1, 2. (a) Mɛɛ gbɛ nɔ esoro hiɛnɔkamɔ ni anɔkwa Kristofoi yɔɔ lɛ yɛ hiɛnɔkamɔi ni mɛi pii yɔɔ ŋmɛnɛ lɛ ahe? (b) Mɛɛ sanebimɔi ahe wɔbaasusu?

YEHOWA ehã wɔ fɛɛ hiɛnɔkamɔ ni nɔ bɛ! Ewo mɛi ni afɔ amɛ mu lɛ kɛ “gwantɛŋi krokomɛi” lɛ fɛɛ shi akɛ, ebaatse egbɛ́i lɛ he, ni ebaahã yiŋtoo hewɔ ni ebɔ shikpɔŋ lɛ kɛ adesai lɛ aba mli. (Yoh. 10:16; Mat. 6:9, 10) Nibii enyɔ nɛɛ ji nibii ni wɔhiɛ kã nɔ lɛ ateŋ nɔ ni he hiaa fe fɛɛ. Yɛ enɛɛmɛi asɛɛ lɛ, Nyɔŋmɔ ewo shi akɛ, ebaahã wɔteŋ mɛi komɛi ahi shi kɛya naanɔ yɛ ŋwɛi, ní mɛi komɛi hu ahi shi kɛya naanɔ yɛ shikpɔŋ lɛ nɔ. Wɔkɛ miishɛɛ miikpa jɔɔmɔi nɛɛ hu gbɛ. (2 Pet. 3:13) Shi dani nomɛi baaba po lɛ, wɔhiɛ kã nɔ akɛ ebaaya nɔ etsɔɔ ewebii gbɛ ni eye ebua amɛ.

² Ŋmɛnɛ lɛ, mɛi pii hu yɛ hiɛnɔkamɔi srɔtoi, shi amɛbɛ nɔmimaa yɛ nibii ni amɛhiɛ kã nɔ lɛ ahe. Akɛ nɔkwɛmɔnɔ lɛ, mɛi akpekpei abɔ ni tseɔ loto lɛ kpaa gbɛ akɛ amɛbaaye, tsɛbelɛ, amɛbɛ nɔmimaa ko kwraa yɛ enɛ he. Shi jeee nakai eji yɛ anɔkwa Kristofoi ahiɛnɔkamɔ lɛ gbɛfaŋ. Akɛni wɔyɛ hemɔkɛyeli ni mli wa hewɔ lɛ, ‘wɔkɛ nɔmimaa kwɛɔ nibii ni wɔhiɛ kã nɔ lɛ gbɛ.’ (Heb. 11:1) Yɛ nikasemɔ nɛɛ mli lɛ, wɔbaahã sanebimɔi ni nyiɛ sɛɛ nɛɛ ahetoo: Mɛni ji nibii komɛi ni baanyɛ aye abua wɔ ni wɔhemɔkɛyeli lɛ mli aya nɔ awa? Ni kɛ́ wɔhemɔkɛyeli lɛ mli wa lɛ, mɛɛ gbɛ nɔ wɔbaaná he sɛɛ?

3. Mɛni hewɔ wɔheɔ nibii fɛɛ ni Nyɔŋmɔ ewo he shi lɛ wɔyeɔ lɛ?

 ³ Wɔteŋ mɔ ko mɔ ko bɛ ni akɛ hemɔkɛyeli fɔ lɛ. Dani wɔbaaná hemɔkɛyeli lɛ, esa akɛ wɔhã Nyɔŋmɔ mumɔ krɔŋkrɔŋ lɛ aná wɔtsui nɔ hewalɛ. (Gal. 5:22) Akɛni Yehowa ji Ofe ni husu bɛ ehiɛshikamɔ lɛ he hewɔ lɛ, nɔ ko nɔ ko bɛ ni baanyɛ atsĩ enaa ni ekatsu eyiŋtoi ahe nii. Enɛ hewɔ lɛ, hemɔkɛyeli he ehiaaa lɛ. Yehowa, wɔ-Tsɛ ni yɔɔ ŋwɛi lɛ yɛ nɔmimaa yɛ nibii ni ewo shi lɛ ahe aahu akɛ, yɛ ehiɛ lɛ, etamɔ nɔ ni “amɛba mli” momo. (Kanemɔ Kpojiemɔ 21:3-6.) Yehowa ji “Mawu anɔkwafo,” ni eyeɔ eshiwoi fɛɛ nɔ. Enɛ hewɔ wɔheɔ enɔ wɔyeɔ lɛ.​—5 Mose 7:9.

4. Mɛɛ hiɛnɔkamɔ Nyɔŋmɔ tsuji anɔkwafoi ni hi shi yɛ blema lɛ kwɛ gbɛ?

⁴ Hebribii yitso 11 lɛ gbaa wɔ hii kɛ yei 16 ni hi shi yɛ blema ni he Nyɔŋmɔ nɔ amɛye kɛ amɛtsui fɛɛ lɛ ahe sane. Ewieɔ anɔkwafoi krokomɛi ni ‘aye amɛhe odase kpakpa yɛ amɛhemɔkɛyeli lɛ hewɔ’ lɛ hu ahe. (Heb. 11:39) Anɔkwafoi nɛɛ fɛɛ ‘kɛ nɔmimaa’ kpa be ni “seshi” lɛ baaba ni ebakpãtã Nyɔŋmɔ henyɛlɔi fɛɛ ahiɛ ni ehã shikpɔŋ lɛ atsɔ paradeiso ekoŋŋ lɛ gbɛ. (1 Mose 3:15) Mɛi nɛɛ fɛɛ gboi dani Yesu Kristo, ni ji “seshi” ni awo ehe shi lɛ ba, no hewɔ lɛ, amɛteŋ mɔ ko mɔ ko bɛ ŋwɛi hiɛnɔkamɔ lɛ. (Gal. 3:16) Moŋ lɛ, amɛyɛ hiɛnɔkamɔ akɛ abaatee amɛ shi kɛba shikpɔŋ lɛ nɔ, amɛbaaye emuu, ni amɛbaahi shi kɛya naanɔ yɛ Paradeiso lɛ mli, taakɛ Yehowa ewo shi lɛ pɛpɛɛpɛ.​—Lala 37:11; Yes. 26:19; Hosh. 13:14.

5, 6. Mɛni nɔ Abraham kɛ eweku lɛ kɛ amɛhiɛ fɔ̃? Ni mɛni amɛfee koni amɛhemɔkɛyeli lɛ mli aya nɔ awa? (Kwɛmɔ mfoniri ni yɔɔ nikasemɔ lɛ shishijee lɛ.)

⁵ Hebribii 11:13 lɛ wie yɛ anɔkwafoi nɛɛ ahe akɛ: “Hemɔkɛyeli mli mɛnɛɛmɛi fɛɛ gboi yɛ, tsɛbelɛ amɛnine shɛɛɛ shiwoi lɛ amlibaa lɛ nɔ; shi amɛna nomɛi yɛ shɔŋŋ ni amɛkɛ miishɛɛ kpɛlɛ nɔ.” Mɛi nɛɛ ateŋ mɔ kome ji Abraham. Ani nɔ ko yɛ ni tsɔɔ akɛ Abraham kɛ nɔmimaa kpa be ni shikpɔŋ lɛ baatsɔ Paradeiso lɛ gbɛ? Yesu hã sanebimɔ nɛɛ hetoo be ni ekɛɛ ehenyɛlɔi lɛ akɛ: “Nyɛtsɛ Abraham mii shɛ ehe naakpa yɛ hiɛnɔkamɔ ni ená akɛ ebaana migbi lɛ hewɔ, ni ena ni emii shɛ ehe.” (Yoh. 8:56) Sara, Isak, Yakob, kɛ anɔkwafoi krokomɛi hu kɛ amɛhiɛ fɔ̃ Maŋtsɛyeli lɛ nɔ. Maŋtsɛyeli nɛɛ “ŋaatolɔ kɛ emalɔ ji Nyɔŋmɔ.”​—Heb. 11:8-11.

⁶ Mɛni Abraham kɛ eweku lɛ fee koni amɛhemɔkɛyeli lɛ mli aya nɔ awa? Eeenyɛ efee akɛ, anɔkwafoi ni hi shi yɛ amɛbeiaŋ lɛ gba amɛ Nyɔŋmɔ he sane, loo amɛkane ehe sane yɛ blema niŋmai komɛi amli. Kɛfata he lɛ, Nyɔŋmɔ tsɔ ŋwɛibɔfoi, ninai, kɛ lamɔi anɔ ekɛ amɛ wie. Nɔ ni fe fɛɛ lɛ, amɛhiɛ kpaaa Nyɔŋmɔ shiwoi kɛ gbɛtsɔɔmɔi ni ekɛhã amɛ lɛ anɔ. Moŋ lɛ, amɛtee nɔ amɛjwɛŋ nɔ. Hemɔkɛyeli ni amɛyɔɔ yɛ nibii ni Nyɔŋmɔ ewo he shi lɛ ahe lɛ mli wa aahu akɛ, no waje amɛ ni amɛtee nɔ amɛye Nyɔŋmɔ anɔkwa yɛ kai kɛ naagbai ni amɛkɛkpe lɛ fɛɛ sɛɛ.

7. Mɛɛ nibii Yehowa eduro wɔ koni wɔhemɔkɛyeli lɛ mli awa? Mɛni esa akɛ wɔfee koni wɔná nibii nɛɛ ahe sɛɛ?

⁷ Ŋmɛnɛ lɛ, Yehowa eduro wɔ Biblia lɛ koni no aye abua wɔ ni wɔhemɔkɛyeli lɛ mli awa. Kɛ́ wɔmiitao wɔná miishɛɛ ni wɔtsui anyɔ wɔmli yɛ shihilɛ mli lɛ, esa akɛ wɔkane Biblia lɛ daa gbi, kɛ́ ebaahi. (Lala 1:1-3; kanemɔ Bɔfoi 17:11.) Kɛfata he lɛ, taakɛ Nyɔŋmɔ tsuji ni hi shi yɛ blema lɛ fee lɛ, esa akɛ wɔ hu wɔya nɔ wɔjwɛŋ Nyɔŋmɔ shiwoi lɛ anɔ, ni wɔkɛ egbɛtsɔɔmɔi lɛ atsu nii. Agbɛnɛ hu, Yehowa tsɔɔ “nyɔŋ anɔkwafo kɛ hiɛshikalɔ” lɛ nɔ eduroɔ wɔ niyenii babaoo. (Mat. 24:45) Kɛ́ wɔhe be kɛkase Biblia lɛ kɛ asafo lɛ woji lɛ, ni wɔjwɛŋ  nibii ni wɔkaseɔ lɛ anɔ lɛ, wɔhemɔkɛyeli lɛ mli baawa tamɔ anɔkwafoi ni hi shi yɛ blema lɛ, ni wɔkɛ nɔmimaa baakwɛ Maŋtsɛyeli lɛ gbɛ.

8. Mɛɛ gbɛ nɔ sɔlemɔ baanyɛ ahã wɔhemɔkɛyeli lɛ mli awa?

⁸ Sɔlemɔ hu ji nɔ kome ni ye ebua anɔkwafoi ni hi shi yɛ blema lɛ koni amɛhemɔkɛyeli lɛ mli aya nɔ awa. Amɛsɔle amɛbi Nyɔŋmɔ dɛŋ yelikɛbuamɔ, ni gbɛi srɔtoi ni etsɔ nɔ ehã amɛsɔlemɔi lɛ ahetoo lɛ hã amɛhemɔkɛyeli lɛ mli wa. (Neh. 1:4, 11; Lala 34:5, 16, 18; Dan. 9:19-21) Kɛ́ wɔ hu wɔsɔle wɔbi Yehowa ni eye ebua wɔ lɛ, ebaahã wɔsɔlemɔi lɛ ahetoo. Ni kɛ́ wɔna bɔ ni ehãa wɔsɔlemɔi lɛ ahetoo lɛ, wɔhemɔkɛyeli lɛ mli baawa, ni no baawaje wɔ koni wɔnyɛ wɔkɛ miishɛɛ akpee shihilɛi ni jaraa anaa. (Kanemɔ 1 Yohane 5:14, 15.) Kɛfata he lɛ, esa akɛ ‘wɔya nɔ wɔbi’ Yehowa ni eduro wɔ mumɔ krɔŋkrɔŋ lɛ bɔ ni afee ni wɔhemɔkɛyeli lɛ mli aya nɔ awa.​—Luka 11:9, 13.

9. Mɛni ji nibii komɛi ni esa akɛ wɔtsĩ tã yɛ wɔsɔlemɔi amli?

⁹ Yɛ nibii ni he hiaa wɔ lɛ asɛɛ lɛ, nibii krokomɛi hu yɛ ni esa akɛ wɔtsĩ tã yɛ wɔsɔlemɔi amli. Akɛ nɔkwɛmɔnɔ lɛ, esa akɛ wɔjie Nyɔŋmɔ yi ni wɔda lɛ shi daa gbi, ejaakɛ ‘naakpɛɛ nii ni etsuɔ lɛ fa naakpa.’ (Lala 40:6) Agbɛnɛ hu, esa akɛ ‘wɔkai wɔnyɛmimɛi ni awo amɛ tsuŋ lɛ,’ ni wɔsɔle wɔhã amɛ. Esaaa akɛ wɔhiɛ kpaa ‘mɛi ni nyiɛɔ hiɛ yɛ wɔteŋ’ lɛ kɛ wɔnyɛmimɛi krokomɛi ni yɔɔ jeŋ fɛɛ lɛ anɔ. Kɛ́ wɔna bɔ ni Yehowa hãa wɔsɔlemɔi lɛ ahetoo lɛ, wɔhemɔkɛyeli lɛ mli baawa, ni wekukpaa ni yɔɔ wɔ kɛ lɛ teŋ lɛ hu mli baawa.​—Heb. 13:3, 7.

10. Tsĩi Nyɔŋmɔ tsuji anɔkwafoi komɛi ni fi shi lɛ atã. Mɛni waje amɛ koni amɛhiɛ amɛhemɔkɛyeli lɛ mli?

¹⁰ Yɛ Hebribii yitso 11 lɛ, bɔfo Paulo tsĩ kai srɔtoi ni Nyɔŋmɔ tsuji anɔkwafoi komɛi kɛkpe lɛ atã. Ewie yei anɔkwafoi komɛi ni amɛbii gboi, shi atee amɛ shi lɛ ahe. Kɛkɛ ni etsa nɔ akɛ: “Shi mɛi krokomɛi lɛ, apiŋ amɛ ejaakɛ amɛkpɛlɛɛɛ ni atsɔ kpɔmɔnɔ ko nɔ ajie amɛ, bɔ ni afee ni amɛná gbohiiashitee ni hi fe no.” (Heb. 11:35) Wɔleee mɛi tuuntu ni yɔɔ Paulo jwɛŋmɔ mli be ni ewie sane nɛɛ, shi wɔle akɛ atswia mɛi komɛi tamɔ Nabot kɛ Zakaria tɛi yɛ anɔkwa ni amɛye Nyɔŋmɔ lɛ hewɔ. (1 Maŋ. 21:3, 15; 2 Kron. 24:20, 21) Yɛ gbɛ ko nɔ lɛ, Daniel hu tsɔ ehemɔkɛyeli lɛ nɔ ‘etsimɔ jatai anaa,’ ejaakɛ ekpɛ eyiŋ akɛ ebaasumɔ ni egbo yɛ jatai abu lɛ mli, moŋ fe ni ebaagbo Nyɔŋmɔ nɔ toi. Enanemɛi lɛ hu ‘gbe la hewalɛ,’ ejaakɛ amɛhala akɛ amɛbaabo Yehowa toi, kɛ́ no baahã ashɛ amɛ afɔ̃ la kɛ flɔnɔɔ lɛ mli po. Anɔkwafoi nɛɛ fɛɛ ná nɔmimaa akɛ, Yehowa baahã amɛ emumɔ krɔŋkrɔŋ lɛ, ni ebaaye ebua amɛ ni amɛfi shi.​—Heb. 11:33, 34; Dan. 3:16-18, 20, 28; 6:14, 17, 22-24.

11. Mɛɛ kai gbalɔi lɛ ekomɛi kɛkpe yɛ amɛhemɔkɛyeli lɛ hewɔ?

¹¹ Aye gbalɔi komɛi tamɔ Mikaia kɛ Yeremia he fɛo ni “awo amɛ tsuŋ” yɛ amɛhemɔkɛyeli lɛ hewɔ. Elia kɛ gbalɔi krokomɛi hu tsomlo “yɛ shia ŋai kɛ gɔji anɔ kɛ tɛkploi kɛ shikpɔŋ nɔ bui amli.” Gbalɔi nɛɛ fɛɛ ye anɔkwa, ejaakɛ ‘amɛkɛ nɔmimaa kwɛ amɛhiɛnɔkamɔ lɛ gbɛ.’​—Heb. 11:1, 36-38; 1 Maŋ. 18:13; 22:24-27; Yer. 20:1, 2; 28:10, 11; 32:2.

12. Namɔ ji anɔkwafo ni fe fɛɛ ni esa akɛ wɔkase? Ni mɛni ye ebua lɛ ni enyɛ efi shi lɛ?

¹² Be ni Paulo wie hii kɛ yei anɔkwafoi nɛɛ ahe egbe naa lɛ, ewie wɔ-Nuŋtsɔ Yesu Kristo he. Yesu ji anɔkwafo ni fe fɛɛ ni esa akɛ wɔkase. Paulo wie yɛ Hebribii 12:2 lɛ akɛ: “Miishɛɛ ni kã ehiɛ lɛ hewɔ lɛ, efi shi yɛ piŋmɔ tso nɔ, ni ebuuu hiɛgbele, ni eyata shi yɛ Nyɔŋmɔ maŋtsɛ sɛi lɛ ninejurɔ nɔ.” No hewɔ lɛ, kɛ́ kai ni wɔkɛkpeɔ lɛ  amli wa waa po lɛ, esa akɛ wɔsusu Yesu nɔkwɛmɔnɔ lɛ he jogbaŋŋ. (Kanemɔ Hebribii 12:3.) Kristofoi ni hi shi yɛ klɛŋklɛŋ afii 100 lɛ mli lɛ kase Yesu, ni amɛye anɔkwa kɛtee gbele mli. Amɛteŋ mɔ kome ji Antipa. (Kpoj. 2:13) Yehowa eteŋ anɔkwafoi nɛɛ ashi kɛbaŋ shikpɔŋ lɛ nɔ, taakɛ ebaafee ehã blema anɔkwafoi lɛ, ejaakɛ etee amɛ shi kɛtee ŋwɛi momo. (Heb. 11:35) Be ni awo Yesu Maŋtsɛ yɛ ŋwɛi yɛ afi 1914 lɛ sɛɛ lɛ, atee Kristofoi ni afɔ amɛ mu lɛ ateŋ mɛi ni egboi lɛ ashi kɛtee ŋwɛi koni amɛyafata Yesu he kɛye adesai anɔ.​—Kpoj. 20:4.

13, 14. Mɛɛ naagbai Rudolf Graichen kɛkpe? Ni mɛni ye ebua lɛ ni enyɛ efi shi?

¹³ Yɛ wɔbei nɛɛ amli hu lɛ, Nyɔŋmɔ tsuji akpekpei abɔ ekase Yesu. Anɔkwafoi nɛɛ kɛ nɔmimaa kwɛ amɛhiɛnɔkamɔ lɛ gbɛ, ni no hewɔ lɛ, amɛhãaa kai ni amɛkɛkpe lɛ ahoso amɛhemɔkɛyeli lɛ. Amɛteŋ mɔ kome ji Rudolf Graichen. Afɔ Rudolf yɛ Germany yɛ afi 1925. Egbekɛbiiashi lɛ, efɔlɔi kɛ nibii ni awie he yɛ Biblia lɛ mli lɛ ateŋ ekomɛi ahe mfonirii tsotsoro gbogboi lɛ ahe yɛ amɛshĩa lɛ. Ewie akɛ: “Yɛ mfonirii  lɛ ateŋ ekome mli lɛ, atɛŋ klaŋ kɛ gwantɛŋbi, abotiabi kɛ kootsɛ, kɛ tsinabi kɛ jata ní amɛ fɛɛ amɛyɛ he kome ni gbekɛ nuu fioo ko nyiɛ amɛhiɛ.” (Yes. 11:6-9) Mfonirii nɛɛ ka Rudolf jwɛŋmɔ mli ni amɛhã esusu Paradeiso lɛ he waa. Enɛ waje lɛ ni enyɛ eye Yehowa anɔkwa, eyɛ mli akɛ Nazi nɔyeli lɛ kɛ nɔyeli ni ba yɛ no sɛɛ lɛ fɛɛ wa lɛ yi afii babaoo.

¹⁴ Rudolf kɛ shihilɛi krokomɛi ni jaraa kpe. Emami yaná hela ko ni atsɛɔ lɛ typhus lɛ yɛ Ravensbrück nsara lɛ mli ni egbo. Epapa hu nyɛɛɛ ahiɛ ehemɔkɛyeli lɛ mli kɛyawula shi, ni ekɛ enine wo wolo shishi kɛtsɔɔ akɛ ejeee Yehowa Odasefonyo dɔŋŋ. Be ni aŋmɛɛ Rudolf he lɛ, esɔmɔ akɛ kpokpaa nɔkwɛlɔ, ni sɛɛ mli lɛ, etee Gilead Skul lɛ eko. Be ni egbe skul lɛ naa lɛ, ahã eyasɔmɔ yɛ Chile akɛ kpokpaa nɔkwɛlɔ. Ekɛ maŋsɛɛ sɔɔlɔ ko ni atsɛɔ lɛ Patsy lɛ bote gbalashihilɛ mli, ni yɛ klɛŋklɛŋ afi lɛ mli nɔŋŋ lɛ, amɛfɔ biyoo. Shi amɛbiyoo lɛ náaa afi ni egbo. Sɛɛ mli be ni eŋa lɛ ye afii 43 lɛ, lɛ hu egbo. Rudolf fi shi yɛ naagbai nɛɛ fɛɛ mli, ni be ni ewala shihilɛ he sane lɛ je kpo yɛ August 1, 1997, Buu-Mɔɔ lɛ, baafa 20-25 lɛ mli lɛ, no mli lɛ, eesɔmɔ akɛ daa gbɛgbalɔ kɛ asafoŋ onukpa, tsɛ egbɔ ni ebɛ gbɔmɔtsoŋ hewalɛ. ^[1]

15. Tsĩi nyɛmimɛi komɛi ni kɛ miishɛɛ miisɔmɔ Yehowa yɛ amɛyi ni awaa lɛ fɛɛ sɛɛ lɛ atã.

¹⁵ Ŋmɛnɛ lɛ, aawa wɔnyɛmimɛi lɛ ateŋ mɛi babaoo yi, shi fɛɛ sɛɛ lɛ, amɛkɛ miishɛɛ miisɔmɔ Yehowa. Akɛ nɔkwɛmɔnɔ lɛ, awo nyɛmimɛi ni yɔɔ Eritrea, Singapore, kɛ South Korea lɛ ateŋ mɛi ohai abɔ tsuŋ, ejaakɛ amɛsumɔɔɔ ni ‘amɛgbalaa klante.’ (Mat. 26:52) Nyɛmimɛi nɛɛ ateŋ mɛi etɛ, ni ji Isaac, Negede, kɛ Paulos lɛ ehi tsuŋwoo mli yɛ Eritrea nɔ ni fe afii 20! Enɛ hewɔ lɛ, amɛnyɛko amɛbote gbalashihilɛ mli, ni amɛnyɛɛɛ amɛkwɛ amɛfɔlɔi hu. Yɛ niseniianii ni afeɔ amɛ lɛ fɛɛ sɛɛ lɛ, amɛtee nɔ amɛye Yehowa anɔkwa. Nyɛmimɛi etɛ nɛɛ ahe mfoniri ni yɔɔ jw.org wɛbsaiti lɛ nɔ lɛ hãa wɔnaa akɛ, amɛyɛ miishɛɛ ni amɛhiɛ amɛhemɔkɛyeli lɛ mli kpɛŋŋ. Amrɔ nɛɛ, bulɔi ni yɔɔ tsuŋwoohe lɛ po buɔ amɛ.

16. Kɛ́ oheɔ Nyɔŋmɔ nɔ oyeɔ waa lɛ, mɛɛ gbɛ nɔ ebaanyɛ eye ebua bo ni oya nɔ oye lɛ anɔkwa?

¹⁶ Yehowa tsuji babaoo yɛ ni awoko amɛ tsuŋ, ni asaŋ, afeee amɛ niseniianii taakɛ eji yɛ nyɛmimɛi ni wɔwie amɛhe kɛtsɔ hiɛ lɛ agbɛfaŋ lɛ. Shi amɛ hu amɛkɛ shihilɛi krokomɛi ni kaa amɛhemɔkɛyeli lɛ miikpe. Akɛ nɔkwɛmɔnɔ lɛ, ohia, tai, loo adebɔɔ naa osharai ehã wɔnyɛmimɛi lɛ ateŋ mɛi babaoo miina nɔ. Mɛi komɛi hu eshi heloonaa nibii kɛ ogbɔjɔ shihilɛ ni kulɛ amɛyɔɔ mli lɛ, ni amɛkɛ amɛjwɛŋmɔ ema Yehowa sɔɔmɔ lɛ nɔ, taakɛ Abraham, Isak, Yakob, kɛ Mose fee lɛ. Nyɛmimɛi nɛɛ fɛɛ kɛ miishɛɛ miisɔmɔ Yehowa ejaakɛ amɛsumɔɔ lɛ, ni amɛheɔ enɔ amɛyeɔ waa. Amɛle akɛ ebaafo efɔŋfeemɔ fɛɛ sɛɛ, ni ebaahã etsuji anɔkwafoi lɛ ahi shi kɛya naanɔ yɛ jalɛ jeŋ hee lɛ mli, taakɛ ewo shi lɛ.​—Kanemɔ Lala 37:5, 7, 9, 29.

17. Mɛni otswa ofai shi akɛ obaafee koni ohemɔkɛyeli lɛ mli awa? Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁷ Yɛ nikasemɔ nɛɛ mli lɛ, wɔna akɛ, kɛ́ wɔjwɛŋ nibii ni Yehowa ewo he shi lɛ anɔ, ni wɔsɔle daa lɛ, wɔhemɔkɛyeli lɛ mli baawa. Kɛ́ wɔhemɔkɛyeli lɛ mli wa lɛ, wɔkɛ ‘nɔmimaa baakwɛ nibii ni wɔhiɛ kã nɔ lɛ gbɛ,’ ni wɔbaaya nɔ wɔfi shi yɛ kai amli. Yɛ nikasemɔ ni nyiɛ sɛɛ lɛ mli lɛ, wɔbaana nibii krokomɛi ni esa akɛ wɔfee kɛtsɔɔ akɛ wɔyɛ hemɔkɛyeli.