BƆ NI WƆƆFEE WƆYE HETSƐ̃ NƆ
2 | Kaatɔ Owele
Biblia Mli Tsɔɔmɔ:
“Nyɛkɛ efɔŋ akatoa mɔ ko mɔ ko efɔŋ najiaŋ. . . . Kɛ́ ebaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ. . . . Nyɛkatɔa nyɛ diɛŋtsɛ nyɛhe owele, . . . ejaakɛ aŋma akɛ: ‘“Minɔ ji oweletɔɔ lɛ; mi mato najiaŋ,” Yehowa kɛɛ.’”—ROMABII 12:17-19.
Nɔ Ni Etsɔɔ:
Kɛ́ mɔ ko fee wɔ efɔŋ lɛ, ejeee tɔmɔ akɛ wɔmli baafu, shi Nyɔŋmɔ sumɔɔɔ ni wɔtɔɔ owele. Eesumɔ ni wɔto wɔtsui shi moŋ, ni wɔshi sane lɛ fɛɛ wɔhã lɛ, ejaakɛ etsɛŋ, ebaajie wɔnaagbai lɛ fɛɛ kɛya.—Lala 37:7, 10.
Nɔ Ni Obaanyɛ Ofee:
Akɛni adesai yeee emuu hewɔ lɛ, kɛ́ amɛtɔ owele lɛ, eyatsɛɔ hetsɛ̃ kɛbaa. No hewɔ lɛ, kɛ́ mɔ ko fee bo efɔŋ ko lɛ, kaatɔ owele. Bɔɔ mɔdɛŋ ni oye ohe nɔ, ni obaa toiŋjɔlɛ yi. Bei komɛi lɛ, ebaahi waa akɛ obaaŋmɛɛ sane lɛ he kwraa. (Abɛi 19:11) Bei komɛi hu lɛ, ebaahi akɛ obaafee nɔ ko yɛ sane lɛ he. Akɛ nɔkwɛmɔnɔ lɛ, kɛ́ mɔ ko fee bo nɔ ko ni teɔ shi ewoɔ maŋ lɛ mla lɛ, obaanyɛ owó polisifoi lɛ loo amralofoi krokomɛi atoi nɔ.
Oweletɔɔ hãa mɔ yeɔ lɛ diɛŋtsɛ ehe awui
Ni kɛ́ etamɔ nɔ ni onyɛŋ otsu sane lɛ he nii bɔ ni kɛ toiŋjɔlɛ baaba hu? Aloo ekolɛ ofee bɔ fɛɛ bɔ ni obaanyɛ koni otsu he nii bɔ ni kɛ toiŋjɔlɛ baaba, shi ehiii hu? Loloolo lɛ, kaatɔ owele. Kɛ́ otɔ owele lɛ, obaafite sane lɛ kwraa. Kɛ́ otɔɔɔ owele lɛ, no baahã oye hetsɛ̃ nɔ. Hemɔ oye waa akɛ, Nyɔŋmɔ baatsu sane lɛ he nii jogbaŋŋ. “Okɛ ohiɛ afɔ̃ enɔ, ni ebaatsu nibii ahe nii ehã bo.”—Lala 37:3-5.
Ekolɛ Obaasumɔ Enɛ Hu
BIBLIA LƐ TSAKEƆ MƐI
Mikɛɛ Mahã Mɛi Diji Kɛ Mɛi Yɛji Afee Ekome Kɛhi Shi
Rafika kɛ ehe yadɔmɔ maŋkwramɔ kuu ko koni amɛwu amɛshi jalɛsane ni ayeee. Shi ebana akɛ Biblia lɛ ewo shi akɛ Nyɔŋmɔ Maŋtsɛyeli lɛ baahã toiŋjɔlɛ aba, ni aye jalɛsane hu.
