa lɛ nɔ hewalɛ. Ewie akɛ, “Kɛbashi ŋmɛnɛ lɛ, mimiaa mihiɛ waa koni maye mihe nɔ ni mimli akafu  mramra, ejaakɛ shĩa ni mida yɛ mli lɛ, mɔ fɛɛ mɔ mli fuɔ mramra.” Mɛni ye ebua Rachel koni etiu toiŋjɔlɛ sɛɛ? Ewie akɛ, “Misɔle mikpa Yehowa fai daa koni eye ebua mi.”

Jeee David kɛ Rachel pɛ ena bɔ ni gbɛtsɔɔmɔi ni yɔɔ Biblia lɛ mli lɛ kɛ Nyɔŋmɔ mumɔ krɔŋkrɔŋ lɛ baanyɛ aye abua mɛi ni amɛná toiŋjɔlɛ diɛŋtsɛ. Mɛi babaoo yɛ ni ená niiashikpamɔi ni tamɔ amɛnɔ lɛ. Enɛ hãa wɔnaa faŋŋ akɛ, eyɛ mli akɛ wɔyɛ jeŋ fɔŋ mli moŋ, shi wɔbaanyɛ wɔná toiŋjɔlɛ ni wɔtsui anyɔ wɔmli, ni kɛ́ wɔtoiŋ jɔ wɔ lɛ, no dani wɔbaanyɛ wɔkɛ wɔweku lɛ kɛ wɔsafo lɛ mli bii lɛ ahi shi yɛ toiŋjɔlɛ mli. Shi jeee amɛ pɛ esa akɛ wɔkɛ amɛ ahi shi yɛ toiŋjɔlɛ mli. Yehowa kɛɛ wɔhã toiŋjɔlɛ ahi wɔ kɛ “mɛi fɛɛ” ateŋ. (Rom. 12:18) Ani wɔbaanyɛ wɔfee nakai lɛɛlɛŋ? Ni kɛ́ wɔfee nakai lɛ mɛɛ sɛɛ wɔbaaná?

Kɛ́ wɔtee shiɛmɔ lɛ, wɔgbaa mɛi Nyɔŋmɔ Maŋtsɛyeli lɛ he sane kpakpa lɛ, ni sane kpakpa nɛɛ hãa mɔ toiŋ jɔɔ lɛ ni emii shɛɔ ehe. (Yes. 9:6, 7; Mat. 24:14) Miishɛɛ sane ji akɛ, mɛi pii ebo sane kpakpa nɛɛ toi, ni enɛ hewɔ lɛ, amɛyeee amɛtsui tuutuu yɛ nibii gbohii ni yaa nɔ yɛ je lɛ mli ŋmɛnɛ lɛ ahe dɔŋŋ. Mɛni hewɔ? Ejaakɛ amrɔ nɛɛ amɛná hiɛnɔkamɔ kpakpa kɛhã wɔsɛɛ, ni no tsirɛɔ amɛ koni ‘amɛtao toiŋjɔlɛ ni amɛtiu sɛɛ.’​—Lala 34:14.

Shi jeee mɛi fɛɛ boɔ wɔsane lɛ toi klɛŋklɛŋ be ni wɔbaaya amɛŋɔɔ. (Yoh. 3:19) Fɛɛ sɛɛ lɛ, Nyɔŋmɔ mumɔ lɛ yeɔ ebuaa wɔ ni wɔjɛɔ bulɛ mli wɔshiɛɔ sane kpakpa lɛ wɔhãa amɛ, ni wɔhãaa amɛnifeemɔ lɛ awo wɔmli la. Enɛ ni wɔfeɔ lɛ tsɔɔ akɛ, wɔkɛ shiɛmɔ nitsumɔ lɛ he gbɛtsɔɔmɔi ni Yesu kɛhã yɛ Mateo 10:11-13 lɛ tsuɔ nii. Yesu wie yɛ jɛmɛ akɛ: “Kɛ́ nyɛbote shĩa lɛ mli lɛ, nyɛŋaa shĩabii lɛ. Kɛ́ shĩa lɛ sa lɛ, nyɛhãa toiŋjɔlɛ ni nyɛtaoɔ akɛ ená lɛ abaa enɔ; shi kɛ́ esaaa lɛ, nyɛhãa nyɛtoiŋjɔlɛ lɛ akua sɛɛ kɛbaa nyɛŋɔɔ.” Kɛ́ wɔkɛ gbɛtsɔɔmɔ nɛɛ tsu nii lɛ, mɛi lɛ anifeemɔ fiteŋ wɔtoiŋjɔlɛ, ni wɔsɛɛ ko lɛ, ekolɛ amɛbaabo sane kpakpa lɛ toi.

Eyɛ mli akɛ maŋ onukpai komɛi teɔ shi amɛwoɔ wɔ moŋ, shi kɛ́ wɔjie bulɛ kpo wɔtsɔɔ maŋ onukpai fɛɛ lɛ, no baanyɛ aye abua wɔ ni wɔná toiŋjɔlɛ kɛtsu wɔshiɛmɔ nitsumɔ lɛ. Akɛ nɔkwɛmɔnɔ lɛ, yɛ maji ni yɔɔ Afrika lɛ ateŋ ekome nɔ lɛ, nibii gbohii ni nɔyeli lɛ enu yɛ wɔhe lɛ ahewɔ lɛ, amɛŋmɛɛɛ wɔ gbɛ ni wɔmamɔ Maŋtsɛyeli Asai. No hewɔ lɛ, asafo lɛ tsu nyɛmi nuu ko ni esɔmɔ akɛ maŋsɛɛ sɔɔlɔ yɛ nakai maŋ lɛ nɔ pɛŋ lɛ ni ekɛ maŋ lɛ Maŋsɔɔlɔ Nukpa ni yɔɔ London, yɛ England lɛ ayawie. Akɛɛ lɛ akɛ kɛ́ etee lɛ, etsɔɔ maŋsɔɔlɔ lɛ nitsumɔ ni Yehowa Odasefoi tsuɔ yɛ emaŋ lɛ mli, koni ahã ena akɛ wɔnitsumɔ lɛ kɛ basabasafeemɔ baaa. Te nibii anaa yakpa hã tɛŋŋ?

Nyɛmi nuu lɛ wie akɛ: “Be ni mishɛ he ni ahereɔ gbɔi lɛ yɛ lɛ, atade ni yoo lɛ ni hereɔ gbɔi lɛ wo lɛ hã mina amɛmaŋ lɛ mli he ni ejɛ. Akɛni mikase amɛmaŋ wiemɔ lɛ hewɔ lɛ, miŋa lɛ yɛ nakai wiemɔ lɛ mli. Yoo lɛ naa kpɛ ehe, ni ebi mi akɛ, ‘Ofainɛ, mɛni kɛ bo ba biɛ?’ Mijɛ bulɛ mli mikɛɛ lɛ akɛ miitao mana Maŋsɔɔlɔ Nukpa lɛ. Etswa maŋsɔɔlɔ lɛ, ni maŋsɔɔlɔ lɛ ba ekɛ mi bakpe ni eŋa mi yɛ amɛmaŋ wiemɔ lɛ mli. No sɛɛ lɛ, migbala nitsumɔ ni Odasefoi tsuɔ lɛ mli mitsɔɔ lɛ koni ena akɛ wɔbɛ basabasa, ni lɛ hu ebo toi jogbaŋŋ.”

Bulɛ ni nyɛmi nuu lɛ jie lɛ kpo lɛ kɛ bɔ ni egbala nibii amli etsɔɔ maŋsɔɔlɔ lɛ hewɔ lɛ, maŋsɔɔlɔ lɛ na akɛ nibii gbohii ni awie yɛ nitsumɔ ni wɔtsuɔ lɛ he lɛ bɛ mli. Sɛɛ mli lɛ, nɔyeli lɛ ŋmɛ gbɛ ni amamɔ Maŋtsɛyeli Asai yɛ jɛmɛ. Nyɛmimɛi lɛ amii shɛ amɛhe waa yɛ yibii kpakpai ni jɛ toiŋjɔlɛ sɛɛ ni amɛtiu lɛ mli kɛba lɛ hewɔ! Kɛ́ wɔjie bulɛ kpo wɔtsɔɔ mɛi lɛ, ewoɔ yibii kpakpai babaoo, ni ekɛ toiŋjɔlɛ baa.

Ŋmɛnɛ lɛ, toiŋjɔlɛ yɛ Yehowa webii lɛ ateŋ. Kɛ́ omia ohiɛ waa akɛ obaajie su nɛɛ ni fata sui ni feɔ mumɔ lɛ yibii lɛ ahe lɛ kpo lɛ, bo hu obaaye obua ni abaa toiŋjɔlɛ nɛɛ yi. Nɔ ni fe fɛɛ lɛ, Yehowa baaná ohe miishɛɛ, ni obaahi shi kɛya naanɔ yɛ toiŋjɔlɛ babaoo mli yɛ Nyɔŋmɔ jeŋ hee lɛ mli.​—2 Pet. 3:13, 14.