María, Raúl, Arne, kɛ mɛi babaoo naa sɔlemɔ akɛ nikeenii ko ni nɔ bɛ. Amɛnuɔ he akɛ sɔlemɔ hãa amɛnyɛɔ amɛkɛ Nyɔŋmɔ wieɔ, amɛdaa lɛ shi, ni amɛbiɔ lɛ ni eye ebua amɛ. Amɛheɔ amɛyeɔ waa akɛ, nɔ ni Biblia lɛ ewie yɛ sɔlemɔ ni asɔleɔ ahãa Nyɔŋmɔ lɛ he lɛ ji anɔkwale. Biblia lɛ kɛɛ: “Enɛ ji ekãa ni wɔyɔɔ yɛ ehiɛ lɛ, akɛ nɔ fɛɛ nɔ ni wɔbiɔ ni kɛ esuɔmɔnaa nii kpãa gbee lɛ, eboɔ wɔ toi.”​—1 Yohane 5:14.

Shi mɛi pii hu heee nɔ ni Biblia lɛ wieɔ yɛ sɔlemɔ he lɛ amɛyeee. Steve tsɔɔ nɔ hewɔ ni enyaaa sɔlemɔ he lɛ mli akɛ: “Be ni miye afii 17 lɛ, minanemɛi lɛ ateŋ mɛi etɛ gboi yɛ oshãrai srɔtoi enyɔ amli. Mɔ kome kɛ lɔle yaná oshãra, ni ŋshɔ sha mɛi enyɔ.” Mɛni Steve fee? Ewie akɛ:“Misɔle  mihã Nyɔŋmɔ ni etsɔɔ mi nɔ hewɔ ni oshãrai nɛɛ fɛɛ ba lɛ, shi mináaa hetoo ko. No hewɔ lɛ, mibi mihe akɛ, ‘Mɛni hewɔ migbaa mihe naa misɔleɔ?’” Mɛi pii nuɔ he akɛ ahãaa amɛsɔlemɔi lɛ hetoo, ni no hewɔ lɛ, esaaa ni amɛgbaa amɛhe naa amɛsɔleɔ.

Mɛi komɛi hu lɛ, jeee amɛsɔlemɔi ahetoo ni ahãaa lɛ hewɔ ni amɛnuɔ he akɛ esaaa ni amɛgbaa amɛhe naa amɛsɔleɔ lɛ. Amɛkɛɔ akɛ Nyɔŋmɔ le nɔ fɛɛ nɔ, ni no hewɔ lɛ, ele amɛhiamɔ nii loo amɛnaagbai lɛ fɛɛ momo, hewɔ lɛ, ehe ehiaaa ni amɛkɛɔ lɛ nibii nɛɛ.

Mɛi krokomɛi hu nuɔ he akɛ, tɔmɔi ni amɛtɔ̃ be ko ni eho lɛ hewɔ lɛ, Nyɔŋmɔ booo amɛ toi. Jenny wie akɛ: “Nɔ ni haoɔ mi waa ji akɛ, minuɔ he akɛ misaaa kwraa. Be ko ni eho lɛ, mifee nibii gbohii komɛi, hewɔ lɛ, mikɛɔ mihe akɛ misaaa mɔ ni Nyɔŋmɔ boɔ lɛ toi.”

Te onaa sɔlemɔ tɛŋŋ? Kɛ́ onuɔ he akɛ sɛɛnamɔ bɛ sɔlemɔ he, osaaa mɔ ni sɔleɔ, loo oyiŋ etɛ̃ɛɛ bo yɛ he lɛ, tsɛ otsui oŋmɛ omli, ejaakɛ Biblia lɛ baanyɛ ahã saji ni obiɔ yɛ he lɛ hetoi ni ja. Obaanyɛ ohe nɔ ni Biblia lɛ wieɔ yɛ sɔlemɔ he lɛ oye; * ebaanyɛ eye ebua bo ni oná sanebimɔi ni nyiɛ sɛɛ nɛɛ ahetoo:

• Ani Nyɔŋmɔ boɔ wɔsɔlemɔi toi lɛɛlɛŋ?

• Mɛni hewɔ ahãaa sɔlemɔi komɛi hetoo lɛ?

• Mɛɛ gbɛ nɔ obaanyɛ osɔle ni Nyɔŋmɔ abo bo toi?

• Mɛɛ sɛɛnamɔ yɔɔ sɔlemɔ he?