YƐ BLEMA lɛ, mɛi kɛ wiemɔ ni ji “yoo” lɛ kpaa sane hiɛ, ejaakɛ bulɛ yɛ he. Akɛ nɔkwɛmɔnɔ lɛ, be ni Yesu tsaa mami ko ni “edɔ kɔmɔɔ ni enyɛɛɛ emli ekpã kwraa” afii 18 lɛ, ekɛɛ lɛ akɛ: “Yoo, afɛne bo kɛjɛ ogbedemɔ lɛ mli.” (Luka 13:10-13) Yesu kɛ wiemɔ nɛɛ tsu nii yɛ nɛkɛ gbɛ nɔ be ni ekɛ emami po wieɔ lɛ. (Yoh. 19:26; 20:13) Shi wiemɔ kroko yɛ ni mɛi kɛtsu nii ni ta yei atsuiŋ waa.

Wiemɔ nɛɛ ji “biyoo.” Be ko lɛ, Yesu kɛ wiemɔ nɛɛ ni tsɔɔ hedɔɔ kɛ mɔhesusumɔ lɛ tsu nii be ni ekɛ yoo ko ni lá eho lɛ afii 12 lɛ wieɔ lɛ. Susumɔ nɔ ni ba lɛ he okwɛ. Yoo nɛɛ nyiɛ asafo kuu ko teŋ kɛbɛŋkɛ Yesu, tsɛbelɛ aŋma yɛ Mla lɛ mli akɛ esaaa akɛ mɔ ko ni lá miiho lɛ lɛ baa mɛi ateŋ, ejaakɛ ehe tseee. (3 Mose 15:19-27) Shi anɔkwa sane kome ji akɛ, no mli lɛ yoo nɛɛ “ena nɔ babaoo yɛ helatsalɔi pii adɛŋ, ni efite edɛŋ nii fɛɛ, ni kɛ̃lɛ ehiko hãko lɛ kwraa,” moŋ lɛ, ehela lɛ mli ewo wu. No hewɔ lɛ, etswa efai shi akɛ, ebaafee bɔ fɛɛ bɔ ni ebaanyɛ koni atsa lɛ.​—Mar. 5:25, 26.

Edɛkɛ shi kɛbɛŋkɛ Yesu kɛjɛ esɛɛgbɛ ni eta etade nɔhaanɔ lɛ naamuu lɛ he. Amrɔ nɔŋŋ lɛ, lá ni hoɔ lɛ lɛ sɛɛ fo! Yoo lɛ kpaaa gbɛ akɛ mɔ ko baana nɔ ni efee lɛ. Shi Yesu nu he akɛ mɔ ko eta ehe, ni ebi akɛ: “Namɔ ta mihe lɛ?” (Luka 8:45-47) Yoo lɛ tsui fã, eshe gbeyei, ni ehe kpokpo. Ebagbee Yesu hiɛ ni “egba lɛ anɔkwale lɛ fɛɛ.”​—Mar. 5:33.

Yesu hã yoo lɛ tsui. Ejɛ mlihilɛ mli ekɛɛ lɛ akɛ: “Biyoo, hã otsui anyɔ omli!” Kɛkɛ ni ewie kɛfata he akɛ: “Ohemɔkɛyeli ehã ohe ewa bo. Yaa yɛ toiŋjɔlɛ mli, ni hela ni ehã opiŋ nɛɛ akagba onaa dɔŋŋ.” (Mat. 9:22; Mar. 5:34) Biblia mli nilelɔi kɛɔ akɛ, bei komɛi lɛ, akɛ Hebri kɛ Hela wiemɔ ni atsɔɔ shishi akɛ “biyoo” lɛ tsuɔ nii kɛ́ aatao mɔ ko ana akɛ asusuɔ ehe ni adɔɔ ehe.

Israelnyo niiatsɛ Boaz hu kɛ wiemɔ nɛɛ tsu nii be ni ekɛ Moabyoo Rut wieɔ lɛ. No mli lɛ, Rut miiye kpɛkpɛo yɛ Boaz akoko ŋmɔ lɛ mli, tsɛbelɛ eleee lɛ. Eeenyɛ efee akɛ, enɛ hã eshe gbeyei fioo. Shi Boaz kɛɛ lɛ akɛ: “Mibi [aloo, mibiyoo], oobo toi? Kaaya ni oyaye kpɛkpɛo yɛ mɔ kroko ŋmɔshi.” Rut ho ekula shikpɔŋ yɛ Boaz hiɛ ni ebi lɛ nɔ hewɔ ni ejie mlihilɛ kpo etsɔɔ lɛ, ni eji gbɔ lɛ. Boaz hã hetoo akɛ: “Nii ni ofee ohã oshaayoo lɛ [ni ji yoo okulafo Naomi lɛ] yɛ owu gbele lɛ sɛɛ lɛ, agba mi fɛɛ pɛpɛɛpɛ.” Kɛkɛ ni ewo lɛ hewalɛ kɛ wiemɔi nɛɛ, akɛ: “Yehowa atoo onii ni otsu lɛ najiaŋ.”​—Rut 2:8-12.

Nɔ ni Yesu kɛ Boaz fee lɛ ji nɔkwɛmɔnɔ kpakpa kɛhã asafoŋ onukpai. Bei komɛi lɛ, ehe baahia ni asafoŋ onukpai enyɔ kɛ nyɛmi yoo ko akpe koni amɛjɛ Ŋmalɛi lɛ amli amɛye amɛbua lɛ ni amɛwo lɛ hewalɛ. Be ni amɛkɛ lɛ esɔle amɛgbe naa lɛ, esa akɛ amɛbo lɛ toi jogbaŋŋ. Kɛkɛ lɛ, no sɛɛ lɛ, amɛbaanyɛ amɛkɛ ŋmalɛi ni sa aye abua lɛ ni amɛkɛwo lɛ hewalɛ.​—Rom. 15:4.