Mida yɛ Puerto Limón, ni ji ŋshɔnaa maŋ ko ni yɔɔ Costa Rica bokãgbɛ lɛ mli. Afɔ wɔyi kpaanyɔ, ni mi ji mɔ kpawo nɔ. Mipapa gbo be ni miye afii kpaanyɔ. No sɛɛ lɛ, mimami pɛ ni kwɛ wɔ fɛɛ.

Bezbɔl he mishihilɛ fɛɛ. Mibɔi tswaa kɛjɛ migbekɛbiiashi tɔ̃ɔ. Be ni miye aaafee afii 17 kɛyaa lɛ, mikɛ mihe yadɔmɔ gbekɛbii abezbɔl kuu ko. Be ni miná afii 20 kɛyaa lɛ, nuu ko ni taoɔ mɛi kɛhã bezbɔl kui lɛ kɛɛ mi ni miyatswa mihã kuu ko yɛ Nicaragua. Shi akɛni no mli lɛ mimami bɛ hewalɛ ní miikwɛ lɛ hewɔ lɛ, misumɔɔɔ ni mayahi Nicaragua. No hewɔ lɛ mikɛɛ lɛ akɛ minyɛŋ maya. Sɛɛ mli lɛ, mɔ kroko hu kɛɛ mi ni miyatswa mihã Costa Rica maŋ lɛ bezbɔl kuu lɛ. Oblahii ni ahala amɛ kɛjɛ kui srɔtoi ni tswaa yɛ maŋ lɛ mli lɛ ni yɔɔ kuu nɛɛ mli. Shi enɛ lɛ, mikpɛlɛ nɔ. Mitswa mihã maŋ lɛ kɛjɛ afi 1949 kɛyashi afi 1952, ni miyatswa shii abɔ yɛ Cuba, Mexico, kɛ Nicaragua. No mli lɛ, bezman ji mi, ni mibɔɔ mɔdɛŋ waa; minyɛɔ mitswaa yɛ akaŋshii 17 sɔŋŋ mli ní mitɔ̃ɔɔ shi kome po. Kɛ́ minu ni mɛi ni kwɛɔ bɔɔlu lɛ miibolɔ kɛmiitsɛ migbɛi lɛ, eŋɔɔ minaa kɛkɛ!

Shi nɔ ni dɔɔ mi waa ji akɛ, mikɛ mihe wo jeŋba sha mli hu. Eyɛ mli akɛ no mli lɛ miyɛ jɔle kome pɛ moŋ, shi mikɛ yei krokomɛi hɔlɔɔ shi. Minuɔ dãa hu waa. Gbi ko lɛ, mitɔ aahu akɛ, be ni je tsɛre ni mite shi lɛ, mikaiii bɔ ni fee ni mibashɛ shĩa! Mishwɛɔ asɔ waa, ni mitseɔ loto hu.

Shihilɛ nɛɛ mli miyɔɔ, ni mimami batsɔ Yehowa Odasefonyo. Ebɔ mɔdɛŋ akɛ ekɛ mi baagba ehemɔkɛyeli lɛ he sane, shi shishijee mli lɛ, eyayeee omanye, ejaakɛ no mli lɛ bezbɔl lɛ ehe mitsui fɛɛ. Kɛ́ miifee trenii ni niyeli be shɛ po lɛ, minuuu hɔmɔ he! Akaŋ ni mayashi lɛ heɔ mijwɛŋmɔ fɛɛ. Misumɔɔ bezbɔl fe nɔ fɛɛ nɔ!

Shi be ni miye afii 29 lɛ, mipila waa be ni miimɔ bɔɔlu yɛ akaŋshii ko mli lɛ. Be ni miná hewalɛ lɛ, mikpa bezbɔl lɛ tswaa. Shi mitsɔse gbekɛbii abezbɔltswaa kuu ko ni bɛŋkɛ mishĩa lɛ koni amɛhe asa kɛtswaa.

Yɛ afi 1957 lɛ, afɔ̃ mi nine kɛhã kpee ko ni Yehowa Odasefoi lɛ baafee yɛ stediɔm ko ni mitswa bezbɔl yɛ jɛmɛ dã lɛ, ni mikpɛlɛ akɛ maya. Be ni mitee ni mita mɛi lɛ ateŋ lɛ, mina srɔto agbo yɛ Odasefoi lɛ kɛ mɛi ni bakwɛɔ bɔɔlu yɛ jɛmɛ lɛ ateŋ, ejaakɛ Odasefoi lɛ jieɔ bulɛ kpo waa, shi mɛi ni bakwɛɔ bɔɔlu lɛ feɔ basabasa. Nɔ ni mina yɛ kpee lɛ shishi lɛ hã mikɛ Odasefoi lɛ bɔi Biblia lɛ kasemɔ, ni mibɔi amɛsafoŋ kpeei lɛ yaa.

Minya Biblia mli tsɔɔmɔi ni mikase lɛ babao he waa. Akɛ nɔkwɛmɔnɔ lɛ, Yesu gba akɛ yɛ naagbee gbii lɛ amli lɛ, ekaselɔi lɛ baashiɛ Nyɔŋmɔ Maŋtsɛyeli lɛ he sanekpakpa lɛ yɛ jeŋ fɛɛ. (Mateo 24:14) Mikase hu akɛ, anɔkwa Kristofoi eshiɛɛɛ yɛ shika hewɔ. Yesu kɛɛ akɛ: “Yaka nyɛná, yaka nyɛŋɔhãa.”—Mateo 10:8.

Be ni mikaseɔ Biblia lɛ, mikɛ nɔ ni ekɛɔ lɛ to nɔ ni minaa yɛ Yehowa Odasefoi lɛ ahe lɛ he. Mihiɛ sɔ bɔ ni amɛbɔɔ mɔdɛŋ kɛshiɛɔ Nyɔŋmɔ Maŋtsɛyeli lɛ he sane kpakpa lɛ waa. Miyɔse akɛ, amɛjieɔ nɔhãmɔ mumɔ ni Yesu fã Kristofoi akɛ amɛjie lɛ kpo lɛ kpo. No hewɔ lɛ, be ni mikane Marko 10:21, ní mina ninefɔɔ ni Yesu kɛhã akɛ, ‘ba ni obatsɔ misɛɛnyiɛlɔ’ lɛ, minu he akɛ esa akɛ matsɔ Odasefonyo.

Shi ehe mi be dani minyɛ mitsu he nii. Akɛ nɔkwɛmɔnɔ lɛ, daa otsi lɛ, mitseɔ lotonɔmba ko ni misumɔɔ waa, ni mifee nakai afii abɔ. Shi mikase yɛ Biblia lɛ mli akɛ, Nyɔŋmɔ nyɛɔ mɛi ni jáa “shade wɔŋ,” kɛ amimyelɔi fɛɛ. (Yesaia 65:11; Kolosebii 3:5) No hewɔ lɛ, mikpɛ mli akɛ makpa asɔshwɛmɔ. Be ni mikpa lɛ sɛɛ klɛŋklɛŋ Hɔgbaa lɛ, lotonɔmba ni misumɔɔ tsemɔ waa lɛ gbee shi! Mɛi ŋmɔ mi waa, ejaakɛ mitseee loto nakai otsi lɛ, ni amɛnyɛ minɔ ni mitse ekoŋŋ, shi mitseee. Mikɛ asɔshwɛmɔ fo tako mli kwraa.

Mikɛ “subaŋ hee” ni miwo lɛ he kaa kroko kpe gbi tuuntu ni abaptisi mi yɛ Yehowa Odasefoi akpee ko shishi lɛ. (Efesobii 4:24) Nakai gbɛkɛ lɛ, be ni mitee hotɛl ni miyɔɔ lɛ, mina mitsutsu jɔle lɛ damɔ shinaa lɛ sɛɛ eemɛ mi. Ekɛɛ mi akɛ, “Sammy, hã wɔshwɛ wɔhiɛ fioo!” Shi oya nɔŋŋ ni mikɛɛ lɛ akɛ, “Dabi!” Mikai lɛ akɛ, amrɔ nɛɛ miihi shi yɛ Biblia mli shishitoo mlai anaa. (1 Korintobii 6:18) Ni ebo waa akɛ, “Okɛɛ mɛni.” Kɛkɛ ni ekɛɛ nɔ ni Biblia lɛ wieɔ yɛ bɔlɛnamɔ jeŋba sha he lɛ he ehiaaa, hewɔ lɛ wɔtsa wɔjɔlefeemɔ lɛ nɔ. Shi mishi lɛ kɛbote mitsu lɛ mli, kɛkɛ ni miŋmɛ shinaa lɛ mli. Ŋmɛnɛ lɛ, manyɛ mikɛ miishɛɛ awie akɛ, kɛjɛ be ni mibatsɔ Odasefonyo yɛ afi 1958 nɛɛ, minyɛ mihi shi yɛ tsakemɔi ni mifee lɛ anaa.

Minuɔ he akɛ manyɛ maŋma wolo muu yɛ jɔɔmɔi ni miná kɛjɛ Biblia mli gbɛtsɔɔmɔi anaa ni mihi shi yɛ lɛ hewɔ! Jɔɔmɔi lɛ ekomɛi ji akɛ, amrɔ nɛɛ miyɛ nanemɛi kpakpai babaoo, yiŋtoo yɛ mishihilɛ sɛɛ, ni miyɛ miishɛɛ waa.

Misumɔɔ bezbɔl lolo, shi mifee tsakemɔi yɛ mijeŋba mli. Be ni mitswaa bezbɔl lɛ, mihé gbɛ́i ni miná shika, shi nibii nɛɛ asɛɛ etsɛɛɛ. Nɔ ni tamɔɔɔ nakai lɛ, wekukpaa ni yɔɔ mi kɛ Nyɔŋmɔ kɛ nyɛmimɛi ni yɔɔ jeŋ fɛɛ ni mifata he lɛ ateŋ lɛ baahi shi kɛya naanɔ. Biblia lɛ kɛɔ akɛ: “Je lɛ kɛ nɔ fɛɛ nɔ ni yɔɔ mli ni mɛi shweɔ lɛ miiho kɛmiiya, shi mɔ ni feɔ Nyɔŋmɔ suɔmɔnaa nii lɛ baahi shi kɛya naanɔ.” (1 Yohane 2:17) Amrɔ nɛɛ misumɔɔ Yehowa Nyɔŋmɔ kɛ ewebii lɛ fe nɔ fɛɛ nɔ!