Mɔ Ni Hãa Mɔ Nɔ Lɛ, Abaajɔɔ Lɛ

TSWAA

KƐJƐ blema beebe lɛ, mɛi fɛɛ ni jáa Nyɔŋmɔ lɛ shãa afɔlei amɛhãa lɛ, ni amɛbuɔ enɛ akɛ eji nɔ ko ni he hiaa waa. Israelbii lɛ kɛ kooloi shã afɔle, ni Kristofoi hu kɛ “yijiemɔ afɔle” hãa Nyɔŋmɔ be fɛɛ be. Kɛ̃lɛ, afɔlei krokomɛi yɛ ni saa Nyɔŋmɔ hiɛ jogbaŋŋ. (Heb. 13:15, 16) Ni tamɔ bɔ ni wɔbaana lɛ, mɛi fɛɛ ni shãa afɔlei nɛɛ náa miishɛɛ ni Nyɔŋmɔ jɔɔ amɛ.

Nyɔŋmɔ tsulɔ anɔkwafo ko ni hi shi yɛ blema ni atsɛɔ lɛ Hana lɛ, shwe waa ni ená binuu, shi enyɛɛɛ efɔ. Esɔle ehã Yehowa ni ewo lɛ shi akɛ, kɛ́ eduro lɛ binuu lɛ, ‘ebaaŋɔ lɛ ehã Yehowa ewala gbii fɛɛ.’ (1 Sam. 1:10, 11) Hana bahiɛ hɔ, ni efɔ binuu. Ewo ebi lɛ gbɛ́i Samuel. Be ni etse Samuel fufɔ lɛ, ekɛ lɛ tee sɔlemɔ buu lɛ, tamɔ bɔ ni ewo shi lɛ pɛpɛɛpɛ. Yehowa jɔɔ Hana yɛ afɔle ni eshã lɛ hewɔ, ni ehã efɔ bii enumɔ krokomɛi. Ebinuu Samuel hu batsɔ gbalɔ, ni ená hegbɛ eŋma Biblia lɛ eko.—1 Sam. 2:21.

Ŋmɛnɛ lɛ, Kristofoi baanyɛ akase Hana kɛ Samuel ni amɛjɔɔ amɛwala nɔ amɛhã mɔ ni bɔ amɛ lɛ ni amɛsɔmɔ lɛ. Yesu ewo shi akɛ, Yehowa baajɔɔ wɔ waa yɛ nibii fɛɛ ni wɔkɛshãa afɔle yɛ esɔɔmɔ lɛ mli lɛ hewɔ.—Mar. 10:28-30.

Yɛ klɛŋklɛŋ afii 100 lɛ mli lɛ, Kristofonyo yoo ko ni atsɛɔ lɛ Dorka lɛ kɛ enibii shã afɔle kɛye ebua mɛi krokomɛi. Biblia lɛ wie yɛ ehe akɛ etsu “nitsumɔi kpakpai” ni ‘efee ohiafoi ejurɔ.’ Dɔlɛ sane ji akɛ, hela bamɔ Dorka ni egbo, ni enɛ kumɔ nyɛmimɛi lɛ atsui waa. Kɛkɛ ni amɛnu akɛ Petro yɛ akutso lɛ mli. No hewɔ lɛ, amɛtsu ni ayatsɛ lɛ kɛba amrɔ nɔŋŋ. Be ni Petro ba lɛ, etee Dorka shi ni enɛ hã nyɛmimɛi lɛ amii shɛ amɛhe waa diɛŋtsɛ. Enɛ ji gbohiiashitei ni awie he yɛ Biblia lɛ mli lɛ ateŋ klɛŋklɛŋ nɔ ni Yesu bɔfoi lɛ eko ni tee mɔ lɛ shi. (Bɔf. 9:36-41) Nyɔŋmɔ hiɛ kpaaa afɔlei ni Dorka shã lɛ anɔ. (Heb. 6:10) Ehã aŋma ejurɔ ni efee lɛ he sane yɛ E-Wiemɔ lɛ mli akɛ nɔkwɛmɔnɔ kɛhã wɔ.

Bɔfo Paulo hu fee nɔkwɛmɔnɔ kpakpa ehã wɔ. Ekɛ ebe kɛ ehewalɛ shã afɔle ehã mɛi krokomɛi. Yɛ wolo ni eŋma eyahã enyɛmimɛi Kristofoi ni yɔɔ Korinto lɛ mli lɛ, ewie akɛ: “Migbɛfaŋ lɛ, miyɛ he miishɛɛ babaoo akɛ maŋɔ nii ni miyɔɔ lɛ fɛɛ mahã, ni asaŋ akɛ mi atsu nii kɛwula shi yɛ nyɛhewɔ.” (2 Kor. 12:15) Akɛni Paulo kɛ ehe shã afɔle nɛkɛ hewɔ lɛ, etsui nyɔ emli waa. Shi nɔ ni fe fɛɛ lɛ, nɔ ni efee lɛ sa Yehowa hiɛ, ni Yehowa jɔɔ lɛ.—Bɔf. 20:24, 35.

No hewɔ lɛ, eyɛ faŋŋ akɛ, Yehowa mii shɛɔ ehe waa kɛji wɔkɛ wɔbe kɛ wɔhewalɛ shã afɔle yɛ esɔɔmɔ lɛ mli loo wɔkɛye wɔbua wɔnyɛmimɛi Kristofoi lɛ. Shi ani nibii krokomɛi yɛ ni wɔbaanyɛ wɔfee kɛfi Maŋtsɛyeli shiɛmɔ nitsumɔ lɛ sɛɛ? Hɛɛ! Yɛ wɔbe kɛ wɔhewalɛ ni wɔkɛshãa afɔle lɛ sɛɛ lɛ, wɔbaanyɛ wɔjɛ wɔtsuiŋ wɔkɛ wɔshika kɛ wɔnibii hu ashã afɔle kɛwo Nyɔŋmɔ hiɛ nyam. Oniai ni wɔtsuɔ lɛ yeɔ ebuaa ni anyɛɔ atsuɔ shiɛmɔ nitsumɔ lɛ yɛ jeŋ fɛɛ, ni no nɔŋŋ mli ajɛɔ akwɛɔ maŋsɛɛ sɔɔlɔi kɛ mɛi krokomɛi ni yɔɔ be fɛɛ sɔɔmɔ krɛdɛɛ nitsumɔ lɛ mli lɛ. Kɛfata he lɛ, no mli ajɛɔ akalaa wɔwoji lɛ ni atsɔɔ shishi, afeɔ vidioi, ayeɔ abuaa mɛi ni osharai enina amɛ, ni amamɔɔ Maŋtsɛyeli Asai hei. Kɛ́ wɔjɛ wɔsuɔmɔ mli wɔkɛ wɔnibii ni jara wa lɛ shã afɔle lɛ, wɔmiiwo Yehowa hiɛ nyam, ni ebaajɔɔ wɔ.—Abɛi 3:9; 22:9.

Gbɛi Ni Mɛi Komɛi Tsɔɔ Nɔ Amɛfiɔ Jeŋ Muu Fɛɛ Nitsumɔ Lɛ Sɛɛ

Tamɔ bɔ ni eji yɛ bɔfo Paulo beiaŋ lɛ, ŋmɛnɛ lɛ, mɛi pii ‘ŋɔɔ nɔ ko amɛtoɔ’ ni amɛkɛwoɔ oniatsumɔ adekai ni aŋmala yɛ he akɛ, “Jeŋ Muu Fɛɛ Nitsumɔ Lɛ” amli yɛ amɛsafoi lɛ amli. (1 Kor. 16:2) Daa nyɔɔŋ nɔ lɛ, asafoi lɛ fɛɛ kɛ oniai ni atsuɔ lɛ majeɔ Yehowa Odasefoi anitsumɔhe nine ni kwɛɔ shiɛmɔ nitsumɔ lɛ nɔ yɛ maŋ nɔ he ni amɛyɔɔ lɛ. Obaanyɛ okɛ shika ni ootao okɛke lɛ hu amaje Yehowa Odasefoi tɛ̃ɛ kɛtsɔ nitsumɔhe ko ni asafo lɛ etsɔɔ akɛ ehe shika yɛ egbɛ́i mli lɛ nɔ. Kɛ́ ootao ole nitsumɔhe titri ni Yehowa Odasefoi ni yɔɔ maŋ nɔ he ni oyɔɔ lɛ kɛtsuɔ nii lɛ gbɛ́i lɛ, ofainɛ, tswaa amɛnitsumɔhe nine lɛ, loo ŋmaa amɛ wolo. Obaanyɛ ona nitsumɔhe nine lɛ tɛlifoŋ nɔmba kɛ adrɛs yɛ www.pr418.com. Obaanyɛ okɛ nibii ni nyiɛ sɛɛ nɛɛ ateŋ eko fɛɛ eko ahã tɛ̃ɛ kɛji afeɔ nakai yɛ maŋ nɔ he ni oyɔɔ lɛ:

NIBII NI OTAOƆ OKƐKE

Obaanyɛ ohã shikatoohe ko kɛ shika awo Yehowa Odasefoi afotro mli tɛ̃ɛ, loo ohã ajie kɛjɛ okaadi ni okɛjieɔ shika loo okɛwoɔ nibii ahe nyɔmɔ lɛ nɔ. Yɛ maji komɛi anɔ lɛ, obaanyɛ otsɔ jw.org wɛbsaiti lɛ loo wɛbsaiti kroko ko ni Yehowa Odasefoi etsɔɔ akɛ atsɔ nɔ ahã amɛ shika lɛ nɔ ofee nakai.
Obaanyɛ okɛ shika diɛŋtsɛ, jwinei, loo ojarawa nibii krokomɛi hu ake. Ofainɛ, ŋmaa wolo kɛfata shika loo ojarawa nii ni otaoɔ okɛke lɛ he kɛtsɔɔ akɛ okɛmiike.

NIBII NI OTAOƆ OKƐHÃ SHI JEEE NI OKƐMIIKE

Obaanyɛ okɛ shika ko ahã ni Yehowa Odasefoi kɛtsu nii, koni sɛɛ mli lɛ, akɛhã bo.
Ofainɛ, ŋmaa wolo kɛfata shika lɛ he kɛtsɔɔ akɛ okɛmiihã shi okɛkeko.

EJURƆFEEMƆ HE GBƐJIANƆTOO

Yɛ shika kɛ ojarawa nibii ni obaanyɛ okɛke lɛ sɛɛ lɛ, naa gbɛi krokomɛi ni obaanyɛ otsɔ nɔ ofi Maŋtsɛyeli shiɛmɔ nitsumɔ ni atsuɔ yɛ jeŋ fɛɛ lɛ sɛɛ. Ofainɛ, dani okɛ gbɛi nɛɛ eko baatsu nii lɛ, bi gbɛtsɔɔmɔ kɛjɛ nitsumɔhe nine lɛ, koni ona amɛteŋ nɔ ni obaanyɛ okɛtsu nii yɛ maŋ nɔ he ni oyɔɔ lɛ. Akɛni esoro he fɛɛ he kɛ mlai ni akɛtsuɔ nii yɛ jɛmɛ kɛ toi srɔtoi ni awoɔ yɛ jɛmɛ hewɔ lɛ, ehe miihia ni okɛ mɔ ko ni le mla lɛ kɛ toi srɔtoi lɛ ahe nii jogbaŋŋ lɛ agba sane, koni ona gbɛi srɔtoi ni atsɔɔ lɛ ateŋ nɔ ni hi fe fɛɛ ni obaanyɛ okɛtsu nii.

Ŋshuɔransi Kɛ Pɛnshɛŋ Shika: Obaanyɛ okɛ nitsumɔhe ko ni Yehowa Odasefoi etsɔɔ akɛ ebaanyɛ ehe shika yɛ egbɛ́i mli lɛ gbɛ́i awo ŋshuɔransi ko nɔ akɛ mɛi ni akɛ ŋshuɔransi lɛ ahã kɛji ogbo. Nakai nɔŋŋ obaanyɛ oŋma nitsumɔhe nɛɛ gbɛ́i akɛ mɛi ni akɛ opɛnshɛŋ shika, loo shika ko ni okɛto shikatoohe lɛ koni kɛ́ oba nitsumɔ mli hejɔɔmɔ lɛ akɛhã bo lɛ ahã.

Shika Ni Akɛto Shikatoohe: Obaanyɛ oto gbɛjianɔ koni kɛ́ ogbo lɛ, akɛ shika ko ni okɛto shikatoohe lɛ ahã Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika yɛ amɛgbɛ́i mli lɛ nɔ, kɛji afeɔ nakai yɛ maŋ nɔ he ni oyɔɔ lɛ.

Shika Ni Akɛwo Nitsumɔ Ko Mli Loo Akɛfa Shikatoohe Ko: Obaanyɛ okɛ shika ni okɛwo nitsumɔ ko mli loo okɛfa shikatoohe ko lɛ ahã Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika yɛ amɛgbɛ́i mli lɛ nɔ.

Shikpɔji Kɛ Tsũi: Obaanyɛ okɛ shikpɔji kɛ tsũi ni baahi hɔ̃ɔmɔ ake Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika loo nibii krokomɛi yɛ amɛgbɛ́i mli lɛ nɔ. Obaanyɛ okɛ bo diɛŋtsɛ oshĩa ni oyɔɔ mli lɛ hu ahã akɛ okɛmiike kwraa shi obaahi mli kɛyashi obaagbo.

Shamaŋsheo: Obaanyɛ oŋma shamaŋsheo yɛ mla naa, ni okɛ nibii loo shika ni oyɔɔ lɛ ake Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika loo nibii krokomɛi yɛ amɛgbɛ́i mli lɛ nɔ. Gbɛjianɔtoo nɛɛ baanyɛ ahã bo kɛ asafo lɛ aye nyɛhe kɛjɛ toi komɛi ahe.

Tamɔ bɔ ni wiemɔ ni ji “ejurɔfeemɔ he gbɛjianɔtoo” lɛ tsɔɔ lɛ, ebaabi ni mɔ ko ni miitao ni ekɛ nibii ni atsĩ tã kɛtsɔ hiɛ lɛ eko ake lɛ ato he gbɛjianɔ. Afee broshuɔ ko ni yitso ji, Charitable Planning to Benefit Kingdom Service Worldwide lɛ, koni eye ebua mɛi fɛɛ ni miisumɔ ni amɛtsu onia kɛfi Yehowa Odasefoi ajeŋ muu fɛɛ nitsumɔ lɛ sɛɛ lɛ ni amɛna gbɛi srɔtoi ni amɛbaanyɛ amɛtsɔ nɔ amɛto he gbɛjianɔ. Enɛ baanyɛ afee gbɛjianɔtoo ko ni Yehowa Odasefoi baaná he sɛɛ amrɔ nɛɛ, loo nɔ ni amɛbaaná he sɛɛ sɛɛ mli, tamɔ be ni mɔ lɛ egbo nɛkɛ. Afee broshuɔ nɛɛ yɛ Blɔfo kɛ Spanish mli. Akɛni esoro he fɛɛ he kɛ mlai ni akɛtsuɔ nii yɛ jɛmɛ kɛ toi srɔtoi ni awoɔ yɛ jɛmɛ hewɔ lɛ, ekolɛ jeee saji fɛɛ ni yɔɔ broshuɔ nɛɛ mli lɛ obaanyɛ okɛtsu nii yɛ he ni oyɔɔ lɛ. Mɛi etsɔ gbɛi srɔtoi ni atsɔɔ yɛ broshuɔ nɛɛ mli lɛ anɔ amɛfi Yehowa Odasefoi asɛɛ yɛ amɛ-Biblia tsɔsemɔ kɛ ejurɔfeemɔ nitsumɔ ni amɛtsuɔ yɛ jeŋ fɛɛ lɛ mli ni aheee amɛ toi babaoo. Kɛ́ ayɛ broshuɔ nɛɛ eko yɛ maŋ nɔ he ni oyɔɔ lɛ, obaanyɛ obi ni asafoŋ woloŋmalɔ lɛ ahã bo eko.

Kɛ́ ootao ole saji babaoo lɛ, ofainɛ, yaa www.pr418.com/gaa ni okliki he ni kɛɛ “Tsu Onia ni Okɛye Obua Wɔ-Jeŋ Muu Fɛɛ Nitsumɔ Lɛ.” Eyɛ wɛbsaiti lɛ shishigbɛ kwraa. Aloo obaanyɛ otswa nitsumɔhe nine lɛ loo oŋma amɛ wolo.

Ekolɛ Obaasumɔ Enɛ Hu

Bɔ Ni Obaafee Otsu Onia Kɛtsɔ Intanɛt Lɛ Nɔ

Kwɛmɔ gbɛi srɔtoi ni atsɔɔ nɔ atsuɔ onia kɛ nibii ni obaanyɛ okɛtsu nii kɛtsu onia.

BUU-MƆƆ—NIKASEMƆ NƆ

Mɔ Ni Hãa Mɔ Nɔ Lɛ, Abaajɔɔ Lɛ

https://cms-imgp.jw-cdn.org/img/p/2017645/univ/art/2017645_univ_sqr_xl.jpg

Ekolɛ Obaasumɔ Enɛ Hu

DAUNLODIMƆ HENƆ NI OSUMƆƆ

Halamɔ Owiemɔ

Kɛmaje Mɔ Ko