GBƆMƐI

Nɔ ni Biblia lɛ kɛɔ: Nyɔŋmɔ “ebɔɔɔ [shikpɔŋ lɛ] efolo, shi moŋ eshɔ̃ ni ahi nɔ.”​—YESAIA 45:18.

SHIKPƆŊ LƐ

Nɔ ni Biblia lɛ kɛɔ: “Yinɔ hoɔ eyaa, ni yinɔ baa, shi shikpɔŋ lɛ yɛ kɛmiiya naanɔ.”​—JAJELƆ 1:4.

NƆ NI ETSƆƆ: Nɔ ni Biblia lɛ ewie lɛ tsɔɔ akɛ, akpãtãŋ shikpɔŋ lɛ hiɛ kɔkɔɔkɔ, ni gbɔmɛi baahi nɔ be fɛɛ be. Hewɔ lɛ, kɛ́ akɛɛ je lɛ baaba naagbee lɛ, te atsɔɔ tɛŋŋ?

SUSUMƆ ENƐ HE OKWƐ: Biblia lɛ kɛ je nɛɛ naagbee ni etsɛŋ ebaaba lɛ toɔ nɔ ni ba yɛ Noa gbii lɛ amli lɛ he. Nakai beiaŋ lɛ, shikpɔŋ lɛ nɔ “eyi obɔ kɛ yiwalɛ.” (1 Mose 6:13) Shi no mli lɛ, jalɔ ji Noa. No hewɔ lɛ, Nyɔŋmɔ here Noa kɛ eweku lɛ yiwala, shi ekɛ nu afua kpãtã mɛi fɔji lɛ ahiɛ. Biblia lɛ wie nɔ ni ba yɛ blema nɛɛ he akɛ: “Akɛ nu afua kpãtã jeŋ ni yɔɔ nakai beiaŋ lɛ hiɛ.” (2 Petro 3:6) No kɛ nakai je lɛ ba naagbee. Shi mɛni hiɛ akpãtã lɛ? Jeee shikpɔŋ lɛ, shi moŋ mɛi fɔji ni yɔɔ nɔ lɛ. Hewɔ lɛ, kɛ́ Biblia lɛ miiwie je lɛ naagbee lɛ he lɛ, jeee shikpɔŋ lɛ diɛŋtsɛ hiɛ ni abaakpãtã he ewieɔ lɛ. Moŋ lɛ, eewie mɛi fɔji ni yɔɔ shikpɔŋ lɛ nɔ, kɛ amɛgbɛjianɔtoi lɛ naagbee lɛ he.

NAAGBAI KƐ EFƆŊFEEMƆ

Nɔ ni Biblia lɛ kɛɔ: “Eshwɛ be fioo kɛkɛ, ni onaŋ mɛi fɔji lɛ dɔŋŋ; obaayakwɛ he ni amɛyɔɔ lɛ, shi onaŋ amɛ yɛ jɛmɛ. Shi mɛi ni he jɔ lɛ, shikpɔŋ lɛ baatsɔ amɛnɔ, ni amɛmii baashɛ amɛhe waa yɛ toiŋjɔlɛ babaoo mli.”​—LALA 37:10, 11.

NƆ NI ETSƆƆ: Nu Afua lɛ ni ba yɛ Noa beiaŋ lɛ kpãtã mɛi fɔji lɛ ahiɛ, shi no hãaa efɔŋfeemɔ sɛɛ afo. Nu Afua lɛ sɛɛ lɛ, mɛi komɛi bɔi efɔŋfeemɔ, ni no hã shihilɛ bawa kɛhã mɔ fɛɛ mɔ. Shi etsɛŋ, Nyɔŋmɔ baafo efɔŋfeemɔ sɛɛ. Lalatsɛ lɛ wie akɛ: “Onaŋ mɛi fɔji lɛ dɔŋŋ.” Nyɔŋmɔ baatsɔ e-Maŋtsɛyeli lɛ nɔ efo efɔŋfeemɔ sɛɛ. E-Maŋtsɛyeli lɛ ji nɔyeli ko ni baajɛ ŋwɛi eye shikpɔŋ muu lɛ fɛɛ nɔ, ni ebaaye adesai ni boɔ Nyɔŋmɔ toi lɛ anɔ.

SUSUMƆ ENƐ HE OKWƐ: Ani nɔyelɔi ni yɔɔ shikpɔŋ lɛ nɔ ŋmɛnɛ lɛ baasumɔ ni Nyɔŋmɔ Maŋtsɛyeli lɛ abaye shikpɔŋ lɛ nɔ? Biblia lɛ hãa wɔnaa akɛ, amɛsumɔŋ. Amɛbuulu baagbe amɛ, ni amɛbaate shi awo Nyɔŋmɔ Maŋtsɛyeli lɛ. (Lala 2:2) Mɛni baajɛ mli aba? Nyɔŋmɔ Maŋtsɛyeli lɛ baaye adesai anɔyelii fɛɛ najiaŋ, ni “lɛ pɛ ebaadamɔ shi kɛya naanɔ.” (Daniel 2:44) Shi mɛni hewɔ ehe baahia ni afo adesai anɔyeli sɛɛ?

Nɔ ni Biblia lɛ kɛɔ: “Bɔ ni gbɔmɔ ni nyiɛ lɛ baakudɔ lɛ diɛŋtsɛ enajifaamɔi ehã po lɛ, ebɛ edɛŋ.”​—YEREMIA 10:23.

NƆ NI ETSƆƆ: Abɔɔɔ adesai ni amɛ diɛŋtsɛ amɛye amɛhe nɔ. Amɛnyɛɛɛ amɛye nɔ jogbaŋŋ, ni wɔnaagbai lɛ hu, amɛnyɛɛɛ amɛtsu he nii kɛmɔ shi.

SUSUMƆ ENƐ HE OKWƐ: Wolo ni ji, Britannica Academic lɛ tsɔɔ mli akɛ, etamɔ nɔ ni adesai anɔyelii nyɛɛɛ “atsu naagbai ni wɔkɛkpeɔ yɛ jeŋ fɛɛ, ni ji ohia, hɔmɔ, hela, adebɔɔ naa oshãrai, kɛ ta loo yiwalɛ nifeemɔi krokomɛi lɛ ahe nii.” Ni ekɛshi sɛɛ akɛ: “Mɛi komɛi. . . susuɔ akɛ, ja aná nɔyeli ko ni baaye jeŋ muu lɛ fɛɛ nɔ dani abaanyɛ atsu naagbai nɛɛ ahe nii.” Shi kɛ́ adesai anɔyelii lɛ fɛɛ fee ekome po lɛ, nɔyelɔi ni yeee emuu, ni nyɛŋ atsu naagbai ni wɔwieɔ he lɛ ahe nii lɛ nɔŋŋ ni baaye je lɛ nɔ. Nyɔŋmɔ Maŋtsɛyeli lɛ pɛ ji nɔyeli ni baanyɛ atsu je lɛŋ naagbai lɛ fɛɛ ahe nii kwrakwra.

Hewɔ lɛ, yɛ nɔ ni Biblia lɛ tsɔɔ lɛ naa lɛ, esaaa akɛ gbɔmɛi kpakpai sheɔ je lɛ, ni ji mɛi fɔji kɛ amɛgbɛjianɔtoi lɛ, naagbee lɛ gbeyei. Moŋ lɛ, eji nɔ ko ni esa akɛ wɔkpa gbɛ, ejaakɛ Nyɔŋmɔ jeŋ hee ni nɔ bɛ lɛ baaba ebaye jeŋ momo ni efite nɛɛ najiaŋ!

Mɛɛ be enɛ fɛɛ baaba mli? Obaana hetoo ni Biblia lɛ kɛhãa lɛ yɛ sane ni nyiɛ sɛɛ mli.