KƐ́ MƆ ko jie mlihilɛ kpo etsɔɔ bo lɛ, te onuɔ he ohãa tɛŋŋ? Ŋwanejee ko bɛ he akɛ ewoɔ bo hewalɛ, ni ehãa omii shɛɔ ohe waa. Ehãa onaa akɛ mɔ lɛ susuɔ ohe. Akɛni wɔ fɛɛ wɔmiisumɔ ni mɛi amli ahi yɛ wɔnɔ hewɔ lɛ, te wɔbaafee tɛŋŋ wɔjie su kpakpa nɛɛ kpo?

Kɛ́ akɛɛ mɔ ko ml i hi lɛ, no tsɔɔ akɛ mɔ lɛ susuɔ mɛi krokomɛi ahe, ni etsɔɔ ewiemɔ kɛ enifeemɔ nɔ eyeɔ ebuaa amɛ. Nibii ni wɔfeɔ wɔhãa mɛi lɛ ni tsɔɔ kɛji wɔmli hi lɛɛlɛŋ. No hewɔ lɛ, kɛ́ mɔ ko tseɔ ehiɛ ehãa mɛi, shi yɛ etsui mli lɛ esumɔɔɔ amɛsane ni enuuu he ehãaa amɛ lɛ, emli nyɛŋ ahi yɛ amɛnɔ. Mlihilɛ fata sui kpakpai ni Nyɔŋmɔ mumɔ krɔŋkrɔŋ lɛ woɔ lɛ ahe, ni esa akɛ Kristofoi fɛɛ ajie su nɛɛ kpo. (Gal. 5:22, 23) Nɔ kome ni baaye abua wɔ ni wɔfee nakai ji, ni wɔbaakase Yehowa kɛ e-Bi Yesu. Mɛɛ gbɛ nɔ Yehowa kɛ Yesu etsɔɔ akɛ amɛmli hi?

Yehowa mli hi yɛ mɛi fɛɛ anɔ ni esusuɔ amɛhe. “Emli hi yɛ mɛi ni leee shidaa kɛ mɛi fɔji” po anɔ. (Luka 6:35) Akɛ nɔkwɛmɔnɔ lɛ, “ehãa ehulu teɔ shi yɛ mɛi fɔji kɛ mɛi kpakpai fɛɛ anɔ, ni ehãa nugbɔ nɛɔ shwieɔ jalɔi kɛ mɛi ni ejaaa fɛɛ anɔ.” (Mat. 5:45) Mɛi ni kɛɛ jeee Yehowa ni bɔ je lɛ po náa nibii nɛɛ ni ejɛɔ mlihilɛ mli ekɛdroɔ wɔ lɛ ahe sɛɛ, ni ekolɛ, amɛnáa miishɛɛ ko kɛ̃ yɛ amɛshihilɛ mli.

Nɔ ko ni Yehowa fee ehã Adam kɛ Hawa lɛ hãa wɔnaa akɛ emli hi waa. Be ni Adam kɛ Hawa fee esha lɛ sɛɛ etsɛɛɛ lɛ, “amɛkpɛ agbami bai kɛtsara, ni amɛkɛha amɛshishigbɛ.” Shi Yehowa na akɛ, nɔ ni amɛkpɛ kɛha amɛhe nɛɛ kɛ amɛ shɛŋ he ko kwraa, ejaakɛ alomɔ shikpɔŋ lɛ, ni “ŋmeii kɛ jwɛi ni ŋmei yɔɔ he” sɔŋŋ ni yɔɔ abɔɔ lɛ sɛɛ he ni amɛbaayahi lɛ. No hewɔ lɛ, Yehowa jɛ mlihilɛ mli ekɛ “kooloi ahewoji fee atadei kakadaji ehã” amɛ.​—1 Mo. 3:7, 17, 18, 21.

Eyɛ mli akɛ Yehowa mli hi yɛ “jalɔi kɛ mɛi ni ejaaa fɛɛ” anɔ moŋ, shi mɛi titri ni esumɔɔ ni ejie mlihilɛ kpo etsɔɔ ji etsuji ni yeɔ lɛ anɔkwa lɛ. Akɛ nɔkwɛmɔnɔ lɛ, be ni Israelbii lɛ ku amɛsɛɛ kɛje nomŋɔɔ mli lɛ, amɛbɔi sɔlemɔ shĩa ni yɔɔ Yerusalem lɛ maa ekoŋŋ, shi amɛkɛyawa gbɛteŋ. Enɛ hao ŋwɛibɔfo ko waa, ni eye he ŋkɔmɔ. Yehowa bo bɔfo lɛ toi, ni ekɛ “naajɔlɛ kɛ miishɛjemɔ wiemɔi” hã lɛ hetoo. (Zak. 1:12, 13) Be ko hu lɛ, gbalɔ Elia nu he akɛ lɛ pɛ ji Yehowa jálɔ ni eshwɛ yɛ Israel, ni ehao aahu akɛ ekɛɛ Yehowa akɛ egbe lɛ. Yehowa nu he ehã Elia, ni ejie mlihilɛ kpo etsɔɔ lɛ. Etsu ŋwɛibɔfo ko kɛtee eŋɔɔ koni eyawo lɛ hewalɛ. Agbɛnɛ hu, ehã Elia le akɛ jeee lɛ pɛ ji Nyɔŋmɔ tsulɔ ni eshwɛ yɛ Israel. Hewalɛwoo wiemɔi ni Yehowa kɛ Elia wie lɛ, kɛ nibii krokomɛi ni efee kɛye ebua lɛ lɛ ahewɔ lɛ, Elia nyɛ etsa nitsumɔ ni Yehowa kɛwo edɛŋ lɛ nɔ. (1 Maŋ. 19:1-18) Nyɔŋmɔ tsuji lɛ ateŋ namɔ enyɛ ekase Yehowa jogbaŋŋ ni ejie mlihilɛ kpo fe mɔ fɛɛ mɔ?

Be ni Yesu yɔɔ shikpɔŋ lɛ nɔ lɛ, ejie mlihilɛ kpo ni enu he ehã mɛi. Efeee mɛi hãihãi, ni asaŋ, eyeee mɛi anɔ nuŋtsɔmɛi asane.  Emusuŋ tsɔ lɛ yɛ mɛi ahe, ni no hewɔ lɛ, ewie akɛ: “Nyɛbaa miŋɔɔ, nyɛ mɛi fɛɛ ni eetɔ nyɛ, ni nyɛtere jatsui ni tsii, ni mahã nyɛhe ajɔ nyɛ. . . . Ejaakɛ mikɔɔŋtso lɛ teremɔ waaa.” (Mat. 11:28-30) Bɔ ni Yesu mli hi lɛ hewɔ lɛ, he fɛɛ he ni ebaatsɔ lɛ, mɛi nyiɛɔ esɛɛ. Elɛ mɛi, etsa helai srɔtoi fɛɛ, ni etsɔɔ mɛi e-Tsɛ lɛ he “nibii pii,” ejaakɛ ‘mɛi lɛ anii fee lɛ mɔbɔ.’​—Mar. 6:34; Mat. 14:14; 15:32-38.

Bɔ ni Yesu kɛ mɛi ye ehã lɛ tsɔɔ akɛ enu amɛ shishi ni enyɛ ekɔ sane sɛɛ. Enɛ ji nɔ kroko ni hãa wɔnaa akɛ emli hi waa. Be fɛɛ be ni mɛi baaba eŋɔɔ kɛ amɛnaagbai lɛ, ‘ehereɔ amɛ hiɛmɛɛ,’ kɛ́ be ni amɛba lɛ ehiii hãaa lɛ po. (Luka 9:10, 11) Akɛ nɔkwɛmɔnɔ lɛ, be ko lɛ, yoo ko ni lá eho lɛ afii 12 lɛ ta Yesu atade nɔhaanɔ lɛ he koni ehe awa lɛ. Kulɛ, esaaa akɛ yoo lɛ feɔ nakai, ejaakɛ yɛ Mose Mla lɛ naa lɛ ehe tseee. (3 Mo. 15:25-28) Be ni yoo lɛ na akɛ Yesu ena nɔ ni efee lɛ, etsui fã waa. Shi ani Yesu kã ehiɛ? Dabi. Emusuŋ tsɔ lɛ yɛ ehewɔ, ni ekɛɛ lɛ akɛ: “Biyoo, ohemɔkɛyeli lɛ ehã oná hewalɛ. Yaa yɛ toiŋjɔlɛ mli, ni hela ni ehã opiŋ nɛɛ akagba onaa dɔŋŋ.” (Mar. 5:25-34) Yesu jie mlihilɛ kpele kpo lɛɛlɛŋ!

Saji ni wɔsusu he kɛtsɔ hiɛ lɛ hãa wɔnaa akɛ, kɛ́ wɔmli hi lɛɛlɛŋ lɛ, ebaaje kpo yɛ wɔnifeemɔ mli. Yɛ Samarianyo naanyo kpakpa lɛ he nɔkwɛmɔnɔ ni Yesu gba lɛ mli lɛ, ehã anɔkwa sane nɛɛ fee faŋŋ. Eyɛ mli akɛ Samariabii kɛ Yudafoi yeee kwraa moŋ, shi yɛ nɔkwɛmɔnɔ lɛ mli lɛ, Yudanyo ni atswa lɛ ojo, ni ayi lɛ, ni ashi lɛ kã gbɛ lɛ nɔ ni egbo fã kɛ fã lɛ nii fee Samarianyo lɛ mɔbɔ. No hewɔ lɛ, ejie mlihilɛ kpo etsɔɔ lɛ, ni eye ebua lɛ. Eto nuu lɛ pilamɔi lɛ anɔ ni ekɛ lɛ tee gbɔiatoohe koni akwɛ lɛ. Shi ekɛwaaa jɛmɛ. Ehã gbɔiatoohe nɔkwɛlɔ lɛ shika ni ekɛkwɛ nuu lɛ, ni ekɛɛ lɛ akɛ nɔ fɛɛ nɔ ni ebaafite kɛfata he lɛ, ebaahã lɛ.​—Luka 10:29-37.

Kɛ́ wɔmli hi lɛ, ebaaje kpo yɛ wɔwiemɔi amli hu. Nibii ni wɔbaawie lɛ baawo mɛi krokomɛi hewalɛ, ni ebaahã amɛna akɛ amɛsane kã wɔtsui nɔ. Biblia lɛ kɛɔ akɛ: “Gbɔmɔ tsui mli ŋkɔmɔyeli hãa ehaoɔ, shi wiemɔ kpakpa hãa enáa miishɛɛ.” (Abɛi 12:25) Kɛ́ wɔmli hi ni wɔfeɔ mɛi ekpakpa lɛ, ebaatsirɛ wɔ ni wɔwie nibii ni baawo amɛ hewalɛ ni ehã amɛná miishɛɛ. * Nibii ni wɔbaawie lɛ baahã amɛna akɛ wɔsusuɔ amɛhe. Enɛ baawo amɛ hewalɛ koni amɛnyɛ amɛkpee naagbai ni amɛkɛkpeɔ yɛ shihilɛ mli lɛ anaa.​—Abɛi 16:24.

Nyɔŋmɔ bɔ gbɔmɔ “tamɔ bɔ ni eyɔɔ lɛ,” ni no hewɔ lɛ, adesai fɛɛ baanyɛ ajie mlihilɛ kpo. (1 Mo. 1:27) Akɛ nɔkwɛmɔnɔ lɛ, Yulio, ni ji Roma asraafoiatsɛ ni kwɛ bɔfo Paulo nɔ be ni efãa gbɛ kɛyaa Roma lɛ, “kɛ Paulo ye yɛ mlihilɛ naa, ni eŋmɛ lɛ gbɛ ni eya enanemɛi lɛ aŋɔɔ” yɛ Sidon “ni amɛkwɛ lɛ.” (Bɔf. 27:3) Sɛɛ mli lɛ, mɛi ni yɔɔ Malta ŋshɔkpɔ lɛ nɔ lɛ kɛ Paulo kɛ mɛi krokomɛi ni fata ehe lɛ “ye yɛ mlihilɛ ni nɔ bɛ naa” be ni amɛlɛlɛ lɛ yasha shi yɛ jɛmɛ lɛ. Mɛi lɛ shɛre la amɛhã amɛ koni amɛhe adɔ la ni fɛ̃i akaye amɛ. (Bɔf. 28:1, 2) Nɔ ni amɛfee nɛɛ sa yijiemɔ waa. Shi jeee ejurɔ ni mɔ ko baafee shi kome ko pɛ lɛ ni baatsɔɔ akɛ mɔ lɛ mli hi.

Kɛ́ wɔmiitao wɔsa Nyɔŋmɔ hiɛ jogbaŋŋ lɛ, esa akɛ wɔjie mlihilɛ kpo be fɛɛ be. Enɛ hewɔ lɛ, Yehowa kɛɔ wɔ yɛ Biblia lɛ mli akɛ, ‘wɔwo’ mlihilɛ. (Kol. 3:12) Anɔkwa, jeee be fɛɛ be eyɔɔ mlɛo akɛ wɔbaajie su kpakpa nɛɛ kpo. Mɛni hewɔ? Ekolɛ wɔhiɛ gboɔ, wɔnuɔ he akɛ wɔnyɛŋ wɔfee, aloo wɔsheɔ gbeyei akɛ abaate shi awo wɔ. Agbɛnɛ hu, eyɛ mli akɛ wɔmiifee bɔ fɛɛ bɔ ni wɔbaanyɛ ni wɔkafo wɔ pɛ wɔnɔ mli moŋ, shi jeee be fɛɛ be wɔnyɛɔ wɔyeɔ su gbonyo nɛɛ nɔ, ni bei komɛi lɛ, enɛ hãaa wɔnyɛ wɔjie mlihilɛ kpo. Shi mumɔ krɔŋkrɔŋ lɛ baanyɛ aye abua wɔ ni wɔye gbɛtsiinii nɛɛ anɔ. Nɔ kroko ni baanyɛ aye abua wɔ ji, ni wɔbaakase bɔ ni Yehowa jieɔ mlihilɛ kpo lɛ.​—1 Kor. 2:12.

 Ani wɔbaanyɛ wɔyɔse gbɛi komɛi ni wɔbaanyɛ wɔtsɔ nɔ wɔjie mlihilɛ kpo jogbaŋŋ fe bɔ ni wɔfeɔ amrɔ nɛɛ? Esa akɛ wɔbi wɔhe akɛ: ‘Ani mitoɔ mitsui shi miboɔ mɛi toi ni mibɔɔ mɔdɛŋ akɛ manu amɛ shishi? Ani mikɛ mihiɛ fɔ̃ɔ shi ni miyɔseɔ nibii ni he hiaa mɛi krokomɛi? Mɛɛ be nɛ ni mijie mlihilɛ kpo mitsɔɔ mɔ ko ni jeee miwekunyo loo minaanyo ni bɛŋkɛ mi kpaakpa?’ No sɛɛ lɛ, wɔbaanyɛ wɔkɛ otii komɛi amamɔ wɔhiɛ. Akɛ nɔkwɛmɔnɔ lɛ, wɔbaanyɛ wɔkɛfee oti ni ma wɔhiɛ akɛ wɔkɛ mɛi ni bɛŋkɛ wɔ, titri lɛ, mɛi ni yɔɔ Kristofoi asafo lɛ mli lɛ, baabɔ naanyo koni wɔle amɛ jogbaŋŋ. Enɛ baahã wɔle shihilɛi amli ni amɛyɔɔ kɛ nibii ni he hiaa amɛ. No sɛɛ lɛ, wɔbaanyɛ wɔbi wɔhe akɛ, ‘Eji mi miyɔɔ shihilɛ nɛɛ mli kulɛ, mɛni masumɔ ni mɔ ko afee kɛye ebua mi?,’ ni wɔbɔ mɔdɛŋ wɔfee nakai kɛye wɔbua amɛ. (Mat. 7:12) Naagbee lɛ, esa akɛ wɔbi Yehowa ni eye ebua wɔ koni wɔnyɛ wɔjie mlihilɛ kpo, ni kɛ́ wɔfee nakai lɛ, Yehowa baajɔɔ wɔmɔdɛŋbɔi lɛ anɔ.​—Luka 11:13.

Be ni bɔfo Paulo tsĩɔ nibii ni hãa anaa akɛ Nyɔŋmɔ sɔɔlɔ ji lɛ lɛ atã lɛ, etsĩ “mlihilɛ” tã. (2 Kor. 6:3-6) Paulo ná dekã ehã mɛi, ni etsɔ ewiemɔ kɛ enifeemɔ nɔ ehã amɛna akɛ esusuɔ amɛhe. Enɛ hewɔ lɛ, mɛi basumɔ esane waa. (Bɔf. 28:30, 31) Kɛ́ wɔ hu wɔtsɔ wɔwiemɔ kɛ wɔnifeemɔ nɔ wɔjie mlihilɛ kpo wɔtsɔɔ mɛi lɛ, ekolɛ amɛbaaná anɔkwale lɛ he miishɛɛ. Kɛ́ wɔmli hi yɛ mɛi ni sumɔɔɔ wɔsane lɛ po anɔ lɛ, ekolɛ no baahã amɛtsui he ajɔ, amɛtse amɛhiɛ amɛhã wɔ, loo amɛkɛ wɔ aye jogbaŋŋ fe tsutsu lɛ. (Rom. 12:20) Wɔsɛɛ lɛ, ekolɛ amɛbaakpɛlɛ ni wɔkɛ amɛ akase Biblia lɛ po.

Yɛ Paradeiso lɛ mli lɛ, wɔbaaná hegbɛ wɔjie mlihilɛ kpo wɔtsɔɔ mɛi babaoo ni abaatee amɛ shi lɛ, ni ŋwanejee ko bɛ he akɛ, enɛ baahã amɛná miishɛɛ waa. Yɛ amɛteŋ mɛi komɛi agbɛfaŋ lɛ, ekolɛ enɛ baafee klɛŋklɛŋ be ni ajie mlihilɛ diɛŋtsɛ kpo atsɔɔ amɛ. Miishɛɛ ni amɛbaaná lɛ baatsirɛ amɛ ni amɛ hu amɛjie mlihilɛ kpo amɛtsɔɔ mɛi krokomɛi. Mɛi fɛɛ ni baakpiliŋ amɛtsui akɛ amɛjieŋ mlihilɛ kpo lɛ ehiŋ Paradeiso lɛ mli kɛyaŋ naanɔ. Shi Nyɔŋmɔ baahã mɛi fɛɛ ni baajie suɔmɔ kɛ mlihilɛ kpo amɛtsɔɔ amɛnaanyo gbɔmɔ lɛ ahi shi kɛya naanɔ. (Lala 37:9-11) Nakai beiaŋ lɛ, wɔ fɛɛ wɔbaahi shi shweshweeshwe ni wɔtoiŋ baajɔ wɔ waa diɛŋtsɛ! Shi amrɔ nɛɛ po lɛ, kɛ́ wɔjie mlihilɛ kpo lɛ, wɔnáa he sɛɛ. Yɛ mɛɛ gbɛ nɔ?

Biblia lɛ kɛɔ akɛ: “Mɔ ni mli hi lɛ, lɛ diɛŋtsɛ ebaaná he sɛɛ.” (Abɛi 11:17) Kɛ́ wɔmli hi lɛ, mɛi baasumɔ wɔsane, ni ekolɛ amɛ hu amɛmli baahi yɛ wɔnɔ. Yesu wie akɛ: “Susumɔnɔ ni nyɛkɛsusuɔ nyɛhãa mɛi lɛ, no nɔŋŋ amɛbaaku sɛɛ amɛkɛsusu amɛhã nyɛ.” (Luka 6:38) Kɛ́ wɔmli hi lɛ, ewaŋ kɛhãŋ wɔ akɛ wɔbaaná nanemɛi kpakpai, ni wɔfeŋ nibii ni baafite wɔ kɛ wɔnanemɛi lɛ ateŋ.

Bɔfo Paulo wo Kristofoi ni yɔɔ Efeso lɛ ŋaa akɛ: “Nyɛmli ahia ahãa nyɛhe, nyɛmusuŋ atsɔa nyɛ yɛ nyɛhe, nyɛkɛkea nyɛhe tswaa.” (Efe. 4:32) Kɛ́ mɛi fɛɛ ni yɔɔ asafo lɛ mli lɛ amusuŋ tsɔ amɛ yɛ mɛi krokomɛi ahe, amɛjie mlihilɛ kpo amɛtsɔɔ amɛhe, ni amɛye amɛbua amɛhe lɛ, asafo muu lɛ fɛɛ baaná he sɛɛ. Kristofoi ni jieɔ sui kpakpai nɛɛ akpo lɛ jɛɛɛ mɔ, amɛwieee mɛi ahiɛ nyanyaanya, ni amɛwieee nibii ni yɔɔ dɔlɛ amɛshiii mɛi koni amɛkɛwo mɛi anaa ŋmɔlɔ. Agbɛnɛ hu, amɛyeee mɛi ahe osheku, shi moŋ amɛwieɔ nibii ni shɛjeɔ mɔ mii ni tswaa mɔ emaa shi. (Abɛi 12:18) Kɛ́ mɛi ni tamɔ nakai yɛ asafo ko mli lɛ, asafo lɛ shwereɔ.

Tamɔ bɔ ni wɔna yɛ sane nɛɛ mli lɛ, wɔwiemɔ kɛ wɔnifeemɔ ni baatsɔɔ kɛji wɔmli hi lɛɛlɛŋ. Kɛ́ wɔmli hi lɛ, no tsɔɔ akɛ wɔmiikase Yehowa Nyɔŋmɔ, ejaakɛ emli hi ni efeɔ ejurɔ. (Efe. 5:1) Kɛ́ wɔmli hi lɛ, ebaatswa wɔsafo lɛ ema shi, ni ebaagbala mɛi krokomɛi kɛba anɔkwa jamɔ lɛ he. No hewɔ lɛ, nyɛhãa wɔ fɛɛ wɔjiea mlihilɛ kpo be fɛɛ be!