Aashiɛ Nyɔŋmɔ Maŋtsɛyeli lɛ he sane kpakpa lɛ yɛ shikpɔŋ lɛ nɔ fɛɛ, tamɔ bɔ ni Yesu gba lɛ pɛpɛɛpɛ. (Mateo 24:14) Biblia mli wolo ni ji Daniel lɛ hãa wɔleɔ akɛ, Nyɔŋmɔ ji mɔ ni to Maŋtsɛyeli loo nɔyeli nɛɛ shishi. Daniel yitso 2 lɛ hãa wɔleɔ gbalɛ ko ni kɔɔ adesai anɔyelii ni yɔɔ hewalɛ ni tsara nɔ kɛba, kɛjɛ blema Babilon nɔ aahu kɛbashi wɔgbii nɛɛ amli lɛ he. Kuku 44 lɛ gba nɔ ni baaba wɔsɛɛ. Jɛmɛ kɛɔ akɛ:

“Nyɔŋmɔ ni yɔɔ ŋwɛi lɛ baato maŋtsɛyeli ko ni anyɛŋ hiɛ akpãtã lɛ shishi. Ni ashiŋ maŋtsɛyeli nɛɛ ahãŋ maŋ ko maŋ ko. Ebaajwara maŋtsɛyelii nɛɛ fɛɛ ni ebaakpãtã amɛhiɛ, ni lɛ pɛ ebaadamɔ shi kɛya naanɔ.”

Gbalɛ nɛɛ kɛ Biblia mli gbalɛi krokomɛi tsɔɔ wɔ akɛ, Nyɔŋmɔ Maŋtsɛyeli lɛ baakpãtã adesai anɔyelii fɛɛ ahiɛ, ni ebaahã adesai atoiiaŋ ajɔ amɛ, ni nɔ fɛɛ nɔ baaya lɛ jogbaŋŋ ahã amɛ yɛ shikpɔŋ lɛ nɔ. Te shihilɛ baafee tɛŋŋ yɛ Maŋtsɛyeli lɛ shishi? Naa shiwoi komɛi ni nɔ bɛ ni etsɛŋ kwraa amɛbaaba mli.

• AWUŊ TA DƆŊŊ

  Lala 46:9: “[Nyɔŋmɔ baafo] tai asɛɛ yɛ shikpɔŋ lɛ nɔ fɛɛ. Ekuɔ gãi mli ni efolɔɔ akpɔlɔ mli; ekɛ la shãa ta shwiilii lɛ.”

  Kɛ́ akɛ shika kɛ hesai fɛɛ ni akɛfeɔ tawuu nibii kɛgbeɔ gbɔmɛi lɛ fee nibii krokomɛi ni adesai baaná he sɛɛ lɛ, kulɛ je lɛŋ shihilɛ baaŋɔɔ waa, aloo jeee nakai? Nakai ebaaba lɛ yɛ Nyɔŋmɔ Maŋtsɛyeli lɛ shishi.

• HELA MƆŊ MƆ KO DƆŊŊ

  Yesaia 33:24: “Mɛi ni yɔɔ [jɛmɛ] lɛ ateŋ mɔ ko ekɛŋ akɛ: ‘Mibɛ hewalɛ.’”

  Etsɛŋ kwraa, tsui hela, kansa, atridii, loo hela kroko ko gbaŋ adesai anaa dɔŋŋ. Helatsamɔhei kɛ tsofai hu ahe ebahiaŋ dɔŋŋ. Mɛi ni baahi shikpɔŋ lɛ nɔ wɔsɛɛ lɛ baaná gbɔmɔtsoŋ hewalɛ kpakpa.

• NIYENII BAABU

  Lala 72:16: “Shikpɔŋ lɛ nɔ baayi kɛ ŋmaa; ebaafa babaoo kɛteke nɔ yɛ gɔji lɛ ayiteŋ.”

  Shikpɔŋ lɛ baaba niyenii pii, ni mɔ fɛɛ mɔ baaná eko eye. Hɔmɔ yeŋ mɔ ko dɔŋŋ, ni hela mɔŋ mɔ ko yɛ niyenii kpakpa ni enáaa eye lɛ hewɔ.

• PIŊMƆ, AWERƐHOYELI, KƐ GBELE EHIŊ SHI DƆŊŊ

  Kpojiemɔ 21:4: ‘Nyɔŋmɔ baatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko woŋ yara ko hu dɔŋŋ, ni mɔ ko hu piŋŋ dɔŋŋ. Tsutsu nibii lɛ eho etee.’

   Enɛ tsɔɔ akɛ, adesai baaye emuu ni amɛbaahi shi kɛya naanɔ yɛ paradeiso mli yɛ shikpɔŋ lɛ nɔ! Enɛ ji shi ni Yehowa Nyɔŋmɔ, wɔ-Bɔlɔ ni yɔɔ suɔmɔ lɛ ewo.

Ani onuɔ he akɛ shiwoi nɛɛ nyɛŋ aba mli? Eyɛ mli akɛ mɛi babaoo baakpɛlɛ nɔ akɛ shiwoi ni awie he yɛ Biblia lɛ mli lɛ baahã shihilɛ aŋɔɔ waa moŋ, shi yɛ yiŋtoi komɛi ahewɔ lɛ, ewa kɛhã mɛi pii akɛ amɛbaahe amɛye akɛ adesai baanyɛ ahi shi kɛya naanɔ. Enɛ bɛ naakpɛɛ, ejaakɛ adesa ko kwraa ehiko shihilɛ ni tamɔ nakai mli pɛŋ ni ebaagba wɔ.

Esha kɛ gbele eye adesai nyɔŋ, ni ehã amɛna nɔ, amɛpiŋ, ni amɛkɛ haomɔi pii ekpe afii babaoo. Enɛ hewɔ lɛ, mɛi pii enaaa naagba ko yɛ shihilɛ ni wɔyɔɔ mli amrɔ nɛɛ he. Shi jeee nakai kwraa Yehowa Nyɔŋmɔ, ni ji wɔ-Bɔlɔ lɛ, to ehã adesai.

Bɔ ni afee ni Nyɔŋmɔ ahã wɔna akɛ nibii fɛɛ ni ewo he shi lɛ baaba mli lɛ, ewie kɛ nɔmimaa akɛ, wiemɔi ni je enaa lɛ ‘ekuŋ esɛɛ kɛbaŋ eŋɔɔ efolo, shi ebaatsu nɔ fɛɛ nɔ ni eyɔɔ he miishɛɛ lɛ he nii, ni ebaagbe nɔ fɛɛ nɔ ni etsu lɛ akɛ eyafee lɛ naa pɛpɛɛpɛ.’​—Yesaia 55:11.

Biblia lɛ kɛɛ Yehowa ji Nyɔŋmɔ ni “nyɛŋ emale.” (Tito 1:2) Akɛni ewo shi akɛ wɔsɛɛ lɛ wɔbaaná nibii kpakpai nɛɛ fɛɛ hewɔ lɛ, nilee yɛ mli akɛ wɔbaabi saji ni nyiɛ sɛɛ nɛɛ: Ani adesai baanyɛ ahi shi kɛya naanɔ yɛ shikpɔŋ lɛ nɔ, yɛ Paradeiso ni awo he shi lɛ mli? Mɛni esa akɛ wɔfee koni wɔnyɛ wɔhi jɛmɛ? Obaaná sanebimɔi nɛɛ ahetoo yɛ baafai ni nyiɛ sɛɛ lɛ amli.