Nɔ Hewɔ Ni Esa Akɛ Onu Nɔ Ni Okaneɔ Lɛ Shishi Jogbaŋŋ
Gbekɛ yoo fioo ko na ni lasu kpii ni tamɔ atatu miifã kɛmiijɛ nitsumɔhe ko mli kɛmiiya ŋwɛi. Kɛkɛ ni emu sane naa akɛ, nɔ ni nitsumɔhe lɛ feɔ ji atatu. Gbekɛ nɛɛ susumɔ lɛ yɛ ŋmɔlɔ waa. Kɛ̃lɛ, kɛ́ wɔnuuu nɔ ko ni he hiaa waa shishi lɛ, ebaanyɛ esa wɔshihilɛ he. Akɛ nɔkwɛmɔnɔ lɛ, kɛ́ wɔkaneee ni wɔbaanu gbɛtsɔɔmɔi ni kɔɔ tsofa ko he lɛ shishi jogbaŋŋ lɛ, ebaanyɛ ekɛ wɔwala awo ashara mli.
Shi kɛ́ wɔyanuuu nibii ni kɔɔ Nyɔŋmɔ he lɛ shishi jogbaŋŋ lɛ, ebaanyɛ efee oshara kwraa po fe nakai. Akɛ nɔkwɛmɔnɔ lɛ, mɛi komɛi yanu Yesu tsɔɔmɔi lɛ ashishi yɛ gbɛ ni ejaaa nɔ. (Yohane 6:48-68) Yɛ nɔ najiaŋ ni amɛbaahã Yesu atsɔɔ amɛ nii babaoo lɛ, amɛkpoo nibii fɛɛ ni etsɔɔ lɛ moŋ. Enɛ hã nibii babaoo ŋmɛɛ amɛ!
Ani okaneɔ Biblia lɛ kɛhã gbɛtsɔɔmɔ? Belɛ, osa yijiemɔ waa. Shi ani ebaanyɛ eba akɛ obaakane nɔ ko ni obaanu shishi yɛ gbɛ ni ejaaa nɔ? Ebaa lɛ nakai yɛ mɛi pii agbɛfaŋ. Susumɔ nibii etɛ komɛi ni mɛi nuɔ shishi yɛ gbɛ ni ejaaa nɔ lɛ ahe okwɛ.
-
Mɛi komɛi nuɔ fãmɔ ni Biblia lɛ kɛhã akɛ, “she Nyɔŋmɔ gbeyei” lɛ shishi yɛ gbɛ ni ejaaa nɔ. Amɛsusuɔ akɛ aatsɔɔ akɛ ashe Nyɔŋmɔ gbeyei tamɔ asheɔ kooloo ko gbeyei lɛ. (Jajelɔ 12:13) Shi Nyɔŋmɔ sumɔɔɔ ni mɛi ni jáa lɛ lɛ sheɔ lɛ gbeyei yɛ nakai gbɛ nɔ. Ekɛɔ akɛ: “Kaashe gbeyei, shi mi, mikɛo yɔɔ! Kaakwɛkwɛɛ ohe, shi mi ji o-Nyɔŋmɔ lɛ! Mawajeo, ni maye mabuao.” (Yesaia 41:10) Nyɔŋmɔ gbeyeishemɔ tsɔɔ hiɛsɔɔ kɛ bulɛ ni mli kwɔ ni wɔɔná wɔhã lɛ.
-
Ani akɛ la baashã shikpɔŋ lɛ?
“Nɔ fɛɛ nɔ yɛ ebe ní ato, . . . fɔmɔ be yɛ, ni gbele be hu yɛ.” Mɛi komɛi nuɔ wiemɔ ni ajɛ mumɔŋ aŋma nɛɛ shishi yɛ gbɛ ni ejaaa nɔ. Amɛmuɔ sane naa akɛ, Nyɔŋmɔ eto be tuuntu ni mɔ fɛɛ mɔ kɛbaagbo. (Jajelɔ 3:1, 2) Shi ŋmalɛ nɛɛ miiwie bɔ ni adesa wala shihilɛ ji hã lɛ he, ni eetsɔɔ akɛ, gbele ji nɔ ni muɔ nɔ fɛɛ nɔ naa. Nyɔŋmɔ Wiemɔ lɛ hu tsɔɔ akɛ, wɔ diɛŋtsɛ wɔyiŋkpɛi baanyɛ asa wɔwala he. Akɛ nɔkwɛmɔnɔ lɛ, Biblia lɛ kɛɔ akɛ: “Yehowa gbeyeishemɔ hãa gbii asɛɛ tsɛɔ.” (Abɛi 10:27; Lala 90:10; Yesaia 55:3) Yɛ mɛɛ gbɛ nɔ? Kɛ́ wɔyɛ bulɛ kɛhã Nyɔŋmɔ Wiemɔ lɛ, ebaatsirɛ wɔ ni wɔtsi wɔhe kɛje nifeemɔi ni esaaa, tamɔ dãatɔɔ kɛ jeŋba sha he.—1 Korintobii 6:9, 10.
-
Mɛi komɛi ŋɔɔ nɔ ni Biblia lɛ kɛɔ akɛ, akɛ ŋwɛi kɛ shikpɔŋ lɛ ‘eto ehã la’ lɛ akɛ nakai eji diɛŋtsɛ, ni amɛmuɔ sane naa akɛ, Nyɔŋmɔ baakpãtã wɔshikpɔŋ lɛ hiɛ. (2 Petro 3:7) Shi Nyɔŋmɔ ewo shi akɛ, ehaŋ akpãtã wɔshikpɔŋ lɛ hiɛ kɔkɔɔkɔ. Nyɔŋmɔ eŋɔ “shikpɔŋ lɛ oto eshishitoo nii lɛ anɔ, koni ekahoso gbi ko gbi ko.” (Lala 104:5; Yesaia 45:18) Shihilɛ gbɛjianɔtoo ni ekpɔtɔ nɛɛ ji nɔ ni abaakpãtã hiɛ kwraa, tamɔ nɔ ni akɛ la eshã lɛ, shi jeee wɔshikpɔŋ lɛ diɛŋtsɛ. Shi kɛ́ aawie ŋwɛi he lɛ, ebaanyɛ etsɔɔ atatu lɛ, ŋulamii ni yɔɔ ŋwɛi lɛ, loo Nyɔŋmɔ shihilɛhe. Akpataŋ nibii nɛɛ eko kwraa hiɛ.
MƐNI HEWƆ BEI KOMƐI LƐ MƐI NUƆ BIBLIA LƐ SHISHI YƐ GBƐ NI EJAAA NƆ LƐ?
Taakɛ ona yɛ nɔkwɛmɔnii nɛɛ amli lɛ, bei pii lɛ mɛi nuɔ nibii komɛi ni amɛkaneɔ yɛ Biblia lɛ mli lɛ shishi yɛ gbɛ ni ejaaa nɔ. Shi mɛni hewɔ Nyɔŋmɔ hãa ebaa lɛ nakai? Ekolɛ mɛi komɛi baasusu akɛ: ‘Kɛji Nyɔŋmɔ le nii fe mɔ fɛɛ mɔ, ni ele nɔ fɛɛ nɔ hu lɛ, kulɛ ebaanyɛ ehã wɔ wolo ko ni aŋma lɛ jogbaŋŋ ni mɔ fɛɛ mɔ baanyɛ enu shishi. Shi mɛni hewɔ efeee nakai lɛ?’ Susumɔ yiŋtoi etɛi komɛi ahewɔ ni bei pii lɛ mɛi nuɔ Biblia lɛ shishi yɛ gbɛ ni ejaaa nɔ lɛ he okwɛ.
-
Ato Biblia lɛ he gbɛjianɔ koni mɛi ni baa amɛhe shi kɛ mɛi ni miisumɔ ni amɛkase nii Luka 10:21) Aŋma Biblia lɛ bɔ ni mɛi ni hiɛ jwɛŋmɔ ni ja lɛ pɛ baanyɛ anu emli sane lɛ shishi. Bei pii lɛ, mɛi ni woɔ amɛhe nɔ lɛ nuɔ Biblia lɛ shishi yɛ gbɛ ni ejaaa nɔ, ni anaa henɔwomɔ su nɛɛ yɛ mɛi ni ji “hiɛshikalɔi kɛ nilelɔi” ahe titri. Shi kɛ́ mɛi ni kaneɔ Biblia lɛ fee amɛnii tamɔ “gbekɛbii bibii”—ni ji mɛi ni baa amɛhe shi kɛ mɛi ni miisumɔ ni amɛkase nii lɛ—amɛnuɔ Nyɔŋmɔ sane lɛ shishi yɛ gbɛ ni ja nɔ. Kwɛ bɔ ni Nyɔŋmɔ eto Biblia lɛ he gbɛjianɔ jogbaŋŋ!
lɛ anu shishi. Yesu kɛɛ e-Tsɛ akɛ: “Miijie oyi yɛ faŋŋ, Ataa, ŋwɛi kɛ shikpɔŋ Nuŋtsɔ, ejaakɛ oŋɔ nibii nɛɛ otee hiɛshikalɔi kɛ nilelɔi jogbaŋŋ, ni ojie amɛ kpo otsɔɔ gbekɛbii bibii.” ( -
Aŋma Biblia lɛ bɔ ni mɛi ni miisumɔ ni Nyɔŋmɔ aye abua amɛ lɛɛlɛŋ lɛ baanu shishi. Yesu hã ana akɛ, ebaabi ni aye abua mɛi koni amɛnu nɔ ni etsɔɔ lɛ shishi jogbaŋŋ. Te abaafee tɛŋŋ aye abua amɛ lɛ? Yesu tsɔɔ mli akɛ: “Yelikɛbualɔ lɛ, mumɔ krɔŋkrɔŋ lɛ, ni Tsɛ lɛ baatsu yɛ migbɛ́i mli lɛ, lɛ ebaatsɔɔ nyɛ nibii fɛɛ.” (Yohane 14:26) No hewɔ lɛ, Nyɔŋmɔ kɛ emumɔ krɔŋkrɔŋ lɛ—ni ji ehewalɛ kpele ni miitsu nii lɛ—hãa koni eye ebua mɛi ni amɛnu nɔ ni amɛkaneɔ yɛ Biblia lɛ mli lɛ shishi. Shi Nyɔŋmɔ kɛ emumɔ lɛ hãaa mɛi ni kɛ amɛhiɛ efɔ̃ɔɔ enɔ kɛhã yelikɛbuamɔ lɛ, hewɔ lɛ bei pii lɛ amɛnuuu Biblia lɛ shishi. Mumɔ krɔŋkrɔŋ lɛ tsirɛɔ Kristofoi ni le Biblia lɛ mli jogbaŋŋ lɛ koni amɛyaye amɛbua mɛi ni miitao amɛnu Biblia lɛ shishi lɛ.—Bɔfoi 8:26-35.
-
Adesai baanyɛ anu Biblia mli saji lɛ ekomɛi ashishi yɛ be ni sa mli pɛ. Akɛ nɔkwɛmɔnɔ lɛ, akɛɛ gbalɔ Daniel ni eŋma sane ko efɔ̃ shi kɛhã wɔsɛɛ. Ŋwɛibɔfo ko kɛɛ lɛ akɛ: ‘Daniel, tsiimɔ wiemɔi nɛɛ anɔ, ní osɔo wolo nɛɛ naa kɛyashi naagbee be lɛ.’ Afii ohai komɛi asɛɛ lɛ, mɛi babaoo kane Daniel wolo ni yɔɔ Biblia lɛ mli lɛ, shi amɛnuuu shishi jogbaŋŋ. Anɔkwa, Daniel diɛŋtsɛ hu po nuuu nibii komɛi ni eŋmala lɛ ashishi. Ejɛ heshibaa mli ewie akɛ: “Minu, shi minaaa shishi.” Sɛɛ mli lɛ, mɛi baanu gbalɛ ni Nyɔŋmɔ hã Daniel ŋma efɔ̃ shi lɛ shishi jogbaŋŋ, shi yɛ be pɔtɛɛ ni Nyɔŋmɔ eto lɛ mli. Ŋwɛibɔfo lɛ wie akɛ: “Yaa, Daniel! ejaakɛ atsĩmɔ wiemɔi lɛ anɔ, ni asɔo naa kɛyashi naagbee be lɛ.” Namɛi baanu Nyɔŋmɔ sane lɛ shishi? “Mɛi fɔji lɛ ateŋ mɔ ko mɔ ko enaŋ shishi; shi mɛi ní le nii lɛ aaana shishi.” (Daniel 12:4, 8-10) No hewɔ lɛ, Nyɔŋmɔ hãaa anu Biblia mli saji komɛi ashishi amrɔ nɔŋŋ, moŋ lɛ emɛɔ kɛyashiɔ be ni sa mli dani ehãa anuɔ shishi.
Ani Yehowa Odasefoi lɛ enu Biblia lɛ shishi yɛ gbɛ ni ejaaa nɔ dã? Hɛɛ. Shi be ni be ni Nyɔŋmɔ eto akɛ ebaahã anu nibii ashishi lɛ shɛ lɛ, Odasefoi lɛ fee tsakemɔi oya nɔŋŋ yɛ amɛsusumɔi lɛ ahe. Amɛheɔ amɛyeɔ akɛ amɛmiikase Kristo bɔfoi lɛ, ni jɛɔ heshibaa mli amɛtsakeɔ amɛsusumɔ be fɛɛ be ni Yesu baajaje amɛ lɛ.—Bɔfoi 1:6, 7.
Ekolɛ nɔ ni gbekɛ yoo fioo lɛ susu yɛ he ni lasu lɛ jɛɔ kɛbaa lɛ he lɛ yɛ ŋmɔlɔ, ni eji nɔ ko ni eyanuuu shishi. Shi nɔ ni Biblia lɛ tsɔɔ lɛ ji nɔ ko ni he yɔɔ sɛɛnamɔ waa kɛhã bo. Biblia mli sane lɛ he miihia aahu akɛ, esaaa akɛ mɔ ko susuɔ akɛ ekome pɛ ebaanyɛ ekane ni enu shishi jogbaŋŋ. No hewɔ lɛ, bi ni aye abua bo ni onu nɔ ni okaneɔ lɛ shishi jogbaŋŋ. Taomɔ mɛi ni jɛɔ heshibaa mli amɛkaseɔ Biblia lɛ, ni hãa Nyɔŋmɔ mumɔ krɔŋkrɔŋ lɛ yeɔ ebuaa amɛ koni amɛnu Biblia lɛ shishi, ni amɛna faŋŋ akɛ, wɔyɛ be ni Nyɔŋmɔ miisumɔ ni wɔnu Biblia lɛ shishi fe bei fɛɛ ni eho lɛ mli lɛ asɛɛgbɛ. Kaashashao shi akɛ okɛ Yehowa Odasefoi lɛ baagba sane loo ni ookane amɛwoji ni yɔɔ jw.org wɛbsaiti lɛ nɔ ní atao nii amli jogbaŋŋ dani aŋmala lɛ. Biblia lɛ ewo shi akɛ: ‘Kɛ́ obolɔ otsɛ́ saneshishinumɔ lɛ, oooná Nyɔŋmɔ he nilee.’—Abɛi 2:3-5.