Kɛ́ okɛɛ dabi po lɛ, ekolɛ ona ni aafee mɔ ko nakai pɛŋ. Bei pii lɛ, wɔnuɔ ni afee mɔ ko niseniianii akɛni ejɛ maŋ kroko nɔ, esoro ehewolonɔ su, loo akɛni eji nuu ni kɛ nuu náa bɔlɛ, loo yoo ni kɛ yoo náa bɔlɛ lɛ hewɔ. Enɛ hewɔ lɛ, amralofoi pii miiwo mlai ni baahã agbala mɛi ni he tsɛ̃ɔ mɛi lɛ atoi.

Hetsɛ̃ tsɛɔ hetsɛ̃ kɛbaa. Bei pii lɛ, mɛi ni afeɔ amɛ nɔ ko kɛtsɔɔ akɛ he miitsɛ̃ amɛ lɛ hu tɔɔ owele, ni mɛi ni amɛtɔ amɛnɔ owele lɛ hu feɔ mɛi nɔ ko kɛtseɔ, ni etsaraa nɔ nakai.

Ekolɛ aye ohe fɛo, ajɛ bo, loo awo ohe gbeyei pɛŋ akɛni esoro bo yɛ gbɛ ko nɔ lɛ hewɔ. Shi nibii ni mɛi feɔ kɛtsɔɔ akɛ amɛhe miitsɛ̃ mɛi lɛ yaa shɔŋŋ fe enɛɛmɛi. Bei pii lɛ, amɛfeɔ mɛi lɛ yiwalɛ nii, amɛtoɔ amɛ kabonaa, amɛgbeɔ amɛ, loo amɛkaa akɛ amɛbaabule nakai mɛi lɛ ashishi kwraa.

Magazin nɛɛ baahã sanebimɔi ni nyiɛ sɛɛ nɛɛ hetoo, ni ebaatsɔɔ gbɛ ni abaatsɔ nɔ afo hetsɛ̃ sɛɛ kwraa:

• Mɛni hewɔ sɛɛkpee nɛɛ mɛi ahe tsɛ̃ɔ mɛi waa lɛ?

• Te wɔɔfee tɛŋŋ wɔye hetsɛ̃ nɔ lɛ?

• Ani be ko baashɛ ni mɔ ko he tsɛ̃ŋ mɔ ko dɔŋŋ?