Delphine ni wɔtsĩ etã yɛ sane ni tsɔ hiɛ lɛ mli lɛ na akɛ, enaagbai lɛ hã ebɔi dãanumɔ waa. Biblia lɛ ekɛɛɛ akɛ akanu dãa kwraa, shi ekɛɔ akɛ: “Okɛ ohe akafutu mɛi ni nuɔ wain babaoo.” (Abɛi 23:20) Helai ni naa wala mɔmɔɔ mɛi ni nuɔ dãa bɔ ni esaaa lɛ, amɛ kɛ mɛi ateŋ fiteɔ, ni amɛteŋ mɛi akpekpei abɔ gboiɔ kpatu daa afi. Kɛ́ mɛi kɛ Biblia mli ŋaawoo ni nilee yɔɔ mli lɛ tsu nii lɛ, amɛbaanyɛ amɛtsi amɛhe kɛje naagbai nɛɛ pii ahe.

Delphine fee nakai. Ewie akɛ: “Mina akɛ dãa lɛ tsuuu minaagbai lɛ ahe nii. Mikɛ ŋaawoo ni yɔɔ Filipibii 4:6, 7 lɛ tsu nii, jɛmɛ kɛɔ akɛ: ‘Nyɛkayea nyɛtsui yɛ nɔ ko nɔ ko he, shi moŋ . . . nyɛhãa Nyɔŋmɔ alea nyɛnibimɔi lɛ.’ Daa gbɛkɛ kɛ́ mijwɛŋmɔ bɔi shikpaa ni mibɔi mitsui yeli lɛ, misɔleɔ waa mihãa Yehowa. Migbaa lɛ bɔ ni minuɔ he mihãa lɛ fɛɛ, mlifu jio, dɔlɛ jio, haomɔ jio, ni mikpaa lɛ fai ni ewa mi ni mana nibii ni manyɛ mafee koni maná jwɛŋmɔ ni ja yɛ minaagbai lɛ ahe. Kɛ́ je tsɛre lɛ, mibɔɔ mɔdɛŋ akɛ majie mijwɛŋmɔ kɛje minaagbai lɛ fɛɛ anɔ. Sɔlemɔ ye ebua mi ni mikɛ mijwɛŋmɔ ma nibii ni miyɔɔ lɛ anɔ moŋ fe nibii ni eŋmɛɛ mi lɛ. Be ni mikpa dãa lɛ numɔ lɛ, mitoiŋ jɔ mi waa. No hewɔ lɛ, mikpɛ miyiŋ akɛ minuŋ dãa dɔŋŋ, ejaakɛ misumɔɔɔ ni nɔ ko nɔ ko fiteɔ toiŋjɔlɛ nɛɛ.”

Nibii ni hãa mɛi haoɔ waa ni amɛshihilɛ feɔ basaa lɛ ateŋ ekome ji, jeŋba sha. Shi kɛ́ wɔkɛ Biblia mli  shishitoo mlai tsu nii lɛ, wɔbaatsi wɔhe kɛje nibii ni hãa mɛi kɛ amɛhe woɔ jeŋba sha mli lɛ ahe, ni enɛ baahã wɔye wɔhe kɛjɛ naagbai nɛɛ ahe. Nibii ni hãa mɛi kɛ amɛhe woɔ jeŋba sha mli lɛ ateŋ ekomɛi ji, ni mɔ ko baafee enii tamɔ eyɛ mɔ kroko he suɔmɔ, tsɛbelɛ gbalashihilɛ bɛ ejwɛŋmɔ mli, kɛ ponografi kwɛmɔ. Oblanyo ko ni atsɛɔ lɛ Samuel lɛ wie akɛ: “No mli lɛ, ewaaa hãaa mi akɛ mafee nibii ni baahã yei ana akɛ misumɔɔ amɛ.” Ekɛfata he akɛ: “Bei komɛi lɛ, jeee akɛ miisumɔ mɔ lɛ, shi minaa akɛ mɔ lɛ ni sumɔɔ mi, no hewɔ lɛ, mifeɔ nibii ni baahã esusu akɛ mi hu misumɔɔ lɛ.” Samuel na akɛ esubaŋ lɛ hewɔ lɛ, bei pii lɛ, kɛ́ efeko ejwɛŋmɔ akɛ ebaafee nibii ni baahã mɛi ana akɛ esumɔɔ amɛ po lɛ, mɛi wieɔ akɛ efee nakai. No hewɔ lɛ, agbɛnɛ lɛ, ekpɛ eyiŋ akɛ ebaaje gbɛ efee koni mɛi awie. Shi esubaŋ gbonyo lɛ gba lɛ diɛŋtsɛ enaa. Ewie akɛ: “Eji su ko ni yeɔ awui, ejaakɛ ehãa mɔ susuɔ lɛ pɛ ehe.”

Samuel kane sane ko ni aŋma ahã oblahii kɛ oblayei ni yɔɔ jw.org wɛbsaiti lɛ nɔ lɛ. Ni esusu sane ni yɔɔ Abɛi 20:11 lɛ he, jɛmɛ kɛɔ akɛ: “Gbekɛ [loo “gbekɛ nuu,” shishigbɛ niŋmaa] po, enifeemɔi akɛyoɔ lɛ, akɛ ejeŋba he tse, ni efeɔ nɔ ni ja lo.” Mɛɛ gbɛ nɔ ŋmalɛ nɛɛ ye ebua lɛ? Samuel na akɛ nɔ ni efeɔ lɛ he tseee, ni ejaaa hu. Ewie akɛ: “Mibana akɛ, kɛ́ oblanyo loo oblayoo ko feɔ nakai lɛ, belɛ eekase sui gbohii, ni sui nɛɛ hãŋ efee wu loo ŋa kpakpa wɔsɛɛ. Mibi mihe akɛ, kɛ́ yoo ni mikɛbaahi shi wɔsɛɛ lɛ na akɛ miifee nibii ni tsɔɔ akɛ misumɔɔ mɛi krokomɛi lɛ, te ebaanu he ehã tɛŋŋ? Enɛ hã mina akɛ su nɛɛ yeɔ awui waa. Kɛ́ efeemɔ waaa lɛ, no etsɔɔɔ akɛ eja.” Samuel tsake esubaŋ lɛ. Enɛ wa lɛ ni etsi ehe kɛje jeŋba sha hu he.

Nuu ko ni atsɛɔ lɛ Antonio lɛ hu kɛ ehe wo shihilɛ ko ni yɔɔ hiɛdɔɔ mli. No mli lɛ, ponografi kwɛmɔ eka ehe, ni kulɛ ewaaa kwraa akɛ ekɛ ehe baawo jeŋba sha mli. Eyɛ mli akɛ eyɛ ŋa ni esumɔɔ lɛ waa moŋ, shi ewa hã lɛ akɛ ebaakpa ponografi kwɛmɔ. Ewie akɛ, esusu 1 Petro 5:8 lɛ he, ni no ye ebua lɛ waa. Ŋmalɛ nɛɛ kɛɔ akɛ: “Nyɛhiɛ ahia nyɛhe nɔ be fɛɛ be, nyɛkwɛa nyɛhe nɔ jogbaŋŋ! Nyɛhenyɛlɔ, Abonsam lɛ, nyiɛ tamɔ jata ni miihũu, ni eetao mɔ ko emi.” Antonio wie akɛ: “Ponografi mfonirii ebu yɛ je lɛŋ, ni mfonirii nɛɛ baanyɛ aka wɔjwɛŋmɔŋ. Ŋmalɛ nɛɛ ye ebua mi waa ni misusu mɔ ni hɔ nibii gbohii nɛɛ asɛɛ lɛ he. Mina akɛ, be fɛɛ be ni mana mfonirii gbohii nɛɛ eko lɛ, ehe baahia ni makai mihe amrɔ nɔŋŋ akɛ, mɔ fɔŋ lɛ ji mɔ ni hɔ sɛɛ. Amrɔ nɛɛ, mile akɛ Yehowa pɛ ji mɔ ni baanyɛ aye abua mi ni ‘mihiɛ ahi mihe nɔ be fɛɛ be, ní makwɛ mihe nɔ jogbaŋŋ,’ koni nibii gbohii nɛɛ akaná mijwɛŋmɔ, mitsui, kɛ migbalashihilɛ lɛ nɔ hewalɛ.” Aye abua Antonio, ni amrɔ nɛɛ, ekpa ponografi kwɛmɔ. Enɛ ehã eye ehe kɛjɛ naagbai wuji ahe.

Eyɛ faŋŋ akɛ, Biblia lɛ baanyɛ aye abua wɔ ni wɔtsi wɔhe kɛje naagbai ni yɔɔ hiɛdɔɔ ahe. Shi kɛ́ naagba lɛ ehe shi momo, ni wɔfee he eko aahu shi ehiii hu? Nyɛhãa wɔkwɛa bɔ ni Nyɔŋmɔ Wiemɔ lɛ baanyɛ aye abua wɔ ni wɔtsu naagbai ni tamɔ nakai lɛ hu ahe nii.